1 ⵡⴰ ⴷ ⴰⵡⴰⵍ ⴷⴰⵢⴻⵙ ⵍⴰⵎⴰⵏ: ⵎⴰⵍⴰ ⵉⵅⵙ ⵃⴻⴷ ⴰⴷ ⵢⵉⵍⵉ ⴷ ⴰⵎⵖⴰⵔ, ⴰⵇⴰ ⵉⵜⵜⵎⴻⵥⵔⵉ ⴷⴻⴳ ⵉⵛⵜ ⵏ ⵍⵅⴻⴷⵎⴻⵜ ⵜⴻⵛⵏⴰ. 2 ⵎⴰⵛⴰ ⵉⵜⵜⵅⴻⵚⵚⴰ ⵉ ⵓⵎⵖⴰⵔ ⴰⴷ ⵉⵜⵡⴰⴼ ⴱⵍⴰ ⵍⵄⵉⴱ, ⴰⴷ ⵢⵉⵍⵉ ⴷ ⴰⵔⵢⴰⵣ ⵏ ⵉⵛⵜ ⵏ ⵜⴻⵎⵖⴰⵔⵜ, ⵖⴰⵔⴻⵙ ⴰⵎⴻⴽⴽⴻⵏ ⵏ ⵏⵏⴻⴼⵙ, ⴰⴷ ⵢⵉⵍⵉ ⴷ ⴰⵙⴻⵅⵅⴰⵢ, ⴰⴷ ⵉⴳⴳ ⵙ ⵓⵙⴻⵜⵜⴻⴼ, ⴰⴷ ⵢⴰⵔⴻⵃⵃⴻⴱ ⵙ ⵉⵏⴻⵡⵊⵉⵡⴻⵏ, ⵉⵣⴻⵎⵎⴰⵔ ⴰⴷ ⵉⵙⵙⴻⵍⵎⴻⴷ. ◘3:2 2 ⵜⵉⵎ. 2:24; ⵜⵉⵜ. 1:6. 3 ⵏⴻⵜⵜⴰ ⵡⴰⵔ ⵉⵜⵜⵉⵍⵉ ⴷ ⴰⵎⴻⵙⵛⴰⵔ ⵏⵉⵖ ⵉⵡⵡⴻⵜ ⴷⴻⵖⵢⴰ ⵙ ⵓⴼⵓⵙ ⵏⵏⴻⵙ, ⵎⴰⵛⴰ ⴰⴷ ⵢⵉⵍⵉ ⴷ ⴰⵎⵡⴰⴹⴻⵄ, ⵡⴰⵔ ⵉⵜⵜⴻⵎⵛⵓⴱⴱⵓⵛ, ⵡⴰⵔ ⵉⵜⵜⵉⵍⵉ ⴷ ⴰⵇⴻⵣⵣⴰⵣ. 4 ⴰⵇⴰ ⵏⴻⵜⵜⴰ ⵉⵙⵙⴻⴳⴳⵓⵔ ⵜⴰⴷⴷⴰⵔⵜ ⵏⵏⴻⵙ ⵎⵍⵉⵃ ⵓⵛⴰ ⵉⵃⴻⴽⴽⴻⵎ ⵅ ⵉⵃⴻⵏⵊⵉⵔⴻⵏ ⵏⵏⴻⵙ ⵙ ⵎⴰⵔⵔⴰ ⵍⴻⵚⴼⴰⵢⴻⵜ. 5 ⵎⴰⵛⴰ ⵎⴰⵍⴰ ⵏⴻⵜⵜⴰ ⵡⴰⵔ ⵉⵣⴻⵎⵎⴰⵔ ⴰⴷ ⵉⵙⵙⵓⵢⵓⵔ ⵜⴰⴷⴷⴰⵔⵜ ⵏⵏⴻⵙ, ⵎⴰⵎⵎⴻⵛ ⵖⴰ ⵉⴳⴳ ⴰⴷ ⵉⵃⴹⴰ ⵜⴰⵎⴻⵙⵎⵓⵏⵜ ⵏ ⴰⵔⴻⴱⴱⵉ? 6 ⵡⴰⵔ ⵉⵜⵜⵉⵍⵉ ⴷ ⴰⵎⴻⵃⴹⴰⵔ ⵏ ⵊⴷⵉⴷ ⴷⵉ ⵍ’ⵉⵎⴰⵏ, ⵃⵉⵎⴰ ⵡⴰⵔ ⵉⵜⵜⵓⴼⴼ ⵙ ⵍⴻⴼⵢⵓⵛ ⵓⵛⴰ ⴰⴷ ⵉⵡⴹⴰ ⴷⵉ ⵛⵛⵔⴻⵄ ⵏ ⵛⵛⵉⵟⴰⵏ. 7 ⵄⴰⵡⴻⴷ ⵉⵜⵜⵅⴻⵚⵚⴰ ⴰⴷ ⵖⴰⵔⴻⵙ ⵜⵉⵍⵉ ⵚⵚⵓⵎⵄⴻⵜ ⵜⴻⵛⵏⴰ ⵖⴰⵔ ⵢⵉⵏⵏⵉ ⴷⵉ ⴱⴰⵔⵔⴰ, ⵃⵉⵎⴰ ⵡⴰⵔ ⵅⴰⵙ ⵜⵜⵄⴻⵢⵢⵉⴱⴻⵏ ⵓⵛⴰ ⵡⴰⵔ ⵉⵡⴻⵟⵟⵉ ⵛⴰ ⴷⵉ ⵍⴻⴼⵅⵓⵅ ⵏ ⵛⵛⵉⵟⴰⵏ.

8 ⵉⵜⵜⵅⴻⵚⵚⴰ ⵄⴰⵡⴻⴷ ⵉ ⵉⵎⵙⴻⵅⵅⴰⵔⴻⵏ ⴷⵉ ⵜⵎⴻⵙⵎⵓⵏⵜ ⴰⴷ ⵉⵍⵉⵏ ⴷ ⵉⵎⴻⵣⴷⴰⴳⴻⵏ, ⵡⴰⵔ ⵙⵙⵉⵡⵉⵍⴻⵏ ⵛⴰ ⵙ ⵜⵏⴰⵢⴻⵏ ⵏ ⵉⵍⵙⴰⵡⴻⵏ, ⵡⴰⵔ ⵅⴻⵣⵣⴰⵔⴻⵏ ⵛⴰ ⵖⴰⵔ ⴱⵉⵏⵓ ⴰⵟⵟⴰⵙ, ⵡⴰⵔ ⴹⴻⵎⵎⵄⴻⵏ ⴷⵉ ⴰⵔⵔⴱⴻⵃ ⵡⴰⵔ ⵉⵃⵍⵉⵏ. ◘3:8 ⵍⴻⵅ. 6:3. 9 ⵉⵜⵜⵅⴻⵚⵚⴰ ⴰⵙⴻⵏ ⴰⴷ ⵟⵟⴼⴻⵏ ⴷⵉ ⵙⵙⵉⵔⵔ ⵏ ⵍ’ⵉⵎⴰⵏ ⵙ ⵜⵏⴻⴼⵙⴻⵛⵜ ⵜⴻⵚⴼⴰ. ◘3:9 1 ⵜⵉⵎ. 1:19. 10 ⴻⵊⵊ ⵉ-ⵜⴻⵏ ⴰⴷ ⵜⵜⵡⴰⵇⴻⴵⴱⴻⵏ ⴷ ⴰⵎⴻⵣⵡⴰⵔⵓ, ⵍⴻⵅⴷⴻⵏⵏⵉ, ⵎⴰⵍⴰ ⵉⴱⴰⵏ-ⴷⴷ ⵡⴰⵔ ⴷⴰⵢⵙⴻⵏ ⵉⵜⵜⵉⵍⵉ ⴱⵓ ⵍⵄⵉⴱ, ⴰⴷ ⵙⴻⵅⵅⴰⵔⴻⵏ. 11 ⴰⵎⵎⵓ ⵉⵜⵜⵅⴻⵚⵚⴰ ⵓⵍⴰ ⵉ ⵜⵉⵎⵖⴰⵔⵉⵏ ⴰⴷ ⴰⵔⵙⵉⵏⵜ ⵙ ⵜⵙⴻⵅⵅⴰⵢⵜ, ⴰⴷ ⵃⴹⴰⵏⵜ ⴷⵉ ⵍⴻⵄⵇⵓⵍ ⵏⵙⴻⵏⵜ, ⴰⴷ ⴷⴰⵢⵙⴻⵏⵜ ⵜⵉⵍⵉ ⵍⵎⴰⵏⴻⵜ ⴷⵉ ⵎⴰⵔⵔⴰ, ⵡⴰⵔ ⴷ ⵜⵜⵉⵍⵉⵏⵜ ⴷ ⵜⵉⵎⵛⴻⵇⵇⴰⴼⵉⵏ. 12 ⵉⵜⵜⵅⴻⵚⵚⴰ ⵉ ⵉⵎⵙⴻⵅⵅⴰⵔⴻⵏ ⴷⵉ ⵜⵎⴻⵙⵎⵓⵏⵜ, ⴰⵇⴰ ⴽⵓⵍ ⵉⵊⵊⴻⵏ ⵣⵣⴰⵢⵙⴻⵏ ⴰⴷ ⵢⵉⵍⵉ ⵙ ⵉⵛⵜ ⵏ ⵜⴻⵎⵖⴰⵔⵜ, ⵓⵛⴰ ⵉⵜⵜⵅⴻⵙⵚⴰ ⴰⵙ ⴰⴷ ⵉⵙⵙⵓⵢⵓⵔ ⵎⵍⵉⵃ ⵉⵃⴻⵏⵊⵉⵔⴻⵏ ⵏⵏⴻⵙ ⴷ ⵜⴰⴷⴷⴰⵔⵜ ⵏⵏⴻⵙ. 13 ⵎⵉⵏⵣⵉ ⵉⵏⵏⵉ ⵉⵜⵜⴻⴳⴳⴻⵏ ⵜⴰⵙⴻⵢⵢⴰⵔⵜ ⵏⵙⴻⵏ ⵎⵍⵉⵃ, ⴰⴷ ⵟⵟⴼⴻⵏ ⵉ ⵢⵉⵅⴻⴼ ⵏⵙⴻⵏ ⵉⵊⵊ ⵏ ⵡⴻⵎⵛⴰⵏ ⵉⵛⵏⴰ ⴷ ⵡⴰⵟⵟⴰⵙ ⵏ ⵜⴻⵔⵢⴰⵙⵜ ⴷⵉ ⵍ’ⵉⵎⴰⵏ ⵏ ⵢⴰⵙⵓⵄ ⵍⵎⴰⵙⵉⵃ. ◘3:13 ⵎⵜ. 25:21.

14 ⵓⵔⵉⵖ ⴰⵛ-ⴷⴷ ⵎⴰⵏ ⴰⵢⴰ ⵓⵛⴰ ⵙⵙⵉⵜⵉⵎⴻⵖ ⴰⴷ ⵖⴰⵔⴻⴽ ⴷⴷ-ⴰⵙⴻⵖ ⴷⴻⵖⵢⴰ. 15 ⵎⴰⵛⴰ ⵎⴰⵍⴰ ⵄⴻⵟⵟⴰⵍⴻⵖ ⵅⴰⴽ, ⴰⴷ ⵜⴻⵙⵙⵏⴻⴷ ⵎⴰⵎⵎⴻⵛ ⵉⵜⵜⵅⴻⵚⵚⴰ ⴰⴷ ⵏⵓⵢⵓⵔ ⴷⵉ ⵜⴰⴷⴷⴰⵔⵜ ⵏ ⴰⵔⴻⴱⴱⵉ, ⵜⴻⵏⵏⵉ ⵉⴵⴰⵏ ⴷ ⵜⴰⵎⴻⵙⵎⵓⵏⵜ ⵏ ⴰⵔⴻⴱⴱⵉ ⵉⴷⴷⴰⵔⴻⵏ, ⴰⴱⵉⵍⴰⵔ ⴷ ⴷⵙⴰⵙ ⵏ ⵜⵉⴷⴻⵜⵜ. ◘3:15 ⴰⴼⴰ. 2:19; ⵄⴱⵔ. 10:21; 1 ⴱⵟ. 4:17 16 ⵙⵙⵉⵔⵔ ⵡⴰⵏⵉⵜⴰ ⵏ ⵜⵙⴻⴳⴷⴰ ⴷ ⴰⵎⴻⵇⵇⵔⴰⵏ ⵙ ⵜⵉⴷⴻⵜⵜ!

“ⴷ ⵡⴻⵏⵏⵉ ⵉⵜⵜⵡⴰⵙⵙⴰⵔⴳⴱⴻⵏ ⴷⵉ ⴷⴷⴰⵜ,

ⵉⵜⵜⵡⴰⵙⴻⴳⴳⴷⴻⵏ ⴷⵉ ⴰⵔⵔⵓⵃ,

ⵉⴹⵃⴰⵔⴻⵏ-ⴷⴷ ⵉ ⵍⵎⴰⵍⴰⴽⴰⵜ,

ⵉⵜⵜⵡⴰⴱⴰⵔⵔⵃⴻⵏ ⵣⵣⴰⵢⴻⵙ ⵊⴰⵔ ⵍⴻⴳⵏⵓⵙ,

ⴷ ⵡⴻⵏⵏⵉ ⵣⵣⴰⵢⴻⵙ ⵢⵓⵎⵏⴻⵏ ⴷⵉ ⴷⴷⵓⵏⴻⵛⵜ,

ⵉⵎⵎⴻⴽⵙⵉⵏ ⴷⴻⴳ ⵓⵄⵓⴵⵉ.” ◘3:16 ⵎⴽ. 16:19; ⵍⴽ. 9:51; ⵢⵃ. 1:14; ⵍⴻⵅ. 1:2; ⴰⴼⴰ. 3:5, 6.