1 ⴰⵍⴰⵎⵉ ⴷⴷ-ⵉⴼⴼⴻⵖ ⵣⵉ ⵣⵣⴰⵡⴻⵛⵜ ⵜⴰⵎⴻⵇⵇⵔⴰⵏⵜ, ⵉⵏⵏⴰ ⴰⵙ ⵉⵊⵊⴻⵏ ⵣⴻⴳ ⵉⵎⴻⵃⴹⴰⵔⴻⵏ ⵏⵏⴻⵙ: “ⴰ ⴰⵎⵙⴻⵖⵖⴰⵔ, ⵅⵣⴰⵔ, ⵎⴰⵎⵎⴻⵛ ⴵⴰⵏ ⵉⵥⵔⴰ-ⵢⴰ ⴷ ⵍⴻⴱⵏⵉ-ⵢⴰ!” ◘13:1 [ⵎⵜ. 24:1-44; ⵍⴽ. 21:5-33] — ⵎⵜ. 24:1; ⵍⴽ. 21:5. 2 ⵢⴰⵔⵔⴰ-ⴷⴷ ⵢⴰⵙⵓⵄ, ⵉⵏⵏⴰ ⴰⵙ: “ⵎⴰ ⵜⴻⵥⵔⵉⴷ ⵍⴻⴱⵏⵉ-ⵢⴰ ⵉⵎⵖⴰⵔⴻⵏ? ⵡⴰⵔ ⴷⴰ ⵉⵜⵜⵖⵉⵎⵉ ⵓⵍⴰ ⴷ ⵉⵊⵊ ⵏ ⵡⴻⵥⵔⵓ ⵅ ⵡⴻⵥⵔⵓ ⵏⵏⴻⵖⵏⵉ ⵉ ⵡⴰⵔ ⵉⵜⵜⵏⴻⵀⴷⵉⵎ.” ◘13:2 1 ⵉⵊ. 9:7, 8; ⵎⵉⵅⴰ 3:12; ⵍⴽ. 19:44.

3 ⵍⴰⵎⵉ ⵜⵓⵖⴰ ⵉⵇⵇⵉⵎ ⵅ ⵡⴻⴷⵔⴰⵔ ⵏ ⵣⵣⵉⵜⵓⵏ ⵇⵉⴱⴰⵍⵜ ⵉ ⵣⵣⴰⵡⴻⵛⵜ ⵜⴰⵎⴻⵇⵇⵔⴰⵏⵜ, ⵙⵙⴻⵇⵙⴰⵏ ⵜ ⴱⵓⵟⵔⵓⵙ ⴷ ⵢⴰⵄⵇⵓⴱ ⴷ ⵢⵓⵃⴰⵏⵏⴰ ⴷ ⴰⵏⴷⵔⴰⵡⵓⵙ ⵍⴰⵎⵉ ⵜⴻⵏ ⵜⵓⵖⴰ ⵡⴻⵃⵃⴻⴷⵙⴻⵏ: ◘13:3 ⵎⵜ. 24:3; ⵍⴽ. 21:7. 4 “ⵉⵏⵉ ⴰⵏⴻⵖ ⵎⴻⵍⵎⵉ ⵉ ⵖⴰ ⵢⵉⵍⵉ ⵎⴰⵏ ⴰⵢⴰ, ⵓ ⵎⴰⵏ ⴰⴷ ⵜⵉⵍⵉ ⵍⴻⵄⵍⴰⵎⴻⵜ ⴰⵇⴰ ⵎⴰⵔⵔⴰ ⵜⵉⵎⴻⵙⵍⴰⵢⵏ-ⴰ ⴰⴷ ⴰⵡⴹⴻⵏⵜ?” ◘13:4 ⵍⴻⵅ. 1:6.

5 ⵉⴱⴷⴰ ⵢⴰⵙⵓⵄ ⵉⵇⵇⴰⵔ ⴰⵙⴻⵏ: “ⵅⵣⴰⵔⴻⵎ, ⵃⵉⵎⴰ ⵡⴰⵔ ⴽⴻⵏⵏⵉⵡ ⵉⵖⴻⴽⴽⵡⵉ ⵃⴻⴷ. ◘13:5 ⵉⵔⵎ. 29:8; ⴰⴼⴰ. 5:6; 2 ⵜⵙ. 2:2, 3; 1 ⵢⵃ. 4:1. 6 ⴰⵇⴰ ⴰⵟⵟⴰⵙ ⴰⴷ ⴷⴷ-ⴰⵙⴻⵏ ⵙ ⵢⵉⵙⴻⵎ ⵉⵏⵓ ⵇⵇⴰⵔⴻⵏ: ‘ⴰⵇⴰ ⴷ ⵏⴻⵛⵛ!’, ⵓⵛⴰ ⴰⴷ ⵖⵡⴰⵏ ⴰⵟⵟⴰⵙ. ◘13:6 ⵉⵔⵎ. 14:14; 23:21. 7 ⵎⴰⵍⴰ ⵜⴻⵙⵍⵉⵎ ⵅ ⵉⵎⴻⵏⵖⴰⵏ ⴷ ⵍⴻⵅⴱⴰⵔ ⵏ ⴳⴰⵔⵔⴰⵜ, ⵡⴰⵔ ⵜⵜⵏⴻⵅⵍⵉⵄⴻⵎ ⵛⴰ, ⵎⵉⵏⵣⵉ ⵙ ⵓⵖⵉⵍ ⴰⴷ ⵢⵉⵍⵉ ⵎⴰⵏ ⴰⵢⴰ, ⵎⴰⵛⴰ ⵡⴰⵔ ⵉⵜⵜⵉⵍⵉ ⵄⴰⴷ ⴷ ⴰⵏⴻⴳⴳⴰⵔ. 8 ⵎⵉⵏⵣⵉ ⵍⴳⴻⵏⵙ ⴰⴷ ⵉⴽⴽⴰⵔ ⴹⵉⴷⴷ ⵉ ⵍⴳⴻⵏⵙ ⵏⵏⴻⵖⵏⵉ ⵓ ⵜⴰⴳⴻⵍⴷⵉⵜ ⴹⵉⴷⴷ ⵉ ⵜⴳⴻⵍⴷⵉⵜ ⵏⵏⴻⵖⵏⵉ. ⴰⴷ ⵉⵍⵉⵏ ⵉⵏⵀⴻⵣⵣⴰⵏ ⵏ ⵜⴻⵎⵎⵓⵔⵜ ⵣⴻⴳ ⵡⴻⵎⵛⴰⵏ ⵖⴰⵔ ⵡⴻⵎⵛⴰⵏ ⵏⵏⴻⵖⵏⵉ ⵓⵛⴰ ⴰⴷ ⵢⵉⵍⵉ ⵍⴰⵥ ⴷ ⵓⵖⴻⵡⵡⵓⵖ. ⵜⵉⵎⴻⵙⵍⴰⵢⵉⵏ-ⴰ ⴷ ⴱⴻⴷⴷⵓ ⵏ ⵍⴻⵡⵊⴻⵄ ⵏ ⵜⴰⵔⵡⴰ. ◘13:8 ⵉⵛⴰ. 19:2.

9 ⵃⴹⴰⵎ ⵉⵅⴻⴼ ⵏⵡⴻⵎ, ⵎⵉⵏⵣⵉ ⴰⴷ ⴽⴻⵏⵏⵉⵡ ⵙⴻⵍⵍⵎⴻⵏ ⵉ ⵜⵓⴷⵔⵉⵏ ⵏ ⵛⵛⵔⴻⵄ, ⴰⴷ ⴽⴻⵏⵏⵉⵡ ⵀⴻⵜⵜⴽⴻⵏ ⵙ ⵓⵔⴻⴽⴽⵓⴹ ⴷⵉ ⵜⴻⵎⵣⵉⴷⴰⵡⵉⵏ ⵏⵙⴻⵏ ⵓⵛⴰ ⴰⴷ ⴽⴻⵏⵏⵉⵡ ⵙⵙⵉⵡⴹⴻⵏ ⵖⴰⵔ ⵉⵊⴻⴵⵉⴷⴻⵏ ⴷ ⵍⵃⵓⴽⴽⴰⵎ ⴷⵉ ⵙⵙⵉⴱⴱⴻⵜ ⵉⵏⵓ, ⴷ ⵛⵛⵀⴰⴷⴻⵜ ⵉ ⵏⵉⵜⵏⵉ. ◘13:9 ⵎⵜ. 10:17; 24:9; ⵍⴽ. 21:12; ⵢⵃ. 15:19; 16:2; ⴰⵙⴰ. 2:10. 10 ⵎⴰⵛⴰ ⵖⴰⵔ ⵓⵎⴻⵣⵡⴰⵔ ⵉⵜⵜⵅⴻⵚⵚⴰ ⴰⴷ ⵉⵜⵜⵡⴰⴱⴰⵔⵔⴻⵃ ⵙ ⵍⴻⵅⴱⴰⵔ ⴰⵚⴻⴱⵃⴰⵏ ⴷⵉ ⵎⴰⵔⵔⴰ ⵍⴻⴳⵏⵓⵙ. 11 ⵅⵎⵉ ⴽⴻⵏⵏⵉⵡ ⵉ ⵖⴰ ⴳⴻⵡⵡⴷⴻⵏ ⵃⵉⵎⴰ ⴰⴷ ⴽⴻⵏⵏⵉⵡ ⵙⴻⵍⵍⵎⴻⵏ, ⵡⴰⵔ ⴽⴻⵙⵙⵉⵎ ⵙ ⵡⴻⵎⵏⵓⵙ ⵇⴱⴻⵍ ⵣⵉ ⵎⵉⵏ ⵖⴰ ⵜⵉⵏⵉⵎ, ⵡⴰⵔ ⴷⴰⵢⴻⵙ ⵜⵅⴰⵔⵔⵉⵚⴻⵎ ⵛⴰ, ⵎⴰⵛⴰ ⵎⵉⵏ ⵎⴰ ⴷ ⴰⵡⴻⵎ ⵉ ⵖⴰ ⵉⵎⵎⴻⵡⵛⴻⵏ ⴷⵉ ⵜⵙⴰⵄⵄⴻⵜ ⵏⵏⵉ, ⵙⵉⵡⵍⴻⵎ ⵣⵣⴰⵢⴻⵙ, ⵎⵉⵏⵣⵉ ⵡⴰⵔ ⵜⴻⴵⵉⵎ ⴷ ⴽⴻⵏⵏⵉⵡ ⵉ ⵉⵙⵙⴰⵡⴰⵍⴻⵏ, ⵎⴰⵛⴰ ⴷ ⴰⵔⵔⵓⵃ ⵉⵇⴻⴷⴷⵙⴻⵏ. ◘13:11 ⵎⵜ. 10:19; ⵍⴽ. 12:11; 21:4. 12 ⵓⵎⴰⵙ ⴰⴷ ⵉⵙⴻⵍⵍⴻⵎ ⵓⵎⴰⵙ ⵎⴰⵃⴻⵏⴷ ⴰⴷ ⵜ ⵏⵖⴻⵏ, ⵓ ⴱⴰⴱⴰⵙ ⴰⴷ ⵉⵙⴻⵍⵍⴻⵎ ⵎⵎⵉⵙ, ⵓⵛⴰ ⴰⴷ ⵜⴻⴽⴽⴰⵔ ⵜⴰⵔⵡⴰ ⵅ ⵍⵡⴰⵍⵉⴷⵉⵏ ⵏⵏⴻⵙ ⵓⵛⴰ ⴰⴷ ⵜⴻⵏ ⵏⵖⴻⵏ. ◘13:12 ⵃⵉⵥ. 38:21; ⵎⵉⵅⴰ 7:6. 13 ⴰⴷ ⴽⴻⵏⵏⵉⵡ ⵛⴰⵔⵀⴻⵏ ⵎⴰⵔⵔⴰ ⴷⵉ ⵙⵙⵉⴱⴱⴻⵜ ⵏ ⵢⵉⵙⴻⵎ ⵉⵏⵓ, ⵎⴰⵛⴰ ⵡⴻⵏⵏⵉ ⵉ ⵖⴰ ⵉⵚⴱⴰⵔⴻⵏ ⴰⵍ ⴰⵏⴻⴳⴳⴰⵔ, ⴰⴷ ⵉⵜⵜⵡⴰⵙⵙⴻⵏⵊⴻⵎ. ◘13:13 ⵎⵜ. 10:22; 24:13; ⵍⴽ. 21:19; ⴰⵙⴰ. 2:7, 10.

14 ⵅⵎⵉ ⵖⴰ ⵜⵥⴰⵔⴻⵎ ⵏⵏⵄⵉ ⵏ ⵡⴰⵔⴻⵢⵢⴻⴱ, ⵎⵉⵏ ⵅⴻⴼ ⵜⵓⵖⴰ ⵉⵙⵙⴰⵡⴰⵍ ⵓⵏⴰⴱⵉ ⴷⴰⵏⵉⵢⴰⵍ, ⵉⵜⵜⴱⴻⴷⴷⴰ ⵎⴰⵏⵉ ⵡⴰⵔ ⵉⵜⵜⵅⴻⵚⵚⴰ ⴰⴷ ⵉⴱⴻⴷⴷ - ⵡⴻⵏⵏⵉ ⵉⵖⵔⵉⵏ ⴰⴷ ⵉⴼⵀⴻⵎ! - ⵍⴻⵅⴷⴻⵏⵏⵉ ⵉⵜⵜⵅⴻⵚⵚⴰ ⵉ ⵢⵉⵏⵏⵉ ⵉⴵⴰⵏ ⴷⵉ ⵢⴰⵀⵓⴷⵉⵢⵢⴰ, ⴰⴷ ⴰⵔⴻⵡⵍⴻⵏ ⵖⴰⵔ ⵉⴷⵓⵔⴰⵔ, ◘13:14 ⴷⴰⵏ. 9:27; ⵎⵜ. 24:15; ⵍⴽ. 21:20, 21. 15 ⵓ ⵡⴻⵏⵏⵉ ⵉⴵⴰⵏ ⵅ ⵜⵣⴻⵇⵇⴰ ⵡⴰⵔ ⴷⴷ-ⵉⵀⴻⴽⴽⵡⵉ ⵛⴰ ⵖⴰⵔ ⵜⴰⴷⴷⴰⵔⵜ ⵓ ⵡⴰⵔ ⵉⵜⵜⵉⴷⴻⴼ ⵛⴰ ⵃⵉⵎⴰ ⴰⴷ ⵉⴽⵙⵉ ⵛⴰ ⵣⵉ ⵜⴰⴷⴷⴰⵔⵜ ⵏⵏⴻⵙ, 16 ⵓ ⵡⴻⵏⵏⵉ ⵉⴵⴰⵏ ⴷⴻⴳ ⵉⵢⵢⴰⵔ ⵡⴰⵔ ⴷⴷ-ⵉⵜⵜⵄⵉⵇⵇⵉⴱ ⵛⴰ ⵃⵉⵎⴰ ⴰⴷ ⵉⴽⵙⵉ ⴰⵙⴻⵍⵀⴰⵎ ⵏⵏⴻⵙ. 17 ⵓⵛⵜ ⵅ ⵜⵉⵏⵏⵉ ⵉⴵⴰⵏ ⵙ ⴷⴷⴻⵢⵙⴻⵜ ⴷ ⵜⵉⵏⵏⵉ ⵉⵙⵙⵓⵟⵓⴹⴻⵏ ⴷⴻⴳ ⵡⵓⵙⵙⴰⵏ ⵏⵏⵉ! 18 ⵥⴰⴵⴻⵎ ⵃⵉⵎⴰ ⵡⴰⵔ ⵜᵉⵜⵜⵉⵍⵉ ⵜⴰⵔⴻⵡⵍⴰ ⵏⵡⴻⵎ ⴷⵉ ⵍⵎⴻⵛⵜⴰ, 19 ⵎⵉⵏⵣⵉ ⴷⴻⴳ ⵡⵓⵙⵙⴰⵏ ⵏⵏⵉ ⴰⴷ ⴷⵉⵏ ⵜⵉⵍⵉ ⵉⵛⵜ ⵏ ⵍⵎⴻⵃⵏⴻⵜ ⵉ ⵡⴰⵔ ⵜⵓⵖⵉ ⴰⵎ ⵏⴻⵜⵜⴰⵜ ⵣⴻⴳ ⵡⴰⵎⵉ ⴷⴷ-ⵉⵅⵍⴻⵇ ⴰⵔⴻⴱⴱⵉ ⴷⴷⵓⵏⴻⵛⵜ ⴰⵍ ⵍⴻⵅⵅⵓ, ⵓⵛⴰ ⵡⴰⵔ ⵜᵉⵜⵜⵉⵍⵉ ⵄⴻⵎⵎⴰⵔⵚ ⵄⴰⵡⴻⴷ. ◘13:19 ⵎⵜ. 24:21 20 ⵎⴰⵍⴰ ⵙⵉⴷⵉ ⵡⴰⵔ ⵉⵙⵙⴻⵎⵥⵉ ⵓⵙⵙⴰⵏ ⵏⵏⵉ, ⵡⴰⵔ ⵜⵏⴻⵊⵊⴻⵎ ⵓⵍⴰ ⴷ ⵉⵛⵜ ⵏ ⴷⴷⴰⵜ, ⵎⴰⵛⴰ ⴷⵉ ⵟⵟⵡⴻⵄ ⵏ ⵢⵉⵏⵏⵉ ⵉⵜⵜⵡⴰⴼⴰⵔⵣⴻⵏ, ⵉⵏⵏⵉ ⵉ ⵉⵅⴹⴰⵔ ⵏⴻⵜⵜⴰ, ⴰⵇⴰ ⵉⵙⵙⴻⵎⵥⵉ ⵓⵙⵙⴰⵏ ⵏⵏⵉ.

21 ⵅⴻⵏⵏⵉ ⵎⴰⵍⴰ ⵉⵏⵏⴰ ⴰⵡⴻⵎ ⵉⵊⵊⴻⵏ: ‘ⴰⵇⴰ ⵍⵎⴰⵙⵉⵃ ⴷⴰ!’, ⵏⵉⵖ: ‘ⴰⵇⴰ-ⵜ ⴷⵉⵀⴰ!’, ⵡⴰⵔ ⵜ ⵜⵜⴰⵎⵏⴻⵎ. ◘13:21 ⵎⵜ. 24:23; ⵍⴽ. 21:8. 22 ⵎⵉⵏⵣⵉ ⴰⴷ ⴽⴽⴰⵔⴻⵏ ⵉⵎⴰⵙⵉⵃⴻⵏ ⵉⴼⴰⵍⵙⵓⵜⴻⵏ ⴷ ⵉⵏⴰⴱⵉⵢⵢⴻⵏ ⵉⵙⵙⵅⴰⵔⵔⵉⵇⴻⵏ, ⴰⴷ ⴳⴳⴻⵏ ⵍⴻⵄⵍⴰⵎⴰⵜ ⴷ ⵍⴻⵄⵊⴰⵢⴻⴱ ⵃⵉⵎⴰ, ⵎⴰⵍⴰ ⵉⵣⴻⵎⵎⴰⵔ, ⴰⴷ ⵅⴻⴷⵄⴻⵏ ⵄⴰⴷ ⵉⵏⵏⵉ ⵉⵜⵜⵡⴰⴼⴰⵔⵣⴻⵏ. ◘13:22 ⴰⵄⵡⴷ. 13:2; 2 ⵜⵙ. 2:11. 23 ⴽⴻⵏⵏⵉⵡ ⵎⴰⵛⴰ, ⵃⴹⴰⵎ, ⴰⵇⴰ ⵎⴰⵔⵔⴰ ⵏⵏⵉⵖ ⴰⵡⴻⵎ ⵜ ⵇⴱⴻⵍ.

24 ⵎⴰⵛⴰ ⴷⴻⴳ ⵡⵓⵙⵙⴰⵏ ⵏⵏⵉ, ⴰⵡⴰⵔⵏⵉ ⵍⵎⴻⵃⵏⴻⵜ ⵏⵏⵉ, ⴰⴷ ⵜⴻⴱⴱⴰⵔⵛⴻⵏ ⵜⴼⵓⵛⵜ ⵓⵛⴰ ⵜⴰⵣⵉⵔⵉ ⵡⴰⵔ ⵜᵉⵜⵜⵉⵛ ⵄⴰⴷ ⵜⴰⴼⴰⵡⵜ ⵏⵏⴻⵙ, ◘13:24 ⵉⵛⴰ. 13:10; ⵃⵉⵥ. 32:7; ⵢⵓⵡ. 3:4; 3:15; ⵎⵜ. 24:29; ⵍⴽ. 21:25; ⴰⵙⴰ. 6:12. 25 ⵉⵜⵔⴰⵏ ⴰⴷ ⴷⴷ-ⵡⴹⴰⵏ ⵣⴻⴳ ⵓⵊⴻⵏⵏⴰ ⵓⵛⴰ ⵚⵚⵓⵍⴰⵟⴰⵜ ⵉ ⵉⴵⴰⵏ ⴷⴻⴳ ⵉⵊⴻⵏⵡⴰⵏ ⴰⴷ ⵜⵜⵡⴰⵏⵀⴻⵣⵣⴻⵏⵜ. ◘13:25 ⵉⵛⴰ. 13:10; 34:4. 26 ⵅⴻⵏⵏⵉ ⴰⴷ ⵥⴰⵔⴻⵏ ⵎⵎⵉⵙ ⵏ ⴱⵏⴰⴷⴻⵎ ⵅⵎⵉ ⴷⴷ ⵖⴰ ⵢⴰⵙ ⴷⴻⴳ ⵉⵙⴻⵢⵏⵓⵜⴻⵏ, ⵙ ⵊⵊⴻⵀⴷ ⴷ ⵓⵄⵓⴵⵉ ⴰⵎⴻⵇⵇⵔⴰⵏ. ◘13:26 ⴷⴰⵏ. 7:10; ⵎⵜ. 16:27; 24:30; ⵎⴽ. 14:62; ⵍⴽ. 21:27; ⵍⴻⵅ. 1:11; 1 ⵜⵙ. 4:16; 2 ⵜⵙ. 1:10; ⴰⵙⴰ. 1:7. 27 ⵍⴻⵅⴷⴻⵏⵏⵉ ⴰⴷ ⵉⵙⵙⴻⴽⴽ ⵍⵎⴰⵍⴰⴽⴰⵜ ⵏⵏⴻⵙ ⵓⵛⴰ ⴰⴷ ⵉⵢⵔⵓ ⵉⵏⵏⵉ ⵣⵣⴰⵢⴻⵙ ⵉⵜⵜⵡⴰⴼⴰⵔⵣⴻⵏ ⵣⵉ ⴰⵔⴻⴱⵄⴰ ⵏ ⵜⵖⴻⵎⵎⵓⵔⴰ ⵏ ⵓⵙⴻⵎⵎⵉⴹ, ⵣⵉ ⵟⵟⴰⵔⴼ ⴰⵏⴻⴳⴳⴰⵔⵓ ⵏ ⵜⴻⵎⵎⵓⵔⵜ ⴰⵍ ⵟⵟⴰⵔⴼ ⴰⵏⴻⴳⴳⴰⵔⵓ ⵏ ⵓⵊⴻⵏⵏⴰ. ◘13:27 ⴰⵄⵡⴷ. 30:4, 5

28 ⵍⴻⵎⴷⴻⵎ ⵣⴻⴳ ⵡⴰⵔⵜⵓ ⵏ ⵜⴰⵣⴰⵔⵜ ⴰⵎⴻⵜⵜⵉⵍ-ⴰ: ⵅⵎⵉ ⵖⴰ ⴷⴻⵡⵍⴻⵏ ⵍⴻⴼⵔⵓⵄ ⵏⵏⴻⵙ ⴰⴷ ⴷⴷ-ⴰⵔⴻⴹⴱⴻⵏ ⵓⵛⴰ ⵜⵉⴼⵔⴰⵢ ⴰⴷ ⴷⴷ-ⴼⴼⵖⴻⵏⵜ, ⵅⴻⵏⵏⵉ ⴰⴷ ⵜⴻⵙⵙⵏⴻⵎ ⴰⵇⴰ ⴰⵏⴻⴱⴷⵓ ⵢⵉⵡⴻⴹ-ⴷⴷ. ◘13:28 ⵎⵜ. 24:32; ⵍⴽ. 21:29. 29 ⴰⵎⵎⵓ ⵉⵜⵜⵅⴻⵚⵚⴰ ⵓⵍⴰ ⴷ ⴽⴻⵏⵏⵉⵡ, ⵅⵎⵉ ⵖⴰ ⵜⵥⴰⵔⴻⵎ ⵜⵉⵎⴻⵙⵍⴰⵢⵉⵏ-ⴰ ⵜⵜⴻⵎⵙⴰⵔⴰⵏⵜ, ⴰⴷ ⵜⴻⵙⵙⵏⴻⵎ, ⴰⵇⴰ ⵎⴰⵏ ⴰⵢⴰ ⵢⵓⴷⴻⵙ-ⴷⴷ, ⵅ ⵜⴻⵡⵡⴰⵔⵜ. 30 ⵙ ⵜⵉⴷⴻⵜⵜ ⴰⴷ ⴰⵡⴻⵎ ⵉⵏⵉⵖ, ⵊⵊⵉⵍ-ⴰ ⵡⴰⵔ ⵉⵄⴻⴷⴷⵓ ⵛⴰ ⴰⵍ ⴷ ⵖⴰ ⵢⵉⵍⵉ ⵎⴰⵏ ⴰⵢⴰ ⵎⴰⵔⵔⴰ. 31 ⴰⵊⴻⵏⵏⴰ ⴷ ⵜⴻⵎⵎⵓⵔⵜ ⴰⴷ ⵄⴷⵓⵏ, ⵎⴰⵛⴰ ⴰⵡⴰⵍⴻⵏ ⵉⵏⵓ ⵡⴰⵔ ⵄⴻⴷⴷⵓⵏ ⵄⴻⵎⵎⴰⵔⵚ. ◘13:31 ⵉⵥⵀⴷ. 102:27; ⵉⵛⴰ. 40:8; 51:6; ⵄⴱⵔ. 1:11. 32 ⵎⴰⵛⴰ ⴰⵙⵙ ⵏⵏⵉ ⴷ ⵜⵙⴰⵄⵄⴻⵜ ⵏⵏⵉ ⵓⵍⴰ ⴷ ⵉⵊⵊ ⵡⴰⵔ ⵜ ⵉⵙⵙⵉⵏ, ⵓⵍⴰ ⴷ ⵍⵎⴰⵍⴰⴽⴰⵜ ⵏⵏⵉ ⵉⴵⴰⵏ ⴷⴻⴳ ⵓⵊⴻⵏⵏⴰ, ⵓⵍⴰ ⴷ ⵎⵎⵉⵙ, ⵎⵖⵉⵔ ⴱⴰⴱⴰⵙ. ◘13:32 ⵎⵜ. 24:36; ⵍⴻⵅ. 1:7.

33 ⵅⵥⴰⵔⴻⵎ, ⵃⴹⴰⵎ, ⵥⴰⴵⴻⵎ, ⵎⵉⵏⵣⵉ ⵡⴰⵔ ⵜⴻⵙⵙⵉⵏⴻⵎ ⵛⴰ ⵎⴻⵍⵎⵉ ⴷⴷ ⵖⴰ ⵜⴰⵡⴻⴹ ⵍⵡⴻⵇⵜ ⵏⵏⵉ. ◘13:33 ⵎⵜ. 24:42; 25:13; ⵍⴽ. 12:40; 21:36; 1 ⵜⵙ. 5:6. 34 ⴰⵇⴰ-ⵜ ⴰⵎ ⵢⵉⵊⵊ ⵏ ⴱⵏⴰⴷⴻⵎ ⵉⵜⵜⵅⴻⵚⵚⴰ ⴰⵙ ⴰⴷ ⵉⵙⴰⴼⴰⵔ, ⵉⵊⵊⴰ ⵜⴰⴷⴷⴰⵔⵜ ⵏⵏⴻⵙ, ⵉⵡⴻⴽⴽⴻⵍ ⵉⵎⵙⴻⵅⵅⴰⵔⴻⵏ ⵏⵏⴻⵙ ⵙ ⵚⵚⵓⵍⵟⴰ, ⵉⵡⵛⴰ ⵉ ⴽⵓⵍ ⵉⵊⵊ ⵣⵣⴰⵢⵙⴻⵏ ⵍⵅⴻⴷⵎⴻⵜ ⵏⵏⴻⵙ, ⵓⵛⴰ ⵉⵄⵍⴻⵎ ⴰⵙ ⵉ ⵓⵄⴻⵙⵙⴰⵙ ⵏ ⵜⴻⵡⵡⴰⵔⵜ ⵎⴰⵃⴻⵏⴷ ⴰⴷ ⵉⵇⵇⵉⵎ ⴰⴷ ⵉⵃⴹⴰ. 35 ⵉⵡⴰ ⵃⴹⴰⵎ ⵅⴻⵏⵏⵉ, ⵎⵉⵏⵣⵉ ⵡⴰⵔ ⵜⴻⵙⵙⵉⵏⴻⵎ ⵛⴰ ⵎⴻⵍⵎⵉ ⵉ ⴷⴷ ⵖⴰ ⵢⴰⵙ ⴱⴰⴱ ⵏ ⵜⴰⴷⴷⴰⵔⵜ, ⵖⴰⵔ ⵓⵄⴻⵛⵛⵉ ⵏⵉⵖ ⵖⴰⵔ ⵡⴻⵣⵢⴻⵏ ⵏ ⴵⵉⵍⴻⵜ ⵏⵉⵖ ⵖⴰⵔ ⵓⵙⵇⵓⵇⴻⵄ ⵏ ⵓⵢⴰⵥⵉⴹ ⵏⵉⵖ ⵖⴰⵔ ⵚⵚⴱⴻⵃ ⵣⵉⵛ, 36 ⵃⵉⵎⴰ, ⵎⴰⵍⴰ ⴷⴷ-ⵉⵜⵜⵉⵙ ⴷⴻⵖⵢⴰ, ⵡⴰⵔ ⴽⴻⵏⵏⵉⵡ ⵉⵜⵜⵉⴼ ⵜᵉⵜⵜⴻⵟⵟⵚⴻⵎ. 37 ⵎⵉⵏ ⴷ ⴰⵡⴻⵎ ⵇⵇⴰⵔⴻⵖ ⵍⴻⵅⵅⵓ, ⵇⵇⴰⵔⴻⵖ ⵜ ⵉ ⵎⴰⵔⵔⴰ: ⴼⴰⵇⴻⵎ!”