40
1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⵏ ⴷⴰⵡⵓⴷ. ⴰⵣⴻⵀⵀⴻⴷ.
2 ⵙⵙⵉⵜⵉⵎⴻⵖ ⵇⴰⵄ ⵅ ⵙⵉⴷⵉ.
ⵏⴻⵜⵜⴰ ⵢⴰⵔⵔⴰ-ⴷⴷ ⵖⴰⵔⵉ ⵙ ⵓⵣⴻⴵⵉⴼ,
ⵉⵙⵙⵃⴻⵙⵙ ⵖⴰⵔ ⵓⵖⵓⵢⵢⵉ ⵉⵏⵓ.
3 ⵏⴻⵜⵜⴰ ⵉⵙⵙⴳⴻⵄⵄⴻⴷ ⴰⵢⵉ-ⴷⴷ
ⵣⴻⴳ ⵉⵊⵊ ⵏ ⵡⴰⵏⵓ ⵉⵏⴻⵇⵇⴻⵏ,
ⵣⴻⴳ ⵓⴱⴻⴵⴰⵄ ⴷ ⵓⴱⴰⵔⵢⵓⴹ,
ⵏⴻⵜⵜⴰ ⵉⵙⵙⴰⵔⵙ ⵉⴹⴰⵔⴻⵏ ⵉⵏⵓ ⵅ ⵜⴻⵚⴹⴰⵔⵜ,
ⵉⵙⵙⴻⵎⵜⴻⵏ ⵉⵚⵓⵔⴰⴼ ⵉⵏⵓ.
4 ⵏⴻⵜⵜⴰ ⵉⴳⴳⴰ ⴰⵢⵉ ⵉⵊⵊ ⵏ ⵢⴻⵣⵍⵉ ⴷ ⴰⵎⴰⵢⵏⵓ
ⴷⴻⴳ ⵓⵇⴻⵎⵎⵓⵎ ⵉⵏⵓ,
ⵉⵊⵊ ⵏ ⵉⵣⵍⵉ ⵏ ⵓⵚⴻⴱⴱⴻⵃ ⵉ ⴰⵔⴻⴱⴱⵉ.
ⴰⵟⵟⴰⵙ ⴰⴷ ⵜ ⵥⴰⵔⴻⵏ,
ⴰⴷ ⵜⴻⵛⵍⴻⵏ ⵅ ⵙⵉⴷⵉ.
5 ⵙⵙⴻⵄⴷ ⵏ ⵡⴻⵔⵢⴰⵣ
ⵡⴻⵏⵏⵉ ⵉⵜⵜⴻⵛⵍⴻⵏ ⵅ ⵙⵉⴷⵉ,
ⵡⴻⵏⵏⵉ ⵡⴰⵔ ⵉⵜⵜⵎⴻⵢⵢⵍⴻⵏ
ⵖⴰⵔ ⴰⵢⵜ ⵏ ⴱⵓ-ⵏⵏⴼⴰⵅⴻⵜ,
ⵓⵍⴰ ⵖⴰⵔ ⵢⵉⵏⵏⵉ ⵉⵡⴻⴷⴷⴰⵔⴻⵏ ⵖⴰⵔ ⵓⵅⴰⵔⵔⵉⵇ.
6 ⴰⵟⵟⴰⵙ, ⴰ ⵙⵉⴷⵉ, ⴰⵔⴻⴱⴱⵉ ⵉⵏⵓ, ⴷ ⵍⵎⵓⵄⵊⵉⵣⴰⵜ
ⵏⵏⵉ ⵜⴻⴳⴳⵉⴷ, ⵓⵍⴰ ⴷ ⵎⵉⵏ ⵜⴻⵏⵡⵉⴷ ⵅⴰⵏⴻⵖ.
ⵓⵍⴰ ⴷ ⵉⵊⵊ ⵉⵣⴻⵎⵎⴰⵔ
ⴰⴷ ⵉⵄⴱⴰⵔ ⵉⵅⴻⴼ ⵏⵏⴻⵙ ⴰⴽⵉⴷⴻⴽ.
ⵏⴻⵛⵛ ⴰⴷ ⵜⴻⵏⵜ ⵀⴰⵊⵉⵖ, ⴰⴷ ⵣⵣⴰⵢⵙⴻⵏⵜ ⵙⵙⵉⵡⵍⴻⵖ.
ⴰⵇⴰ ⵏⵉⵜⴻⵏⵜⵉ ⴷⴻⴳ ⵡⴰⵟⵟⴰⵙ,
ⵡⴰⵔ ⵣⴻⵎⵎⴰⵔⴻⵏⵜ ⴰⴷ ⵜⵜⵡⴰⵃⴻⵙⴱⴻⵏⵜ. ◘40:6 ⵉⵥⵀⴷ. 89:7; ⵉⵛⴰ. 40:18
7 ⵡⴰⵔ ⵜⴻⵅⵙⴻⴷ ⵜⴰⵖⴰⵔⵚⵜ
ⴷ ⵜⴻⵡⵀⵉⴱⵜ ⵏ ⵍⵖⵉⴵⴻⵜ.
ⵛⴻⴽ ⵜⴰⵔⵣⵎⴻⴷ ⵉⵎⴻⵣⵣⵓⵖⴻⵏ ⵉⵏⵓ.
ⵜⴰⵖⴰⵔⵚⵜ ⵏ ⵡⴻⵛⵎⴰⴹ ⴷ ⵜⵖⴰⵔⵚⵜ ⵏ ⴷⴷⴻⵏⴱ
ⵡⴰⵔ ⵜⴻⵏⵜ ⵜᵉⵜⵜⴰⵔⴻⴷ. ◘40:7 ⵄⴱⵔ. 10:5
8 ⵅⴻⵏⵏⵉ ⵏⵏⵉⵖ: “ⵅⵣⴰⵔ, ⵏⴻⵛⵛ ⴰⴷ ⴷⴷ-ⴰⵙⴻⵖ,
ⴷⴻⴳ ⵡⴻⴷⵍⵉⵙ ⵉⵜⵜⵡⴰⵏⵏⴹⴻⵏ ⵢⵓⵔⴰ ⵅⴰⴼⵉ.
9 ⵏⴻⵛⵛ ⵖⴰⵔⵉ ⵎⴻⵥⵔⵉ, ⴰ ⴰⵔⴻⴱⴱⵉ,
ⵃⵉⵎⴰ ⴰⴷ ⴳⴳⴻⵖ ⵎⵉⵏ ⵜⴻⵅⵙⴻⴷ ⵛⴻⴽ.
ⵛⵛⴰⵔⵉⵄⴰ ⵏⵏⴻⵛ ⴰⵇⴰ-ⵜⵜ ⴷⵉ ⴷⴰⵅⴻⵍ ⵉⵏⵓ.” ◘40:9 ⵉⵥⵀⴷ. 37:31; ⵉⵛⴰ. 51:7
10 ⵏⴻⵛⵛ ⵜⵜⴱⴰⵔⵔⵃⴻⵖ ⵍⴻⵅⴱⴰⵔ ⴰⵚⴻⴱⵃⴰⵏ
ⵏ ⵜⵙⴻⴳⴷⴰ ⵏⵏⴻⵛ
ⴷⴻⴳ ⵡⴻⴳⵔⴰⵡ ⵏ ⵍⴳⴻⵏⵙ ⴰⵎⴻⵇⵇⵔⴰⵏ.
ⵅⵣⴰⵔ, ⵡⴰⵔ ⵜⵜⴻⵇⵇⵏⴻⵖ ⵉⵢⴻⵏⵛⵉⵛⴻⵏ ⵉⵏⵓ,
ⴰ ⵙⵉⴷⵉ, ⵛⴻⴽ ⵜⴻⵙⵙⵏⴻⴷ ⵜ. ◘40:10 ⵉⵥⵀⴷ. 35:18; 111:1
11 ⵡⴰⵔ ⵜⵜⵅⴻⵎⵎⵍⴻⵖ ⵜⴰⵙⴻⴳⴷⴰ ⵏⵏⴻⵛ
ⴷⴰⵅⴻⵍ ⴷⴻⴳ ⵡⵓⵍ ⵉⵏⵓ,
ⵙⵙⴰⵡⴰⵍⴻⵖ ⵅ ⵜⵉⴷⴻⵜⵜ ⵏⵏⴻⵛ ⵓ ⵅ ⵓⵙⴻⵏⵊⴻⵎ ⵏⵏⴻⵛ.
ⵜⴰⵎⴻⵅⵙⵉⵡⵜ ⵏⵏⴻⵛ ⵉⵛⴻⵡⵡⴰⵔⴻⵏ
ⴷ ⵍⴰⵎⴰⵏ ⵉ ⴷⴰⵢⴻⴽ
ⵡⴰⵔ ⵜⴻⵏ ⵙⵙⵏⵓⴼⴼⴰⵔⴻⵖ
ⴷⴻⴳ ⵡⴻⴳⵔⴰⵡ ⵏ ⵍⴳⴻⵏⵙ ⴰⵎⴻⵇⵇⵔⴰⵏ.
12 ⵛⴻⴽ, ⴰ ⵙⵉⴷⵉ,
ⵡⴰⵔ ⵅⴰⴼⵉ ⵜⴻⵙⵙⴱⴻⴷⴷⵉⴷ ⴰⵔⵔⴻⵃⵎⴻⵜ ⵏⵏⴻⵛ.
ⴻⵊⵊ ⵜⴰⵎⴻⵅⵙⵉⵡⵜ ⵏⵏⴻⵛ ⵉⵛⴻⵡⵡⴰⵔⴻⵏ
ⴷ ⵍⴰⵎⴰⵏ ⵉ ⴷⴰⵢⴻⴽ ⴰⴷ ⴰⵢⵉ ⵃⴹⴰⵏⵜ ⵍⴻⴱⴷⴰ.
13 ⵎⴰⵖⴰⵔ ⵡⴰⵔ ⵉⵣⴻⵎⵎⴰⵔ ⴰⴷ ⵉⵜⵜⵡⴰⵃⴻⵚⵚⴻⴱ
ⵍⵖⴰⵔ ⵉ ⴷ ⴰⵢⵉ ⵉⵇⵓⵡⵡⴰⵔⴻⵏ,
ⵍⵎⵓⵄⵚⵉⵢⵢⴰⵜ ⵉⵏⵓ ⵜⵜⵎⴻⵏⵄⴻⵏⵜ ⴰⵢⵉ-ⴷⴷ,
ⴷⴻⵡⵍⴻⵖ ⵡⴰⵔ ⵜⵜⵡⵉⵍⵉⵖ ⵄⴰⴷ ⵙ ⵎⴰⵏ ⴰⵢⴰ.
ⴰⵇⴰ-ⵜⴻⵏⵜ ⴷ ⴰⵟⵟⴰⵙ ⵅ ⵓⵛⵓⵡⵡⴰⴼ ⵏ ⵓⵣⴻⴵⵉⴼ ⵉⵏⵓ,
ⵓⵍ ⵉⵏⵓ ⵉⵜⵜⴻⴼⵛⵉⵍ.
14 ⴰ ⵙⵉⴷⵉ, ⴰⴷ ⴰⵛ ⵢⴰⵔⴹⴰ
ⵃⵉⵎⴰ ⴰⴷ ⴰⵢⵉ ⵜⴼⴻⴽⴽⴻⴷ,
ⴰ ⵙⵉⴷⵉ, ⴷⴻⵖⵢⴰⵜ ⵃⵉⵎⴰ ⴰⴷ ⴰⵢⵉ ⵜⴻⵡⵛⴻⴷ ⴰⴼⵓⵙ.
15 ⴻⵊⵊ ⵉⵏⵏⵉ ⵢⴰⵔⴻⵣⵣⵓⵏ ⵍⴻⵄⵎⴰⵔ ⵉⵏⵓ
ⵃⵉⵎⴰ ⴰⴷ ⵜ ⵜⴻⵃⵃⴰⵏ
ⴰⴷ ⵜⵜⵡⴰⵅⴰⵔⵡⴻⴹⴻⵏ,
ⴰⴷ ⵙⵙⵏⵓⴼⴰⵔⴻⵏ ⵉⵅⴻⴼ ⵏⵙⴻⵏ ⵊⵎⵉⵄ,
ⴻⵊⵊ ⵉⵏⵏⵉ ⵉⴼⴰⵔⵔⵃⴻⵏ ⴷⴻⴳ ⵓⵄⴻⴷⴷⴻⴱ ⵉⵏⵓ
ⴰⴷ ⴷⴻⵡⵍⴻⵏ ⵖⴰⵔ ⴹⴻⴼⴼⴰⵔ ⵓ ⴰⴷ ⵜⵜⵡⴰⵙⵙⴱⴻⵀⴷⵍⴻⵏ. ◘40:15 ⵉⵥⵀⴷ. 35:4, 26; 70:3; 71:13
16 ⴻⵊⵊ ⵉ-ⵜⴻⵏ ⴰⴷ ⵜⵜⵡⴰⵔⴻⴷⴷⴵⴻⵏ
ⴰⵎ ⵓⵅⴻⴵⴻⵚ ⵉ ⵍⴻⴼⴹⵉⵃⴻⵜ ⵏⵙⴻⵏ ⵉ ⵉⴳⴳⵉⵏ,
ⵉⵏⵏⵉ ⴷⵉⵏ ⵉⵇⵇⴰⵔⴻⵏ: “ⵀⴰ, ⵀⴰ!”
17 ⴻⵊⵊ ⵎⴰⵔⵔⴰ ⵉⵏⵏⵉ ⵅⴰⴽ ⵢⴰⵔⴻⵣⵣⵓⵏ,
ⴰⴷ ⴰⵔⵔⴻⵏ ⵎⴻⵥⵔⵉ, ⴰⴷ ⵣⵣⴰⵢⴻⴽ ⴼⴰⵔⵃⴻⵏ.
ⴻⵊⵊ ⵉⵏⵏⵉ ⵉⵜⵜⴻⵅⵙⴻⵏ ⴰⵙⴻⵏⵊⴻⵎ ⵏⵏⴻⵛ
ⴰⴷ ⵉⵏⵉⵏ ⵍⴻⴱⴷⴰ: “ⵙⵉⴷⵉ ⴷ ⴰⵎⴻⵇⵇⵔⴰⵏ!”
18 ⵏⴻⵛⵛ ⴷⵉ ⵍⴻⵖⴱⴻⵏ ⵓ ⵣⴻⵍⴹⴻⵖ,
ⵎⴰⵛⴰ ⵙⵉⴷⵉ ⵉⵏⵓ ⵉⵄⵇⴻⵍ ⵅⴰⴼⵉ.
ⵛⴻⴽ ⴷ ⵡⴻⵏⵏⵉ ⴷ ⴰⵢⵉ ⵉⵡⵛⵉⵏ ⴰⴼⵓⵙ
ⴷ ⵡⴻⵏⵏⵉ ⴷ ⴰⵢⵉ ⵉⵙⵙⵏⴻⵊⵎⴻⵏ.
ⴰ ⴰⵔⴻⴱⴱⵉ ⵉⵏⵓ, ⵡⴰⵔ ⵜⵜⵄⴻⵟⵟⴰⵍ ⵛⴰ.
◘40:6 40:6 ⵉⵥⵀⴷ. 89:7; ⵉⵛⴰ. 40:18
◘40:9 40:9 ⵉⵥⵀⴷ. 37:31; ⵉⵛⴰ. 51:7
◘40:10 40:10 ⵉⵥⵀⴷ. 35:18; 111:1
◘40:15 40:15 ⵉⵥⵀⴷ. 35:4, 26; 70:3; 71:13