7
1 ⵉⵣⵍⵉ ⵏ ⴷⴰⵡⵓⴷ ⴷⴻⴳ ⵡⴰⵟⵟⴰⵙ ⵏ ⵜⵎⵉⵊⵊⵉⵡⵉⵏ, ⵉⵣⵍⵉ ⵏⵏⵉ ⵉⵖⴻⵏⵏⴻⵊ ⵉ ⵙⵉⴷⵉ ⴷⵉ ⵙⵙⵉⴱⴱⴻⵜ ⵏ ⵡⴰⵡⴰⵍⴻⵏ ⵏ ⴽⵓⵛ, ⵡⴻⵏⵏⵉ ⵉⴵⴰⵏ ⵣⴻⴳ ⴰⵢⵜ ⵏ ⴱⵉⵏⵢⴰⵎⵉⵏ.
2 ⴰ ⵙⵉⴷⵉ, ⴰⵔⴻⴱⴱⵉ ⵉⵏⵓ,
ⴰⵇⴰ ⵖⴰⵔⴻⴽ ⴰⵔⴻⴽⴽⵡⴰⵍⴻⵖ!
ⵙⴻⵏⵊⴻⵎ ⴰⵢⵉ ⵣⵉ ⵎⴰⵔⵔⴰ ⵉⵏⵏⵉ ⵅⴰⴼⵉ ⵉⵜⵜⴰⵥⵥⵍⴻⵏ
ⵓⵛⴰ ⴼⴻⴽⴽ ⴰⵢⵉ,
3 ⵎⴰⵃⴻⵏⴷ ⵏⴻⵜⵜⴰ ⵡⴰⵔ ⴷ ⴰⵢⵉ ⵉⵣⴻⵄⵄⴻⴼ
ⴰⵎ ⵡⴻⵢⵔⴰⴷ,
ⴰⴷ ⴰⵢⵉ ⵉⵎⴻⵣⵣⴻⵇ,
ⵍⴰⵎⵉ ⵡⴰⵔ ⴷⵉⵏ ⵡⵉ ⵖⴰ ⵉⴼⴻⴽⴽⴻⵏ!
4 ⴰ ⵙⵉⴷⵉ, ⴰⵔⴻⴱⴱⵉ ⵉⵏⵓ,
ⵎⴰⵍⴰ ⵏⴻⵛⵛ ⴳⴳⵉⵖ ⵎⴰⵏ ⴰⵢⴰ,
ⵎⴰⵍⴰ ⴷⵉⵏ ⵛⴰ ⵏ ⵍⵖⴻⵛⵛ ⵉⵍⵚⴻⵇ
ⴷⴻⴳ ⵉⴼⴰⵙⵙⴻⵏ ⵉⵏⵓ, ◘7:4 ⴰⵢⵓⴱ 31:1-34; ⵉⵥⵀⴷ. 15:2-5
5 ⵎⴰⵍⴰ ⵏⴻⵛⵛ ⵅⴻⵍⴼⴻⵖ
ⵡⴻⵏⵏⵉ ⴰⴽⵉⴷⵉ ⵉⴷⴷⴰⵔⴻⵏ ⴷⵉ ⵍⴻⵀⵏⴰ ⵙ ⵍⵖⴰⵔ,
- ⵎⴰⵛⴰ ⵙ ⵍⵄⴻⴽⵙ ⵡⴻⵏⵏⵉ ⴷ ⴰⵢⵉ ⵉⵃⴻⵚⵚⴰⵔⴻⵏ ⵅ ⵡⴰⵍⵓ,
ⵊⵊⵉⵖ ⵜ ⴰⴷ ⵢⵓⵢⵓⵔ -
6 ⴻⵊⵊ ⵅⴻⵏⵏⵉ ⴰⴷ ⵢⴰⵥⵥⴻⵍ ⵍⴻⵄⴷⵓ ⵅ ⵍⴻⵄⵎⴰⵔ ⵉⵏⵓ,
ⴰⴷ ⴰⵢⵉ ⵉⵄⴷⵓ,
ⴰⴷ ⵉⵄⴼⴻⵙ ⵅ ⵜⵓⴷⴰⵔⵜ ⵉⵏⵓ ⴷⵉ ⵜⴻⵎⵎⵓⵔⵜ,
ⴻⵊⵊ ⵉ-ⵜ ⴰⴷ ⵉⵙⵙⴻⵣⴷⴻⵖ ⴰⵄⵓⴵⵉ ⵉⵏⵓ ⴷⵉ ⵜⵄⴻⵊⵊⴰⵊⵜ!
ⵙⵉⵍⴰⵀ.
7 ⴽⴽⴰⵔ-ⴷⴷ, ⴰ ⵙⵉⴷⵉ, ⴷⴻⴳ ⵡⴻⵖⴹⴰⴱ ⵏⵏⴻⵛ,
ⵙⵓⵄⵍⴰ ⵉⵅⴻⴼ ⵏⵏⴻⵛ ⵅ ⵓⴷⵓⵇⵇⴻⵣ
ⵏ ⵢⵉⵏⵏⵉ ⴷ ⴰⵢⵉ ⵉⵃⴻⵚⵚⴰⵔⴻⵏ,
ⴼⴰⵇ ⴷⵉ ⵟⵟⵡⴻⵄ ⵉⵏⵓ,
ⴰⵇⴰ ⵜⴻⴳⴳⵉⴷ ⵜⵓⵎⵓⵔⴻⴷ ⵍⵃⴻⵇⵇ.
8 ⴰⴳⵔⴰⵡ ⵏ ⵍⴻⴳⵏⵓⵙ ⴰⴷ ⴰⵛ ⴷⴷ-ⵉⵏⵏⴻⴹ,
ⵅⴻⵏⵏⵉ ⴷⵡⴻⵍ ⵜⵉⵡⴰ ⵏⵙⴻⵏ ⵖⴰⵔ ⵙⴻⵏⵏⴻⵊ.
9 ⵙⵉⴷⵉ ⴰⴷ ⵉⵃⴰⴽⴻⵎ ⵍⴻⴳⵏⵓⵙ.
ⴰⵖ ⴰⵢⵉ ⵜⴰⵙⵖⴰⵔⵜ, ⴰ ⵙⵉⴷⵉ,
ⵄⵍⴰⵃⵙⴰⴱ ⵜⴰⵙⴻⴳⴷⴰ ⵉⵏⵓ,
ⵄⵍⴰⵃⵙⴰⴱ ⵍⴻⴽⵎⴰⵔⴻⵜ ⵉ ⴷⴰⵢⵉ.
10 ⵙⴱⴻⴷⴷ ⵜⵓⵄⴻⴼⴼⵏⴰ ⵏ ⵉⵄⴻⴼⴼⴰⵏⴻⵏ,
ⵙⴻⵎⵜⴻⵏ ⴰⵎⵙⴻⴳⴳⴻⴷ,
ⵛⴻⴽ, ⵡⴻⵏⵏⵉ ⵉⵇⴻⴵⴱⴻⵏ ⵓⵍⴰⵡⴻⵏ ⴷ ⵜⵉⵥⵥⴰⵍ,
ⴰ ⴰⵔⴻⴱⴱⵉ ⵉⵙⴻⴳⴳⴷⴻⵏ! ◼7:10 ⵜⵉⵥⵥⴰⵍ-ⵏⵉⵖ ‘ⵜⵉⴳⴻⵥⵍⵉⵏ’. ◘7:10 1 ⵉⵎ. 28:9; ⵉⵔⵎ. 11:20; 17:10; 20:12; ⴰⵙⴰ. 2:23
11 ⵜⴰⵙⴻⴷⴷⴰⵔⵜ ⵉⵏⵓ ⵉ ⵓⵙⴻⵍⵇⵉ ⵖⴰⵔ ⴰⵔⴻⴱⴱⵉ,
ⴰⵎⵙⴻⵏⵊⴻⵎ ⵏ ⵉⵎⵙⴻⴳⴳⵎⴻⵏ ⵏ ⵡⵓⵍⴰⵡⴻⵏ.
12 ⴰⵔⴻⴱⴱⵉ ⴷ ⵉⵊⵊ ⵏ ⵍⵇⴰⴹⵉ ⵉⵙⴻⴳⴳⴷⴻⵏ,
ⴰⵔⴻⴱⴱⵉ ⵏⵏⵉ ⵉⵙⴻⵅⵅⴹⴻⵏ ⴽⵓⵍ ⴰⵙⵙ. ◘7:12 ⴰⵙⴰ. 16:
13 ⵎⴰⵍⴰ ⵏⴻⵜⵜⴰ ⵡⴰⵔ ⴷⴷ-ⵉⵄⵇⵉⴱ,
ⴰⴷ ⵉⵙⵙⴻⵇⴹⴻⵄ ⵏⴻⵜⵜⴰ ⵙⵙⵉⴼ ⵏⵏⴻⵙ,
ⴰⴷ ⵉⵎⵃⴻⴹ ⵍⵇⴻⵡⵙ ⵏⵏⴻⵙ
ⵓⵛⴰ ⴰⴷ ⵅⴰⵙ ⵉⵏⴻⵢⵢⴻⵛ.
14 ⵉⴳⴳⴰ ⵅⴰⵙ ⵍⴻⵙⵏⴰⵃ ⵉⵏⴻⵇⵇⴻⵏ,
ⴰⴷ ⵢⴰⵔⵔ ⴼⵍⵉⵜⵛⴰⵜ ⵏⵏⴻⵙ
ⴷ ⵉⵚⴻⴼⴹⴰⵡⴻⵏ ⵢⴰⵔⴻⵇⵇⴻⵏ.
15 ⵅⵣⴰⵔ, ⴰⵇⴰ ⵡⴹⴰⵏ-ⴷⴷ ⵅⴰⵙ
ⵍⴻⵡⵊⴻⵄ ⵏ ⵜⴰⵔⵓⵜ ⵏ ⵍⵎⵓⵄⵚⵉⵢⵢⴻⵜ,
ⵉⴽⵙⵉ ⴷⴷⴻⵢⵙⴻⵜ ⵏ ⵜⴰⵎⴰⵔⴰ
ⵓⵛⴰ ⴰⴷ ⵢⴰⵔⵓ ⵉⵅⴰⵔⵔⵉⵇⴻⵏ. ◘7:15 ⴰⵢⵓⴱ 15:35; ⵉⵛⴰ. 59:4
16 ⵉⵇⵇⴰⵣ ⵉⵊⵊ ⵏ ⵡⴻⵃⴼⵓⵔ ⵓⵛⴰ ⵉⵙⵙⵓⴵⴻⵖ ⵉ-ⵜ,
ⵎⴰⵛⴰ ⴷ ⵏⴻⵜⵜⴰ ⵙ ⵢⵉⵅⴻⴼ ⵏⵏⴻⵙ ⵉ ⵉⵡⴹⴰⵏ
ⴷⴻⴳ ⵡⴻⵃⴼⵓⵔ ⵏ ⵜⵓⵔⵚⵓⴹⵉ ⵉ ⵉⴳⴳⴰ. ◘7:16 ⴰⵢⵓⴱ 4:8; ⵉⵥⵀⴷ. 9:16; 10:2; ⴰⵡⵍⵏ. 5:22; 26:27; ⴰⵎⴱ. 10:8
17 ⵜⴰⵎⴰⵔⴰ ⵏⵏⴻⵙ ⴰⴷ ⴷⴷ-ⵜⴻⴷⵡⴻⵍ
ⵅ ⵓⵣⴻⴵⵉⴼ ⵏⵏⴻⵙ,
ⵍⴻⵅⵛⵓⵏⴻⵜ ⵏⵏⴻⵙ ⴰⴷ ⴷⴷ-ⵜⴻⵀⵡⴰ
ⵅ ⵓⵛⴻⵇⵇⵓⴼ ⵏⵏⴻⵙ.
18 ⴰⴷ ⵇⴰⴷⵉⵖ ⵙⵉⴷⵉ ⵄⵍⴰⵃⵙⴰⴱ ⵜⴰⵙⴻⴳⴷⴰ ⵏⵏⴻⵙ,
ⴰⴷ ⵣⴻⵀⵀⴷⴻⵖ ⵉ ⵢⵉⵙⴻⵎ ⵏ ⵙⵉⴷⵉ, ⴰⵎⵄⵓⴵⵉ ⵅ ⴽⵓⵍⵛⵉ.
◘7:4 7:4 ⴰⵢⵓⴱ 31:1-34; ⵉⵥⵀⴷ. 15:2-5
◼7:10 7:10 ⵜⵉⵥⵥⴰⵍ-ⵏⵉⵖ ‘ⵜⵉⴳⴻⵥⵍⵉⵏ’.
◘7:10 7:10 1 ⵉⵎ. 28:9; ⵉⵔⵎ. 11:20; 17:10; 20:12; ⴰⵙⴰ. 2:23
◘7:12 7:12 ⴰⵙⴰ. 16:
◘7:15 7:15 ⴰⵢⵓⴱ 15:35; ⵉⵛⴰ. 59:4
◘7:16 7:16 ⴰⵢⵓⴱ 4:8; ⵉⵥⵀⴷ. 9:16; 10:2; ⴰⵡⵍⵏ. 5:22; 26:27; ⴰⵎⴱ. 10:8