1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⵉ ⵢⴰⴷⵓⵜⵓⵏ. ⴰⵣⴻⵀⵀⴻⴷ ⵏ ⴷⴰⵡⵓⴷ.

2 ⵏⵏⵉⵖ: “ⵏⴻⵛⵛ ⴰⴷ ⴽⴽⴰⵔⴻⵖ ⴰⴷ ⵃⴹⵉⵖ ⵉⴱⵔⵉⴷⴻⵏ ⵉⵏⵓ

ⵣⵉ ⴷⴷⴻⵏⴱ ⵏ ⵢⵉⵍⴻⵙ ⵉⵏⵓ,

ⴰⴷ ⵟⵟⴼⴻⵖ ⴰⵃⴻⵟⵟⵓ ⵖⴰⵔ ⵓⵇⴻⵎⵎⵓⵎ ⵉⵏⵓ

ⵙ ⵉⵛⵜ ⵏ ⵜⴻⵛⵎⴰⵏⵜ,

ⵎⵉⵏ ⵖⴰ ⵢⴻⴽⴽ ⵓⵄⴻⴼⴼⴰⵏ ⵣⵣⴰⵜⵉ.”

3 ⵏⴻⵛⵛ ⴷⴻⵡⵍⴻⵖ ⴰⵎ ⵡⴻⵢⵏⴰⵡ,

ⵍⴻⵃⵃⴼⴻⵖ ⵉⵅⴻⴼ ⵉⵏⵓ ⵙ ⵓⵙⴻⵖⴷ,

ⴱⴻⴽⵎⴻⵖ ⵓⵍⴰ ⵅ ⵍⵅⴰⵔ,

ⵎⴰⵛⴰ ⵍⴻⵃⵔⵉⵇ ⵉⵏⵓ ⵜⵓⵖⴰ ⵢⴰⵔⴻⵏⵏⵉ.

4 ⵓⵍ ⵉⵏⵓ ⵉⴷⵡⴻⵍ ⵉⵃⴻⵎⵎⴰ ⴷⵉ ⴷⴰⵅⴻⵍ ⵉⵏⵓ,

ⵜᵉⵜⵜⵡⴰⵙⵙⴰⵔⴻⵖ ⵉⵛⵜ ⵏ ⵜⵎⴻⵙⵙⵉ

ⵖⴰⵔ ⵓⵏⵉⵅⵙⴻⵙ ⵉⵏⵓ.

ⵅⴻⵏⵏⵉ ⵙⵙⵉⵡⵍⴻⵖ ⵙ ⵢⵉⵍⴻⵙ ⵉⵏⵓ:

5 “ⴰ ⵙⵉⴷⵉ, ⵙⵛⴻⵏ ⴰⵢⵉ ⴰⵏⴻⴳⴳⴰⵔ ⵉⵏⵓ,

ⵎⴰⵏ ⵉⴵⴰ ⵍⵇⴻⴷⴷ ⵏ ⵡⵓⵙⵙⴰⵏ ⵉⵏⵓ,

ⵃⵉⵎⴰ ⴰⴷ ⵙⵙⵏⴻⵖ ⵎⴰⵎⵎⴻⵛ ⴰⵔⴻⵅⴼⴻⵖ.

6 ⵅⵣⴰⵔ, ⵛⴻⴽ ⵜⴰⵔⵔⵉⴷ ⵓⵙⵙⴰⵏ ⵉⵏⵓ

ⴰⵎ ⵢⵉⵛⴱⴰⵔⴻⵏ ⵏ ⵓⴼⵓⵙ,

ⵍⵎⵉⵊⴰⵍ ⵏ ⵜⵓⴷⴰⵔⵜ ⵉⵏⵓ ⵣⵣⴰⵜ ⵉ ⵛⴻⴽ

ⴰⵅⵎⵉ ⴷ ⵡⴰⵍⵓ.

ⴽⵓⵍ ⴱⵏⴰⴷⴻⵎ, ⵎⴰⵎⵎⴻⵛ ⵎⴰ ⵉⴱⴻⴷⴷ ⵉⵎⵜⴻⵏ,

ⵏⵉⵛⴰⵏ ⴰⵎ ⵢⵉⵛⵜ ⵏ ⵜⴰⵢⵢⵓⵜ.” ⵙⵉⵍⴰⵀ. ◘39:6 ⵉⵥⵀⴷ. 62:10; 144:4

7 ⵉⵡⴰ, ⴱⵏⴰⴷⴻⵎ ⵉⴳⴳⵓⵔ ⴰⵎ ⵢⵉⵊⵊ ⵏ ⵍⴻⵅⵢⴰⵍ,

ⵡⴰⵀ, ⴰⵎ ⵉⵛⵜ ⵏ ⵜⴰⵢⵢⵓⵜ

ⴰⵎⵎⵓ ⵉ ⵉⵜⵜⵔⴰⵃ ⵉⵜⵜⴰⵙ-ⴷⴷ.

ⵏⴻⵜⵜⴰ ⵉⵙⵙⵎⵓⵏ,

ⵡⴰⵔ ⵉⵙⵙⵉⵏ ⵎⴰⵏ ⵡⴻⵏ ⵜ ⵉ ⵖⴰ ⵉⴽⵙⵉⵏ ⵖⴰⵔⴻⵙ.

8 ⵓ ⵍⴻⵅⵅⵓ, ⵎⵉⵏ ⵖⴰ ⵙⵙⵉⵜⵎⴻⵖ, ⴰ ⵙⵉⴷⵉ ⵉⵏⵓ?

ⴰⵇⴰ ⵏⴻⵛⵛ ⵜⵜⵔⴰⵊⵉⵖ ⵛⴻⴽ!

9 ⴼⴻⴽⴽ ⴰⵢⵉ ⵣⵉ ⵎⴰⵔⵔⴰ ⵉⵅⴻⵟⵟⴰⵏ ⵉⵏⵓ,

ⵡⴰⵔ ⴷ ⴰⵢⵉ ⵜⵜⴻⴳⴳ ⵛⴰ ⴷ ⵜⵉⵙⴻⴹⵃⴰⵛ ⵉ ⵓⴱⵓⵃⴰⵍⵉ.

10 ⵏⴻⵛⵛ ⴷⴻⵡⵍⴻⵖ ⴰⵎ ⵡⴻⵢⵏⴰⵡ,

ⵡⴰⵔ ⴰⵔⴻⵣⵣⵎⴻⵖ ⴰⵇⴻⵎⵎⵓⵎ ⵉⵏⵓ,

ⵎⴰⵖⴰⵔ ⴷ ⵛⴻⴽ ⵉ ⵉⴳⴳⵉⵏ ⴰⵢⴰ.

11 ⴽⵙⵉ ⵣⵣⴰⵢⵉ ⵊⵊⵔⵉⵃⴻⵛⵜ ⵏⵏⴻⵛ,

ⴰⵇⴰ ⴼⴻⵏⵏⵉⵖ ⵙ ⵓⵟⴻⴼⴼⵓ ⵉⵃⴻⵚⵚⴰⵔⴻⵏ ⵏ ⵓⴼⵓⵙ ⵏⵏⴻⵛ.

12 ⵎⴰⵍⴰ ⵜⵙⴻⴳⴳⴷⴻⴷ ⵛⴰ ⵏ ⵡⴻⵔⵢⴰⵣ ⵙ ⵜⵉⵢⵢⵉⵜⴰ

ⴷⵉ ⵙⵙⵉⴱⴱⴻⵜ ⵏ ⵍⵎⵓⵄⵚⵉⵢⵢⴻⵜ ⵏⵏⴻⵙ,

ⵅⴻⵏⵏⵉ ⵜⴻⵙⵙⴼⴻⵙⵢⴻⴷ ⴰⵛⴻⵡⵡⴰⵔ ⵏ ⵡⴰⴷⴷⵓⴷ ⵏⵏⴻⵙ

ⴰⵎ ⵜⵛⵉⵏⴷⴰ.

ⵉⵡⴰ ⴽⵓⵍ ⴱⵏⴰⴷⴻⵎ ⴰⴷ ⵉⴼⵏⴰ

ⴰⵎ ⵢⵉⵛⵜ ⵏ ⵜⴰⵢⵢⵓⵜ. ⵙⵉⵍⴰⵀ.

13 ⵙⴻⵍ ⵉ ⵜⵥⴰⴵⵉⵜ ⵉⵏⵓ, ⴰ ⵙⵉⴷⵉ,

ⵙⵃⴻⵙⵙ ⵉ ⵓⵖⵓⵢⵢⵉ ⵉⵏⵓ.

ⵡⴰⵔ ⵜⵜⴻⴱⴽⵉⵎ ⵖⴰⵔ ⵉⵎⴻⵟⵟⴰⵡⴻⵏ ⵉⵏⵓ,

ⵎⴰⵖⴰⵔ ⴰⵇⴰ ⴰⵢⵉ ⴷ ⴰⴱⴰⵔⵔⴰⵏⵉ,

ⴷ ⴰⵎⵄⴻⵣⵣⴻⴱ ⵖⴰⵔⴻⴽ,

ⴰⵎ ⵎⴰⵔⵔⴰ ⵍⴻⵊⴷⵓⴷ ⵉⵏⵓ. ◘39:13 ⵍⴰⵡⵉ 25:23; 1 ⵉⵎ. 29:15; ⵉⵥⵀⴷ. 119:19; ⵄⴱⵔ. 11:13; 1 ⴱⵟ. 2:11

14 ⵙⵃⴻⵢⵢⴻⴷ ⵅⴰⴼⵉ

ⵎⴰⵃⴻⵏⴷ ⴰⴷ ⵛⴻⵄⵛⴻⵄⴻⵖ ⵄⴰⴷ ⵙ ⵍⴻⴼⵔⴰⵃⴻⵜ,

ⵇⴱⴻⵍ ⴰⴷ ⵔⴰⵃⴻⵖ ⵓ ⵡⴰⵔ ⴷⴰ ⵜⵜⵉⵍⵉⵖ ⵄⴰⴷ.