7
ⵎⵉⵅⴰ ⵉⵥⵔⴰ ⵜⵓⵄⴻⴼⴼⵏⴰ ⵉ ⵉⴵⴰⵏ ⴷⵉ ⵍⴳⴻⵏⵙ
1 “ⵓⵛⵜ ⵉⵏⵓ, ⵎⴰⵖⴰⵔ ⴰⵇⴰ ⴰⵢⵉ ⵖⴰⵔⵉ
ⴰⵎⴻⵛⵏⴰⵡ ⵖⴰⵔ ⵜⵎⴻⵢⵔⴰ ⵏ ⵜⵉⵏⵉ ⵏ ⵓⵏⴻⴱⴷⵓ,
ⴰⵎⴻⵛⵏⴰⵡ ⵖⴰⵔ ⵜⵡⴰⵍⴰ ⵡⵉⵙⵙ ⵜⵏⴰⵢⴻⵏ
ⵏ ⵡⴻⵍⵇⴰⴹ ⵏ ⵓⴹⵉⵍ:
ⵡⴰⵔ ⴷⵉⵏ ⵓⵍⴰ ⴷ ⵉⵊⵊ ⵏ ⵓⵣⴻⴽⴽⵓⵏ ⵏ ⵓⴹⵉⵍ
ⵉ ⵎⴰⵛⵛⴰ,
ⵡⴰⵔ ⴷⵉⵏ ⵉⴵⵉ ⵓⵍⴰ ⴷ ⵉⵊⵊ ⵏ ⵍⴱⴰⵛⵓⵔ ⵇⴱⴻⵍ ⵍⵡⴻⵇⵜ
ⵉ ⴷⴰⵢⴻⵙ ⵎⴻⵥⵔⵉ ⵍⴻⵄⵎⴰⵔ ⵉⵏⵓ.
2 ⴰⵎⴻⴷⴷⵓⴽⴽⴰⵍ ⵉ ⴷⴰⵢⴻⵙ
ⵜⴰⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ
ⵡⴰⵔ ⵉⵇⵇⵉⵎ ⴷⵉ ⵜⴻⵎⵎⵓⵔⵜ,
ⵓⵛⴰ ⵡⴰⵔ ⴷⵉⵏ ⵓⵍⴰ ⴷ ⵉⵊⵊ ⵏ ⵓⵚⴻⴱⵃⴰⵏ
ⵊⴰⵔ ⵉⵡⴷⴰⵏ.
ⵏⵉⵜⵏⵉ ⵎⴰⵔⵔⴰ ⵜⵜⵃⴰⵎⴰⵏ ⵅ ⵉⴷⴰⵎⵎⴻⵏ,
ⵉⵊⵊⴻⵏ ⵉⵢⴻⵎⵎⴰⵔ ⵡⴻⵏⵏⴻⵖⵏⵉ ⵙ ⵜⵔⴰⵛⵛⴰ. ◘7:2 ⵉⵥⵀⴷ. 12:2; ⵃⵓⵛ. 4:1
3 ⵉⴼⴰⵙⵙⴻⵏ ⵏⵙⴻⵏ ⵡⴻⵊⴷⴻⵏ ⵙ ⵜⵏⴰⵢⴻⵏ
ⵎⴰⵃⴻⵏⴷ ⴰⴷ ⴳⴳⴻⵏ ⵍⵖⴰⵔ.
ⵍⵃⴰⴽⴻⵎ ⵉⵜⵜⴰⵔ ⵓ ⵍⵇⴰⴹⵉ ⵉⵜⵜⴻⴳⴳ ⵉ-ⵜⵜ
ⴷⵉ ⵟⵟⵡⴻⵄ ⵏ ⵓⵅⴻⴵⴻⵚ,
ⵓ ⵡⴻⵏⵏⵉ ⴰⵎⴻⵇⵇⵔⴰⵏ ⵉⵙⵙⴰⵡⴰⵍ
ⵄⵍⴰⵃⵙⴰⴱ ⵎⴻⵥⵔⵉ ⴰⵄⴻⴼⴼⴰⵏ ⵏ ⵍⴻⵄⵎⴰⵔ ⵏⵏⴻⵙ
ⵓ ⴰⵎⵎⵓ ⵉ ⵙⵙⴼⴰⵔⵖⴻⵏ ⵏⵉⵜⵏⵉ ⵜⴰⵎⴻⵙⵍⴰⵛⵜ. ◘7:3 ⵎⵉⵅⴰ 2:1; 3:11
4 ⵡⴻⵏⵏⵉ ⵣⵣⴰⵢⵙⴻⵏ ⴷ ⴰⵚⴻⴱⵃⴰⵏ ⴰⵟⵟⴰⵙ
ⴰⵇⴰ-ⵜ ⴰⵎ ⵢⵉⵊⵊ ⵏ ⵛⴱⴰⵔⵇ ⵏ ⵉⵙⴻⵏⵏⴰⵏⴻⵏ,
ⵡⴻⵏⵏⵉ ⴷ ⴰⵚⴷⵉⵇ ⵏ ⵡⵓⵍ ⵇⴰⵄ ⵣⵣⴰⵢⵙⴻⵏ
ⴰⵇⴰ-ⵜ ⵎⴰⵀⵓ ⵅ ⵉⵊⵊ ⵏ ⵡⴻⴼⵔⴰⵢ ⵏ ⵛⴱⴰⵔⵇ
ⴰⴽ-ⴷ ⵉⵙⴻⵏⵏⴰⵏⴻⵏ.
ⴰⵙⵙ ⵏ ⵉⵄⴻⵙⵙⴰⵙⴻⵏ ⵏⵏⴻⵛ,
ⴰⵙⵙ ⵏ ⵓⵅⴻⴵⴻⵚ, ⵢⵓⵙⴰ-ⴷⴷ.
ⵍⴻⵅⵅⵓ ⴰⴷ ⵏⵅⴻⵍⵄⴻⵏ.”
ⵎⵉⵅⴰ ⴰⴷ ⵉⵔⴰⵊⴰ ⴰⵙⴻⵏⵊⴻⵎ ⵏ ⴰⵔⴻⴱⴱⵉ
5 “ⵡⴰⵔ ⵜⵓⵎⵉⵏⴻⴷ ⴷⴻⴳ ⵉⵊⵊ ⵏ ⵓⵎⴻⴷⴷⵓⴽⴽⴻⵍ,
ⵡⴰⵔ ⵜᵉⵜⵜⴻⵛⵍⴻⴷ
ⵅ ⵓⵎⴻⴷⴷⵓⴽⴽⴻⵍ ⵏⵏⴻⵛ ⵉⵄⵉⵣⵣⴻⵏ.
ⵃⴹⴰ ⵜⵉⵡⵡⵓⵔⴰ ⵏ ⵓⵇⴻⵎⵎⵓⵎ ⵏⵏⴻⵛ
ⵣⵉ ⵜⴻⵏⵏⵉ ⵉⴵⴰⵏ ⵖⴰⵔ ⵡⴻⵃⵙⵉⵏ ⵏⵏⴻⵛ.
6 ⵎⴰⵖⴰⵔ ⵎⵎⵉⵙ ⵉⵙⵙⴻⵃⵇⴰⵔⴰ ⴱⴰⴱⴰⵙ,
ⵢⴻⴵⵉⵙ ⵜᵉⵜⵜⴹⴰⴷⴷⴰ ⵢⴻⵎⵎⴰⵙ,
ⵜⴰⵙⵍⵉⵜ ⵅ ⵍⴰⵍⵍⴰⵙ,
ⵍⵄⴻⴷⵢⴰⵏ ⵏ ⵉⵊⵊ ⵏ ⵡⴻⵔⵢⴰⵣ
ⴰⵇⴰ ⴷ ⴰⵢⵜⴱⴰⴱ ⵏ ⵜⴰⴷⴷⴰⵔⵜ ⵏⵏⴻⵙ.” ◘7:6 ⵃⵉⵥ. 22:7; ⵎⵜ. 10:21, 35, 36; ⵍⴽ. 12:53
7 “ⵎⴰⵛⴰ ⵏⴻⵛⵛ ⴰⴷ ⵅⵣⴰⵔⴻⵖ ⵖⴰⵔ ⵙⵉⴷⵉ,
ⴰⴷ ⵔⴰⵊⵉⵖ ⴰⵔⴻⴱⴱⵉ ⵏ ⵓⵙⴻⵏⵊⴻⵎ ⵉⵏⵓ.
ⴰⵔⴻⴱⴱⵉ ⵉⵏⵓ ⴰⴷ ⵖⴰⵔⵉ ⴷⴷ-ⵉⵙⴻⵍ.”
8 “ⵡⴰⵔ ⴷ ⴰⵢⵉ ⵙⴼⴰⵔⵔⴻⵃ,
ⴰ ⵛⴻⵎ ⵜⴰⵎⵖⴰⵔⵜ ⵏⵏⵉ ⴷ ⵍⴻⵄⴷⵓ ⵉⵏⵓ!
ⵎⴰⵖⴰⵔ ⵎⴰⵍⴰ ⵡⴹⵉⵖ, ⴰⴷ ⴽⴽⴰⵔⴻⵖ ⵄⴰⵡⴻⴷ,
ⵎⴰⵍⴰ ⵇⵇⵉⵎⴻⵖ ⴷⵉ ⵜⴰⴵⴻⵙⵜ,
ⴰⴷ ⵢⵉⵍⵉ ⵙⵉⴷⵉ ⴷ ⵜⴰⴼⴰⵡⵜ ⵉ ⵏⴻⵛⵛ.
9 ⵏⴻⵛⵛ ⴰⴷ ⴽⵙⵉⵖ ⴰⵙⵅⴻⴹ ⵏ ⵙⵉⴷⵉ,
ⵎⵉⵏⵣⵉ ⵏⴻⵛⵛ ⵅⴹⵉⵖ ⴰⴽⵉⴷⴻⵙ,
ⴰⵍ ⵅⴰⴼⵉ ⵉ ⵖⴰ ⵉⵡⵡⴻⵜ ⵏⴻⵜⵜⴰ ⵅ ⴷⴷⴻⵄⵡⴻⵜ ⵉⵏⵓ
ⵓ ⴰⴷ ⴰⵢⵉ ⵢⴰⵖ ⵜⴰⵙⵖⴰⵔⵜ ⵉⵏⵓ.
ⵏⴻⵜⵜⴰ ⴰⴷ ⴰⵢⵉ ⵉⵙⵙⵓⴼⴼⴻⵖ ⵖⴰⵔ ⵜⴼⴰⵡⵜ,
ⵏⴻⵛⵛ ⴰⴷ ⵥⴰⵔⴻⵖ ⵜⴰⵙⴻⴳⴷⴰ ⵏⵏⴻⵙ. ◘7:9 ⵉⵥⵀⴷ. 9:5-6; ⵉⵥⵀⴷ. 43:1; ⵉⵔⵎ. 50:34
10 ⵜⴰⵎⵖⴰⵔⵜ ⵜⴻⵏⵏⵉ ⴷ ⵍⴻⵄⴷⵓ ⵉⵏⵓ
ⴰⴷ ⵜⵥⴰⵔ ⴰⵢⴰ.
ⵎⵍⵉ ⴷ ⴰⵙ ⵉ ⵖⴰ ⵜⴷⴻⵍ ⵍⴻⵃⵢⴰ
ⵉ ⵜⴻⵏⵏⵉ ⴷ ⴰⵢⵉ ⵉⵇⵇⴰⵔⴻⵏ:
‘ⵎⴰⵏⵉ ⵉⴵⴰ ⵙⵉⴷⵉ, ⴰⵔⴻⴱⴱⵉ ⵏⵏⴻⵛ?’
ⵜⵉⵟⵟⴰⵡⵉⵏ ⵉⵏⵓ ⴰⴷ ⵖⴰⵔⴻⵙ ⵅⵣⴰⵔⴻⵏⵜ!
ⵍⴻⵅⵅⵓ ⴰⴷ ⵜᵉⵜⵜⵡⴰⴷⴷⴻⵣ ⵏⴻⵜⵜⴰⵜ,
ⴰⵎ ⵓⴱⴻⴵⴰⵄ ⴷⵉ ⵣⵣⵏⴰⵇⵉ.” ◘7:10 ⵉⵥⵀⴷ. 79:10; 115:2; ⵢⵓⵡ. 2:17
11 “ⴷⴻⴳ ⵡⴰⵙⵙ ⵉ ⴷⵉ ⵉ ⵖⴰ ⵉⴱⵏⴰ ⵏⴻⵜⵜⴰ
ⵍⴻⵃⵢⵓⴹ ⵏⵏⴻⵛ ⵄⴰⵡⴻⴷ,
ⴷⴻⴳ ⵡⴰⵙⵙ ⵏⵏⵉ ⴰⴷ ⵉⵔⴰⵃ ⵍⵃⴻⵇⵇ
ⵖⴰⵔ ⵍⴰⴳⴳⵯⴰⵊ ⴰⵟⵟⴰⵙ.
12 ⴷⴻⴳ ⵡⴰⵙⵙ ⵏⵏⵉ ⴰⴷ ⴷⴷ-ⴰⵙⴻⵏ,
ⵣⵉ ⴰⵛⵛⵓⵔ ⴷ ⵜⵏⴻⴷⴷⴰⵎ ⵏ ⵎⵉⵚⵔⴰ,
ⵓ ⵣⵉ ⵎⵉⵚⵔⴰ ⴰⵍ ⵉⵖⵣⴰⵔ ⵏ ⵍⴼⵓⵔⴰⵟ,
ⵓ ⵣⵉ ⵍⴻⴱⵃⴰⵔ ⴰⵍ ⵍⴻⴱⵃⴰⵔ
ⵓ ⵣⴻⴳ ⵡⴻⴷⵔⴰⵔ ⴰⵍ ⵡⴻⴷⵔⴰⵔ ⵏⵏⴻⵖⵏⵉ.
13 ⵎⴰⵛⴰ ⴷⴷⵓⵏⴻⵛⵜ ⴰⴷ ⵜⴻⴷⵡⴻⵍ
ⵉⵛⵜ ⵏ ⵜⴻⵎⵎⵓⵔⵜ ⵉⵜⵜⵡⴰⵔⴻⴷⴷⴵⴻⵏ,
ⵣⵉ ⵙⵙⵉⴱⴱⴻⵜ ⵏ ⵉⵎⴻⵣⴷⴰⵖ ⵏⵏⴻⵙ,
ⵣⵉ ⵙⵙⵉⴱⴱⴻⵜ ⵏ ⵍⵖⵉⴵⴻⵜ ⵏ ⵜⵎⴻⴳⴳⴰ ⵏⵙⴻⵏ.” ◘7:13 ⵉⵔⵎ. 21:14
14 “ⴰⵔⵡⴻⵙ ⵍⴳⴻⵏⵙ ⵏⵏⴻⵛ ⵙ ⵜⴻⵖⵖⴰⵔⵛⵜ ⵏⵏⴻⵛ,
ⵓⴵⵉ ⵏ ⵜⴻⵙⵖⴰⵔⵜ ⵏⵏⴻⵛ,
ⵜⴻⵏⵏⵉ ⵉⴵⴰⵏ ⵡⴻⵃⵃⴷⴻⵙ ⴷⴻⴳ ⵡⴻⵣⵖⴰⵔ,
ⴷⵉ ⵍⵡⴻⵙⵟ ⵏ ⴽⴰⵔⵎⵉⵍ.
ⴻⵊⵊ ⵉ-ⵜⴻⵏⵜ ⴰⴷ ⴰⵔⴻⵡⵙⴻⵏ ⴷⵉ ⴱⴰⵛⴰⵏ ⴷ ⵊⵉⵍⵄⴰⴷ,
ⴰⵎ ⴷⴻⴳ ⵡⵓⵙⵙⴰⵏ ⵏ ⵡⴻⵛⵃⴰⵍ ⵓⵢⴰ. ◘7:14 ⵎⵉⵅⴰ 5:3
15 ⵏⴻⵛⵛ ⴰⴷ ⴰⵙ ⵙⵙⴻⵛⵛⵏⴻⵖ ⵍⵎⵓⵄⵊⵉⵣⴰⵜ,
ⴰⵎ ⴷⴻⴳ ⵡⵓⵙⵙⴰⵏ
ⵍⴰⵎⵉ ⴷⴷ-ⵜⴻⴼⴼⵖⴻⴷ ⵣⵉ ⵜⴻⵎⵎⵓⵔⵜ ⵏ ⵎⵉⵚⵔⴰ. ◘7:15 ⵢⵓⵡ. 2:26; 3:3.
16 ⵍⴻⴳⵏⵓⵙ ⴰⴷ ⵜ ⵜⵡⴰⵍⵉⵏ,
ⴰⴷ ⵙⴻⴹⵃⴰⵏ ⵣⵉ ⵙⵙⵉⴱⴱⴻⵜ
ⵏ ⵎⴰⵔⵔⴰ ⵜⵉⵣⴻⵎⵎⴰⵔ ⵏⵙⴻⵏ,
ⵏⵉⵜⵏⵉ ⴰⴷ ⵙⵙⴰⵔⵙⴻⵏ ⴰⴼⵓⵙ ⵅ ⵓⵇⴻⵎⵎⵓⵎ,
ⵉⵎⴻⵣⵣⵓⵖⴻⵏ ⵏⵙⴻⵏ ⴰⴷ ⴷⴷⵓⵀⵛⴰⵔⴻⵏ.
17 ⵏⵉⵜⵏⵉ ⴰⴷ ⵍⴻⵙⵃⴻⵏ ⵜⴰⵄⴻⵊⵊⴰⵊⵜ ⴰⵎ ⵓⴼⵉⵖⴰⵔ,
ⴰⴷ ⴷⴷ-ⴼⴼⵖⴻⵏ ⵣⵉ ⵍⴱⵓⵔⵊⴰⵜ ⵏⵙⴻⵏ
ⴰⵎ ⵉⵎⵓⴷⴷⴰⵔ ⵏ ⵜⴻⵎⵎⵓⵔⵜ ⵉⵜⵜⴱⵓⵄⴻⵏ.
ⴰⴷ ⴷⴷ-ⴰⵙⴻⵏ ⵜⵜⴰⵔⵊⵉⵊⴻⵏ
ⵖⴰⵔ ⵙⵉⴷⵉ, ⴰⵔⴻⴱⴱⵉ ⵏⵏⴻⵖ,
ⵓ ⴰⴷ ⵣⵣⴰⵢⴻⴽ ⴳⴳⵯⴻⴷⴻⵏ.” ◘7:17 ⵉⵥⵀⴷ. 72:9; ⵉⵛⴰ. 49:32
ⵜⴰⵢⵔⵉ ⵏ ⴰⵔⴻⴱⴱⵉ ⴷ ⴰⵔⵔⴻⵃⵎⴻⵜ ⵏⵏⴻⵙ
18 “ⵎⴰⵏ ⵡⴻⵏ ⵉⴵⴰⵏ ⴷ ⴰⵔⴻⴱⴱⵉ ⴰⵎ ⵛⴻⴽ,
ⵡⴻⵏⵏⵉ ⵉⵖⴻⴼⴼⴰⵔⴻⵏ ⵍⵎⵓⵄⵚⵉⵢⵢⴻⵜ,
ⵡⴻⵏⵏⵉ ⵉⵄⴻⴷⴷⵓⵏ ⵅ ⵓⵅⴻⵟⵟⵓ
ⵏ ⵎⵉⵏ ⵉⵇⵇⵉⵎⴻⵏ ⵣⵉ ⵜⴻⵙⵖⴰⵔⵜ ⵏⵏⴻⵙ?
ⵏⴻⵜⵜⴰ ⵡⴰⵔ ⵉⵎⴻⵏⵏⴻⵄ ⵉ ⵍⴻⴱⴷⴰ
ⴷⴻⴳ ⵡⴻⵖⴹⴰⴱ ⵏⵏⴻⵙ,
ⵎⴰⵖⴰⵔ ⵢⴰⵔⴹⴰ ⴰⵙ ⵜⴰⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ. ◘7:18 ⵓⴼ. 34:6, 7; ⵉⵥⵀⴷ. 103:9
19 ⵏⴻⵜⵜⴰ ⴰⴷ ⵅⴰⵏⴻⵖ ⵢⴰⵔⵃⴻⵎ ⵄⴰⵡⴻⴷ,
ⵏⴻⵜⵜⴰ ⴰⴷ ⵉⵄⴼⴻⵙ ⵅ ⵍⵎⵓⵄⵚⵉⵢⵢⴻⵜ ⵏⵏⴻⵖ,
ⵡⴰⵀ, ⵛⴻⴽ ⴰⴷ ⵜⴻⵏⴹⴰⵔⴻⴷ
ⵎⴰⵔⵔⴰ ⴷⴷⵏⵓⴱ ⵏⵙⴻⵏ
ⴷⵉ ⵍⴰⴵⴰⵖ ⵏ ⵍⴻⴱⵃⴰⵔ.
20 ⵉⵍⵉ ⵛⴻⴽ ⴰⴷ ⵜⴻⵙⵙⴻⵛⵏⴻⴷ ⵍⴰⵎⴰⵏ ⵉ ⵢⴰⵄⵇⵓⴱ
ⵓ ⵜⴰⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⵉ ⵉⴱⵔⴰⵀⵉⵎ,
ⴰⵎ ⵎⴰⵎⵎⴻⵛ ⵜⴻⵊⵊⵓⴵⴻⴷ ⵉ ⵍⴻⵊⴷⵓⴷ ⵏⵏⴻⵖ
ⵣⴻⴳ ⵡⵓⵙⵙⴰⵏ ⵏ ⵎⴻⵛⵃⴰⵍ ⵓⵢⴰ.”
◘7:2 7:2 ⵉⵥⵀⴷ. 12:2; ⵃⵓⵛ. 4:1
◘7:6 7:6 ⵃⵉⵥ. 22:7; ⵎⵜ. 10:21, 35, 36; ⵍⴽ. 12:53
◘7:9 7:9 ⵉⵥⵀⴷ. 9:5-6; ⵉⵥⵀⴷ. 43:1; ⵉⵔⵎ. 50:34
◘7:10 7:10 ⵉⵥⵀⴷ. 79:10; 115:2; ⵢⵓⵡ. 2:17
◘7:13 7:13 ⵉⵔⵎ. 21:14
◘7:17 7:17 ⵉⵥⵀⴷ. 72:9; ⵉⵛⴰ. 49:32
◘7:18 7:18 ⵓⴼ. 34:6, 7; ⵉⵥⵀⴷ. 103:9