1 ⴷⴻⴳ ⵡⴰⵙⵙ ⵡⵉⵙⵙ ⵜⵎⴻⵏⵢⴰ ⵉⵎⵙⴰⵔ, ⴰⵇⴰ ⵎⵓⵙⴰ ⵉⵍⴰⵖⴰ ⵉ ⵀⴰⵔⵓⵏ ⴷ ⵡⴰⵔⵔⴰⵡ ⵏⵏⴻⵙ ⴷ ⵉⵎⵖⴰⵔⴻⵏ ⵏ ⵉⵙⵔⴰⵉⵍ 2 ⵓⵛⴰ ⵉⵏⵏⴰ ⵉ ⵀⴰⵔⵓⵏ: “ⴽⵙⵉ ⵖⴰⵔⴻⴽ ⵉⵊⵊ ⵏ ⵓⵄⴻⵊⵎⵉ, ⴰⵎⴻⵥⵢⴰⵏ ⵏ ⵓⴼⵓⵏⴰⵙ, ⴰⵎ ⵜⵖⴰⵔⵚⵜ ⵏ ⴷⴷⴻⵏⴱ, ⵓⵍⴰ ⴷ ⵉⵊⵊ ⵏ ⵉⵛⴰⵔⵔⵉ ⴰⵎ ⵜⵖⴰⵔⵚⵜ ⵏ ⵡⴻⵛⵎⴰⴹ, ⴰⵇⴰ ⴰⴷ ⵉⵍⵉⵏ ⵛⵏⴰⵏ ⵇⴰⵄ, ⵓⵛⴰ ⴻⵊⵊ ⵉ-ⵜⴻⵏ ⴰⴷ ⴷⴷ-ⵇⴰⵔⵔⴱⴻⵏ ⵖⴰⵔ ⵡⵓⴷⴻⵎ ⵏ ⵙⵉⴷⵉ. ◼9:2 ⴰⵄⴻⵊⵎⵉ-ⵏⵉⵖ ‘ⴰⵢⴻⵏⴷⵓⵥ’ ⵏⵉⵖ ‘ⵢⵓⴳⴳⵓ’. ⵓⵍⴰ ⴷⵉ ⴰⵢⴰⵜ 3 ⴷ 8.  ◘9:2 ⵓⴼ. 29:1 3 ⵙⵉⵡⴻⵍ ⴰⴽ-ⴷ ⴰⵢⵜ ⵏ ⵉⵙⵔⴰⵉⵍ ⵓⵛⴰ ⵉⵏⵉ: “ⴽⵙⵉⵎ ⵉⵊⵊ ⵏ ⵓⵎⵢⴰⵏ ⵣⴻⴳ ⵉⵖⴰⵢⴹⴻⵏ ⴰⵎ ⵜⵖⴰⵔⵚⵜ ⵏ ⴷⴷⴻⵏⴱ ⵓ ⴽⵙⵉ ⵉⵊⵊ ⵏ ⵓⵄⴻⵊⵎⵉ ⴷ ⵉⵊⵊ ⵏ ⵢⴻⵣⵎⴰⵔ, ⴰⵇⴰ ⴰⴷ ⵉⵍⵉⵏ ⵉⵎⵓⴷⴷⴰⵔⴻⵏ ⵛⵏⴰⵏ ⵇⴰⵄ ⵏ ⵉⵊⵊ ⵏ ⵓⵙⴻⴳⴳⵯⴰⵙ, ⵉ ⵜⵖⴰⵔⵚⵜ ⵏ ⵡⴻⵛⵎⴰⴹ, 4 ⵓⵛⴰ ⴽⵙⵉ ⵄⴰⵡⴻⴷ ⵉⵊⵊ ⵏ ⵓⴼⵓⵏⴰⵙ ⴷ ⵉⵊⵊ ⵏ ⵓⵛⴰⵔⵔⵉ ⴰⵎ ⵜⵖⴰⵔⵚⴰ ⵏ ⵍⴻⵀⵏⴰ, ⵎⴰⵃⴻⵏⴷ ⴰⴷ ⵜⴻⵏ ⵇⴻⴷⴷⵎⴻⵏ ⴷ ⴷⴷⴱⵉⵃⴻⵜ ⵉ ⵙⵉⴷⵉ, ⵓⵍⴰ ⴷ ⵉⵛⵜ ⵏ ⵜⴻⵡⵀⵉⴱⵜ ⵏ ⵍⵖⵉⴵⴻⵜ ⵉⵅⴻⴵⴹⴻⵏ ⵙ ⵣⵣⴻⵛⵜ, ⵎⵉⵏⵣⵉ ⴰⵙⵙ-ⴰ ⴰⴷ ⴰⵡⴻⵎ ⴷⴷ-ⵉⴱⴰⵏ ⵙⵉⴷⵉ.”

5 ⵅⴻⵏⵏⵉ ⴰⵡⵢⴻⵏ ⵎⵉⵏ ⵅⴻⴼ ⵉⵡⴻⵚⵚⴰ ⵎⵓⵙⴰ ⵖⴰⵔ ⵣⵣⴰⵜ ⵏ ⵓⵇⵉⴹⵓⵏ ⵏ ⵓⵎⵙⴰⴳⴰⵔ ⵓⵛⴰ ⵜⴰⵎⴻⵙⵎⵓⵏⵜ ⵜⵇⴰⵔⵔⴻⴱ-ⴷⴷ ⵓⵛⴰ ⴱⴻⴷⴷⴻⵏ ⵏⵉⵜⵏⵉ ⵣⵣⴰⵜ ⵉ ⵡⵓⴷⴻⵎ ⵏ ⵙⵉⴷⵉ.

6 ⵓⵛⴰ ⵎⵓⵙⴰ ⵉⵏⵏⴰ: “ⴷ ⵎⴰⵏ ⴰⵢⴰ ⵎⵉⵏ ⵅⴻⴼ ⵉⵡⴻⵚⵚⴰ ⵙⵉⴷⵉ ⵎⴰⵃⴻⵏⴷ ⴰⴷ ⵜ ⵜⴻⴳⴳⴻⵎ. ⵓⵛⴰ ⵅⴻⵏⵏⵉ ⴰⴷ ⴰⵡⴻⵎ ⴷⴷ-ⵉⴱⴰⵏ ⵓⵄⵓⴵⵉ ⵏ ⵙⵉⴷⵉ.”

7 ⵉⵏⵏⴰ ⵎⵓⵙⴰ ⵉ ⵀⴰⵔⵓⵏ: “ⵇⴰⵔⵔⴻⴱ-ⴷⴷ ⵖⴰⵔ ⵓⵄⴰⵍⵟⴰⵔ ⵓⵛⴰ ⵙⴻⵡⵊⴻⴷ ⵜⴰⵖⴰⵔⵚⵜ ⵏⵏⴻⵛ ⵏ ⴷⴷⴻⵏⴱ ⴷ ⵜⵖⴰⵔⵚⵜ ⵏⵏⴻⵛ ⵏ ⵡⴻⵛⵎⴰⴹ ⵓⵛⴰ ⴻⴳⴳ ⴰⵚⵍⴰⵃ ⵅ ⵢⵉⵅⴻⴼ ⵏⵏⴻⵛ ⵓ ⵅ ⵍⴳⴻⵏⵙ. ⵙⴻⵡⵊⴻⴷ ⵄⴰⵡⴻⴷ ⵜⴰⵡⵀⵉⴱⵜ ⵏ ⵍⴳⴻⵏⵙ ⵓⵛⴰ ⴻⴳⴳ ⵅⴰⵙⴻⵏ ⴰⵚⵍⴰⵃ ⴰⵎ ⵎⴰⵎⵎⴻⵛ ⵜ ⵉⵡⴻⵚⵚⴰ ⵙⵉⴷⵉ.” ◘9:7 ⵍⴰⵡⵉ 16:6; ⵄⴱⵔ. 7:27 8 ⵅⴻⵏⵏⵉ ⵉⵇⴰⵔⵔⴻⴱ-ⴷⴷ ⵀⴰⵔⵓⵏ ⵖⴰⵔ ⵓⵄⴰⵍⵟⴰⵔ ⵓⵛⴰ ⵉⵖⴰⵔⵚ ⵉ ⵓⵄⴻⵊⵎⵉ ⵏ ⵜⵖⴰⵔⵚⵜ ⵏ ⴷⴷⴻⵏⴱ ⵉ ⵉⴵⴰⵏ ⵉ ⵢⵉⵅⴻⴼ ⵏⵏⴻⵙ. 9 ⴰⵔⵔⴰⵡ ⵏ ⵀⴰⵔⵓⵏ ⵉⵡⵢⴻⵏ ⴰⵙ-ⴷⴷ ⵉⴷⴰⵎⵎⴻⵏ ⵓⵛⴰ ⵏⴻⵜⵜⴰ ⵉⵙⵙⵓⴼ ⴰⴹⴰⴹ ⵏⵏⴻⵙ ⴷⴻⴳ ⵉⴷⴰⵎⵎⴻⵏ ⵓⵛⴰ ⵉⴳⴳⴰ ⵉ-ⵜⴻⵏ ⵅ ⵡⴰⵛⵛⴰⵡⴻⵏ ⵏ ⵓⵄⴰⵍⵟⴰⵔ. ⵎⵉⵏ ⵉⵛⴻⵟⵟⴻⵏ ⵏ ⵉⴷⴰⵎⵎⴻⵏ ⵉⵙⴻⵢⵢⴻⴱ ⵉ-ⵜⴻⵏ ⵖⴰⵔ ⵓⴹⴰⵔ ⵏ ⵓⵄⴰⵍⵟⴰⵔ. 10 ⵉⵙⵙⴱⴻⵅⵅⴰⵔ ⵜⴰⴷⵓⵏⵜ ⴷ ⵜⵉⵥⵥⴰⵍ ⴷ ⵎⵉⵏ ⵢⵓⵢⵍⴻⵏ ⵖⴰⵔ ⵜⵙⴰ ⵏ ⵜⵖⴰⵔⵚⵜ ⵏ ⴷⴷⴻⵏⴱ ⵅ ⵓⵄⴰⵍⵟⴰⵔ ⴰⵎ ⵎⴰⵎⵎⴻⵛ ⵢⵓⵎⵓⵔ ⵙⵉⴷⵉ ⵉ ⵎⵓⵙⴰ. ◼9:10 ⵜⵉⵥⵥⴰⵍ-ⵏⵉⵖ ‘ⵜⵉⴳⴻⵥⵍⵉⵏ’. ⵓⵍⴰ ⴷⵉ ⴰⵢⴻⵜ 19. 11 ⵉⵙⵙⴻⵛⵎⴻⴹ ⴰⵢⵙⵓⵎ ⴷ ⵢⵉⵍⴻⵎ ⵙ ⵜⵎⴻⵙⵙⵉ ⴱⴰⵔⵔⴰ ⵉ ⵍⵎⴰⵔⴳⴻⵃ ⵏ ⵍⵄⴻⵙⴽⴰⵔ.

12 ⵉⵖⴰⵔⵚ ⵜⴰⵖⴰⵔⵚⵜ ⵏ ⵡⴻⵛⵎⴰⴹ ⵓⵛⴰ ⴰⵔⵔⴰⵡ ⵏ ⵀⴰⵔⵓⵏ ⵇⴻⴷⴷⵎⴻⵏ ⴰⵙ ⵉⴷⴰⵎⵎⴻⵏ ⵓⵛⴰ ⵏⴻⵜⵜⴰ ⵉⵣⴻⴵⴻⵄ ⵉ-ⵜⴻⵏ ⵅ ⵓⵄⴰⵍⵟⴰⵔ ⵖⴰⵔ ⵎⴰⵔⵔⴰ ⵉⵖⴻⵣⴷⵉⵙⴻⵏ ⵏⵏⴻⵙ. 13 ⵅⴻⵏⵏⵉ ⵇⴻⴷⴷⵎⴻⵏ ⴰⵙ ⵜⴰⵖⴰⵔⵚⵜ ⵏ ⵡⴻⵛⵎⴰⴹ ⵉ ⵜⵜⵡⴰⴱⴹⴰⵏ ⴷ ⵉⵛⴻⴵⵉⵇⴻⵏ, ⵓⵍⴰ ⴷ ⴰⵣⴻⴵⵉⴼ, ⵓⵛⴰ ⵏⴻⵜⵜⴰ ⵉⵙⵙⴱⴻⵅⵅⴰⵔ ⵉ-ⵜⵜ ⵅ ⵓⵄⴰⵍⵟⴰⵔ. 14 ⵉⵙⵙⵉⵔⴷ ⴰⴷⴰⵏ ⴷ ⵉⴹⴰⵔⴻⵏ ⵓⵛⴰ ⵉⵙⵙⴱⴻⵅⵅⴰⵔ ⵉ-ⵜⴻⵏ ⵅ ⵜⵖⴰⵔⵚⵜ ⵏ ⵡⴻⵛⵎⴰⴹ ⵉ ⵉⴵⴰⵏ ⵅ ⵓⵄⴰⵍⵟⴰⵔ.

15 ⴰⵡⴰⵔⵏⵉ ⴰⵙ ⵉⵙⵙⵇⴰⵔⵔⴻⴱ-ⴷⴷ ⵜⴰⵡⵀⵉⴱⵜ ⵏ ⵍⴳⴻⵏⵙ. ⵏⴻⵜⵜⴰ ⵉⴽⵙⵉ ⴰⵎⵢⴰⵏ ⵏ ⵜⵖⴰⵔⵚⵜ ⵏ ⴷⴷⴻⵏⴱ ⵉ ⵍⴳⴻⵏⵙ ⵓⵛⴰ ⵉⵖⴰⵔⵚ ⴰⵙ ⵓⵛⴰ ⵉⵙⵙⴻⵡⵊⴻⴷ ⵉ-ⵜ ⴷ ⵜⴰⵖⴰⵔⵚⵜ ⵏ ⴷⴷⴻⵏⴱ ⴰⵎ ⵎⴰⵎⵎⴻⵛ ⵉⵙⵙⴻⵡⵊⴻⴷ ⵉⵛⴰⵔⵔⵉ ⴰⵎⴻⵣⵡⴰⵔⵓ. ◘9:15 ⵍⴰⵡⵉ 4:13

16 ⵉⵙⵙⵇⴰⵔⵔⴻⴱ-ⴷⴷ ⵜⴰⵖⴰⵔⵚⵜ ⵏ ⵡⴻⵛⵎⴰⴹ ⵓⵛⴰ ⵉⵙⵙⴻⵡⵊⴻⴷ ⵉ-ⵜⵜ ⵄⵍⴰⵃⵙⴰⴱ ⵍⴼⴰⵔⵉⴹⴰ. 17 ⵉⵇⴻⴷⴷⴻⵎ ⵜⴰⵡⵀⵉⴱⵜ ⵏ ⵍⵖⵉⴵⴻⵜ ⵓⵛⴰ ⵉⴽⵙⵉ ⵣⵣⴰⵢⴻⵙ ⵉⵊⵊ ⵏ ⵡⵓⵔⵓ ⵉⵛⵛⵓⵔ ⵓⵛⴰ ⵉⵙⵙⴱⴻⵅⵅⴰⵔ ⴰⵢⴰ ⵅ ⵓⵄⴰⵍⵟⴰⵔ, ⵣⵣⴰⵜ ⵉ ⵜⵖⴰⵔⵚⵜ ⵏ ⵡⴻⵛⵎⴰⴹ ⵏ ⵚⵚⴱⴻⵃ. ◘9:17 ⵓⴼ. 29:38; ⵍⴰⵡⵉ 2:1

18 ⵉⵖⴰⵔⵚ ⵄⴰⵡⴻⴷ ⵉ ⵓⴼⵓⵏⴰⵙ ⵓ ⵉ ⵢⵉⵛⴰⵔⵔⵉ ⵏ ⵜⵖⴰⵔⵚⵜ ⵏ ⵍⴻⵀⵏⴰ ⴷⵉ ⵟⵟⵡⴻⵄ ⵏ ⵍⴳⴻⵏⵙ, ⵓⵛⴰ ⴰⵔⵔⴰⵡ ⵏ ⵀⴰⵔⵓⵏ ⵇⴻⴷⴷⵎⴻⵏ ⴰⵙ ⵉⴷⴰⵎⵎⴻⵏ ⵓⵛⴰ ⵉⵣⴻⴵⴻⵄ ⵉ-ⵜⴻⵏ ⵅ ⵓⵄⴰⵍⵟⴰⵔ ⵖⴰⵔ ⵎⴰⵔⵔⴰ ⵉⵖⴻⵣⴷⵉⵙⴻⵏ ⵏⵏⴻⵙ. 19 ⵅ ⵜⴰⴷⵓⵏⵜ ⵏ ⵓⴼⵓⵏⴰⵙ ⵓ ⵏ ⵉⵛⴰⵔⵔⵉ: ⴰⵏⴻⵡⵡⴰⵔ ⵙ ⵜⴰⴷⵓⵏⵜ ⵏⵏⴻⵙ ⴷ ⵎⵉⵏ ⵉⴷⵍⵉⵏ ⴰⴹⴰⵏ ⴷ ⵜⵉⵥⵥⴰⵍ ⴷ ⵎⵉⵏ ⵢⵓⵢⵍⴻⵏ ⵖⴰⵔ ⵜⵙⴰ, 20 ⴰⵇⴰ ⵙⵙⴰⵔⵙⴻⵏ ⵜⴰⴷⵓⵏⵜ ⵏⵏⵉ ⵅ ⵉⴷⵎⴰⵔⴻⵏ ⵓⵛⴰ ⵏⴻⵜⵜⴰ ⵉⵙⵙⴱⴻⵅⵅⴰⵔ ⵜⴰⴷⵓⵏⵜ ⵅ ⵓⵄⴰⵍⵟⴰⵔ. 21 ⵎⴰⵛⴰ ⵉⴷⵎⴰⵔⴻⵏ ⴷ ⵓⵛⴻⴽⵔⵓⴷ ⴰⴼⵓⵙⵉ ⵉⵙⵙⴻⵏⵀⴻⵣⵣ ⵉ-ⵜⴻⵏ ⵀⴰⵔⵓⵏ ⴰⵎⴻⵛⵏⴰⵡ ⵉⵛⵜ ⵏ ⵜⴻⵡⵀⵉⴱⵜ ⵏ ⵡⴻⵏⵀⴻⵣⵣⵉ ⵣⵣⴰⵜ ⵉ ⵡⵓⴷⴻⵎ ⵏ ⵙⵉⴷⵉ, ⴰⵎ ⵎⴰⵎⵎⴻⵛ ⵜ ⵉⵡⴻⵚⵚⴰ ⵎⵓⵙⴰ. ◘9:21 ⵍⴰⵡⵉ 7:32

22 ⵅⴻⵏⵏⵉ ⵉⵙⵙⴳⴻⵄⵄⴻⴷ ⵀⴰⵔⵓⵏ ⵉⴼⴰⵙⵙⴻⵏ ⵏⵏⴻⵙ ⵖⴰⵔ ⵍⴳⴻⵏⵙ ⵓⵛⴰ ⵉⴱⴰⵔⴻⴽ ⵉ-ⵜⴻⵏ ⵓⵛⴰ ⵉⵀⵡⴰ ⴰⵡⴰⵔⵏⵉ ⵍⴰⵎⵉ ⵉⵇⴻⴷⴷⴻⵎ ⵜⴰⵖⴰⵔⵚⵜ ⵏ ⴷⴷⴻⵏⴱ ⴷ ⵜⵖⴰⵔⵚⵜ ⵏ ⵡⴻⵛⵎⴰⴹ ⴷ ⵜⵖⴰⵔⵚⵜ ⵏ ⵍⴻⵀⵏⴰ. 23 ⵓⵛⴰ ⵢⵓⴷⴻⴼ ⵎⵓⵙⴰ ⴰⴽ-ⴷ ⵀⴰⵔⵓⵏ ⵖⴰⵔ ⵓⵇⵉⴹⵓⵏ ⵏ ⵓⵎⵙⴰⴳⴰⵔ ⵓⵛⴰ ⵏⵉⵜⵏⵉ ⴼⴼⵖⴻⵏ ⵣⵣⴰⵢⴻⵙ ⵄⴰⵡⴻⴷ ⵓⵛⴰ ⴱⴰⵔⴽⴻⵏ ⵍⴳⴻⵏⵙ ⵓⵛⴰ ⵉⴱⴰⵏ ⵓⵄⵓⴵⵉ ⵏ ⵙⵉⴷⵉ ⵉ ⵎⴰⵔⵔⴰ ⵍⴳⴻⵏⵙ 24 ⵓⵛⴰ ⵜⴻⴼⴼⴻⵖ-ⴷⴷ ⵜⵎⴻⵙⵙⵉ ⵣⵉ ⵣⵣⴰⵜ ⵉ ⵡⵓⴷⴻⵎ ⵏ ⵙⵉⴷⵉ, ⵜⴻⵛⵛⴰ ⵜⴰⵖⴰⵔⵚⵜ ⵏ ⵡⴻⵛⵎⴰⴹ ⵅ ⵓⵄⴰⵍⵟⴰⵔ ⵓⵍⴰ ⴷ ⵜⴰⴷⵓⵏⵜ. ⵓⵎⵉ ⵉⵥⵔⴰ ⵍⴳⴻⵏⵙ ⵎⴰⵏ ⴰⵢⴰ, ⵙⵍⵉⵡⴻⵍⵡⴻⵏ ⵓⵛⴰ ⵡⴹⴰⵏ ⵖⴰⵔ ⵜⴻⵎⵎⵓⵔⵜ ⵅ ⵓⵖⴻⵎⴱⵓⴱ ⵏⵙⴻⵏ. ◘9:24 1 ⵉⵊ. 18:38; 2 ⵉⵎ. 7:1