8
ⴰⵍⴰⵖⵉ ⵏ ⵜⵉⵖⵉⵜ
1 ⵎⴰ ⵡⴰⵔ ⵜᵉⵜⵜⵍⵉⵖⵉ ⵜⵉⵖⵉⵜ ⵓ ⵡⴰⵔ ⵜⴻⵙⴳⵉⵄⵄⵉⴷ
ⵍⴻⴼⵀⴰⵎⴻⵜ ⵜⵎⵉⵊⵊⴰ ⵏⵏⴻⵙ? ◘8:1 ⴰⵡⵍⵏ. 1:20, 21
2 ⵅ ⵜⵇⵉⵛⵛⴰⵜ ⵏ ⵍⴻⴳⵄⵓⴷⵉ ⵅ ⵡⴻⴱⵔⵉⴷ,
ⵎⴰⵏⵉ ⵜⵜⴻⵎⵙⴻⵍⵇⴰⵏ ⵉⵎⴻⵙⵔⴰⵇ
ⵜⴱⴻⴷⴷ ⵏⴻⵜⵜⴰⵜ ⴷ ⴰⴱⴻⴷⴷⵉ.
3 ⵖⴰⵔ ⵓⵖⴻⵣⴷⵉⵙ ⵏ ⵜⴻⵡⵡⵓⵔⴰ,
ⵖⴰⵔ ⵡⴰⴷⴰⴼ ⵏ ⵜⴻⵏⴷⵉⵏⵜ,
ⵎⴰⵏⵉ ⵖⴰ ⵜⴰⴷⴼⴻⴷ ⵅ ⵜⴻⵡⵡⵓⵔⴰ,
ⵜᵉⵜⵜⵍⴰⵖⴰ ⵙ ⵊⵊⴻⵀⴷ:
4 “ⵉ ⴽⴻⵏⵏⵉⵡ, ⴰ ⵉⵔⵢⴰⵣⴻⵏ, ⵜⵜⵍⴰⵖⵉⵖ,
ⵜⵎⵉⵊⵊⴰ ⵉⵏⵓ ⵜᵉⵜⵜⴻⴼⴼⴻⵖ ⵖⴰⵔ ⵜⴰⵔⵡⴰ ⵏ ⴱⵏⴰⴷⴻⵎ.
5 ⴽⴻⵏⵏⵉⵡ ⵉⵃⴰⴼⵉⵢⵢⴻⵏ,
ⴼⴻⵀⵎⴻⵎ ⵅⴻⵏⵏⵉ ⵎⵉⵏ ⵉⴵⴰⵏ ⴷ ⴰⴼⵜⴰⵏ,
ⴽⴻⵏⵏⵉⵡ ⵉⴱⵓⵀⴰⵍⵉⵢⵢⴻⵏ,
ⴼⴻⵀⵎⴻⵎ ⵙ ⵡⵓⵍ ⵏⵡⴻⵎ.
6 ⵙⵍⴻⵎ, ⵎⵉⵏⵣⵉ ⴰⴷ ⵙⵙⵉⵡⵍⴻⵖ
ⴰⵡⴰⵍⴻⵏ ⵉ ⴷⴷ-ⵉⵊⴻⴱⴱⴷⴻⵏ ⵍⴻⴼⵜⴻⵏ,
ⴰⵏⵓⵔⵣⴻⵎ ⵏ ⵉⵢⴻⵏⵛⵉⵛⴻⵏ ⵉⵏⵓ
ⵊⴻⴱⴱⴻⴷ-ⴷⴷ ⵜⵉⵎⴻⵙⵍⴰⵢⵉⵏ ⵉⵙⴻⴳⴳⴷⴻⵏ,
7 ⵎⴰⵖⴰⵔ ⴰⵏⴻⵖ ⵉⵏⵓ ⴰⴷ ⵢⵉⵏⵉ ⵜⵉⴷⴻⵜⵜ ⵙ ⵏⵏⴻⵢⵢⴻⵜ,
ⵍⵀⴰⵔⴷ ⵉⵄⴻⴼⴼⵏⴻⵏ ⴰⵇⴰ-ⵜ ⴷ ⵏⵏⵄⵉ
ⵉ ⵉⵢⴻⵏⵛⵉⵛⴻⵏ ⵉⵏⵓ.
8 ⵎⴰⵔⵔⴰ ⴰⵡⴰⵍⴻⵏ ⵏ ⵓⵇⴻⵎⵎⵓⵎ ⵉⵏⵓ
ⵜⵜⴻⴼⴼⵖⴻⵏ-ⴷⴷ ⵣⵉ ⵜⵙⴻⴳⴷⴰ,
ⵡⴰⵔ ⴷⴰⵢⵙⴻⵏ ⵓⵍⴰ ⴷ ⵉⵛⵜ ⵏ ⵍⵃⴰⵊⵊⴻⵜ
ⵉⵅⵏⵓⵏⵏⴻⵙⴻⵏ ⵏⵉⵖ ⵉⴼⴰⵔⵖⴻⵏ.
9 ⴰⵇⴰ ⴰⵜⴻⵏ ⵎⴰⵔⵔⴰ ⵚⴼⴰⵏ
ⵉ ⵡⴻⵏⵏⵉ ⴷⵉ ⵜⴻⴵⴰ ⵍⴻⴼⵀⴰⵎⴻⵜ,
ⵓⵍⴰ ⵙ ⵍⴻⵇⵢⴰⵙ ⵉ ⵢⵉⵏⵏⵉ ⵉⵅⵙⴻⵏ ⴰⴷ ⴰⴼⴻⵏ ⵜⵓⵙⵙⵏⴰ.
10 ⴽⵙⵉⵎ ⵜⵜⴰⵔⴱⵉⵢⵢⴻⵜ ⵉⵏⵓ, ⵡⴰⵔ ⵉⴵⵉ ⵏⵏⵓⵇⴰⵔⵜ,
ⵓⵍⴰ ⵜⵓⵙⵙⵏⴰ ⴽⵜⴰⵔ ⵅ ⵡⵓⵔⴻⵖ ⵉⵇⵇⵓⵔⴻⵏ,
11 ⵎⴰⵖⴰⵔ ⵜⵉⵖⵉⵜ ⵃⵙⴻⵏ ⵣⵉ ⵍⵎⴰⵔⵊⴰⵏ,
ⵎⴰⵔⵔⴰ ⵎⵉⵏ ⴷⵉ ⵉⵣⴻⵎⵎⴰⵔ ⴱⵏⴰⴷⴻⵎ
ⴰⴷ ⵉⵎⴻⵥⵔⵉ,
ⵡⴰⵔ ⵉⵣⴻⵎⵎⴰⵔ ⴰⴷ ⴷⴰⵢⴻⵙ ⵢⴰⵔⵡⴻⵙ. ◘8:11 ⴰⵢⵓⴱ 28:15; ⵉⵥⵀⴷ. 19:11; ⴰⵡⵍⵏ. 3:14, 15; 16:16
12 ⵏⴻⵛⵛ, ⵜⵉⵖⵉⵜ, ⵣⴻⴷⴷⵖⴻⵖ ⵖⴰⵔ ⵡⴻⴼⵜⴰⵏ,
ⵜⵜⴰⴼⴻⵖ ⵜⵓⵙⵙⵏⴰ ⵙ ⵓⵃⴰⴷⵓⵔ.
13 ⵜⵉⴳⴳⵯⵓⴷⵉ ⵏ ⵙⵉⴷⵉ ⴷ ⴰⵛⵔⴰⵀ ⵏ ⵍⵖⴰⵔ,
ⵏⵏⴼⴰⵅⴻⵜ, ⵜⴰⵛⴻⵏⵏⴰⵄⵜ ⴷ ⵓⵎⴻⵙⵔⵓⵇ ⴰⵄⴻⴼⴼⴰⵏ,
ⵏⴻⵛⵛ ⵛⴰⵔⵔⵀⴻⵖ ⵓⵍⴰ ⴷ ⴰⵇⴻⵎⵎⵓⵎ
ⵉⵛⵛⵓⵔ ⵙ ⵍⴻⵅⴷⴰⵄⴰⵜ.
14 ⵖⴰⵔⵉ ⴰⵛⴰⵡⴰⵔ ⴷ ⵜⵡⵉⵣⴰ,
ⵏⴻⵛⵛ ⴷ ⵍⴻⴼⵀⴰⵎⴻⵜ, ⵖⴰⵔⵉ ⵊⵊⴻⵀⴷ.
15 ⵣⵣⴰⵢⵉ ⵃⴻⴽⴽⵎⴻⵏ ⵉⵊⴻⴵⵉⴷⴻⵏ,
ⵣⵣⴰⵢⵉ ⵜⵜⴰⵔⴻⵢⵙⴻⵏ ⴰⵢⵜ ⵏ ⵊⵊⴻⵀⴷ ⵙ ⵜⵙⴻⴳⴷⴰ.
16 ⵣⵣⴰⵢⵉ ⵃⴻⴽⴽⵎⴻⵏ ⵍⵃⵓⴽⴽⴰⵎ
ⴷ ⵜⴰⵔⵡⴰ ⵏ ⵜⴰⵚⵉⵍⴻⵜ,
ⵎⴰⵔⵔⴰ ⵍⵇⵓⴹⴰⵜ ⵏ ⵜⴻⵎⵎⵓⵔⵜ.
17 ⵏⴻⵛⵛ ⵜⵜⴻⵅⵙⴻⵖ ⵎⴰⵔⵔⴰ
ⵉⵏⵏⵉ ⴷ ⴰⵢⵉ ⵉⵜⵜⴻⵅⵙⴻⵏ,
ⴷ ⵢⵉⵏⵏⵉ ⵅⴰⴼⵉ ⵢⴰⵔⴻⵣⵣⵓⵏ ⵣⵉⵛ, ⴰⴷ ⴰⵢⵉ ⴰⴼⴻⵏ.
18 ⴰⴳⵍⴰ ⴷ ⵛⵛⴰⵏ ⴰⵇⴰ ⴰⵜⴻⵏ ⵖⴰⵔⵉ,
ⴰⴳⵍⴰ ⵉⵇⵇⵉⵎⴻⵏ ⴷ ⵜⵙⴻⴳⴷⴰ. ◘8:18 ⴰⵡⵍⵏ. 3:16
19 ⴼⵔⵓⵜⴰ ⵉⵏⵓ ⵜⴻⵛⵏⴰ ⵅ ⵡⵓⵔⴻⵖ ⵉⵜⵜⵉⵙⵙⵉⵇⴻⵏ,
ⵡⴰⵀ ⵅ ⵡⵓⵔⴻⵖ ⴰⵣⴷⴰⴷ,
ⵍⵖⵉⴵⴻⵜ ⵉⵏⵓ ⵜⴻⵄⴷⵓ ⵏⵏⵓⵇⴰⵔⵜ ⵉⵇⵇⵓⵔⴻⵏ.◘8:19 ⴰⵡⵍⵏ. 3:14
20 ⵏⴻⵛⵛ ⴳⴳⵓⵔⴻⵖ ⵅ ⵓⵎⴻⵙⵔⵓⵇ ⵏ ⵜⵙⴻⴳⴷⴰ,
ⴷⵉ ⵍⵡⴻⵙⵟ ⵏ ⵉⵎⴻⵙⵔⴰⵇ ⵏ ⵍⵃⴻⵇⵇ,
21 ⵃⵉⵎⴰ ⴰⴷ ⴰⵔⵔⴻⵖ ⵉⵏⵏⵉ ⴷ ⴰⵢⵉ ⵉⵜⵜⴻⵅⵙⴻⵏ
ⴰⴷ ⵟⵟⴼⴻⵏ ⵉⵛⵜ ⵏ ⵜⴻⵙⵖⴰⵔⵜ ⴷ ⵍⵡⴰⵔⵜ,
ⵏⴻⵛⵛ ⴰⴷ ⵛⵛⵓⵔⴻⵖ ⵉⵅⵅⴰⵎⴻⵏ ⵏ ⵜⵅⵓⴱⴰⵢ ⵏⵙⴻⵏ.
22 ⵙⵉⴷⵉ ⵉⴳⴳⴰ ⴰⵢⵉ ⴷ ⴰⵎⴻⵣⵡⴰⵔⵓ ⵏ ⵡⴻⴱⵔⵉⴷ ⵏⵏⴻⵙ,
ⵄⴰⴷ ⵇⴱⴻⵍ ⴰⵎⴻⵣⵡⴰⵔⵓ ⵏ ⵜⵎⴻⴳⴳⴰ ⵏⵏⴻⵙ
ⵣⴻⴳ ⵡⴻⵛⵃⴰⵍ ⵓⵢⴰ.
23 ⵣⵉ ⵍⴻⴱⴷⴰ ⵉⵜⵜⵡⴰⵣⴻⴵⴻⵄ ⵅⴰⴼⵉ ⵊⵊⴻⵀⴷ,
ⵣⴻⴳ ⵓⵎⴻⵣⵡⴰⵔⵓ,
ⵣⵉ ⵍⵡⴻⵇⵜ ⵏ ⵓⵎⴻⵣⵡⴰⵔⵓ
ⵉ ⴷⵉ ⵜᵉⵜⵜⵡⴰⴳⴳ ⵜⴻⵎⵎⵓⵔⵜ, ◘8:23 ⵢⵃ. 1:1
24 ⵓⵎⵉ ⵡⴰⵔ ⴷⵉⵏ ⵜⵓⵖⵉ ⵄⴰⴷ ⴰⵎⴰⵏ ⵉⵀⴻⵡⵍⴻⵏ,
ⵏⴻⵛⵛ ⵜⵜⵡⴰⵅⴻⵍⵇⴻⵖ-ⴷⴷ,
ⵓⵎⵉ ⵡⴰⵔ ⴷⵉⵏ ⵜⵓⵖⵉ ⵄⴰⴷ ⵍⵄⵓⵏⵚⴰⵔⴰⵜ
ⵛⵛⵓⵔⴻⵏⵜ ⵙ ⵡⴰⵎⴰⵏ.
25 ⵇⴱⴻⵍ ⵎⴰ ⴰⴷ ⵜⵜⵡⴰⴳⴳⴻⵏ ⵉⴷⵓⵔⴰⵔ,
ⵇⴱⴻⵍ ⵎⴰ ⴰⴷ ⵉⵍⵉⵏⵜ ⵜⴻⵡⵔⵉⵔⵉⵏ,
ⵜⵓⵖⴰ ⵅⴻⵍⵇⴻⵖ-ⴷⴷ ⵏⴻⵛⵛ.
26 ⵏⴻⵜⵜⴰ ⵜⵓⵖⴰ ⵄⴰⴷ ⵡⴰⵔ ⴷⴷ-ⵉⵅⵍⵉⵇ
ⵜⴰⵎⵎⵓⵔⵜ ⴷ ⵉⵢⵢⴰⵔⴻⵏ,
ⵓⵍⴰ ⴷ ⵜⴰⵎⴻⵣⵡⴰⵔⵓⵜ ⵏ ⵜⵄⴻⵊⵊⴰⵊⵜ ⵏ ⴷⴷⵓⵏⴻⵛⵜ.
27 ⵓⵎⵉ ⵏⴻⵜⵜⴰ ⵉⴳⴳⴰ ⵉⵊⴻⵏⵡⴰⵏ, ⵜⵓⵖⴰ ⴰⵢⵉ ⴷⵉⵏ,
ⵓⵎⵉ ⵏⴻⵜⵜⴰ ⵢⴰⵔⵛⴻⵎ ⵉⵛⵜ ⵏ ⵜⵇⵓⵔⴰⵔⴻⵛⵜ
ⵅ ⵡⵓⴷⴻⵎ ⵏ ⵡⴰⵎⴰⵏ ⵉⵀⴻⵡⵍⴻⵏ. ◘8:27 ⴰⵢⵓⴱ 26:10
28 ⵓⵎⵉ ⵏⴻⵜⵜⴰ ⵉⴳⴳⴰ ⵉⵙⴻⵢⵏⵓⵜⴻⵏ ⵙⴻⵏⵏⴻⵊ,
ⵓⵎⵉ ⵜⵜⵡⴰⵊⴻⵀⴷⴻⵏⵜ
ⵍⵄⵓⵏⵚⴰⵔⴰⵜ ⵏ ⵡⴰⵎⴰⵏ ⵉⵀⴻⵡⵍⴻⵏ, ◘8:28 ⴰⵎⵥ. 7:11
29 ⵓⵎⵉ ⵏⴻⵜⵜⴰ ⵉⴳⴳⴰ ⵉ ⵍⴻⴱⵃⴰⵔ ⴰⵢⵎⵉⵔ ⵏⵏⴻⵙ,
ⵎⴰⵃⴻⵏⴷ ⴰⵎⴰⵏ
ⵡⴰⵔ ⴷⴷ-ⵄⴻⴷⴷⵓⵏ ⵍⵓⵎⵓⵔ ⵏⵏⴻⵙ,
ⵓⵎⵉ ⵏⴻⵜⵜⴰ ⵉⵄⴱⴰⵔ ⴷⵙⵓⵙⴰ ⵏ ⵜⴻⵎⵎⵓⵔⵜ, ◘8:29 ⴰⵎⵥ. 1:9, 10; ⴰⵢⵓⴱ 38:10, 11; ⵉⵥⵀⴷ. 104:9
30 ⵜⵓⵖⴰ ⴰⵢⵉ ⴷ ⴰⵎⵓⴷⵔⵓⵙ ⵉⵄⵉⵣⵣⴻⵏ
ⵖⴰⵔ ⵓⵖⴻⵣⴷⵉⵙ ⵏⵏⴻⵙ.
ⵏⴻⵛⵛ ⵜⵓⵖⴰ ⴰⵢⵉ ⵎⴰⵔⵔⴰ ⴷ ⵜⴰⵔⵔⵉⵜ ⵏ ⵎⴻⵥⵔⵉ
ⴰⵙⵙ ⵅ ⵡⴰⵙⵙ,
ⵜⵜⵉⵔⴰⵔⴻⵖ ⵣⵣⴰⵜ ⵉ ⵡⵓⴷⴻⵎ ⵏⵏⴻⵙ ⵍⴻⴱⴷⴰ, ◘8:30 ⵢⵃ. 5:17
31 ⵜⵜⵉⵔⴰⵔⴻⵖ ⴷⵉ ⵎⴰⵔⵔⴰ ⵜⴰⵎⵎⵓⵔⵜ ⵏⵏⴻⵙ,
ⴰⵎ ⵜⵓⵖⴰ ⵜⴰⵔⵔⵉⵜ ⵏ ⵎⴻⵥⵔⵉ ⵉⵏⵓ
ⴰⴽ-ⴷ ⵜⴰⵔⵡⴰ ⵏ ⴱⵏⴰⴷⴻⵎ.
32 ⵅⴻⵏⵏⵉ ⵍⴻⵅⵅⵓ, ⴰ ⵉⵃⴻⵏⵊⵉⵔⴻⵏ ⵉⵏⵓ,
ⵙⵍⴻⵎ-ⴷⴷ ⵖⴰⵔⵉ!
ⵙⵙⴻⵄⴷ ⵏ ⵢⵉⵏⵏⵉ ⵉⵃⴻⵟⵟⴰⵏ ⵉⴱⵔⵉⴷⴻⵏ ⵉⵏⵓ. ◘8:32 ⵉⵥⵀⴷ. 119:1, 2; 128:1; ⵍⴽ. 11:28
33 ⵙⵍⴻⵎ ⵖⴰⵔ ⵜⵜⴰⵔⴱⵉⵢⵢⴻⵜ
ⵓ ⴷⴻⵡⵍⴻⵎ ⴷ ⵉⵎⵉⵖⵉⵙⴻⵏ,
ⵡⴰⵔ ⵏⴻⵟⵟⴰⵔⴻⵎ ⵜⵜⴰⵔⴱⵉⵢⵢⴻⵜ.
34 ⵙⵙⴻⵄⴷ ⵏ ⴱⵏⴰⴷⴻⵎ ⵏⵏⵉ ⵖⴰⵔⵉ ⵉⵙⵍⴰⵏ,
ⵡⴻⵏⵏⵉ ⵉⵟⵟⴼⴻⵏ ⴰⵛⴱⴰⵔ ⵖⴰⵔ ⵜⴻⵡⵡⵓⵔⴰ ⵉⵏⵓ
ⵣⴻⴳ ⵡⴰⵙⵙ ⴰⵍ ⵡⴰⵙⵙ,
ⵉⵃⴻⵜⵜⴰ ⵅ ⵜⵖⴻⵎⵎⴰⵔ ⵏ ⵜⴻⵡⵡⵓⵔⴰ ⵉⵏⵓ,
35 ⵎⴰⵖⴰⵔ ⵡⴻⵏⵏⵉ ⴷ ⴰⵢⵉ ⵢⵓⴼⵉⵏ, ⴰⴷ ⵢⴰⴼ ⵜⵓⴷⴰⵔⵜ,
ⵓ ⴰⴷ ⵉⵟⵟⴻⴼ ⴰⵔⴹⴰ ⵏ ⵙⵉⴷⵉ. ◘8:35 ⴰⵡⵍⵏ. 12:2
36 ⵡⴻⵏⵏⵉ ⵉ ⴷ ⴰⵢⵉ ⵉⵅⴹⴰⵏ, ⵉⵢⴻⵣⵣⴻⵎ ⵍⴻⵄⵎⴰⵔ ⵏⵏⴻⵙ,
ⵎⴰⵔⵔⴰ ⵉⵏⵏⵉ ⴷ ⴰⵢⵉ ⵉⵛⴰⵔⵔⵀⴻⵏ, ⵜⵜⴻⵅⵙⴻⵏ ⵍⵎⴻⵡⵜ.
◘8:1 8:1 ⴰⵡⵍⵏ. 1:20, 21
◘8:11 8:11 ⴰⵢⵓⴱ 28:15; ⵉⵥⵀⴷ. 19:11; ⴰⵡⵍⵏ. 3:14, 15; 16:16
◘8:18 8:18 ⴰⵡⵍⵏ. 3:16
◘8:19 8:19 ⴰⵡⵍⵏ. 3:14
◘8:27 8:27 ⴰⵢⵓⴱ 26:10
◘8:29 8:29 ⴰⵎⵥ. 1:9, 10; ⴰⵢⵓⴱ 38:10, 11; ⵉⵥⵀⴷ. 104:9
◘8:32 8:32 ⵉⵥⵀⴷ. 119:1, 2; 128:1; ⵍⴽ. 11:28
◘8:35 8:35 ⴰⵡⵍⵏ. 12:2