1 ⵜⴰⵥⴰⴵⵉⵜ ⵏ ⵉⵊⵊ ⵏ ⵍⵎⴻⵙⴽⵙⵉⵏ ⵎⴰⵍⴰ ⵎⴰⵏⴰⵢⴻⵏⵏⵉ ⴷ ⴰⵟⵟⴰⵙ ⵅⴰⵙ, ⵓⵛⴰ ⵅⴻⵏⵏⵉ ⵉⵜⵜⴼⴰⵔⵔⴻⵖ ⵉⵎⵓⵏⴰⵙ ⵏⵏⴻⵙ ⵣⵣⴰⵜ ⵉ ⵙⵉⴷⵉ.

2 ⴰ ⵙⵉⴷⵉ, ⵙⴻⵍ ⵖⴰⵔ ⵜⵥⴰⴵⵉⵜ ⵉⵏⵓ,

ⴻⵊⵊ ⴰⵖⵓⵢⵢⵉ ⵉⵏⵓ ⴰⴷ ⵖⴰⵔⴻⴽ ⴷⴷ-ⵢⴰⵡⴻⴹ.

3 ⵡⴰⵔ ⵜⵜⴻⴼⴼⴰⵔ ⵓⴷⴻⵎ ⵏⵏⴻⵛ ⵅⴰⴼⵉ

ⴷⴻⴳ ⵡⴰⵙⵙ ⵉ ⴷⵉ ⵜⵜⵡⴰⵃⵚⴰⵔⴻⵖ.

ⴰⵔⵔ-ⴷⴷ ⵖⴰⵔⵉ ⴰⵎⴻⵣⵣⵓⵖ ⵏⵏⴻⵛ

ⴷⴻⴳ ⵡⴰⵙⵙ ⵉ ⴷⵉ ⵍⴰⵖⵉⵖ,

ⵙⴻⵍ-ⴷⴷ ⵅⴻⵏⵏⵉ ⵖⴰⵔⵉ ⴷⴻⵖⵢⴰ.

4 ⵎⵉⵏⵣⵉ ⵓⵙⵙⴰⵏ ⵉⵏⵓ ⵄⴷⵓⵏ ⴰⵎ ⴷⴷⴻⵅⵅⴰⵏ,

ⵉⵅⵙⴰⵏ ⵉⵏⵓ ⴰⵎ ⵜⴻⴼⵇⵓⵏⵜ ⵉⵛⴻⵎⴹⴻⵏ. ◘102:4 ⵉⵥⵀⴷ. 37:20

5 ⵓⵍ ⵉⵏⵓ ⵉⵜⵜⵉⵙⵍⴰⵡ ⵓ ⵢⵓⵥⴻⵖ ⴰⵎ ⴰⵔⴱⵉⵄ,

ⴰⵍⴰⵎⵉ ⵜⵜⵓⵖ ⴰⴷ ⵛⵛⴻⵖ ⴰⵖⵔⵓⵎ ⵉⵏⵓ.

6 ⵣⵉ ⵙⵙⵉⴱⴱⴻⵜ ⵏ ⵓⵣⴻⵀⵀⴰⵔ ⵢⵓⴵⵖⴻⵏ ⵉⵏⵓ,

ⵍⴻⵚⵇⴻⵏ ⵉⵖⵙⴰⵏ ⵉⵏⵓ ⵖⴰⵔ ⵜⴻⵍⵎⴻⵛⵜ ⵉⵏⵓ.

7 ⵏⴻⵛⵛ ⴰⵎ ⵢⵉⵊⵊ ⴱⵓ-ⵓⵄⵓⵇⵇⵉ ⵏ ⵓⵊⴹⵉⴹ

ⴷⵉ ⵍⴻⵅⵍⴰ,

ⴷⴻⵡⵍⴻⵖ ⴰⵎ ⵢⵉⵊⵊ ⵏ ⵎⵓⴽⴰ ⵊⴰⵔ ⵍⵅⵉⵔⴱⴰⵜ.

8 ⵜⵜⵖⵉⵎⴻⵖ ⴼⴰⵇⴻⵖ ⵙ ⵍⴻⴼⵜⴰⵏⴻⵜ,

ⴷⴻⵡⵍⴻⵖ ⴰⵎ ⵢⵉⵊⵊ ⵏ ⵡⴻⵊⴹⵉⴹ

ⵉ ⵉⵇⵇⵉⵎⴻⵏ ⵡⴻⵃⵃⴷⴻⵙ ⵅ ⵜⵣⴻⵇⵇⴰ.

9 ⵍⵄⴻⴷⵢⴰⵏ ⵉⵏⵓ ⵜⵜⴻⴽⴽⵡⴰⵔⴻⵏ ⴰⵢⵉ ⴰⵙⵙ ⵎⴰⵔⵔⴰ.

ⵉⵏⵏⵉ ⵅⴰⴼⵉ ⵉⵜⵜⵄⴻⴷⴷⴰⵏ,

ⵏⴻⵄⵄⵍⴻⵏ ⴰⵎ ⵇⵇⴰⵔⴻⵏ ⵉⵙⴻⵎ ⵉⵏⵓ.

10 ⵎⴰⵖⴰⵔ ⵜⵜᵉⵜⵜⴻⵖ ⵉⵖⵖⴻⴹ ⴰⵎ ⵡⴻⵖⵔⵓⵎ

ⵓ ⵅⴻⴵⴹⴻⵖ ⵜⵉⵙⴻⵙⵙⵉⵜ ⵉⵏⵓ ⵙ ⵉⵎⴻⵟⵟⴰⵡⴻⵏ ⵉⵏⵓ

11 ⵣⵉ ⵙⵙⵉⴱⴱⴻⵜ ⵏ ⵡⴻⵙⵅⴻⴹ ⵏⵏⴻⵛ

ⴷ ⵓⴷⵓⵇⵇⴻⵣ ⵏ ⵡⴻⵖⴹⴰⴱ ⵏⵏⴻⵛ,

ⵎⴰⵖⴰⵔ ⵛⴻⴽ ⵜⴻⵙⵙⴳⴻⵄⵄⴷⴻⴷ ⴰⵢⵉ

ⵓ ⵜⴻⵏⴹⴰⵔⴻⴷ ⴰⵢⵉ ⵄⴰⵡⴻⴷ ⵖⴰⵔ ⵜⴻⵎⵎⵓⵔⵜ.

12 ⵓⵙⵙⴰⵏ ⵉⵏⵓ ⴰⵎ ⵢⵉⵛⵜ ⵏ ⵜⵉⵍⵉ ⵉⵣⵣⵓⴳⴳⴰⵔⵜⴻⵏ,

ⵓ ⵏⴻⵛⵛ ⵜⴰⵥⵖⴻⵖ ⴰⵎ ⵜⵓⴳⴰ.

13 ⵎⴰⵛⴰ ⵛⴻⴽ, ⴰ ⵙⵉⴷⵉ,

ⴰⴷ ⵜⴻⵇⵇⵉⵎⴻⴷ ⵅ ⵍⴽⵓⵔⵙⵉ ⵏⵏⴻⴽ ⵉ ⵍⴻⴱⴷⴰ,

ⵣⵉ ⵊⵊⵉⵍ ⴰⵍ ⵊⵊⵉⵍ ⴰⴷ ⴷⴰⵢⴻⴽ ⵅⴰⵔⵔⵚⴻⵏ.

14 ⵛⴻⴽ ⴰⴷ ⵜⴻⴽⴽⴰⵔⴻⴷ ⴰⴷ ⵜⴰⵔⵃⵎⴻⴷ ⵅ ⵚⵉⵀⵢⵓⵏ,

ⵎⴰⵖⴰⵔ ⴰⵇⴰ ⴷ ⵍⵡⴻⵇⵜ

ⵎⴰⵃⴻⵏⴷ ⴰⴷ ⵅⴰⵙ ⵜⵃⵉⵏⵏⴻⴷ,

ⵎⵉⵏⵣⵉ ⵍⵡⴻⵇⵜ ⵉⵜⵜⵡⴰⴳⴳⴻⵏ

ⴰⵇⴰ ⵜⵉⵡⴻⴹ-ⴷⴷ.

15 ⵎⴰⵖⴰⵔ ⵉⵥⵔⴰ ⵏⵏⴻⵙ ⵓⵙⵉⵏ-ⴷⴷ

ⵅ ⵍⵅⴰⴹⴰⵔ ⵏ ⵉⵎⵙⴻⵅⵅⴰⵔⴻⵏ ⵏⵏⴻⵛ

ⵓ ⵏⵉⵜⵏⵉ ⴽⵙⵉⵏ ⵙ ⵡⴻⵙⵃⵉⵙⵙⴻⴼ ⴷⵉ ⵜⵄⴻⵊⵊⴰⵊⵜ ⵏⵙⴻⵏ.

16 ⵍⴻⴳⵏⵓⵙ ⴰⴷ ⴳⴳⵯⴻⴷⴻⵏ ⵉⵙⴻⵎ ⵏ ⵙⵉⴷⵉ,

ⵎⴰⵔⵔⴰ ⵉⵊⴻⴵⵉⴷⴻⵏ ⵏ ⵜⴻⵎⵎⵓⵔⵜ

ⴰⴷ ⴳⴳⵯⴻⴷⴻⵏ ⴰⵄⵓⴵⵉ ⵏⵏⴻⵛ.

17 ⵅⵎⵉ ⵖⴰ ⵉⴱⵏⴰ ⵙⵉⴷⵉ ⵚⵉⵀⵢⵓⵏ

ⵜⵡⴰⵍⴰⵜ ⵏⵏⴻⵖⵏⵉⵜ,

ⴰⴷ ⴷⴷ-ⵉⴱⴰⵏ ⴷⴻⴳ ⵓⵄⵓⴵⵉ ⵏⵏⴻⵙ.

18 ⴰⴷ ⵉⵍⵀⴰ ⴰⴽ-ⴷ ⵜⵥⴰⴵⵉⵜ ⵏ ⵓⵎⴻⵣⵍⵓⴹ,

ⵡⴰⵔ ⵉⵙⵙⴻⵃⵇⴰⵔⴰ ⵛⴰ ⵜⴰⵥⴰⴵⵉⵜ ⵏⵙⴻⵏ.

19 ⵎⴰⵏ ⴰⵢⴰ ⵉⵜⵜⵡⴰⵔⵉ ⵉ ⵊⵊⵉⵍ ⵉ ⴷⴷ ⵖⴰ ⵢⴰⵙⴻⵏ,

ⵍⴳⴻⵏⵙ ⵏⵏⵉ ⴷⴷ ⵖⴰ ⵉⵜⵜⵡⴰⵅⴻⵍⵇⴻⵏ,

ⴰⴷ ⵉⵚⴻⴱⴱⴻⵃ ⵉ ⵙⵉⴷⵉ,

20 ⵎⴰⵖⴰⵔ ⵏⴻⵜⵜⴰ ⴰⵇⴰ ⵉⵙⵙⵉⵊⵊ-ⴷⴷ

ⵣⵉ ⵣⵣⴰⵡⴻⵛⵜ ⵏⵏⴻⵙ ⵉⵇⴻⴷⴷⵙⴻⵏ ⵢⵓⵄⵍⴰⵏ,

ⵣⴻⴳ ⵓⵊⴻⵏⵏⴰ ⵉⵅⵣⴰⵔ-ⴷⴷ ⵙⵉⴷⵉ

ⵖⴰⵔ ⵜⴻⵎⵎⵓⵔⵜ ⵙⵡⴰⴷⴷⴰⵢ

21 ⵃⵉⵎⴰ ⴰⴷ ⵉⵙⴻⵍ ⴰⵡⴻⵄⵄⴻⴹ ⵏ ⵓⵎⴻⵃⴱⵓⵙ,

ⵃⵉⵎⴰ ⴰⴷ ⵢⴰⵔⵅⵓ

ⵉ ⵢⵉⵏⵏⵉ ⵉⴵⴰⵏ ⴷ ⵜⴰⵔⵡⴰ ⵏ ⵍⵎⴻⵡⵜ,

22 ⵎⴰⵃⴻⵏⴷ ⴰⴷ ⴱⴰⵔⵔⵃⴻⵏ

ⵙ ⵢⵉⵙⴻⵎ ⵏ ⵙⵉⴷⵉ ⴷⵉ ⵚⵉⵀⵢⵓⵏ,

ⴷ ⵛⵛⴻⵏⵄⴻⵜ ⵏⵏⴻⵙ ⴷⵉ ⵓⵔⵛⴰⵍⵉⵎ,

23 ⵅⵎⵉ ⴷⵉⵏⵏⵉ ⵉ ⵖⴰ ⵜⵜⵡⴰⵙⵙⵎⵓⵏⴻⵏ ⵍⴻⴳⵏⵓⵙ,

ⵊⵎⵉⵄ ⴰⴽ-ⴷ ⵜⴳⴻⵍⴷⵉⵡⵉⵏ,

ⵃⵉⵎⴰ ⴰⴷ ⵙⴻⵅⵅⴰⵔⴻⵏ ⵉ ⵙⵉⴷⵉ.

24 ⵏⴻⵜⵜⴰ ⵉⵙⵙⴰⵔⵅⵓ ⵊⵊⴻⵀⴷ ⵉⵏⵓ ⴰⴽ-ⴷ ⵡⴻⴱⵔⵉⴷ,

ⵏⴻⵜⵜⴰ ⵉⵙⵙⴻⵎⵥⵉ ⴷⴻⴳ ⵡⵓⵙⵙⴰⵏ ⵉⵏⵓ.

25 ⵏⴻⵛⵛ ⵏⵏⵉⵖ: ‘ⵡⴰⵔ ⴷ ⴰⵢⵉ ⴽⴻⵙⵙⵉ

ⴷⴻⴳ ⵡⴻⵣⵢⴻⵏ ⵏ ⵡⵓⵙⵙⴰⵏ ⵏ ⵜⵓⴷⴰⵔⵜ ⵉⵏⵓ, ⴰ ⴰⵔⴻⴱⴱⵉ,

ⴰⵇⴰ ⵉⵙⴻⴳⴳⵯⵓⵙⴰ ⵏⵏⴻⵛ ⵜⵜⵖⵉⵎⴰⵏ ⵣⵉ ⵊⵊⵉⵍ ⴰⵍ ⵊⵊⵉⵍ.

26 ⵣⴻⴳ ⵡⴻⵛⵃⴰⵍ ⵓⵢⴰ ⵜⴻⴳⴳⵉⴷ ⴷⵙⴰⵙ ⵉ ⵜⴻⵎⵎⵓⵔⵜ,

ⵉⵊⴻⵏⵡⴰⵏ ⴷ ⵍⵅⴻⴷⵎⴻⵜ ⵏ ⵉⴼⴰⵙⵙⴻⵏ ⵏⵏⴻⵛ. ◘102:26 ⵄⴱⵔ. 1:10

27 ⵉⵏⴰ ⴰⴷ ⴼⵏⴰⵏ, ⵎⴰⵛⴰ ⵛⴻⴽ ⴰⴷ ⵜⴷⵓⵎⴻⴷ.

ⵏⵉⵜⵏⵉ ⵎⴰⵔⵔⴰ ⴰⴷ ⴰⵔⵛⴰⵏ ⴰⵎ ⵡⴰⵔⵔⵓⴹ,

ⵛⴻⴽ ⴰⴷ ⵜⴻⵏ ⵜⴱⴻⴷⴷⵍⴻⴷ

ⴰⵎ ⵢⵉⵛⵜ ⵏ ⵍⴻⵄⴱⴰⵢⴻⵜ,

ⴰⵎⵎⵓ ⵉ ⵖⴰ ⵜⵜⵡⴰⴱⴻⴷⴷⵍⴻⵏ. ◘102:27 ⵄⴱⵔ. 1:10-12

28 ⵛⴻⴽ ⵎⴰⵛⴰ ⴷ ⵛⴻⴽ,

ⵉⵙⴻⴳⴳⵯⵓⵙⴰ ⵏⵏⴻⵛ ⵡⴰⵔ ⵇⴻⵟⵟⵉⵏ ⵄⴻⵎⵎⴰⵔⵚ.’ ◘102:28 ⵄⴱⵔ. 1:12ⴱ

29 ⵉⵃⴻⵏⵊⵉⵔⴻⵏ ⵏ ⵉⵎⵙⴻⵅⵅⴰⵔⴻⵏ ⵏⵏⴻⵛ

ⴰⴷ ⴷⵉⵏ ⵣⴻⴷⵖⴻⵏ

ⵓ ⵜⴰⵔⵡⴰ ⵏⵙⴻⵏ ⴰⴷ ⵜⵜⵡⴰⵙⵙⵎⴻⵜⵏⴻⵏ

ⵣⵣⴰⵜ ⵉ ⵡⵓⴷⴻⵎ ⵏⵏⴻⵛ.