9
ⵜⴰⵎⵡⴰⵔⵔⵉⵜ ⵏ ⴰⵢⵓⴱ ⵅ ⴱⵉⵍⴷⴰⴷ
1 ⵢⴰⵔⵔⴰ-ⴷⴷ ⴰⵢⵓⴱ, ⵉⵏⵏⴰ:
2 ⵙⵙⵏⴻⵖ ⵏⵉⵛⴰⵏ, ⴰⵇⴰ ⴰⵎⵎⵓ ⵉ ⵜⴻⴵⴰ,
ⵎⴰⵖⴰⵔ ⵎⴰⵎⵎⴻⵛ ⵖⴰ ⵢⵉⵍⵉ ⴱⵏⴰⴷⴻⵎ
ⴷ ⴰⵎⵙⴻⴳⴳⴻⴷ ⵖⴰⵔ ⴰⵔⴻⴱⴱⵉ? ◘9:2 ⵉⵥⵀⴷ. 143:2
3 ⵎⴰⵍⴰ ⵏⴻⵜⵜⴰ ⵉⵅⵙ ⴰⴽⵉⴷⴻⵙ ⵉⵎⵛⴰⵔⵔⴻⵄ,
ⵉⵍⵉ ⵏⴻⵜⵜⴰ ⵡⴰⵔ ⵉⵣⴻⵎⵎⴰⵔ ⴰⴷ ⵅⴰⵙ ⴷⴷ-ⵢⴰⵔⵔ
ⵓⵍⴰ ⴷ ⵉⵛⵜ ⵏ ⵜⵡⴰⵍⴰ ⵅ ⵡⴰⵍⴻⴼ ⵏ ⵜⵡⴰⵍⴰⵡⵉⵏ.
4 ⵏⴻⵜⵜⴰ ⴷ ⴰⵎⵉⵖⵉⵙ ⵏ ⵡⵓⵍ
ⴷ ⴱⵓ-ⵜⵣⴻⵎⵎⴰⵔ ⵉⵊⴻⵀⴷⴻⵏ,
ⵎⴰⵏ ⵡⴻⵏ ⵉⵣⴻⵎⵎⴰⵔⴻⵏ
ⴰⴷ ⵉⵙⵙⴻⵇⵙⴻⵃ ⵉⵅⴻⴼ ⵏⵏⴻⵙ ⴹⵉⴷⴷ ⵏⵏⴻⵙ
ⵓⵛⴰ ⴰⴷ ⵉⵇⵇⵉⵎ ⵉⴷⴷⴰⵔ ⴷⵉ ⵍⴰⵎⴰⵏ?
5 ⵏⴻⵜⵜⴰ ⴷ ⵡⴻⵏⵏⵉ ⵉⵙⵙⵎⵓⵟⵟⵓⵢⴻⵏ ⵉⴷⵓⵔⴰⵔ
ⴰⵎ ⵡⴰⵔ ⵜⵜ ⵜⵜⵉⵛⵉⵏ ⵉⵡⴷⴰⵏ,
ⴷ ⵡⴻⵏⵏⵉ ⵜⴻⵏ ⵉⵙⵙⵏⴻⵇⵍⴰⴱⴻⵏ
ⴷⴻⴳ ⵡⴻⵖⴹⴰⴱ ⵏⵏⴻⵙ,
6 ⵏⴻⵜⵜⴰ ⴷ ⵡⴻⵏⵏⵉ ⵉⵙⵙⴻⵏⵀⴻⵣⵣⴰⵏ ⵜⴰⵎⵎⵓⵔⵜ
ⵣⴻⴳ ⵡⴻⵎⵛⴰⵏ ⵏⵏⴻⵙ,
ⴷ ⵡⴻⵏⵏⵉ ⵉⴳⴳⵉⵏ ⵉⴱⵉⵍⴰⵔⴻⵏ ⵏⵏⴻⵙ ⴰⴷ ⴰⵔⵊⵉⵊⴻⵏ,
7 ⵏⴻⵜⵜⴰ ⴷ ⵡⴻⵏⵏⵉ ⵉⵜⵜⴰⵎⴰⵔⴻⵏ ⵜⴰⴼⵓⵛⵜ
ⴰⵍⴰⵎⵉ ⵡⴰⵔ ⴷⴷ-ⵜⴻⵏⵇⵉⵔ,
ⴷ ⵡⴻⵏⵏⵉ ⵉⵜⵜⵛⴻⵎⵎⴰⵄⴻⵏ ⵉⵜⵔⴰⵏ!
8 ⵏⴻⵜⵜⴰ ⵙ ⵢⵉⵅⴻⴼ ⵏⵏⴻⵙ ⵡⴰⵀⴰ
ⵉⵜⵜⴱⴻⵣⵣⴰⵄ ⵉⵊⴻⵏⵡⴰⵏ,
ⵏⴻⵜⵜⴰ ⵉⵚⵓⵔⵔⵓⴼ ⵜⵉⵡⴰ
ⵏ ⵜⵄⵓⵔⴰⵔ ⵏ ⵍⴻⵎⵡⴰⵊ ⵏ ⵡⴰⵎⴰⵏ. ◘9:8 ⴰⵎⵥ. 1:6
9 ⵏⴻⵜⵜⴰ ⴷ ⵡⴻⵏⵏⵉ ⵉⴳⴳⵉⵏ ⴰⵡⵔⴰⴼ ⵏ ⵉⵜⵔⴰⵏ
ⵏ ⴷⴷⵓⴱ ⴰⵎⴻⵇⵇⵔⴰⵏ ⴷ ⵓⵔⵢⵓⵏ,
ⴰⴳⵔⴰⵡ ⵏ ⵙⴻⴱⵄⴰ ⵏ ⵉⵜⵔⴰⵏ
ⴷ ⵉⵅⴰⵎⵎⴻⵏ ⵏ ⵍⵊⴰⵏⵓⴱ,
10 ⵏⴻⵜⵜⴰ ⴷ ⵡⴻⵏⵏⵉ ⵉⴳⴳⵉⵏ
ⵜⵉⵎⴻⵙⵍⴰⵢⵉⵏ ⵜⵉⵎⴻⵇⵇⵔⴰⵏⵉⵏ,
- ⵡⴰⵔ ⵉⵣⴻⵎⵎⴰⵔ ⴱⵏⴰⴷⴻⵎ ⴰⴷ ⵜⴻⵏⵜ ⵉⴼⵀⴻⵎ -
ⵓⵍⴰ ⴷ ⵍⴻⵄⵊⴰⵢⴻⴱ ⴱⵍⴰ ⵍⴻⵃⵙⴰⴱ. ◘9:10 ⴰⵢⵓⴱ 5:9; ⵉⵥⵀⴷ. 72:18; 77:15; 86:10; ⵔⵓⵎ. 11:33
11 ⵅⵣⴰⵔ, ⵏⴻⵜⵜⴰ ⵉⵄⴻⴷⴷⵓ ⵅⴰⴼⵉ, ⵡⴰⵔ ⵜ ⵥⴰⵔⵔⴻⵖ,
ⵉⵥⴻⴽⴽⵡⴰ, ⵏⴻⵛⵛ ⵡⴰⵔ ⴽⵉⴷⴻⵙ ⵜⵜⴰⵛⵉⵖ.
12 ⵅⵣⴰⵔ, ⵎⴰⵍⴰ ⵉⵅⴹⴻⴼ ⵏⴻⵜⵜⴰ,
ⵎⴰⵏ ⵡⴻⵏ ⵉ ⵜ ⵖⴰ ⵉⵎⴻⵏⵄⴻⵏ?
ⵎⴰⵏ ⵡⴻⵏ ⵉⵣⴻⵎⵎⴰⵔⴻⵏ ⴰⴷ ⴰⵙ ⵢⵉⵏⵉ:
‘ⵎⵉⵏ ⴷⵉⵏ ⵜᵉⵜⵜⴻⴳⴳⴻⴷ ⵛⴻⴽ?’
13 ⴰⵔⴻⴱⴱⵉ ⵡⴰⵔ ⵉⵜⵜⴰⵔⵔⵉ ⴰⵖⴹⴰⴱ ⵏⵏⴻⵙ
ⴰⴷ ⴷⴷ-ⵉⴷⵡⴻⵍ,
ⵙⴰⴷⵓ ⵏⵏⴻⵙ ⵓⴹⴰⵔⴻⵏ ⵉⵎⵄⴰⵡⴰⵏⴻⵏ ⵏ ‘ⵔⴰⵀⴰⴱ’. ◼9:13 ⵔⴰⵀⴰⴱ-ⵉⵅⵙ ⴰⴷ ⵢⵉⵏⵉ: ‘ⵡⴻⵏⵏⵉ ⵉⵙⵙⴰⴳⴳⵯⴰⴷⴻⵏ’. ‘ⵔⴰⵀⴰⴱ’ ⴷ ⵉⵙⴻⵎ ⵏ ⵍⵀⴰⵢⵛⴻⵜ. ⵍⵀⴰⵢⵛⴻⵜ-ⴰ ⴰⵇⴰ-ⵜⵜ ⴷ ⵜⴰⵎⵎⵓⵔⵜ ⵏ ⵎⵉⵚⵔⴰ, ⵜⴻⵏⵏⵉ ⴰⵎ ⵍⴻⵃⵡⴻⵛ ⴷⵉ ⵍⴻⴱⵃⴰⵔ (ⵉⵅⵙ ⴰⴷ ⵢⵉⵏⵉ: ‘ⵉⵖⵥⴰⵔ ⵏ ⵏⵉⵍ’) ⵉⵙⵙⴰⴳⴳⵯⴰⴷ ⵍⴻⴳⵏⵓⵙ ⵙ ⵊⵊⴻⵀⴷ ⵏⵏⴻⵙ ⵛⵛⵉⵟⴰⵏⵉ.
14 ⵎⴰⵎⵎⴻⵛ ⵉ ⵖⴰ ⴳⴳⴻⵖ ⴰⴷ ⵅⴰⵙ ⴷⴷ-ⴰⵔⵔⴻⵖ,
ⵎⴰⵎⵎⴻⵛ ⵉ ⵖⴰ ⴼⴰⵔⵣⴻⵖ
ⴰⵡⴰⵍⴻⵏ ⵉⵏⵓ ⵎⵍⵉⵃ ⵣⵣⴰⵜⴻⵙ?
15 ⵡⴰⵅⵅⴰ ⵏⴻⵛⵛ ⴷ ⴰⵎⵙⴻⴳⴳⴻⴷ,
ⵡⴰⵔ ⵣⴻⵎⵎⴰⵔⴻⵖ ⴰⴷ ⵅⴰⵙ ⴷⴷ-ⴰⵔⵔⴻⵖ,
ⵎⴰⵛⴰ ⴰⴷ ⵣⴰⵡⴳⴻⵖ ⵍⵇⴰⴹⵉ ⵉⵏⵓ
ⵎⴰⵃⴻⵏⴷ ⴰⴷ ⵅⴰⴼⵉ ⵉⵃⵉⵏⵏ,
16 ⵎⴰⵍⴰ ⵅⴰⴼⵉ ⴷⴷ-ⵢⴰⵔⵔ ⵍⴰⵎⵉ ⵍⴰⵖⵉⵖ,
ⵡⴰⵔ ⵜⵜⵖⵉⵍⴻⵖ ⴰⵇⴰ ⵏⴻⵜⵜⴰ ⴰⴷ ⵉⵙⴻⵍ
ⵖⴰⵔ ⵜⵎⵉⵊⵊⴰ ⵉⵏⵓ.
17 ⴰⵇⴰ ⵏⴻⵜⵜⴰ ⵉⵍⴻⴱⴱⴻⵣ ⴰⵢⵉ ⵙ ⵉⵛⵜ ⵏ ⵜⵃⴰⵔⵢⴰⴹⵜ
ⵓ ⵢⴰⵔⴻⵏⵏⵉ ⴷⴻⴳ ⵉⵢⴻⵣⵣⵉⵎⴻⵏ ⵉⵏⵓ ⴱⴰⵟⴻⵍ.
18 ⵏⴻⵜⵜⴰ ⵡⴰⵔ ⴷ ⴰⵢⵉ ⵉⵜⵜⴻⵊⵊⵉ ⴰⴷ ⴰⵔⵔⴻⵖ ⵏⵏⴻⴼⵙ,
ⵎⴰⵛⴰ ⵉⵙⵙⵊⴰⵡⴰⵏ ⴰⵢⵉ ⵙ ⵜⴰⵔⵣⵓⴳⵉ.
19 ⵎⴰⵍⴰ ⵜⴻⵇⵇⵉⵎ ⵜⵎⴻⵙⵍⴰⵛⵜ ⴷⵉ ⵊⵊⴻⵀⴷ,
ⴰⵇⴰ ⵏⴻⵜⵜⴰ ⵉⵊⵀⴻⴷ ⵇⴰⵄ,
ⵎⴰⵍⴰ ⴷⵉ ⵛⵛⵔⴻⵄ, ⵉⵇⵇⴰⵔ:
‘ⵡⵉ ⴷ ⴰⵢⵉ ⵖⴰ ⵉⵄⴰⵔⴹⴻⵏ?’
20 ⵡⴰⵅⵅⴰ ⵏⴻⵛⵛ ⴷ ⴰⵎⵙⴻⴳⴳⴻⴷ,
ⵄⴰⴷ ⴰⵇⴻⵎⵎⵓⵎ ⵉⵏⵓ ⴰⴷ ⵅⴰⴼⵉ ⵉⵃⴽⴻⵎ,
ⵡⴰⵅⵅⴰ ⵏⴻⵛⵛ ⴱⵍⴰ ⵍⵄⵉⴱ,
ⵄⴰⴷ ⵏⴻⵜⵜⴰ ⴰⴷ ⴰⵢⵉ ⵉⵄⴻⵢⵢⴻⴱ.
21 ⵡⴰⵅⵅⴰ ⵏⴻⵛⵛ ⴱⵍⴰ ⵍⵄⵉⴱ ⵉ ⴵⵉⵖ,
ⵡⴰⵔ ⵙⵙⵉⵏⴻⵖ ⵍⴻⵄⵎⴰⵔ ⵉⵏⵓ ⵏⵉⵛⴰⵏ,
ⵜⵓⴷⴰⵔⵜ ⵉⵏⵓ ⵃⴻⵙⵙⴱⴻⵖ ⵜⵜ ⴷ ⵡⴰⵍⵓ.
22 ⵅ ⵓⵢⴰ ⵉ ⵖⴰ ⵉⵏⵉⵖ: ‘ⵇⴰⵄ ⴷ ⵉⵛⵜ!
ⴰⵎ ⵡⴻⵏⵏⵉ ⵉⴵⴰⵏ ⴱⵍⴰ ⵍⵄⵉⴱ
ⴰⵎ ⵡⴻⵏⵏⵉ ⵉⴵⴰⵏ ⴷ ⴰⵄⴻⴼⴼⴰⵏ,
ⵏⴻⵜⵜⴰ ⴰⴷ ⵜⴻⵏ ⵉⵇⴹⴰ ⵙ ⵜⵏⴰⵢⴻⵏ ⵉⴷⵙⴻⵏ!’ ◘9:22 ⴰⵎⴱ. 9:2, 3; ⵎⴰⵍ. 3:14
23 ⵎⴰⵍⴰ ⴰⵔⴻⴽⴽⵓⴹ ⵉⵏⴻⵇⵇ ⴷⴻⴳ ⵉⵛⵜ ⵏ ⵜⴻⵛⵜⵉ,
ⵅⴻⵏⵏⵉ ⵏⴻⵜⵜⴰ ⵉⵙⵜⴻⵀⴻⵣⵣⴰ
ⵣⵉ ⵍⴻⵇⴹⴻⵄ ⵏ ⵍⴰⵢⴰⵙ ⵉ ⵉⵎⴻⵣⴷⴰⴳⴻⵏ.
24 ⵜⴰⵎⵎⵓⵔⵜ ⴰⴷ ⵜⴻⵎⵎⴻⵡⵛ
ⴷⴻⴳ ⵓⴼⵓⵙ ⵏ ⵓⵄⴻⴼⴼⴰⵏ.
ⵉⵖⴻⵎⴱⴰⴱ ⵏ ⵍⵇⵓⴹⴰⵜ ⵏⵏⴻⵙ ⵉⵜⵜⵍⴻⵃⵃⴻⴼ ⴰⵙⴻⵏ.
ⵎⴰⵍⴰ ⵡⴰⵔ ⵜ ⵉⴳⴳⵉ ⵏⴻⵜⵜⴰ, ⵎⴰⵏ ⵡⴻⵏ ⵅⴻⵏⵏⵉ?
25 ⴷⴻⵖⵢⴰ ⵅ ⵡⴻⵏⵏⵉ ⵉⵜⵜⴰⵣⵣⵍⴻⵏ
ⴰⵇⴰ ⵜⵜⵇⴻⴵⵉⵇⴻⵏ ⵡⵓⵙⵙⴰⵏ ⵉⵏⵓ,
ⴰⵔⴻⵡⵍⴻⵏ ⵖⴰⵔ ⴷⵉⵏ, ⵡⴰⵔ ⵜⵡⵉⵍⵉⵏ ⵍⵅⴰⵔ. ◘9:25 ⴰⵢⵓⴱ 7:6, 7
26 ⴽⴽⵉⵏ ⴰⵎ ⵜⵖⴰⵔⵔⵓⴱⴰ ⵏ ⵓⵖⴰⵏⵉⵎ,
ⴰⵎ ⵓⴳⵉⴷⴻⵔ ⵉⵃⴻⵡⵡⵎⴻⵏ ⵅ ⵣⵣⴰⵔⴷⴻⵜ.
27 ⵎⴰⵍⴰ ⵏⵏⵉⵖ: ‘ⴰⴷ ⵜⵜⵓⵖ ⴰⵛⴻⵜⵛⵉ ⵉⵏⵓ,
ⴰⴷ ⴱⴻⴷⴷⵍⴻⵖ ⴰⵖⴻⵎⴱⵓⴱ ⵉⵛⴻⴹⵏⴻⵏ ⵉⵏⵓ,
ⴰⴷ ⵙⵙⴼⵉⵔⵏⵉⵏⴻⵖ!’,
28 ⴰⵎⵎⵓ ⵉ ⵜⵜⴻⴳⴳⵯⴻⴷⴻⵖ ⵣⵉ ⵎⴰⵔⵔⴰ ⵍⴻⵃⵔⵉⵇ ⵉⵏⵓ.
ⵏⴻⵛⵛ ⵙⵙⵏⴻⵖ ⵛⴻⴽ ⵡⴰⵔ ⵣⵣⴰⵢⵉ ⵜᵉⵜⵜⴱⴰⵔⵔⵉⴷ.
29 ⵏⴻⵛⵛ ⴷ ⴰⵄⴻⴼⴼⴰⵏ,
ⵎⴰⵢⴻⵎⵎⵉ ⵙⵙⵃⵉⵙⵙⵉⴼⴻⵖ ⵉ ⵡⴰⵍⵓ?
30 ⵎⴰⵍⴰ ⵙⵙⵉⵔⴷⴻⵖ ⵙ ⵡⴰⵎⴰⵏ ⵏ ⵡⴻⴷⴼⴻⵍ,
ⴰⴷ ⵙⵙⵉⵣⴻⴷⴳⴻⵖ ⵉⴼⴰⵙⵙⴻⵏ ⵉⵏⵓ ⵙ ⵍⵍⵉⵅⵉⵢⴰ, ◘9:30 ⵉⵔⵎ. 2:22
31 ⵄⴰⴷ ⴰⴷ ⴰⵢⵉ ⵜⵏⴻⵜⵢⴻⴷ
ⴷⴻⴳ ⵡⴻⵃⴼⵓⵔ ⵢⴰⵔⵚⵓⴷⴻⵏ,
ⴰⵍ ⴷ ⴰⵢⵉ ⵖⴰ ⵉⵄⵉⴼⴼ ⵡⴰⵔⵔⵓⴹ ⵉⵏⵓ.
32 ⵎⴰⵖⴰⵔ ⵏⴻⵜⵜⴰ ⵡⴰⵔ ⵉⴵⵉ ⴷ ⴱⵏⴰⴷⴻⵎ ⴰⵎ ⵏⴻⵛⵛ,
ⵡⴻⵏⵏⵉ ⵅⴻⴼ ⵣⴻⵎⵎⴰⵔⴻⵖ ⴰⴷ ⴷⴷ-ⴰⵔⵔⴻⵖ,
ⵅⵎⵉ ⵏⴻⵜⵜⴰⵡⴻⴹ ⵖⴰⵔ ⵜⴰⴷⴷⴰⵔⵜ ⵏ ⵛⵛⵔⴻⵄ
ⴰⴽ-ⴷ ⵡⴰⵢⴰⵡⵢⴰ. ◘9:32 ⴰⵎⴱ. 6:10; ⵉⵔⵎ. 49:19
33 ⵡⴰⵔ ⴷⵉⵏ ⵉⴵⵉ ⵍⵄⴰⴷⴻⵍ ⵊⴰⵔ ⴰⵏⴻⵖ,
ⵡⴻⵏⵏⵉ ⵉⵣⴻⵎⵎⴰⵔⴻⵏ ⴰⴷ ⵉⵙⵙⴰⵔⵙ ⴰⴼⵓⵙ ⵏⵏⴻⵙ
ⵅⴰⵏⴻⵖ ⵙ ⵜⵏⴰⵢⴻⵏ ⵉⴷⵏⴻⵖ.
34 ⴻⵊⵊ ⵉ-ⵜ ⴰⴷ ⵅⴰⴼⵉ ⵉⴽⵙⵉ ⴰⵄⵎⵓⴷ ⵏⵏⴻⵙ,
ⵡⴰⵔ ⴷ ⴰⵢⵉ ⵉⵙⵙⵏⴻⵅⵍⵉⵄ ⵄⴰⴷ ⵓⵀⵓⴷⴷⵉ ⵏⵏⴻⵙ, ◘9:34 ⴰⵢⵓⴱ 13:20; 33:7
35 ⵅⴻⵏⵏⵉ ⴰⴷ ⵙⵙⵉⵡⵍⴻⵖ
ⵏⵀⵍⴰ ⴰⴷ ⵣⵣⴰⵢⴻⵙ ⴳⴳⵯⴻⴷⴻⵖ,
ⵎⴰⵖⴰⵔ ⵏⴻⵛⵛ ⵡⴰⵔ ⴵⵉⵖ ⴰⵎⵎⵓ ⵉ ⵢⵉⵅⴻⴼ ⵉⵏⵓ.
◘9:2 9:2 ⵉⵥⵀⴷ. 143:2
◘9:10 9:10 ⴰⵢⵓⴱ 5:9; ⵉⵥⵀⴷ. 72:18; 77:15; 86:10; ⵔⵓⵎ. 11:33
◼9:13 9:13 ⵔⴰⵀⴰⴱ-ⵉⵅⵙ ⴰⴷ ⵢⵉⵏⵉ: ‘ⵡⴻⵏⵏⵉ ⵉⵙⵙⴰⴳⴳⵯⴰⴷⴻⵏ’. ‘ⵔⴰⵀⴰⴱ’ ⴷ ⵉⵙⴻⵎ ⵏ ⵍⵀⴰⵢⵛⴻⵜ. ⵍⵀⴰⵢⵛⴻⵜ-ⴰ ⴰⵇⴰ-ⵜⵜ ⴷ ⵜⴰⵎⵎⵓⵔⵜ ⵏ ⵎⵉⵚⵔⴰ, ⵜⴻⵏⵏⵉ ⴰⵎ ⵍⴻⵃⵡⴻⵛ ⴷⵉ ⵍⴻⴱⵃⴰⵔ (ⵉⵅⵙ ⴰⴷ ⵢⵉⵏⵉ: ‘ⵉⵖⵥⴰⵔ ⵏ ⵏⵉⵍ’) ⵉⵙⵙⴰⴳⴳⵯⴰⴷ ⵍⴻⴳⵏⵓⵙ ⵙ ⵊⵊⴻⵀⴷ ⵏⵏⴻⵙ ⵛⵛⵉⵟⴰⵏⵉ.
◘9:22 9:22 ⴰⵎⴱ. 9:2, 3; ⵎⴰⵍ. 3:14
◘9:32 9:32 ⴰⵎⴱ. 6:10; ⵉⵔⵎ. 49:19
◘9:34 9:34 ⴰⵢⵓⴱ 13:20; 33:7