1 ⵡⴻⵏⵏⵉ ⵜⵓⵖⴰ ⴷⵉⵏ ⵣⴻⴳ ⵓⵎⴻⵣⵡⴰⵔⵓ, ⴷ ⵏⴻⵜⵜⴰ ⵉ ⴷ ⴰⵡⴻⵎ ⵏⴻⵜⵜⴱⴰⵔⵔⴻⵃ: ⵡⴻⵏⵏⵉ ⵏⴻⵙⵍⴰ ⴷ ⵡⴻⵏⵏⵉ ⵏⴻⵥⵔⴰ ⵙ ⵜⵉⵟⵟⴰⵡⵉⵏ ⵏⵏⴻⵖ, ⴷ ⵡⴻⵏⵏⵉ ⵏⴻⵜⵡⴰⵍⴰ ⵓ ⵏⵃⴰⴷⴰ ⵜ ⵙ ⵉⴼⴰⵙⵙⴻⵏ ⵏⵏⴻⵖ ⴷ ⵡⴻⵏⵏⵉ ⵉⴵⴰⵏ ⴷ ⴰⵡⴰⵍ ⵉⴷⴷⴰⵔⴻⵏ. ◘1:1 ⵍⴽ. 24:39; ⵢⵃ. 20:27; ⵢⵃ. 1:1, 14; ⵍⴻⵅ. 13:26; 2 ⴱⵟ. 1:16. 2 ⴰⵇⴰ ⵜⵓⴷⴰⵔⵜ ⵜⴻⴹⵀⴰⵔ-ⴷⴷ, ⵏⴻⵛⵛⵉⵏ ⵏⴻⵥⵔⴰ ⵉ-ⵜⵜ, ⵓⵛⴰ ⵏⵛⴻⵀⵀⴻⴷ ⵓ ⵏⴻⵜⵜⴱⴰⵔⵔⴻⵃ ⴰⵡⴻⵎ ⵜⵓⴷⴰⵔⵜ ⵉⵜⵜⴷⵓⵎⴰⵏ, ⵜⴻⵏⵏⵉ ⵜⵓⵖⴰ ⴰⴽ-ⴷ ⴱⴰⴱⴰⵜⵏⴻⵖ ⵓⵛⴰ ⵜᵉⵜⵜⵡⴰⵙⵙⴰⵔⴳⴻⴱ-ⴷⴷ ⵉ ⵏⴻⵛⵛⵉⵏ. 3 ⵎⵉⵏ ⵏⴻⵥⵔⴰ ⴷ ⵎⵉⵏ ⵏⴻⵙⵍⴰ, ⴰⴷ ⴰⵡⴻⵎ ⵜ-ⵉ-ⴷⴷ-ⵏⴻⵙⵙⵛⴻⵏ, ⵃⵉⵎⴰ ⵄⴰⵡⴻⴷ ⴽⴻⵏⵏⵉⵡ ⴰⴷ ⵜⵉⵍⵉⵎ ⴷⴻⴳ ⵓⵎⵓⵏⵉ ⴰⴽⵉⴷⵏⴻⵖ, ⵓⵛⴰ ⴰⵎⵓⵏⵉ ⵏⵏⴻⵖ ⴰⴽ-ⴷ ⴱⴰⴱⴰⵜⵏⴻⵖ ⵓ ⴰⴽ-ⴷ ⵎⵎⵉⵙ ⵢⴰⵙⵓⵄ ⵍⵎⴰⵙⵉⵃ. 4 ⴰⵇⴰ ⵏⴻⵜⵜⴰⵔⵉ ⵎⴰⵏ ⴰⵢⴰ ⵉ ⴽⴻⵏⵏⵉⵡ, ⵃⵉⵎⴰ ⵍⴻⴼⵔⴰⵃⴻⵜ ⵏⵏⴻⵖ ⴰⴷ ⵜⵉⵍⵉ ⵜⴻⴽⵎⴻⵍ.

5 ⴷ ⵡⴰ ⴷ ⵍⴻⵅⴱⴰⵔ ⴰⵚⴻⴱⵃⴰⵏ ⵉ ⵣⵣⴰⵢⴻⵙ ⵏⴻⵙⵍⴰ ⵓⵛⴰ ⴰⴷ ⴰⵡⴻⵎ ⵏⴱⴰⵔⵔⴻⵃ: ⴰⵔⴻⴱⴱⵉ ⴷ ⵜⴰⴼⴰⵡⵜ, ⵏⴻⵜⵜⴰ ⵡⴰⵔ ⴷⴰⵢⴻⵙ ⴱⵓ ⵊⵊⵓⵔⵔⴻⵜ ⵏ ⵜⴰⴵⴻⵙⵜ. ◘1:5 ⵢⵃ. 1:9; 8:12; 9:5; 12:35, 36. 6 ⵎⴰⵍⴰ ⵏⴻⵇⵇⴰⵔ, ⴰⵇⴰ ⵖⴰⵔⵏⴻⵖ ⴰⵎⵓⵏⵉ ⴰⴽⵉⴷⴻⵙ, ⵓⵛⴰ ⵏⴻⴳⴳⵓⵔ ⴷⵉ ⵜⴰⴵⴻⵙⵜ, ⴰⵇⴰ ⵏⴻⵙⵙⵅⴰⵔⵔⵉⵇ, ⵡⴰⵔ ⵏⴹⴻⴼⴼⴰⵔ ⵛⴰ ⵜⵉⴷⴻⵜⵜ. 7 ⵎⴰⵛⴰ ⵎⴰⵍⴰ ⵏⵓⵢⵓⵔ ⴷⵉ ⵜⴼⴰⵡⵜ, ⴰⵎ ⵏⴻⵜⵜⴰ ⴷⵉ ⵜⴼⴰⵡⵜ, ⵖⴰⵔⵏⴻⵖ ⴰⵎⵓⵏⵉ ⴰⴽ-ⴷ ⵡⴰⵢⴰⵡⵢⴰ, ⵓⵛⴰ ⴰⴷ ⵜⴰⴼ ⵉⴷⴰⵎⵎⴻⵏ ⵏ ⵢⴰⵙⵓⵄ, ⵎⵎⵉⵙ, ⴰⴷ ⴰⵏⴻⵖ ⵙⵙⵉⵣⴷⴻⴳⴻⵏ ⵣⵉ ⵎⴰⵔⵔⴰ ⴷⴷⵏⵓⴱ ⵏⵏⴻⵖ. ◘1:7 ⵄⴱⵔ. 9:14; 1 ⴱⵟ. 1:19; ⴰⵙⴰ. 1:5.

8 ⵎⴰⵍⴰ ⵏⴻⵇⵇⴰⵔ, ⵡⴰⵔ ⴷⴰⵢⵏⴻⵖ ⴱⵓ ⴷⴷⵏⵓⴱ, ⴰⵇⴰ ⵏⴻⵙⵙⵅⴰⵔⵔⵉⵇ ⵅ ⵢⵉⵅⴻⴼ ⵏⵏⴻⵖ ⵓⵛⴰ ⵜⵉⴷⴻⵜⵜ ⵡⴰⵔ ⴷⴰⵢⵏⴻⵖ ⵜⴻⴵⵉ. ◘1:8 1 ⵉⵊ. 8:46; 2 ⵉⵎ. 6:36; ⴰⵢⵓⴱ 9:2; ⵉⵥⵀⴷ. 143:2; ⴰⵡⵍⵏ. 20:9; ⴰⵎⴱ. 7:20. 9 ⵎⴰⵛⴰ ⵎⴰⵍⴰ ⵏⴻⵏⵄⴻⵎ ⵙ ⴷⴷⵏⵓⴱ ⵏⵏⴻⵖ, ⴰⵇⴰ ⵏⴻⵜⵜⴰ ⴷ ⴰⵎⵜⵉⵇⵇⵉ ⴷ ⴰⵎⵙⴻⴳⴳⴰⴷ ⵃⵉⵎⴰ ⴰⴷ ⴰⵏⴻⵖ ⵉⵖⴼⴰⵔ ⴷⴷⵏⵓⴱ ⵏⵏⴻⵖ ⵓⵛⴰ ⴰⴷ ⴰⵏⴻⵖ ⵉⵙⵙⵉⵣⴷⴻⴳ ⵣⵉ ⵎⴰⵔⵔⴰ ⵎⵉⵏ ⵡⴰⵔ ⵉⵙⴻⴳⴳⴷⴻⵏ. ◘1:9 ⵉⵥⵀⴷ. 32:5; ⴰⵡⵍⵏ. 28:13. 10 ⵎⴰⵍⴰ ⵏⴻⵇⵇⴰⵔ: ‘ⵏⴻⵛⵛⵉⵏ ⵡⴰⵔ ⴷⴰⵢⵏⴻⵖ ⴱⵓ ⴷⴷⵏⵓⴱ!’, ⵏⴻⵜⵜⴰⵔⵔⴰ ⵉ-ⵜ ⴷ ⴱⵓ-ⵉⵅⴰⵔⵔⵉⵇⴻⵏ ⵓⵛⴰ ⴰⵡⴰⵍ ⵏⵏⴻⵙ ⵡⴰⵔ ⴷⴰⵢⵏⴻⵖ ⵉⴵⵉ.