1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⴰⵣⴻⵀⵀⴻⴷ ⵏ ⴷⴰⵡⵓⴷ.

2 ⵙⵙⴻⵄⴷ ⵏ ⵡⴻⵏⵏⵉ ⵉⴼⴻⵀⵀⵎⴻⵏ ⵉ ⵓⵎⴰⵔⵅⵓ.

ⵙⵉⴷⵉ ⴰⴷ ⵜ ⵉⴼⴻⴽⴽ ⴷⴻⴳ ⵡⴰⵙⵙ ⵏ ⵍⵖⴰⵔ.

3 ⵙⵉⴷⵉ ⴳⴳⵓⵔ ⴰⴷ ⵜ ⵉⵃⴹⴰ,

ⴰⴷ ⵜ ⵢⴻⵊⵊ ⴰⴷ ⵉⴷⴷⴰⵔ,

ⵏⴻⵜⵜⴰ ⴰⴷ ⵢⴰⵔⵔ ⵎⴻⵥⵔⵉ ⴷⵉ ⵜⴻⵎⵎⵓⵔⵜ.

ⵡⴰⵔ ⵜ ⵜⵜⵙⴻⵍⵍⴰⵎ ⵛⴰ

ⵖⴰⵔ ⵎⵉⵏ ⴷⵉⵏ ⵉⴵⴰⵏ

ⴷⵉ ⵍⴻⵄⵎⴰⵔ ⵏ ⵍⵄⴻⴷⵢⴰⵏ ⵏⵏⴻⵙ.

4 ⵙⵉⴷⵉ ⴰⴷ ⴽⵉⴷⴻⵙ ⵉⴱⴻⴷⴷ

ⴷⵉ ⵜⴰⵙⵙⵓⵜ ⵏ ⵍⴻⵀⵍⴰⵛ.

ⵛⴻⴽ ⵜᵉⵜⵜⴱⴻⴷⴷⵍⴻⴷ ⵎⴰⵔⵔⴰ ⵍⴻⵛⵜⵓ ⵏⵏⴻⵙ

ⵓⵎⵉ ⵉⵀⴻⴵⴻⵛ.

5 ⵏⴻⵛⵛ ⵏⵏⵉⵖ: “ⴰ ⵙⵉⴷⵉ, ⵃⵉⵏⵏ ⵅⴰⴼⵉ,

ⵙⴳⴻⵏⴼⴰ ⵍⴻⵄⵎⴰⵔ ⵉⵏⵓ,

ⵎⴰⵖⴰⵔ ⵅⴹⵉⵖ ⴰⴽⵉⴷⴻⴽ.”

6 ⵍⵄⴻⴷⵢⴰⵏ ⵉⵏⵓ ⵙⵙⴰⵡⴰⵍⴻⵏ ⵅⴰⴼⵉ ⵙ ⵍⵖⴰⵔ:

“ⵎⴻⵍⵎⵉ ⵉ ⵖⴰ ⵉⵎⵎⴻⵜ

ⵓ ⴰⴷ ⵉⵜⵜⵡⴰⴽⴽⴻⵙ ⵉⵙⴻⵎ ⵏⵏⴻⵙ?”

7 ⵎⴰⵍⴰ ⵢⵓⵙⴰ-ⴷⴷ ⵃⴻⴷ

ⵎⴰⵃⴻⵏⴷ ⴰⴷ ⴰⵢⵉ ⵉⵥⴰⵔ,

ⵉⵙⵙⴰⵡⴰⵍ ⴷⵉ ⵍⴱⴰⵟⴻⵍ.

ⵓⵍ ⵏⵏⴻⵙ ⵉⵙⵙⵎⵓⵏ ⵖⴰⵔⴻⵙ ⵍⵖⴻⵛⵛ,

ⵅⴻⵏⵏⵉ ⵉⵜⵜⴻⴼⴼⴻⵖ ⵖⴰⵔ ⴱⴰⵔⵔⴰ, ⵉⵙⵙⴰⵡⴰⵍ.

8 ⵎⴰⵔⵔⴰ ⵉⵏⵏⵉ ⴷ ⴰⵢⵉ ⵉⵛⴰⵔⵔⵀⴻⵏ

ⵜⵜⴻⵎⵜⴰⵎⴻⵏ ⵅⴰⴼⵉ ⵊⵎⵉⵄ,

ⴰⵇⴰ ⴰⵜⴻⵏ ⵜⵜⵅⴰⵔⵔⵉⵚⴻⵏ ⴷⴰⵢⵉ,

ⵎⴰⵃⴻⵏⴷ ⴰⴷ ⴰⵢⵉ ⴳⴳⴻⵏ ⵍⵖⴰⵔ.

9 ⵉⵍⵇⴻⴼ ⵉ-ⵜ ⴰⵛⵜⴰⴱ ⴰⴱⴰⵔⵛⴰⵏ

ⵓ ⵡⴻⵏⵏⵉ ⴷⴷ-ⵉⵡⴹⴰⵏ ⴰⵎⵎⵓ,

ⵡⴰⵔ ⴷⴷ-ⵉⵜⵜⴻⴽⴽⴰⵔ ⵄⴰⴷ.

10 ⵓⵍⴰ ⴷ ⴰⵔⵢⴰⵣ ⵡⵉ ⴰⴽ-ⴷ ⴷⴷⴰⵔⴻⵖ ⴷⵉ ⵍⴻⵀⵏⴰ,

ⵡⴻⵏⵏⵉ ⴷⵉ ⵜⵜⵉⵇⵇⴻⵖ,

ⵡⴻⵏⵏⵉ ⵉⵛⵛⴻⵏ ⴰⵖⵔⵓⵎ ⵉⵏⵓ,

ⴰⵇⴰ ⵉⵙⵙⴻⵎⵖⴰⵔ ⵅⴰⴼⵉ ⴰⵏⵉⵔⵣ ⵏⵏⴻⵙ. ◘41:10 ⵄⵓⴱ. 1:7, ⵢⵃ. 13:18

11 ⵎⴰⵛⴰ ⵛⴻⴽ, ⴰ ⵙⵉⴷⵉ, ⵃⵉⵏⵏ ⵅⴰⴼⵉ,

ⵙⵏⴻⴽⴽⴰⵔ ⴰⵢⵉ-ⴷⴷ,

ⵅⴻⵏⵏⵉ ⵏⴻⵛⵛ ⴰⴷ ⵜⴻⵏ ⵅⴻⴵⵚⴻⵖ.

12 ⵙ ⵎⴰⵏ ⴰⵢⴰ ⴰⴷ ⵙⵙⵏⴻⵖ

ⴰⵇⴰ ⵓⵙⵉⵖ ⴰⵛ-ⴷⴷ ⵅ ⵍⵅⴰⴹⴰⵔ,

ⵎⴰⵃⴻⵏⴷ ⵍⴻⵄⴷⵓ ⵉⵏⵓ

ⵡⴰⵔ ⵅⴰⴼⵉ ⵉⵜⵜⴷⵓⵇⵇⴻⵣ ⵙ ⵓⵙⵍⵉⵡⵍⴻⵡ.

13 ⵓ ⵅⴰⴼⵉ, ⴰⵇⴰ ⵛⴻⴽ ⵜⵜⵉⵛⴻⴷ ⴰⵢⵉ ⴰⴼⵓⵙ

ⵙ ⵡⴰⵡⴰⵍ ⵏⵏⴻⴽ ⵅ ⵍⴻⴽⵎⴰⵔⴻⵜ ⵉⵏⵓ,

ⵜⴻⵙⵙⴱⴻⴷⴷⴻⴷ ⴰⵢⵉ

ⵣⵣⴰⵜ ⵉ ⵡⵓⴷⴻⵎ ⵏⵏⴻⵛ ⵉ ⵍⴻⴱⴷⴰ. ◘41:13 2 ⵚⵎ. 7:16

14 ⴰⴷ ⵉⵜⵜⵡⴰⴱⴰⵔⴻⴽ ⵙⵉⴷⵉ, ⴰⵔⴻⴱⴱⵉ ⵏ ⵉⵙⵔⴰⵉⵍ,

ⵣⵉ ⵍⴻⴱⴷⴰ ⴰⵍ ⵉ ⵍⴻⴱⴷⴰ! ⴰⵎⵉⵏ, ⵡⴰⵀ, ⴰⵎⵉⵏ!