1 ⴰⵣⴻⵀⵀⴻⴷ ⵏ ⴷⴰⵡⵓⴷ.

ⴰ. ⴰⵣⴻⵀⵀⴻⴷ ⵓⵎⵉ ⵜⵜⴳⴻⵄⵄⴷⴻⵏ ⵖⴰⵔ ⵡⴻⴷⵔⴰⵔ ⵏ ⵚⵉⵀⵢⵓⵏ

ⵎⴰⵔⵔⴰ ⵉⵎⴻⵖⵏⴰⵊⴻⵏ ⵏ ⵍⵖⴰⵛⵉ ⵉⵜⵜⵄⴻⵢⵢⴷⴻⵏ:

ⵉ ⵙⵉⴷⵉ ⵜⴻⴵⴰ ⵜⴻⵎⵎⵓⵔⵜ ⴷ ⵓⵄⴻⵎⵎⴰⵔ ⵏⵏⴻⵙ,

ⴷⴷⵓⵏⴻⵛⵜ ⴷ ⵉⵎⴻⵣⴷⴰⵖ ⵏⵏⴻⵙ.◘24:1 ⵓⴼ. 19:5; ⴰⵄⵡⴷ. 10:14; ⴰⵢⵓⴱ 41:3; ⵉⵥⵀⴷ. 50:12; 1 ⴽⵓⵔ. 10:26, 28

2 ⵎⴰⵖⴰⵔ ⵏⴻⵜⵜⴰ ⵉⵙⵙⴰⵔⵙ ⴷⵙⴰⵙ ⵏⵏⴻⵙ ⵅ ⵍⴻⴱⵃⵓⵔ,

ⵉⵙⵙⴻⵎⵜⴻⵏ ⵉ-ⵜ ⵅ ⵙⵙⴻⵃⵍⴰⵜ.

3 ⵜⵎⵉⵊⵊⴰ:

ⵡⵉ ⵉⵣⴻⵎⵎⴰⵔⴻⵏ ⴰⴷ ⵉⴳⴻⵄⵄⴻⴷ ⴰⴷⵔⴰⵔ ⵏ ⵙⵉⴷⵉ,

ⵡⵉ ⵉⵣⴻⵎⵎⴰⵔⴻⵏ ⴰⴷ ⵉⴱⴻⴷⴷ

ⴷⴻⴳ ⵡⴻⵎⵛⴰⵏ ⵏⵏⴻⵙ ⵉⵇⴻⴷⴷⵙⴻⵏ? ◘24:3 ⵉⵥⵀⴷ. 15:1; ⵉⵛⴰ. 33:14, 15

4 ⵜⵎⵉⵊⵊⴰ ⵏⵏⴻⵖⵏⵉ:

ⵡⴻⵏⵏⵉ ⵖⴰⵔ ⵉⴵⴰ ⵉⴼⴰⵙⵙⴻⵏ ⵉⵎⴻⵣⴷⴰⴳⴻⵏ

ⴷ ⵡⵓⵍ ⵉⵚⴼⴰ,

ⵡⴻⵏⵏⵉ ⵡⴰⵔ ⴷⴷ-ⵉⵜⵜⴰⵔⵔⵉ ⵍⴻⵄⵎⴰⵔ ⵏⵏⴻⵙ

ⵅ ⵍⵖⴻⵛⵛ,

ⵡⴰⵔ ⵉⵜⵜⵊⵊⴰⴵⴰ ⵥⵓⵔ!

5 ⵎⴰⵔⵔⴰ ⵉⵎⴻⵖⵏⴰⵊⴻⵏ:

ⵏⴻⵜⵜⴰ ⴰⴷ ⵉⴽⵙⵉ ⵍⴱⴰⵔⴰⴽⴰ ⵣⵉ ⵙⵉⴷⵉ,

ⵓⵍⴰ ⴷ ⵜⴰⵙⴻⴳⴷⴰ ⵣⵉ ⴰⵔⴻⴱⴱⵉ ⵏ ⵓⵙⴻⵏⵊⴻⵎ ⵏⵏⴻⵙ.

6 ⴷ ⵡⴰ ⴷ ⵊⵊⵉⵍ ⵏ ⵢⵉⵏⵏⵉ ⵅⴰⵙ ⵢⴰⵔⴻⵣⵣⵓⵏ,

ⵉⵏⵏⵉ ⵢⴰⵔⴻⵣⵣⵓⵏ ⵅ ⵡⵓⴷⴻⵎ ⵏⵏⴻⵛ,

ⴰⵇⴰ-ⵜ ⴷ ⵢⴰⵄⵇⵓⴱ. ⵙⵉⵍⴰⵀ.

7 ⴱ. ⴰⵣⴻⵀⵀⴻⴷ ⵓⵎⵉ ⵓⴷⴼⴻⵏ ⵖⴰⵔ ⵜⴻⵏⴷⵉⵏⵜ ⵏ ⵚⵉⵀⵢⵓⵏ

ⵎⴰⵔⵔⴰ ⵉⵎⴻⵖⵏⴰⵊⴻⵏ ⵏ ⵍⵖⴰⵛⵉ ⵉⵜⵜⵄⴻⵢⵢⴷⴻⵏ:

ⵙⴳⴻⵄⵄⴷⴻⵏⵜ ⵉⵣⴻⴵⵉⴼⴻⵏ ⵏⵡⴻⵎ, ⴰ ⵜⵉⵡⵡⵓⵔⴰ,

ⵙⴳⴻⵄⵄⴷⴻⵏⵜ ⵉⵅⴻⴼ ⵏⴽⴻⵏⵜ, ⴰ ⵜⵉⵡⵡⵓⵔⴰ ⵏ ⵍⴻⴱⴷⴰ,

ⵃⵉⵎⴰ ⴰⴷ ⵢⴰⴷⴻⴼ ⵓⵊⴻⴵⵉⴷ ⵏ ⵓⵄⵓⴵⵉ!

8 ⵜⵎⵉⵊⵊⴰ ⵣⵉ ⵜⴻⵡⵡⵓⵔⵜ ⵏ ⵜⴻⵏⴷⵉⵏⵜ:

ⵎⴰⵏ ⵡⴻⵏ ⵉ ⵉⴵⴰⵏ ⴷ ⴰⵊⴻⴵⵉⴷ ⵏ ⵓⵄⵓⴵⵉ ⵡⴰⵏⵉⵜⴰ?

ⵎⴰⵔⵔⴰ ⵉⵎⴻⵖⵏⴰⵊⴻⵏ:

ⴷ ⵙⵉⴷⵉ, ⵉⵊⵀⴻⴷ ⵉⵊⴻⴱⴱⴰⵔ,

ⵙⵉⴷⵉ ⴰⵇⴰ-ⵜ ⴷ ⴰⵊⴻⴱⴱⴰⵔ ⴷⴻⴳ ⵓⵎⴻⵏⵖⵉ.

9 ⵙⴳⴻⵄⵄⴷⴻⵏⵜ ⵉⵣⴻⴵⵉⴼⴻⵏ ⵏⴽⴻⵏⵜ, ⴰ ⵜⵉⵡⵡⵓⵔⴰ,

ⵙⴳⴻⵄⵄⴷⴻⵏⵜ ⵉⵅⴻⴼ ⵏⴽⴻⵏⵜ, ⴰ ⵜⵉⵡⵡⵓⵔⴰ ⵏ ⵍⴻⴱⴷⴰ,

ⵃⵉⵎⴰ ⴰⴷ ⵢⴰⴷⴻⴼ ⵓⵊⴻⴵⵉⴷ ⵏ ⵓⵄⵓⴵⵉ!

10 ⵜⵎⵉⵊⵊⴰ ⵣⵉ ⵜⴻⵡⵡⴰⵔⵜ ⵏ ⵜⴻⵏⴷⵉⵏⵜ:

ⵎⵉⵏ ⵉⵄⵏⴰ ⵏⴻⵜⵜⴰ, ⴰⵊⴻⴵⵉⴷ-ⴰ ⵏ ⵓⵄⵓⴵⵉ?

ⵎⴰⵔⵔⴰ ⵉⵎⴻⵖⵏⴰⵊⴻⵏ:

ⵙⵉⴷⵉ ⵏ ⵍⵄⴻⵙⴽⴰⵔⴰⵜ

ⴷ ⵏⴻⵜⵜⴰ ⴷ ⴰⵊⴻⴵⵉⴷ ⵏ ⵓⵄⵓⴵⵉ. ⵙⵉⵍⴰⵀ.