28
ⵍⵀⴰⵔⴷ ⵏ ⴰⵢⵓⴱ ⵅ ⵜⵉⵖⵉⵜ
1 ⵙ ⵜⵉⴷⴻⵜⵜ, ⴰⵇⴰ ⴷⵉⵏ ⴰⵎⵛⴰⵏ
ⵎⴰⵏⵉ ⵜᵉⵜⵜⵡⴰⴼ ⵏⵏⵓⵇⴰⵔⵜ,
ⵓⵍⴰ ⴷⵉⵏ ⴰⵎⵛⴰⵏ ⵉ ⵡⵓⵔⴻⵖ
ⵎⴰⵏⵉ ⵜ ⵙⵙⵉⵣⴷⵉⴳⴻⵏ.
2 ⵓⵣⵣⴰⵍ ⵜⵜⴰⵡⵢⴻⵏ ⵜ-ⵉ-ⴷⴷ ⵣⴻⴳ ⵓⵛⴰⵍ
ⵓ ⵣⴻⴳ ⵡⴻⵥⵔⵓ ⵙⵙⴼⴻⵙⵙⵢⴻⵏ ⵏⵏⵃⴰⵙ.
3 ⵉⴳⴳⴰ ⴱⵏⴰⴷⴻⵎ ⵇⴻⵟⵟⵓ ⵉ ⵜⴰⴵⴻⵙⵜ,
ⵏⴻⵜⵜⴰ ⵢⴰⵔⴻⵣⵣⵓ ⴷⵉ ⵎⴽⵓⵍ ⴰⵎⵛⴰⵏ ⵎⴰⵏⵉ ⵎⴰ,
ⵅ ⵡⴻⵥⵔⵓ ⵉ ⴷⴷ-ⵉⵜⵜⴻⴼⴼⵖⴻⵏ
ⵣⵉ ⵜⵓⴱⴱⴰⵔⵛⴻⵏⵜ ⴷ ⵜⵉⵍⵉ ⵏ ⵍⵎⴻⵡⵜ.
4 ⵢⴰⵔⵣⴻⵎ ⵉⵊⵊ ⵏ ⵡⴻⵅⵊⵉⴹ
ⴱⵍⴰ ⵉ ⵖⴰ ⵢⵉⵍⵉ ⵃⴻⴷ ⴰⴽⵉⴷⴻⵙ.
ⵜⵜⵡⴰⵜⵜⵓⵏ ⵣⴻⴳ ⵉⴹⴰⵔⴻⵏ ⵏ ⵢⵉⵏⵏⵉ ⵙⴻⵏⵏⴻⵊ ⵏⵙⴻⵏ,
ⵓⵢⵍⴻⵏ ⵜⵜⵔⴰⵃⴻⵏ ⵜⴰⵙⴻⵏ-ⴷⴷ
ⴱⵍⴰ ⵉ ⵖⴰ ⵢⴰⵔⵔⴰ ⴰⵙⴻⵏ-ⴷⴷ ⵃⴻⴷ ⵍⴱⴰⵍ.
5 ⵉⵜⵜⴻⴼⴼⴻⵖ-ⴷⴷ ⵡⴻⵖⵔⵓⵎ ⵣⵉ ⵜⴻⵎⵎⵓⵔⵜ,
ⴰⵎ ⵙⵡⴰⴷⴷⴰⵢ ⵏⵏⴻⵙ ⵎⴰⵔⵔⴰ
ⴰⵅⵎⵉ ⵙ ⵜⵎⴻⵙⵙⵉ ⵉⵏⵏⴻⵇⵍⴻⴱ.
6 ⵉⵥⵔⴰ ⵏⵏⴻⵙ ⴷ ⴰⵎⵛⴰⵏ ⵎⴰⵏⵉ ⵜⵜⴰⴼⴻⵏ ⵚⴰⴼⴼⵉⵔ,
ⴷⴰⵢⴻⵙ ⵉ ⵜⴻⴵⴰ ⵓⵍⴰ ⴷ ⵜⴰⵄⴻⵊⵊⴰⵛⵜ ⵏ ⵡⵓⵔⴻⵖ.
7 ⴰⵊⴹⵉⴹ ⵉⵜⵜⴽⴻⵛⵛⴰⴹⴻⵏ ⵡⴰⵔ ⵉⵙⵙⵉⵏ
ⴰⵎⴻⵙⵔⵓⵇ ⵉ ⵖⴰⵔⴻⵙ ⵉⴵⴰⵏ,
ⵜⵉⵟⵟ ⵏ ⵓⵊⴹⵉⴷ ⴰⵎⴻⵙⵙⵖⵓⵢ ⴰⵎⵓⵇⴹⵉⵄ ⵏ ⵜⵉⵟⵟⴰⵡⵉⵏ
ⵄⴻⵎⵎⴰⵔⵚ ⵡⴰⵔ ⵜ ⵜⴻⵃⴹⵉ.
8 ⵉⵢⵔⴰⴷⴻⵏ ⵉⵎⴻⵥⵢⴰⵏⴻⵏ ⵉⵏⴻⴼⴼⵅⴻⵏ
ⵡⴰⵔ ⴷⴰⵢⴻⵙ ⵓⵢⵓⵔⴻⵏ,
ⵓⵍⴰ ⴷ ⴰⵢⵔⴰⴷ ⵉⵣⴻⵀⵀⴰⵔⴻⵏ ⵡⴰⵔ ⵜ ⵉⵜⵜⵛⵓⵇⵉ.
9 ⵎⴰⵛⴰ ⴱⵏⴰⴷⴻⵎ ⵉⵙⴰⵔⵔⴻⵃ ⴰⴼⵓⵙ ⵏⵏⴻⵙ
ⵖⴰⵔ ⵙⵙⴻⴵⴰⵃ ⵉⵇⴻⵙⵃⴻⵏ,
ⵉⵙⵙⵏⴻⵇⵍⴰⴱ ⵉⴷⵓⵔⴰⵔ ⴽⵓⵍⵛⵉ.
10 ⴷⵉ ⵍⴻⵊⵔⵓⴼ ⵉⵇⵇⴰⵣ ⵉⵖⴻⵣⵔⴰⵏ,
ⵜⵉⵟⵟ ⵏⵏⴻⵙ ⵜᵉⵜⵜⵡⴰⵍⴰ ⵎⴰⵔⵔⴰ ⵎⵉⵏ ⵉⵖⵍⴰⵏ.
11 ⵉⵃⴻⵡⵡⴻⵇ ⵉ ⵉⵖⴻⵣⵔⴰⵏ
ⴰⵍⴰⵎⵉ ⴰⵎⴰⵏ ⵡⴰⵔ ⵇⵇⵉⵎⴻⵏ ⵜⵜⴻⴼⴼⵖⴻⵏ-ⴷⴷ,
ⵎⵉⵏ ⴷⴰⵢⴻⵙ ⵉⵏⵓⴼⴼⴰⵔⴻⵏ
ⵉⵜⵜⴰⵡⵢⵉ ⵜ-ⵉ-ⴷⴷ ⵖⴰⵔ ⵜⴼⴰⵡⵜ.
12 ⵜⵉⵖⵉⵜ ⵎⴰⵛⴰ, ⵎⴰⵏⵉ ⵜᵉⵜⵜⵡⴰⴼ?
ⵓ ⵎⴰⵏⵉ ⵜⴻⴵⴰ ⵜⵣⴻⴷⴷⵉⵖⵜ ⵏ ⵍⴻⴼⵀⴰⵎⴻⵜ?
13 ⴱⵏⴰⴷⴻⵎ ⵡⴰⵔ ⵉⵙⵙⵉⵏ ⵍⵇⵉⵎⴻⵜ ⵏⵏⴻⵙ,
ⵡⴰⵔ ⵜᵉⵜⵜⵡⵉⴼ ⵜⵉⵖⵉⵜ
ⴷⵉ ⵜⴻⵎⵎⵓⵔⵜ ⵏ ⵢⵉⵏⵏⵉ ⵉⴷⴷⴰⵔⴻⵏ.
14 ⴰⵎⴰⵏ ⵉⵀⴻⵡⵍⴻⵏ ⵇⵇⴰⵔⴻⵏ:
‘ⴷⴰⵢⵏⴻⵖ ⵡⴰⵔ ⵜⴻⴵⵉ ⵛⴰ!’,
ⵍⴻⴱⵃⴰⵔ ⵉⵇⵇⴰⵔ: ‘ⵖⴰⵔⵉ ⵡⴰⵔ ⴷⴰ ⵜⴻⴵⵉ ⵛⴰ!’ ◘28:14 ⴰⵢⵓⴱ 28:22
15 ⵡⴰⵔ ⵉⵣⴻⵎⵎⴰⵔ ⴰⴷ ⵉⵎⵎⴻⵡⵛ
ⵡⵓⵔⴻⵖ ⵉⵇⵇⵓⵔⴻⵏ
ⴷⴻⴳ ⵡⴻⵎⵛⴰⵏ ⵏⵏⴻⵙ,
ⵙⵙⵓⵎ ⵏⵏⴻⵙ ⵡⴰⵔ ⵣⴻⵎⵎⴰⵔⴻⵏ
ⴰⴷ ⵜ ⵡⴻⵣⵏⴻⵏ ⵙ ⵏⵏⵓⵇⴰⵔⵜ. ◘28:15 ⴰⵡⵍⵏ. 3:14; 8:11, 19; 16:16
16 ⵡⴰⵔ ⵣⴻⵎⵎⴰⵔⴻⵏ ⴰⴷ ⵡⴻⵣⵏⴻⵏ ⵙⵙⵓⵎ ⵏⵏⴻⵙ
ⵙ ⵡⵓⵔⴻⵖ ⵉⵖⵍⴰⵏ ⵣⵉ ⵓⴼⵉⵔ,
ⵙ ⵡⴻⵥⵔⵓ ⵏ ⵓⵏⵉⴽⵙ ⵉⵖⵍⴰⵏ ⴷ ⵚⴰⴼⴼⵉⵔ ⴰⵣⵉⵣⴰ.
17 ⵡⴰⵔ ⵣⴻⵎⵎⴰⵔⴻⵏ
ⴰⴷ ⵎⵎⵇⵓⴷⴷⴰⵏ ⵍⵇⵉⵎⴻⵜ ⵏⵏⴻⵙ
ⴰⴽ-ⴷ ⵡⵓⵔⴻⵖ ⵏⵉⵖ ⴽⵔⵉⵙⵜⴰⵍ,
ⵏⵉⵖ ⴰⴷ ⵜⵜ ⴱⴻⴷⴷⵍⴻⵏ
ⵙ ⵉⵛⵜ ⵏ ⵍⵇⴻⵛⵄⴻⵜ ⵏ ⵡⵓⵔⴻⵖ ⵉⵜⵜⵡⴰⵚⴻⴼⴼⴰⵏ.
18 ⵡⴰⵔ ⵜⵜⴻⵄⵇⵉⵍⴻⵏ ⵄⴰⴷ ⵅ ⵜⵢⴰⵇⵓⵜⵉⵏ
ⴷ ⵡⴻⵥⵔⵓ ⵏ ⵓⴽⵔⵉⵙⵜⴰⵍ,
ⵎⴰⵖⴰⵔ ⵜⵡⴰⴼⵉⵜ ⵏ ⵜⵉⵖⵉⵜ ⵜⵓⵄⵄⵍⴰ
ⵅ ⵜⵡⴰⴼⵉⵜ ⵏ ⵍⵎⴰⵔⵊⴰⵏ.
19 ⵍⴻⵄⵇⵉⵇ ⴰⵣⴻⴳⴳⵡⴰⵖ ⵣⵉ ⴽⵓⵛ
ⵡⴰⵔ ⴷⴰⵢⴻⵙ ⵢⴰⵔⵡⵉⵙ,
ⵡⴰⵔ ⵜⵣⴻⵎⵎⴰⵔ ⴰⴷ ⵜᵉⵜⵜⵡⴰⵡⵣⴻⵏ ⵜⵉⵖⵉⵜ
ⵙ ⵡⵓⵔⴻⵖ ⵉⵚⴼⴰⵏ ⵉⵖⵍⴰⵏ.
20 ⵎⴰⵏⵉⵙ ⴷⴷ-ⵜⵓⵙⴰ ⵅⴻⵏⵏⵉ ⵜⵉⵖⵉⵜ
ⵓ ⵎⴰⵏⵉ ⵜⴻⴵⴰ ⵜⵣⴻⴷⴷⵉⵖⵜ ⵏ ⵍⴻⴼⵀⴰⵎⴻⵜ? ◘28:20 ⴰⵢⵓⴱ 28:12
21 ⴰⵇⴰ-ⵜⵜ ⵜⵏⵓⴼⴼⴰⵔ ⵅ ⵜⵉⵟⵟⴰⵡⵉⵏ
ⵏ ⵎⴰⵔⵔⴰ ⵎⵉⵏ ⵉⴷⴷⴰⵔⴻⵏ,
ⵜᵉⵜⵜⵡⴰⵍⴻⵃⵃⴻⴼ ⵅ ⵉⵊⴹⴰⴹ ⵏ ⵓⵊⴻⵏⵏⴰ.
22 ⴰⵀⴻⵍⵍⴻⴽ ⴷ ⵍⵎⴻⵡⵜ ⵇⵇⴰⵔⴻⵏ:
‘ⵙ ⵉⵎⴻⵣⵣⵓⵖⴻⵏ ⵏⵏⴻⵖ ⵏⴻⵙⵍⴰ ⵅⴰⵙ ⵍⴻⵅⴱⴰⵔ!’ ◘28:22 ⴰⵢⵓⴱ 28:14
23 ⴰⵔⴻⴱⴱⵉ ⵉⴼⴻⵀⵀⴻⵎ ⴰⴱⵔⵉⴷ ⵏⵏⴻⵙ,
ⵏⴻⵜⵜⴰ ⵉⵙⵙⴻⵏ ⵜⴰⵣⴻⴷⴷⵉⵖⵜ ⵏⵏⴻⵙ,
24 ⵎⴰⵖⴰⵔ ⵉⵜⵜⵡⴰⵍⴰ ⴰⵍ ⵜⵉⵏⴻⴳⴳⵓⵔⴰ ⵏ ⵜⴻⵎⵎⵓⵔⵜ,
ⵉⵥⴰⵔⵔ ⵎⴰⵔⵔⴰ ⵎⵉⵏ ⵉⴵⴰⵏ ⵙⴰⴷⵓ ⵉⵊⴻⵏⵡⴰⵏ.
25 ⵓⵎⵉ ⵉⴳⴳⴰ ⵉ ⵓⵙⴻⵎⵎⵉⴹ ⵊⵊⴻⵀⴷ ⵏⵏⴻⵙ,
ⵓⵎⵉ ⵉⵄⴱⴰⵔ ⵍⴻⵄⴱⴰⵔ ⵏ ⵡⴰⵎⴰⵏ, ◘28:25 ⴰⵡⵍⵏ. 8:29
26 ⵓⵎⵉ ⵉⴳⴳⴰ ⵉ ⵡⴻⵏⵥⴰⵔ ⵇⴻⵟⵟⵓ,
ⵉⵊⵊ ⵏ ⵡⴻⴱⵔⵉⴷ ⵉ ⵡⴰⵙⵙⴰⵎ ⵏ ⵡⴰⵊⵊⴰⵊⴻⵏ,
27 ⵅⴻⵏⵏⵉ ⵉⵥⵔⴰ ⵉ-ⵜⵜ, ⵉⵙⵙⴰⵔⴳⴻⴱ ⵉ-ⵜⵜ,
ⵓⵛⴰ ⵉⵙⵙⴱⴻⴷⴷ ⵉ-ⵜⵜ ⴷⴻⴳ ⵡⴻⵎⵛⴰⵏ ⵏⵏⴻⵙ
ⵓⵛⴰ ⵉⴱⴻⵇⵇⴻⵛ ⴷⴰⵢⴻⵙ,
28 ⵓⵛⴰ ⵉⵏⵏⴰ ⵉ ⴱⵏⴰⴷⴻⵎ:
‘ⵅⵣⴰⵔ, ⵜⵉⴳⴳⵯⵓⴷⵉ ⵣⵉ ⵙⵉⴷⵉ ⴷ ⵜⵉⵖⵉⵜ,
ⴰⴱⴻⵄⵄⴻⴷ ⵅ ⵎⵉⵏ ⵉⴵⴰⵏ ⴷ ⴰⵄⴻⴼⴼⴰⵏ,
◘28:14 28:14 ⴰⵢⵓⴱ 28:22
◘28:15 28:15 ⴰⵡⵍⵏ. 3:14; 8:11, 19; 16:16
◘28:20 28:20 ⴰⵢⵓⴱ 28:12
◘28:22 28:22 ⴰⵢⵓⴱ 28:14
◘28:25 28:25 ⴰⵡⵍⵏ. 8:29
◼28:28 28:28 ⵙⵉⴷⵉ-ⵙ ⵜⵄⵉⴱⵔⴰⵏⵉⵜ ‘ⵙⵉⴷⵉ ⵉⵏⵓ’.
◘28:28 28:28 ⵉⵥⵀⴷ. 111:10; ⴰⵡⵍⵏ. 1:7; 9:10