15
ⵍⵀⴰⵔⴷ ⵡⵉⵙⵙ ⵜⵏⴰⵢⴻⵏ ⵏ ⵉⵍⵉⴼⴰⵣ ⵅ ⵓⵄⴻⴼⴼⴰⵏ
1 ⵅⴻⵏⵏⵉ ⵢⴰⵔⵔⴰ-ⴷⴷ ⵉⵍⵉⴼⴰⵣ, ⵡⴻⵏⵏⵉ ⴷⴷ-ⵢⵓⵙⵉⵏ ⵣⵉ ⵜⴰⵢⵎⴰⵏ, ⵉⵏⵏⴰ:
2 ⵎⴰ ⵉⵜⵜⴰⵔⵔⴰ-ⴷⴷ ⵉⵊⵊ ⵏ ⵓⵎⵉⵖⵉⵙ ⵙ ⵜⵓⵙⵙⵏⴰ ⵉⵅⵡⴰⵏ?
ⵎⴰ ⴰⴷ ⵉⵛⵛⵓⵔ ⴰⵄⴻⴷⴷⵉⵙ ⵏⵏⴻⵙ ⵙ ⵓⵙⴻⵎⵎⵉⴹ
ⵉ ⴷⴷ-ⵉⵜⵜⴰⵙⴻⵏ ⵣⵉ ⵎⴰⵏⵉⵙ ⴷⴷ-ⵜⵏⴻⵇⵇⴰⵔ ⵜⴼⵓⵛⵜ?
3 ⵎⴰ ⵉⵜⵜⵛⴰⵔⵔⴰⵄ ⵙ ⵍⵀⴰⵔⴷ ⵡⴰⵔ ⵉⵏⴻⴼⴼⵄⴻⵏ,
ⵙ ⵡⴰⵡⴰⵍⴻⵏ ⵏⵏⵉ ⵡⴰⵔ ⵉⵜⵜⴰⴽⴽⵡⴰⴹⴻⵏ?
4 ⵛⴻⴽ ⵜⴰⵔⵥⵉⴷ ⵜⵉⴳⴳⵯⵓⴷⵉ ⵏ ⴰⵔⴻⴱⴱⵉ,
ⵜⴻⴽⴽⵙⴻⴷ ⵜⴰⵥⴰⴵⵉⵜ ⵣⵣⴰⵜ ⵉ ⵡⵓⴷⴻⵎ ⵏ ⴰⵔⴻⴱⴱⵉ.
5 ⵎⴰⵖⴰⵔ ⴰⵇⴻⵎⵎⵓⵎ ⵏⵏⴻⵛ ⵉⵙⵙⴰⵔⴳⴻⴱ
ⵍⵎⵓⵄⵚⵉⵢⵢⴻⵜ ⵏⵏⴻⵛ,
ⴰⵇⴰ ⵉⵜⵜⴻⵄⵊⵉⴱ ⴰⵛ ⵍⵀⴰⵔⴷ ⵙ ⵜⵃⵔⴰⵢⵎⴻⵛⵜ
ⵙ ⵢⵉⵍⴻⵙ ⵏⵏⴻⵛ.
6 ⴰⵇⴻⵎⵎⵓⵎ ⵏⵏⴻⵛ ⴰⴷ ⵛⴻⴽ ⵉⵃⴽⴻⵎ,
ⵡⴰⵔ ⵉⴵⵉ ⵏⴻⵛⵛ,
ⵉⵢⴻⵏⵛⵉⵛⴻⵏ ⵏⵏⴻⵛ ⴰⴷ ⵅⴰⴽ ⵛⴻⵀⴷⴻⵏ.
7 ⵎⴰ ⵛⴻⴽ ⴷ ⴱⵏⴰⴷⴻⵎ ⴷ ⴰⵎⴻⵣⵡⴰⵔⵓ
ⵏⵏⵉ ⴷⴷ-ⵉⵜⵜⵡⴰⵅⴻⵍⵇⴻⵏ?
ⵏⵉⵖ ⵜᵉⵜⵜⵡⴰⵔⵡⴻⴷ ⵇⴱⴻⵍ ⵜⵉⵡⵔⵉⵔⵉⵏ?
8 ⵎⴰ ⵜⴻⵙⵙⵃⴻⵙⵙⴻⴷ ⵉ ⵡⴻⴳⵔⴰⵡ
ⵏ ⵉⵎⵛⴰⵡⴰⵔⴻⵏ ⵉⵎⵜⵉⵇⵇⴰⵏ ⵏ ⴰⵔⴻⴱⴱⵉ,
ⵎⴰ ⵜⵊⴻⴱⴱⴷⴻⴷ ⵜⵉⵖⵉⵜ ⵖⴰⵔⴻⴽ? ◘15:8 ⵔⵓⵎ. 11:34
9 ⵎⵉⵏ ⵜⴻⵙⵙⵏⴻⴷ ⵛⴻⴽ, ⵏⴻⵛⵛⵉⵏ ⵡⴰⵔ ⵜ ⵏⴻⵙⵙⵉⵏ?
ⵎⵉⵏ ⵜⴼⴻⵀⵀⵎⴻⴷ ⵛⴻⴽ, ⴰⵇⴰ ⵉⵏⵇⴻⵚ ⵖⴰⵔⵏⴻⵖ?
10 ⵓⵍⴰ ⵊⴰⵔ ⴰⵏⴻⵖ ⴷ ⴰⵎⵛⴰⵢⴱⵓ ⴷ ⵓⵡⴻⵙⵙⴰⵔ,
ⵏⵉⵜⵏⵉ ⴷ ⵉⵎⵖⴰⵔⴻⵏ ⴷⴻⴳ ⵡⵓⵙⵙⴰⵏ ⵅ ⴱⴰⴱⴰⵛ. ◘15:10 ⴰⵢⵓⴱ 32:7
11 ⵎⴰ ⴰⵙⴼⴻⵡⵡⴻⵊ ⵏ ⴰⵔⴻⴱⴱⵉ ⴷⵔⵓⵙ ⵖⴰⵔⴻⴽ,
ⵏⵉⵖ ⵉⵊⵊ ⵏ ⵡⴰⵡⴰⵍ ⵙⵙⵉⵡⵍⴻⵏ ⵜ ⴰⴽⵉⴷⴻⴽ ⵙ ⵜⴻⵔⵖⴻⵖ?
12 ⵎⴰⵢⴻⵎⵎⵉ ⵛⴻⴽ ⵉⵙⵙⴻⵜⵍⴰⵄ ⵡⵓⵍ ⵏⵏⴻⵛ,
ⵎⴰⵢⴻⵎⵎⵉ ⵇⴻⴵⵄⴻⵏⵜ ⵜⵉⵟⵟⴰⵡⵉⵏ ⵏⵏⴻⵛ,
13 ⴰⵇⴰ ⵜⴻⵙⵙⵏⴻⵇⵍⴰⴱⴻⴷ ⴱⵓⵃⴱⴻⵍ ⵏⵏⴻⵛ ⵅ ⴰⵔⴻⴱⴱⵉ,
ⴰⵍⴰⵎⵉ ⵜⴻⵙⵙⵓⴼⴼⵓⵖⴻⴷ ⵎⴰⵔⵔⴰ ⴰⵡⴰⵍⴻⵏ ⵏⵏⵉ
ⵣⴻⴳ ⵓⵇⴻⵎⵎⵓⵎ ⵏⵏⴻⵛ?
14 ⵎⵉⵏ ⵉⵄⵏⴰ ⴱⵏⴰⴷⴻⵎ ⴰⵇⴰ ⵏⴻⵜⵜⴰ ⴰⴷ ⵢⵉⵍⵉ ⴷ ⴰⵎⴻⵣⴷⴰⴳ,
ⵎⵉⵏ ⵉⵄⵏⴰ ⵡⴻⵏⵏⵉ ⴷⴷ-ⵉⵜⵜⵡⴰⵅⴻⵍⵇⴻⵏ ⵣⵉ ⵜⴻⵎⵖⴰⵔⵜ,
ⴰⵇⴰ ⵏⴻⵜⵜⴰ ⴰⴷ ⵢⵉⵍⵉ ⴷ ⴰⵎⵙⴻⴳⴳⴻⴷ? ◘15:14 1 ⵉⵊ. 8:46; 2 ⵉⵎ. 6:36; ⴰⵢⵓⴱ 14:4; ⵉⵥⵀⴷ. 14:3; ⴰⵡⵍⵏ. 20:9; ⴰⵎⴱ. 7:20; 1 ⵢⵃ. 1:8, 10
15 ⵅⵣⴰⵔ, ⵉⵎⵇⴻⴷⴷⴰⵙⴻⵏ ⵏⵏⴻⵙ ⵡⴰⵔ ⵅⴰⵙⴻⵏ ⵉⵜⵜⵛⵉⵍ,
ⵓⵍⴰ ⴷ ⵉⵊⴻⵏⵡⴰⵏ ⵡⴰⵔ ⴵⵉⵏ ⵚⴼⴰⵏ ⴷⵉ ⵜⵉⵟⵟⴰⵡⵉⵏ ⵏⵏⴻⵙ! ◘15:15 ⴰⵢⵓⴱ 4:18; 25:5
16 ⴰⵀⵜⴰⵜ ⵄⴰⴷ ⵉⵊⵊ ⵏ ⵏⵏⵄⵉ ⵏ ⴱⵏⴰⴷⴻⵎ
ⴷ ⴱⵓ-ⵓⴼⴻⵙⵙⴰⴷ,
ⵡⴻⵏⵏⵉ ⵉⵙⴻⵙⵙⴻⵏ ⵎⵉⵏ ⵡⴰⵔ ⵉⵃⵍⵉⵏ ⴰⵎ ⵡⴰⵎⴰⵏ!
17 ⵏⴻⵛⵛ ⵅⵙⴻⵖ ⴰⴷ ⴰⵛ ⵜ ⵙⵙⴻⵛⵏⴻⵖ, ⵙⴻⵍ-ⴷⴷ ⵖⴰⵔⵉ,
ⵅⴻⵏⵏⵉ ⴰⴷ ⵄⴰⵡⴷⴻⵖ ⵎⵉⵏ ⵥⵔⵉⵖ,
18 ⵎⵉⵏ ⵄⴰⵡⴷⴻⵏ ⵉⵎⵉⵖⵉⵙⴻⵏ,
ⴰⵎ ⵡⴰⵔ ⴼⴼⴰⵔⴻⵏ ⵛⴰ ⵏ ⵍⴻⵊⴷⵓⴷ ⵏⵙⴻⵏ.
19 ⵉ ⵏⵉⵜⵏⵉ ⵡⴰⵀⴰ ⵓⵎⵉ ⵜⴻⵎⵎⴻⵡⵛ ⵜⴻⵎⵎⵓⵔⵜ,
ⵓⵍⴰ ⴷ ⵉⵊⵊ ⵏ ⵍⴱⴰⵔⵔⴰⵏⵉ ⵡⴰⵔ ⵅⴰⵙ ⵉⵄⴷⵓ.
20 ⵎⴰⵔⵔⴰ ⵓⵙⵙⴰⵏ ⵉ ⵉⴷⴷⴰⵔ ⵓⵄⴻⴼⴼⴰⵏ,
ⵉⵎⴰⵔⵔⴻⵜ ⵉⵅⴻⴼ ⵏⵏⴻⵙ,
ⵍⵇⴻⴷⴷ ⵏ ⵉⵙⴻⴳⴳⵯⵓⵙⴰ
ⵉ ⵉⵜⵜⵡⴰⵅⴻⵎⵎⵍⴻⵏ ⵉ ⴱⵓ-ⵍⴻⵅⵛⵓⵏⴻⵜ,
ⴰⵇⴰ ⵉⵏⵓⴼⴼⴰⵔ ⵅⴰⵙ.
21 ⵢⵓⴷⴻⴼ-ⴷⴷ ⵍⵃⴻⵙⵙ ⵏ ⵉⵖⵓⵢⵢⴰⵏ ⵉⵙⵙⵏⴻⵅⵍⴰⵄⴻⵏ
ⵖⴰⵔ ⵉⵎⴻⵣⵣⵓⵖⴻⵏ ⵏⵏⴻⵙ.
ⵄⴰⴷ ⴷⵉ ⵍⵡⴻⵇⵜ ⵏ ⵍⴻⵀⵏⴰ ⴰⴷ ⵅⴰⵙ ⵉⵡⴹⴰ ⵓⵎⵜⴻⵃⵃⴰⵢ. ◘15:21 1 ⵜⵙ. 5:3
22 ⵏⴻⵜⵜⴰ ⵡⴰⵔ ⵉⵜⵜⵔⵉⵊⵉ ⴰⴷ ⴷⴷ-ⵉⵄⵇⴻⴱ ⵣⵉ ⵜⴰⴵⴻⵙⵜ,
ⵎⴰⵛⴰ ⴰⵇⴰ ⵏⴻⵜⵜⴰ ⵉⵜⵜⵡⴰⴳⴳ ⵉ ⵙⵙⵉⴼ.
23 ⵏⴻⵜⵜⴰ ⵉⵜⵜⴻⵎⵀⴰⴼⴰ ⴷⴰ ⴷ ⴷⵉⵀⴰ ⵅ ⵡⴻⵖⵔⵓⵎ.
‘ⴰ, ⵎⴰⵏⵉ ⵉ ⵢⴻⴵⴰ?’
ⵏⴻⵜⵜⴰ ⵉⵙⵙⴻⵏ ⴰⵇⴰ ⵉⵜⵜⵔⴰⵊⴰ ⵉ-ⵜ
ⵡⴰⵙⵙ ⴷ ⴰⴱⴰⵔⵛⴰⵏ ⴷⴻⵖⵢⴰ. ◘15:23 ⴰⵢⵓⴱ 18:12; ⵉⵥⵀⴷ. 109:10
24 ⴹⴹⵉⵇⴻⵜ ⴷ ⵍⴻⵃⵚⴰⵔⴻⵜ ⵙⵙⴰⴳⴳⵯⴰⴷⴻⵏⵜ ⵏⴻⵜⵜⴰ,
ⴰⵔⵏⵉⵏⵜ ⵉ-ⵜ ⴰⵎ ⵢⵉⵊⵊ ⵏ ⵓⵊⴻⴵⵉⴷ
ⵉⵡⵊⴻⴷ ⵉ ⵓⵎⴻⵏⵖⵉ.
25 ⵎⴰⵖⴰⵔ ⵖⴰⵔ ⴰⵔⴻⴱⴱⵉ
ⵉⵙⵙⵡⵉⵥⵥⴰⴹ ⵏⴻⵜⵜⴰ ⴰⴼⵓⵙ ⵏⵏⴻⵙ,
ⴰⴽ-ⴷ ⵓⵎⵣⴻⵎⵎⴰⵔ ⵅ ⴽⵓⵍⵛⵉ
ⵉⵎⴻⵏⵏⴻⵄ ⵜⴰⵖⴻⵏⵏⴰⵏⵜ ⵜⴰⵎⴻⵇⵇⵔⴰⵏⵜ. ◘15:25 ⴰⵙⴰ. 13:5
26 ⵙ ⵢⵉⵔⵉ ⵉⵎⴻⵃⴹⴻⵏ ⵉⵜⵜⴰⵣⵣⴻⵍ ⵖⴰⵔⴻⵙ,
ⵉⵏⵏⵓⴼⵔⴰⵔ ⵖⴰⵔ ⴹⴻⴼⴼⴰⵔ
ⵏ ⵜⵙⴻⴷⴷⴰⵔⵉⵢⵉⵏ ⵏⵙⴻⵏ ⵏ ⵓⵄⴻⵙⴽⴰⵔⵉ
ⵙ ⵉⴱⵓⵟⵓⵏⴻⵏ ⵉⴳⴷⴰⵔⴻⵏ.
27 ⵎⴰⵖⴰⵔ ⵉⵍⴻⵃⵃⴻⴼ ⵉ ⵓⵖⴻⵎⴱⵓⴱ ⵏⵏⴻⵙ ⵙ ⵜⴰⴷⵓⵏⵜ,
ⵉⴳⴳⴰ ⵜⴰⴷⵓⵏⵜ ⵉ ⵜⴻⵊⵄⵉⵏⵏⴰ ⵏⵏⴻⵙ.
28 ⵉⵣⴻⴷⴷⴻⵖ ⴷⵉ ⵜⵏⴻⴷⴷⴰⵎ ⵉⵜⵜⵡⴰⵀⴻⴷⵎⴻⵏ,
ⴷⵉ ⵜⵓⴷⵔⵉⵏ ⵡⴰⵔ ⴷⴰⵢⵙⴻⵏⵜ ⵉⵣⴻⴷⴷⴻⵖ
ⵄⴰⴷ ⵓⵍⴰ ⴷ ⵉⵊⵊ,
ⵜⵉⵏⵏⵉ ⵢⵓⵔⴰⵏ ⵎⴰⵃⴻⵏⴷ ⴰⴷ ⴷⴻⵡⵍⴻⵏⵜ ⴷ ⵍⵅⵉⵔⴱⴰⵜ.
29 ⵏⴻⵜⵜⴰ ⵡⴰⵔ ⵉⴷⴷⵉⴽⴽⵡⵉⵍ ⴷ ⴱⵓ-ⵡⴰⴳⵍⴰ,
ⴰⴳⵍⴰ ⵏⵏⴻⵙ ⵡⴰⵔ ⵉⵜⵜⵖⵉⵎⵉ,
ⵎⴰⵍⴰ ⵎⵉⵏ ⴷⴷ-ⵉⴽⵙⴻⴱ
ⵡⴰⵔ ⵢⴰⵔⴻⵏⵏⵉ ⵅ ⵜⴻⵎⵎⵓⵔⵜ.
30 ⵏⴻⵜⵜⴰ ⵡⴰⵔ ⵉⵏⴻⵊⵊⴻⵎ ⵉ ⵜⴰⴵⴻⵙⵜ,
ⴰⵛⴻⵄⵄⴰⵍ ⵏ ⵜⵎⴻⵙⵙⵉ ⴰⴷ ⵢⴻⵛⵛ ⵍⴻⴼⵔⵓⵄ ⵏⵏⴻⵙ,
ⴰⴷ ⵉⴼⵏⴰ ⵙ ⵍⴻⵄⵡⵉⵏ ⵏ ⵓⵇⴻⵎⵎⵓⵎ ⵏⵏⴻⵙ.
31 ⴻⵊⵊ ⵉ-ⵜ ⵡⴰⵔ ⵉⵜⵜⵛⵉⵍⵉ ⵅ ⵍⵖⴻⵛⵛ,
ⵎⴰⵖⴰⵔ ⵅⴻⵏⵏⵉ ⵉ ⵖⴰ ⵜⵉⵍⵉ
ⵓⵍⴰ ⴷ ⵍⵎⵓⵏⴻⵜ ⵏⵏⴻⵙ ⴷ ⵍⵖⴻⵛⵛ.
32 ⵎⴰⵍⴰ ⵡⴰⵔ ⴷⴷ-ⵢⵓⵙⵉ ⵄⴰⴷ ⵡⴰⵙⵙ ⵏⵏⴻⵙ,
ⴰⴷ ⵉⵜⵜⵡⴰⴽⴻⵎⵎⴻⵍ ⵄⴰⴷ,
ⵎⴰⵖⴰⵔ ⵜⴰⵙⴻⵟⵟⴰ ⵏ ⵜⵉⵏⵉ ⵏⵏⴻⵙ ⵡⴰⵔ ⵜⵣⴻⵢⵣⵉⵡ. ◘15:32 ⴰⵢⵓⴱ 22:16; ⵉⵥⵀⴷ. 55:24
33 ⴰⴷ ⵉⵙⵙⴻⵖⴹⴻⵍ ⴰⴹⵉⵍ ⵡⴰⵔ ⵉⵙⵙⵏⴻⴷⵢⴻⵏ ⵏⵏⴻⵙ
ⴰⵎ ⵢⵉⵛⵜ ⵏ ⵜⵣⴰⵢⴰⵔⵜ,
ⴰⴷ ⵉⵎⵎⴻⵏⴹⴰⵔ ⵏⵏⵓⵡⴰⵔ ⵏⵏⴻⵙ ⴰⵎ ⵜⵣⵉⵜⵓⵏⵜ.
34 ⵎⴰⵖⴰⵔ ⴰⴱⴰⵔⵔⵓ ⵏ ⵉⵎⵏⴰⴼⵇⴻⵏ
ⴰⵇⴰ-ⵜ ⴱⵍⴰ ⵍⵖⵉⴵⴻⵜ
ⵓ ⵜⵉⵎⴻⵙⵙⵉ ⵜᵉⵜⵜⴻⵜⵜ ⵉⵇⵉⴹⴰⵏ ⵉ ⵉⵛⵛⵓⵔⴻⵏ ⵙ ⵍⵖⴻⵛⵛ. ◼15:34 ⴰⵎⵏⴰⴼⴻⵇ-ⴱⵏⴰⴷⴻⵎ ⵏⵏⵉ ⵉⵜⵜⴻⴳⴳⴻⵏ ⵙ ⵜⵏⴰⵢⴻⵏ ⵏ ⵡⵓⴷⵎⴰⵡⴻⵏ.
35 ⴰⵇⴰ ⴰⵜⴻⵏ ⵙ ⴷⴷⴻⵢⵙⴻⵜ ⵣⵉ ⵜⴰⵎⴰⵔⴰ,
ⵜⵜⵓⵔⵡⴻⵏ ⵍⵖⴻⵛⵛ,
ⵍⴻⵅⴷⴻⵄ ⴰⵇⴰ-ⵜ ⴷⴻⴳ ⵓⵄⴻⴷⴷⵉⵙ ⵏⵙⴻⵏ. ◘15:35 ⵉⵥⵀⴷ. 7:15; ⵉⵛⴰ. 59:4; ⵃⵓⵛ. 10:13
◘15:8 15:8 ⵔⵓⵎ. 11:34
◘15:14 15:14 1 ⵉⵊ. 8:46; 2 ⵉⵎ. 6:36; ⴰⵢⵓⴱ 14:4; ⵉⵥⵀⴷ. 14:3; ⴰⵡⵍⵏ. 20:9; ⴰⵎⴱ. 7:20; 1 ⵢⵃ. 1:8, 10
◘15:23 15:23 ⴰⵢⵓⴱ 18:12; ⵉⵥⵀⴷ. 109:10
◘15:32 15:32 ⴰⵢⵓⴱ 22:16; ⵉⵥⵀⴷ. 55:24
◼15:34 15:34 ⴰⵎⵏⴰⴼⴻⵇ-ⴱⵏⴰⴷⴻⵎ ⵏⵏⵉ ⵉⵜⵜⴻⴳⴳⴻⵏ ⵙ ⵜⵏⴰⵢⴻⵏ ⵏ ⵡⵓⴷⵎⴰⵡⴻⵏ.
◘15:35 15:35 ⵉⵥⵀⴷ. 7:15; ⵉⵛⴰ. 59:4; ⵃⵓⵛ. 10:13