1 “ⵓⵎⵉ ⵉⵙⵙⵉⵡⴻⵍ ⵉⴼⵔⴰⵢⵉⵎ, ⴰⵇⴰ ⴷⵉⵏ ⵜⴰⵔⵊⵉⵊⴻⵜ ⵙ ⵓⵡⴻⵇⵇⴰⵔ. ⵏⴻⵜⵜⴰ ⵉⵙⵙⴳⴻⵄⵄⴻⴷ ⵉⵅⴻⴼ ⵏⵏⴻⵙ ⴷⵉ ⵉⵙⵔⴰⵉⵍ ⵓⵛⴰ ⵉⴷⵡⴻⵍ ⴷ ⴰⵎⴻⴷⵏⵓⴱ ⵣⵉ ⵙⵙⵉⴱⴱⴻⵜ ⵏ ⵡⴻⵄⴱⴻⴷ ⵏⵏⴻⵙ ⵉ ⴱⴰⵄⵍ, ⵓⵛⴰ ⵅⴻⵏⵏⵉ ⵉⵎⵎⵓⵜ. 2 ⵓⵛⴰ ⵍⴻⵅⵅⵓ ⵄⴰⵡⴻⴷ ⴰⵔⵏⵉⵏ ⵜⵜⴻⴳⴳⴻⵏ ⴷⴷⵏⵓⴱ ⵓ ⴳⴳⵉⵏ ⵙ ⵏⵏⵓⵇⴰⵔⵜ ⵏⵙⴻⵏ ⵉⵊⵊ ⵏ ⵍⴻⵅⵢⴰⵍ ⵉⴼⴻⵙⵢⴻⵏ ⵄⵍⴰⵃⵙⴰⴱ ⵍⴻⵄⵇⴻⵍ ⵏⵙⴻⵏ, ⴰⵇⴰ-ⵜⴻⵏⵜ ⴷ ⵍⴻⵅⵢⴰⵍⴰⵜ ⵏ ⵍ’ⴰⵚⵏⴰⵎ ⵎⴰⵔⵔⴰ, ⵍⵅⴻⴷⵎⴻⵜ ⵏ ⵓⵎⵣⵉⵍ. ⵏⵉⵜⵏⵉ ⵇⵇⴰⵔⴻⵏ ⵅⴰⵙⴻⵏ: ‘ⴻⵊⵊ ⵉⵡⴷⴰⵏ ⵉⵏⵏⵉ ⵉ ⵖⴰ ⵉⵡⴻⵀⵀⴱⴻⵏ ⵜⵉⵖⴰⵔⵚⴰ ⴰⴷ ⵙⵙⵓⴷⵓⵎⴻⵏ ⵉⵄⴻⵊⵎⵉⵢⵢⴻⵏ-ⴰ!’ ◘13:2 ⵃⵓⵛ. 8:6 3 ⵙ ⵓⵢⴰ ⴰⴷ ⴷⴻⵡⵍⴻⵏ ⴰⵎ ⵢⵉⵊⵊ ⵏ ⵓⵙⴻⵢⵏⵓ ⵏ ⵚⵚⴱⴻⵃ ⵓ ⴰⵎ ⵏⵏⴷⴰ ⵖⴰⵔ ⵜⵓⴼⴼⵓⵜ ⵏⵏⵉ ⴷⴻⵖⵢⴰ ⵉⵄⴻⴷⴷⵓⵏ, ⴰⵎ ⵓⵍⵓⵎ ⵉⵟⵟⴰⵡⴻⵏ ⵣⴻⴳ ⵓⵏⴻⴷⵔⴰⵔ ⵓ ⴰⵎ ⴷⴷⴻⵅⵅⴰⵏ ⵉⵜⵜⴻⴼⴼⵖⴻⵏ ⵣⵉ ⵜⴱⵓⵔⵊⴻⵜ.”

4 “ⵏⴻⵛⵛ ⴷ ⵙⵉⴷⵉ, ⴰⵔⴻⴱⴱⵉ ⵏⵏⴻⵛ, ⵣⴻⴳ ⵡⴰⵎⵉ ⴷⴷ-ⵜⴻⴼⴼⵖⴻⵎ ⴽⴻⵏⵏⵉⵡ ⵣⵉ ⵜⴻⵎⵎⵓⵔⵜ ⵏ ⵎⵉⵚⵔⴰ. ⵛⴻⴽ ⵡⴰⵔ ⵜᵉⵜⵜⴻⵙⵙⵏⴻⴷ ⴱⵓ ⴰⵔⴻⴱⴱⵉ ⵏⵏⴻⵖⵏⵉ ⵎⵖⵉⵔ ⵏⴻⵛⵛ ⵓ ⵡⴰⵔ ⴷⵉⵏ ⴰⵎⵙⴻⵏⵊⴻⵎ ⵎⵖⵉⵔ ⵏⴻⵛⵛ. ◘13:4 2 ⵚⵎ. 22:32; ⵉⵥⵀⴷ. 18:32; ⵉⵛⴰ. 43:11; ⵃⵓⵛ. 12:10 5 ⵏⴻⵛⵛ ⵙⵙⵏⴻⵖ ⵛⴻⴽ ⴷⵉ ⵍⴻⵅⵍⴰ, ⴷⴻⴳ ⵉⵛⵜ ⵏ ⵜⴻⵎⵎⵓⵔⵜ ⵏ ⵍⴻⵃⵎⵓ ⵢⴰⵔⴻⵇⵇⴻⵏ. 6 ⴰⵍⴰⵎⵉ ⵉⵡⴹⴻⵏ ⵖⴰⵔ ⴷⴷⴻⵎⵏⴻⵜ ⵏⵙⴻⵏ ⵏ ⵜⴰⵔⴻⵡⵙⴰ, ⴷⴻⵡⵍⴻⵏ ⵊⵊⵉⵡⵏⴻⵏ. ⴰⵍⴰⵎⵉ ⵊⵊⵉⵡⵏⴻⵏ, ⵉⵏⵏⵓⵔⴼⴻⵄ ⵡⵓⵍ ⵏⵙⴻⵏ. ⵅ ⵓⵢⴰ ⵜⵜⵓⵏ ⴰⵢⵉ. ◘13:6 ⴰⵄⵡⴷ. 32:15; ⵃⵓⵛ. 8:14 7 ⵙ ⵓⵢⴻⵏⵏⵉ ⵏⴻⵛⵛ ⴷⴻⵡⵍⴻⵖ ⵉ ⵏⵉⵜⵏⵉ ⴰⵎ ⵡⴻⵢⵔⴰⴷ ⵉⵣⴻⵀⵀⴰⵔⴻⵏ, ⴰⵎ ⵓⵖⵉⵍⴰⵙ ⵍⴻⴱⵜⴻⵖ ⴷⴻⴳ ⵡⴻⴱⵔⵉⴷ. 8 ⵏⴻⵛⵛ ⵓⵙⵉⵖ-ⴷⴷ ⵖⴰⵔⵙⴻⵏ ⴰⵎ ⵢⵉⵊⵊ ⵏ ⴷⴷⵓⴱ ⵡⴻⵏⵏⵉ ⵓⵎⵉ ⵓⵛⴰⵔⴻⵏ ⵜⴰⵔⵡⴰ ⵏⵏⴻⵙ ⵓ ⵏⴻⵛⵛ ⴰⵍⵥⴻⵖ ⵉⴷⵎⴰⵔⴻⵏ ⵏⵙⴻⵏ ⵓ ⵚⴰⵔⴹⴻⵖ ⵜⴻⵏ ⴷⵉⵏ ⴰⵎ ⵜⵉⵣⴻⵎⵜ. ⵍⴻⵡⵃⵓⵛ ⵏ ⵍⴻⵅⵍⴰ ⵎⴻⵣⵣⵇⴻⵏ ⵜⴻⵏ.” ◼13:8 ⵉⴷⵎⴰⵔⴻⵏ ⵏⵙⴻⵏ-ⵙ ⵜⵄⵉⴱⵔⴰⵏⵉⵜ ‘ⴰⵍⴻⵃⵃⴻⴼ ⵏ ⵡⵓⵍ ⵏⵙⴻⵏ’.

9 “ⵎⴰⵏ ⴰⵢⴰ ⵉⴷⵡⴻⵍ ⴷ ⴰⴽⴻⵃⵃⴻⴹ ⵏⵏⴻⵛ, ⴰ ⵉⵙⵔⴰⵉⵍ, ⴰⵇⴰ ⵜⵄⴻⴽⴽⵙⴻⴷ ⴰⵢⵉ, ⴹⵉⴷⴷ ⵉ ⵡⴻⵏⵏⵉ ⵉⴵⴰⵏ ⴷ ⴰⵎⵄⴰⵡⴻⵏ ⵏⵏⴻⵛ. 10 ⵎⴰⵏⵉ ⵉⴵⴰ ⵅⴻⵏⵏⵉ ⵓⵊⴻⴵⵉⴷ ⵏⵏⴻⵛ, ⴷ ⵡⴻⵏⵏⵉ ⵉⵣⴻⵎⵎⴰⵔⴻⵏ ⴰⴷ ⵛⴻⴽ ⵉⵙⵙⴻⵏⵊⴻⵎ ⴷⵉ ⵎⴰⵔⵔⴰ ⵜⵉⵏⴻⴷⴷⴰⵎ ⵏⵏⴻⵛ! ⵓ ⵎⴰⵏⵉ ⴵⴰⵏ ⵍⵇⵓⴹⴰⵜ ⵏⵏⴻⵛ ⵓⵎⵉ ⵜⴻⵏⵏⵉⴷ: ‘ⴻⵡⵛ ⴰⵢⵉ ⵉⵊⵊ ⵏ ⵓⵊⴻⴵⵉⴷ ⵓⵍⴰ ⴷ ⵍⵃⵓⴽⴽⴰⵎ’? 11 ⵙ ⵡⴻⵖⴹⴰⴱ ⵉⵏⵓ ⵡⵛⵉⵖ ⴰⵛ ⵉⵊⵊ ⵏ ⵓⵊⴻⴵⵉⴷ ⵓ ⵙ ⵓⴷⵓⵇⵇⴻⵣ ⵉⵏⵓ ⵏ ⵓⴼⵓⴳⴻⵎ ⴽⴽⵙⴻⵖ ⴰⵛ ⵜ. ◘13:11 1 ⵚⵎ. 8:5; 15:23; 16:1 12 ⵍⵎⵓⵄⵚⵉⵢⵢⴻⵜ ⵏ ⵉⴼⵔⴰⵢⵉⵎ ⵜᵉⵜⵜⵡⴰⵇⴻⴱⴱⴻⴹ ⴰⵎ ⴷⴻⴳ ⵉⵛⵜ ⵏ ⵜⵇⴻⴱⴱⵉⴹⵟ, ⴷⴷⵏⵓⴱ ⵏⵏⴻⵙ ⵜⵜⵡⴰⵃⴹⴰⵏ. 13 ⵍⴻⵃⵔⵉⵇ ⵏ ⵜⴰⵔⵡⴰ ⴰⴷ ⵖⴰⵔⴻⵙ ⴷⴷ-ⵢⴰⵙ. ⵏⴻⵜⵜⴰ ⴷ ⵉⵊⵊ ⵏ ⵓⵃⴻⵏⵊⵉⵔ ⵉⵇⵇⵉⵎ ⴱⵍⴰ ⵜⵉⵖⵉⵜ, ⵎⴰⵖⴰⵔ ⵏⴻⵜⵜⴰ ⵡⴰⵔ ⴷⵉⵏ ⵉⴱⴻⴷⴷ ⴷⵉ ⵍⵡⴻⵇⵜ ⵏⵏⴻⵙ ⵎⴰⵃⴻⵏⴷ ⴰⴷ ⵉⴼⴼⴻⵖ

ⵅⵎⵉ ⵉ ⵖⴰ ⵜⴰⵔⵣⴻⵎ ⵍⴻⵎⵍⴰⵡⵍⴻⵜ ⵃⵉⵎⴰ ⴰⴷ ⴼⴼⵖⴻⵏ ⵉⵃⴻⵏⵊⵉⵔⴻⵏ.

14 “ⵣⴻⴳ ⵓⴼⵓⵙ ⵏ ⵍⴰⵅⴰⵔⵜ ⴰⴷ ⵜⴻⵏ ⴼⴷⵉⵖ, ⴰⴷ ⵜⴻⵏ ⴼⴻⴽⴽⴻⵖ ⵣⵉ ⵍⵎⴻⵡⵜ. ⴰ ⵍⵎⴻⵡⵜ, ⵎⴰⵏⵉ ⴵⴰⵏ ⵍⴻⵃⵍⴰⵛⴰⵜ ⵏ ⵟⵟⴰⵄⵓⵏ ⵏⵏⴻⵎ, ⴰ ⵍⴰⵅⴰⵔⵜ, ⵎⴰⵏⵉ ⵜⴻⴵⴰ ⵜⵓⵔⵚⵓⴹⵉ ⵏⵏⴻⵎ? ⵎⴰ ⴰⴷ ⵏⴻⴷⵎⴻⵖ ⵄⴰⴷ? ⵍⵍⴰ, ⴰⵢⴰ ⵉⵏⵓⴼⴼⴰⵔ ⵣⵣⴰⵜ ⵉ ⵜⵉⵟⵟⴰⵡⵉⵏ ⵉⵏⵓ. ◘13:14 ⵉⵛⴰ. 25:8; 1 ⴽⵓⵔ. 15:55

15 ⵡⴰⵅⵅⴰ ⴳⴳⵓⵔ ⵉⴼⵔⴰⵢⵉⵎ ⴰⴷ ⵉⵡⵛ ⵍⵖⵉⴵⴻⵜ ⵊⴰⵔ ⴰⵢⵜⵎⴰⵙ, ⵄⴰⴷ ⴰⴷ ⴷⴷ-ⵢⴰⵙ ⵉⵊⵊ ⵏ ⵓⵙⴻⵎⵎⵉⴹ ⵣⵉ ⵛⵛⴰⵔⵇ, ⵉⵊⵊ ⵏ ⵓⵙⴻⵎⵎⵉⴹ ⵏ ⵙⵉⴷⵉ ⵏⵏⵉ ⵉ-ⴷⴷ ⵉ ⵖⴰ ⵉⴽⴽⴰⵔⴻⵏ, - ⵜⴰⵍⴰ ⵏⵏⴻⵙ ⴳⴳⵓⵔ ⴰⴷ ⵜⴰⵥⴻⵖ, ⴰⵏⵓ ⵏⵏⴻⵙ ⴳⴳⵓⵔ ⴰⴷ ⵉⵡⴹⴰ - ⴳⴳⵓⵔ ⴰⴷ ⵉⴽⴻⵛⵛⴻⴹ ⵓⵙⴻⵎⵎⵉⴹ ⵉⵛⵜ ⵏ ⵜⵅⴰⴱⴻⵛⵜ ⵣⵉ ⵎⴽⵓⵍ ⵍⴻⵇⵛⵓⵄ ⵉⵖⵍⴰⵏ.”