1 “ⵏⴻⵛⵛ ⴷ ⵜⴰⵣⴰⵢⴰⵔⵜ ⵏ ⵜⵉⴷⴻⵜⵜ, ⴱⴰⴱⴰ ⴷ ⴱⴰⴱ ⵏ ⵡⴻⵃⵡⵉⵛ ⵏ ⵜⵣⴰⵢⴰⵔⵜ. 2 ⴽⵓⵍ ⵜⴰⵙⴻⵟⵟⴰ ⴷⴰⵢⵉ ⵉ ⵡⴰⵔ ⵉⵜⵜⵉⵛⴻⵏ ⵍⵖⵉⴵⴻⵜ, ⴰⴷ ⵜⵜ ⵉⴽⴽⴻⵙ, ⵓⵛⴰ ⴽⵓⵍ ⵜⴰⵙⴻⵟⵟⴰ ⵉ ⴷⴷ-ⵉⵜⵜⴰⵡⵢⴻⵏ ⵍⵖⵉⴵⴻⵜ, ⴰⴷ ⵜⵜ ⵉⵙⵙⵉⵣⴷⴻⴳ, ⵃⵉⵎⴰ ⴰⴷ ⵜⴰⵔⵏⵉ ⴷⵉ ⵍⵖⵉⴵⴻⵜ. ◘15:2 ⵎⵜ. 15:13. 3 ⴽⴻⵏⵏⵉⵡ ⴰⵇⴰ ⵜᵉⵜⵜⵡⴰⵙⵙⵉⵣⴻⴷⴳⴻⵎ ⵣⵉ ⵙⵙⵉⴱⴱⴻⵜ ⵏ ⵡⴰⵡⴰⵍ ⵉ ⴷ ⴰⵡⴻⵎ ⵏⵏⵉⵖ. ◘15:3 ⵢⵃ. 13:10. 4 ⵇⵇⵉⵎⴻⵎ ⴷⴰⵢⵉ, ⴰⵎ ⵎⴰⵎⵎⴻⵛ ⵏⴻⵛⵛ ⴰⵇⴰ ⴰⵢⵉ ⴷⴰⵢⵡⴻⵎ. ⴰⵎ ⵜⵙⴻⵟⵟⴰ ⵉ ⵡⴰⵔ ⵉⵣⴻⵎⵎⴰⵔⴻⵏ ⴰⴷ ⴷⴷ-ⵜⴰⵡⵢⵉ ⵍⵖⵉⴵⴻⵜ ⵣⴻⴳ ⵉⵅⴻⴼ ⵏⵏⴻⵙ ⵎⴰⵍⴰ ⵡⴰⵔ ⵜⴻⵇⵇⵉⵎ ⴷⵉ ⵜⵣⴰⵢⴰⵔⵜ, ⴰⵎⵢⴰ ⵓⵍⴰ ⴷ ⴽⴻⵏⵏⵉⵡ, ⵎⵖⵉⵔ ⵎⴰⵍⴰ ⵜⴻⵇⵇⵉⵎⴻⵎ ⴷⴰⵢⵉ. 5 ⵏⴻⵛⵛ ⴷ ⵜⴰⵣⴰⵢⴰⵔⵜ, ⴽⴻⵏⵏⵉⵡ ⴷ ⵜⵉⵙⴻⴹⵡⵉⵏ. ⵡⴻⵏⵏⵉ ⴷⴰⵢⵉ ⵉ ⵖⴰ ⵉⵇⵇⵉⵎⴻⵏ ⵓ ⵏⴻⵛⵛ ⴷⴰⵢⴻⵙ, ⵏⴻⵜⵜⴰ ⴰⴷ ⴷⴷ-ⵢⴰⵡⵉ ⵍⵖⵉⴵⴻⵜ ⴰⵟⵟⴰⵙ, ⵎⵉⵏⵣⵉ ⴱⵍⴰ ⵣⵣⴰⵢⵉ ⵡⴰⵔ ⵜⵣⴻⵎⵎⴰⵔⴻⵎ ⴰⴷ ⵜⴻⴳⴳⴻⵎ ⵡⴰⵍⵓ. 6 ⵎⴰⵍⴰ ⵛⴰ ⵏ ⵢⵉⵊⵊⴻⵏ ⵡⴰⵔ ⴷⴰⵢⵉ ⵉⵇⵇⵉⵎ, ⴰⴷ ⵉⵎⵎⴻⵏⴹⴰⵔ ⵖⴰⵔ ⴱⴰⵔⵔⴰ ⴰⵎ ⵜⵙⴻⵟⵟⴰ ⵜⵓⵥⴻⵖ, ⵅⴻⵏⵏⵉ ⴰⴷ ⵜⵜ ⵢⴰⵔⵡⴻⵏ, ⴰⴷ ⵜⵜ ⵏⴹⴰⵔⴻⵏ ⴷⵉ ⵜⵎⴻⵙⵙⵉ, ⴰⴷ ⵢⴰⵔⴻⵖ. ◘15:6 ⵃⵉⵥ. 15:2-8; ⵎⵜ. 3:10; 7:19; ⴽⵓⵍ. 1:23. 7 ⵎⴰⵛⴰ ⵎⴰⵍⴰ ⵜⴻⵇⵇⵉⵎⴻⵎ ⴷⴰⵢⵉ ⵓⵛⴰ ⴰⵡⴰⵍⴻⵏ ⵉⵏⵓ ⴰⴷ ⴷⴰⵢⵡⴻⵎ ⵇⵇⵉⵎⴻⵏ, ⵜⵜⴰⵔⴻⵎ ⵎⵉⵏ ⵜⴻⵅⵙⴻⵎ ⵓⵛⴰ ⴰⴷ ⵖⴰⵔⵡⴻⵎ ⵢⵉⵍⵉ. ◘15:7 ⵉⵔⵎ. 29:12; ⵎⵜ. 7:7; 21:22; ⵎⴽ. 11:24; ⵍⴽ. 11:9; ⵢⵃ. 14:13; 16:24; ⵢⴰⵄ. 1:5; 1 ⵢⵃ. 3:22; 5:14. 8 ⵣⵉ ⵎⴰⵏ ⴰⵢⴰ ⴰⴷ ⵉⵜⵜⵡⴰⵙⵙⵄⵓⴵ ⴱⴰⴱⴰ, ⵅⵎⵉ ⵉ ⴷⴷ ⵖⴰ ⵜⴰⵡⵢⴻⵎ ⴰⵟⵟⴰⵙ ⵏ ⵍⵖⵉⴵⴻⵜ ⵓⵛⴰ ⴰⴷ ⵜⵉⵍⵉⵎ ⴷ ⵉⵎⴻⵃⴹⴰⵔⴻⵏ ⵉⵏⵓ.

9 ⴰⵎ ⵎⴰⵎⵎⴻⵛ ⴱⴰⴱⴰ ⵜⵓⵖⴰ ⵉⵜⵜⴻⵅⵙ ⴰⵢⵉ, ⴰⵎⵎⵓ ⵓⵍⴰ ⴷ ⵏⴻⵛⵛ ⵜⵓⵖⴰ ⵜⵜⴻⵅⵙⴻⵖ ⴽⴻⵏⵏⵉⵡ. ⵇⵇⵉⵎⴻⵎ ⴷⵉ ⵜⴰⵢⵔⵉ ⵉⵏⵓ. 10 ⵎⴰⵍⴰ ⵜᵉⵟⵟⴼⴻⵎ ⴷⵉ ⵜⵡⴻⵚⵚⴰ ⵉⵏⵓ, ⴰⴷ ⵜⴻⵇⵇⵉⵎⴻⵎ ⴷⵉ ⵜⴰⵢⵔⵉ ⵉⵏⵓ, ⴰⵎ ⵎⴰⵎⵎⴻⵛ ⵏⴻⵛⵛ ⵜⵓⵖⴰ ⵜⵜᵉⵟⵟⴼⴻⵖ ⴷⵉ ⵜⵡⴻⵚⵚⴰ ⵏ ⴱⴰⴱⴰ ⵓⵛⴰ ⵜⵜⵖⵉⵎⴻⵖ ⴷⵉ ⵜⴰⵢⵔⵉ ⵏⵏⴻⵙ. ◘15:10 ⵢⵃ. 14:15, 21, 23; 1 ⵢⵃ. 5:3.

11 ⵏⵏⵉⵖ ⴰⵡⴻⵎ ⵎⴰⵏ ⴰⵢⴰ, ⵃⵉⵎⴰ ⴰⴷ ⴷⴰⵢⵡⴻⵎ ⵜⵉⵍⵉ ⵍⴻⴼⵔⴰⵃⴻⵜ ⵉⵏⵓ ⵓⵛⴰ ⵃⵉⵎⴰ ⴰⴷ ⵜᵉⵜⵜⵡⴰⴽⴻⵎⵎⴻⵍ ⵍⴻⴼⵔⴰⵃⴻⵜ ⵏⵡⴻⵎ. 12 ⵜⴰⵡⵚⴻⵢⵢⴻⵜ ⵉⵏⵓ ⴷ ⵜⴰⵏⵉⵜⴰ: ⴰⵇⴰ ⴰⴷ ⵜⴻⵅⵙⴻⵎ ⵉⵊⵊⴻⵏ ⵡⴻⵏⵏⴻⵖⵏⵉ ⴰⵎ ⵎⴰⵎⵎⴻⵛ ⵏⴻⵛⵛ ⵜⵓⵖⴰ ⵅⵙⴻⵖ ⴽⴻⵏⵏⵉⵡ. ◘15:12 ⵍⴰⵡⵉ 19:18; ⵎⵜ. 22:39; ⵢⵃ. 13:34; ⴰⴼⴰ. 5:2; 1 ⵜⵙ. 4:9; 1 ⴱⵟ. 4:8; 1 ⵢⵃ. 3:23; 4:21. 13 ⵓⵍⴰ ⴷ ⵉⵊⵊ ⵡⴰⵔ ⵖⴰⵔⴻⵙ ⴱⵓ ⵜⴰⵢⵔⵉ ⵜⴰⵎⴻⵇⵇⵔⴰⵏⵜ ⵅ ⵜⴰⵏⵉⵜⴰ: ⴱⴻⵍⵍⵉ ⵛⴰ ⵏ ⵢⵉⵊⵊⴻⵏ ⴰⴷ ⵉⵡⵛ ⵜⵓⴷⴰⵔⵜ ⵏⵏⴻⵙ ⵉ ⵉⵎⴻⴷⴷⵓⴽⴽⴰⵍ ⵏⵏⴻⵙ. ◘15:13 ⵔⵓⵎ. 5:7; ⴰⴼⴰ. 5:2; 1 ⵢⵃ. 3:16. 14 ⴽⴻⵏⵏⵉⵡ ⴷ ⵉⵎⴻⴷⴷⵓⴽⴽⴰⵍ ⵉⵏⵓ, ⵎⴰⵍⴰ ⵜⴻⴳⴳⵉⵎ ⵎⴰⵔⵔⴰ ⵎⵉⵏ ⴽⴻⵏⵏⵉⵡ ⵡⴻⵚⵚⵉⵖ. ◘15:14 ⵎⵜ. 12:50; 2 ⴽⵓⵔ. 5:16; ⴳⴰⵍ. 5:6; 6:15; ⴽⵓⵍ. 3:11. 15 ⵡⴰⵔ ⵜⵜⵄⵉⵡⵉⴷⴻⵖ ⴰⴷ ⴰⵡⴻⵎ ⵙⴻⵎⵎⵉⵖ ‘ⵉⵎⵙⴻⵅⵅⴰⵔⴻⵏ’, ⵎⵉⵏⵣⵉ ⴰⵎⵙⴻⵅⵅⴰⵔ ⵡⴰⵔ ⵉⵙⵙⵉⵏ ⵎⵉⵏ ⵉⵜⵜⴻⴳⴳ ⵙⵉⴷⵉⵙ. ⵎⴰⵛⴰ ⵏⴻⵛⵛ ⵜⵓⵖⴰ ⵜⵜⵍⴰⵖⵉⵖ ⴰⵡⴻⵎ ⴷ ‘ⵉⵎⴻⴷⴷⵓⴽⴽⴰⵍ ⵉⵏⵓ!’, ⵎⵉⵏⵣⵉ ⵏⴻⵛⵛ ⵙⵙⴻⵛⵏⴻⵖ ⴽⴻⵏⵏⵉⵡ ⵎⴰⵔⵔⴰ ⵎⵉⵏ ⵙⵍⵉⵖ ⵣⵉ ⴱⴰⴱⴰ. ◘15:15 ⵢⵃ. 8:26. 16 ⵡⴰⵔ ⵉⴵⵉ ⴷ ⴽⴻⵏⵏⵉⵡ ⵉ ⴷ ⴰⵢⵉ ⵉⵅⴹⴰⵔⴻⵏ, ⵎⴰⵛⴰ ⴷ ⵏⴻⵛⵛ ⵉ ⴽⴻⵏⵏⵉⵡ ⵉⵅⴹⴰⵔⴻⵏ ⵓⵛⴰ ⵏⴻⵛⵛ ⴳⴳⵉⵖ ⴽⴻⵏⵏⵉⵡ ⵃⵉⵎⴰ ⴰⴷ ⵜⵔⴰⵃⴻⵎ, ⴰⴷ ⴷⴷ-ⵜⴰⵡⵢⴻⵎ ⵍⵖⵉⴵⴻⵜ ⵓ ⵃⵉⵎⴰ ⴰⴷ ⵜⴻⵇⵇⵉⵎ ⵍⵖⵉⴵⴻⵜ ⵏⵡⴻⵎ, ⵃⵉⵎⴰ ⵎⴰⵔⵔⴰ ⵎⵉⵏ ⵖⴰ ⵜᵉⵜⵜⴰⵔⴻⵎ ⵣⵉ ⴱⴰⴱⴰ ⵙ ⵢⵉⵙⴻⵎ ⵉⵏⵓ, ⴰⴷ ⴰⵡⴻⵎ ⵜ ⵉⵡⵛ ⵏⴻⵜⵜⴰ. ◘15:16 ⵎⵜ. 28:19; ⵎⴽ. 16:15; ⵢⵃ. 13:18; ⴰⴼⴰ. 1:4; ⴽⵓⵍ. 1:6. 17 ⴷ ⵎⴰⵏ ⴰⵢⴰ ⵉ ⵣⵉ ⴽⴻⵏⵏⵉⵡ ⵓⵎⵓⵔⴻⵖ, ⵃⵉⵎⴰ ⴰⴷ ⵜⴻⵅⵙⴻⵎ ⵉⵊⵊⴻⵏ ⵡⴻⵏⵏⴻⵖⵏⵉ.”

18 “ⵎⴰⵍⴰ ⴷⴷⵓⵏⴻⵛⵜ ⴰⴷ ⴽⴻⵏⵏⵉⵡ ⵜⵛⴰⵔⵀ, ⵙⵏⴻⵎ ⴰⵇⴰ ⵜⵛⴰⵔⵀ ⴰⵢⵉ ⵇⴱⴻⵍ ⴽⴻⵏⵏⵉⵡ. ◘15:18 1 ⵢⵃ. 3:13. 19 ⵎⴰⵍⴰ ⴰⵇⴰ ⴽⴻⵏⵏⵉⵡ ⵣⵉ ⴷⴷⵓⵏⴻⵛⵜ, ⵉⵍⵉ ⴰⵇⴰ ⴷⴷⵓⵏⴻⵛⵜ ⵜⵓⵖⴰ ⵜᵉⵜⵜⴻⵅⵙ ⵉⵏⵏⵉ ⵣⵣⴰⵢⴻⵙ. ⵎⴰⵛⴰ ⵎⵉⵏⵣⵉ ⴽⴻⵏⵏⵉⵡ ⵡⴰⵔ ⵜⴻⴵⵉⵎ ⵛⴰ ⵣⵉ ⴷⴷⵓⵏⴻⵛⵜ, ⵎⴰⵛⴰ ⵏⴻⵛⵛ ⵉⵅⴹⴰⵔⴻⵖ ⴽⴻⵏⵏⵉⵡ ⵣⵉ ⴷⴷⵓⵏⴻⵛⵜ, ⵙ ⵓⵢⴻⵏⵏⵉ ⵜⵛⴰⵔⵔⴻⵀ ⴷⴷⵓⵏⴻⵛⵜ ⴽⴻⵏⵏⵉⵡ. ◘15:19 ⵢⵃ. 17:14; ⴳⴰⵍ. 1:10. 20 ⵄⴻⵇⵍⴻⵎ ⴰⵡⴰⵍ ⵉ ⴷ ⴰⵡⴻⵎ ⵏⵏⵉⵖ: ‘ⴰⵎⵙⴻⵅⵅⴰⵔ ⵡⴰⵔ ⵢⵓⵄⵍⵉ ⵅ ⵙⵉⴷⵉⵙ!’ ⵎⴰⵍⴰ ⴷⴰⵔⵔⴰⵛⴻⵏ ⴰⵢⵉ, ⴰⴷ ⴽⴻⵏⵏⵉⵡ ⴷⴰⵔⵔⵛⴻⵏ ⵄⴰⵡⴻⴷ. ⵎⴰⵍⴰ ⵟⵟⴼⴻⵏ ⴷⴻⴳ ⵡⴰⵡⴰⵍ ⵉⵏⵓ, ⴰⴷ ⵟⵟⴼⴻⵏ ⵄⴰⵡⴻⴷ ⴷⴻⴳ ⵡⴰⵡⴰⵍ ⵏⵡⴻⵎ. ◘15:20 ⵎⵜ. 10:24; 24:9; ⵍⴽ. 6:40; ⵢⵃ. 13:16; 16:2. 21 ⵎⴰⵛⴰ ⴰⴷ ⵣⵣⴰⵢⵡⴻⵎ ⴳⴳⴻⵏ ⵎⴰⵏ ⴰⵢⴰ ⵎⴰⵔⵔⴰ ⴷⵉ ⵙⵙⵉⴱⴱⴻⵜ ⵏ ⵢⵉⵙⴻⵎ ⵉⵏⵓ, ⵎⵉⵏⵣⵉ ⵏⵉⵜⵏⵉ ⵡⴰⵔ ⵙⵙⵉⵏⴻⵏ ⵛⴰ ⵡⴻⵏⵏⵉ ⴷ ⴰⵢⵉ ⴷⴷ-ⵉⵙⵙⴻⴽⴽⴻⵏ. ◘15:21 ⵎⵜ. 10:22; ⵢⵃ. 16:3. 22 ⵎⴰⵍⴰ ⵡⴰⵔ ⴷⴷ-ⵓⵙⵉⵖ ⵓ ⵡⴰⵔ ⴽⵉⵙⴻⵏ ⵙⵙⵉⵡⵍⴻⵖ, ⴰⴷ ⵢⵉⵍⵉ ⵡⴰⵔ ⵖⴰⵔⵙⴻⵏ ⴱⵓ ⴷⴷⵏⵓⴱ. ⵎⴰⵛⴰ ⵍⴻⵅⵅⵓ ⵡⴰⵔ ⵖⴰⵔⵙⴻⵏ ⴱⵓ ⵙⵎⴰⵃⴻⵜ ⵅ ⴷⴷⵏⵓⴱ ⵏⵙⴻⵏ. ◘15:22 ⵔⵓⵎ. 4:15; 5:20. 23 ⵡⴻⵏⵏⵉ ⴷ ⴰⵢⵉ ⵉⵛⴰⵔⵔⵀⴻⵏ, ⴰⴷ ⵉⵛⴰⵔⵀ ⵓⵍⴰ ⴷ ⴱⴰⴱⴰ. 24 ⵎⴰⵍⴰ ⵡⴰⵔ ⴳⴳⵉⵖ ⵣⵣⴰⵜ ⵉ ⵜⵉⵟⵟⴰⵡⵉⵏ ⵏⵙⴻⵏ ⵍⴻⵅⴷⴰⵢⴻⵎ ⵉ ⵡⴰⵔ ⵜⴻⵏⵜ ⵢⴻⴳⴳⵉ ⵓⵍⴰ ⴷ ⵉⵊⵊ ⴱⵏⴰⴷⴻⵎ ⵏⵏⴻⵖⵏⵉ, ⴰⴷ ⵢⵉⵍⵉ ⵡⴰⵔ ⵖⴰⵔⵙⴻⵏ ⴱⵓ ⴷⴷⵏⵓⴱ. ⵎⴰⵛⴰ ⵍⴻⵅⵅⵓ ⵥⵔⵉⵏ ⵜⴻⵏⵜ, ⵛⴰⵔⵀⴻⵏ ⴰⵢⵉ ⵏⴻⵛⵛ ⵓⵍⴰ ⴷ ⴱⴰⴱⴰ. ◘15:24 ⵢⵃ. 10:37. 25 ⵙ ⵓⵢⴰ ⴰⴷ ⵉⵜⵜⵡⴰⴽⴻⵎⵎⴻⵍ ⵡⴰⵡⴰⵍ ⵉ ⵢⵓⵔⴰⵏ ⴷⵉ ⵛⵛⴰⵔⵉⵄⴰ ⵏⵙⴻⵏ: ‘ⵛⴰⵔⵀⴻⵏ ⴰⵢⵉ ⵅ ⵡⴰⵍⵓ’. ◘15:25 ⵉⵥⵀⴷ. 35:19; 69:5.

26 ⵅⵎⵉ ⴷⴷ ⵖⴰ ⵢⴰⵙ ⵓⵎⵙⴻⵚⵍⴰⵃ, ⵡⴻⵏⵏⵉ ⵖⴰⵔⵡⴻⵎ ⴷⴷ ⵖⴰ ⵙⵙⴻⴽⴽⴻⵖ ⵣⵉ ⴱⴰⴱⴰ, ⴰⵔⵔⵓⵃ ⵏ ⵜⵉⴷⴻⵜⵜ ⵉ ⴷⴷ-ⵢⵓⵙⵉⵏ ⵣⵉ ⵖⴰⵔ ⴱⴰⴱⴰ, ⵅⴻⵏⵏⵉ ⵡⴰⵏⵉⵜⴰ ⴰⴷ ⴰⵢⵉ ⵉⵛⵀⴻⴷ. ◘15:26 ⵍⴽ. 24:49; ⵢⵃ. 14:26; 16:7; ⵍⴻⵅ. 5:32. 27 ⵓⵛⴰ ⴰⴷ ⵜⵛⴻⵀⴷⴻⵎ ⵓⵍⴰ ⴷ ⴽⴻⵏⵏⵉⵡ, ⵎⵉⵏⵣⵉ ⵜⵓⵖⴰ ⴽⴻⵏⵏⵉⵡ ⴰⴽⵉⴷⵉ ⵣⴻⴳ ⵓⵎⴻⵣⵡⴰⵔⵓ.” ◘15:27 ⵍⴻⵅ. 1:8, 21; 5:32.