1 ⵢⴰⵄⵇⵓⴱ, ⴰⵎⵙⴻⵅⵅⴰⵔ ⵏ ⴰⵔⴻⴱⴱⵉ ⵓ ⵏ ⵙⵉⴷⵉⵜⵏⴻⵖ ⵢⴰⵙⵓⵄ ⵍⵎⴰⵙⵉⵃ, ⵉ ⵜⴻⵏⵄⴰⵛ ⵏ ⵜⵇⴻⴱⴱⴰⵍ ⵜⵉⵏⵏⵉ ⵉⵜⵜⵡⴰⵣⴻⴵⵄⴻⵏ ⵊⴰⵔ ⵍⴻⴳⵏⵓⵙ: ⵍⴻⵀⵏⴰ ⵅⴰⵡⴻⵎ! ◘1:1 ⵍⴻⵅ. 8:1; 1 ⴱⵟ. 1:1.

2 ⴰ ⴰⵢⵜⵎⴰ, ⵎⴰⵍⴰ ⴰⴷ ⵅⴰⵡⴻⵎ ⴽⴽⴻⵏ ⵄⵍⴰⵎ ⴽⵓⵍ ⵉⵊⴰⵔⵔⵉⴱⴻⵏ, ⵃⴻⵙⴱⴻⵎ ⵎⴰⵏ ⴰⵢⴰ ⵎⴰⵔⵔⴰ ⴷ ⵍⴻⴼⵔⴰⵃⴻⵜ, ◘1:2 ⵎⵜ. 5:11; ⵔⵓⵎ. 5:3; 1 ⴱⵟ. 1:6. 3 ⵎⴰⵖⴰⵔ ⴽⴻⵏⵏⵉⵡ ⵜⴻⵙⵙⵏⴻⵎ ⴱⴻⵍⵍⵉ ⵜⴰⵇⴻⴵⴻⴱⵜ ⵏ ⵍ’ⵉⵎⴰⵏ, ⴰⴷ ⴷⴷ-ⵜⴻⵊⵊ ⵚⵚⴱⴰⵔ ⵏⵡⴻⵎ. ◘1:3 ⵔⵓⵎ. 5:3; 1 ⴱⵟ. 1:7. 4 ⵎⴰⵛⴰ ⵉⵜⵜⵅⴻⵚⵚⴰ ⵚⵚⴱⴰⵔ ⴰⴷ ⵉⵜⵜⵡⴰⴽⴻⵎⵎⴻⵍ, ⵃⵉⵎⴰ ⴰⴷ ⵜⴰⵡⴹⴻⵎ ⵓ ⴰⴷ ⵜⴽⴻⵎⵎⵍⴻⵎ, ⵓⵛⴰ ⵡⴰⵔ ⴽⴻⵏⵏⵉⵡ ⵉⵜⵜⵅⴻⵚⵚⵉ ⵡⴰⵍⵓ.

5 ⵎⴰⵍⴰ ⵛⴰ ⵏ ⵉⵊⵊⴻⵏ ⵣⵣⴰⵢⵡⴻⵎ ⵜⴻⵇⵇⵉⵎ ⴰⵙ ⵄⴰⴷ ⵜⵉⵖⵉⵜ, ⴰⴷ ⵜⵜ ⵉⵜⵜⴰⵔ ⵣⵉ ⴰⵔⴻⴱⴱⵉ ⵡⴻⵏⵏⵉ ⵉⵜⵜⵉⵛⴻⵏ ⵙ ⵜⴻⵛⵔⵉⵎⴻⵜ ⵉ ⵎⴰⵔⵔⴰ ⴱⵍⴰ ⴰⵣⴰⵡⴰⵔ, ⵓⵛⴰ ⴰⴷ ⴰⵙ ⵜⴻⵎⵎⴻⵡⵛ. ◘1:5 ⴰⵡⵍⵏ. 2:3; ⵉⵔⵎ. 29:12; ⵎⵜ. 7:7; 21:22; ⵎⴽ. 11:24; ⵢⵃ. 16:24; 1 ⵢⵃ. 3:22; 5:14. 6 ⵎⴰⵛⴰ ⴻⵊⵊ ⵉ-ⵜ ⴰⴷ ⵉⵜⵜⴰⵔ ⵙ ⵍ’ⵉⵎⴰⵏ, ⴱⵍⴰ ⴰⵛⴻⴽⴽⵉ, ⵎⵉⵏⵣⵉ ⵡⴻⵏⵏⵉ ⵉⵜⵜⵛⴻⴽⴽⴰⵏ ⴰⵇⴰ ⵏⴻⵜⵜⴰ ⴰⵎ ⵍⴻⵎⵡⴰⵊ ⵏ ⵍⴻⴱⵃⴰⵔ ⵏⵏⵉ ⵉⵜⵜⵡⴰⵄⴰⵔⵔⵏⴻⵏ ⵣⴻⴳ ⵓⵙⴻⵎⵎⵉⴹ. 7 ⵡⴰⵔ ⵜⵜⴻⵊⵊⵉ ⴰⴷ ⴰⵙ ⵉⵜⵜⵖⵉⵍ ⵉ ⴱⵏⴰⴷⴻⵎ ⵏⵏⵉ ⴰⴷ ⵉⴽⵙⵉ ⵛⴰ ⵣⵉ ⵙⵉⴷⵉ, 8 ⵎⴰⵖⴰⵔ ⵏⴻⵜⵜⴰ ⵙ ⵜⵏⴰⵢⴻⵏ ⵉⵣⴻⴵⵉⴼⴻⵏ, ⵡⴰⵔ ⵢⴰⵔⵙⵉ ⴷⵉ ⵎⴰⵔⵔⴰ ⵉⴱⵔⵉⴷⴻⵏ ⵏⵏⴻⵙ.

9 ⴻⵊⵊ ⵓⵎⴰⵜⵡⴻⵎ ⵉⵡⴰⴹⵄⴻⵏ ⴰⴷ ⵉⵙⵙⴻⵎⵖⴰⵔ ⴷⵉ ⵍⵓⵄⵍⴰ ⵏⵏⴻⵙ, 10 ⵓ ⴱⵓ-ⵡⴰⴳⵍⴰ ⴷⴻⴳ ⵓⵡⴰⴹⴻⵄ ⵏⵏⴻⵙ, ⵎⵉⵏⵣⵉ ⴰⵎ ⵜⵡⴰⵔⴷⴻⵛⵜ ⴷⵉ ⴰⵔⴱⵉⵄ ⴰⴷ ⵉⴼⵏⴰ ⵏⴻⵜⵜⴰ. 11 ⵎⴰⵖⴰⵔ ⴰⴷ ⵜⴻⵏⵇⴰⵔ ⵜⴼⵓⵛⵜ ⵙ ⵍⴻⵃⵎⵓ ⵏⵏⴻⵙ, ⴰⴷ ⵜⴻⵙⵙⴻⵛⵎⴻⴹ ⴰⵔⴱⵉⵄ ⵓⵛⴰ ⵜⴰⵡⴰⵔⴷⴻⵛⵜ ⴰⴷ ⵜⵉⵙⵍⴰⵡ ⵓⵛⴰ ⴰⴷ ⴰⵙ ⵉⵔⴰⵃ ⵡⴰⵥⵔⵉ ⵏ ⵡⵓⴷⴻⵎ ⵏⵏⴻⵙ. ⴰⵎⵎⵓ ⵉ ⵖⴰ ⵉⴼⵏⴰ ⵄⴰⵡⴻⴷ ⴱⵓ-ⵡⴰⴳⵍⴰ ⴷⵉ ⵎⴰⵔⵔⴰ ⵉⴱⵔⵉⴷⴻⵏ ⵏⵏⴻⵙ. ◘1:11 ⵉⵛⴰ. 40:6, 7; 1 ⴽⵓⵔ. 7:31; ⵢⴰⵄ. 4:14; 1 ⴱⵟ. 1:24; 1 ⵢⵃ. 2:17.

12 ⵙⵙⴻⵄⴷ ⵏ ⵡⴻⵔⵢⴰⵣ ⵏⵏⵉ ⵉ ⵖⴰ ⵉⵃⴻⵎⵍⴻⵏ ⴰⵊⴰⵔⵔⴻⴱ, ⵎⵉⵏⵣⵉ ⵎⴰⵍⴰ ⵉⴷⵡⴻⵍ ⴷ ⴰⵎⵇⴻⴵⴻⴱ, ⴰⴷ ⵉⵟⵟⴻⴼ ⵜⵜⴰⵊ ⵏ ⵜⵓⴷⴰⵔⵜ ⵏⵏⵉ ⵜⵓⵖⴰ ⵉⵡⴰⵄⴷ ⵣⵣⴰⵢⴻⵙ ⴰⵔⴻⴱⴱⵉ ⵉ ⵢⵉⵏⵏⵉ ⵜ ⵉⵜⵜⴻⵅⵙⴻⵏ. ◘1:12 ⴰⵢⵓⴱ 5:17; ⵎⵜ. 10:22; 19:28, 29; 2 ⵜⵉⵎ. 4:8; 1 ⴱⵟ. 5:4; ⴰⵙⴰ. 2:10. 13 ⵡⴰⵔ ⵜⵜⴻⵊⵊⵉ ⵃⴻⴷ ⵎⴰⵍⴰ ⵉⵜⵜⵡⴰⵊⵊⴰⵔⴻⴱ, ⴰⴷ ⵢⵉⵏⵉ: “ⴰⵔⴻⴱⴱⵉ ⵉ ⴷ ⴰⵢⵉ ⵉⵜⵜⵊⴰⵔⵔⴰⴱⴻⵏ!” ⴰⵇⴰ ⴰⵔⴻⴱⴱⵉ ⵡⴰⵔ ⵉⵣⴻⵎⵎⴰⵔ ⴰⴷ ⵉⵜⵜⵡⴰⵊⴰⵔⵔⴻⴱ ⵣⵉ ⵍⵖⴰⵔ ⵓⵛⴰ ⵏⴻⵜⵜⴰ ⵙ ⵢⵉⵅⴻⴼ ⵏⵏⴻⵙ ⵡⴰⵔ ⵉⵜⵜⵊⵊⴰⵔⵔⵉⴱ ⵓⵍⴰ ⴷ ⵉⵊⵊ. 14 ⵎⴰⵛⴰ ⴽⵓⵍ ⵉⵊⵊ ⴰⴷ ⵉⵜⵜⵡⴰⵖⵡⴰ ⵣⵉ ⵏⵏⴻⵛⵡⴻⵜ ⵏⵏⴻⵙ ⵓⵛⴰ ⵏⵏⴻⵛⵡⴻⵜ ⴰⴷ ⵜ ⵜᵉⵟⵟⴻⴼ ⵓⵛⴰ ⴰⴷ ⵣⵣⴰⵢⴻⵙ ⵉⵜⵜⵡⴰⵖⵡⴰ. 15 ⵎⴰⵍⴰ ⵏⵏⴻⵛⵡⴻⵜ ⵜⴻⴽⵙⵉ ⵙ ⵓⵄⴻⴷⴷⵉⵙ, ⴰⴷ ⴷⴷ-ⵜⴰⵔⵓⵡ ⴷⴷⴻⵏⴱ, ⵓⵛⴰ ⵅⵎⵉ ⵖⴰ ⵉⵎⵖⴰⵔ ⴷⴷⴻⵏⴱ, ⴰⴷ ⴷⴷ-ⵢⴰⵡⵉ ⵍⵎⴻⵡⵜ. 16 ⴰ ⴰⵢⵜⵎⴰ ⵉⵄⵉⵣⵣⴻⵏ, ⵡⴰⵔ ⵜⵜⵡⴻⴷⴷⴰⵔⴻⵎ! 17 ⴽⵓⵍ ⵜⴰⵡⵀⵉⴱⵜ ⵜⴰⵚⴻⴱⵃⴰⵏⵜ ⴷ ⵉⴽⴻⵎⵎⵍⴻⵏ ⵜⵀⴻⴽⴽⵡⴰ-ⴷⴷ ⵣⵉ ⵙⴻⵏⵏⴻⵊ, ⵣⵉ ⴱⴰⴱⴰⵜⵙⴻⵏⵜ ⵏ ⵜⴼⴰⵡⵉⵏ ⵉ ⵡⴰⵔ ⵖⴰⵔ ⵉⴵⵉ ⵓⴱⴻⴷⴷⴻⵍ ⵏⵉⵖ ⵜⵉⵍⵉ ⵏ ⴷⴷⴻⵡⵍⴰⵏ. ◘1:17 ⴰⵡⵍⵏ. 2:6; ⵉⵛⴰ. 14:27; 46:10; ⵎⴰⵍ. 3:6; ⵔⵓⵎ. 11:29; 1 ⴽⵓⵔ. 4:7. 18 ⵢⵓⵙⴰ-ⴷⴷ ⴰⵙ ⵅ ⵍⵅⴰⴹⴰⵔ, ⵎⴰⵃⴻⵏⴷ ⴰⴷ ⴰⵏⴻⵖ ⴷⴷ-ⵢⴻⵊⵊ ⵙ ⵡⴰⵡⴰⵍ ⵏ ⵜⵉⴷⴻⵜⵜ, ⵃⵉⵎⴰ ⴰⴷ ⵏⵉⵍⵉ ⴷ ⵚⵚⴰⴱⴻⵜ ⵜⴰⵎⴻⵣⵡⴰⵔⵓⵜ ⵣⵉ ⵎⴰⵔⵔⴰ ⵎⵉⵏ ⵣⵣⴰⵢⴻⵙ ⴷⴷ-ⵉⵅⴻⵍⵇⴻⵏ. ◘1:18 1 ⴽⵓⵔ. 4:15; ⴳⴰⵍ. 4:19; 1 ⴱⵟ. 1:23.

19 ⵙⵏⴻⵎ ⴰⵢⴰ, ⴰ ⴰⵢⵜⵎⴰ ⵉⵄⵉⵣⵣⴻⵏ, ⴻⵊⵊ ⴽⵓⵍ ⴱⵏⴰⴷⴻⵎ ⴰⴷ ⵉⵇⴻⴵⴻⵇ ⵃⵉⵎⴰ ⴰⴷ ⵉⵙⴻⵍ, ⵡⴰⵔ ⵜⵇⴻⴵⵉⵇⴻⵎ ⵛⴰ ⵖⴰⵔ ⵡⴰⵡⴰⵍ ⵏⵉⵖ ⵖⴰⵔ ⵜⴻⴼⵇⴻⵃⵜ. ◘1:19 ⴰⵡⵍⵏ. 17:27; ⴰⵎⴱ. 5:1. 20 ⵎⵉⵏⵣⵉ ⵜⴰⴼⵇⴻⵃⵜ ⵏ ⵡⴻⵔⵢⴰⵣ ⵡⴰⵔ ⴷⴷ-ⵜᵉⵜⵜⵉⵡⵉ ⵛⴰ ⵜⴰⵙⴻⴳⴷⴰ ⵣⵣⴰⵜ ⵉ ⴰⵔⴻⴱⴱⵉ. 21 ⵙ ⵓⵢⴻⵏⵏⵉ ⵙⵙⴱⴻⵄⵄⴷⴻⵎ ⵅⴰⵡⴻⵎ ⵇⴰⵄ ⵜⴰⵅⵎⵓⵊⵉ ⴷ ⵡⴰⵟⵟⴰⵙ ⵏ ⵜⵓⵄⴻⴼⴼⵏⴰ, ⵓⵛⴰ ⵇⴻⴱⵍⴻⵎ ⵙ ⵜⴻⵎⵀⵉⵏⵜ ⴰⵡⴰⵍ ⵉ ⵉⵜⵜⵡⴰⵥⵥⵓⵏ ⴷⵉ ⵟⵟⴱⵉⵄⴻⵜ ⵏⵏⴻⵖ, ⴰⵡⴰⵍ ⵉ ⵉⵣⴻⵎⵎⴰⵔⴻⵏ ⴰⴷ ⵉⵙⵙⴻⵏⵊⴻⵎ ⵍⴻⵄⵎⵓⵔ ⵏⵡⴻⵎ. ◘1:21 ⵔⵓⵎ. 13:12; ⴽⵓⵍ. 3:8.

22 ⵉⵍⵉⵎ ⴷ ⵉⵏⵏⵉ ⵉⵜⵜⴻⴳⴳⴻⵏ ⴰⵡⴰⵍ, ⵡⴰⵔ ⵉⴵⵉ ⴷ ⵉⵏⵏⵉ ⵉⵜⵜⴻⵙⵍⴰⵏ ⵡⴰⵀⴰ, ⵡⴰⵔ ⵛⴻⵎⵜⴻⵎ ⵉⵅⴻⴼ ⵏⵡⴻⵎ! ◘1:22 ⵎⵜ. 7:21; ⵍⴽ. 11:28; ⵔⵓⵎ. 2:13; 1 ⵢⵃ. 3:7. 23 ⵎⵉⵏⵣⵉ ⵎⴰⵍⴰ ⵉⵙⵍⴰ ⵃⴻⴷ ⵉ ⵡⴰⵡⴰⵍ, ⵎⴰⵛⴰ ⵡⴰⵔ ⵣⵣⴰⵢⴻⵙ ⵉⴳⴳⵉ, ⴰⵇⴰ ⵏⴻⵜⵜⴰ ⴰⵎ ⵢⵉⵊⵊ ⵏ ⵡⴻⵔⵢⴰⵣ ⵉ ⵉⵅⴻⵣⵣⴰⵔⴻⵏ ⴷⵉ ⵜⵉⵙⵉⵜ ⴷⴻⴳ ⵓⵖⴻⵎⴱⵓⴱ ⵏⵏⴻⵙ. ◘1:23 ⵍⴽ. 6:47. 24 ⵎⵉⵏⵣⵉ ⵉⵜⵜⵡⴰⵍⴰ ⵉⵅⴻⴼ ⵏⵏⴻⵙ, ⵉⵔⵓⵃ, ⵓⵛⴰ ⵍⴻⵅⴷⴻⵏⵏⵉ ⴰⴷ ⵉⵜⵜⵓ ⵎⴰⵎⵎⴻⵛ ⵜⵓⵖⴰ ⵉⴵⴰ. 25 ⵎⴰⵛⴰ ⵡⴻⵏⵏⵉ ⵉ ⵖⴰ ⵉⵅⵣⴰⵔⴻⵏ ⴷⵉ ⵛⵛⴰⵔⵉⵄⴰ ⵉⴽⴻⵎⵎⵍⴻⵏ ⵏ ⵜⵉⵍⴻⵍⵍⵉ ⵓⵛⴰ ⵉⵇⵇⵉⵎ ⵉⵅⴻⵣⵣⴰⵔ ⴷⴰⵢⴻⵙ, ⵡⴰⵔ ⵉⴵⵉ ⴰⵎ ⵢⵉⵊⵊⴻⵏ ⵉⵜⵜⴻⵙⵍⴰ ⵍⴻⵅⴷⴻⵏⵏⵉ ⵉⵜⵜᵉⵜⵜⵓ ⴷⴻⵖⵢⴰ, ⵎⴰⵛⴰ ⴰⵎ ⵢⵉⵊⵊⴻⵏ ⵡⴻⵏⵏⵉ ⵜⵜ ⵉⵜⵜⴻⴳⴳⴻⵏ ⵙ ⵜⵉⴷⴻⵜⵜ, ⴰⵇⴰ ⵡⴰⵏⵉⵜⴰ ⴷ ⴰⵎⵉⵎⵓⵏ ⴷⵉ ⵎⵉⵏ ⵉⵜⵜⴻⴳⴳ. ◘1:25 ⵎⵜ. 5:19.

26 ⵎⴰⵍⴰ ⴷⵉⵏ ⵡⴻⵏⵏⵉ ⵓⵎⵉ ⵉⵜⵜⵖⵉⵍ ⴰⵇⴰ ⵏⴻⵜⵜⴰ ⵉⵜⵜⵙⴻⵅⵅⴰⵔ ⵉ ⴰⵔⴻⴱⴱⵉ ⴰⵎ ⵡⴰⵔ ⵉⵃⴻⵟⵟⵉ ⵉⵍⴻⵙ ⵏⵏⴻⵙ, ⵎⴰⵛⴰ ⵉⵅⴻⴷⴷⴻⵄ ⵓⵍ ⵏⵏⴻⵙ, ⵅⴻⵏⵏⵉ ⴰⵇⴰ ⵜⴰⵙⴻⵅⵅⴰⵔⵜ ⵏⵏⴻⵙ ⴱⴰⵟⴻⵍ. ◘1:26 ⵉⵥⵀⴷ. 34:14; ⵢⴰⵄ. 3:6; 1 ⴱⵟ. 3:10. 27 ⵎⴰⵖⴰⵔ ⵜⴰⵙⴻⵅⵅⴰⵔⵜ ⵜⴰⵎⴻⵣⴷⴰⴳⵜ ⴷ ⵉⵇⴻⴷⴷⵙⴻⵏ ⵇⵉⴱⴰⵍⵜ ⵉ ⴰⵔⴻⴱⴱⵉ, ⴱⴰⴱⴰⵜⵏⴻⵖ, ⴰⵇⴰ-ⵜ ⴷ ⵜⴰ: ⴰⵜⵀⵉⵍⵉ ⴷⴻⴳ ⵉⵢⵓⵊⵉⵍⴻⵏ ⴷ ⵜⵉⵊⵊⴰⵍ ⴷⵉ ⵍⵎⴻⵃⵏⴻⵜ ⵏⵙⴻⵏⵜ, ⵓ ⵎⴰⵃⴻⵏⴷ ⴱⵏⴰⴷⴻⵎ ⴰⴷ ⵉⵃⴻⵢⵢⴻⴷ ⵉⵅⴻⴼ ⵏⵏⴻⵙ ⵣⵉ ⴷⴷⵓⵏⴻⵛⵜ ⴱⵍⴰ ⵍⵖⴻⵛⵛ.