ⴰⵡⴰⵍⴻⵏ ⵉⵡⴻⵥⵏⴻⵏ
1
ⴰⵡⴰⵍ ⴰⵎⴻⵣⵡⴰⵔⵓ - ⵍⵖⴰⵔⴰⴹ ⵏ ⵡⴰⵡⴰⵍⴻⵏ ⵉⵡⴻⵣⵏⴻⵏ
1 ⴰⵡⴰⵍⴻⵏ ⵉⵡⴻⵣⵏⴻⵏ ⵏ ⵙⵓⵍⵉⵎⴰⵏ,
ⵎⵎⵉⵙ ⵏ ⴷⴰⵡⵓⴷ, ⴰⵊⴻⴵⵉⴷ ⵏ ⵉⵙⵔⴰⵉⵍ,
2 ⵃⵉⵎⴰ ⴰⴷ ⵉⵙⵙⴻⵏ ⴱⵏⴰⴷⴻⵎ ⵜⵉⵖⵉⵜ ⴷ ⵜⵜⴰⵔⴱⵉⵢⵢⴻⵜ,
ⵃⵉⵎⴰ ⴰⴷ ⵉⴼⵀⴻⵎ ⴰⵡⴰⵍⴻⵏ ⵛⵛⵓⵔⴻⵏ ⵙ ⵍⴻⴼⵀⴰⵎⴻⵜ,
3 ⵃⵉⵎⴰ ⴰⴷ ⵉⵇⴱⴻⵍ ⵜⵜⴰⵔⴱⵉⵢⵢⴻⵜ ⴷ ⵍⴻⵄⵇⴻⵍ,
ⵜⴰⵙⴻⴳⴷⴰ ⴷ ⵍⵃⴻⵇⵇ ⴷ ⵍⴻⵚⴼⴰⵢⴻⵜ,
4 ⵃⵉⵎⴰ ⴰⴷ ⵉⵡⵛ ⴰⵙⴼⴰⵔⵣ ⵉ ⵉⵃⴰⴼⵉⵢⵢⴻⵏ,
ⵜⵓⵙⵙⵏⴰ ⴷ ⵓⵃⴰⴷⵓⵔ ⵉ ⵓⵃⵓⴷⵔⵉ.
5 ⴻⵊⵊ ⴰⵎⵉⵖⵉⵙ ⴰⴷ ⵉⵙⴻⵍ
ⵓ ⴰⴷ ⵢⴰⵔⵏⵉ ⴷⵉ ⵍⴻⴼⵀⴰⵎⴻⵜ ⵏⵏⴻⵙ,
ⴻⵊⵊ ⵡⴻⵏⵏⵉ ⵉⴼⴻⵀⵀⵎⴻⵏ ⴰⴷ ⵉⴽⵙⴻⴱ ⵍⴻⵇⵏⴰⵄⴻⵜ,
6 ⵃⵉⵎⴰ ⴰⴷ ⵉⴼⵀⴻⵎ ⴰⵡⴰⵍ ⵉⵡⴻⵣⵏⴻⵏ ⴷ ⵍⵎⴰⵜⴰⵍ,
ⴰⵡⴰⵍⴻⵏ ⵏ ⵉⵎⵉⵖⵉⵙⴻⵏ
ⴷ ⵍⴻⵎⵄⴰⵏⵉ ⵉⵏⵏⵓⴼⴰⵔⴻⵏ ⵏⵙⴻⵏ.
7 ⵜⵉⴳⴳⵯⵓⴷⵉ ⵏ ⵙⵉⴷⵉ ⴷ ⴱⴻⴷⴷⵓ ⵏ ⵜⵓⵙⵙⵏⴰ,
ⵎⴰⵛⴰ ⵉⴱⵓⵀⴰⵍⵉⵢⵢⴻⵏ
ⵙⵙⴻⵃⵇⴰⵔⴰⵏ ⵜⵉⵖⵉⵜ ⴷ ⵜⵜⴰⵔⴱⵉⵢⵢⴻⵜ. ◘1:7 ⴰⵢⵓⴱ 28:28; ⵉⵥⵀⴷ. 111:10; ⴰⵡⵍⵏ. 9:10; ⴰⵎⴱ. 12:13
ⵛⵛⵡⴰⵔ ⵏ ⴱⴰⴱⴰⵙ ⵉ ⵎⵎⵉⵙ
8 ⵙⴻⵍ, ⴰ ⵎⵎⵉ, ⵖⴰⵔ ⵜⵜⴰⵔⴱⵉⵢⵢⴻⵜ ⵏ ⴱⴰⴱⴰⵛ,
ⵡⴰⵔ ⵜⵜⴰⴳⵉ ⵛⴰ ⵜⴰⵖⵓⵔⵉ ⵏ ⵢⴻⵎⵎⴰⵛ,
9 ⵎⴰⵖⴰⵔ ⵏⵉⵜⴻⵏⵜⵉ ⴰⴷ ⵉⵍⵉⵏⵜ
ⴷ ⵜⵜⴰⵊ ⵉⵛⵏⴰ ⵅ ⵓⵣⴻⴵⵉⴼ ⵏⵏⴻⵛ,
ⴷ ⵜⵙⴻⴷⴷⵢⵉⵏ ⵉⵣⴻⵡⵡⵇⴻⵏ ⵉ ⵢⵉⵔⵉ ⵏⵏⴻⵛ.
10 ⴰ ⵎⵎⵉ, ⵎⴰⵍⴰ ⵅⵙⴻⵏ ⵉⵎⴻⴷⵏⴰⴱ
ⴰⴷ ⵛⴻⴽ ⵖⵡⴰⵏ,
ⵡⴰⵔ ⴷ ⴰⵙⴻⵏ ⵜⵜⴻⴳⴳ ⵛⴰ ⴰⵔⵔⴰⵢ.
11 ⵎⴰⵍⴰ ⵏⵉⵜⵏⵉ ⵇⵇⴰⵔⴻⵏ:
“ⵓⵢⵓⵔ ⴰⴽⵉⴷⵏⴻⵖ, ⴻⵊⵊ ⴰⴷ ⵏⵃⴰⵎⴰ
ⵉ ⵓⵙⵉⵣⵣⴻⵍ ⵏ ⵉⴷⴰⵎⵎⴻⵏ,
ⴻⵊⵊ ⴰⵏⴻⵖ ⴰⴷ ⵏⴻⴳⴳ ⵉⵊⵊ ⵏ ⵍⴼⴻⵅ
ⵉ ⵓⵎⴻⵣⴷⴰⴳ, ⴱⵍⴰ ⵙⵙⵉⴱⴱⴻⵜ,
12 ⴻⵊⵊ ⴰⵏⴻⵖ ⴰⴷ ⵜⴻⵏ ⵏⵚⴰⵔⴹ ⴰⵎ ⴷⴷⴰⵔⴻⵏ,
ⴰⵎ ⵎⴰⵎⵎⴻⵛ ⵜⵚⴰⵔⴻⴹ ⵍⴰⵅⴰⵔⵜ,
ⴰⵎ ⴽⴻⵎⵍⴻⵎ,
ⴰⵎ ⵎⴰⵎⵎⴻⵛ ⵉⵎⵙⴰⵔ
ⴰⴽ-ⴷ ⵢⵉⵏⵏⵉ ⵉⵀⴻⴽⴽⵡⴰⵏ
ⴷⴻⴳ ⵡⴻⵃⴼⵓⵔ ⵏ ⵡⴻⵏⴹⴻⵍ.
13 ⴰⴷ ⵏⴰⴼ ⵄⵍⴰⵎⴽⵓⵔ ⵍⴻⵃⵡⴰⵢⴻⵊ ⵢⵉⵖⵍⴰⵏ ⴰⵟⵟⴰⵙ,
ⵜⵓⴷⵔⵉⵏ ⵏⵏⴻⵖ ⴰⴷ ⵜⴻⵏⵜ ⵏⴻⵛⵛⵓⵔ ⵙ ⵜⴽⴻⵛⵛⴰⴹⵜ.
14 ⵛⴻⴽ ⴰⴷ ⵜⴻⵏⴹⴰⵔⴻⴷ ⵜⴰⵇⴻⴷⴷⵓⵃⵜ ⵏⵏⴻⵛ ⵊⴰⵔ ⴰⵏⴻⵖ,
ⴰⴷ ⵖⴰⵔⵏⴻⵖ ⵜⵉⵍⵉ ⵎⴰⵔⵔⴰ ⵉⵛⵜ ⵏ ⵜⴻⵛⵢⴰⵔⵜ.”
15 ⴰ ⵎⵎⵉ, ⵡⴰⵔ ⴽⵉⴷⵙⴻⵏ ⴳⴳⵓⵔ ⴷⴻⴳ ⵡⴻⴱⵔⵉⴷ,
ⵙⵉⴳⴳⵯⴻⵊ ⴰⴹⴰⵔ ⵏⵏⴻⵛ ⵅ ⵓⵎⴻⵙⵔⵓⵇ ⵏⵙⴻⵏ,
16 ⵎⴰⵖⴰⵔ ⵉⴹⴰⵔⴻⵏ ⵏⵙⴻⵏ ⵜⵜⴰⵣⵣⵍⴻⵏ ⵖⴰⵔ ⵍⵖⴰⵔ,
ⵓ ⵏⵉⵜⵏⵉ ⵜⵜⵇⴻⴵⵉⵇⴻⵏ
ⵎⴰⵃⴻⵏⴷ ⴰⴷ ⵙⵙⵉⵣⵣⵍⴻⵏ ⵉⴷⴰⵎⵎⴻⵏ. ◘1:16 ⵉⵛⴰ. 59:7; ⵔⵓⵎ. 3:15
17 ⵎⴰⵖⴰⵔ ⵙ ⵍⴱⴰⵟⴻⵍ ⴰⴷ ⵜᵉⵜⵜⵡⴰⴱⴻⵣⵣⴻⵄ ⵜⵔⴰⵛⵛⴰ,
ⵣⵣⴰⵜ ⵉ ⵜⵉⵟⵟⴰⵡⵉⵏ ⵏ ⵎⴰⵔⵔⴰ
ⵎⵉⵏ ⵖⴰⵔ ⵉⴵⴰ ⵡⴰⴼⵔⵉⵡⴻⵏ,
18 ⵎⴰⵖⴰⵔ ⵏⵉⵜⵏⵉ ⵜⵜⵃⴰⵎⴰⵏ
ⵉⴷⴰⵎⵎⴻⵏ ⵏ ⵢⵉⵅⴻⴼ ⵏⵙⴻⵏ,
ⵜⵜⴻⴳⴳⴻⵏ ⵍⴼⴻⵅ ⵉ ⵍⴻⵄⵎⵓⵔ ⵏ ⵢⵉⵅⴻⴼ ⵏⵙⴻⵏ.
19 ⴰⵎⵎⵓ ⵉ ⵉⴵⴰⵏ ⵉⴱⵔⵉⴷⴻⵏ ⵏ ⴽⵓⵍ ⵉⵊⵊ
ⵡⴻⵏⵏⵉ ⵉⵜⵜⴰⵣⵣⵍⴻⵏ ⵖⴰⵔ ⴰⵔⴱⴻⵃ,
ⴰⵇⴰ ⴰⵢⴰ ⵉⵜⵜⴻⵟⵟⴻⴼ ⵍⴻⵄⵎⴰⵔ ⵏ ⵙⵉⴷⵉⵙ. ◘1:19 ⴰⵢⵓⴱ 8:13
ⵜⵉⵖⵉⵜ
20 ⵜⵉⵖⵉⵜ ⵜᵉⵜⵜⵍⴰⵖⴰ ⵙ ⵊⵊⵀⴻⴷ ⴷⵉⵀⴰ ⴱⴰⵔⵔⴰ,
ⵜⴻⵙⵙⴳⴻⵄⵄⴻⴷ ⵜⵎⵉⵊⵊⴰ ⵏⵏⴻⵙ ⴷⴻⴳ ⵡⴰⵣⵣⴰⵢⴻⵏ.
21 ⵖⴰⵔ ⵓⵎⴻⵣⵡⴰⵔ ⵏ ⵉⵎⵓⵛⴰⵏ ⵉ ⴷⴰⵢⵙⴻⵏ ⵍⵀⴰⵔⴰⵊ,
ⵜᵉⵜⵜⴱⴰⵔⵔⴰⵃ ⵏⴻⵜⵜⴰⵜ,
ⵖⴰⵔ ⵡⴰⴷⴰⴼⴻⵏ ⵏ ⵜⴻⵡⵡⵓⵔⴰ ⵏ ⵜⴻⵏⴷⵉⵏⵜ
ⵜⴻⵙⵙⴰⵡⴰⵍ ⴰⵡⴰⵍⴻⵏ ⵏⵏⴻⵙ.
22 “ⴰⵍ ⵎⴻⵍⵎⵉ ⵖⴰ ⵇⵇⵉⵎⴻⵏ
ⵉⵃⴰⴼⵉⵢⵢⴻⵏ ⵜⵜⴻⵅⵙⴻⵏ ⵜⴰⵇⵓⴱⴱⴰⵏⴻⵛⵜ,
ⴰⵍ ⵎⴻⵍⵎⵉ ⴷ ⴰⵙⴻⵏ ⵉ ⵖⴰ ⵉⵄⵊⴻⴱ
ⵓⵃⴻⵛⵛⵉ ⵉ ⵉⵎⴻⵙⵜⴻⵀⵣⴰⵢⴻⵏ,
ⵓ ⴰⵍ ⵎⴻⵍⵎⵉ ⵖⴰ ⵛⴰⵔⵀⴻⵏ
ⵉⴱⵓⵀⴰⵍⵉⵢⵢⴻⵏ ⵜⵓⵙⵙⵏⴰ?
23 ⴷⴻⵡⵍⴻⵎ ⵖⴰⵔ ⵓⵡⴻⴱⴱⴻⵅ ⵉⵏⵓ!
ⵅⵣⴰⵔⴻⵎ, ⵏⴻⵛⵛ ⴰⴷ ⵅⴰⵡⴻⵎ ⵙⵙⴼⴰⵔⵔⵖⴻⵖ
ⴰⵔⵔⵓⵃ ⵉⵏⵓ,
ⴰⵡⴰⵍⴻⵏ ⵉⵏⵓ ⴰⴷ ⴰⵡⴻⵎ ⵜⴻⵏ ⵄⴻⵍⵎⴻⵖ.”
24 “ⴰⵇⴰ ⵣⴻⵄⵎⴰ ⵍⴰⵖⵉⵖ ⵓ ⴽⴻⵏⵏⵉⵡ ⵡⴰⵔ ⵜⴻⵅⵙⴻⵎ,
ⵙⵙⵡⵉⵥⵥⴹⴻⵖ ⵏⴻⵛⵛ ⴰⴼⵓⵙ ⵉⵏⵓ,
ⵎⴰⵛⴰ ⵓⵍⴰ ⴷ ⵉⵊⵊ ⵡⴰⵔ ⴷ ⴰⵙ ⵉⵃⴻⴽⴽⴰⵔ. ◘1:24 ⵉⵛⴰ. 65:12; 66:4; ⵉⵔⵎ. 13:10
25 ⵜⴻⵏⴹⴰⵔⴻⵎ ⵛⵛⵡⴰⵔ ⵉⵏⵓ,
ⴰⵡⴻⴱⴱⴻⵅ ⵉⵏⵓ ⵡⴰⵔ ⵜ ⵜⴻⵇⴱⵉⵍⴻⵎ.
26 ⵙ ⵓⵢⴻⵏⵏⵉ ⵓⵍⴰ ⴷ ⵏⴻⵛⵛ
ⴰⴷ ⴹⴻⵃⵛⴻⵖ ⵅ ⵓⴹⴻⵢⵢⴻⵄ ⵏⵡⴻⵎ,
ⵏⴻⵛⵛ ⴰⴷ ⵣⵣⴰⵢⵡⴻⵎ ⵙⵜⴻⵀⵣⴻⵖ
ⵅⵎⵉ ⴷⴷ ⵖⴰ ⵢⴰⵙ ⵓⵏⴻⵅⵍⵉⵄ ⵏⵡⴻⵎ,
27 ⵅⵎⵉ ⴷⴷ ⵖⴰ ⵢⴰⵙ ⵓⵏⴻⵅⵍⵉⵄ ⵏⵡⴻⵎ
ⴰⵎ ⵢⵉⵊⵊ ⵏ ⵓⵔⴻⴷⴷⴻⴵ,
ⴰⴹⴻⵢⵢⴻⵄ ⵏⵡⴻⵎ ⴰⵎ ⵢⵉⵛⵜ ⵏ ⵜⵃⴰⵔⵢⴰⴹⵜ,
ⵅⵎⵉ ⵅⴰⵡⴻⵎ ⴷⴷ ⵖⴰ ⵜⴻⵡⴹⴰ
ⵍⴻⵃⵚⴰⵔⴻⵜ ⴷ ⵜⴻⴳⴳⵯⵓⴷⵉ. ◘1:27 ⴰⵢⵓⴱ 27:9; 35:12; ⵉⵛⴰ. 1:15; ⵉⵔⵎ. 11:11; 14:12; ⵃⵉⵥ. 8:18; ⵎⵉⵅⴰ 3:4
28 ⵅⴻⵏⵏⵉ ⴰⴷ ⵅⴰⴼⵉ ⴷⴷ-ⵍⴰⵖⴰⵏ,
ⵎⴰⵛⴰ ⵏⴻⵛⵛ ⵡⴰⵔ ⴷⴷ-ⵜⵜⴰⵔⵔⵉⵖ,
ⴰⴷ ⵅⴰⴼⵉ ⴰⵔⵣⵓⵏ, ⵎⴰⵛⴰ ⵡⴰⵔ ⴷ ⴰⵢⵉ ⵜⵜⵉⴼⴻⵏ,
29 ⵎⵉⵏⵣⵉ ⵏⵉⵜⵏⵉ ⵛⴰⵔⵀⴻⵏ ⵜⵓⵙⵙⵏⴰ,
ⵓ ⵡⴰⵔ ⵉⵅⴹⴰⵔⴻⵏ ⴰⴷ ⵟⵟⴼⴻⵏ ⴷⵉ ⵜⵉⴳⴳⵯⵓⴷⵉ ⵏ ⵙⵉⴷⵉ.
30 ⵏⵉⵜⵏⵉ ⵡⴰⵔ ⵅⵙⴻⵏ ⵛⴰ ⵍⴻⵛⵡⴰⵔ ⵉⵏⵓ,
ⵎⴰⵔⵔⴰ ⴰⵡⴻⴱⴱⴻⵅ ⵉⵏⵓ ⵏⴹⴰⵔⴻⵏ ⵜ.
31 ⵏⵉⵜⵏⵉ ⴰⴷ ⵛⵛⴻⵏ ⵣⵉ ⵍⵖⵉⴵⴻⵜ ⵏ ⵡⴻⴱⵔⵉⴷ ⵏⵙⴻⵏ,
ⵓ ⴰⴷ ⵊⵊⵉⵡⵏⴻⵏ ⵙ ⵉⵅⴰⵔⵔⵉⵚⴻⵏ ⵏ ⵢⵉⵅⴻⴼ ⵏⵙⴻⵏ,
32 ⵎⵉⵏⵣⵉ ⵓⴼⴼⵓⵖ ⵏ ⵉⵃⴰⴼⴻⵢⵢⴻⵏ
ⵅ ⵡⴻⴱⵔⵉⴷ ⴰⴷ ⵜⴻⵏ ⵉⵏⴻⵖ,
ⵓ ⴰⴼⵍⴰⵃ ⵏ ⵉⴱⵓⵀⴰⵍⵉⵢⵢⴻⵏ ⴰⴷ ⵜⴻⵏ ⵉⵙⵙⵀⴻⵍⵍⴻⴽ.
33 ⵡⵉ ⵖⴰⵔⵉ ⵉ ⵖⴰ ⵉⵙⵍⴻⵏ, ⴰⴷ ⵉⵣⴷⴻⵖ ⴷⵉ ⵍⴰⵎⴰⵏ,
ⴰⴷ ⵢⵉⵍⵉ ⴷⵉ ⵍⴻⵀⵏⴰ ⴱⵍⴰ ⴰⵏⴻⵅⵍⵉⵄ ⵏ ⵜⵓⵄⴻⴼⴼⵏⴰ.”
◘1:7 1:7 ⴰⵢⵓⴱ 28:28; ⵉⵥⵀⴷ. 111:10; ⴰⵡⵍⵏ. 9:10; ⴰⵎⴱ. 12:13
◘1:16 1:16 ⵉⵛⴰ. 59:7; ⵔⵓⵎ. 3:15
◘1:24 1:24 ⵉⵛⴰ. 65:12; 66:4; ⵉⵔⵎ. 13:10
◘1:27 1:27 ⴰⵢⵓⴱ 27:9; 35:12; ⵉⵛⴰ. 1:15; ⵉⵔⵎ. 11:11; 14:12; ⵃⵉⵥ. 8:18; ⵎⵉⵅⴰ 3:4