105
1 ⵇⴰⴷⴰⵎ ⵙⵉⴷⵉ,
ⵍⴰⵖⴰⵎ ⵅ ⵢⵉⵙⴻⵎ ⵏⵏⴻⵙ,
ⴱⴰⵔⵔⵃⴻⵎ ⵙ ⵜⵎⴻⴳⴳⴰ ⵏⵏⴻⵙ ⵊⴰⵔ ⵍⴻⴳⵏⵓⵙ. ◘105:1 1 ⵉⵎ. 16:8-22
2 ⵖⴻⵏⵏⵊⴻⵎ ⴰⵙ, ⵣⴻⵀⵀⴷⴻⵎ ⵉ ⵏⴻⵜⵜⴰ,
ⵙⵉⵡⵍⴻⵎ ⵅ ⵎⴰⵔⵔⴰ ⵍⵎⵓⵄⵊⵉⵣⴰⵜ ⵏⵏⴻⵙ.
3 ⵛⴻⵏⵏⵄⴻⵎ ⵉⵅⴻⴼ ⵏⵏⴻⵛ
ⵙ ⵢⵉⵙⴻⵎ ⵏⵏⴻⵙ ⵉⵇⴻⴷⴷⵙⴻⵏ,
ⵃⵉⵎⴰ ⵓⵍ ⵏ ⵢⵉⵏⵏⵉ ⵢⴰⵔⴻⵣⵣⵓⵏ ⵙⵉⴷⵉ, ⴰⴷ ⵉⴼⴰⵔⵃ. ◘105:3 ⵉⵥⵀⴷ. 34:3
4 ⵙⴻⵇⵙⴰⵎ ⵅ ⵙⵉⴷⵉ ⴷ ⵊⵊⴻⵀⴷ ⵏⵏⴻⵙ,
ⴰⵔⵣⵓⵎ ⵓⴷⴻⵎ ⵏⵏⴻⵙ ⵍⴻⴱⴷⴰ.
5 ⵄⴻⵇⵍⴻⵎ ⵅ ⵍⵎⵓⵄⵊⵉⵣⴰⵜ ⵏⵏⴻⵙ ⵉ ⵉⴳⴳⴰ,
ⵅ ⵍⴻⵄⵍⴰⵎⴻⵜ ⵏⵏⴻⵙ
ⵓ ⵅ ⵍⴻⵃⴽⴰⵎⴰⵜ ⵏ ⵓⵇⴻⵎⵎⵓⵎ ⵏⵏⴻⵙ.
6 ⵣⵣⴰⵔⵉⵄⴻⵜ ⵏ ⵉⴱⵔⴰⵀⵉⵎ, ⴰⵎⵙⴻⵅⵅⴰⵔ ⵏⵏⴻⵙ,
ⴰⵢⵜ ⵏ ⵢⴰⵄⵇⵓⴱ, ⵉⵏⵏⵉ ⵣⵣⴰⵢⴻⵙ ⵉⵜⵜⵡⴰⴼⴰⵔⵣⴻⵏ!
7 ⵏⴻⵜⵜⴰ ⴷ ⵙⵉⴷⵉ, ⴰⵔⴻⴱⴱⵉ ⵏⵏⴻⵖ.
ⵍⴻⵃⴽⴰⵎⴰⵜ ⵏⵏⴻⵙ ⵉ ⴷⴷ-ⵉⵜⵜⴰⵙⴻⵏ
ⵅ ⵜⴻⵎⵎⵓⵔⵜ ⵎⴰⵔⵔⴰ.
8 ⵄⴻⵇⵍⴻⵎ ⵅ ⵍⵄⴰⵀⴷ ⵏⵏⴻⵙ ⵉ ⵍⴻⴱⴷⴰ,
ⴰⵡⴰⵍ ⵏⵏⵉ ⵉⵡⴻⵚⵚⴰ ⵉ ⵡⴰⵍⴻⴼ ⵏ ⵊⵊⵉⵍⴰⵜ,
9 ⵉ ⵉⴳⴳⴰ ⴰⴽ-ⴷ ⵉⴱⵔⴰⵀⵉⵎ,
ⵓ ⵉⵙⵙⴻⵎⵜⴻⵏ ⵉ-ⵜ ⵙ ⵜⵊⴰⴵⵉⵜ ⵏⵏⴻⵙ ⵉ ⵉⵙⵃⴰⵇ.
10 ⵏⴻⵜⵜⴰ ⵉⴳⴳⴰ ⵉ-ⵜ ⴷ ⵜⴰⵡⵚⴻⵢⵢⴻⵜ ⵉ ⵢⴰⵄⵇⵓⴱ,
ⵉ ⵉⵙⵔⴰⵉⵍ ⵉⴳⴳⴰ ⵉ-ⵜ ⴷ ⵍⵄⴰⵀⴷ ⵉ ⵍⴻⴱⴷⴰ, ◘105:10 ⴰⵎⵥ. 28:13; 35:11; 1 ⵉⵎ. 16:17
11 ⵓⵎⵉ ⵉⵏⵏⴰ:
“ⴰⴷ ⴰⵛ ⵡⵛⴻⵖ ⵜⴰⵎⵎⵓⵔⵜ ⵏ ⴽⴻⵏⵄⴰⵏ,
ⴰⴼⵉⵍⵓ ⵏ ⵍⴻⵄⴱⴰⵔ ⵏ ⵜⴻⵙⵖⴰⵔⵜ ⵏⵡⴻⵎ!” ◘105:11 ⴰⵎⵥ. 13:15; 15:18
12 ⵓⵎⵉ ⵜⵓⵖⴰ ⴽⴻⵏⵏⵉⵡ ⴷⴻⴳ ⵉⵊⵊ ⵏ ⵡⵓⵔⵓ ⵏ ⵢⴻⵔⵢⴰⵣⴻⵏ,
ⵙ ⴷⵔⵓⵙ ⵡⴰⵀⴰ,
ⵓ ⴰⵎ ⵢⵉⴱⴰⵔⵔⴰⵏⵉⵢⵢⴻⵏ ⵉ ⵜⴻⴵⵉⵎ ⴷⴰⵢⴻⵙ. ◘105:12 1 ⵉⵎ. 16:19
13 ⵏⵉⵜⵏⵉ ⵜⴻⵍⵄⴻⵏ ⵣⵉ ⵍⴳⴻⵏⵙ ⵖⴰⵔ ⵍⴳⴻⵏⵙ ⵏⵏⴻⵖⵏⵉ,
ⵣⴻⴳ ⵉⵛⵜ ⵏ ⵜⴳⴻⵍⴷⵉⵜ ⵖⴰⵔ ⵉⵊⵊ ⵏ ⵍⴳⴻⵏⵙ ⵏⵏⴻⵖⵏⵉ.
14 ⵡⴰⵔ ⵉⵊⵊⵉ ⵓⵍⴰ ⴷ ⵉⵊⵊ ⵏ ⴱⵏⴰⴷⴻⵎ
ⴰⴷ ⵜⴻⵏ ⵉⵙⵙⴻⵃⵚⴰⵔ,
ⵉⵄⴰⵇⴻⴱ ⵉⵊⴻⴵⵉⴷⴻⵏ ⴷⵉ ⵟⵟⵡⴻⵄ ⵏⵙⴻⵏ. ◘105:14 ⴰⵎⵥ. 35:5
15 ⵡⴰⵔ ⵜⵜⵃⴰⴷⴰⵎ ⵛⴰ ⵉⵎⴻⴷⵀⵓⵏⴻⵏ ⵉⵏⵓ,
ⵡⴰⵔ ⵜⵜⴻⴳⴳⴻⵎ ⵍⵖⴰⵔ ⴷⴻⴳ ⵉⵏⴰⴱⵉⵢⵢⴻⵏ ⵉⵏⵓ.
16 ⵅⴻⵏⵏⵉ ⵉⵍⴰⵖⴰ-ⴷⴷ ⵉ ⵍⴰⵥ ⵖⴰⵔ ⵜⴻⵎⵎⵓⵔⵜ.
ⵢⴰⵔⵥⴰ ⴰⵙⴻⵏ ⵎⴰⵔⵔⴰ ⵍⴻⵄⵡⴻⵍⵜ ⵏ ⵡⴻⵖⵔⵓⵎ. ◼105:16 ⵍⴻⵄⵡⴻⵞ ⵏ ⵡⴻⵖⵔⵓⵎ-ⵙ ⵍⵃⴰⵔⴼ: ‘ⴰⵥⴻⴵⴰⴹ ⵏ ⵡⴻⵖⵔⵓⵎ’.
17 ⵉⵙⵙⴻⴽⴽ-ⴷⴷ ⵉⵊⵊ ⵏ ⵡⴻⵔⵢⴰⵣ ⵖⴰⵔ ⵣⵣⴰⵜ,
ⵢⵓⵙⵓⴼ ⵉⵎⵎⴻⵏⵣ ⴷ ⵉⵙⵎⴻⵖ. ◘105:17 ⴰⵎⵥ. 37:27, 35; 45:5
18 ⵛⴰⵔⴼⴻⵏ ⵉⴹⴰⵔⴻⵏ ⵏⵏⴻⵙ ⴷⴻⴳ ⵉⵛⴻⴷⴷⵉⵢⵢⴻⵏ,
ⵍⴻⵄⵎⴰⵔ ⵏⵏⴻⵙ ⵉⵜⵜⵡⴰⵃⵚⴰⵔ ⴷⴻⴳ ⵡⵓⵣⵣⴰⵍ. ◼105:18 ⵉⵜⵜⵡⴰⵃⵚⴰⵔ ⴷⴻⴳ ⵡⵓⵥⵥⴰⵍ-ⵙ ⵜⵄⵉⴱⵔⴰⵏⵉⵜ ‘ⵢⵓⵙⴰ-ⴷⴷ ⵡⵓⵥⵥⴰⵍ’.
19 ⴰⵍ ⵍⵡⴻⵇⵜ ⵏⵏⵉ ⴷⵉ ⵉⵜⵜⵡⴰⵙⵙⴻⵇⴼⴻⵍ
ⵡⴰⵡⴰⵍ ⵏⵏⴻⵙ
ⵉⵚⴻⴼⴼⴰ ⴰⵙ ⵍⵀⴰⵔⴷ ⵏ ⵙⵉⴷⵉ.
20 ⵉⵙⵙⴻⴽⴽ ⵓⵊⴻⴵⵉⴷ ⵉⵊⵊ ⵃⵉⵎⴰ ⴰⴷ ⴰⵙ ⵉⵙⵙⴰⵔⵅⵓ,
ⵍⵃⴰⴽⴻⵎ ⵏ ⵍⴻⴳⵏⵓⵙ ⵉⴹⵍⴻⵇ ⵉ-ⵜ.
21 ⵏⴻⵜⵜⴰ ⵉⴳⴳⴰ ⵉ-ⵜ ⴷ ⴱⴰⴱ ⵅ ⵜⴰⴷⴷⴰⵔⵜ ⵏⵏⴻⵙ,
ⵓⵍⴰ ⴷ ⵍⵃⴰⴽⴻⵎ ⵅ ⵎⴰⵔⵔⴰ ⵎⵉⵏ ⵖⴰⵔⴻⵙ. ◘105:21 ⴰⵎⵥ. 41:40
22 ⵃⵉⵎⴰ ⴰⴷ ⵖⴰⵔⴻⵙ ⵉⵛⴻⴷⴷ ⵍⵃⵓⴽⴽⴰⵎ
ⵓ ⵃⵉⵎⴰ ⴰⴷ ⵉⵙⵙⴻⵍⵎⴻⴷ ⵜⵉⵖⵉⵜ ⵉ ⵉⵎⵖⴰⵔⴻⵏ ⵏⵏⴻⵙ.
23 ⴰⵡⴰⵔⵏⵉ ⴰⵢⴰ ⵢⵓⵙⴰ-ⴷⴷ ⵉⵙⵔⴰⵉⵍ ⵖⴰⵔ ⵎⵉⵚⵔⴰ,
ⵉⵇⵇⵉⵎ ⵢⴰⵄⵇⵓⴱ ⴰⵎ ⵓⴱⴰⵔⵔⴰⵏⵉ
ⴷⵉ ⵜⴻⵎⵎⵓⵔⵜ ⵏ ⵃⴰⵎ.
24 ⵏⴻⵜⵜⴰ ⵉⴳⴳⴰ ⵍⵖⵉⴵⴻⵜ ⴷⵉ ⵍⴳⴻⵏⵙ ⵏⵏⴻⵙ ⴰⵟⵟⴰⵙ,
ⵢⴰⵔⵔⴰ ⵉ-ⵜ ⵉⵊⵀⴻⴷ ⵅ ⵢⵉⵏⵏⵉ ⵜ ⵉⵃⴻⵚⵚⴰⵔⴻⵏ. ◘105:24 ⵓⴼ. 1:7, 9
25 ⵏⴻⵜⵜⴰ ⵢⴰⵔⵔⴰ ⵓⵍ ⵏⵙⴻⵏ ⵉⵏⵏⴻⵇⵍⴻⴱ,
ⴰⵍⴰⵎⵉ ⴷⴻⵡⵍⴻⵏ ⵛⴰⵔⵔⵀⴻⵏ ⵍⴳⴻⵏⵙ ⵏⵏⴻⵙ,
ⴷⴻⵡⵍⴻⵏ ⵖⴻⴷⴷⴰⵔⴻⵏ ⵉⵎⵙⴻⵅⵅⴰⵔⴻⵏ ⵏⵏⴻⵙ. ◘105:25 ⵓⴼ. 1:9, 10, 12
26 ⵅⴻⵏⵏⵉ ⵉⵙⵙⴻⴽⴽ-ⴷⴷ ⵎⵓⵙⴰ, ⴰⵎⵙⴻⵅⵅⴰⵔ ⵏⵏⴻⵙ,
ⴷ ⵀⴰⵔⵓⵏ ⵡⴻⵏⵏⵉ ⵉⴼⴰⵔⵣ ⵉ-ⵜ ⵏⴻⵜⵜⴰ. ◘105:26 ⵓⴼ. 3:10; 4:12
27 ⵏⵉⵜⵏⵉ ⴳⴳⵉⵏ ⵍⴻⵄⵍⴰⵎⴰⵜ ⵏⵙⴻⵏ ⵉⴼⴰⵔⵣⴻⵏ ⵊⴰⵔ ⴰⵙⴻⵏ,
ⵓ ⴳⴳⵉⵏ ⵍⵎⵓⵄⵊⵉⵣⴰⵜ ⴷⵉ ⵜⴻⵎⵎⵓⵔⵜ ⵏ ⵃⴰⵎ. ◘105:27 ⵓⴼ. 7:9
28 ⵏⴻⵜⵜⴰ ⵉⵙⵙⴻⴽⴽ-ⴷⴷ ⵜⴰⴵⴻⵙⵜ
ⵓⵛⴰ ⵜⴻⴷⵡⴻⵍ ⵎⴰⵔⵔⴰ ⴷ ⵜⴰⴵⴻⵙⵜ.
ⵏⵉⵜⵏⵉ ⵡⴰⵔ ⵖⴻⵡⵡⵖⴻⵏ ⵛⴰ ⵅ ⵡⴰⵡⴰⵍⴻⵏ ⵏⵏⴻⵙ.
29 ⵏⴻⵜⵜⴰ ⵢⴰⵔⵔⴰ ⴰⵎⴰⵏ ⵏⵙⴻⵏ ⴷ ⵉⴷⴰⵎⵎⴻⵏ
ⵓ ⵉⵏⵖⴰ ⵉⵙⴻⵍⵎⴰⵏ ⵏⵙⴻⵏ. ◘105:29 ⵓⴼ. 7:17, 18, 20; ⴰⵙⴰ. 16:3, 4
30 ⵏⴻⵜⵜⴰ ⵢⴰⵔⵔⴰ ⵜⴰⵎⵎⵓⵔⵜ ⵏⵙⴻⵏ
ⵜⵙⴻⴼⴼⴰⵢ ⵙ ⵉⵇⴰⵔⵇⵔⵉⵡⴻⵏ,
ⴰⵍ ⴷⴰⵅⴻⵍ ⴷⴻⴳ ⵉⵅⵅⴰⵎⴻⵏ ⵏ ⵉⵊⴻⴵⵉⴷⴻⵏ ⵏⵙⴻⵏ.
31 ⵏⴻⵜⵜⴰ ⵉⵙⵙⵉⵡⴻⵍ ⵓⵛⴰ ⵢⵓⵙⴰ-ⴷⴷ
ⵡⴻⵢⵍⴰⴼ ⵏ ⵉⴱⴻⵄⵄⴰⵛ,
ⵏⵏⴰⵎⵓⵙ ⵡⴹⴰⵏ-ⴷⴷ
ⵅ ⵜⴻⵎⵎⵓⵔⵜ ⵏⵙⴻⵏ ⵎⴰⵔⵔⴰ.
32 ⵏⴻⵜⵜⴰ ⵢⴰⵔⵔⴰ ⴰⵏⵥⴰⵔ ⵏⵙⴻⵏ ⴷ ⴰⴱⵔⵓⵔⵔⵉ,
ⵉⵙⵙⴻⴽⴽ-ⴷⴷ ⵜⵉⵎⴻⵙⵙⵉ ⴷ ⵉⵛⴻⵄⵄⴰⵍⴻⵏ
ⵅ ⵜⴻⵎⵎⵓⵔⵜ ⵏⵙⴻⵏ.
33 ⵏⴻⵜⵜⴰ ⵉⵡⵜⴰ ⵜⴰⵣⴰⵢⴰⵔⵜ ⵏⵙⴻⵏ ⴷ ⵡⴰⵔⵜⵓ ⵏⵙⴻⵏ,
ⵢⴰⵔⵥⴰ ⵜⵉⵛⴻⵊⵊⵓⵔⴰ ⴷⵉ ⵜⴻⵎⵎⵓⵔⵜ ⵏⵙⴻⵏ.
34 ⵏⴻⵜⵜⴰ ⵉⵙⵙⵉⵡⴻⵍ, ⵅⴻⵏⵏⵉ ⵜⵓⵙⴰ-ⴷⴷ ⵜⵎⵓⵖⵔⵉ,
ⵓⵍⴰ ⴷ ⴱⵓ-ⵡⴻⵍⵙⴰⵃ, ⴰⵇⴰ ⴰⵜⴻⵏ ⴱⵍⴰ ⵍⴻⵃⵙⴰⴱ.
35 ⵏⵉⵜⵏⵉ ⵛⵛⵉⵏ ⵎⴰⵔⵔⴰ ⴰⴼⵙⵓ ⴷⵉ ⵜⴻⵎⵎⵓⵔⵜ ⵏⵙⴻⵏ,
ⵛⵛⵉⵏ ⵍⵖⵉⴵⴻⵜ ⵏ ⵜⴻⵎⵎⵓⵔⵜ ⵏⵙⴻⵏ.
36 ⵏⴻⵜⵜⴰ ⵉⵏⵖⴰ ⵎⴰⵔⵔⴰ ⵉⵎⴻⵏⵣⴰ
ⴷⵉ ⵜⴻⵎⵎⵓⵔⵜ ⵏⵙⴻⵏ,
ⵉⵎⴻⵏⵣⴰ ⵏ ⵎⴰⵔⵔⴰ ⵜⴰⵔⵢⴰⵙⵜ ⵏⵙⴻⵏ. ◘105:36 ⵉⵥⵀⴷ.78:51
37 ⵏⴻⵜⵜⴰ ⵉⵙⵙⵓⴼⴼⴻⵖ ⵉ-ⵜⴻⵏ-ⴷⴷ
ⵙ ⵏⵏⵓⵇⴰⵔⵜ ⴷ ⵡⵓⵔⴻⵖ,
ⵡⴰⵔ ⴷⵉⵏ ⵜⵓⵖⵉ ⵓⵍⴰ ⴷ ⵉⵊⵊ
ⴷⵉ ⵜⵇⴻⴱⴱⴰⵍ ⵏⵙⴻⵏ ⵉ ⵉⵏⴷⴻⵔⴼⴻⵏ.
38 ⵎⵉⵚⵔⴰ ⵜⴼⴰⵔⵃ ⵙ ⵡⵓⴼⴼⵓⵖ ⵏⵙⴻⵏ,
ⵎⴰⵖⴰⵔ ⵜⴻⵡⴹⴰ ⵅⴰⵙⴻⵏ ⵜⵉⴳⴳⵯⵓⴷⵉ ⵜⴻⵎⵖⴰⵔ. ◘105:38 ⵓⴼ. 12:33
39 ⵏⴻⵜⵜⴰ ⵉⴱⴻⵣⵣⴻⵄ ⴰⵙⴻⵢⵏⵓ ⴰⵎ ⵢⵉⵊⵊ ⵏ ⴰⵔⵡⴰⵇ
ⵓ ⵜⵎⴻⵙⵙⵉ ⵃⵉⵎⴰ ⴰⴷ ⵜⴻⵡⵛ ⵜⴰⴼⴰⵡⵜ ⵙ ⴵⵉⵍⴻⵜ.
40 ⵏⵉⵜⵏⵉ ⵥⵥⵓⴵⴻⵏ ⵓ ⵏⴻⵜⵜⴰ ⵢⴰⵔⵔⴰ
ⴰⴷ ⴷⴷ-ⴰⵙⴻⵏ ⵉⵊⴹⴰⴹ, ⵇⵇⴰⵔⴻⵏ ⴰⵙ ‘ⵜⵙⴰⵍⵡⴰ’,
ⵉⵙⵙⵊⵊⵉⵡⴻⵏ ⵉ-ⵜⴻⵏ ⵙ ⵡⴻⵖⵔⵓⵎ ⵏ ⵓⵊⴻⵏⵏⴰ.
41 ⵏⴻⵜⵜⴰ ⵢⴰⵔⵣⴻⵎ ⵜⴰⵚⴹⴰⵔⵜ,
ⴰⵎⴰⵏ ⴷⵓⵇⵇⵣⴻⵏ-ⴷⴷ ⵣⵣⴰⵢⴻⵙ,
ⵓⵣⵣⵍⴻⵏ ⵅ ⵍⴰⵥⴰⵖ ⵓ ⴷⴻⵡⵍⴻⵏ ⴰⵎ ⵢⴻⵖⵣⴰⵔ.
42 ⵎⴰⵖⴰⵔ ⵏⴻⵜⵜⴰ ⵉⵄⵇⴻⵍ
ⵅ ⵡⴰⵡⴰⵍ ⵏⵏⴻⵙ ⵉⵇⴻⴷⴷⵙⴻⵏ,
ⵅ ⵓⵎⵙⴻⵅⵅⴰⵔ ⵏⵏⴻⵙ ⵉⴱⵔⴰⵀⵉⵎ. ◘105:42 ⴰⵎⵥ. 15:14
43 ⵏⴻⵜⵜⴰ ⵉⵙⵙⵓⴼⴼⴻⵖ-ⴷⴷ ⵍⴳⴻⵏⵙ ⵏⵏⴻⵙ
ⵙ ⵍⴻⴼⵔⴰⵃⴻⵜ,
ⵉⵏⵏⵉ ⵣⵣⴰⵢⴻⵙ ⵉⵜⵜⵡⴰⴼⴰⵔⵣⴻⵏ ⵙ ⵓⵙⵍⵉⵡⵍⴻⵡ. ◘105:43 ⵓⴼ. 14:8; ⵍⵅⵍ. 33:3
44 ⵏⴻⵜⵜⴰ ⵉⵡⵛⴰ ⴰⵙⴻⵏ ⵜⵉⵎⵎⵓⵔⴰ ⵏ ⵍⴻⴳⵏⵓⵙ,
ⵏⵉⵜⵏⵉ ⵡⴰⵔⵜⴻⵏ ⵜⴰⵎⴰⵔⴰ ⵏ ⵛⵛⵓⵄⵓⴱ,
45 ⵃⵉⵎⴰ ⴰⴷ ⵟⵟⴼⴻⵏ ⴷⵉ ⵜⵡⴻⵚⵚⴰ ⵏⵏⴻⵙ,
ⴰⴷ ⵃⴹⴰⵏ ⵉⵣⴻⵔⴼⴰⵏ ⵏⵏⴻⵙ. ⵀⴰⵍⵍⵉⵍⵓ-ⵢⴰⵀ. ◘105:45 ⵓⴼ. 19:4, 5, 6; ⴰⵄⵡⴷ. 4:1, 40; 6:21, 22, 23, 24, 25
◘105:1 105:1 1 ⵉⵎ. 16:8-22
◘105:3 105:3 ⵉⵥⵀⴷ. 34:3
◘105:10 105:10 ⴰⵎⵥ. 28:13; 35:11; 1 ⵉⵎ. 16:17
◘105:11 105:11 ⴰⵎⵥ. 13:15; 15:18
◘105:12 105:12 1 ⵉⵎ. 16:19
◼105:16 105:16 ⵍⴻⵄⵡⴻⵞ ⵏ ⵡⴻⵖⵔⵓⵎ-ⵙ ⵍⵃⴰⵔⴼ: ‘ⴰⵥⴻⴵⴰⴹ ⵏ ⵡⴻⵖⵔⵓⵎ’.
◘105:17 105:17 ⴰⵎⵥ. 37:27, 35; 45:5
◼105:18 105:18 ⵉⵜⵜⵡⴰⵃⵚⴰⵔ ⴷⴻⴳ ⵡⵓⵥⵥⴰⵍ-ⵙ ⵜⵄⵉⴱⵔⴰⵏⵉⵜ ‘ⵢⵓⵙⴰ-ⴷⴷ ⵡⵓⵥⵥⴰⵍ’.
◘105:21 105:21 ⴰⵎⵥ. 41:40
◘105:25 105:25 ⵓⴼ. 1:9, 10, 12
◘105:29 105:29 ⵓⴼ. 7:17, 18, 20; ⴰⵙⴰ. 16:3, 4
◘105:36 105:36 ⵉⵥⵀⴷ.78:51
◘105:42 105:42 ⴰⵎⵥ. 15:14
◘105:43 105:43 ⵓⴼ. 14:8; ⵍⵅⵍ. 33:3
◘105:45 105:45 ⵓⴼ. 19:4, 5, 6; ⴰⵄⵡⴷ. 4:1, 40; 6:21, 22, 23, 24, 25