104
1 ⴱⴰⵔⴻⴽ ⵙⵉⴷⵉ, ⴰ ⵍⴻⵄⵎⴰⵔ ⵉⵏⵓ!
ⴰ ⵙⵉⴷⵉ, ⴰⵔⴻⴱⴱⵉ ⵉⵏⵓ,
ⵎⴰⵎⵎⴻⵛ ⴷ ⴰⵎⴻⵇⵇⵔⴰⵏ ⵛⴻⴽ!
ⵛⴻⴽ ⵜⵢⴰⵔⴹⴻⴷ ⵙ ⵍⵄⴰⴹⴰⵎⴰ ⴷ ⵍⵄⴻⵣⵣ.
2 ⵏⴻⵜⵜⴰ ⵉⵍⴻⵃⵃⴻⴼ ⵉⵅⴻⴼ ⵏⵏⴻⵙ ⵙ ⵜⴼⴰⵡⵜ
ⴰⵎ ⵙ ⵉⵊⵊ ⵏ ⵓⴱⴰⵔⵜⴻⵙⵙⵓ,
ⵏⴻⵜⵜⴰ ⵉⵜⵜⴱⴻⵣⵣⴻⵄ ⴰⵊⴻⵏⵏⴰ
ⴰⵎ ⵜⵊⴰⵔⵜⵉⵍⵜ ⵏ ⵓⵇⵉⴹⵓⵏ. ◘104:2 ⴰⵎⵥ. 1:6; ⴰⵢⵓⴱ 26:7
3 ⴰⵇⴰ ⵏⴻⵜⵜⴰ ⴷ ⵡⴻⵏⵏⵉ ⵉⵙⵙⴰⵔⵙⴻⵏ
ⵜⵉⵃⴻⵏⵢⴰ ⵏ ⵡⴻⵙⵇⴻⴼ
ⵙⴰⴷⵓ ⵉⵅⵅⴰⵎⴻⵏ ⵏⵏⴻⵙ ⵅ ⵡⴰⵎⴰⵏ,
ⴷ ⵡⴻⵏⵏⵉ ⵉⴳⴳⵉⵏ ⵉⵙⴻⵢⵏⵓⵜⴻⵏ
ⴷ ⴰⴽⴰⵔⵔⵓ ⵏⵏⴻⵙ,
ⴷ ⵡⴻⵏⵏⵉ ⵉⴳⴳⵓⵔⴻⵏ
ⵅ ⵡⴰⴼⵔⵉⵡⴻⵏ ⵏ ⵓⵙⴻⵎⵎⵉⴹ, ◘104:3 ⵉⵥⵀⴷ. 18:11; ⵉⵛⴰ. 19:1; ⴰⵙⴰ. 14:14
4 ⴷ ⵡⴻⵏⵏⵉ ⵉⴳⴳⵉⵏ ⵍⵎⴰⵍⴰⴽⴰⵜ ⵏⵏⴻⵙ
ⴰⵎ ⵢⵉⵙⴻⵎⵎⵉⴹⴻⵏ
ⵓ ⵉⵎⵙⴻⵅⵅⴰⵔⴻⵏ ⵏⵏⴻⵙ
ⴷ ⵉⵛⵜ ⵏ ⵜⵎⴻⵙⵙⵉ ⵉⵜⵜⴻⵃⴷⵓⴷⵓⵇⴻⵏ. ◘104:4 ⵄⴱⵔ. 1:7
5 ⵏⴻⵜⵜⴰ ⵉⵙⵙⴱⴻⴷⴷ ⵜⴰⵎⵎⵓⵔⵜ ⵅ ⴷⵙⵓⵙⴰ ⵏⵏⴻⵙ,
ⵡⴰⵔ ⵜᵉⵜⵜⴻⵏⵀⴻⵣⵣⵉ ⵄⴻⵎⵎⴰⵔⵚ ⵉ ⵍⴻⴱⴷⴰ. ◘104:5 ⴰⵢⵓⴱ 26:7; 38:4, 5, 6; ⵉⵥⵀⴷ. 24:2; 78:69
6 ⵛⴻⴽ ⵜⵍⴻⵃⵃⴼⴻⴷ ⴰⵙ ⵙ ⵡⴰⵎⴰⵏ ⵉⵀⴻⵡⵍⴻⵏ
ⴰⵎ ⵙ ⵢⵉⵊⵊ ⵏ ⵡⴰⵔⵔⵓⴹ,
ⴰⵎⴰⵏ ⴱⴻⴷⴷⴻⵏ ⵜⵉⵡⴰ ⵉ ⵉⴷⵓⵔⴰⵔ.
7 ⵏⵉⵜⵏⵉ ⴰⵔⴻⵡⵍⴻⵏ ⵣⴻⴳ ⵓⵙⵉⴳⴳⵯⴻⴷ ⵏⵏⴻⵛ,
ⵇⴻⴵⵇⴻⵏ ⴰⴷ ⴼⴼⵖⴻⵏ ⵣⵉ ⵜⵎⵉⵊⵊⴰ ⵏ ⵡⴰⵊⵊⴰⵊ ⵏⵏⴻⵛ.
8 ⵜⵜⵡⴰⵙⵙⴳⴻⵄⵄⴷⴻⵏ ⵉⴷⵓⵔⴰⵔ,
ⵀⴻⴽⴽⵡⴰⵏⵜ ⵜⴻⵢⵙⴰⵔⵉⵏ
ⴷⴻⴳ ⵡⴻⵎⵛⴰⵏ ⵉ ⴷ ⴰⵙⴻⵏ ⵜⴻⴳⴳⵉⴷ.
9 ⵛⴻⴽ ⵜⴻⴳⴳⵉⴷ ⴰⵢⵎⵉⵔ ⵉ ⵡⴰⵎⴰⵏ
ⵏⵏⵉ ⵡⴰⵔ ⵄⴻⴷⴷⵓⵏ,
ⵡⴰⵔ ⴷⴷ-ⴷⴻⴽⴽⵡⵉⵍⴻⵏ
ⵎⴰⵃⴻⵏⴷ ⴰⴷ ⴷⵍⴻⵏ ⵜⴰⵎⵎⵓⵔⵜ.
10 ⵛⴻⴽ ⴷ ⵡⴻⵏⵏⵉ ⵉⵏⴻⴷⴷⵀⴻⵏ
ⵜⴰⵍⴰⵡⵉⵏ ⴷⵉ ⵜⴻⵖⵣⵓⵔⵉⵏ,
ⴰⵇⴰ ⵜⵜⴰⵣⵣⵍⴻⵏⵜ ⴷⵉⵏ ⵊⴰⵔ ⵉⴷⵓⵔⴰⵔ.
11 ⴰⵇⴰ ⵡⴰⵔⵔⴷⴻⵏⵜ ⵎⴰⵔⵔⴰ ⵍⵎⴰⵍ ⵏ ⵢⴻⵢⵢⴰⵔ,
ⵉⵖⵢⴰⵍ ⵏ ⵍⴻⵅⵍⴰ ⵜⵜⴻⴽⴽⵙⴻⵏ ⴰⴼⴰⴷⵉ ⵏⵙⴻⵏ ⵣⵣⴰⵢⵙⴻⵏⵜ.
12 ⵉⵊⴹⴰⴹ ⵏ ⵓⵊⴻⵏⵏⴰ ⵣⴻⴷⴷⵖⴻⵏ
ⵖⴰⵔ ⵜⴻⵎⵎⴰⵡⵉⵏ ⵏⵙⴻⵏ,
ⵣⵉ ⵊⴰⵔ ⵍⴻⴼⵔⵓⵄ ⵜᵉⵜⵜⴻⴽⴽ-ⴷⴷ ⵜⵎⵉⵊⵊⴰ ⵏⵙⴻⵏ.
13 ⵏⴻⵜⵜⴰ ⴰⵇⴰ ⴷ ⵡⴻⵏⵏⵉ ⵉⵜⵜⴻⵙⵙⵓⵏ ⵉⴷⵓⵔⴰⵔ
ⵣⴻⴳ ⵉⵅⵅⴰⵎⴻⵏ ⵏⵏⴻⵙ ⴷⴻⴳ ⵓⵊⴻⵏⵏⴰ,
ⵜⴰⵎⵎⵓⵔⵜ ⵜᵉⵜⵜⵢⴰⵡⴰⵏ
ⵣⵉ ⵍⵖⵉⴵⴻⵜ ⵉ ⴷⴷ-ⵉⴼⴼⵖⴻⵏ ⵣⵉ ⵎⵉⵏ ⵜⴻⴳⴳⵉⴷ ⵛⴻⴽ. ◼104:13 ⵉⵅⴰⵎⵎⴻⵏ ⵏⵏⴻⵙ ⴷⴻⴳ ⵓⵊⴻⵏⵏⴰ-ⵙ ⵜⵄⵉⴱⵔⴰⵏⵉⵜ ‘ⵉⵅⴰⵎⵎⴻⵏ ⵏⵏⴻⵙ ⵏ ⵏⵏⴻⵊ’.
14 ⵏⴻⵜⵜⴰ ⵉⴳⴳⴰ ⴰⵔⴱⵉⵄ ⵉⵖⴻⵎⵎⵉ ⵉ ⵍⵎⴰⵔ,
ⵓⵍⴰ ⴷ ⴰⵖⴻⵎⵎⵓⵢ ⴷⵉ ⵟⵟⵡⴻⵄ ⵏ ⴱⵏⴰⴷⴻⵎ.
ⵉⴳⴳⴰ ⵉ-ⵜⵜ ⵎⴰⵃⴻⵏⴷ ⴰⴷ ⴷⴷ-ⵢⴰⵡⵉ
ⴰⵖⵔⵓⵎ ⵣⵉ ⵜⴻⵎⵎⵓⵔⵜ
15 ⵓ ⴱⵉⵏⵓ ⵏⵏⵉ ⵉⵙⵙⴼⴰⵔⵔⴰⵃⴻⵏ ⵓⵍ ⵏ ⴱⵏⴰⴷⴻⵎ.,
ⴰⵍⴰⵎⵉ ⵉⵖⴻⵎⴱⴰⴱ ⴰⴷ ⵣⵣⴰⵢⴻⵙ ⵡⴻⵙⵙⴳⴻⵏ
ⵎⴰⵀⵓ ⵣⵉ ⵣⵣⴻⵛⵜ,
ⵓⵍⴰ ⴷ ⴰⵖⵔⵓⵎ ⵏⵏⵉ ⵉⵙⵙⴻⵊⵀⴻⴷ ⵓⵍ ⵏ ⴱⵏⴰⴷⴻⵎ.
16 ⵜⵉⵛⴻⵊⵊⵓⵔⴰ ⵏ ⵙⵉⴷⵉ ⵜⵜⵢⴰⵡⴰⵏⴻⵏⵜ,
ⵜⵉⵛⴻⵊⵊⵓⵔⴰ ⵏ ⵜⴻⵏⴳⴻⵍⵜ ⵏ ⵍⵓⴱⵏⴰⵏ
ⵏⵏⵉ ⵉⵥⵥⵓ ⵏⴻⵜⵜⴰ,
17 ⵎⴰⵏⵉ ⵜⵜⴻⴳⴳⴻⵏ ⵉⵊⴹⴰⴹ ⵍⵄⵓⵛⵛ ⵏⵙⴻⵏ,
ⵎⴰⵏⵉ ⵉ ⵜⴻⴵⴰ ⵜⴰⴷⴷⴰⵔⵜ ⵏ ⵓⴱⴻⵍⵍⴰⵔⵊ
ⴷⵉ ⵜⵛⴻⵊⵊⵓⵔⴰ ⵏ ⵓⵎⴻⵔⵣⵉ. ◼104:17 ⴰⵎⴻⵔⵥⵉ-ⵏⵉⵖ ‘ⴰⵎⴻⴹⵥⵉ’.
18 ⵉⴷⵓⵔⴰⵔ ⵢⵓⵄⵍⴰⵏ ⴰⵇⴰ ⴰⵜⴻⵏ
ⵉ ⵉⵖⴰⵢⴹⴻⵏ ⵏ ⵜⵚⵓⴹⴰⵔ,
ⵍⴻⵊⵔⵓⴼ ⴷ ⴰⵎⵛⴰⵏ ⵏ ⵜⴰⵔⴻⵡⵍⴰ
ⵉ ⵉⴽⴰⵡⴽⴰⵡⴻⵏ ⵏ ⵜⴻⵚⴹⴰⵔⵜ.
19 ⵏⴻⵜⵜⴰ ⵉⴳⴳⴰ ⵜⴰⵣⵉⵔⵉ ⴷ ⵍⴻⵄⴱⴰⵔ
ⵉ ⵍⴻⵡⵇⴰⵜ ⵉⵜⵜⵡⴰⴳⴳⴻⵏ,
ⵜⴰⴼⵓⵛⵜ ⵜⴻⵙⵙⴻⵏ ⵎⴻⵍⵎⵉ ⵉ ⵖⴰ ⵜⴻⵖⵍⵉ.
20 ⵛⴻⴽ ⵜⴻⵙⵙⴻⴽⴽⵉⴷ-ⴷⴷ ⵜⴰⴵⴻⵙⵜ
ⵓ ⵜⴻⵡⴹⴰ-ⴷⴷ ⴵⵉⵍⴻⵜ
ⵉ ⴷⵉ ⵜⵜⴻⵅⵜⵓⵜⵢⴻⵏ
ⵎⴰⵔⵔⴰ ⵍⴻⵡⵃⵓⵛ ⵏ ⵡⴻⵣⵖⴰⵔ. ◼104:20 ⴰⵥⵖⴰⵔ-ⵏⵉⵖ ‘ⵍⵖⴰⴱⴻⵜ’ ⵏⵉⵖ ‘ⵜⴰⵥⴳⴰⵏⵜ’.
21 ⴰⵢⵔⴰⴷⴻⵏ ⵉⵎⴻⵥⵢⴰⵏⴻⵏ
ⵣⴻⵀⵀⴰⵔⴻⵏ ⵅ ⵣⵣⴰⵔⴷⴻⵜ,
ⴰⵔⴻⵣⵣⵓⵏ ⵅ ⵎⴰⵛⵛⴰ ⵏⵙⴻⵏ ⵣⵉ ⴰⵔⴻⴱⴱⵉ. ◘104:21 ⴰⵢⵓⴱ 38:39,40; ⵉⵛⴰ. 31:4
22 ⵎⴰⵍⴰ ⵜⴻⴼⴼⴻⵖ-ⴷⴷ ⵅⴻⵏⵏⵉ ⵜⴼⵓⵛⵜ,
ⵜⵜⴻⵛⵔⵓⵔⵓⴷⴻⵏ ⵖⴰⵔ ⵍⵎⴰⵔⴳⴻⵃ,
ⵜⵜⵖⴻⵎⵎⴰⵔⴻⵏ ⴷⴻⴳ ⵉⴼⵔⴰⵏ ⵏⵙⴻⵏ.
23 ⵅⴻⵏⵏⵉ ⵉⵜⵜⴻⴼⴼⴻⵖ ⴱⵏⴰⴷⴻⵎ
ⵖⴰⵔ ⵍⵅⴻⴷⵎⴻⵜ ⵏⵏⴻⵙ,
ⵖⴰⵔ ⵜⴻⵡⵡⵓⵔⵉ ⵏⵏⴻⵙ ⴰⵍ ⵜⴰⵎⴻⴷⴷⵉⵜ.
24 ⵎⴰⵎⵎⴻⵛ ⴰⵟⵟⴰⵙ ⵉ ⵜⴻⴳⴳⵉⴷ, ⴰ ⵙⵉⴷⵉ,
ⵙ ⵜⵉⵖⵉⵜ ⵉ ⵜⴻⴳⴳⵉⴷ ⵎⴰⵔⵔⴰ ⵜⵉⵎⴻⵙⵍⴰⵢⵉⵏ,
ⵜⴰⵎⵎⵓⵔⵜ ⵜᵉⵜⵜⵡⴰⵛⵛⵓⵔ ⵙ ⵡⴰⴳⵍⴰ ⵏⵏⴻⵛ.
25 ⴰⵇⴰ ⴷⵉⵏ ⵍⴻⴱⵃⴰⵔ ⵉⵎⵖⴰⵔ,
ⵢⵉⵔⵉⵡ ⵖⴰⵔ ⵎⴰⵔⵔⴰ ⵉⵖⴻⵣⴷⵉⵙⴻⵏ ⵏⵏⴻⵙ,
ⵎⴰⵏⵉ ⵉⵙⵙⴼⵓⴼⴼⴻⵢ ⵎⴰⵔⵔⴰ ⵙ ⵉⵎⵓⴷⴷⴰⵔⴻⵏ
ⵉⵎⴻⵇⵇⵔⴰⵏⴻⵏ ⴷ ⵉⵎⴻⵥⵢⴰⵏⴻⵏ,
ⴱⵍⴰ ⵍⴻⵃⵙⴰⴱ,
26 ⵎⴰⵏⵉ ⴳⴳⵓⵔⴻⵏ ⵉⵖⴰⵔⵔⵓⴱⴰ,
ⵓⵍⴰ ⴷ ‘ⵍⵉ$ⵉⵢⴰⵜⴰⵏ’ ⵏⵏⵉ ⵜⴻⴳⴳⵉⴷ
ⵃⵉⵎⴰ ⴰⴷ ⴷⴰⵢⴻⵙ ⵉⵜⵜⵉⵔⴰⵔ.
27 ⵏⵉⵜⵏⵉ ⵎⴰⵔⵔⴰ ⵜⵜⵔⴰⵊⴰⵏ ⵛⴻⴽ,
ⴰⴷ ⴰⵙⴻⵏ ⵜⴻⵡⵛⴻⴷ ⵎⴰⵛⵛⴰ ⵏⵙⴻⵏ
ⴷⵉ ⵍⵡⴻⵇⵜ ⵏⵏⴻⵙ. ◘104:27 ⵉⵥⵀⴷ. 145:15
28 ⵎⴰⵍⴰ ⵜⴻⵡⵛⵉⴷ ⴰⵙⴻⵏ, ⵢⴰⵔⵔⵡⴻⵏ ⵏⵉⵜⵏⵉ,
ⵎⴰⵍⴰ ⵜⴰⵔⵣⵎⴻⴷ ⴰⴼⵓⵙ ⵏⵏⴻⵛ,
ⴷⴷⴰⴽⴽⵡⴰⵍⴻⵏ ⵊⵊⵉⵡⵏⴻⵏ ⵙ ⵍⵅⴰⵔ.
29 ⵎⴰⵍⴰ ⵜⴻⴼⴼⴰⵔⴻⴷ ⵓⴷⴻⵎ ⵏⵏⴻⵛ,
ⴰⵇⴰ ⵜⵜⵏⴻⵅⵍⴰⵄⴻⵏ,
ⵎⴰⵍⴰ ⵜⴽⴻⵙⵙⵉⴷ ⴰⵙⴻⵏ ⵏⵏⴻⴼⵙ,
ⴰⴷ ⵙⵙⵓⴼⴼⵖⴻⵏ ⴱⵓⵃⴱⴻⵍ
ⵓⵛⴰ ⴰⴷ ⴷⴷ-ⴷⴻⵡⵍⴻⵏ ⵖⴰⵔ ⵓⵛⴰⵍ ⵏⵙⴻⵏ. ◘104:29 ⵉⵥⵀⴷ. 30:8
30 ⵎⴰⵍⴰ ⵜⴻⵙⵙⴻⴽⴽⴻⴷ-ⴷⴷ ⴰⵔⵔⵓⵃ ⵏⵏⴻⵛ,
ⵅⴻⵏⵏⵉ ⵜⵜⵡⴰⵅⴻⵍⵇⴻⵏ-ⴷⴷ ⵏⵉⵜⵏⵉ,
ⴰⴷ ⵜⴰⵔⵔⵉⴷ ⴰⵖⴻⵎⴱⵓⴱ ⵏ ⵜⴻⵎⵎⵓⵔⵜ ⴷ ⴰⵎⴰⵢⵏⵓ.
31 ⴰⵄⵓⴵⵉ ⵏ ⵙⵉⴷⵉ ⴰⴷ ⵢⵉⵍⵉ ⵉ ⵍⴻⴱⴷⴰ,
ⵙⵉⴷⵉ ⴰⴷ ⵉⴼⴰⵔⵃ ⵉ ⵎⴰⵔⵔⴰ ⵎⵉⵏ ⵉⴳⴳⴰ.
32 ⵎⴰⵍⴰ ⵏⴻⵜⵜⴰ ⵉⵅⴻⵣⵣⴰⵔ
ⴷⵉ ⵜⴻⵎⵎⵓⵔⵜ, ⵜᵉⵜⵜⴰⵔⵊⵉⵊⵉ,
ⵎⴰⵍⴰ ⵉⵃⴰⴷⴰ ⵉⴷⵓⵔⴰⵔ, ⴰⴷ ⴷⵓⵅⵅⵏⴻⵏ.
33 ⵏⴻⵛⵛ ⵅⵙⴻⵖ ⴰⴷ ⵖⴻⵏⵏⵊⴻⵖ ⵉ ⵙⵉⴷⵉ
ⵎⵉⵏ ⵖⴰ ⴽⴽⴻⵖ ⴷⴷⴰⵔⴻⵖ,
ⴰⴷ ⵣⴻⵀⵀⴷⴻⵖ ⵉ ⴰⵔⴻⴱⴱⵉ ⵉⵏⵓ
ⵎⵉⵏ ⴷⴰ ⵉ ⵖⴰ ⴽⴽⴻⵖ ⴵⵉⵖ. ◘104:33 ⵉⵥⵀⴷ. 63:5; 146:2
34 ⴰⵅⴻⵎⵎⴻⵎ ⵉⵏⵓ ⴰⴷ ⴷⴷ-ⵢⴰⵙ
ⵅ ⵍⵅⴰⴹⴰⵔ ⵏⵏⴻⵙ,
ⴰⴷ ⴼⴰⵔⵃⴻⵖ ⴷⵉ ⵙⵉⴷⵉ.
35 ⵉⵎⴻⴷⵏⴰⴱ ⴰⴷ ⵜⵜⵡⴰⵜⴻⵃⵃⴰⵏ ⵇⴰⵄ
ⵣⵉ ⵜⴻⵎⵎⵓⵔⵜ,
ⵉⵄⴻⴼⴼⴰⵏⴻⵏ ⵡⴰⵔ ⵜⵜⵉⵍⵉⵏ ⵄⴰⴷ.
ⴱⴰⵔⴻⴽ ⵙⵉⴷⵉ, ⴰ ⵍⴻⵄⵎⴰⵔ ⵉⵏⵓ. ⵀⴰⵍⵍⵉⵍⵓ-ⵢⴰⵀ!
◘104:2 104:2 ⴰⵎⵥ. 1:6; ⴰⵢⵓⴱ 26:7
◘104:3 104:3 ⵉⵥⵀⴷ. 18:11; ⵉⵛⴰ. 19:1; ⴰⵙⴰ. 14:14
◘104:5 104:5 ⴰⵢⵓⴱ 26:7; 38:4, 5, 6; ⵉⵥⵀⴷ. 24:2; 78:69
◼104:13 104:13 ⵉⵅⴰⵎⵎⴻⵏ ⵏⵏⴻⵙ ⴷⴻⴳ ⵓⵊⴻⵏⵏⴰ-ⵙ ⵜⵄⵉⴱⵔⴰⵏⵉⵜ ‘ⵉⵅⴰⵎⵎⴻⵏ ⵏⵏⴻⵙ ⵏ ⵏⵏⴻⵊ’.
◼104:17 104:17 ⴰⵎⴻⵔⵥⵉ-ⵏⵉⵖ ‘ⴰⵎⴻⴹⵥⵉ’.
◼104:20 104:20 ⴰⵥⵖⴰⵔ-ⵏⵉⵖ ‘ⵍⵖⴰⴱⴻⵜ’ ⵏⵉⵖ ‘ⵜⴰⵥⴳⴰⵏⵜ’.
◘104:21 104:21 ⴰⵢⵓⴱ 38:39,40; ⵉⵛⴰ. 31:4
◘104:27 104:27 ⵉⵥⵀⴷ. 145:15
◘104:29 104:29 ⵉⵥⵀⴷ. 30:8
◘104:33 104:33 ⵉⵥⵀⴷ. 63:5; 146:2