1 ⵎⵉⵏⵣⵉ ⵜⵓⵖⴰ ⵛⵛⴰⵔⵉⵄⴰ ⴷ ⵜⵉⵍⵉ ⵏ ⵍⵅⴰⵔ ⵉ ⴷⴷ ⵖⴰ ⵢⴰⵙⴻⵏ ⵡⴰⵀⴰ, ⵡⴰⵔ ⵖⴰⵔⴻⵙ ⵟⵟⴱⵉⵄⴻⵜ ⵏ ⵜⵎⴻⵙⵍⴰⵢⵉⵏ ⵙⵉⵎⴰⵏⵜ ⵏⵙⴻⵏⵜ. ⵙ ⵓⵢⴻⵏⵏⵉ ⵡⴰⵔ ⵣⴻⵎⵎⴰⵔⴻⵏⵜ ⵜⵖⴰⵔⵚⴰ ⵏⵏⵉ, ⵡⴰⵅⵅⴰ ⵉⵡⵢⴻⵏ ⵜⴻⵏⵜ-ⵉ-ⴷⴷ ⴽⵓⵍ ⴰⵙⴻⴳⴳⵯⴰⵙ, ⴰⴷ ⴰⵡⵢⴻⵏⵜ ⵍⴻⴽⵎⴰⵔⴻⵜ ⵅ ⵢⵉⵏⵏⵉ ⵜⴻⵏⵜ ⴷⴷ-ⵉⵜⵜⵇⴰⵔⵔⴰⴱⴻⵏ. ◘10:1 ⴽⵓⵍ. 2:17; ⵄⴱⵔ. 8:5. 2 ⵎⵉⵏⵣⵉ ⵎⴰⵍⴰ ⵉⴱⴰⵏ-ⴷⴷ ⴰⵇⴰ ⵜᵉⵜⵜⴰⵡⵢⴻⵏⵜ ⵖⴰⵔ ⵍⴻⴽⵎⴰⵔⴻⵜ, ⴰⴷ ⵜⵉⵍⵉ ⵜⵜⵡⴰⵙⵙⴱⴻⴷⴷⴻⵏ ⵏⵉⵜⵏⵉ ⵣⴻⴳ ⵓⵡⴻⵀⵀⴻⴱ ⵏ ⵜⵖⴰⵔⵚⴰ ⵏⵙⴻⵏ ⴰⵟⵟⴰⵙ ⵣⴻⴳ ⵡⴰⵎⵉ, ⵎⵉⵏⵣⵉ ⵡⴰⵔ ⵜᵉⵜⵜⵡⴰⴽⴽⵯⵓⵔ ⵄⴰⴷ ⵜⵏⴻⴼⵙⴻⵛⵜ ⵏⵙⴻⵏ ⵙ ⴷⴷⴻⵏⴱ ⴰⵡⴰⵔⵏⵉ ⵍⴰⵎⵉ ⵜⵜⵡⴰⵙⵙⵉⵣⴻⴷⴳⴻⵏ ⵉⵛⵜ ⵏ ⵜⵡⴰⵍⴰ. 3 ⵎⴰⵛⴰ ⵙ ⵎⴰⵏ ⴰⵢⴰ ⵜⵜⵡⴰⵙⵙⴼⴻⴽⴽⴰⵔⴻⵏ ⴰⵙⴻⵏ-ⴷⴷ ⴷⴷⵏⵓⴱ ⵏⵙⴻⵏ ⴽⵓⵍ ⴰⵙⴻⴳⴳⵯⴰⵙ, 4 ⵎⵉⵏⵣⵉ ⵉⴷⴰⵎⵎⴻⵏ ⵏ ⵉⴼⵓⵏⴰⵙⴻⵏ ⵉⵎⴻⵥⵢⴰⵏⴻⵏ ⴷ ⵉⵖⴰⵢⴹⴻⵏ ⵡⴰⵔ ⵣⴻⵎⵎⴰⵔⴻⵏ ⴰⴷ ⵙⵙⵉⵣⴷⴻⴳⴻⵏ ⵣⵉ ⴷⴷⵏⵓⴱ. ◘10:4 ⵍⴰⵡⵉ 16:14; ⵍⵅⵍ. 19:4; ⵄⴱⵔ. 9:13. 5 ⵙ ⵓⵢⴻⵏⵏⵉ ⵍⴰⵎⵉ ⴷⴷ-ⵢⵓⴷⴻⴼ ⵖⴰⵔ ⴷⴷⵓⵏⴻⵛⵜ, ⵉⵏⵏⴰ:

“ⵜⵉⵖⴰⵔⵚⴰ ⵏⵉⵖ ⵜⵉⵡⵀⵉⴱⵉⵏ ⵡⴰⵔ ⵜⴻⵏⵜ ⵜⴻⵅⵙⴻⴷ,

ⵎⴰⵛⴰ ⴰⵇⴰ ⵜⴻⵙⵙⵢⴰⵔⴹⴻⴷ ⴰⵢⵉ ⵉⵛⵜ ⵏ ⴰⵔⵔⵉⵎⴻⵜ. ◘10:5 ⵉⵥⵀⴷ. 40:7; ⵉⵛⴰ. 1:11; ⵉⵔⵎ. 6:20; ⵄⴰⵎ. 5:21.

6 ⵜⵉⵖⴰⵔⵚⵉⵏ ⵏ ⵡⴻⵛⵎⴰⴹ

ⴰⴽ-ⴷ ⵜⵉⵖⴰⵔⵚⴰ ⵏ ⵍⴻⵀⵏⴰ ⵉ ⴷⴷⵏⵓⴱ

ⵡⴰⵔ ⵜⴻⵏⵜ ⵜᵉⵜⵜⴰⵔⴻⴷ.”

7 ⵍⴻⵅⴷⴻⵏⵏⵉ ⵏⵏⵉⵖ:

“ⵅⵣⴰⵔ, ⴰⴷ ⴷⴷ-ⴰⵙⴻⵖ!

- ⵎⵉⵏⵣⵉ ⵢⵓⵔⴰ ⵅⴰⴼⵉ ⴷⴻⴳ ⵡⴻⴷⵍⵉⵙ ⵉⵜⵜⵡⴰⵏⴹⴻⵏ -

ⵃⵉⵎⴰ ⴰⴷ ⴳⴳⴻⵖ ⵎⵉⵏ ⵜⴻⵅⵙⴻⴷ ⵛⴻⴽ, ⴰ ⴰⵔⴻⴱⴱⵉ!” ◘10:7 ⵉⵥⵀⴷ. 40:8, 9

8 ⵜⵓⵖⴰ ⵉⵏⵏⴰ ⵇⴱⴻⵍ: “ⵜⵉⵖⴰⵔⵚⵉⵏ ⴷ ⵜⴻⵡⵀⵉⴱⵉⵏ ⴷ ⵜⵖⴰⵔⵚⵉⵏ ⵙ ⵜⵎⴻⵙⵙⵉ ⴷ ⵜⵖⴰⵔⵚⵉⵏ ⵉ ⴷⴷⵏⵓⴱ ⵡⴰⵔ ⵜⴻⵏⵜ ⵜⴻⵅⵙⴻⴷ!”, ⵡⴰⵅⵅⴰ ⴰⵇⴰ ⴰⵜⴻⵏⵜ ⵜⵜⵡⴰⵇⴻⴷⴷⵎⴻⵏⵜ ⵄⵍⴰⵃⵙⴰⴱ ⵛⵛⴰⵔⵉⵄⴰ. 9 ⴰⵡⴰⵔⵏⵉ ⵎⴰⵏ ⴰⵢⴰ ⵉⵏⵏⴰ: “ⵅⵣⴰⵔ, ⵓⵙⵉⵖ-ⴷⴷ ⵃⵉⵎⴰ ⴰⴷ ⴳⴳⴻⵖ ⵎⵉⵏ ⵜⴻⵅⵙⴻⴷ ⵛⴻⴽ, ⴰ ⴰⵔⴻⴱⴱⵉ.” ⵙ ⵓⵢⴰ ⵉⴽⴽⴻⵙ ⴰⵎⴻⵣⵡⴰⵔ, ⵃⵉⵎⴰ ⴰⴷ ⵉⵙⵙⴳⴻⵄⵄⴻⴷ ⵡⵉⵙⵙ ⵜⵏⴰⵢⴻⵏ. 10 ⵎⴰⵖⴰⵔ ⵙ ⵎⴰⵏ ⴰⵢⴰ, ⵙ ⵍⵅⴰⴹⴰⵔ ⵏⵏⴻⵙ, ⴰⵇⴰ ⵏⴻⵜⵜⵡⴰⵇⴻⴷⴷⴻⵙ ⴷⴻⴳ ⵉⵛⵜ ⵏ ⵜⵡⴰⵍⴰ ⵙ ⵜⵖⴰⵔⵚⵜ ⵏ ⴰⵔⵔⵉⵎⴻⵜ ⵏ ⵢⴰⵙⵓⵄ ⵍⵎⴰⵙⵉⵃ. ◘10:10 ⵄⴱⵔ. 9:12.

11 ⵎⴰⵖⴰⵔ ⴽⵓⵍ ⴰⴽⴻⵀⵀⴰⵏ ⵉ ⵜⵓⵖⴰ ⵉⵜⵜⵙⴻⵅⵅⴰⵔ ⴽⵓⵍ ⴰⵙⵙ, ⴰⵇⴰ ⵉⵡⴻⵀⵀⴻⴱ ⴰⵟⵟⴰⵙ ⵏ ⵜⵡⴰⵍⴰⵡⵉⵏ ⵙⵉⵎⴰⵏⵜ ⵏ ⵜⵖⴰⵔⵚⴰ, ⵜⵉⵏⵏⵉ ⵡⴰⵔ ⵉⵣⴻⵎⵎⴰⵔⴻⵏ ⴰⴷ ⵙⵙⵉⵣⴻⴷⴳⴻⵏⵜ ⵣⵉ ⴷⴷⵏⵓⴱ. 12 ⵎⴰⵛⴰ ⵡⴰⵏⵉⵜⴰ ⵉⵇⴻⴷⴷⴻⵎ ⵉⵛⵜ ⵏ ⵜⵖⴰⵔⵚⵜ ⵅ ⴷⴷⵏⵓⴱ, ⵓⵛⴰ ⵅⴻⵏⵏⵉ ⵉⵇⵇⵉⵎ ⵅ ⵢⴻⴼⵓⵙ ⵏ ⴰⵔⴻⴱⴱⵉ ⵉ ⵍⴻⴱⴷⴰ. ◘10:12 ⵉⵥⵀⴷ. 110:1; ⵍⴻⵅ. 2:34; 1 ⴽⵓⵔ. 15:25; ⴰⴼⴰ. 1:20; ⴽⵓⵍ. 3:1; ⵄⴱⵔ. 1:13. 13 ⵣⵉ ⵍⴻⵅⴷⴻⵏⵏⵉ ⵉⵜⵜⵔⴰⵊⴰ ⴰⵍ ⴷ ⴰⵙ ⵜⵜⵡⴰⴳⴳⴻⵏ ⵍⵄⴻⴷⵢⴰⵏ ⵏⵏⴻⵙ ⴷ ⵜⴰⵏⴻⴱⴷⴰⵜ ⵙⴰⴷⵓ ⵉⴹⴰⵔⴻⵏ ⵏⵏⴻⵙ. 14 ⵎⵉⵏⵣⵉ ⵙ ⵉⵛⵜ ⵏ ⵜⵖⴰⵔⵚⵜ ⴰⵇⴰ ⵢⵉⵡⵉ ⵉⵏⵏⵉ ⵣⵣⴰⵢⴻⵙ ⵉⵜⵜⵡⴰⵇⴻⴷⴷⵙⴻⵏ ⵖⴰⵔ ⵍⴻⴽⵎⴰⵔⴻⵜ ⵉ ⵍⴻⴱⴷⴰ.

15 ⵎⴰⵛⴰ ⴰⵔⵔⵓⵃ ⵉⵇⴻⴷⴷⵙⴻⵏ ⵄⴰⵡⴻⴷ ⵉⵛⵀⴻⴷ ⵉ ⵏⴻⵛⵛⵉⵏ, ⵉⵇⵇⴰⵔ:

16 “ⴷ ⵡⴰ ⴷ ⵍⵄⴰⵀⴷ ⵉ ⴷ ⴰⵙⴻⵏ ⵖⴰ ⵡⵛⴻⵖ

ⴰⵡⴰⵔⵏⵉ ⵉ ⵡⵓⵙⵙⴰⵏ ⵏⵏⵉ, ⵉⵇⵇⴰⵔ ⵙⵉⴷⵉ:

‘ⴰⴷ ⴳⴳⴻⵖ ⵛⵛⴰⵔⵉⵄⴰ ⵉⵏⵓ ⴷⵉ ⵍⴻⵄⵇⴻⵍ ⵏⵙⴻⵏ,

ⴰⴷ ⵜⵜ ⴰⵔⵉⵖ ⵄⴰⵡⴻⴷ ⴷⴻⴳ ⵡⵓⵍⴰⵡⴻⵏ ⵏⵙⴻⵏ, ◘10:16 ⵉⵔⵎ. 31:31-34; ⵔⵓⵎ. 11:27; ⵄⴱⵔ. 8:8.

17 ⵓⵛⴰ ⴷⴷⵏⵓⴱ ⵏⵙⴻⵏ ⴷ ⵉⵅⴻⵟⵟⴰⵏ ⵏⵙⴻⵏ,

ⵄⴻⵎⵎⴰⵔⵚ ⴰⴷ ⴷⴰⵢⵙⴻⵏ ⴼⴻⴽⴽⴰⵔⴻⵖ ⵄⴰⴷ.’ ” ◘10:17 ⵉⵔⵎ. 31:33, 34.

18 ⵎⴰⵏⵉ ⵉⵜⵜⵉⵍⵉ ⵅⴻⵏⵏⵉ ⵡⴻⵖⴼⴰⵔ ⵉ ⴷⴷⵏⵓⴱ, ⵡⴰⵔ ⴷⵉⵏ ⵉⵇⵇⵉⵎ ⵄⴰⴷ ⵜⵖⴰⵔⵚⵜ ⵅ ⴷⴷⵏⵓⴱ. 19 ⵙ ⵓⵢⴻⵏⵏⵉ, ⴰ ⴰⵢⵜⵎⴰ, ⴰⵇⴰ ⵖⴰⵔⵏⴻⵖ ⵜⵜⵉⵇⵇⴻⵜ ⵎⴰⵃⴻⵏⴷ ⴰⴷ ⵏⴰⴷⴻⴼ ⵖⴰⵔ ⵣⵣⴰⵡⴻⵛⵜ ⵉⵇⴻⴷⴷⵙⴻⵏ ⵙ ⵉⴷⴰⵎⵎⴻⵏ ⵏ ⵢⴰⵙⵓⵄ, ◘10:19 ⵢⵃ. 10:9; 14:6; ⵔⵓⵎ. 5:2; ⴰⴼⴰ. 2:13; 3:12. 20 ⵅ ⵡⴻⴱⵔⵉⴷ ⵏ ⵊⴷⵉⴷ ⵉⴷⴷⴰⵔⴻⵏ ⵉ ⴷ ⴰⵏⴻⵖ ⵉⵙⵙⴻⵡⵊⴻⴷ ⴰⵎ ⵡⴻⴱⵔⵉⴷ ⵏ ⵊⴷⵉⴷ ⵉ ⴷⴷ-ⵉⵜⵜⴰⴷⴼⴻⵏ ⵖⴰⵔ ⴷⴰⵅⴻⵍ ⵏ ⵓⵍⴻⵃⵃⴰⴼ ⵏ ⵜⴻⵡⵡⴰⵔⵜ, ⵡⴻⵏⵏⵉ ⴷ ⵡⴻⵢⵙⵓⵎ ⵏⵏⴻⵙ, 21 ⵓⵛⴰ ⴰⵇⴰ ⵖⴰⵔⵏⴻⵖ ⵄⴰⵡⴻⴷ ⴰⵔⵔⴰⵢⵙ ⵏ ⵉⴽⴻⵀⵀⴰⵏⴻⵏ ⵅ ⵜⴰⴷⴷⴰⵔⵜ ⵏ ⴰⵔⴻⴱⴱⵉ. ◘10:21 ⴰⴼⴰ. 2:19; 1 ⵜⵉⵎ. 3:1; 1 ⴱⵟ. 4:17 22 ⴻⵊⵊ ⴰⵏⴻⵖ ⵅⴻⵏⵏⵉ ⴰⴷ ⴷⴷ-ⵏⵇⴰⵔⵔⴻⴱ ⵙ ⵡⵓⵍ ⵏ ⵜⵉⴷⴻⵜⵜ, ⴷⵉ ⵜⵜⵉⵇⵇⴻⵜ ⵏ ⵍ’ⵉⵎⴰⵏ, ⴰⵎ ⵜⵜⵡⴰⵔⵓⵛⵛⴻⵏ ⵡⵓⵍⴰⵡⴻⵏ ⵏⵏⴻⵖ ⵓ ⵜⵜⵡⴰⵙⵙⵉⵣⴷⴻⴳⴻⵏ ⵄⴰⵡⴻⴷ ⵣⵉ ⵜⵏⴻⴼⵙⴻⵛⵜ ⵜⴰⵄⴻⴼⴼⴰⵏⵜ, ⵓ ⴰⵎ ⵜᵉⵜⵜⵡⴰⵙⵙⵉⵔⴷ ⵄⴰⵡⴻⴷ ⴰⵔⵔⵉⵎⴻⵜ ⵏⵏⴻⵖ ⵙ ⵡⴰⵎⴰⵏ ⵉⵚⴼⴰⵏ. ◘10:22 ⵃⵉⵥ. 36:25. 23 ⴻⵊⵊ ⴰⵏⴻⵖ ⴰⴷ ⵏⵛⴻⴱⴱⴰⵔ ⴷⵉ ⵛⵛⵀⴰⴷⴻⵜ ⵏ ⵓⵙⵉⵜⴻⵎ ⵏⵏⴻⵖ ⴱⵍⴰ ⵎⴰ ⴰⴷ ⵏⴰⵔⵊⵉⵊ, ⵎⵉⵏⵣⵉ ⴷ ⵡⴻⵏⵏⵉ ⴷ ⴰⵏⴻⵖ ⵉⵡⵛⵉⵏ ⵍⵡⴰⵄⴷ, ⴷⴰⵢⴻⵙ ⵍⴰⵎⴰⵏ. 24 ⴻⵊⵊ ⴰⵏⴻⵖ ⴰⴷ ⵏⴻⵃⴹⴰ ⵉⵊⵊ ⵉ ⵡⴻⵏⵏⴻⵖⵏⵉ ⵃⵉⵎⴰ ⴰⴷ ⵏⴻⴳⴳ ⵓⵍ ⴷⴻⴳ ⵡⴰⵢⴰⵡⵢⴰ ⵖⴰⵔ ⵜⴰⵢⵔⵉ ⵓ ⵖⴰⵔ ⵍⴻⵅⴷⴰⵢⴻⵎ ⵜⵉⵚⴻⴱⵃⴰⵏⵉⵏ. 25 ⵡⴰⵔ ⵏᵉⵜⵜⴻⵊⵊⵉ ⵛⴰ ⵜⴰⵎⴻⵙⵎⵓⵏⵜ ⵏⵏⴻⵖ ⴰⵎ ⵎⴰⵎⵎⴻⵛ ⵏⵏⵓⵎⴻⵏ ⵛⴰ, ⵎⴰⵛⴰ ⴰⴷ ⵏⴻⵙⵙⴻⵎⵃⴻⴹ ⵉⵊⵊⴻⵏ ⵡⴻⵏⵏⴻⵖⵏⵉ, ⵎⴰⵀⵓ ⵄⴰⴷ ⵅⵎⵉ ⵖⴰ ⵜⵥⴰⵔⴻⵎ ⴰⵇⴰ ⴰⵙⵙ ⵏⵏⵉ ⵢⵉⵡⴻⴹ-ⴷⴷ.

26 ⵎⵉⵏⵣⵉ ⵎⴰⵍⴰ ⵉⵅⴹⴰ ⵛⴰ ⵏ ⵉⵊⵊ ⵏⴻⵄⵎⴰⴷⴰ ⴰⵡⴰⵔⵏⵉ ⵎⴰ ⵉⵟⵟⴻⴼ ⵜⵓⵙⵙⵏⴰ ⵏ ⵜⵉⴷⴻⵜⵜ, ⵅⴻⵏⵏⵉ ⵡⴰⵔ ⵜⴻⵇⵇⵉⵎ ⵄⴰⴷ ⵜⵖⴰⵔⵚⵜ ⵅ ⴷⴷⵏⵓⴱ, ◘10:26 ⵍⵅⵍ. 15:30; ⵎⵜ. 12:31; ⵄⴱⵔ. 6:4; 2 ⴱⵟ. 2:20; 1 ⵢⵃ. 5:16. 27 ⵎⴰⵛⴰ ⵎⵖⵉⵔ ⴰⵔⴰⵊⵉ ⵏ ⵍⵃⵉⵙⴰⴱ ⵉⵙⵙⵏⴻⵅⵍⵄⴻⵏ ⴷ ⵍⵄⴰⴱⵓⵇ ⵏ ⵜⵎⴻⵙⵙⵉ ⵏⵏⵉ ⵉ ⵖⴰ ⵉⵛⵛⴻⵏ ⵍⵄⴻⴷⵢⴰⵏ. 28 ⵎⴰⵍⴰ ⵉⵅⴹⴰ ⵃⴻⴷ ⴰⴽ-ⴷ ⵛⵛⴰⵔⵉⵄⴰ ⵏ ⵎⵓⵙⴰ, ⵉⵜⵜⵅⴻⵚⵚⴰ ⴰⴷ ⵉⵎⵎⵓⵜ ⴱⵍⴰ ⴰⵔⵔⴻⵃⵎⴻⵜ ⵅ ⵓⵇⴻⵎⵎⵓⵎ ⵏ ⵜⵏⴰⵢⴻⵏ ⵏⵉⵖ ⵜⵍⴰⵜⴰ ⵏ ⵍⴻⵛⵀⵓⴷ. ◘10:28 ⵍⵅⵍ. 35:30; ⴰⵄⵡⴷ. 17:6; 19:15; ⵎⵜ. 18:16; 2 ⴽⵓⵔ. 13:1. 29 ⵎⴻⵛⵃⴰⵍ ⴽⵜⴰⵔ ⵉⵜⵜⵅⴻⵚⵚⴰ ⴰⴷ ⵉⵀⵡⴰ ⵍⵄⵉⵇⴰⴱ ⵅ ⵓⵣⴻⴵⵉⴼ ⵏ ⵡⴻⵏⵏⵉ ⵉⵄⴻⴼⴼⵙⴻⵏ ⵅ ⵎⵎⵉⵙ ⵏ ⴰⵔⴻⴱⴱⵉ, ⴷ ⵡⴻⵏⵏⵉ ⵉⵃⴻⵙⵙⴱⴻⵏ ⵉⴷⴰⵎⵎⴻⵏ ⵏ ⵍⵄⴰⵀⴷ ⵏⵏⴻⵙ ⵉ ⵣⵉ ⵜⵓⵖⴰ ⵉⵜⵜⵡⴰⵇⴻⴷⴷⴻⵙ ⴰⵎⴻⵛⵏⴰⵡ ⵉⴷⴰⵎⵎⴻⵏ ⵏ ⵎⴰⵔⵔⴰ ⵉⵡⴷⴰⵏ, ⴷ ⵡⴻⵏⵏⵉ ⵉⵙⵙⴻⵃⵇⴰⵔⴻⵏ ⵄⴰⵡⴻⴷ ⴰⵔⵔⵓⵃ ⵏ ⴰⵔⴹⴰ? 30 ⵎⵉⵏⵣⵉ ⵏⴻⵙⵙⴻⵏ ⴷ ⵡⴻⵏⵏⵉ ⵉⵏⵏⴰⵏ:

“ⴰⵏⵜⴰⵇⴻⵎ ⵉ ⵏⴻⵛⵛ ⵓⵎⵉ ⵉⴵⴰ,

ⵏⴻⵛⵛ ⴰⴷ ⵜ ⵅⴻⴵⵚⴻⵖ!”

ⵓⵛⴰ ⵄⴰⵡⴻⴷ:

“ⵙⵉⴷⵉ ⴰⴷ ⵉⵃⴽⴻⵎ ⵍⴳⴻⵏⵙ ⵏⵏⴻⵙ.” ◘10:30 ⴰⵄⵡⴷ. 32:35, 36; ⵔⵓⵎ. 12:19.

31 ⵙⵙⴻⵄⴷ ⴷ ⴰⴱⴰⵔⵛⴰⵏ ⵉ ⵡⴻⵏⵏⵉ ⵉ ⵖⴰ ⵉⵡⴹⴰⵏ ⴷⴻⴳ ⵉⴼⴰⵙⵙⴻⵏ ⵏ ⴰⵔⴻⴱⴱⵉ ⵉⴷⴷⴰⵔⴻⵏ. 32 ⵙ ⵓⵢⴰ ⴼⴻⴽⴽⴰⵔⴻⵎ ⴷⴻⴳ ⵡⵓⵙⵙⴰⵏ ⵉⵎⴻⵣⵡⵓⵔⴰ ⵍⴰⵎⵉ ⵜᵉⵜⵜⵡⴰⵙⵙⵖⴻⴹⵚⴻⵎ ⵓ ⵜⵓⵖⴰ ⵜⴰⵔⴻⴱⴱⵓⵎ ⴰⵎⴻⵏⵖⵉ ⴰⵎⴻⵇⵇⵔⴰⵏ ⴰⵎ ⵎⴰⵎⵎⴻⵛ ⵅⴰⵡⴻⵎ ⵜⴻⴽⴽⴰ ⵍⴻⴼⴹⵉⵃⴻⵜ ⴷ ⵍⵎⴻⵃⵏⴻⵜ. 33 ⵜⴷⴻⵡⵍⴻⵎ ⴷ ⵉⵊⵊ ⵏ ⴰⴼⵓⵔⵔⴻⵊ ⵓ ⵜⵛⴰⵔⵛⴻⵎ ⴰⴽ-ⴷ ⵉⵏⵏⴻⵖⵏⵉ ⵓⵎⵉ ⴷⴰⵢⵙⴻⵏ ⵉⵜⵜⵡⴰⴳⴳ ⴰⵎⵎⵓ ⴽⵉⴼⴽⵉⴼ. 34 ⵎⵉⵏⵣⵉ ⵜⴻⴽⵙⵉⵎ ⴰⵎⵏⵓⵙ ⵅ ⵢⵉⵏⵏⵉ ⵉⵜⵜⵡⴰⵃⴻⴱⴱⵙⴻⵏ, ⵓⵛⴰ ⵜⵇⴻⴱⵍⴻⵎ ⴰⴽⴻⵛⵛⴻⴹ ⵏ ⵡⴰⴳⵍⴰ ⵏⵡⴻⵎ ⵙ ⵍⴻⴼⵔⴰⵃⴻⵜ, ⵜⴻⵙⵙⵏⴻⵎ ⴱⴻⵍⵍⵉ ⵖⴰⵔⵡⴻⵎ ⴰⴳⵍⴰ ⵉⵎⵖⴰⵔ ⵉ ⵡⴰⵔ ⵉⴼⴻⵏⵏⵉⵏ ⴷⴻⴳ ⵉⵊⴻⵏⵡⴰⵏ. ◘10:34 ⵎⵜ. 5:12; ⵍⴻⵅ. 21:33. 35 ⵡⴰⵔ ⵏⴻⵟⵟⴰⵔⴻⵎ ⵛⴰ ⵜⴰⵔⵢⴰⵙⵜ ⵏⵡⴻⵎ ⵏⵏⵉ ⵖⴰⵔ ⵜⴻⴵⴰ ⵉⵛⵜ ⵏ ⵍⵎⵓⵏⴻⵜ ⵜⴻⵎⵖⴰⵔ. 36 ⵎⵉⵏⵣⵉ ⵉⵜⵜⵅⴻⵚⵚⴰ ⴽⴻⵏⵏⵉⵡ ⵚⵚⴱⴰⵔ ⵃⵉⵎⴰ ⴰⴷ ⵜⴻⴳⴳⴻⵎ ⵎⵉⵏ ⵉⵅⵙ ⴰⵔⴻⴱⴱⵉ ⵓ ⵎⴰⵃⴻⵏⴷ ⴰⴷ ⵜᵉⵟⵟⴼⴻⵎ ⵍⵡⴰⵄⴷ. ◘10:36 ⵍⴽ. 21:19.

37 “ⵎⵉⵏⵣⵉ ⴷⵔⵓⵙ ⵏ ⵍⵡⴻⵇⵜ ⵉ ⴷⵉⵏⵏⵉ, ⵡⴰⵀ ⴷⵔⵓⵙ,

ⴰⵍ ⵡⴻⵏⵏⵉ ⴷⴷ ⵖⴰ ⵢⴰⵙⴻⵏ ⴰⴷ ⵉⵅⴻⵛⵛ,

ⵡⴰⵔ ⵉⵜⵜⵄⴻⵟⵟⴰⵍ ⵛⴰ. ◘10:37 ⵃⴰⴱ. 2:2-3; ⵃⴰⴳ. 2:7; 1 ⴱⵟ. 1:6; 5:10.

38 ⵎⴰⵛⴰ ⴰⵎⵙⴻⴳⴳⴰⴷ ⵙ ⵍ’ⵉⵎⴰⵏ ⵉⵏⵓ ⴰⴷ ⵉⴷⴷⴰⵔ,

ⵎⴰⵛⴰ ⵎⴰⵍⴰ ⵉⵙⵎⴻⵃ,

ⵡⴰⵔ ⴷⴰⵢⴻⵙ ⵢⴰⵔⴻⵟⵟⵉ ⵍⴻⵄⵎⴰⵔ ⵉⵏⵓ.” ◘10:38 ⵃⴰⴱ. 2:4; ⵔⵓⵎ. 1:17; ⴳⴰⵍ. 3:11.

39 ⵎⴰⵛⴰ ⵏⴻⵛⵛⵉⵏ ⵡⴰⵔ ⵖⴰⵔⵏⴻⵖ ⵎⵉⵏ ⵖⴰ ⵏⴻⴳⴳ ⵙ ⵜⴰⵔⴻⵅⵅⵓⵜ ⵉ ⵉⵜⵜⴰⵡⵢⴻⵏ ⵖⴰⵔ ⵜⵅⴻⵙⵙⴰⵔⵜ, ⵎⴰⵛⴰ ⵖⴰⵔⵏⴻⵖ ⵍ’ⵉⵎⴰⵏ ⵉ ⵉⵜⵜⴰⵡⵢⴻⵏ ⵖⴰⵔ ⵓⵙⴻⵏⵊⴻⵎ ⵏ ⵍⴻⵄⵎⴰⵔ ⵏⵏⴻⵖ.