1 ⵓⵎⵉ ⵡⴰⵔ ⵏⵣⴻⵎⵎⴰⵔ ⴰⴷ ⵜ ⵏⴻⵚⴱⴰⵔ ⴽⵜⴰⵔ, ⵜⵓⵖⴰ ⵉⵜⵜⵖⵉⵍ ⴰⵏⴻⵖ ⵎⵍⵉⵃ ⵎⴰⵃⴻⵏⴷ ⴰⴷ ⵏⴻⵇⵇⵉⵎ ⴷⵉ ⴰⵜⵉⵏⴰ ⵡⴻⵃⵃⴻⴷⵏⴻⵖ, 2 ⵓⵛⴰ ⵏⴻⵙⵙⴻⴽⴽ ⴰⵡⴻⵎ-ⴷⴷ ⵓⵎⴰⵜⵏⴻⵖ ⵜⵉⵎⵓⵜⵉⵢⵓ. ⵏⴻⵜⵜⴰ ⴷ ⴰⵎⵙⴻⵅⵅⴰⵔ ⵏ ⴰⵔⴻⴱⴱⵉ ⴷ ⴰⵎⵄⴰⵡⴻⵏ ⵏⵏⴻⵖ ⴷⵉ ⵜⴱⴰⵔⵔⴻⵃⵜ ⵏ ⵍⴻⵅⴱⴰⵔ ⴰⵚⴻⴱⵃⴰⵏ ⵏ ⵍⵎⴰⵙⵉⵃ, ⴰⵍⴰⵎⵉ ⵉⵣⴻⵎⵎⴰⵔ ⴰⴷ ⴽⴻⵏⵏⵉⵡ ⵉⵙⵙⴻⵊⵀⴻⴷ ⵓ ⴰⴷ ⵉⵇⴻⴵⴻⴱ ⵍ’ⵉⵎⴰⵏ ⵏⵡⴻⵎ, ◘3:2 ⵍⴻⵅ. 16:1; ⵔⵓⵎ. 16:21; ⴼⵉⵍ. 2:19. 3 ⵃⵉⵎⴰ ⵓⵍⴰ ⴷ ⵉⵊⵊ ⵣⵣⴰⵢⵡⴻⵎ ⵡⴰⵔ ⵉⵇⴻⵟⵟⴻⵄ ⵍⴰⵢⴰⵙ ⵣⵉ ⵙⵙⵉⴱⴱⴻⵜ ⵏ ⵍⴻⵎⵃⴰⵢⴻⵎ-ⴰ. ⴰⵇⴰ ⴽⴻⵏⵏⵉⵡ ⵜⴻⵙⵙⵏⴻⵎ ⵙⵉⵎⴰⵏⵜ ⵏⵡⴻⵎ, ⴱⴻⵍⵍⵉ ⵏⴻⵜⵜⵡⴰⴳⴳ ⵉ ⵎⴰⵏ ⴰⵢⴰ. ◘3:3 ⵍⴻⵅ. 14:22; ⴰⴼⴰ. 3:13; ⴼⵉⵍ. 1:14; 2 ⵜⵉⵎ. 3:12. 4 ⵎⴰⵖⴰⵔ ⵍⴰⵎⵉ ⴷ ⴰⵏⴻⵖ ⵜⵓⵖⴰ ⴰⴽⵉⴷⵡⴻⵎ, ⵏⵉⵣⵣⴰⵔ ⵏⴻⵏⵏⴰ, ⴱⴻⵍⵍⵉ ⴰⴷ ⵅⴰⵏⴻⵖ ⵜⴻⴽⴽ ⵍⴻⵃⵚⴰⵔⴻⵜ, ⵓⵛⴰ ⴰⵎⵎⵓ ⵉ ⵉⵎⵙⴰⵔ ⴰⵎ ⵎⴰⵎⵎⴻⵛ ⵜⴻⵙⵙⵏⴻⵎ ⴽⴻⵏⵏⵉⵡ. 5 ⵙ ⵓⵢⴻⵏⵏⵉ, ⵓⵎⵉ ⵡⴰⵔ ⵣⴻⵎⵎⴰⵔⴻⵖ ⴰⴷ ⵚⴱⴰⵔⴻⵖ ⴽⵜⴰⵔ, ⴰⵇⴰ ⵙⵙⴻⴽⴽⴻⵖ ⵜ-ⵉ-ⴷⴷ ⵃⵉⵎⴰ ⴰⴷ ⵙⵙⵏⴻⵖ ⵅ ⵍ’ⵉⵎⴰⵏ ⵏⵡⴻⵎ, ⵎⴰ ⴰⴷ ⵜⴰⵖ ⵡⴻⵏⵏⵉ ⵉⵜⵜⵊⴰⵔⵔⴰⴱⴻⵏ ⴰⵇⴰ ⵉⵊⴰⵔⵔⴻⴱ ⴽⴻⵏⵏⵉⵡ ⵓⵛⴰ ⴰⴷ ⵉⴼⴼⴻⵖ ⴰⵔⴱⴻⵔ ⵏⵏⴻⵖ ⴷ ⵡⴰⵍⵓ.

6 ⵎⴰⵛⴰ ⵍⴻⵅⵅⵓ ⵉⴷⵡⴻⵍ-ⴷⴷ ⵖⴰⵔⵏⴻⵖ ⵣⵣⴰⵢⵡⴻⵎ ⵜⵉⵎⵓⵜⵉⵢⵓ ⵓⵛⴰ ⵉⵙⵙⵉⵡⴻⴹ ⴰⵏⴻⵖ-ⴷⴷ ⵍⴻⵅⴱⴰⵔ ⴰⵚⴻⴱⵃⴰⵏ ⵏ ⵍ’ⵉⵎⴰⵏ ⵏⵡⴻⵎ ⴷ ⵜⴰⵢⵔⵉ ⵏⵡⴻⵎ, ⴰⵇⴰ ⴽⴻⵏⵏⵉⵡ ⵍⴻⴱⴷⴰ ⵜᵉⵜⵜⵉⴷⴰⵔⴻⵎ ⴰⵏⴻⵖ ⵙ ⵍⵅⴰⵔ ⵣⵉ ⵎⴰⵔⵔⴰ ⵉⵖⴻⵣⴷⵉⵙⴻⵏ ⵓ ⴷⴰⵢⵡⴻⵎ ⵎⴻⵥⵔⵉ ⵎⴰⵃⴻⵏⴷ ⴰⴷ ⴰⵏⴻⵖ ⵜⵥⴰⵔⴻⵎ, ⴰⵎ ⵓⵍⴰ ⴷ ⵏⴻⵛⵛⵉⵏ ⴷⴰⵢⵏⴻⵖ ⵎⴻⵥⵔⵉ ⴰⴷ ⴽⴻⵏⵏⵉⵡ ⵏⵥⴰⵔ. 7 ⵙ ⵓⵢⴻⵏⵏⵉ ⵏⴻⵜⵜⵡⴰⴼⴻⵡⵡⴻⵊ ⵣⵣⴰⵢⵡⴻⵎ, ⴰ ⴽⴻⵏⵏⵉⵡ ⴰⵡⵎⴰⵜⴻⵏ ⵏⵏⴻⵖ, ⴷⵉ ⵎⴰⵔⵔⴰ ⵜⴰⵎⴰⵔⴰ ⵏⵏⴻⵖ ⴷ ⵍⴻⵎⵃⴰⵢⴻⵎ ⵏⵏⴻⵖ, ⵣⵉ ⵙⵙⵉⴱⴱⴻⵜ ⵏ ⵍ’ⵉⵎⴰⵏ ⵏⵡⴻⵎ, 8 ⵓⵛⴰ ⵍⴻⵅⵅⵓ ⵏⴻⵜⵜⵡⴰⵏⵄⴻⵛⵛ, ⵎⴰⵍⴰ ⴽⴻⵏⵏⵉⵡ ⵜᵉⵜⵜⵖⵉⵎⴰⵎ ⵜᵉⵜⵜⴱⴻⴷⴷⴰⵎ ⵏⵉⵛⴰⵏ ⴷⵉ ⵙⵉⴷⵉⵜⵏⴻⵖ. 9 ⵎⴰⵎⵎⴻⵛ ⵉ ⵖⴰ ⵏⴻⴳⴳ ⴰⴷ ⵏⵇⴰⴷⴰ ⴰⵔⴻⴱⴱⵉ ⵣⵉ ⵙⵙⵉⴱⴱⴻⵜ ⵏⵡⴻⵎ ⵅ ⵎⴰⵔⵔⴰ ⵍⴻⴼⵔⴰⵃⴻⵜ ⵉ ⵣⵉ ⵏⴼⴰⵔⵔⴻⵃ ⵣⵣⴰⵢⵡⴻⵎ, 10 ⵎⵖⵉⵔ ⵓⵎⵉ ⵏⴻⵜⵜᵉⵜⵜⴰⵔ ⴵⵉⵍⴻⵜ ⴷ ⵡⴰⵙⵙ ⵙ ⵡⴰⵟⵟⴰⵙ ⵣⵣⴰⵜ ⵉ ⵡⵓⴷⴻⵎ ⵏ ⴰⵔⴻⴱⴱⵉ, ⵃⵉⵎⴰ ⴰⴷ ⴽⴻⵏⵏⵉⵡ ⵏⵥⴰⵔ ⵙ ⵓⵖⴻⵎⴱⵓⴱ ⵓⵛⴰ ⴰⴷ ⵏⴽⴻⵎⵎⴻⵍ ⵎⵉⵏ ⵉⵜⵜⵅⴻⵚⵚⴰⵏ ⵄⴰⴷ ⵉ ⵍ’ⵉⵎⴰⵏ ⵏⵡⴻⵎ. ◘3:10 ⵔⵓⵎ. 1:10, 11; 15:23; 2 ⵜⵉⵎ. 1:4.

11 ⵎⴰⵛⴰ ⴰⵔⴻⴱⴱⵉ, ⴱⴰⴱⴰⵜⵏⴻⵖ, ⴷ ⵙⵉⴷⵉⵜⵏⴻⵖ ⵢⴰⵙⵓⵄ ⵍⵎⴰⵙⵉⵃ, ⴰⴷ ⵉⵙⴻⴳⴳⴻⵎ ⴰⴱⵔⵉⴷ ⵏⵏⴻⵖ ⵖⴰⵔⵡⴻⵎ. 12 ⵏⴻⵜⵜⴰ ⴰⴷ ⵢⴰⵔⵏⵉ ⴷⵉ ⵜⴰⵢⵔⵉ ⵏⵡⴻⵎ ⵏ ⵉⵊⵊⴻⵏ ⵉ ⵡⴻⵏⵏⴻⵖⵏⵉ ⵓ ⵜⴰⵢⵔⵉ ⵏⵡⴻⵎ ⵉ ⵎⴰⵔⵔⴰ, ⴰⵎ ⵎⴰⵎⵎⴻⵛ ⵏᵉⵜⵜⴻⵅⵙ ⵏⴻⵛⵛⵉⵏ ⵓⵍⴰ ⵉ ⴽⴻⵏⵏⵉⵡ, 13 ⵓⵛⴰ ⵏⴻⵜⵜⴰ ⴰⴷ ⵉⵙⵙⵎⴻⵃⵃⴻⴷ ⵓⵍⴰⵡⴻⵏ ⵏⵡⴻⵎ, ⵃⵉⵎⴰ ⴰⴷ ⵜⵉⵍⵉⵎ ⴱⵍⴰ ⵍⵄⵉⴱ ⴷⵉ ⵜⵇⴻⴷⴷⴰⵙⵜ ⵇⵉⴱⴰⵍⵜ ⵉ ⴰⵔⴻⴱⴱⵉ ⴱⴰⴱⴰⵜⵏⴻⵖ, ⵅ ⵎⵉⵏⵏⵉ ⴷⴷ ⵖⴰ ⵢⴰⵙ ⵙⵉⴷⵉⵜⵏⴻⵖ ⵢⴰⵙⵓⵄ ⵍⵎⴰⵙⵉⵃ ⴰⴽ-ⴷ ⵎⴰⵔⵔⴰ ⵉⵎⵇⴻⴷⴷⴰⵙⴻⵏ ⵏⵏⴻⵙ. ◘3:13 1 ⴽⵓⵔ. 1:8; 1 ⵜⵙ. 5:23; 2 ⵜⵙ. 2:17.