1 ⵍⵃⴰⵙⵓⵍ, ⵉⵜⵜⵡⴰⵏⵏⴰ ⴱⴻⵍⵍⵉ ⴰⵇⴰ ⴷⵉⵏ ⵊⴰⵔ ⴰⵡⴻⵎ ⴼⴰⵔⵇ-ⵛⵛⵖⴻⵍ, ⵓ ⴰⵏⴻⵛⵜ ⵏ ⴼⴰⵔⵇ-ⵛⵛⵖⴻⵍ ⵏⵏⵉ ⵡⴰⵔ ⵉⴵⵉⵏ ⵇⴰⵄ ⵊⴰⵔ ⵍⴽⵓⴼⴼⴰⵔ, ⴰⵇⴰ ⵉⵊⵊ ⵏ ⵎⵎⵉⵙ ⵖⴰⵔⴻⵙ ⵜⴰⵎⵖⴰⵔⵜ ⵏ ⴱⴰⴱⴰⵙ. ◘5:1 ⵍⴰⵡⵉ 18:8; ⴰⵄⵡⴷ. 27:20. 2 ⴽⴻⵏⵏⵉⵡ ⵜⴻⵙⵙⵓⴼⴼⴰⵎ ⵉⵅⴻⴼ ⵏⵡⴻⵎ, ⵡⴰⵅⵅⴰ ⵉⵜⵜⵅⴻⵚⵚⴰ ⴰⵡⴻⵎ ⴷⵉ ⵜⵉⴷⴻⵜⵜ ⴰⴷ ⵜⵛⴻⴹⵏⴻⵎ, ⵃⵉⵎⴰ ⴰⴷ ⵜⵃⴻⵢⵢⴹⴻⵎ ⵡⴻⵏⵏⵉ ⵉⴳⴳⵉⵏ ⵎⴰⵏ ⴰⵢⴰ ⵣⵉ ⵍⵡⴻⵙⵟ ⵏⵡⴻⵎ. 3 ⵡⴰⵅⵅⴰ ⵏⴻⵛⵛ ⴰⴳⴳⵯⴻⵊⴻⵖ ⵄⵍⴰⵃⵙⴰⴱ ⴰⵔⵔⵉⵎⴻⵜ, ⴰⵇⴰ ⴰⵢⵉ ⵃⴹⴰⵔⴻⵖ ⴷⵉ ⴰⵔⵔⵓⵃ, ⵓⵛⴰ ⴰⵇⴰ ⵃⴻⴽⵎⴻⵖ ⴰⵅⵎⵉ ⵃⴹⴰⵔⴻⵖ ⵅ ⵡⴻⵏⵏⵉ ⵉⴳⴳⵉⵏ ⵎⴰⵏ ⴰⵢⴰ. 4 ⵉⵜⵜⵅⴻⵚⵚⴰ ⴰⴷ ⵜⵎⵓⵏⴻⵎ ⵎⴰⵔⵔⴰ ⴷⴻⴳ ⵢⵉⵙⴻⵎ ⵏ ⵙⵉⴷⵉⵜⵏⴻⵖ ⵢⴰⵙⵓⵄ ⵍⵎⴰⵙⵉⵃ, ⵓ ⵏⴻⵛⵛ ⴰⴽⵉⴷⵡⴻⵎ ⴷⵉ ⴰⵔⵔⵓⵃ, ⵙ ⵊⵊⴻⵀⴷ ⵏ ⵙⵉⴷⵉⵜⵏⴻⵖ ⵢⴰⵙⵓⵄ ⵍⵎⴰⵙⵉⵃ, 5 ⵓⵛⴰ ⴽⴻⵏⵏⵉⵡ ⴰⴷ ⵜ ⵜⵙⴻⵍⵍⵎⴻⵎ ⵉ ⵛⵛⵉⵟⴰⵏ ⵉ ⵜⵅⴻⵙⵙⴰⵔⵜ ⵏ ⴰⵔⵔⵉⵎⴻⵜ ⵏⵏⴻⵙ, ⵃⵉⵎⴰ ⴰⴷ ⵉⴷⴷⴰⵔ ⴷⵉ ⴰⵔⵔⵓⵃ ⴷⴻⴳ ⵡⴰⵙⵙ ⵏ ⵙⵉⴷⵉⵜⵏⴻⵖ ⵢⴰⵙⵓⵄ ⵍⵎⴰⵙⵉⵃ. ◘5:5 1 ⵜⵉⵎ. 1:20.

6 ⵡⴰⵔ ⴷⴷ ⵅⴰⵡⴻⵎ ⵢⵓⵙⵉ ⵓⴼⴻⵢⵢⴻⵛ! ⵎⴰ ⵡⴰⵔ ⵜⴻⵙⵙⵉⵏⴻⵎ ⵛⴰ ⴱⴻⵍⵍⵉ ⵛⵡⴰⵢⵜ ⵏ ⵡⴻⵏⵜⵓⵏ ⵉⵙⵙⵎⴻⵎⵎ ⵎⴰⵔⵔⴰ ⵜⴰⵄⴻⴱⴱⵓⵣⵜ ⵏ ⵡⴰⵔⴻⵛⵜⵉ? ◘5:6 ⴳⴰⵍ. 5:9. 7 ⵙⵉⵣⴻⴷⴳⴻⵎ ⵉⵅⴻⴼ ⵏⵡⴻⵎ ⵅⴻⵏⵏⵉ ⵣⴻⴳ ⵡⴻⵏⵜⵓⵏ ⴰⵇⴷⵉⵎ, ⵃⵉⵎⴰ ⴰⴷ ⵜⵉⵍⵉⵎ ⴷ ⵉⵛⵜ ⵏ ⵍⵄⴻⵊⵏⴻⵜ ⵏ ⵡⴰⵔⴻⵛⵜⵉ ⵏ ⵊⴷⵉⴷ. ⴰⵇⴰ ⴽⴻⵏⵏⵉⵡ ⴷ ⴰⵖⵔⵓⵎ ⴱⵍⴰ ⴰⵏⵜⵓⵏ, ⵎⵉⵏⵣⵉ ⵜⴰⵖⴰⵔⵚⵜ ⵏⵏⴻⵖ ⵏ ⵓⵙⴻⵄⴷⵓ ⴰⵇⴰ ⵜᵉⵜⵜⵡⴰⵖⴰⵔⵚ ⵉ ⵏⴻⵛⵛⵉⵏ, ⴰⵇⴰ ⵏⴻⵜⵜⴰ ⴷ ⵍⵎⴰⵙⵉⵃ. ◘5:7 ⵉⵛⴰ. 53:7; ⵢⵃ. 1:29; 1 ⴽⵓⵔ. 15:3. 8 ⵙ ⵓⵢⴻⵏⵏⵉ ⴻⵊⵊ ⴰⵏⴻⵖ ⴰⴷ ⵏⵄⴻⵢⵢⴻⴷ, ⵡⴰⵔ ⵉⴵⵉ ⵙ ⵡⴻⵏⵜⵓⵏ ⴰⵇⴷⵉⵎ ⵏⵉⵖ ⵙ ⵡⴻⵏⵜⵓⵏ ⵏ ⵜⵓⵄⴻⴼⴼⵏⴰ ⴷ ⵍⵖⴰⵔ, ⵎⴰⵛⴰ ⵙ ⵡⴻⵏⵜⵓⵏ ⵏ ⵍⴻⵚⴼⴰⵢⴻⵜ ⴷ ⵜⵇⴻⴷⴷⴰⵙⵜ. ◘5:8 ⵓⴼ. 12:3, 15; ⴰⵄⵡⴷ. 16:3.

9 ⴰⵇⴰ ⵓⵔⵉⵖ ⴰⵡⴻⵎ-ⴷⴷ ⴷⵉ ⵜⴻⴱⵔⴰⵜ, ⵉⵜⵜⵅⴻⵚⵚⴰ ⵡⴰⵔ ⵜⵜⵄⴰⵛⴰⵔⴻⵎ ⴰⵢⵜ ⵏ ⴼⴰⵔⵇ-ⵛⵛⵖⴻⵍ ◘5:9 ⴰⵄⵡⴷ. 7:2; ⵎⵜ. 18:17; 2 ⴽⵓⵔ. 6:14; ⴰⴼⴰ. 5:11; 2 ⵜⵙ. 3:14. 10 ⵡⴰⵔ ⵙⵙⵉⵡⵍⴻⵖ ⵅ ⴰⵢⵜ ⵏ ⴼⴰⵔⵇ-ⵛⵛⵖⴻⵍ ⵏⵏⵉ ⵉⴵⴰⵏ ⴷⵉ ⴷⴷⵓⵏⴻⵛⵜ-ⴰ, ⵏⵉⵖ ⵅ ⵉⴹⴻⵎⵎⴰⵄⴻⵏ ⵏⵉⵖ ⵅ ⵉⴱⴻⵄⵄⴰⵊ ⵏⵉⵖ ⵅ ⵢⵉⵏⵏⵉ ⵉⵄⴻⴱⴱⴷⴻⵏ ⵍ’ⴰⵚⵏⴰⵎ, ⵎⴰⵍⴰ ⴰⵎⵎⵓ, ⵉⵍⵉ ⴰⴷ ⵜⴻⴼⴼⵖⴻⵎ ⵣⵉ ⴷⴷⵓⵏⴻⵛⵜ-ⴰ. 11 ⵎⴰⵛⴰ ⵓⵔⵉⵖ ⴰⵡⴻⵎ-ⴷⴷ ⵍⴻⵅⵅⵓ, ⵃⵉⵎⴰ ⵡⴰⵔ ⵜᵉⵜⵜⵄⴰⵛⴰⵔⴻⵎ ⵛⴰ ⵃⴻⴷ, ⵡⴰⵅⵅⴰ ⵇⵇⴰⵔⴻⵏ ⴰⵙ ⵓⵎⴰ, ⵎⴰⵛⴰ ⴰⵇⴰ-ⵜ ⴷ ⴱⵓ-ⴼⴰⵔⵇ-ⵛⵛⵖⴻⵍ, ⵏⵉⵖ ⴷ ⴰⴹⴻⵎⵎⴰⵄ, ⵏⵉⵖ ⴷ ⵡⴻⵏⵏⵉ ⵉⵄⴻⴱⴱⴷⴻⵏ ⵍ’ⴰⵚⵏⴰⵎ, ⵏⵉⵖ ⴷ ⴰⵎⵛⴻⵇⵇⴰⴼ, ⵏⵉⵖ ⴷ ⴰⵙⴽⴰⵔⵊⵉ, ⵏⵉⵖ ⴷ ⴰⵛⴻⴼⴼⴰⵔ. ⴰⴽ-ⴷ ⵃⴻⴷ ⴰⵎ ⵡⴰⵏⵉⵜⴰ ⵡⴰⵔ ⴽⵉⵙ ⵜᵉⵜⵜⴻⵜⵜⴻⵎ ⵄⴰⴷ ⴰⵖⵔⵓⵎ! ◘5:11 ⵍⵅⵍ. 12:14; ⵎⵜ. 18:17; 2 ⵜⵙ. 3:14; 2 ⵢⵃ. 10. 12 ⵎⵉⵏⵣⵉ ⵎⴰⵏ ⵍⵃⴻⵇⵇ ⵖⴰⵔⵉ, ⵃⵉⵎⴰ ⴰⴷ ⵃⴻⴽⵎⴻⵖ ⵅ ⵢⵉⵏⵏⵉ ⵉⴵⴰⵏ ⴱⴰⵔⵔⴰ? ⵃⴻⴽⴽⵎⴻⵎ ⴽⴻⵏⵏⵉⵡ ⵅ ⵢⵉⵏⵏⵉ ⵉⴵⴰⵏ ⴷⴰⵅⴻⵍ! 13 ⵎⴰⵛⴰ ⵉⵏⵏⵉ ⵉⴵⴰⵏ ⴱⴰⵔⵔⴰ, ⴰⵔⴻⴱⴱⵉ ⴰⴷ ⵅⴰⵙⴻⵏ ⵉⵃⴽⴻⵎ. ⵙⵃⴻⵢⵢⴷⴻⵎ ⵅⴰⵡⴻⵎ ⴰⵄⴻⴼⴼⴰⵏ! ◘5:13 ⴰⵄⵡⴷ. 17:7