1 ⴰ ⴽⴻⵏⵏⵉⵡ, ⴰⵡⵎⴰⵜⴻⵏ ⵏⵏⴻⵖ, ⵣⵉ ⵙⵙⴰ ⴷ ⵜⵙⴰⵡⴻⵏⵜ ⴽⵙⵉⵎ ⴰⵏⴻⵖ ⵍⵎⴻⵄⵔⵓⴼ ⵃⵉⵎⴰ ⴰⵡⴰⵍ ⵏ ⵙⵉⴷⵉⵜⵏⴻⵖ ⴰⴷ ⴷⴷ-ⵉⴼⴼⴻⵖ ⴷⴻⵖⵢⴰ ⵓ ⴰⴷ ⵉⵜⵜⵡⴰⵙⵙⵄⵓⴵ, ⴰⵎ ⵎⴰⵎⵎⴻⵛ ⵜⵓⵖⴰ ⵉⵎⵙⴰⵔ ⵊⴰⵔ ⴰⵡⴻⵎ ⵄⴰⵡⴻⴷ, ◘3:1 ⵎⵜ. 9:38; ⴰⴼⴰ. 6:19; ⴽⵓⵍ. 4:3. 2 ⵃⵉⵎⴰ ⴰⴷ ⵏⴻⵜⵜⵡⴰⴼⴻⴽⴽ ⵣⴻⴳ ⵉⵡⴷⴰⵏ ⵡⴰⵔ ⵉⵃⵍⵉⵏ, ⵉⵄⴻⴼⴼⴰⵏⴻⵏ, ⵎⵉⵏⵣⵉ ⵍ’ⵉⵎⴰⵏ ⵡⴰⵔ ⵉⴵⵉ ⵖⴰⵔ ⵎⴰⵔⵔⴰ. ◘3:2 ⵢⵃ. 6:44; ⵔⵓⵎ. 15:31.

3 ⵎⴰⵛⴰ ⵙⵉⴷⵉ ⴷ ⴰⵎⵜⵉⵇⵇⵉ. ⵏⴻⵜⵜⴰ ⴰⴷ ⵅⴰⵡⴻⵎ ⵉⵃⴹⴰ ⵓⵛⴰ ⴰⴷ ⴽⴻⵏⵏⵉⵡ ⵉⴼⴻⴽⴽ ⵣⴻⴳ ⵓⵎⵄⴻⴼⴼⴰⵏ. ◘3:3 ⵢⵃ. 17:15; 1 ⵜⵙ. 5:24. 4 ⵎⴰⵛⴰ ⵏⴻⵛⵛⵉⵏ ⵏⴻⵜⵜⵉⵇⵇ ⴷⴰⵢⵡⴻⵎ ⴷⵉ ⵙⵉⴷⵉⵜⵏⴻⵖ, ⴱⴻⵍⵍⵉ ⵎⵉⵏ ⵅⴻⴼ ⵏⵡⴻⵚⵚⴰ ⴽⴻⵏⵏⵉⵡ, ⴰⵇⴰ ⵜᵉⵜⵜⴻⴳⴳⴻⵎ ⵜ ⵓⵛⴰ ⴰⴷ ⵜⴻⵇⵇⵉⵎⴻⵎ ⵜᵉⵜⵜⴻⴳⴳⴻⵎ ⵜ. 5 ⴰⴷ ⵉⵏⴷⴻⵀ ⵙⵉⴷⵉⵜⵏⴻⵖ ⵓⵍⴰⵡⴻⵏ ⵏⵡⴻⵎ ⵖⴰⵔ ⵜⴰⵢⵔⵉ ⵏ ⴰⵔⴻⴱⴱⵉ ⵓ ⵖⴰⵔ ⵓⴱⴰⵔⵔⴻⵃ ⵙ ⵍⴻⵅⴱⴰⵔ ⴰⵚⴻⴱⵃⴰⵏ ⵏ ⵍⵎⴰⵙⵉⵃ.

6 ⵏⵡⴻⵚⵚⴰ ⴽⴻⵏⵏⵉⵡ, ⴰ ⴰⵢⵜⵎⴰ, ⴷⴻⴳ ⵢⵉⵙⴻⵎ ⵏ ⵙⵉⴷⵉⵜⵏⴻⵖ ⵢⴰⵙⵓⵄ ⵍⵎⴰⵙⵉⵃ, ⴰⴷ ⵜⵃⴻⵢⵢⴷⴻⵎ ⵉ ⴽⵓⵍ ⵓⵎⴰ ⵉ ⵉⴳⴳⵓⵔⴻⵏ ⴷⵉ ⵎⵉⵏ ⵡⴰⵔ ⵉⵃⵍⵉⵏ, ⵡⴰⵔ ⵉⴵⵉ ⵄⵍⴰⵃⵙⴰⴱ ⵜⵉⵡⴻⵚⵚⴰ ⵉ ⵣⵣⴰⵢⵏⴻⵖ ⵉⴽⵙⵉ. ◘3:6 1 ⴽⵓⵔ. 5:11; 2 ⵜⵙ. 2:15; 3:14; ⵜⵉⵜ. 3:10. 7 ⴰⵇⴰ ⴽⴻⵏⵏⵉⵡ ⵜⴻⵙⵙⵏⴻⵎ ⵎⴰⵎⵎⴻⵛ ⵉⵛⵓⵡⵡⴰⵔ ⴰⴷ ⴰⵏⴻⵖ ⵜⴻⴹⴼⴰⵔⴻⵎ, ⵎⵉⵏⵣⵉ ⵏⴻⵛⵛⵉⵏ ⵡⴰⵔ ⵏⵓⵢⵓⵔ ⵊⴰⵔ ⴰⵡⴻⵎ ⴷⵉ ⵎⵉⵏ ⵡⴰⵔ ⵉⵃⵍⵉⵏ. ◘3:7 1 ⴽⵓⵔ. 11:1; 1 ⵜⵙ. 1:6, 7; 2 ⵜⵙ. 2:10. 8 ⵡⴰⵔ ⵏⴻⵛⵛⵉ ⴰⵖⵔⵓⵎ ⴰⴽ-ⴷ ⵃⴻⴷ ⴱⴰⵟⴻⵍ, ⵎⴰⵛⴰ ⵙ ⵍⵅⴻⴷⵎⴻⵜ ⴷ ⵜⴰⵎⴰⵔⴰ ⵜⵓⵖⴰ ⴰⵏⴻⵖ ⵏⵅⴻⴷⴷⴻⵎ ⴵⵉⵍⴻⵜ ⴷ ⵡⴰⵙⵙ, ⵃⵉⵎⴰ ⵡⴰⵔ ⴷⴷ-ⵏⴻⵜⵜⵉⵙ ⵏⴻⴷⵇⴻⵍ ⵅ ⵛⴰ ⵏ ⵉⵊⵊⴻⵏ ⵣⵣⴰⵢⵡⴻⵎ. ◘3:8 ⵍⴻⵅ. 18:3; 20:34; 1 ⴽⵓⵔ. 4:12; 2 ⴽⵓⵔ. 11:9; 12:13; 1 ⵜⵙ. 2:9. 9 ⵡⴰⵔ ⵉⴵⵉ ⵎⵉⵏⵣⵉ ⵡⴰⵔ ⵖⴰⵔⵏⴻⵖ ⵜⵜⴻⵙⵔⵉⵃ ⵉ ⵎⴰⵏ ⴰⵢⴰ, ⵎⴰⵛⴰ ⵃⵉⵎⴰ ⴰⴷ ⵏⴻⴳⴳ ⵉⵅⴻⴼ ⵏⵏⴻⵖ ⴷ ⵍⵎⵉⵜⴰⵍ ⵉ ⵖⴰ ⵜⴻⴹⴼⴰⵔⴻⵎ. ◘3:9 1 ⴽⵓⵔ. 4:16; 9:3, 6; 11:1; ⴼⵉⵍ. 3:17; 1 ⵜⵙ. 1:6; 2:9. 10 ⵎⵉⵏⵣⵉ ⵍⴰⵎⵉ ⵜⵓⵖⴰ ⴰⵏⴻⵖ ⵏⴻⴵⴰ ⴰⴽⵉⴷⵡⴻⵎ, ⴰⵇⴰ ⵏⵡⴻⵚⵚⴰ ⴰⵎⵎⵓ: ⵎⴰⵍⴰ ⵃⴻⴷ ⵡⴰⵔ ⵉⵅⵙ ⴰⴷ ⵉⵅⴷⴻⵎ, ⵡⴰⵔ ⵉⵜⵜⴻⵜⵜ ⵄⴰⵡⴻⴷ. 11 ⵎⵉⵏⵣⵉ ⵏⴻⵙⵍⴰ ⴰⵇⴰ ⴷⵉⵏ ⵛⴰ ⵊⴰⵔ ⴰⵡⴻⵎ ⵉⵏⵏⵉ ⵉⴳⴳⵓⵔⴻⵏ ⴷⵉ ⵎⵉⵏ ⵉⵄⴻⴼⴼⵏⴻⵏ, ⵡⴰⵔ ⵅⴻⴷⴷⵎⴻⵏ ⵇⴰⵄ, ⵎⴰⵛⴰ ⵜⵜⴻⴳⴳⴻⵏ ⵎⵖⵉⵔ ⵎⵉⵏ ⵡⴰⵔ ⵉⵙⴻⴽⴽⵡⵉⵏ. 12 ⴰⵇⴰ ⵏⵓⵎⵓⵔ ⵓ ⵏⵣⵉⵢⵢⴰⵔ ⵉ-ⵜⴻⵏ ⴷⵉ ⵙⵉⴷⵉⵜⵏⴻⵖ ⵢⴰⵙⵓⵄ ⵍⵎⴰⵙⵉⵃ ⵃⵉⵎⴰ ⴰⴷ ⵅⴻⴷⵎⴻⵏ ⴷⵉ ⵍⵀⵓⴷⵏⴻⵜ, ⴰⴷ ⵛⵛⴻⵏ ⴰⵖⵔⵓⵎ ⵏⵙⴻⵏ. ◘3:12 ⴰⴼⴰ. 4:28; 1 ⵜⵙ. 4:11.

13 ⵎⴰⵛⴰ ⴽⴻⵏⵏⵉⵡ, ⴰ ⴰⵢⵜⵎⴰ, ⵡⴰⵔ ⵜⵜⵓⵃⵉⵍⴻⵎ ⵛⴰ ⵎⴰⵃⴻⵏⴷ ⴰⴷ ⵜⴻⴳⴳⴻⵎ ⵎⵉⵏ ⵉⵛⵏⴰⵏ. ◘3:13 ⴳⴰⵍ. 6:9. 14 ⵎⴰⵛⴰ ⵎⴰⵍⴰ ⵛⴰ ⵏ ⵉⵊⵊⴻⵏ ⵡⴰⵔ ⵉⵟⴰⵄ ⵉ ⵡⴰⵡⴰⵍⴻⵏ ⵉ ⵢⵓⵔⴰⵏ ⴷⵉ ⵜⴻⴱⵔⴰⵜ-ⴰ, ⴱⴹⴰⵎ ⵅⴰⵙ, ⵡⴰⵔ ⵜⵜⵅⴻⴵⴰⴹⴻⵎ ⵛⴰ ⴰⴽⵉⴷⴻⵙ, ⵃⵉⵎⴰ ⴰⴷ ⵉⴷⵡⴻⵍ ⵉⵜⵜⵙⴻⴹⵃⴰ, ◘3:14 ⵎⵜ. 18:17; 1 ⴽⵓⵔ. 5:9; 2 ⵜⵙ. 3:6. 15 ⵎⴰⵛⴰ ⵡⴰⵔ ⵜ ⵜᵉⵜⵜⵃⴻⵙⵙⴱⴻⵎ ⴷ ⵍⴻⵄⴷⵓ ⵎⴰⵛⴰ ⵏⴻⴷⵀⴻⵎ ⵜ ⵖⴰⵔ ⵡⴻⴱⵔⵉⴷ ⴰⵎ ⵢⵉⵊⵊ ⵏ ⵜⴰⵡⵎⴰⵜ.

16 ⵎⴰⵛⴰ ⵙⵉⴷⵉ ⵏ ⵍⴻⵀⵏⴰ ⴰⴷ ⴰⵡⴻⵎ ⵉⵡⵛ ⵍⴻⵀⵏⴰ ⵉ ⵍⴻⴱⴷⴰ ⵅ ⵎⴰⵔⵔⴰ ⵉⵖⴻⵣⴷⵉⵙⴻⵏ. ⵙⵉⴷⵉⵜⵏⴻⵖ ⴰⴷ ⵢⵉⵍⵉ ⴰⴽⵉⴷⵡⴻⵎ ⵎⴰⵔⵔⴰ. ◘3:16 ⵔⵓⵎ. 15:33; 16:20; 1 ⴽⵓⵔ. 14:33; 2 ⴽⵓⵔ. 13:11; ⴼⵉⵍ. 4:9; 1 ⵜⵙ. 5:23.

17 ⵉⵊⵊ ⵏ ⵓⵙⴻⴵⴻⵎ ⵙ ⵓⴼⵓⵙ ⵉⵏⵓ. ⵏⴻⵛⵛ, ⴱⵓⵍⵓⵙ, ⵓⵔⵉⵖ ⴰⵢⴰ. ⵜⴰ ⴷ ⵍⴻⵄⵍⴰⵎⴻⵜ ⴷⵉ ⵎⴰⵔⵔⴰ ⵜⵉⴱⵔⴰⵜⵉⵏ ⵉⵏⵓ. ⴰⵎⵎⵓ ⵉ ⴷ ⵓⵔⵉⵖ. ◘3:17 1 ⴽⵓⵔ. 16:21; ⴽⵓⵍ. 4:18.

18 ⴰⵔⴹⴰ ⵏ ⵙⵉⴷⵉⵜⵏⴻⵖ ⵢⴰⵙⵓⵄ ⵍⵎⴰⵙⵉⵃ ⴰⴷ ⴰⴽⵉⴷⵡⴻⵎ ⵢⵉⵍⵉ ⵎⴰⵔⵔⴰ, ⴰ ⴰⵡⵎⴰⵜⴻⵏ ⵉⵏⵓ. ⴰⵎⵉⵏ.