ⵉⵄⵉⴱⵔⴰⵏⵉⵢⵢⴻⵏ
1
ⵎⵎⵉⵙ ⵢⵓⵄⵍⴰ ⴰⵟⵟⴰⵙ ⵅ ⵍⵎⴰⵍⴰⴽⴰⵜ
1 ⴷⴻⴳ ⵡⵓⵙⵙⴰⵏ ⵉⵄⴷⵓⵏ ⵉⵙⵙⵉⵡⴻⵍ ⴰⵔⴻⴱⴱⵉ ⴷⵉ ⴽⵓⵍ ⵍⵡⴻⵇⵜ ⵓ ⴷⴻⴳ ⵡⴰⵟⵟⴰⵙ ⵏ ⵉⴱⵔⵉⴷⴻⵏ ⴰⴽ-ⴷ ⵍⴻⵊⴷⵓⴷ ⵏⵏⴻⵖ ⵙ ⵉⵏⴰⴱⵉⵢⵢⴻⵏ. 2 ⴷⴻⴳ ⵡⵓⵙⵙⴰⵏ-ⴰ ⵉⵏⴻⴳⴳⵓⵔⴰ ⴰⵇⴰ ⵉⵙⵙⵉⵡⴻⵍ-ⴷⴷ ⴰⴽⵉⴷⵏⴻⵖ ⵙ ⵎⵎⵉⵙ, ⵡⴻⵏⵏⵉ ⵉⴳⴳⴰ ⴷ ⴰⵡⵔⵉⵜ ⵏ ⴽⵓⵍⵛⵉ, ⵙ ⵡⴻⵏⵏⵉ ⵄⴰⵡⴻⴷ ⵉⴳⴳⴰ ⵣⵣⵎⴰⵏⴰⵜ. ◘1:2 ⴰⵎⵥ. 1:3; ⵉⵥⵀⴷ. 33:6; ⵎⵜ. 21:38; ⵢⵃ. 1:3; ⴰⴼⴰ. 3:9; ⴽⵓⵍ. 1:16. 3 ⵎⵉⵏⵣⵉ ⵏⴻⵜⵜⴰ ⴷ ⵜⴰⵍⴻⵍⵍⴻⵛⵜ ⵏ ⵓⵄⵓⴵⵉ ⵏⵏⴻⵙ ⵓⵍⴰ ⴷ ⵜⵜⴻⵙⵡⵉⵔⵜ ⵏ ⵙⵉⵎⴰⵏⵜ ⵏⵏⴻⵙ, ⵓ ⵏⴻⵜⵜⴰ ⴷ ⵡⴻⵏⵏⵉ ⵢⴰⵔⴻⴱⴱⵓⵏ ⵎⴰⵔⵔⴰ ⵜⵉⵎⴻⵙⵍⴰⵢⵉⵏ ⵙ ⵊⵊⴻⵀⴷ ⵏ ⵡⴰⵡⴰⵍ ⵏⵏⴻⵙ. ⴰⵇⴰ ⵏⴻⵜⵜⴰ ⵉⵙⵙⵉⵣⴷⴻⴳ ⴷⴷⵏⵓⴱ ⵏⵏⴻⵖ ⴷⵉ ⵟⵟⴱⵉⵄⴻⵜ ⵏ ⵢⵉⵅⴻⴼ ⵏⵏⴻⵙ, ⵓⵛⴰ ⵉⵔⵓⵃ ⵉⵇⵇⵉⵎ ⵖⴰⵔ ⵢⴻⴼⵓⵙ ⵏ ⵍⵄⴰⴹⵉⵎ ⴷⵉ ⵍⵓⵄⵍⴰ. ◘1:3 2 ⴽⵓⵔ. 4:4; ⴼⵉⵍ. 2:6; ⴽⵓⵍ. 1:15. 4 ⵏⴻⵜⵜⴰ ⵢⵓⵄⵍⴰ ⴰⵟⵟⴰⵙ ⵅ ⵍⵎⴰⵍⴰⴽⴰⵜ ⴰⵎ ⵉⵙⴻⵎ ⵉ ⵉⵟⵟⴻⴼ ⴷ ⵍⵡⴰⵔⵜ, ⴰⵇⴰ ⵉⵛⵏⴰ ⵅ ⵡⴻⵏⵏⵉ ⵏⵙⴻⵏ.
5 ⵎⵉⵏⵣⵉ ⵉ ⵎⴰⵏ ⵜⴻⵏ ⵣⵉ ⵍⵎⴰⵍⴰⴽⴰⵜ ⵉⵏⵏⴰ ⴰⵔⴻⴱⴱⵉ:
“ⵎⵎⵉ ⵉ ⵜⴻⴵⵉⴷ ⵛⴻⴽ,
ⴰⵙⵙ-ⴰ ⵏⴻⵛⵛ ⵊⵊⵉⵖ-ⴷⴷ ⵛⴻⴽ!”,
ⵓⵛⴰ ⵄⴰⵡⴻⴷ ⵉⵏⵏⴰ:
“ⵏⴻⵛⵛ ⴰⴷ ⴰⵙ ⵉⵍⵉⵖ ⴷ ⴱⴰⴱⴰⵙ
ⵓ ⵏⴻⵜⵜⴰ ⴰⴷ ⴰⵢⵉ ⵢⵉⵍⵉ ⴷ ⵎⵎⵉ”? ◘1:5 2 ⵚⵎ. 7:14; 1 ⵉⵎ. 17:13; 22:10; ⵉⵥⵀⴷ. 2:7; ⵍⴻⵅ. 13:33; ⵄⴱⵔ. 5:5.
6 ⵓⵛⴰ ⵅⴻⵏⵏⵉ ⵅⵎⵉ ⴷⴷ-ⵉⵙⵙⵉⴷⴻⴼ ⴰⵎⴻⵏⵣⵓ ⵖⴰⵔ ⴷⴷⵓⵏⴻⵛⵜ, ⵉⵏⵏⴰ:
“ⴰⴷ ⴰⵙ ⵙⴻⵊⴷⴻⵏⵜ ⵎⴰⵔⵔⴰ ⵍⵎⴰⵍⴰⴽⴰⵜ ⵏ ⴰⵔⴻⴱⴱⵉ.” ◘1:6 ⵉⵥⵀⴷ. 97:7.
7 ⵎⴰⵛⴰ ⵅ ⵍⵎⴰⵍⴰⴽⴰⵜ ⵉⵏⵏⴰ:
“ⵏⴻⵜⵜⴰ ⵉⴳⴳⴰ ⵍⵎⴰⵍⴰⴽⴰⵜ ⵏⵏⴻⵙ ⴷ ⵉⵙⴻⵎⵎⵉⴹⴻⵏ,
ⵓⵛⴰ ⵉⵎⵙⴻⵅⵅⴰⵔⴻⵏ ⵏⵏⴻⵙ
ⴷ ⵉⵛⵜ ⵏ ⵜⵎⴻⵙⵙⵉ ⵉⵜⵜⴻⵃⴷⵓⴷⵓⵇⴻⵏ”, ◘1:7 ⵉⵥⵀⴷ. 104:4
8 ⵎⴰⵛⴰ ⵅ ⵎⵎⵉⵙ:
“ⵍⵄⴰⵔⵛ ⵏⵏⴻⵛ, ⴰ ⴰⵔⴻⴱⴱⵉ,
ⴰⵇⴰ ⵉⴵⴰ ⵉ ⵍⴻⴱⴷⴰ ⵇⴰⵄ.
ⴰⵣⴻⴵⴰⴹ ⵏ ⵜⴳⴻⵍⴷⵉⵜ ⵏⵏⴻⵛ,
ⴰⵇⴰ-ⵜⵜ ⴷ ⴰⵣⴻⴵⴰⴹ ⵉⵙⴻⴳⴳⴷⴻⵏ. ◘1:8 ⵉⵥⵀⴷ. 45:7.
9 ⴰⵇⴰ ⵜⴻⵅⵙⴻⴷ ⵜⴰⵙⴻⴳⴷⴰ, ⵜⵛⴰⵔⵀⴻⴷ ⵍⵖⴰⵔ.
ⵙ ⵓⵢⴻⵏⵏⵉ ⴰⵇⴰ ⵉⴷⵀⴻⵏ ⵉ ⵛ
ⴰⵔⴻⴱⴱⵉ, ⴰⵔⴻⴱⴱⵉ ⵏⵏⴻⵛ,
ⵙ ⵣⵣⴻⵛⵜ ⵏ ⵍⴻⴼⵔⴰⵃⴻⵜ
ⵙⴻⵏⵏⴻⵊ ⵉ ⵉⵎⵄⴰⵛⴰⵔⴻⵏ ⵏⵏⴻⵛ.” ◘1:9 ⵉⵥⵀⴷ. 45:7, 8
10 ⵓⵛⴰ ⵅⴻⵏⵏⵉ:
“ⵣⴻⴳ ⵓⴱⴻⴷⴷⵓ ⵜⴻⴳⴳⵉⴷ ⵛⴻⴽ ⴷⵙⴰⵙ ⵏ ⵜⴻⵎⵎⵓⵔⵜ,
ⵉⵊⴻⵏⵡⴰⵏ ⴵⴰⵏ ⴷ ⵍⵅⴻⴷⵎⴻⵜ ⵏ ⵉⴼⴰⵙⵙⴻⵏ ⵏⵏⴻⵛ. ◘1:10 ⵉⵥⵀⴷ. 102:26.
11 ⵉⵏⴰ ⴰⴷ ⵜⵜⵡⴰⵜⴻⵃⵃⴰⵏ, ⵎⴰⵛⴰ ⵛⴻⴽ ⴰⴷ ⵜⴷⵓⵎⴻⴷ,
ⵓⵛⴰ ⵉⵏⴰ ⵎⴰⵔⵔⴰ ⴰⴷ ⴰⵔⵛⴰⵏ ⴰⵎ ⵡⴰⵔⵔⵓⴹ. ◘1:11 ⵉⵛⴰ. 51:6; 2 ⴱⵟ. 3:7, 10.
12 ⴰⵎⴻⵛⵏⴰⵡ ⵉⵊⵊ ⵏ ⵓⵙⴻⵍⵀⴰⵎ ⴰⴷ ⵜⴻⵏ ⵜⵜⴹⴻⴼⵙⴻⴷ.
ⴰⴷ ⵜⵜⵡⴰⴱⴻⴷⴷⵍⴻⵏ ⴰⵎ ⵡⴰⵔⵔⵓⴹ,
ⵎⴰⵛⴰ ⵛⴻⴽ ⴰⴷ ⵜⵉⵍⵉⴷ ⴷ ⵡⴻⵏⵏⵉ
ⵓⵛⴰ ⵉⵙⴻⴳⴳⵯⵓⵙⴰ ⵏⵏⴻⵛ ⵡⴰⵔ ⵇⴻⵟⵟⵉⵏ ⵛⴰ.” ◘1:12 ⵉⵥⵀⴷ. 102:26-28.
13 ⵎⴰⵛⴰ ⵉ ⵎⴰⵏ ⵜⴻⵏ ⵣⵉ ⵍⵎⴰⵍⴰⴽⴰⵜ ⵉⵏⵏⴰ ⵉⵊⵊ ⵏ ⵡⴰⵙⵙ:
“ⵇⵇⵉⵎ ⵖⴰⵔ ⵢⴻⴼⵓⵙ ⵉⵏⵓ
ⴰⵍ ⴷ ⵖⴰ ⴳⴳⴻⵖ ⵍⵄⴻⴷⵢⴰⵏ ⵏⵏⴻⵛ
ⴷ ⵜⴰⵏⴻⴱⴷⴰⵜ ⵙⴰⴷⵓ ⵉⴹⴰⵔⴻⵏ ⵏⵏⴻⵛ”? ◘1:13 ⵉⵥⵀⴷ. 110:1; ⵍⴻⵅ. 2:34; 1 ⴽⵓⵔ. 15:25; ⴰⴼⴰ. 1:20; ⵄⴱⵔ. 10:12.
14 ⵎⴰ ⵡⴰⵔ ⴵⵉⵏⵜ ⵏⵉⵜⴻⵏⵜⵉ ⴷ ⴰⵔⵔⵓⵃⴰⵜ ⵉ ⵜⵙⴻⵅⵅⴰⵔⵜ, ⵜⵜⵡⴰⵙⵙⴻⴽⴽⴻⵏⵜ-ⵉ-ⴷⴷ ⵃⵉⵎⴰ ⴰⴷ ⵙⴻⵅⵅⴰⵔⴻⵏⵜ ⵉ ⵢⵉⵏⵏⵉ ⵖⴰ ⵉⵡⴰⵔⵜⴻⵏ ⵜⵓⴷⴰⵔⵜ?
◘1:2 1:2 ⴰⵎⵥ. 1:3; ⵉⵥⵀⴷ. 33:6; ⵎⵜ. 21:38; ⵢⵃ. 1:3; ⴰⴼⴰ. 3:9; ⴽⵓⵍ. 1:16.
◘1:3 1:3 2 ⴽⵓⵔ. 4:4; ⴼⵉⵍ. 2:6; ⴽⵓⵍ. 1:15.
◘1:5 1:5 2 ⵚⵎ. 7:14; 1 ⵉⵎ. 17:13; 22:10; ⵉⵥⵀⴷ. 2:7; ⵍⴻⵅ. 13:33; ⵄⴱⵔ. 5:5.
◘1:6 1:6 ⵉⵥⵀⴷ. 97:7.
◘1:7 1:7 ⵉⵥⵀⴷ. 104:4
◘1:8 1:8 ⵉⵥⵀⴷ. 45:7.
◘1:9 1:9 ⵉⵥⵀⴷ. 45:7, 8
◘1:10 1:10 ⵉⵥⵀⴷ. 102:26.
◘1:11 1:11 ⵉⵛⴰ. 51:6; 2 ⴱⵟ. 3:7, 10.
◘1:12 1:12 ⵉⵥⵀⴷ. 102:26-28.
◘1:13 1:13 ⵉⵥⵀⴷ. 110:1; ⵍⴻⵅ. 2:34; 1 ⴽⵓⵔ. 15:25; ⴰⴼⴰ. 1:20; ⵄⴱⵔ. 10:12.