33
1 ⵙⵍⵉⵡⴻⵍⵡⴻⵎ ⵉ ⵙⵉⴷⵉ, ⴰ ⵉⵎⵙⴻⴳⴳⴰⴷⴻⵏ,
ⴰⵚⴻⴱⴱⴰⵃ ⴷ ⵉⵛⵜ ⵏ ⵜⴻⵍⵡⵉⵣⵜ ⵉ ⵢⵉⵏⵏⵉ ⵉⵙⴻⴳⴳⵎⴻⵏ. ◘33:1 ⵉⵥⵀⴷ. 147:1
2 ⵇⴰⴷⴰⵎ ⵙⵉⴷⵉ ⵙ ⵍⴳⴰⵎⴱⵔⵉ,
ⵣⴻⵀⵀⴷⴻⵎ ⴰⵙ ⵙ ⵍⵄⵓⴷ
ⵓ ⵙ ⵍⵀⴰⵔⴱⴰ ⴰⴽ-ⴷ ⵄⴻⵛⵔⴰ ⵏ ⵉⴼⵉⵍⴰⵏ.
3 ⵖⴻⵏⵏⵊⴻⵎ ⴰⵙ ⵙ ⵢⵉⵊⵊ ⵏ ⵢⴻⵣⵍⵉ ⴰⵎⴰⵢⵏⵓ,
ⵉⵔⴰⵔⴻⵎ ⵎⵍⵉⵃ ⵙ ⵡⴻⵙⵔⵓⴷⴷⴻⵃ ⵏ ⵍⴱⵓⵇ. ◘33:3 ⵉⵥⵀⴷ. 40:4; 96:1; 98:1; 144:9; ⵉⵛⴰ. 42:10; ⴰⵙⴰ. 5:9; 14:3
4 ⵎⵉⵏⵣⵉ ⴰⵡⴰⵍ ⵏ ⵙⵉⴷⵉ ⵉⵙⴻⴳⴳⴻⵎ,
ⵎⴰⵔⵔⴰ ⵎⵉⵏ ⵉⵜⵜⴻⴳⴳ, ⵉⵜⵜⴻⴳⴳ ⵉ-ⵜ ⵙ ⵍⴰⵎⴰⵏ.
5 ⵏⴻⵜⵜⴰ ⵉⵜⵜⴻⵅⵙ ⵜⴰⵙⴻⴳⴷⴰ ⴷ ⵍⵃⴻⵇⵇ.
ⵜⴰⵎⵎⵓⵔⵜ ⵜⴻⵛⵛⵓⵔ
ⵙ ⵜⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⵏ ⵙⵉⴷⵉ. ◘33:5 ⵉⵥⵀⴷ. 45:8; 119:64; ⵄⴱⵔ. 1:9
6 ⵣⴻⴳ ⵡⴰⵡⴰⵍ ⵏ ⵙⵉⴷⵉ ⵜⵜⵡⴰⴳⴳⴻⵏ ⵉⵊⴻⵏⵡⴰⵏ,
ⵣⵉ ⴰⵔⵔⵓⵃ ⵏ ⵓⵇⴻⵎⵎⵓⵎ ⵏⵏⴻⵙ
ⵜⵜⵡⴰⴳⴳⴻⵏⵜ ⵎⴰⵔⵔⴰ ⵍⵄⴻⵙⴽⴰⵔⴰⵜ ⵏⵙⴻⵏ. ◘33:6 ⴰⵎⵥ. 1:6, 7
7 ⵏⴻⵜⵜⴰ ⵉⵙⵙⵎⵓⵏ ⴰⵎⴰⵏ ⵏ ⵍⴻⴱⵃⴰⵔ
ⴰⵎ ⵢⵉⵊⵊ ⵏ ⵡⴻⵖⴱⴰⵔ.
ⵏⴻⵜⵜⴰ ⵉⵅⴻⵎⵎⴻⵍ ⴰⵎⴰⵏ ⵉⵀⴻⵡⵍⴻⵏ
ⴷⴻⴳ ⵉⵅⵅⴰⵎⴻⵏ ⵏ ⵍⴻⵅⵣⴻⵏ.
8 ⴰⴷ ⵜⴻⴳⴳⵯⴻⴷ ⵎⴰⵔⵔⴰ ⵜⴰⵎⵎⵓⵔⵜ ⵣⵉ ⵙⵉⴷⵉ,
ⴰⴷ ⵣⵣⴰⵢⴻⵙ ⴳⴳⵯⴻⴷⴻⵏ
ⵎⴰⵔⵔⴰ ⵉⵎⴻⵣⴷⴰⵖ ⵏ ⴷⴷⵓⵏⴻⵛⵜ.
9 ⵎⴰⵖⴰⵔ ⵏⴻⵜⵜⴰ ⵉⵙⵙⴰⵡⴰⵍ ⵓⵛⴰ ⴰⵇⴰ-ⵜ ⴷⵉⵏ,
ⵏⴻⵜⵜⴰ ⵉⵜⵜⴰⵎⴰⵔ ⵓⵛⴰ ⴰⴷ ⵢⵉⵍⵉ ⵉⴱⴻⴷⴷ ⴷⵉⵏ.
10 ⵙⵉⴷⵉ ⵉⵜⵜⴰⵔⴻⵥⵥⴰ ⵛⵛⵡⴰⵔ ⵏ ⵍⴻⴳⵏⵓⵙ,
ⵉⵙⵙⴻⴱⴹⴻⵍ ⵉⵅⴰⵔⵔⵉⵚⴻⵏ ⵏ ⵍⴻⴳⵏⵓⵙ. ◘33:10 ⵉⵛⴰ. 19:3
11 ⵛⵛⵡⴰⵔ ⵏ ⵙⵉⴷⵉ ⴰⴷ ⵉⵇⵇⵉⵎ ⵉⴱⴻⴷⴷ ⵉ ⵍⴻⴱⴷⴰ,
ⵉⵅⴰⵔⵔⵉⵚⴻⵏ ⵏ ⵡⵓⵍ ⵏⵏⴻⵙ ⵣⵉ ⵊⵊⵉⵍ ⴰⵍ ⵊⵊⵉⵍ. ◘33:11 ⴰⵡⵍⵏ. 19:21; 21:30; ⵉⵛⴰ. 46:10
12 ⵙⵙⴻⵄⴷ ⵏ ⵍⴳⴻⵏⵙ
ⵉ ⵖⴰⵔ ⵉⴵⴰ ⴰⵔⴻⴱⴱⵉ ⵏⵏⴻⵙ ⴷ ⵙⵉⴷⵉ,
ⵍⴳⴻⵏⵙ ⵏⵏⵉ ⵉⵅⴹⴰⵔ ⵉ-ⵜ ⵏⴻⵜⵜⴰ
ⴷ ⵜⴰⵙⵖⴰⵔⵜ ⵉ ⵢⵉⵅⴻⴼ ⵏⵏⴻⵙ.◘33:12 ⵉⵥⵀⴷ. 65:5; 144:15
13 ⵙⵉⴷⵉ ⵉⵅⴻⵣⵣⴰⵔ-ⴷⴷ ⵣⴻⴳ ⵓⵊⴻⵏⵏⴰ,
ⵉⵜⵜⵡⴰⵍⴰ ⵎⴰⵔⵔⴰ ⵜⴰⵔⵡⴰ ⵏ ⴱⵏⴰⴷⴻⵎ.
14 ⵣⵉ ⵜⵣⴻⴷⴷⵉⵖⵜ ⵏⵏⴻⵙ ⵉⵎⴻⵜⵏⴻⵏ ⵉⵅⴻⵣⵣⴰⵔ
ⵖⴰⵔ ⵎⴰⵔⵔⴰ ⵉⵎⴻⵣⴷⴰⵖ ⵏ ⵜⴻⵎⵎⵓⵔⵜ.
15 ⵏⴻⵜⵜⴰ ⵡⴻⵃⵃⴷⴻⵙ
ⴷ ⵡⴻⵏⵏⵉ ⵉⴽⴻⵡⵡⵏⴻⵏ ⵓⵍ ⵏⵙⴻⵏ,
ⵏⴻⵜⵜⴰ ⵉⵃⴻⴽⴽⴰⵔ ⵉ ⵎⴰⵔⵔⴰ ⵜⵉⵎⴻⴳⴳⴰ ⵏⵙⴻⵏ.
16 ⴰⵊⴻⴵⵉⴷ ⵡⴰⵔ ⵉⵜⵜⵡⴰⵙⵙⴻⵏⵊⴰⵎ
ⵙ ⵢⵉⵊⵊ ⵏ ⵍⵄⴻⵙⴽⴰⵔ ⴷ ⴰⵎⴻⵇⵇⵔⴰⵏ,
ⴱⵓ-ⵜⴻⵖⵔⵓⴹⵜ ⵡⴰⵔ ⵉⵜⵜⵡⴰⴼⴻⴽⴽⵉ
ⵙ ⵊⵊⴻⵀⴷ ⴰⵟⵟⴰⵙ.
17 ⴰⵇⴰ ⴷ ⴰⵅⴰⵔⵔⵉⵇ
ⴱⴻⵍⵍⵉ ⴰⵢⵉⵙ ⴰⴷ ⴷⴷ-ⵢⴰⵡⵉ ⴰⵙⴻⵏⵊⴻⵎ,
ⵄⴰⴷ ⵙ ⵊⵊⴻⵀⴷ ⵏⵏⴻⵙ ⴰⵎⴻⵇⵇⵔⴰⵏ
ⵡⴰⵔ ⴷⴷ-ⵉⵜⵜⴻⵏⴼⴻⴽⴽⵉ.
18 ⵅⵣⴰⵔ, ⵜⵉⵟⵟ ⵏ ⵙⵉⴷⵉ
ⵅ ⵢⵉⵏⵏⵉ ⵣⵣⴰⵢⴻⵙ ⵉⵜⵜⴻⴳⴳⵯⴻⴷⴻⵏ,
ⵅ ⵢⵉⵏⵏⵉ ⵉⵜⵜⵔⴰⵊⴰⵏ
ⵜⴰⵎⴻⵅⵙⵉⵡⵜ ⵏⵏⴻⵙ ⵉⵛⴻⵡⵡⴰⵔⴻⵏ, ◘33:18 ⴰⵢⵓⴱ 36:7; ⵉⵥⵀⴷ. 34:16; 1 ⴱⵟ. 3:12
19 ⵃⵉⵎⴰ ⴰⴷ ⵉⴼⴻⴽⴽ ⵍⴻⵄⵎⴰⵔ ⵏⵙⴻⵏ ⵣⵉ ⵍⵎⴻⵡⵜ,
ⵃⵉⵎⴰ ⴰⴷ ⵜⴻⵏ ⵢⴻⵊⵊ ⵇⵇⵉⵎⴻⵏ ⴷⴷⴰⵔⴻⵏ ⴷⵉ ⵍⴰⵥ.
20 ⵍⴻⵄⵎⴰⵔ ⵏⵏⴻⵖ ⵉⵜⵜⵔⴰⵊⴰ ⵙⵉⴷⵉ,
ⴰⵇⴰ ⵏⴻⵜⵜⴰ ⴷ ⴰⵄⴰⵡⴻⵏ ⵏⵏⴻⵖ
ⴷ ⵜⴰⵙⴻⴷⴷⴰⵔⵜ ⵏⵏⴻⵖ ⵉ ⵓⵙⴻⵍⵇⵉ.
21 ⵎⴰⵖⴰⵔ ⵣⵣⴰⵢⴻⵙ ⵉⴼⴰⵔⵔⴻⵃ ⵡⵓⵍ ⵏⵏⴻⵖ,
ⵎⵉⵏⵣⵉ ⵏⴻⵜⵜⵛⴰⵍ ⵅ ⵢⵉⵙⴻⵎ ⵏⵏⴻⵙ ⵉⵇⴻⴷⴷⵙⴻⵏ.
22 ⴰⴷ ⵅⴰⵏⴻⵖ ⵜⴰⵔⵙⴰ
ⵜⵎⴻⵅⵙⵉⵡⵜ ⵏⵏⴻⵛ ⵉⵛⴻⵡⵡⴰⵔⴻⵏ, ⴰ ⵙⵉⴷⵉ,
ⴰⵎ ⵎⴰⵎⵎⴻⵛ ⵉ ⵛⴻⴽ ⵏⴻⵜⵜⵔⴰⵊⴰ.
◘33:1 33:1 ⵉⵥⵀⴷ. 147:1
◘33:3 33:3 ⵉⵥⵀⴷ. 40:4; 96:1; 98:1; 144:9; ⵉⵛⴰ. 42:10; ⴰⵙⴰ. 5:9; 14:3
◘33:5 33:5 ⵉⵥⵀⴷ. 45:8; 119:64; ⵄⴱⵔ. 1:9
◘33:11 33:11 ⴰⵡⵍⵏ. 19:21; 21:30; ⵉⵛⴰ. 46:10
◘33:12 33:12 ⵉⵥⵀⴷ. 65:5; 144:15
◘33:18 33:18 ⴰⵢⵓⴱ 36:7; ⵉⵥⵀⴷ. 34:16; 1 ⴱⵟ. 3:12