1 ⵎⴰⵛⴰ ⵜⵓⵖⴰ ⴷⵉⵏ ⵄⴰⵡⴻⴷ ⵊⴰⵔ ⵍⴳⴻⵏⵙ ⵉⵏⴰⴱⵉⵢⵢⴻⵏ ⵉⵙⵙⵅⴰⵔⵔⵉⵇⴻⵏ, ⴰⵎ ⵎⴰⵎⵎⴻⵛ ⵉ ⵖⴰ ⵉⵍⵉⵏ ⵓⵍⴰ ⴷ ⵉⵎⴻⵙⵖⴰⵔⴻⵏ ⵉⵙⵙⵅⴰⵔⵔⵉⵇⴻⵏ ⵊⴰⵔ ⴰⵡⴻⵎ, ⴰⴷ ⵙⵙⵉⴷⴼⴻⵏ ⵜⵉⴱⵔⵉⴷⵉⵏ ⵉⵜⵜⴰⵔⴻⴷⴷⴵⴻⵏ, ⴰⴷ ⵏⴽⴰⵔⴻⵏ ⵙⵉⴷⵉ ⵉ ⵜⴻⵏ ⵉⵙⵖⵉⵏ, ⴰⴷ ⵙⵙⵉⵡⴹⴻⵏ ⴰⵎⵎⵓ ⴰⵔⴻⵢⵢⴻⴱ ⴷⴻⵖⵢⴰ ⵅ ⵢⵉⵅⴻⴼ ⵏⵙⴻⵏ. ◘2:1 ⴰⵄⵡⴷ. 13:2; ⵎⵜ. 24:11; ⵍⴻⵅ. 20:29; 1 ⵜⵉⵎ. 4:1; 2 ⵜⵉⵎ. 3:1. 2 ⴰⵟⵟⴰⵙ ⵉ ⵖⴰ ⵉⴹⴼⴰⵔⴻⵏ ⵜⴰⵅⵎⵓⵊⵉ ⵏⵙⴻⵏ ⴰⵍ ⵖⴰ ⵉⵜⵜⵡⴰⵛⴻⵇⵇⴻⴼ ⵡⴻⴱⵔⵉⴷ ⵏ ⵜⵉⴷⴻⵜⵜ ⵣⵉ ⵙⵙⵉⴱⴱⴻⵜ ⵏⵙⴻⵏ. 3 ⵙ ⵟⵟⵎⴻⵄ ⵓ ⵙ ⵡⴰⵡⴰⵍⴻⵏ ⵉⵜⵜⵡⴰⴳⴳⴻⵏ ⴰⴷ ⵣⵣⴰⵢⵡⴻⵎ ⴳⴳⴻⵏ ⴰⵎ ⵣⵉ ⵙⵙⴻⵍⵄⴻⵜ, ⵎⴰⵛⴰ ⵍⵃⵓⴽⵎ ⵅⴰⵙⴻⵏ ⵣⴻⴳ ⵡⴻⵛⵃⴰⵍ ⵓⵢⴰ ⵡⴰⵔ ⵉⴱⴹⵉⵍ ⵛⴰ ⵓⵛⴰ ⴰⵀⴻⵍⵍⴻⴽ ⵏⵙⴻⵏ ⵡⴰⵔ ⵉⵜⵜⵏⵓⴷⵓⵎ ⵛⴰ. ◘2:3 ⵢⴰⵀ. 4.

4 ⵎⵉⵏⵣⵉ ⵎⴰⵍⴰ ⴰⵔⴻⴱⴱⵉ ⵡⴰⵔ ⵉⵙⵙⴰⵔ ⵅ ⵍⵎⴰⵍⴰⴽⴰⵜ ⵉ ⵢⴻⴳⴳⵉⵏ ⴷⴷⵏⵓⴱ, ⵎⴰⵛⴰ ⵉⵏⴹⴰⵔ ⵉ-ⵜⴻⵏ ⴷⵉ ⵙⵙⵏⴰⵙⴻⵍ ⵏ ⵜⴰⴵⴻⵙⵜ ⴷⵉ ⵍⴰⴵⴰⵖ ⵢⵓⴵⵖⴻⵏ ⵓⵛⴰ ⵉⵙⴻⵍⵍⴻⵎ ⵉ-ⵜⴻⵏ ⵃⵉⵎⴰ ⴰⴷ ⵜⵜⵡⴰⵅⴻⵎⵎⵍⴻⵏ ⴰⵍ ⵍⵃⵓⴽⵎ ⵏ ⵓⵄⴻⴷⴷⴻⴱ, ◘2:4 ⵢⴰⵀ. 6; ⴰⵙⴰ. 20:3. 5 ⵓ ⵄⴰⵡⴻⴷ ⵡⴰⵔ ⵉⵙⵙⴰⵔ ⵅ ⴷⴷⵓⵏⴻⵛⵜ ⵏ ⵣⵉⵛ, ⵎⴰⵛⴰ ⵜⵓⵖⴰ ⵉⵃⴹⴰ ⵏⵓⵃ, ⵡⴻⵏⵏⵉ ⴷ ⵡⵉⵙⵙ ⵜⵎⴻⵏⵢⴰ, ⴰⵎⴱⴰⵔⵔⴻⵃ ⵏ ⵜⵙⴻⴳⴷⴰ, ⵍⴰⵎⵉ ⴷⴷ-ⵉⴹⵍⴻⵇ ⵍⵃⴻⵎⵍⴻⵜ ⵅ ⴷⴷⵓⵏⴻⵛⵜ ⵏ ⵍⴽⵓⴼⴼⴰⵔ, ◘2:5 ⴰⵎⵥ. 7:23; 1 ⴱⵟ. 3:19. 6 ⵓ ⵄⴰⵡⴻⴷ ⵍⴰⵎⵉ ⵉⵙⵙⴻⵛⵎⴻⴹ ⵏⴻⵜⵜⴰ ⵜⵉⵏⴻⴷⴷⴰⵎ ⵏ ⵙⴰⴷⵓⵎ ⴷ ⵄⴰⵎⵓⵔⵔⴰ ⵓ ⵉⵃⴽⴻⵎ ⵅⴰⵙⴻⵏⵜ ⵙ ⵓⵏⴻⵇⵍⴻⴱ, ⴰⵇⴰ ⵢⴰⵔⵔⴰ ⵉ-ⵜⴻⵏⵜ ⴷ ⵍⵎⵉⵜⴰⵍ ⵉ ⵍⴽⵓⴼⴼⴰⵔ ⵉ ⵖⴰ ⵢⵉⵍⵉⵏ ⵄⴰⴷ. ◘2:6 ⴰⵎⵥ. 19:24; ⴰⵄⵡⴷ. 29:22; ⵉⵛⴰ. 13:19; ⵉⵔⵎ. 50:40; ⵃⵉⵥ. 16:49; ⵃⵓⵛ. 11:8; ⵄⴰⵎ. 4:11; ⵢⴰⵀ. 7.

7 ⵄⴰⵡⴻⴷ ⵉⵙⵙⴻⵏⵊⴻⵎ ⵏⴻⵜⵜⴰ ⵍⵓⵜ, ⴰⵎⵙⴻⴳⴳⴰⴷ, ⵡⴻⵏⵏⵉ ⵜⵓⵖⴰ ⵉⵡⴻⴷⴷⴱⴻⵏ ⴰⵟⵟⴰⵙ ⵣⵉ ⵜⵉⵛⵍⵉ ⵉⵅⴻⵎⵊⴻⵏ ⵏ ⵢⵉⵏⵏⵉ ⵡⴰⵔ ⵖⴰⵔ ⵜⴻⴵⵉ ⵛⵛⴰⵔⵉⵄⴰ. ◘2:7 ⴰⵎⵥ. 19:7, 8. 8 ⵎⴰⵖⴰⵔ ⵓⵎⵉ ⴰⵎⵙⴻⴳⴳⴻⴷ ⵡⴰⵏⵉⵜⴰ ⵉⵥⵔⴰ ⴷ ⵉⵙⵍⴰ ⵜⵉⵎⴻⴳⴳⴰ ⵏⵙⴻⵏ ⵉ ⵡⴰⵔ ⴷⴷ-ⵢⵓⵙⵉⵏ ⴰⴽ-ⴷ ⵛⵛⴰⵔⵉⵄⴰ, ⵉⵜⵜⵡⴰⵄⴻⴷⴷⴰⴱ ⵍⴻⵄⵎⴰⵔ ⵏⵏⴻⵙ ⵉⵙⴻⴳⴳⴷⴻⵏ ⵣⴻⴳ ⵡⴰⵙⵙ ⴰⵍ ⵡⴰⵙⵙ, ⴰⵎ ⵜⵓⵖⴰ ⵉⵣⴻⴷⴷⴻⵖ ⵊⴰⵔ ⴰⵙⴻⵏ. ◘2:8 ⵉⵥⵀⴷ. 119:158. 9 ⴰⵎⵎⵓ ⵉ ⵉⵙⵙⴻⵏ ⵙⵉⴷⵉ ⵎⴰⵎⵎⴻⵛ ⵉ ⵖⴰ ⵉⵙⵙⵓⴼⴼⴻⵖ ⵉⵏⵏⵉ ⵜ ⵉⵜⵜⴻⴳⴳⵯⴻⴷⴻⵏ, ⵣⵉ ⵍⵎⴻⵃⵏⴻⵜ, ⵎⴰⵛⴰ ⵏⴻⵜⵜⴰ ⵉⵃⴻⵟⵟⴰ ⵉⵏⵏⵉ ⵡⴰⵔ ⵉⵙⴻⴳⴳⴷⴻⵏ ⵃⵉⵎⴰ ⴰⴷ ⵜⵜⵡⴰⵄⴻⴷⴷⴱⴻⵏ ⴷⴻⴳ ⵡⴰⵙⵙ ⵏ ⵍⵃⵉⵙⴰⴱ, ◘2:9 1 ⴽⵓⵔ. 10:13. 10 ⵎⴰⵀⵓ ⵇⴰⵄ ⵉⵏⵏⵉ ⵉⴹⴼⴰⵔⴻⵏ ⴷⴷⴰⵜ ⵏⵙⴻⵏ ⴰⵎ ⵜⵜⵎⴻⵥⵥⵔⴻⵏ ⴷⵉ ⵎⵉⵏ ⵉⵅⴻⵎⵊⴻⵏ, ⵓ ⵙⴻⵃⵇⴰⵔⵔⴰⵏ ⵚⵚⵓⵍⵟⴰ ⵏ ⵉⵊⴻⵏⵡⴰⵏ. ⴰⵇⴰ ⴰⵜⴻⵏ ⴷ ⵉⵎⵄⴻⴼⴼⴰⵔⴻⵏ ⴷ ⵉⵎⵏⴻⴼⴼⵅⴻⵏ, ⵡⴰⵔ ⵜⵜⴰⵔⵊⵉⵊⵉⵏ ⵣⵣⴰⵜ ⵎⵉⵏ ⵉⵄⵓⴵⴻⵏ ⴰⵎ ⵜⵜⵛⴻⵇⵇⴰⴼⴻⵏ. 11 ⵡⴰⵅⵅⴰ ⵍⵎⴰⵍⴰⴽⴰⵜ ⵓⵊⴰⵔⴻⵏⵜ ⵜⴻⵏ ⴷⵉ ⵚⵚⵓⵍⵟⴰ ⴷ ⵊⵊⴻⵀⴷ, ⵡⴰⵔ ⵅⴰⵙⴻⵏ ⵙⵙⵉⵡⵉⴹⴻⵏⵜ ⵍⵃⵓⴽⵎ ⵏ ⵙⵉⴷⵉ ⴷⵉ ⵙⵙⵉⴱⴱⴻⵜ ⵏ ⵓⵛⴻⵇⵇⴰⴼ. 12 ⵎⴰⵛⴰ ⵏⵉⵜⵏⵉ ⵙ ⵍⵄⴻⴽⵙ ⴵⴰⵏ ⴰⵎ ⵉⵎⵓⴷⴷⴰⵔⴻⵏ ⵉⴳⵏⴰⵡⴻⵏ ⵄⵍⴰⵃⵙⴰⴱ ⵟⵟⴱⵉⵄⴻⵜ, ⵉⵏⵏⵉ ⵢⵓⵔⴰⵏ ⵉ ⵜⵖⴰⵔⵚⵜ ⵙ ⵍⵎⵓⵙ ⴷ ⵜⴰⵊⴻⵢⵢⴰⴼⵜ ⴰⵎ ⵜⵜⵛⴻⵇⵇⴰⴼⴻⵏ ⴷⵉ ⵎⵉⵏ ⴷⵉ ⵡⴰⵔ ⴼⴻⵀⵀⵎⴻⵏ. ⴰⴷ ⵜⵜⵡⴰⵊⴻⵢⵢⴼⴻⵏ ⴷⵉ ⵜⵊⴻⵢⵢⴰⴼⵜ ⵏ ⵢⵉⵅⴻⴼ ⵏⵙⴻⵏ. ◼2:12 ⵉⵎⵓⴷⴷⴰⵔⴻⵏ-ⵏⵉⵖ ‘ⵍⵃⴰⵢⴰⵡⴰⵏⴰⵜ’.  ◘2:12 ⵉⵔⵎ. 12:3; ⵢⴰⵀ. 10. 13 ⵉⵏⴰ ⴷ ⵉⵏⵏⵉ ⵅ ⵜⴻⴵⴰ ⵍⵎⵓⵄⵚⵉⵢⵢⴻⵜ ⴷ ⵍⵎⵓⵏⴻⵜ ⵉ ⵍⵎⵓⵄⵚⵉⵢⵢⴻⵜ. ⵏⵉⵜⵏⵉ ⵃⴻⵙⴱⴻⵏ ⵜⴰⵡⴰⵔⵔⵉⵜ ⵏ ⵎⴻⵥⵔⵉ ⴷⴻⴳ ⵏⵏⴻⵛⵡⴰⵜ ⵙ ⵓⵣⵉⵍ ⴷ ⴰⴱⴰⵔⵔⴻⵄ ⴰⵎ ⵛⵛⵓⵔⴻⵏ ⵏⵉⵜⵏⵉ ⵙ ⵉⴱⴻⵇⵇⵉⴹⴻⵏ ⵏ ⵍⴻⵡⵙⴻⵅ. ⵅⵎⵉ ⵜⵜⴰⵔⵔⴰⵏ ⵏⵏⵉⵜⵏⵉ ⵎⴻⵥⵔⵉ ⴷⴻⴳ ⵓⵔⴰⵔⴻⵏ ⵏⵙⴻⵏ ⵏ ⵓⵖⴻⴱⴱⵉ, ⵙⴻⵍⵍⵎⴻⵏ ⵉⵅⴻⴼ ⵏⵙⴻⵏ ⵖⴰⵔ ⵜⵡⴰⵔⵔⵉⵜ ⵏ ⵎⴻⵥⵔⵉ ⵜⴰⵎⴻⵇⵇⵔⴰⵏⵜ. 14 ⵜⵉⵟⵟⴰⵡⵉⵏ ⵏⵙⴻⵏ ⵛⵛⵓⵔⴻⵏⵜ ⵙ ⵣⵣⵉⵏⴰ ⵓ ⵙ ⴷⴷⴻⵏⴱ ⵡⴰⵔ ⵉⵇⴻⵟⵟⵉⵏ, ⵅⵎⵉ ⵖⴻⴽⴽⵡⴰⵏ ⵏⵉⵜⵏⵉ ⵍⴻⵄⵎⵓⵔ ⵏ ⵢⵉⵏⵏⵉ ⵡⴰⵔ ⵉⴱⴻⴷⴷⴻⵏ ⵏⵉⵛⴰⵏ. ⴰⵇⴰ ⵖⴰⵔⵙⴻⵏ ⵓⵍ ⵉⵜⵜⵡⴰⵔⴻⴱⴱⴰⵏ ⵅ ⵟⵟⵎⴻⵄ, ⴰⵇⴰ ⵏⵉⵜⵏⵉ ⴷ ⵜⴰⵔⵡⴰ ⵏ ⵏⵏⴻⵄⵍⴻⵜ, 15 ⴼⴼⵖⴻⵏ ⵣⴻⴳ ⵡⴻⴱⵔⵉⴷ ⵉⵙⴻⴳⴳⵎⴻⵏ, ⵡⴻⴷⴷⴰⵔⴻⵏ, ⵓⵛⴰ ⴹⴼⴰⵔⴻⵏ ⴰⴱⵔⵉⴷ ⵏⵏⵉ ⵉⴽⴽⴰ ⴱⴰⵍⵄⴰⵎ, ⵎⵎⵉⵙ ⵏ ⴼⴰⵖⵓⵔ, ⵡⴻⵏⵏⵉ ⵜⵓⵖⴰ ⵉⵜⵜⴻⵅⵙⴻⵏ ⵍⵎⵓⵏⴻⵜ ⵏ ⵍⵖⴻⵛⵛ. ◘2:15 ⵍⵅⵍ. 22:7, 21; ⵢⴰⵀ. 11. 16 ⵎⴰⵛⴰ ⵏⴻⵜⵜⴰ ⵉⴽⵙⵉ ⴰⵡⴻⴱⴱⴻⵅ ⵉ ⵍⵎⵓⵄⵚⵉⵢⵢⴻⵜ ⵏⵏⴻⵙ, ⵎⵉⵏⵣⵉ ⵣⵣⴰⵢⵍⴻⵜ ⵜⴰⴳⵏⴰⵡⵜ ⵜⴻⵙⵙⵉⵡⴻⵍ ⵖⴰⵔⴻⵙ ⵙ ⵉⵛⵜ ⵏ ⵜⵎⵉⵊⵊⴰ ⵏ ⵉⵡⴷⴰⵏ, ⵜⴻⵎⵏⴻⵄ ⵜⵓⴱⴱⵓⵀⴻⵍⵢⴰ ⵏ ⵓⵏⴰⴱⵉ. ◘2:16 ⵍⵅⵍ. 22:21.

17 ⵏⵉⵜⵏⵉ ⴷ ⵍⵄⵓⵏⵚⴰⵔⴰⵜ ⵡⴰⵔ ⴷⴰⵢⴻⵙ ⴱⵓ ⵡⴰⵎⴰⵏ, ⴷ ⵉⵙⴻⵢⵏⵓⵜⴻⵏ ⵜⵜⵡⴰⵄⴰⵔⵔⵏⴻⵏ ⵙ ⵜⵃⴰⵔⵢⴰⴹⵜ, ⴰⵇⴰ ⵜⵓⴱⴱⴰⵔⵛⴻⵏⵜ ⵏ ⵜⴰⴵⴻⵙⵜ ⵜᵉⵜⵜⵡⴰⵙⵙⴻⵡⵊⴻⴷ ⴰⵙⴻⵏ. ◘2:17 ⵢⴰⵀ. 12. 18 ⵎⴰⵖⴰⵔ ⵎⴰⵍⴰ ⵙⵙⵉⵡⵍⴻⵏ ⵙ ⵏⵏⵄⵉ ⵏ ⵍⵀⴰⵔⴷ ⵏⵙⴻⵏ ⵉⵅⵡⴰⵏ, ⴰⵇⴰ ⵏⵉⵜⵏⵉ ⵙⵙⵖⴻⴽⴽⵯⴰⵏ ⵙ ⵏⵏⴻⵛⵡⴰⵜ ⵉⵅⴻⵎⵊⴻⵏ ⵏ ⴰⵔⵔⵉⵎⴻⵜ ⵉⵏⵏⵉ ⵉⴳⴳⵓⵔⴻⵏ ⴰⴷ ⴰⵔⴻⵡⵍⴻⵏ ⵣⴻⴳ ⵉⵏⵏⵉ ⵉⵙⴻⵍⵍⵎⴻⵏ ⵉⵅⴻⴼ ⵏⵙⴻⵏ ⵉ ⵓⵖⴻⴽⴽⵡⵉ. 19 ⵡⴰⵄⴷⴻⵏ ⵜⴻⵏ ⵙ ⵜⵉⵍⴻⵍⵍⵉ, ⵡⴰⵅⵅⴰ ⵏⵉⵜⵏⵉ ⵙⵉⵎⴰⵏⵜ ⵏⵙⴻⵏ ⴷ ⵉⵙⴻⵎⵖⴰⵏ ⵏ ⵍⵖⴻⵛⵛ. ⵎⵉⵏⵣⵉ ⵡⵉ ⵣⵉ ⵉⵜⵜⵡⴰⵖⴻⵍⵍⴻⴱ ⴱⵏⴰⴷⴻⵎ, ⴰⵇⴰ ⵉ ⵏⴻⵜⵜⴰ ⴰⴷ ⵢⵉⵍⵉ ⴷ ⴰⵎⵙⴻⵅⵅⴰⵔ. ◘2:19 ⵢⵃ. 8:34; ⵔⵓⵎ. 6:16. 20 ⵎⴰⵖⴰⵔ ⴰⵡⴰⵔⵏⵉ ⵍⴰⵎⵉ ⴷⴷ-ⴰⵔⴻⵡⵍⴻⵏ ⵏⵉⵜⵏⵉ ⵣⵉ ⵍⴻⵅⵎⴻⵊ ⵏ ⴷⴷⵓⵏⴻⵛⵜ ⵙ ⵜⵓⵙⵙⵏⴰ ⵏ ⵙⵉⴷⵉⵜⵏⴻⵖ ⴷ ⴰⵎⵙⴻⵏⵊⴻⵎ ⵏⵏⴻⵖ, ⵢⴰⵙⵓⵄ ⵍⵎⴰⵙⵉⵃ, ⴰⵇⴰ ⴷⴻⵡⵍⴻⵏ-ⴷⴷ ⵖⴰⵔ ⵍⴻⵅⵎⴻⵊ ⵏⵏⵉ ⵄⴰⵡⴻⴷ ⵓⵛⴰ ⵜⵜⵡⴰⵖⴻⵍⵍⴱⴻⵏ ⵣⵣⴰⵢⴻⵙ ⵜⵡⴰⵍⴰ ⵏⵏⴻⵖⵏⵉ, ⴰⵇⴰ ⵅⴻⵏⵏⵉ ⴰⵏⴻⴳⴳⴰⵔ ⵏⵙⴻⵏ ⴰⴷ ⴰⵙⴻⵏ ⵢⵓⵔⴰ ⵎⴰⵀⵓ ⵅ ⵓⵎⴻⵣⵡⴰⵔ. ◘2:20 ⵎⵜ. 12:45; ⵄⴱⵔ. 6:4; 10:26. 21 ⴰⵇⴰ ⵃⵙⴻⵏ ⴰⵙⴻⵏ ⵎⴻⵄⵍⵉⴽ ⵇⵇⵉⵎⴻⵏ ⵡⴰⵔ ⵙⵙⵉⵏⴻⵏ ⴰⴱⵔⵉⴷ ⵏ ⵜⵙⴻⴳⴷⴰ ⵣⵉ ⵎⵉⵏ ⵙⵙⵏⴻⵏ, ⵓⵛⴰ ⵍⴻⵅⴷⴻⵏⵏⵉ ⴰⴷ ⴼⴼⵖⴻⵏ ⵄⴰⵡⴻⴷ ⵅ ⵜⴻⵡⵚⴻⵢⵢⴻⵜ ⵉⵇⴻⴷⴷⵙⴻⵏ ⵉ ⴷ ⴰⵙⴻⵏ ⴷⴷ-ⵉⵜⵜⵡⴰⵙⴻⵍⵍⵎⴻⵏ. 22 ⴰⵇⴰ ⵜⴻⵎⵙⴰⵔ ⴰⵙⴻⵏ ⴰⵎ ⵜⵜ ⵉⵇⵇⴰⵔ ⵡⴰⵡⴰⵍ-ⴰ ⵏ ⵜⵉⴷⴻⵜⵜ: “ⴰⵇⵣⵉⵏ ⴰⵇⴰ ⵉⴷⵡⴻⵍ-ⴷⴷ ⵅ ⵎⵉⵏ ⵜⵓⵖⴰ ⴷⴷ-ⵉⵄⵓⵇⵇ!” ⵏⵉⵖ ⵎⴰⵎⵎⴻⵛ ⴷ ⴰⵙ ⵇⵇⴰⵔⴻⵏ ⵏⵏⴻⵖⵏⵉ: “ⵜⵉⵍⴻⴼⵜ ⵜⴻⵏⵏⵉ ⵉⵜⵜⵡⴰⵙⵙⵉⵔⴷⴻⵏ ⵇⴰⵄ, ⵜⴻⴷⵡⴻⵍ-ⴷⴷ ⵜᵉⵜⵜⵎⴰⵔⵔⴰⵖ ⴷⴻⴳ ⵓⴱⴰⵔⵢⵓⴹ ⵏⵏⴻⵙ!” ◘2:22 ⴰⵡⵍⵏ. 26:11.