1 ⵎⵉⵏⵣⵉ ⴽⵓⵍ ⴰⵔⵔⴰⵢⵙ ⵏ ⵉⴽⴻⵀⵀⴰⵏⴻⵏ ⵉⵜⵜⵡⴰⴽⴽⴻⵙ-ⴷⴷ ⵣⴻⴳ ⵉⵡⴷⴰⵏ, ⵉⵜⵜⵡⴰⵙⵙⴳⴻⵄⵄⴻⴷ ⴷⵉ ⵟⵟⵡⴻⵄ ⵏ ⵉⵡⴷⴰⵏ ⵅ ⵎⵉⵏ ⵉⴵⴰⵏ ⵏ ⴰⵔⴻⴱⴱⵉ, ⵎⴰⵃⴻⵏⴷ ⴰⴷ ⵉⵇⴻⴷⴷⴻⵎ ⵜⵉⵡⵀⵉⴱⵉⵏ ⴷ ⵜⵖⴰⵔⵚⵉⵏ ⵅ ⴷⴷⵏⵓⴱ. 2 ⵉⵣⴻⵎⵎⴰⵔ ⴰⴷ ⵉⵎⵎⴰⵔⵙ ⵉⵅⴻⴼ ⵏⵏⴻⵙ, ⴰⴷ ⵉⵃⵉⵏⵏ ⵅ ⵉⵇⵓⴱⴱⴰⵏⵉⵢⵢⴻⵏ ⴷ ⵉⵎⵡⴻⴷⴷⴰⵔⴻⵏ, ⵎⵉⵏⵣⵉ ⵓⵍⴰ ⴷ ⵏⴻⵜⵜⴰ ⵙⵉⵎⴰⵏⵜ ⵏⵏⴻⵙ ⵢⴰⵔⴹ ⵜⵓⴹⵄⴻⴼⵜ. 3 ⵎⴰⵖⴰⵔ ⵙ ⵎⴰⵏ ⴰⵢⴰ ⴷ ⵉⵛⵜⴻⵏ ⵉⵜⵜⵅⴻⵚⵚⴰ ⴰⵙ ⴰⴷ ⵉⵙⵙⴳⴻⵄⵄⴻⴷ ⵜⵉⵖⴰⵔⵚⵉⵏ ⵅ ⴷⴷⵏⵓⴱ ⵏ ⵍⴳⴻⵏⵙ ⵓⵛⴰ ⵄⴰⵡⴻⴷ ⵅ ⴷⴷⵏⵓⴱ ⵏ ⵢⵉⵅⴻⴼ ⵏⵏⴻⵙ. ◘5:3 ⵍⴰⵡⵉ 9:7; 16:6; ⵄⴱⵔ. 7:26. 4 ⵓⵍⴰ ⴷ ⵉⵊⵊⴻⵏ ⴰⴷ ⵉⴽⵙⵉ ⵉ ⵢⵉⵅⴻⴼ ⵏⵏⴻⵙ ⵛⵛⴰⵏ-ⴰ, ⵎⵖⵉⵔ ⵡⴻⵏⵏⵉ ⵉⵜⵜⵡⴰⵍⴰⵖⴰⵏ ⵣⵉ ⴰⵔⴻⴱⴱⵉ ⴰⵎ ⵎⴰⵎⵎⴻⵛ ⵉⵜⵜⵡⴰⵍⴰⵖⴰ ⵀⴰⵔⵓⵏ. ◘5:4 ⵓⴼ. 28:1; 1 ⵉⵎ. 23:13; 2 ⵉⵎ. 26:16. 5 ⴰⵎⵎⵓ ⵄⴰⵡⴻⴷ ⵍⵎⴰⵙⵉⵃ ⵡⴰⵔ ⵉⵙⵙⵄⵓⴵⵉ ⵛⴰ ⵉⵅⴻⴼ ⵏⵏⴻⵙ ⵓⵎⵉ ⵉⴷⵡⴻⵍ ⴷ ⴰⵔⵔⴰⵢⵙ ⵏ ⵉⴽⴻⵀⵀⴰⵏⴻⵏ, ⵎⴰⵛⴰ ⵉⵙⵙⵄⵓⴵⴰ ⵡⴻⵏⵏⵉ ⴷⴷ ⵖⴰⵔⴻⵙ ⵉⵙⵙⵉⵡⵍⴻⵏ:

“ⵛⴻⴽ ⴷ ⵎⵎⵉ,

ⵏⴻⵛⵛ ⵊⵊⵉⵖ-ⴷⴷ ⵛⴻⴽ ⴰⵙⵙ-ⴰ!” ◘5:5 ⵉⵥⵀⴷ. 2:7; ⵍⴻⵅ. 13:33; ⵄⴱⵔ. 1:5.

6 ⴰⵎ ⵎⴰⵎⵎⴻⵛ ⵉⵏⵏⴰ ⵄⴰⵡⴻⴷ ⴷⵉ ⵎⴰⵏⵉ ⵏⵏⴻⵖⵏⵉ:

“ⵛⴻⴽ ⴷ ⴰⴽⴻⵀⵀⴰⵏ ⵉ ⵍⴻⴱⴷⴰ,

ⴷⴻⴳ ⵡⴰⵔⵡⴰⵙ ⵏ ⵎⴰⵍⴽⵉⵚⴰⴷⵉⵇ.” ◘5:6 ⵉⵥⵀⴷ. 110:4; ⵄⴱⵔ. 7:17.

7 ⵍⴰⵎⵉ ⵜⵓⵖⴰ ⵢⴰⵔⵔⴻⴹ ⴰⵔⵔⵉⵎⴻⵜ ⵏ ⵡⴻⵢⵙⵓⵎ ⵏⵏⴻⵙ, ⵉⵇⴻⴷⴷⴻⵎ ⵜⵉⵥⴰⴵⵉⵜⵉⵏ ⴷ ⵜⵓⵜⵔⴰ ⵙ ⵉⵖⵓⵢⵢⴰⵏ ⴰⵟⵟⴰⵙ ⵓ ⵙ ⵉⵎⴻⵟⵟⴰⵡⴻⵏ ⵉ ⵡⴻⵏⵏⵉ ⵜⵓⵖⴰ ⵉⵣⴻⵎⵎⴰⵔⴻⵏ ⴰⴷ ⵜ-ⵉ-ⴷⴷ-ⵉⵙⵙⵏⴻⴽⴽⴰⵔ ⵣⵉ ⵍⵎⴻⵡⵜ ⵉ ⵜⵓⴷⴰⵔⵜ, ⵓⵛⴰ ⵏⴻⵜⵜⴰ ⵉⵙⵍⴰ ⴰⵙ. ◘5:7 ⵎⵜ. 26:39; 27:46, 50; ⵢⵃ. 17:1. 8 ⵏⴻⵜⵜⴰ, ⵡⴰⵅⵅⴰ ⵜⵓⵖⴰ-ⵜ ⴷ ⵎⵎⵉⵙ, ⴰⵇⴰ ⵉⵍⵎⴻⴷ ⵟⵟⴰⵄⴻⵜ ⵙ ⵜⵉⴳⴳⵯⵓⴷⵉ ⵓ ⵣⴻⴳ ⵓⵡⴻⴷⴷⴻⴱ ⵉ ⵉⴽⵙⵉ. ◘5:8 ⴼⵉⵍ. 2:6. 9 ⴰⵎⵎⵓ ⵉ ⵉⴷⵡⴻⵍ ⵏⴻⵜⵜⴰ ⵉⴽⴻⵎⵎⴻⵍ, ⵉⴷⵡⴻⵍ ⴷ ⵙⵙⵉⴱⴱⴻⵜ ⵏ ⵜⵓⴷⴰⵔⵜ ⵉⵜⵜⴷⵓⵎⴰⵏ ⵉ ⵎⴰⵔⵔⴰ ⵉⵏⵏⵉ ⴷ ⴰⵙ ⵉ ⵖⴰ ⵉⵟⵟⴰⵄⴻⵏ, 10 ⵓⵛⴰ ⵉⴳⴳⴰ ⵉ-ⵜ ⴰⵔⴻⴱⴱⵉ ⴷ ⴰⵔⵔⴰⵢⵙ ⵏ ⵉⴽⴻⵀⵀⴰⵏⴻⵏ ⴷⴻⴳ ⵡⴰⵔⵡⴰⵙ ⵏ ⵎⴰⵍⴽⵉⵚⴰⴷⵉⵇ. ◘5:10 ⵉⵥⵀⴷ. 110:4

11 ⴰⵇⴰ ⵖⴰⵔⵏⴻⵖ ⴰⵟⵟⴰⵙ ⵎⵉⵏ ⵖⴰ ⵏⵉⵏⵉ ⵅ ⵎⴰⵍⴽⵉⵚⴰⴷⵉⵇ ⵡⴰⵏⵉⵜⴰ, ⵎⴰⵛⴰ ⵉⵡⵄⴰⵔ ⴰⴷ ⵜ ⵏⴼⴻⵙⵙⴰⵔ, ⵎⵉⵏⵣⵉ ⵜⴷⴻⵡⵍⴻⵎ ⵜⴻⵡⵄⴰⵔⴻⵎ ⴰⴷ ⵜⴻⵙⵍⴻⵎ. 12 ⵎⴰⵖⴰⵔ ⵜⵓⵖⴰ ⵉⵜⵜⵅⴻⵚⵚⴰ ⴰⴷ ⵜⵉⵍⵉⵎ ⴷ ⵉⵎⴻⵙⵖⴰⵔⴻⵏ ⵣⵉ ⵊⵊⵉⵀⴻⵜ ⵏ ⵍⵎⵉⵊⴰⵍ ⵏ ⵍⵡⴻⵇⵜ ⵉ ⵜⴹⴻⴼⴼⴰⵔⴻⵎ ⵜⵖⵓⵔⵉ-ⵢⴰ. ⵎⴰⵛⴰ ⵍⴻⵅⵅⵓ ⵉⵜⵜⵅⴻⵚⵚⴰ ⴰⵡⴻⵎ ⵄⴰⴷ ⴰⴷ ⵜⵍⴻⵎⴷⴻⵎ ⵍⵃⵓⵔⵓⴼ ⵉⵎⴻⵣⵡⵓⵔⴰ ⵏ ⴱⴻⴷⴷⵓ ⵏ ⵡⴰⵡⴰⵍⴻⵏ ⵏ ⴰⵔⴻⴱⴱⵉ, ⴽⴻⵏⵏⵉⵡ ⵜⴻⵃⴷⴰⵊⴻⵎ ⵄⴰⴷ ⴰⵖⵉ ⴷⴻⴳ ⵡⴻⵎⵛⴰⵏ ⵏ ⵎⴰⵛⵛⴰ ⵉⵊⴻⵀⴷⴻⵏ. ◘5:12 1 ⴽⵓⵔ. 3:1, 2, 3. 13 ⵎⵉⵏⵣⵉ ⴽⵓⵍ ⵉⵊⵊⴻⵏ ⵡⴻⵏⵏⵉ ⵉⵛⴰⵔⵛⴻⵏ ⴷⴻⴳ ⵓⵖⵉ, ⵡⴰⵔ ⵉⵇⴻⴷⴷ ⵅ ⵡⴰⵡⴰⵍ ⵏ ⵜⵙⴻⴳⴷⴰ, ⵎⵉⵏⵣⵉ ⵏⴻⵜⵜⴰ ⴷ ⴰⵙⴻⵢⵎⵉ ⵄⴰⴷ. 14 ⵎⴰⵛⴰ ⵎⴰⵛⵛⴰ ⵉⵊⴻⵀⴷⴻⵏ ⵉⴼⴼⴻⵖ-ⴷⴷ ⵉ ⵢⵉⵏⵏⵉ ⵉⵎⵖⴰⵔⴻⵏ, ⵉⵏⵏⵉ ⴰⵇⴰ ⵏⵏⵓⵎⴻⵏ ⴰⴷ ⴷⴰⵔⵔⴱⴻⵏ ⵜⴰⵛⵉⵜ ⵏⵙⴻⵏ ⵃⵉⵎⴰ ⴰⴷ ⴼⴰⵔⵣⴻⵏ ⵍⵅⴰⵔ ⵅ ⵍⵖⴰⵔ.