1 ⴰ ⴰⵢⵜⵎⴰ ⵉⵏⵓ, ⴰⴷ ⴰⵡⴻⵎ ⵙⵙⴰⵔⴳⴱⴻⵖ ⵅ ⵍ’ⵉⵏⵊⵉⵍ ⵡⴻⵏⵏⵉ ⴷ ⴰⵡⴻⵎ ⴱⴰⵔⵔⵃⴻⵖ, ⴷ ⵡⴻⵏⵏⵉ ⵜⵇⴻⴱⵍⴻⵎ ⵓ ⴷ ⵡⴻⵏⵏⵉ ⴷⵉ ⵜⴱⴻⴷⴷⴻⵎ ⵏⵉⵛⴰⵏ, 2 ⵉ ⵣⵉ ⵜᵉⵟⵟⴼⴻⵎ ⵜⵓⴷⴰⵔⵜ, ⵙ ⵡⴰⵡⴰⵍ ⵉ ⴷ ⴰⵡⴻⵎ ⴱⴰⵔⵔⵃⴻⵖ, ⵎⴰⵍⴰ ⵅⴰⵙ ⵜⵄⴻⵇⵍⴻⵎ ⵄⴰⴷ. ⵎⴰⵎⵎⴻⵛ ⵏⵏⴻⵖⵏⵉ, ⵣⴻⵄⵎⴰ ⵜⵓⵎⵏⴻⵎ ⴰⵎⴻⵏⵏⵉ ⵡⴰⵀⴰ. ◘15:2 ⵔⵓⵎ. 1:16; 1 ⴽⵓⵔ. 1:21. 3 ⵎⵉⵏⵣⵉ ⵣⴻⴳ ⵓⵎⴻⵣⵡⴰⵔ ⵙⵙⴻⵄⴷⵓⵖ ⴰⵡⴻⵎ-ⴷⴷ ⵎⵉⵏ ⵜⵓⵖⴰ ⵟⵟⴼⴻⵖ ⵙ ⵢⵉⵅⴻⴼ ⵉⵏⵓ, ⴰⵇⴰ ⵍⵎⴰⵙⵉⵃ ⵉⵎⵎⵓⵜ ⵅ ⴷⴷⵏⵓⴱ ⵏⵏⴻⵖ ⵄⵍⴰⵃⵙⴰⴱ ⵎⵉⵏ ⵢⵓⵔⴰⵏ, ◘15:3 ⵉⵛⴰ. 53:7; ⴷⴰⵏ. 9:24, 26; 1 ⴽⵓⵔ. 5:7; 1 ⴱⵟ. 2:24. 4 ⴰⵇⴰ ⵉⵜⵜⵡⴰⵏⴹⴻⵍ ⵓⵛⴰ ⵉⵜⵜⵡⴰⵙⵙⵏⴻⴽⴽⴰⵔ-ⴷⴷ ⴷⴻⴳ ⵡⴰⵙⵙ ⵡⵉⵙⵙ ⵜⵍⴰⵜⴰ ⵄⵍⴰⵃⵙⴰⴱ ⵎⵉⵏ ⵢⵓⵔⴰⵏ. ◘15:4 ⵉⵥⵀⴷ. 16:10; ⵉⵛⴰ. 53:8, 9; ⵢⵓⵏ. 2:1; ⵎⵜ. 12:40. 5 ⵏⴻⵜⵜⴰ ⵉⴹⵀⴰⵔ-ⴷⴷ ⵖⴰⵔ ⴽⵉⴼⴰ, ⵅⴻⵏⵏⵉ ⵖⴰⵔ ⵜⴻⵏⵄⴰⵛ ⵏ ⵉⵎⴻⵃⴹⴰⵔⴻⵏ. ◘15:5 ⵍⴽ. 24:34; ⵢⵃ. 20:19; ⵍⴻⵅ. 10:41. 6 ⴰⵡⴰⵔⵏⵉ ⴰⵙ ⵉⴱⴰⵏ-ⴷⴷ ⵉ ⵜⵉⵡⵡⴰ ⵏ ⵅⴻⵎⵙⴰ-ⵎⵢⴰ ⵏ ⵡⴰⵡⵎⴰⵜⴻⵏ ⴷⴻⴳ ⵓⵎⵓⵔ ⴷ ⵉⵊⵊⴻⵏ, ⴰⵟⵟⴰⵙ ⵣⵣⴰⵢⵙⴻⵏ ⴷⴷⴰⵔⴻⵏ ⵄⴰⴷ ⴰⵍ ⵉ ⵍⴻⵅⵅⵓ, ⵎⴰⵛⴰ ⵉⵏⵏⴻⵖⵏⵉ ⴰⵇⴰ ⵟⵟⵚⴻⵏ ⵉⴹⴻⵚ ⵏ ⵍⵎⴻⵡⵜ. 7 ⴰⵡⴰⵔⵏⵉ ⴰⵙ ⵉⴹⵀⴰⵔ-ⴷⴷ ⵉ ⵢⴰⵄⵇⵓⴱ, ⵅⴻⵏⵏⵉ ⵉ ⵎⴰⵔⵔⴰ ⵔⵔⵓⵙⵓⵍ.

8 ⴰⵎ ⵖⴰⵔ ⵓⵏⴻⴳⴳⴰⵔ ⵏ ⵎⴰⵔⵔⴰ, ⵉⴹⵀⴰⵔ ⴰⵢⵉ-ⴷⴷ ⵄⴰⵡⴻⴷ ⴰⵎ ⵉ ⵢⵉⵊⵊ ⵏ ⵓⵎⴻⵅⵍⵓⵇ ⴷⴷ-ⵉⵣⵡⴰⵔⴻⵏ ⵉ ⵍⵡⴻⵇⵜ ⵏⵏⴻⵙ. ◘15:8 ⵍⴻⵅ. 9:3, 17; 23:11; 1 ⴽⵓⵔ. 9:1; 2 ⴽⵓⵔ. 12:2. 9 ⵎⵉⵏⵣⵉ ⵏⴻⵛⵛ ⴵⵉⵖ ⴷ ⴰⵎⴰⵥⵓⵥ ⵇⴰⵄ ⵣⵉ ⵔⵔⵓⵙⵓⵍ, ⵡⴰⵔ ⵙⴷⵉⵀⵉⵊⴻⵖ ⴰⴷ ⴰⵢⵉ ⵍⴰⵖⴰⵏ ⵔⵔⴰⵙⵓⵍ, ⵎⵉⵏⵣⵉ ⵏⴻⵛⵛ ⵜⵓⵖⴰ ⴷⴰⵔⵔⵛⴻⵖ ⵅ ⵜⵎⴻⵙⵎⵓⵏⵜ ⵏ ⴰⵔⴻⴱⴱⵉ. ◘15:9 ⴰⴼⴰ. 3:8; ⵍⴻⵅ. 8:3; 9:1; 22:4; 26:9; ⴳⴰⵍ. 1:13; 1 ⵜⵉⵎ. 1:13. 10 ⵎⴰⵛⴰ ⵙ ⴰⵔⴹⴰ ⵏ ⴰⵔⴻⴱⴱⵉ ⵉ ⴵⵉⵖ ⵎⵉⵏ ⴵⵉⵖ ⵓⵛⴰ ⴰⵔⴹⴰ ⵏⵏⴻⵙ ⵉ ⴷⴰⵢⵉ ⵉⴵⴰⵏ ⵡⴰⵔ ⵉⴵⵉ ⴱⴰⵟⴻⵍ, ⵎⵉⵏⵣⵉ ⵅⴻⴷⵎⴻⵖ ⵎⴰⵀⵓ ⵇⴰⵄ ⵅⴰⵙⴻⵏ ⵎⴰⵔⵔⴰ, ⵎⴰⵛⴰ ⵡⴰⵔ ⵉⴵⵉ ⴷ ⵏⴻⵛⵛ, ⵎⴰⵛⴰ ⴰⵔⴹⴰ ⵏ ⴰⵔⴻⴱⴱⵉ ⵏⵏⵉ ⵉⴵⴰⵏ ⴰⴽⵉⴷⵉ. ◘15:10 2 ⴽⵓⵔ. 11:23; 12:11. 11 ⵅⴻⵏⵏⵉ ⵎⴰ ⴷ ⵏⴻⵛⵛ ⵏⵉⵖ ⴷ ⵏⵉⵜⵏⵉ, ⴰⵎⵎⵓ ⵉ ⵏⴻⵜⵜⴱⴰⵔⵔⴻⵃ, ⴰⵎⵎⵓ ⵉ ⵜⵓⵎⵏⴻⵎ.

12 ⵎⴰⵛⴰ ⵎⴰⵍⴰ ⵉⵜⵜⵡⴰⴱⴰⵔⵔⴻⵃ ⵙ ⵍⵎⴰⵙⵉⵃ ⵡⴻⵏⵏⵉ ⴷⴷ-ⵉⵜⵜⵡⴰⵙⵙⵏⴻⴽⴽⴰⵔⴻⵏ ⵣⵉ ⵜⴰⴷⴷⴰⵔⵜ ⵏ ⵉⵎⴻⵜⵜⵉⵏⴻⵏ, ⵎⴰⵎⵎⴻⵛ ⵅⴻⵏⵏⵉ ⵣⴻⵎⵎⴰⵔⴻⵏ ⵛⴰ ⵊⴰⵔ ⴰⵡⴻⵎ ⴰⴷ ⵉⵏⵉⵏ ⴱⴻⵍⵍⵉ ⵡⴰⵔ ⴷⵉⵏ ⴱⵓ ⵜⵓⴷⴰⵔⵜ ⵉ ⵉⵎⴻⵜⵜⵉⵏⴻⵏ? 13 ⵎⵉⵏⵣⵉ ⵎⴰⵍⴰ ⵡⴰⵔ ⴷⵉⵏ ⴱⵓ ⵜⵓⴷⴰⵔⵜ ⵉ ⵉⵎⴻⵜⵜⵉⵏⴻⵏ, ⵓⵍⴰ ⴷ ⵍⵎⴰⵙⵉⵃ ⵡⴰⵔ ⴷⴷ-ⵉⵜⵜⵡⴰⵙⵙⵏⴻⴽⴽⴰⵔ ⵛⴰ, 14 ⵓⵛⴰ ⵎⴰⵍⴰ ⵍⵎⴰⵙⵉⵃ ⵡⴰⵔ ⴷⴷ-ⵉⵜⵜⵡⴰⵙⵙⵏⴻⴽⴽⴰⵔ, ⵅⴻⵏⵏⵉ ⴱⴰⵟⴻⵍ ⵉ ⵜⴻⴵⴰ ⵜⴱⴰⵔⵔⴻⵃⵜ ⵏⵏⴻⵖ, ⴱⴰⵟⴻⵍ ⵉ ⵢⴻⴵⴰ ⵅⴻⵏⵏⵉ ⵍ’ⵉⵎⴰⵏ ⵏⵡⴻⵎ. 15 ⵅⴻⵏⵏⵉ ⵏⴻⵛⵛⵉⵏ ⵏⴱⴰⵏ ⵄⴰⵡⴻⴷ ⴷ ⵍⴻⵛⵀⵓⴷ ⵉⵙⵙⵅⴰⵔⵔⵉⵇⴻⵏ ⵏ ⴰⵔⴻⴱⴱⵉ, ⵎⵉⵏⵣⵉ ⵏⴻⵛⵀⴻⴷ ⵅ ⴰⵔⴻⴱⴱⵉ ⴱⴻⵍⵍⵉ ⴰⵇⴰ ⵉⵙⵙⵏⴻⴽⴽⴰⵔ-ⴷⴷ ⵍⵎⴰⵙⵉⵃ, ⵡⴰⵅⵅⴰ ⵏⴻⵜⵜⴰ ⵡⴰⵔ ⵉ-ⵜ-ⵉ-ⴷⴷ-ⵉⵙⵙⵏⴻⴽⴽⴰⵔ ⵛⴰ. 16 ⵎⵉⵏⵣⵉ ⵎⴰⵍⴰ ⵉⵎⴻⵜⵜⵉⵏⴻⵏ ⵡⴰⵔ ⴷⴷ-ⵜⵜᵉⵜⵡⴰⵙⵏⴻⴽⴽⴰⵔⴻⵏ ⵛⴰ, ⴰⵇⴰ ⵍⵎⴰⵙⵉⵃ ⵡⴰⵔ ⴷⴷ-ⵉⵜⵜⵡⴰⵙⵙⵏⴻⴽⴽⴰⵔ ⵄⴰⵡⴻⴷ. 17 ⵓ ⵎⴰⵍⴰ ⵍⵎⴰⵙⵉⵃ ⵡⴰⵔ ⴷⴷ-ⵉⵜⵜⵡⴰⵙⵙⵏⴻⴽⴽⴰⵔ ⵛⴰ, ⴰⵇⴰ ⵍ’ⵉⵎⴰⵏ ⵏⵡⴻⵎ ⵉⵅⵡⴰ, ⵓ ⴰⵇⴰ ⴽⴻⵏⵏⵉⵡ ⵄⴰⴷ ⴷⵉ ⴷⴷⵏⵓⴱ ⵏⵡⴻⵎ, 18 ⵓⵛⴰ ⵜⵜⵡⴰⵀⴻⵍⵍⴽⴻⵏ ⵓⵍⴰ ⴷ ⵉⵏⵏⵉ ⵉⵜⵜᵉⵟⵟⵚⴻⵏ ⴷⵉ ⵍⵎⴰⵙⵉⵃ ⴰⵡⴰⵔⵏⵉ ⵍⴰⵎⵉ ⵎⵎⵓⵜⴻⵏ. 19 ⵎⴰⵍⴰ ⵜⵓⵖⴰ ⵏⴻⵙⵙⵉⵜⵉⵎ ⴷⵉ ⵍⵎⴰⵙⵉⵃ ⴷⵉ ⵜⵓⴷⴰⵔⵜ-ⴰ ⵡⴰⵀⴰ, ⴰⵇⴰ ⴰⵏⴻⵖ ⵇⴰⵄ ⴷ ⵉⵎⵛⵓⵎⴻⵏ ⵏ ⵎⴰⵔⵔⴰ ⵉⵡⴷⴰⵏ.

20 ⵎⴰⵛⴰ ⵍⴻⵅⵅⵓ ⵓⵎⵉ ⴷⴷ-ⵉⵜⵜⵡⴰⵙⵙⵏⴻⴽⴽⴰⵔ ⵍⵎⴰⵙⵉⵃ ⵣⵉ ⵜⴰⴷⴷⴰⵔⵜ ⵏ ⵉⵎⴻⵜⵜⵉⵏⴻⵏ, ⴰⵇⴰ ⵉⴷⵡⴻⵍ ⵏⴻⵜⵜⴰ ⴷ ⴰⵎⴻⵏⵣⵓ ⵏ ⵢⵉⵏⵏⵉ ⵉⵟⵟⵚⴻⵏ ⴷⴻⴳ ⵡⴻⵏⴹⴻⵍ. ◘15:20 ⴽⵓⵍ. 1:18; 1 ⴱⵟ. 1:3; ⴰⵙⴰ. 1:5. 21 ⵓ ⴰⵎ ⵎⴰⵎⵎⴻⵛ ⴷⴷ-ⵜⵓⵙⴰ ⵍⵎⴻⵡⵜ ⵣⴻⴳ ⵉⵊⵊ ⵏ ⴱⵏⴰⴷⴻⵎ, ⴰⵎⵎⵓ ⵓⵍⴰ ⴷ ⵜⴰⵏⵓⴽⵔⴰ ⵏ ⵉⵎⴻⵜⵜⵉⵏⴻⵏ ⵜⴻⴵⴰ ⵣⴻⴳ ⵉⵊⵊ ⵏ ⴱⵏⴰⴷⴻⵎ. ◘15:21 ⴰⵎⵥ. 2:17; 3:6; ⵔⵓⵎ. 5:12, 18; 6:23. 22 ⵎⵉⵏⵣⵉ ⴰⵎ ⵉⵡⴷⴰⵏ ⵎⴰⵔⵔⴰ ⴰⴷ ⵎⵎⵜⴻⵏ ⴷⵉ ⴰⴷⴰⵎ, ⴰⵎⵎⵓ ⵄⴰⵡⴻⴷ ⵉ ⵖⴰ ⴷⴷⴰⵔⴻⵏ ⵎⴰⵔⵔⴰ ⵏⵉⵜⵏⵉ ⵄⴰⵡⴻⴷ ⴷⵉ ⵍⵎⴰⵙⵉⵃ. 23 ⵎⴰⵛⴰ ⴽⵓⵍ ⵉⵊⵊ ⴷⵉ ⵏⵏⵓⴱⴻⵜ ⵏⵏⴻⵙ: ⵍⵎⴰⵙⵉⵃ ⵜⵓⵖⴰ ⴷ ⴰⵎⴻⵏⵣⵓ, ⵅⴻⵏⵏⵉ ⴰⵡⴰⵔⵏⵉ ⴰⵙ ⵉⵏⵏⵉ ⵉⴵⴰⵏ ⵏ ⵍⵎⴰⵙⵉⵃ ⵖⴰⵔ ⵜⵡⴰⵙⵉⵜ ⵏⵏⴻⵙ. 24 ⴰⵡⴰⵔⵏⵉ ⵎⴰⵏ ⴰⵢⴰ ⴷ ⴰⵏⴻⴳⴳⴰⵔⵓ, ⵅⵎⵉ ⵖⴰ ⵉⵡⵛ ⵜⴰⴳⴻⵍⴷⵉⵜ ⵉ ⴰⵔⴻⴱⴱⵉ, ⴱⴰⴱⴰⵜⵏⴻⵖ, ⵅⵎⵉ ⵖⴰ ⵉⵙⵙⴻⴱⴹⴻⵍ ⵎⴰⵔⵔⴰ ⵍⴻⵃⴽⴰⵎⴻⵜ ⴷ ⵎⴰⵔⵔⴰ ⵚⵚⵓⵍⵟⴰ ⴷ ⵎⴰⵔⵔⴰ ⵊⵊⴻⵀⴷ.

25 ⵎⴰⵖⴰⵔ ⵏⴻⵜⵜⴰ ⴰⴷ ⵉⵃⴽⴻⵎ ⴰⵎ ⵓⵊⴻⴵⵉⴷ ⴰⵍ ⴷ ⵖⴰ ⵢⴻⴳⴳ ⵎⴰⵔⵔⴰ ⵍⵄⴻⴷⵢⴰⵏ ⵏⵏⴻⵙ ⵙⴰⴷⵓ ⵉⴹⴰⵔⴻⵏ ⵏⵏⴻⵙ. ◘15:25 ⵉⵥⵀⴷ. 110:1; ⵍⴻⵅ. 2:34; ⴰⴼⴰ. 1:20; ⴽⵓⵍ. 3:1; ⵄⴱⵔ. 1:13; 10:12. 26 ⵍⴻⵄⴷⵓ ⴰⵏⴻⴳⴳⴰⵔⵓ ⵡⴻⵏⵏⵉ ⵉ ⵖⴰ ⵉⵜⵜⵡⴰⴱⴻⴹⵍⴻⵏ, ⴰⵇⴰ-ⵜⵜ ⴷ ⵍⵎⴻⵡⵜ. 27 ⵎⵉⵏⵣⵉ ⴰⵇⴰ ⵉⴳⴳⴰ ⵎⴰⵔⵔⴰ ⵙⴰⴷⵓ ⵉⴹⴰⵔⴻⵏ ⵏⵏⴻⵙ. ⵎⴰⵛⴰ ⵅⵎⵉ ⵉⵜⵜⵡⴰⵏⵏⴰ: “ⴰⵇⴰ ⵎⴰⵔⵔⴰ ⵜⵉⵎⴻⵙⵍⴰⵢⵏ ⵜⵜⵡⴰⴳⴳⴻⵏⵜ ⵙⴰⴷⵓ ⵏⴻⵜⵜⴰ!”, ⴰⵇⴰ ⵉⴱⴰⵏ ⵎⵍⵉⵃ ⴱⴻⵍⵍⵉ ⵡⴻⵏⵏⵉ ⴷ ⴰⵙ ⵉⴳⴳⵉⵏ ⵎⴰⵔⵔⴰ ⵙⴰⴷⵓ ⵏⴻⵜⵜⴰ, ⴰⵇⴰ ⵏⴻⵜⵜⴰ ⵙⵉⵎⴰⵏⵜ ⵏⵏⴻⵙ ⵡⴰⵔ ⵉⴵⵉ ⵙⴰⴷⵓ ⵏⴻⵜⵜⴰ. ◘15:27 ⵉⵥⵀⴷ. 8:7; ⵎⵜ. 11:27; 28:18; ⴰⴼⴰ. 1:22; ⵄⴱⵔ. 2:8. 28 ⵓⵛⴰ ⵍⴰⵎⵉ ⴷ ⴰⵙ ⵉⵜⵜⵡⴰⴳⴳ ⵎⴰⵔⵔⴰ ⵙⴰⴷⵓ ⵉ ⵏⴻⵜⵜⴰ, ⵍⴻⵅⴷⴻⵏⵏⵉ ⵎⵎⵉⵙ ⵏ ⴰⵔⴻⴱⴱⵉ ⵄⴰⵡⴻⴷ ⴰⴷ ⵉⵜⵜⵡⴰⴳⴳ ⵙⴰⴷⵓ ⵉ ⵡⴻⵏⵏⵉ ⵓⵎⵉ ⴷ ⴰⵙ ⵉⴳⴳⵉⵏ ⵎⴰⵔⵔⴰ ⵙⴰⴷⵓ ⵉ ⵏⴻⵜⵜⴰ, ⵃⵉⵎⴰ ⴰⴷ ⵢⵉⵍⵉ ⴰⵔⴻⴱⴱⵉ ⴷ ⵎⴰⵔⵔⴰ ⴷⵉ ⵎⵉⵏ ⴷⵉ ⵎⵎⴰ.

29 ⵏⵉⵖ, ⵎⵉⵏ ⵖⴰ ⴳⴳⴻⵏ ⵉⵏⵏⵉ ⵉⵜⵜⵡⴰⵙⵙⵖⴻⴹⵚⴻⵏ ⴷⵉ ⵟⵟⵡⴻⵄ ⵏ ⵉⵎⴻⵜⵜⵉⵏⴻⵏ ⵎⴰⵍⴰ ⵡⴰⵔ ⴷⴷ-ⵜᵉⵜⵜⵡⴰⵙⵙⵏⴻⴽⴽⴰⵔⴻⵏ ⵉⵎⴻⵜⵜⵉⵏⴻⵏ ⵄⴻⵎⵎⴰⵔⵚ? ⵎⴰⵖⴰⵔ ⵎⴰⵢⴻⵎⵎⵉ ⵖⴰ ⵜⵜⵡⴰⵙⵙⵖⴻⴹⵚⴻⵏ ⵄⴰⴷ ⴷⵉ ⵟⵟⵡⴻⵄ ⵏ ⵉⵎⴻⵜⵜⵉⵏⴻⵏ? 30 ⵓ ⵎⴰⵢⴻⵎⵎⵉ ⵏⴻⵛⵛⵉⵏ ⵄⴰⴷ ⴷⵉ ⵍⵅⴰⵟⴰⵔ ⴷⵉ ⴽⵓⵍ ⵜⵙⴰⵄⵄⴻⵜ? 31 ⴰ ⴰⵢⵜⵎⴰ, ⵜⵜⵊⴰⴵⵉⵖ ⵖⴰⵔ ⵓⵙⴻⵎⵖⴰⵔ ⵏⵡⴻⵎ ⵉ ⵉⴵⴰⵏ ⵖⴰⵔⵉ ⴷⵉ ⵙⵉⴷⵉⵜⵏⴻⵖ ⵢⴰⵙⵓⵄ ⵍⵎⴰⵙⵉⵃ, ⴰⵇⴰ ⵜⵜⵎⴻⵜⵜⵉⵖ ⴽⵓⵍ ⴰⵙⵙ. 32 ⵓ ⵎⴰⵎⵎⴻⵛ, ⵎⴰⵍⴰ ⵜⵜⵡⴰⵎⴻⵏⴹⴰⵔⴻⵖ ⵣⵣⴰⵜ ⵉ ⵍⴻⵡⵃⵓⵛ ⴷⵉ ⴰⴼⴰⵙⵓⵙ ⵅ ⵍⴻⵃⵙⴰⴱ ⴱⵏⴰⴷⴻⵎ, ⵎⴰⵏ ⵍⴻⴼⴹⴻⵍ ⵉ ⵖⴰⵔⵉ, ⵎⴰⵍⴰ ⵉⵎⴻⵜⵜⵉⵏⴻⵏ ⵡⴰⵔ ⴷⴷ-ⵜⵜⵡⴰⵙⵙⵏⴻⴽⴽⴰⵔⴻⵏ ⵛⴰ? ⴻⵊⵊ ⴰⵏⴻⵖ ⴰⴷ ⵏⴻⵛⵛ ⴰⴷ ⵏⵙⵓ, ⵎⵉⵏⵣⵉ ⵜⵉⵡⴻⵛⵛⴰ ⴰⴷ ⵏⴻⵎⵎⴻⵜ. ◘15:32 ⵉⵛⴰ. 22:13; 56:12. 33 ⵡⴰⵔ ⵜⵜⵖⴻⵛⵛⵉⵎ ⵢⵉⵅⴻⴼ ⵏⵡⴻⵎ: ⵍⵀⴰⵔⴷ ⵡⴰⵔ ⵉⵃⵍⵉⵏ ⵜⵊⴻⵢⵢⴰⵃ ⵏⵏⴻⵢⵢⴻⵜ ⵜⴰⵚⴻⴱⵃⴰⵏⵜ. 34 ⵙⴼⴰⵇⴻⵎ ⵓⵍⴰⵡⴻⵏ ⵏⵡⴻⵎ ⵖⴰⵔ ⵜⵙⴻⴳⴷⴰ, ⵡⴰⵔ ⵅⴻⵟⵟⵉⵎ ⵛⴰ. ⵎⵉⵏⵣⵉ ⵛⴰ ⵣⵣⴰⵢⵡⴻⵎ ⵡⴰⵔ ⵖⴰⵔⵙⴻⵏ ⵜⴻⴵⵉ ⵜⵓⵙⵙⵏⴰ ⵏ ⴰⵔⴻⴱⴱⵉ. ⵉ ⵍⴻⵃⵢⴰ ⵏⵡⴻⵎ ⵇⵇⴰⵔⴻⵖ ⵜⵜ.

35 ⴰⴷ ⵉⵏⵉⵏ ⵛⴰ ⵣⵣⴰⵢⵡⴻⵎ: “ⵎⴰⵎⵎⴻⵛ ⵉ ⴷⴷ ⵖⴰ ⵜⵜⵡⴰⵙⵙⵏⴻⴽⴽⴰⵔⴻⵏ ⵉⵎⴻⵜⵜⵉⵏⴻⵏ? ⵙ ⵎⴰⵏ ⴰⵔⵔⵉⵎⴻⵜ ⵉ ⴷⴷ ⵖⴰ ⵢⴰⵙⴻⵏ?” ◘15:35 ⵃⵉⵥ. 37:3. 36 ⴰ ⴰⴼⵖⵓⵍ, ⵎⵉⵏ ⵜⵣⴰⵔⵔⵄⴻⴷ ⵛⴻⴽ, ⵡⴰⵔ ⵉⴷⴷⴰⵔ ⵎⴰⵍⴰ ⵡⴰⵔ ⵉⵎⵎⵓⵜ ⵇⴱⴻⵍ. ◘15:36 ⵢⵃ. 12:24. 37 ⵎⵉⵏ ⵜⵣⴰⵔⵔⵄⴻⴷ, ⵡⴰⵔ ⵜⴻⴵⵉ ⵛⴰ ⴷ ⴰⵔⵔⵉⵎⴻⵜ ⵏⵏⵉ ⵉ ⵖⴰ ⵜⵉⵍⵉ, ⵎⴰⵛⴰ ⵜⵣⴰⵔⵔⵄⴻⴷ ⵜⴰⵄⴻⵇⵇⴰⵛⵜ ⵉⵖⴻⵔⵢⴻⵏ ⵏ ⵢⵉⵔⴷⴻⵏ ⵏⵉⵖ ⵏ ⵉⵎⴻⵏⴷⵉ ⵏⵉⵖ ⵏ ⵛⴰ ⵏ ⵣⵣⴰⵔⵉⵄⴻⵜ ⵏⵏⴻⵖⵏⵉ. 38 ⵎⴰⵛⴰ ⴰⵔⴻⴱⴱⵉ ⵉⵡⵛⴰ ⴰⵙ ⴰⵔⵔⵉⵎⴻⵜ ⴰⵎ ⵎⴰⵎⵎⴻⵛ ⵉⵅⵙ ⵏⴻⵜⵜⴰ, ⵉ ⴽⵓⵍ ⴷⴷⴰⴱ ⵏ ⵣⵣⴰⵔⵉⵄⴻⵜ ⵉⵡⵛⴰ ⴰⵙ ⴰⵔⵔⵉⵎⴻⵜ ⵄⵍⴰⵃⵙⴰⴱ ⵟⵟⴱⵉⵄⴻⵜ ⵏ ⴽⵓⵍ ⵉⵛⵜⴻⵏ ⵣⵣⴰⵢⵙⴻⵏⵜ.

39 ⵡⴰⵔ ⵉⴵⵉ ⵎⴰⵔⵔⴰ ⴰⵔⵔⵉⵎⴻⵜ ⴷ ⴰⵔⵔⵉⵎⴻⵜ ⴷ ⵉⵊⵊ, ⵎⴰⵛⴰ ⵜⴻⵏⵏⵉ ⵏ ⵉⵡⴷⴰⵏ ⵉⵎⵎⵙⴻⴱⴹⴰ ⵅ ⵜⴻⵏⵏⵉ ⵏ ⵍⵎⴰⵍ, ⵓ ⵜⴻⵏⵏⵉ ⵏ ⵉⵊⴹⴰⴹ ⵡⴻⵏⵏⴻⵖⵏⵉ ⵏ ⵜⴻⵏⵏⵉ ⵏ ⵉⵙⴻⵍⵎⴰⵏ.

40 ⴰⵇⴰ ⴷⵉⵏ ⴰⵔⵔⵉⵎⴰⵜ ⵏ ⵓⵊⴻⵏⵏⴰ ⴷ ⴰⵔⵔⵉⵎⴰⵜ ⵏ ⵜⴻⵎⵎⵓⵔⵜ, ⵎⴰⵛⴰ ⴰⵄⵓⴵⵉ ⵏ ⵢⵉⵏⵏⵉ ⵏ ⵓⵊⴻⵏⵏⴰ ⵡⴻⵏⵏⴻⵖⵏⵉ ⵏ ⵢⵉⵏⵏⵉ ⵏ ⵜⴻⵎⵎⵓⵔⵜ. 41 ⵉⵊⵊⴻⵏ ⴷ ⴰⵄⵓⴵⵉ ⵏ ⵜⴼⵓⵛⵜ, ⵡⴻⵏⵏⴻⵖⵏⵉ ⴷ ⴰⵄⵓⴵⵉ ⵏ ⵓⵢⵓⵔ, ⵓ ⵡⴻⵏⵏⴻⵖⵏⵉ ⴷ ⴰⵄⵓⴵⵉ ⵏ ⵉⵜⵍⴰⵏ, ⵓⵛⴰ ⴰⵄⵓⴵⵉ ⵏ ⵉⵊⵊ ⵏ ⵉⵜⵍⵉ ⵉⵄⴻⴷⴷⵓⵏ ⵅ ⵓⵄⵓⴵⵉ ⵏ ⵉⵊⵊ ⵏ ⵉⵜⵍⵉ ⵏⵏⴻⵖⵏⵉ.

42 ⴰⵎⵎⵓ ⵅⴻⵏⵏⵉ ⵉ ⵖⴰ ⵜⵉⵍⵉ ⵜⵓⴷⴰⵔⵜ ⵉ ⵢⵉⵏⵏⵉ ⵎⵎⵓⵜⴻⵏ. ⴰⵇⴰ ⵜⵜⵡⴰⵣⴰⵔⵔⵄⴻⵏ ⵏⵉⵜⵏⵉ ⴷⵉ ⵎⵉⵏ ⵉⵖⴻⵛⵛⴻⵏ ⵓⵛⴰ ⵜⵜⵡⴰⵙⵙⵏⴻⴽⴽⴰⵔⴻⵏ-ⴷⴷ ⴱⵍⴰ ⵍⵖⴻⵛⵛ. ◘15:42 ⴷⴰⵏ. 12:3; ⵎⵜ. 13:43. 43 ⴰⵇⴰ ⵜⵜⵡⴰⵣⴰⵔⵔⵄⴻⵏ ⵏⵉⵜⵏⵉ ⴷⵉ ⵎⵉⵏ ⵡⴰⵔ ⵉⵛⵏⵉⵄⴻⵏ ⵓⵛⴰ ⴰⴷ ⴷⴷ-ⵜⵜⵡⴰⵙⵙⵏⴻⴽⴽⴰⵔⴻⵏ ⴷⴻⴳ ⵓⵄⵓⴵⵉ. ⵏⵉⵜⵏⵉ ⵜⵜⵡⴰⵣⴰⵔⵔⵄⴻⵏ ⴷⴻⴳ ⵡⴻⴹⵄⴰⴼ ⵓⵛⴰ ⴰⴷ ⴷⴷ-ⵜⵜⵡⴰⵙⵙⵏⴻⴽⴽⴰⵔⴻⵏ ⴷⵉ ⵊⵊⴻⵀⴷ. 44 ⴰⵇⴰ ⵜⵜⵡⴰⵣⴰⵔⵔⵄⴻⵏ ⵏⵉⵜⵏⵉ ⵙ ⵉⵛⵜ ⵏ ⴰⵔⵔⵉⵎⴻⵜ ⵏ ⵟⵟⴱⵉⵄⴻⵜ ⵓⵛⴰ ⵅⴻⵏⵏⵉ ⴰⴷ ⴷⴷ-ⵉⵜⵜⵡⴰⵙⵙⵏⴻⴽⴽⴰⵔ ⴱⵏⴰⴷⴻⵎ ⵙ ⵉⵛⵜ ⵏ ⴰⵔⵔⵉⵎⴻⵜ ⵜⴰⵔⵔⵓⵃⴰⵏⵉⵜ. ⴰⵇⴰ ⴷⵉⵏ ⴰⵔⵔⵉⵎⴻⵜ ⵏ ⵟⵟⴱⵉⵄⴻⵜ, ⴰⵎⵎⵓ ⴰⵇⴰ ⴷⵉⵏ ⵓⵍⴰ ⴷ ⴰⵔⵔⵉⵎⴻⵜ ⵏ ⴰⵔⵔⵓⵃ.

45 ⴰⵎⵎⵓ ⵉ ⵜⵓⵔⴰ ⵄⴰⵡⴻⴷ: “ⴰⵔⵢⴰⵣ ⴰⵎⴻⵣⵡⴰⵔⵓ ⴰⴷⴰⵎ, ⵉⴷⵡⴻⵍ ⴷ ⵍⴻⵄⵎⴰⵔ ⵉⴷⴷⴰⵔⴻⵏ!”, ⴰⴷⴰⵎ ⴰⵏⴻⴳⴳⴰⵔⵓ ⵉⴷⵡⴻⵍ ⴷ ⴰⵔⵔⵓⵃ ⵉ ⵉⵜⵜⵉⵛⴻⵏ ⵜⵓⴷⴰⵔⵜ. ◘15:45 ⴰⵎⵥ. 2:7. 46 ⵎⴰⵛⴰ ⵎⵉⵏ ⵉⴵⴰⵏ ⵣⵉ ⴰⵔⵔⵓⵃ ⵡⴰⵔ ⴷⴷ-ⵢⵓⵙⵉ ⵛⴰ ⴷ ⴰⵎⴻⵣⵡⴰⵔⵓ, ⵎⴰⵛⴰ ⵎⵉⵏ ⵉⴵⴰⵏ ⵏ ⵟⵟⴱⵉⵄⴻⵜ, ⵅⴻⵏⵏⵉ ⴰⵡⴰⵔⵏⵉ ⵎⴰⵏ ⴰⵢⴰ ⵎⵉⵏ ⵉⴵⴰⵏ ⵣⵉ ⴰⵔⵔⵓⵃ. 47 ⴱⵏⴰⴷⴻⵎ ⴰⵎⴻⵣⵡⴰⵔⵓ ⵉⴽⴽⴰ-ⴷⴷ ⵣⴻⴳ ⵓⵛⴰⵍ ⵏ ⵜⴻⵎⵎⵓⵔⵜ, ⴱⵏⴰⴷⴻⵎ ⵡⵉⵙⵙ ⵜⵏⴰⵢⴻⵏ ⴷ ⵙⵉⴷⵉ ⵉ ⴷⴷ-ⵉⴽⴽⵉⵏ ⵣⴻⴳ ⵓⵊⴻⵏⵏⴰ. 48 ⴰⵎ ⵎⴰⵎⵎⴻⵛ ⵉⴵⴰ ⵡⴻⵏⵏⵉ ⵣⴻⴳ ⵓⵛⴰⵍ, ⴰⵎⵎⵓ ⵉ ⴵⴰⵏ ⵓⵍⴰ ⴷ ⵏⵉⵜⵏⵉ ⵣⴻⴳ ⵓⵛⴰⵍ, ⵓⵛⴰ ⴰⵎ ⵎⴰⵎⵎⴻⵛ ⵉⴵⴰ ⵡⴻⵏⵏⵉ ⵏ ⵓⵊⴻⵏⵏⴰ, ⴰⵎⵎⵓ ⵉ ⴵⴰⵏ ⵓⵍⴰ ⴷ ⵉⵏⵏⵉ ⵏ ⵓⵊⴻⵏⵏⴰ. 49 ⵓⵛⴰ ⴰⵎ ⵎⴰⵎⵎⴻⵛ ⵏⴰⵔⴱⵓ ⵚⵚⵉⴼⴻⵜ ⵏ ⵡⴻⵏⵏⵉ ⵉⵜⵜⵡⴰⴳⴳⴻⵏ ⵣⴻⴳ ⵓⵛⴰⵍ, ⴰⵎⵎⵓ ⵅⴻⵏⵏⵉ ⴰⴷ ⵏⴰⵔⴱⵓ ⵚⵚⵉⴼⴻⵜ ⵏ ⵡⴻⵏⵏⵉ ⵉⴵⴰⵏ ⵣⴻⴳ ⵓⵊⴻⵏⵏⴰ. ◘15:49 2 ⴽⵓⵔ. 4:11.

50 ⴰ ⴰⵢⵜⵎⴰ ⵉⵏⵓ, ⴷⴷⴻⴳⴳⴰ ⵅⵙⴻⵖ ⴰⴷ ⵉⵏⵉⵖ: ⴰⵇⴰ ⴰⵢⵙⵓⵎ ⴷ ⵉⴷⴰⵎⵎⴻⵏ ⵡⴰⵔ ⵣⴻⵎⵎⴰⵔⴻⵏ ⴰⴷ ⵡⴰⵔⵜⴻⵏ ⵜⴰⴳⴻⵍⴷⵉⵜ ⵏ ⵉⵊⴻⵏⵡⴰⵏ, ⵓⵛⴰ ⵎⵉⵏ ⵉⴼⴻⵏⵏⴰⵏ ⵡⴰⵔ ⵉⵡⴰⵔⵔⴻⵜ ⵎⵉⵏ ⵡⴰⵔ ⵉⴼⴻⵏⵏⵉⵏ. ◘15:50 ⵢⵃ. 1:13. 51 ⵅⵣⴰⵔⴻⵎ, ⴰⴷ ⴽⴻⵏⵏⵉⵡ ⵙⵙⴰⵔⴻⴳⴱⴻⵖ ⵅ ⵉⵊⵊ ⵏ ⵙⵙⵉⵔⵔ: ⴰⵇⴰ ⴰⵏⴻⵖ ⵡⴰⵔ ⵏⴻⵜⵜᵉⵟⵟⴻⵚ ⵛⴰ ⵎⴰⵔⵔⴰ ⵙ ⵢⵉⴹⴻⵚ ⵏ ⵍⵎⴻⵡⵜ, ⵎⴰⵛⴰ ⵏⴻⵛⵛⵉⵏ ⵎⴰⵔⵔⴰ ⴰⴷ ⵏⴻⵜⵜⵡⴰⴱⴻⴷⴷⴻⵍ, ◘15:51 1 ⵜⵙ. 4:16. 52 ⴷⴻⵖⵢⴰ, ⴷⴻⴳ ⵡⴻⵔⵎⴰⵛ ⵏ ⵡⴰⴱⵍⵉⵡⴻⵏ, ⵖⴰⵔ ⵍⵃⴻⵙⵙ ⵏ ⵓⵙⵓⴹⵉ ⴰⵏⴻⴳⴳⴰⵔⵓ ⴷⴻⴳ ⵓⵢⵉⵛⵛ ⵏ ⵉⵛⴰⵔⵔⵉ: ⵉⵎⴻⵜⵜⵉⵏⴻⵏ ⴰⴷ ⴷⴷ-ⵜⵜⵡⴰⵙⵙⵏⴻⴽⴽⴰⵔⴻⵏ ⵖⴰⵔ ⵎⵉⵏ ⵡⴰⵔ ⵉⴼⴻⵏⵏⵉⵏ ⵓⵛⴰ ⵏⴻⵛⵛⵉⵏ ⴰⴷ ⵏⴻⵜⵜⵡⴰⴱⴻⴷⴷⴻⵍ. ◘15:52 ⵎⵜ. 24:31; 1 ⵜⵙ. 4:16. 53 ⵎⵉⵏⵣⵉ ⵎⵉⵏ ⵉⴼⴻⵏⵏⴰⵏ ⵉⵜⵜⵅⴻⵚⵚⴰ ⴰⵙ ⴰⴷ ⵢⴰⵔⴹ ⵎⵉⵏ ⵡⴰⵔ ⵉⴼⴻⵏⵏⵉⵏ ⵓ ⵎⵉⵏ ⵖⴰ ⵉⵎⵎⵓⵜⴻⵏ ⵉⵜⵜⵅⴻⵚⵚⴰ ⴰⵙ ⴰⴷ ⵢⴰⵔⴹ ⵎⵉⵏ ⵡⴰⵔ ⵉⵜⵜⵎⴻⵜⵜⵉⵏ.

54 ⵓⵛⴰ ⵅⵎⵉ ⵎⵉⵏ ⵉⴼⴻⵏⵏⴰⵏ ⴰⴷ ⵢⴰⵔⴹ ⵎⵉⵏ ⵡⴰⵔ ⵉⴼⴻⵏⵏⵉⵏ ⵓ ⵎⵉⵏ ⵖⴰ ⵉⵎⵎⵓⵜⴻⵏ ⴰⴷ ⵢⴰⵔⴹ ⵎⵉⵏ ⵡⴰⵔ ⵉⵜⵜⵎⴻⵜⵜⵉⵏ, ⵍⴻⵅⴷⴻⵏⵏⵉ ⴰⴷ ⵉⴽⴻⵎⵎⴻⵍ ⵡⴰⵡⴰⵍ ⵉ ⵉⵜⵜⵡⴰⵔⵉⵏ:

“ⵍⵎⴻⵡⵜ ⴰⵇⴰ ⵜᵉⵜⵜⵡⴰⵚⴰⵔⴹ ⴷⴻⴳ ⵍⴻⵖⵍⴻⴱ.” ◘15:54 ⵉⵛⴰ. 25:8.

55 “ⴰ ⵍⵎⴻⵡⵜ, ⵎⴰⵏⵉ ⵉⴵⴰ ⵓⵙⴻⵏⵏⴰⵏ ⵏⵏⴻⵎ?

ⴰ ⵍⴰⵅⴰⵔⵜ, ⵎⴰⵏⵉ ⵉⴵⴰ ⵍⴻⵖⵍⴻⴱ ⵏⵏⴻⵎ?” ◘15:55 ⵃⵓⵛ. 13:14; ⵄⴱⵔ. 2:14.

56 ⴰⵇⴰ ⴰⵙⴻⵏⵏⴰⵏ ⵏ ⵍⵎⴻⵡⵜ ⴷ ⴷⴷⴻⵏⴱ, ⵓⵛⴰ ⵊⵊⴻⵀⴷ ⵏ ⴷⴷⴻⵏⴱ ⴰⵇⴰ-ⵜⵜ ⴷ ⵛⵛⴰⵔⵉⵄⴰ. 57 ⵎⴰⵛⴰ ⴰⵇⴰⴷⵉ ⵉ ⴰⵔⴻⴱⴱⵉ, ⵡⴻⵏⵏⵉ ⴷ ⴰⵏⴻⵖ ⵉⵡⵛⵉⵏ ⵍⴻⵖⵍⴻⴱ ⵙ ⵙⵉⴷⵉⵜⵏⴻⵖ ⵢⴰⵙⵓⵄ ⵍⵎⴰⵙⵉⵃ. ◘15:57 1 ⵢⵃ. 5:5.

58 ⵙ ⵓⵢⴰ, ⴰ ⴰⵢⵜⵎⴰ ⵉⵄⵉⵣⵣⴻⵏ, ⴱⴻⴷⴷⴻⵎ ⵏⵉⵛⴰⵏ ⵓ ⴱⵍⴰ ⴰⵏⵀⴻⵣⵣⵉ, ⴰⵔⵏⵉⵎ ⵍⴻⴱⴷⴰ ⴷⵉ ⵍⵅⴻⴷⵎⴻⵜ ⵏ ⵙⵉⴷⵉ ⵙ ⵓⴼⴻⵢⵢⴻⴹ, ⴰⵎ ⵜⴻⵙⵙⵏⴻⵎ ⴱⴻⵍⵍⵉ ⵍⵅⴻⴷⵎⴻⵜ ⵏⵡⴻⵎ ⵡⴰⵔ ⵜⴻⴵⵉ ⴱⴰⵟⴻⵍ ⴷⵉ ⵙⵉⴷⵉ.