4
ⵍⵃⴰⵔⴹ ⴰⵎⴻⵣⵡⴰⵔⵓ ⵏ ⵉⵍⵉⴼⴰⵣ: ⴽⵙⵉ ⴰⵡⴻⴱⴱⴻⵅ ⵏ ⴰⵔⴻⴱⴱⵉ!
1 ⵅⴻⵏⵏⵉ ⵢⴰⵔⵔⴰ-ⴷⴷ ⵉⵍⵉⴼⴰⵣ, ⵡⴻⵏⵏⵉ ⴷⴷ-ⵢⵓⵙⵉⵏ ⵣⵉ ⵜⴰⵢⵎⴰⵏ, ⵉⵏⵏⴰ:
2 ⵎⴰⵍⴰ ⵃⴻⴷ ⵢⴰⵔⵣⵓ
ⵎⴰⵃⴻⵏⴷ ⴰⴷ ⴽⵉⴽ ⵉⵙⵙⵉⵡⴻⵍ,
ⵎⴰ ⵡⴰⵔ ⵜᵉⵜⵜⵡⴰⵛⴻⴹⵏⴻⴷ ⵇⴰⵄ ⵙ ⵎⴰⵏ ⴰⵢⴰ?
ⵎⴰⵛⴰ ⵎⴰⵏ ⵡⴻⵏ ⵉⵣⴻⵎⵎⴰⵔⴻⵏ
ⴰⴷ ⵉⵙⵙⴱⴻⴷⴷ ⵍⵀⴰⵔⴷ ⵏⵏⴻⵙ?
3 ⵅⵣⴰⵔ, ⵜⴻⵙⵙⵖⴰⵔⴻⴷ ⴰⵟⵟⴰⵙ ⵏ ⵉⵡⴷⴰⵏ
ⵓ ⵉⴼⴰⵙⵙⴻⵏ ⵢⴰⵔⵅⵓⵏ ⵜⴻⵙⵙⵎⴻⵃⴹⴻⴷ ⵉ-ⵜⴻⵏ.
4 ⵡⴻⵏⵏⵉ ⵉⵏⵇⴰⵔⴹⴻⵏ,
ⵜⴻⵙⵙⴱⴻⴷⴷⴻⴷ ⵉ-ⵜ ⵙ ⵡⴰⵡⴰⵍ ⵏⵏⴻⵛ,
ⵓ ⵉⴼⴰⴷⴷⴻⵏ ⵉⴼⴻⵛⵍⴻⵏ
ⵜⴻⵡⵛⵉⴷ ⴰⵙⴻⵏ ⵊⵊⴻⵀⴷ ⵄⴰⵡⴻⴷ.
5 ⵎⴰⵛⴰ ⵍⴻⵅⵅⵓ ⵉⵎⵙⴰⵔ ⴰⵢⴰ ⵉ ⵛⴻⴽ,
ⵜᵉⵜⵜⵡⴰⵛⴻⴹⵏⴻⴷ ⵇⴰⵄ,
ⵍⴻⵅⵅⵓ ⵉⵍⵇⴻⴼ ⵉ ⵛⴻⴽ ⴰⵢⴰ ⵓⵛⴰ ⵜⴰⵔⴻⵊⴼⴻⴷ.
6 ⵎⴰ ⵡⴰⵔ ⵜⴻⴵⵉ ⵜⵉⴳⴳⵯⵓⴷⵉ ⵣⵉ ⴰⵔⴻⴱⴱⵉ
ⴷ ⵍⴰⵎⴰⵏ ⵏⵏⴻⵛ
ⵓ ⵍⴻⵚⴼⴰⵢⴻⵜ ⵏ ⵉⴱⵔⵉⴷⴻⵏ ⵏⵏⴻⵛ ⴷ ⵍⴰⵢⴰⵙ ⵏⵏⴻⵛ?
7 ⵅⴻⵎⵎ ⵎⴰⵛⴰ!
ⵎⴰⵏ ⵡⴻⵏ ⵉⵜⵜⵡⴰⵀⴻⵍⵍⴽⴻⵏ ⴰⵎ ⵉⴵⴰ ⴷ ⴰⵎⴻⵣⴷⴰⴳ
ⵓ ⵎⴰⵏⵉ ⵜⵜⵡⴰⵜⴻⵃⵃⴰⵏ ⵉⵏⵏⵉ ⵉⴳⴳⵓⵔⴻⵏ ⵏⵉⵛⴰⵏ?
8 ⵥⵔⵉⵖ ⴰⵇⴰ ⵉⵏⵏⵉ ⵉⵛⴰⵔⵔⵣⴻⵏ ⴷⴷⴻⴵ
ⴷ ⵢⵉⵏⵏⵉ ⵉⵣⴰⵔⵔⵄⴻⵏ ⵍⴻⵖⴱⴻⵏ,
ⴰⴷ ⵜ ⵎⵊⴰⵔⴻⵏ ⵄⴰⵡⴻⴷ. ◘4:8 ⴰⵢⵓⴱ 15:35; ⵉⵥⵀⴷ. 7:15; ⴰⵡⵍⵏ. 22:8; ⵉⵛⴰ. 59:4; ⵃⵓⵛ. 10:13; ⴳⴰⵍ. 6:7, 8
9 ⴰⴷ ⵀⴻⵍⵍⴽⴻⵏ ⵣⴻⴳ ⵓⵙⵓⴹⵉ ⵏ ⵏⵏⴻⴼⵙ ⵏ ⴰⵔⴻⴱⴱⵉ,
ⴰⴷ ⴼⵏⴰⵏ ⵙ ⵓⵙⵓⴹⵉ ⵣⴻⴳ ⵡⴻⵏⵣⴰⵔⴻⵏ ⵏⵏⴻⵙ. ◘4:9 ⵉⵛⴰ. 11:4
10 ⵣⵣⵀⵉⵔ ⵏ ⵡⴻⵢⵔⴰⴷ
ⴷ ⵜⵎⵉⵊⵊⴰ ⵏ ⵢⵉⵣⴻⵎ ⴰⵎⴻⵥⵢⴰⵏ ⴰⴷ ⵜⵜⵡⴰⵙⵙⴱⴻⴷⴷⴻⵏ
ⵓ ⵜⵉⵖⵎⴰⵙ ⵏ ⵡⴰⵢⵔⴰⴷⴻⵏ ⵉⵎⴻⵥⵢⴰⵏⴻⵏ
ⴰⴷ ⵜⵜⵡⴰⵔⵥⴰⵏⵜ.
11 ⴰⴷ ⵉⵀⴻⵍⵍⴻⴽ ⵡⴰⵢⵔⴰⴷ,
ⵎⵉⵏⵣⵉ ⵡⴰⵔ ⵢⵓⴼⵉ ⵣⵣⴰⵔⴷⴻⵜ,
ⵜⴰⵔⵡⴰ ⵏ ⵜⴰⵢⵔⴰⴷⵜ ⴰⴷ ⵜⵜⵡⴰⴱⴻⵣⵣⵄⴻⵏ.
12 ⴷⵉ ⵜⵏⵓⴼⴼⵔⴰ ⵢⵉⵡⴻⴹ ⴰⵢⵉ-ⴷⴷ ⵉⵊⵊ ⵏ ⵡⴰⵡⴰⵍ,
ⴰⵎⴻⵣⵣⵓⵖ ⵉⵏⵓ ⵉⵟⵟⴻⴼ ⵣⵣⴰⵢⴻⵙ ⵍⴻⵃⵎⵉⵙ,
13 ⴰⵎ ⵜⵓⵖⴰ ⵖⴰⵔⵔⵇⴻⵖ
ⴷⴻⴳ ⵉⵅⴰⵔⵔⵉⵚⴻⵏ ⵉⵙⵙⵉⴳⴳⵯⵉⴷⴻⵏ
ⵣⴻⴳ ⵉⵡⴻⵃⵃⴰⵏ ⵏ ⴵⵉⵍⴻⵜ,
ⵍⴰⵎⵉ ⴷⴷ-ⵉⵡⴹⴰ ⵢⵉⴹⴻⵚ ⵢⵓⴵⵖⴻⵏ ⵅ ⵉⵡⴷⴰⵏ.
14 ⵜⴻⵍⵇⴻⴼ ⴰⵢⵉ ⵜⵉⴳⴳⵯⵓⴷⵉ ⴷ ⵜⴰⵔⵊⵉⵊⵉⵜ,
ⵎⴰⵔⵔⴰ ⵉⵖⵙⴰⵏ ⵉⵏⵓ ⵏⵏⵅⴻⵍⵄⴻⵏ.
15 ⵉⵊⵊ ⵏ ⴱⵓⵃⴱⴻⵍ ⵉⵃⵔⴰⵔⴰ ⵅ ⵓⵖⴻⵎⴱⵓⴱ ⵉⵏⵓ,
ⵉⵙⵙⴱⴻⴷⴷ ⴰⵛⵓⵡⵡⴰⴼ ⴷⵉ ⴰⵔⵔⵉⵎⴻⵜ ⵉⵏⵓ.
16 ⵏⴻⵜⵜⴰ ⵉⴱⴻⴷⴷ,
ⵎⴰⵛⴰ ⵡⴰⵔ ⵄⵇⵉⵍⴻⵖ ⵅ ⵜⴻⴼⵔⴰⵙ ⵏⵏⴻⵙ.
ⵉⵊⵊ ⵏ ⵡⴰⴷⴷⵓⴷ ⵉⴱⴻⴷⴷ ⵣⵣⴰⵜ ⵉ ⵜⵉⵟⵟⴰⵡⵉⵏ ⵉⵏⵓ.
ⵅⴻⵏⵏⵉ ⵙⵍⵉⵖ ⵉ ⵜⵎⵉⵊⵊⴰ ⵜᵉⵜⵜⴻⵎⵜⵉⵎ, ⵜⴻⵇⵇⴰⵔ:
17 ‘ⵎⴰ ⵉⵣⴻⵎⵎⴰⵔ ⵉⵊⵊ ⵏ ⴱⵏⴰⴷⴻⵎ
ⴰⴷ ⵢⵉⵍⵉ ⵉⵙⴻⴳⴳⴻⴷ ⵅ ⴰⵔⴻⴱⴱⵉ?
ⵎⴰ ⵉⵣⴻⵎⵎⴰⵔ ⵉⵊⵊ ⵏ ⵡⴻⵔⵢⴰⵣ
ⴰⴷ ⵢⵉⵍⵉ ⵉⵚⴼⴰ ⵅ ⵡⴻⵏⵏⵉ ⵜ ⵉⴳⴳⵉⵏ?’
18 ⵅⵣⴰⵔ, ⵡⴰⵔ ⵉⵜⵜⵛⵉⵍⵉ
ⵓⵍⴰ ⵅ ⵉⵎⵙⴻⵅⵅⴰⵔⴻⵏ ⵏⵏⴻⵙ,
ⵉⴳⴳⴰ ⵍⵄⵉⴱ ⵄⴰⴷ ⴰⴽ-ⴷ ⵍⵎⴰⵍⴰⴽⴰⵜ ⵏⵏⴻⵙ
ⵓⵎⵉ ⵡⴻⴷⴷⴰⵔⴻⵏⵜ. ◘4:18 ⴰⵢⵓⴱ 15:15; 2 ⴱⵟ. 2:4
19 ⵎⴰⵀⵓ ⵉⵏⵏⵉ ⵉⵣⴻⴷⴷⵖⴻⵏ ⴷⵉ ⵜⵓⴷⵔⵉⵏ ⵏ ⵓⵛⴰⵍ,
ⵉⵏⵏⵉ ⵖⴰⵔ ⵜⴻⴵⴰ ⵜⵄⴻⵊⵊⴰⵊⵜ ⴷ ⴷⵙⴰⵙ ⵏⵙⴻⵏ.
ⴰⵇⴰ ⴰⴷ ⵜⵜⵡⴰⵍⴻⴱⵣⴻⵏ ⴰⵎⴻⵣⵡⴰⵔ ⵅ ⵜⵛⵉⵏⴷⴰ.
20 ⵣⵉ ⵜⵓⴼⴼⵓⵜ ⵏ ⵚⵚⴱⴻⵃ ⴰⵍ ⵜⴰⵎⴻⴷⴷⵉⵜ
ⴰⴷ ⵜⵜⵡⴰⴼⴰⵔⵜⴽⴻⵏ.
ⴱⵍⴰ ⵉ ⵉⵡⵛⴰ ⴱⵏⴰⴷⴻⵎ ⵜⴰⵢⵏⵉⵜ ⵉ ⵎⴰⵏ ⴰⵢⴰ,
ⴰⴷ ⴼⵏⴰⵏ ⵉ ⵍⴻⴱⴷⴰ.
21 ⵎⴰ ⵡⴰⵔ ⴷⴷ-ⵜᵉⵜⵜⵡⴰⵇⵍⴻⵄ ⵖⴰⵔⵙⴻⵏ
ⵜⴻⵙⵖⵓⵏⵜ ⵏ ⵓⵇⵉⴹⵓⵏ ⵏⵙⴻⵏ ⵏ ⴰⵔⵔⵉⵎⴻⵜ?
ⴰⴷ ⵎⵎⵜⴻⵏ, ⵎⴰⵛⴰ ⵡⴰⵔ ⵉⴵⵉ ⴷⵉ ⵜⵉⵖⵉⵜ.
◘4:8 4:8 ⴰⵢⵓⴱ 15:35; ⵉⵥⵀⴷ. 7:15; ⴰⵡⵍⵏ. 22:8; ⵉⵛⴰ. 59:4; ⵃⵓⵛ. 10:13; ⴳⴰⵍ. 6:7, 8
◘4:18 4:18 ⴰⵢⵓⴱ 15:15; 2 ⴱⵟ. 2:4