1 ⵎⴰⵛⴰ ⴰⵔⵔⵓⵃ ⵉⵇⵇⴰⵔ ⵏⵉⵛⴰⵏ ⴱⴻⵍⵍⵉ ⴷⵉ ⵣⵣⵎⴰⵏⴰⵜ ⵜⵉⵏⴻⴳⴳⵓⵔⴰ ⵛⴰ ⴰⴷ ⵃⴻⵢⵢⴷⴻⵏ ⵅ ⵍ’ⵉⵎⴰⵏ ⵓⵎⵉ ⵖⴰ ⴹⴼⴰⵔⴻⵏ ⵍⴰⵔⵢⴰⵃ ⵉⵙⵙⵖⴻⴽⴽⵡⴰⵏ ⴷ ⵜⵖⵓⵔⵉ ⵏ ⵛⵛⵡⴰⵟⴻⵏ. ◘4:1 ⵎⵜ. 24:23; 2 ⵜⵙ. 2:3; 2 ⵜⵉⵎ. 3:1; 2 ⴱⵟ. 3:3; ⵢⴰⵀ. 18. 2 ⵏⵉⵜⵏⵉ ⵙⵖⴻⴽⴽⵡⴰⵏ ⴰⵎ ⵙⵙⵏⵉⵄⵎⵉⵍⴻⵏ ⵉⵅⴻⴼ ⵏⵙⴻⵏ, ⵙⵙⵅⴰⵔⵔⵉⵇⴻⵏ ⵓ ⵜⵜⴻⵇⵇⴷⴻⵏ ⵜⴰⵏⴻⴼⵙⴻⵛⵜ ⵏⵙⴻⵏ. 3 ⵏⵉⵜⵏⵉ ⵜⵜᵉⵟⵟⴼⴻⵏ ⵍⴻⵎⵍⴰⵛ ⵓⵛⴰ ⵜⵜⴰⵎⴰⵔⴻⵏ ⴰⵙⴱⴻⵄⵄⴻⴷ ⵅ ⵎⴰⵛⵛⴰ ⵏⵏⵉ ⴷⴷ-ⵉⵜⵜⵡⴰⵅⴻⵍⵇⴻⵏ ⵣⵉ ⴰⵔⴻⴱⴱⵉ ⵎⴰⵃⴻⵏⴷ ⴰⴷ ⵜⵉⵍⵉ ⵉ ⵏⵏⴼⴻⵄ ⴷ ⵓⵇⴰⴷⵉ ⵉ ⵢⵉⵏⵏⵉ ⵢⵓⵎⵏⴻⵏ ⵓ ⵙⵙⵏⴻⵏ ⵜⵉⴷⴻⵜⵜ. ◘4:3 ⴰⵎⵥ. 1:29; 9:3; ⵔⵓⵎ. 14:6; 1 ⴽⵓⵔ. 10:30. 4 ⵎⵉⵏⵣⵉ ⵎⴰⵔⵔⴰ ⵎⵉⵏ ⴷⴷ-ⵉⵜⵜⵡⴰⵅⴻⵍⵇⴻⵏ ⵣⵉ ⴰⵔⴻⴱⴱⵉ ⵉⵚⴱⴻⵃ ⵓⵛⴰ ⵡⴰⵔ ⴷⴰⵢⴻⵙ ⵎⵉⵏ ⵖⴰ ⵏⴰⴳⵉ ⵎⴰⵍⴰ ⵏⴻⵇⴱⴻⵍ ⵣⵣⴰⵢⴻⵙ ⵙ ⵓⵇⴰⴷⵉ, ◘4:4 ⴰⵎⵥ. 1:31; ⵍⴻⵅ. 10:15; ⵔⵓⵎ. 14:14. 5 ⵎⵉⵏⵣⵉ ⴰⴷ ⵉⵜⵜⵡⴰⵇⴻⴷⴷⴻⵙ ⵙ ⵡⴰⵡⴰⵍ ⵏ ⴰⵔⴻⴱⴱⵉ ⴷ ⵜⵥⴰⴵⵉⵜ.

6 ⵎⴰⵍⴰ ⵜⴻⵙⵙⵍⴻⵎⴷⴻⴷ ⵎⴰⵏ ⴰⵢⴰ ⵉ ⵡⴰⵡⵎⴰⵜⴻⵏ ⵏⵏⴻⵛ, ⴰⴷ ⵜⵉⵍⵉⴷ ⴷ ⴰⵎⵙⴻⵅⵅⴰⵔ ⵏ ⵢⴰⵙⵓⵄ ⵍⵎⴰⵙⵉⵃ, ⴰⵇⴰ ⵜᵉⵜⵜⵡⴰⵔⴻⴱⴱⵉⴷ ⴷⴻⴳ ⵡⴰⵡⴰⵍⴻⵏ ⵏ ⵍ’ⵉⵎⴰⵏ ⵓ ⵜᵉⵜⵜⵡⴰⵙⵙⵍⴻⵎⴷⴻⴷ ⴷⵉ ⵜⵖⵓⵔⵉ ⵏ ⵚⵚⴰⵃ. ◘4:6 2 ⵜⵉⵎ. 1:5; 3:14, 15. 7 ⵎⴰⵛⴰ ⴰⴳⴳⵯⴻⵊ ⵅ ⵜⵃⵓⵊⴰ ⵉⵅⵡⴰⵏ ⵏ ⵜⵡⴻⵙⵙⵓⵔⴰ ⵓ ⵎⴰⵔⵔⴻⵙ ⵉⵅⴻⴼ ⵏⵏⴻⵛ ⴷⵉ ⵜⵙⴻⴳⴷⴰ. ◘4:7 1 ⵜⵉⵎ. 1:4; 6:20; 2 ⵜⵉⵎ. 2:16; ⵜⵉⵜ. 1:14; 3:9. 8 ⵎⵉⵏⵣⵉ ⴰⵔⵔⵉⵢⴰⴹⴰ ⵏ ⴰⵔⵔⵉⵎⴻⵜ ⵜᵉⵜⵜⴰⵡⵉ ⵖⴰⵔ ⵏⵏⴼⴰⵄ ⵉ ⴷⵔⵓⵙ ⵏ ⵍⵡⴻⵇⵜ ⵡⴰⵀⴰ, ⵎⴰⵛⴰ ⵜⴰⵙⴻⴳⴷⴰ ⵜⵏⴻⴼⴼⴻⵄ ⵍⴻⴱⴷⴰ, ⵓⵛⴰ ⴰⵇⴰ ⵖⴰⵔⴻⵙ ⵍⵡⴰⵄⴷ ⵏ ⵜⵓⴷⴰⵔⵜ ⵉ ⵢⵉⴹⴰ ⵓ ⵉ ⵍⵡⴻⵇⵜ ⵉ ⴷⴷ ⵖⴰ ⵢⴰⵙⴻⵏ. ◘4:8 ⴽⵓⵍ. 2:23.

9 ⵡⴰ ⴷ ⴰⵡⴰⵍ ⴷⴰⵢⴻⵙ ⵍⴰⵎⴰⵏ, ⵉⵙⴷⴰⵀⴻⴵ ⴰⴷ ⵉⵜⵜⵡⴰⵇⴱⴻⵍ. 10 ⵎⵉⵏⵣⵉ ⵉ ⵎⴰⵏ ⴰⵢⴰ ⵓⵎⵉ ⵏⵅⴻⴷⴷⴻⵎ ⵓ ⵏⴻⵜⵜⵡⴰⵙⵙⴻⵃⵇⴰⵔⴰ ⵄⴰⵡⴻⴷ, ⵎⵉⵏⵣⵉ ⴰⵙⵉⵜⴻⵎ ⵏⵏⴻⵖ ⴰⵇⴰ-ⵜ ⴷⵉ ⴰⵔⴻⴱⴱⵉ ⵉⴷⴷⴰⵔⴻⵏ, ⵡⴻⵏⵏⵉ ⵉⵜⵜⵉⵛⴻⵏ ⵜⵓⴷⴰⵔⵜ ⵉ ⵎⴰⵔⵔⴰ ⵉⵡⴷⴰⵏ, ⴰⵎⴻⵣⵡⴰⵔⵓ ⵉ ⵢⵉⵏⵏⵉ ⵢⵓⵎⵏⴻⵏ. 11 ⵙⴻⵍⵎⴻⴷ, ⵜⵓⵎⵓⵔⴻⴷ ⵙ ⵎⴰⵏ ⴰⵢⴰ.

12 ⴻⵊⵊ ⵓⵍⴰ ⴷ ⵉⵊⵊ ⵡⴰⵔ ⵛⴻⴽ ⵉⵙⵙⴻⵃⵇⵉⵔⵉ ⵛⴰ ⵅ ⵜⴻⵎⵥⵉ ⵏⵏⴻⵛ, ⵎⴰⵛⴰ ⵉⵍⵉ ⴷ ⵍⵎⵉⵜⴰⵍ ⵉ ⵢⵉⵏⵏⵉ ⵢⵓⵎⵏⴻⵏ, ⵙ ⵡⴰⵡⴰⵍ, ⵙ ⵡⴻⵏⴷⴰⵀ, ⵙ ⵜⴰⵢⵔⵉ, ⵙ ⵍ’ⵉⵎⴰⵏ ⵓ ⵙ ⵜⴰⵣⴷⵓⴳⵉ. ◘4:12 ⵜⵉⵜ. 2:7, 15; 1 ⴱⵟ. 5:3. 13 ⵉⵍⵉ ⵜⴻⵛⴹⴰⵔⴻⴷ ⴷⵉ ⵜⵖⵓⵔⵉ ⵉ ⵜⵎⴻⵙⵎⵓⵏⵜ, ⴷⵉ ⵟⵥⴰⴵⵉⵜ ⵓ ⴷⴻⴳ ⵓⵙⴻⵍⵎⴻⴷ ⴰⵍ ⴷⴷ ⵖⴰ ⵢⴰⵙⴻⵖ. 14 ⵡⴰⵔ ⵙⵃⴻⵇⵇⴰⵔⴰ ⵛⴰ ⵜⴰⵡⵀⵉⴱⵜ ⵉ ⴷⴰⵢⴻⴽ, ⵜⴻⵏⵏⵉ ⵉ ⴷ ⴰⵛ ⵉⵎⵎⴻⵡⵛⴻⵏ ⵓⵎⵉ ⵜⵓⵖⴰ ⵜⵜⵏⴰⴱⴱⴻⵏ ⵓ ⵙⵙⴰⵔⵙⴻⵏ ⵉⵎⵖⴰⵔⴻⵏ ⵅⴰⴽ ⵉⴼⴰⵙⵙⴻⵏ. ◘4:14 ⵍⴻⵅ. 6:6; 8:17; 13:3; 19:6; 1 ⵜⵉⵎ. 5:22; 2 ⵜⵉⵎ. 1:6. 15 ⵄⵇⴻⵍ ⵅ ⵜⵎⴻⵙⵍⴰⵢⵉⵏ-ⴰ, ⵛⴻⴱⴱⴰⵔ ⴷⴰⵢⵙⴻⵏⵜ, ⵃⵉⵎⴰ ⵜⵉⵛⵍⵉ ⵏⵏⴻⵛ ⵖⴰⵔ ⵣⵣⴰⵜ ⴰⴷ ⵜⴱⴰⵏ ⵉ ⵎⴰⵔⵔⴰ. 16 ⵃⴹⴰ ⵉⵅⴻⴼ ⵏⵏⴻⵛ ⵓ ⵃⴹⴰ ⵅ ⵓⵙⴻⵍⵎⴻⴷ, ⵚⴱⴰⵔ ⴷⵉ ⵎⴰⵏ ⴰⵢⴰ, ⵎⵉⵏⵣⵉ ⵎⴰⵍⴰ ⵜⴻⴳⴳⵉⴷ ⴷⴷⴻⴳⴳⴰ, ⴰⴷ ⵜⴻⵃⴹⵉⴷ ⵉⵅⴻⴼ ⵏⵏⴻⵛ ⴷⵉ ⵜⵓⴷⴰⵔⵜ ⵓⵍⴰ ⴷ ⵉⵏⵏⵉ ⴷ ⴰⵛ ⵉⵜⵜⴻⵙⵍⴰⵏ.