1 “ⵅⵣⴰⵔ, ⴰⴼⵓⵙ ⵏ ⵙⵉⴷⵉ ⵡⴰⵔ ⵉⴵⵉ ⴷ ⴰⵇⵓⴹⴰⴹ ⵃⵉⵎⴰ ⴰⴷ ⵉⵙⵙⴻⵏⵊⴻⵎ, ⴰⵎⴻⵣⵣⵓⵖ ⵏⵏⴻⵙ ⵡⴰⵔ ⵉⴷⴷⵓⵀⵛⴰⵔ ⴰⵇⴰ ⵏⴻⵜⵜⴰ ⵡⴰⵔ ⵉⵜⵜⴻⵙⵍⵉ, ◘59:1 ⵍⵅⵍ. 11:23; ⵉⵛⴰ. 50:2 2 ⵎⴰⵛⴰ ⵍⵎⵓⵄⵚⵉⵢⵢⴻⵜ ⵏⵡⴻⵎ ⴷ ⵎⵉⵏ ⵉⵜⵜⴻⵎⵙⴻⴱⴹⴰⵏ ⵊⴰⵔ ⴰⵡⴻⵎ ⴷ ⴰⵔⴻⴱⴱⵉ ⵏⵡⴻⵎ, ⵓⵛⴰ ⴷⴷⵏⵓⴱ ⵏⵡⴻⵎ ⵍⴻⵃⵃⴼⴻⵏ ⵣⵣⴰⵢⵡⴻⵎ ⴰⵖⴻⵎⴱⵓⴱ ⵏⵏⴻⵙ, ⴰⵇⴰ ⵏⴻⵜⵜⴰ ⵡⴰⵔ ⵉ ⴷ ⴰⵡⴻⵎ ⵉⵜⵜⴻⵙⵍⵉ. 3 ⵎⴰⵖⴰⵔ ⵜⵜⵡⴰⵙⵙⵅⴻⵎⵎⵊⴻⵏ ⵉⴼⴰⵙⵙⴻⵏ ⵏⵡⴻⵎ ⵙ ⵉⴷⴰⵎⵎⴻⵏ, ⵉⴹⴻⵡⴹⴰⵏ ⵏⵡⴻⵎ ⵙ ⵍⵎⵓⵄⵚⵉⵢⵢⴻⵜ, ⵉⵢⴻⵏⵛⵉⵛⴻⵏ ⵏⵡⴻⵎ ⵙⵙⵅⴰⵔⵔⵉⵇⴻⵏ, ⵉⵍⴻⵙ ⵏⵡⴻⵎ ⵉⵏⵟⴻⵇ ⵙ ⵎⵉⵏ ⵡⴰⵔ ⵉⵃⵔⵉⵏ. 4 ⵓⵍⴰ ⴷ ⵉⵊⵊ ⵉⵙⵙⵎⵓⵏⴰ ⵙ ⵜⵙⴻⴳⴷⴰ ⵓⵛⴰ ⵓⵍⴰ ⴷ ⵉⵊⵊ ⵉⵜⵜⵡⴰⵛⴰⵔⵔⴻⵄ ⵙ ⵍⵃⴻⵇⵇ. ⵎⴰⵔⵔⴰ ⵏⵉⵜⵏⵉ ⵜⵜⵄⴻⵎⵎⴷⴻⵏ ⵅ ⵎⵉⵏ ⵉⴵⴰⵏ ⴱⴰⵟⴻⵍ ⵓⵛⴰ ⵇⵇⴰⵔⴻⵏ ⵉⵅⴰⵔⵔⵉⵇⴻⵏ. ⴰⵇⴰ ⴽⴻⵙⵙⵉⵏ ⵙ ⴷⴷⴻⵢⵙⴻⵜ ⵏ ⵜⵓⵄⴻⴼⴼⵏⴰ ⵓ ⵜⵜⴰⵔⵡⴻⵏ-ⴷⴷ ⵍⵎⵓⵄⵚⵉⵢⵢⴻⵜ. ◘59:4 ⴰⵢⵓⴱ 15:35; ⵉⵥⵀⴷ. 7:15 5 ⵃⴻⴱⴹⴻⵏ ⵅ ⵜⵎⴻⴵⴰⵍⵉⵏ ⵏ ⵜⵍⴻⴼⵙⴰ ⵓ ⵣⴻⵟⵟⴻⵏ ⴰⵅⵎⴰⵍ ⵏ ⵇⵓⵏⴷⵄⴰ. ⵡⴻⵏⵏⵉ ⵉⵛⵛⴻⵏ ⵣⵉ ⵜⵎⴻⴵⴰⵍⵉⵏ ⵏⵙⴻⵏ, ⴰⴷ ⵉⵎⵎⴻⵜ, ⵓ ⵅⵎⵉ ⵉⵜⵜⴰⵔⴻⵥⵥⴰ ⵉⵊⵊ ⵉⵛⵜⴻⵏ, ⵜᵉⵜⵜⴻⴼⴼⴻⵖ-ⴷⴷ ⵣⵣⴰⵢⴻⵙ ⵉⵛⵜ ⵏ ⵜⴼⵉⵖⴰⵔⵜ. 6 ⵉⵅⵎⴰⵔⴻⵏ ⵏⵙⴻⵏ ⵡⴰⵔ ⴷⴷ-ⵓⵙⵉⵏ ⵉ ⵡⴻⵔⵔⵓⴹ ⵓⵛⴰ ⵡⴰⵔ ⵣⴻⵎⵎⴰⵔⴻⵏ ⴰⴷ ⴰⵔⴹⴻⵏ ⵉⵅⴻⴼ ⵏⵙⴻⵏ ⵙ ⵎⵉⵏ ⴳⴳⵉⵏ ⵉⴼⴰⵙⵙⴻⵏ ⵏⵙⴻⵏ. ⵎⵉⵏ ⴳⴳⵉⵏ ⴰⵇⴰ ⴷ ⵍⴻⵅⴷⴰⵢⴻⵎ ⵏ ⵍⵎⵓⵄⵚⵉⵢⵢⴻⵜ ⵓⵍⴰ ⴷ ⵍⵅⴻⴷⵎⴻⵜ ⵏ ⵍⴻⵅⵛⵓⵏⴻⵜ ⵏ ⵉⴼⴰⵙⵙⴻⵏ ⵏⵙⴻⵏ. ◘59:6 ⴰⵢⵓⴱ 8:14, 15 7 ⵉⴹⴰⵔⴻⵏ ⵏⵙⴻⵏ ⵜⵜⴰⵣⵣⵍⴻⵏ ⵖⴰⵔ ⵍⵖⴰⵔ ⵓ ⵏⵉⵜⵏⵉ ⵜⵜⵇⴻⴵⵉⵇⴻⵏ ⵎⴰⵃⴻⵏⴷ ⴰⴷ ⵙⵙⵉⵣⵣⵍⴻⵏ ⵉⴷⴰⵎⵎⴻⵏ ⵉⵎⴻⵣⴷⴰⴳⴻⵏ. ⵉⵅⴰⵔⵔⵉⵚⴻⵏ ⵏⵙⴻⵏ ⴷ ⵉⵅⴰⵔⵔⵉⵚⴻⵏ ⵛⵛⵓⵔⴻⵏ ⴰⴽ-ⴷ ⵍⵎⵓⵄⵚⵉⵢⵢⴻⵜ, ⴰⵔⴻⴷⴷⴻⴵ ⴷ ⵓⴽⴻⵀⵀⴻⴹ ⴰⵇⴰ ⴰⵜⴻⵏ ⵅ ⵉⴱⵔⵉⴷⴻⵏ ⵏⵙⴻⵏ ⵉⵡⴰⵟⴰⵏ. ◘59:7 ⴰⵡⵍⵏ. 1:16; ⵔⵓⵎ. 3:15 8 ⴰⴱⵔⵉⴷ ⵏ ⵍⴻⵀⵏⴰ ⵡⴰⵔ ⵜ ⵙⵙⵉⵏⴻⵏ ⵓ ⵍⴰⵜⴰⵔⴰⵜ ⵏⵙⴻⵏ ⵡⴰⵔ ⵅⴰⵙⴻⵏⵜ ⵡⴰⵍⵓ ⵏ ⵍⵃⴻⵇⵇ. ⵏⵉⵜⵏⵉ ⵙⵙⴼⴰⵔⵔⴰⵖⴻⵏ ⵉⵣⵓⴱⴰⵇ ⵏⵙⴻⵏ ⵉ ⵢⵉⵅⴻⴼ ⵏⵙⴻⵏ, ⵎⴰⵔⵔⴰ ⵉⵏⵏⵉ ⴷⴰⵢⵙⴻⵏ ⵉⴳⴳⵓⵔⴻⵏ, ⵡⴰⵔ ⵙⵙⵉⵏⴻⵏ ⵍⴻⵀⵏⴰ.”

9 “ⵅ ⵓⵢⴰ ⵉⵜⵜⵖⵉⵎⴰ ⵍⵃⴻⵇⵇ ⵉⴳⴳⵯⴻⵊ ⵅⴰⵏⴻⵖ ⵓ ⵜⴰⵙⴻⴳⴷⴰ ⵡⴰⵔ ⴷⴷ ⴰⵏⴻⵖ ⴷⴷ-ⵜᵉⵜⵜⵉⴽⴽⵡⵉⴹ. ⵏⴻⵛⵛⵉⵏ ⵏⴻⵜⵜⵔⴰⵊⴰ ⵜⴰⴼⴰⵡⵜ, ⵎⴰⵛⴰ ⵅⵣⴰⵔ, ⴰⵇⴰ ⴷⵉⵏ ⵟⵟⵍⴰⵎ, ⵏⵔⴰⵊⴰ ⵜⵉⵙⵙⵉⵇⵜ ⵏ ⵜⴼⴰⵡⵜ, ⵎⴰⵛⴰ ⵏⵓⵢⵓⵔ ⴷⵉ ⵜⴰⴵⴻⵙⵜ. 10 ⵏⴻⵜⵜⴼⴰⴼⴰ ⴰⵎ ⵢⵉⴹⴰⵔⵖⴰⵍⴻⵏ ⴰⴽ-ⴷ ⵍⵃⵉⴹ ⵓ ⵏᵉⵜⵜⴻⵎⵀⴰⴼⴰ ⵙⵙⴰ ⵖⴰⵔ ⴷⴰ, ⴰⵅⵎⵉ ⵡⴰⵔ ⵖⴰⵔⵏⴻⵖ ⴵⵉⵏⵜ ⵜⵉⵟⵟⴰⵡⵉⵏ. ⵏⵡⴻⵟⵟⴰ ⴷⵉ ⵟⵟⵃⴰ ⵏ ⵓⵣⵉⵍ ⴰⵅⵎⵉ ⴷⵉ ⵜⴱⴰⵎⴱⴰⵙⵜ ⵅ ⵢⵉⵏⵏⵉ ⵉⴷⴷⴰⵔⴻⵏ ⴰⵅⵎⵉ ⵅ ⵉⵎⴻⵜⵜⴰⵏ. 11 ⵏⴻⵛⵛⵉⵏ ⵏⵣⴻⵀⵀⴰⵔ ⵎⴰⵔⵔⴰ ⴰⵎ ⴷⴷⵓⴱⴰⵜ ⵓ ⵏⴻⵜⵜⴳⴻⵔⴳⵓⵔ ⴰⵎ ⵜⵜⴳⴻⵔⴳⵓⵔⴻⵏⵜ ⵜⴻⴷⴱⵉⵔⵉⵏ, ⵏⴻⵜⵜⵔⴰⵊⴰ ⵍⵃⴻⵇⵇ, ⵎⴰⵛⴰ ⵡⴰⵔ ⴷⴷ-ⵢⵓⵙⵉ, ⵏⴻⵜⵜⵔⴰⵊⴰ ⴰⵙⴻⵏⵊⴻⵎ, ⵎⴰⵛⴰ ⵉⴳⴳⵯⴻⵊ ⵅⴰⵏⴻⵖ. 12 ⵎⴰⵖⴰⵔ ⵉⵄⴻⴷⴷⵉⵢⴻⵏ ⵏⵏⴻⵖ ⴰⵟⵟⴰⵙ ⵇⵉⴱⴰⵍⵜ ⵛⴻⴽ ⵓ ⴷⴷⵏⵓⴱ ⵏⵏⴻⵖ ⵛⴻⵀⵀⴷⴻⵏ ⵅⴰⵏⴻⵖ, ⵎⵉⵏⵣⵉ ⵉⵄⴻⴷⴷⵉⵢⴻⵏ ⵏⵏⴻⵖ ⴰⵇⴰ ⴰⵜⴻⵏ ⵖⴰⵔⵏⴻⵖ ⵓ ⵍⵎⵓⵄⵚⵉⵢⵢⴰⵜ ⵏⵏⴻⵖ ⴰⵇⴰ ⵏⴻⵙⵙⴻⵏ ⵉ-ⵜⴻⵏⵜ: 13 ⴰⵄⴻⴷⴷⵉ ⴷ ⵓⵅⴰⵔⵔⴻⵇ ⵅ ⵙⵉⴷⵉ, ⵓⵛⴰ ⴰⵃⴻⵢⵢⴻⴷ ⵣⵉ ⴰⵔⴻⴱⴱⵉ ⵏⵏⴻⵖ, ⵍⵀⴰⵔⴷ ⵅ ⴷⴷⴻⴵ ⴷ ⵓⵖⴻⵡⵡⴻⵖ, ⴰⵃⴰⵡⴻⵍ ⴷ ⵓⵙⵓⴼⴼⴻⵖ ⵏ ⵉⵅⴰⵔⵔⵉⵇⴻⵏ ⵣⴻⴳ ⵡⵓⵍ. 14 ⵉⵜⵜⵡⴻⵅⵅⴰⵔ ⵍⵃⴻⵇⵇ ⵖⴰⵔ ⴹⴻⴼⴼⴰⵔ, ⵓⵛⴰ ⵜᵉⵜⵜⵖⵉⵎⴰ ⵜⵙⴻⴳⴷⴰ ⵖⴰⵔ ⵍⴰⴳⴳⵯⴰⵊ, ⵎⴰⵖⴰⵔ ⵜⵉⴷⴻⵜⵜ ⵜⴻⵏⵏⴻⴷⵔⴻⴼ ⴷⴻⴳ ⵡⴰⵣⵣⴰⵢ ⵓⵛⴰ ⵎⵉⵏ ⵉⵙⴻⴳⴳⵎⴻⵏ ⵡⴰⵔ ⵉⵣⴻⵎⵎⴰⵔ ⴰⴷ ⴷⴷ-ⵢⴰⴷⴻⴼ. 15 ⵜⴱⴻⵟⵟⴻⵍ ⵜⵉⴷⴻⵜⵜ ⵓ ⵡⴻⵏⵏⵉ ⵉⵃⴻⵢⵢⴷⴻⵏ ⵅ ⵜⵓⵄⴻⴼⴼⵏⴰ ⵉⴷⵡⴻⵍ ⴷ ⵜⴰⴽⴻⵛⵛⴰⴹⵜ. ⴰⵢⴰ ⵉⵥⵔⴰ ⵉ-ⵜ ⵙⵉⴷⵉ ⵓⵛⴰ ⵜⵓⵖⴰ-ⵜ ⴷ ⴰⵄⴻⴼⴼⴰⵏ ⴷⵉ ⵜⵉⵟⵟⴰⵡⵉⵏ ⵏⵏⴻⵙ ⴰⵇⴰ ⵡⴰⵔ ⴷⵉⵏ ⵉⴵⵉ ⵍⵃⴻⵇⵇ. 16 ⵉⵥⵔⴰ ⴰⵇⴰ ⵡⴰⵔ ⴷⵉⵏ ⵓⵍⴰ ⴷ ⵉⵊⵊⴻⵏ ⵓ ⵏⴻⵜⵜⴰ ⵜⵓⵖⴰ ⵉⵜⵜⴻⴱⵀⴻⵜ ⵍⴰⵎⵉ ⵓⵍⴰ ⴷ ⵉⵊⵊ ⵉⴽⵙⵉ ⵙ ⵍⵎⴻⵄⵔⵓⴼ ⵉ ⵓⵛⴻⴼⴼⴰⵄ. ⵅⴻⵏⵏⵉ ⵢⵉⵡⵉ ⵓⵖⵉⵍ ⵏⵏⴻⵙ ⴷ ⴰⵙⴻⵏⵊⴻⵎ ⵉ ⵏⴻⵜⵜⴰ ⵓⵛⴰ ⵜⴰⵙⴻⴳⴷⴰ ⵏⵏⴻⵙ ⵜⵓⵖⴰ ⴷ ⴰⵄⴻⵎⵎⴻⴷ ⵏⵏⴻⵙ. ◘59:16 ⵉⵛⴰ. 63:5 17 ⵉⵙⵙⵢⴰⵔⴹ ⵉⵅⴻⴼ ⵏⵏⴻⵙ ⵜⴰⵙⴻⴳⴷⴰ ⴰⵎ ⵡⴰⵔⵔⵓⴹ ⵏ ⵡⵓⵣⵣⴰⵍ ⵓⵛⴰ ⵉⵙⵙⴰⵔⵙ ⵍⴽⴰⵙⴽ ⵏ ⵓⵙⴻⵏⵊⴻⵎ ⵅ ⵓⵣⴻⴵⵉⴼ ⵏⵏⴻⵙ. ⵏⴻⵜⵜⴰ ⵢⴰⵔⴹ ⴰⵔⵔⵓⴹ ⵏ ⵡⴻⵅⵍⴰⴼ ⵓⵛⴰ ⵉⵍⴻⵃⵃⴻⴼ ⵙ ⵜⵓⵙⵎⵉ ⵉⵇⴻⴷⴷⵙⴻⵏ ⴰⵎ ⵉⵍⴻⵃⵃⴻⴼ ⵙ ⵓⵙⴻⵍⵀⴰⵎ. ◘59:17 ⴰⴼⴰ. 6:17; 1 ⵜⵙ. 5:8 18 ⴰⵎ ⵎⴰⵎⵎⴻⵛ ⵙⴷⴰⵀⴵⴻⵏⵜ ⵜⵎⴻⴳⴳⴰ ⵏⵙⴻⵏ, ⴰⵎⵎⵓ ⵉ ⵖⴰ ⵉⵅⵍⴻⴼ ⵉ ⵉⵖⵔⵉⵎⴻⵏ ⵏⵏⴻⵙ ⵙ ⵡⴻⵙⵄⴰⵔ, ⵉ ⵍⵄⴻⴷⵢⴰⵏ ⵏⵏⴻⵙ ⵎⵉⵏ ⴷ ⴰⵙⴻⵏ ⴷⴷ-ⵢⵓⵙⵉⵏ. ⵜⵉⴳⵣⵉⵔⵉⵏ ⴰⴷ ⵜⴻⵏⵜ ⵉⵡⵛ ⵍⴻⵅⵍⴻⴼ ⵏⵙⴻⵏⵜ ⵉ ⵉⵙⴷⴰⵃⴵⴻⵏ.”

19 “ⵅⴻⵏⵏⵉ ⴰⴷ ⴳⴳⵯⴻⴷⴻⵏ ⵣⴻⴳ ⵢⵉⵙⴻⵎ ⵏ ⵙⵉⴷⵉ ⵣⵉ ⵎⴰⵏⵉⵙ ⵜⵖⴻⴵⵉ ⵜⴼⵓⵛⵜ, ⵓⵛⴰ ⴰⵄⵓⴵⵉ ⵏⵏⴻⵙ ⵣⵉ ⵎⴰⵏⵉⵙ ⴷⴷ-ⵜⵏⴻⵇⵇⴰⵔ ⵜⴼⵓⵛⵜ. ⵎⴰⵖⴰⵔ ⴰⴷ ⴷⴷ-ⵢⴰⵙ ⴰⵎ ⵢⴻⵖⵣⴰⵔ ⵉⵃⵚⴰⵔⴻⵏ, ⴰⵙⴻⵎⵎⵉⴹ ⵏ ⵙⵉⴷⵉ ⴰⴷ ⵜ ⵉⵄⴰⵔⵏ. 20 ⴰⴷ ⴷⴷ-ⵢⴰⵙ ⵓⵎⴻⴼⴷⵉ ⵣⵉ ⵚⵉⵀⵢⵓⵏ, ⵉ ⵢⵉⵏⵏⵉ ⵉ ⵖⴰ ⵉⵜⵓⴱⴻⵏ ⵣⴻⴳ ⵉⵄⴻⴷⴷⵉⵢⴻⵏ ⵏⵙⴻⵏ ⵣⵉ ⵢⴰⵄⵇⵓⴱ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ.” ◘59:20 ⵉⵛⴰ. 10:21, 22; ⵔⵓⵎ. 11:26

21 “ⵡⴰ ⴷ ⵍⵄⴰⵀⴷ ⵉⵏⵓ ⴰⴽⵉⴷⵙⴻⵏ, ⵉⵇⵇⴰⵔ ⵙⵉⴷⵉ. ⴰⵔⵔⵓⵃ ⵉⵏⵓ, ⵡⴻⵏⵏⵉ ⵅⴰⴽ ⵉⴵⴰⵏ, ⴷ ⵡⴰⵡⴰⵍⴻⵏ ⵉⵏⵓ ⵏⵏⵉ ⴳⴳⵉⵖ ⴷⴻⴳ ⵓⵇⴻⵎⵎⵓⵎ ⵏⵏⴻⵛ, ⵡⴰⵔ ⵅⴰⴽ ⵜⵜⵃⴻⵢⵢⵉⴷⴻⵏ ⵛⴰ ⵣⴻⴳ ⵓⵇⴻⵎⵎⵓⵎ ⵏⵏⴻⵛ, ⵡⴰⵔ ⵉⴵⵉ ⵣⴻⴳ ⵓⵇⴻⵎⵎⵓⵎ ⵏ ⵜⴰⵔⵡⴰ ⵏⵏⴻⵛ ⵓⵍⴰ ⵣⴻⴳ ⵓⵇⴻⵎⵎⵓⵏ ⵏ ⵜⴰⵔⵡⴰ ⵏ ⵜⴰⵔⵡⴰ ⵏⵏⴻⵛ, ⵣⵉ ⵍⴻⵅⵅⵓ ⴰⵍ ⵉ ⵍⴻⴱⴷⴰ, ⵉⵇⵇⴰⵔ ⵙⵉⴷⵉ.”