1 ⴷⴻⴳ ⵡⵓⵙⵙⴰⵏ ⵏ ⴰⵃⴰⵣ, ⵎⵎⵉⵙ ⵏ ⵢⵓⵜⴰⵎ, ⵎⵎⵉⵙ ⵏ ⵄⵓⵣⵣⵉⵢⴰ, ⴰⵊⴻⴵⵉⴷ ⵏ ⵢⴰⵀⵓⴷⴰ, ⵉⴳⴻⵄⵄⴻⴷ ⵔⴰⵚⵉⵏ, ⴰⵊⴻⴵⵉⴷ ⵏ ⴰⵔⴰⵎ, ⴰⴽ-ⴷ ⴼⴰⵇⴰⵃ, ⵎⵎⵉⵙ ⵏ ⵔⴰⵎⴰⵍⵢⴰⵀⵓ, ⴰⵊⴻⴵⵉⴷ ⵏ ⵉⵙⵔⴰⵉⵍ, ⵖⴰⵔ ⵓⵔⵛⴰⵍⵉⵎ ⵎⴰⵃⴻⵏⴷ ⴰⴷ ⵉⵎⵎⵏⴻⵖ ⴰⴽⵉⴷⴻⵙ. ⵎⴰⵛⴰ ⵏⴻⵜⵜⴰ ⵡⴰⵔ ⵉⵣⴻⵎⵎⴰⵔ ⴰⴷ ⵅⴰⵙ ⵉⵖⴻⵍⵍⴻⴱ. ◘7:1 2 ⵉⵊ. 16:5; 2 ⵉⵎ. 28:5 2 ⵓⵎⵉ ⵃⴰⵊⴰⵏ ⵉ ⵜⴰⴷⴷⴰⵔⵜ ⵏ ⴷⴰⵡⵓⴷ, ⵏⵏⴰⵏ: “ⴰⵇⴰ ⵉⵀⵡⴰ ⴰⵔⴰⵎ ⵅ ⵉⴼⵔⴰⵢⵉⵎ!”, ⵢⴰⵔⵊⵉⵊ ⵡⵓⵍ ⵏ ⵓⵊⴻⴵⵉⴷ ⴷ ⵡⵓⵍ ⵏ ⵍⴳⴻⵏⵙ ⵏⵏⴻⵙ, ⴰⵎ ⵎⴰⵎⵎⴻⵛ ⵜⵜⴰⵔⵊⵉⵊⵉⵏⵜ ⵜⵛⴻⵊⵊⵓⵔⴰ ⵏ ⵡⴻⵣⵖⴰⵔ ⵙ ⵓⵙⴻⵎⵎⵉⴹ. ◼7:2 ⴰⵥⵖⴰⵔ-ⵏⵉⵖ ‘ⵍⵖⴰⴱⴻⵜ’ ⵏⵉⵖ ‘ⵜⴰⵥⴳⴰⵏⵜ’.

3 ⵉⵏⵏⴰ ⵙⵉⴷⵉ ⵉ ⵉⵛⴰⵄⵢⴰ: “ⴼⴼⴻⵖ ⵉ ⵓⵎⵙⴰⴳⴰⵔ ⴰⴽ-ⴷ ⴰⵃⴰⵣ, ⵛⴻⴽ ⴷ ⵎⵎⵉⵛ ⵛⴰ’ⴰⵔ-ⵢⴰⵛⵓⴱ, ⵖⴰⵔ ⵓⵏⴻⴳⴳⴰⵔ ⵏ ⵓⵇⴰⴷⵓⵙ ⵏ ⵡⴰⵎⴰⵏ ⵏ ⵓⵢⴻⵍⵎⴰⵏ ⵏ ⵙⴻⵏⵏⴻⵊ, ⵡⴻⵏⵏⵉ ⵉⴵⴰⵏ ⵖⴰⵔ ⵡⴻⴱⵔⵉⴷ ⵢⵓⵄⵔⴰⵏ ⵖⴰⵔ ⵡⴻⵃⵡⵉⵛ ⵏ ⵓⵚⴻⴱⴱⴰⵏ. 4 ⵉⵏⵉ ⴰⵙ: ‘ⵃⴹⴰ, ⴰⵔⵙ, ⵡⴰⵔ ⵜⵜⴻⴳⴳⵯⴻⴷ ⵛⴰ ⵓ ⵡⴰⵔ ⵜⵜⴻⵊⵊⵉ ⵓⵍ ⵏⵏⴻⵛ ⴰⴷ ⵢⴰⵔⵅⵓ ⵅ ⵜⵏⴰⵢⴻⵏ ⵏ ⵉⵙⴻⴼⴹⴰⵡⴻⵏ ⵏ ⵓⴽⴻⵛⵛⵓⴹ ⵉⴷⴷⵓⵅⵅⵓⵏⴻⵏ, ⵅ ⵓⵅⴻⵢⵢⴻⵇ ⵢⴰⵔⵖⵉⵏ ⵏ ⵔⴰⵚⵉⵏ ⴷ ⴰⵔⴰⵎ, ⵓ ⵏ ⵎⵎⵉⵙ ⵏ ⵔⴰⵎⴰⵍⵢⴰⵀⵓ, 5 ⵓⵎⵉ ⵉⵅⴰⵔⵔⴻⵚ ⴰⵔⴰⵎ ⴷⵉ ⵍⵖⴰⵔ ⵅⴰⴽ, ⵊⵎⵉⵄ ⴰⴽ-ⴷ ⵉⴼⵔⴰⵢⵉⵎ ⵓ ⴰⴽ-ⴷ ⵎⵎⵉⵙ ⵏ ⵔⴰⵎⴰⵍⵢⴰⵀⵓ, ⵉⵏⵏⴰ: 6 ‘ⴻⵊⵊ ⴰⵏⴻⵖ ⴰⴷ ⵏⴳⴻⵄⵄⴻⴷ ⵅ ⵜⴻⵎⵎⵓⵔⵜ ⵏ ⵢⴰⵀⵓⴷⴰ ⵓⵛⴰ ⴰⴷ ⴰⵙ ⵏⴻⵙⵙⵉⴳⴳⵯⴻⴷ ⵓⵛⴰ ⴰⴷ ⵜⵜ ⵏⴻⴱⴹⴰ ⵊⴰⵔ ⴰⵏⴻⵖ ⵓ ⵅⴻⵏⵏⵉ ⴰⴷ ⵏⴻⴳⴳ ⴷⵉⵏⵏⵉ ⵎⵎⵉⵙ ⵏ ⵟⴰⴱⵢⵉⵍ ⴷ ⴰⵊⴻⴵⵉⴷ.’ 7 ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ: ‘ⴰⵢⴰ ⵡⴰⵔ ⵉⵜⵜⵉⵍⵉ, ⴰⵢⴰ ⵡⴰⵔ ⵉⵜⵜⴻⵎⵎⵙⴰⵔ ⵛⴰ!’ 8 ⵎⴰⵖⴰⵔ ⴰⵣⴻⴵⵉⴼ ⵏ ⴰⵔⴰⵎ ⴷ ⴷⵉⵎⴰⵛⵇ ⵓ ⴰⵣⴻⴵⵉⴼ ⵏ ⴷⵉⵎⴰⵛⵇ ⴷ ⵔⴰⵚⵉⵏ - ⵡⴰⵅⵅⴰ ⴰⵎⵎⴻⵏⵏⵉ ⵉⵇⵇⵉⵎ ⵄⴰⴷ ⵎⵖⵉⵔ ⵅⴻⵎⵙⴰ ⵓ-ⵙⴻⵜⵜⵉⵏ ⵏ ⵉⵙⴻⴳⴳⵯⵓⵙⴰ ⵅⴻⵏⵏⵉ ⴰⴷ ⵢⴰⵔⵥ ⵉⴼⵔⴰⵢⵉⵎ ⴰⵍ ⵡⴰⵔ ⵉⵜⵜⵉⵍⵉ ⵄⴰⴷ ⴷ ⵍⴳⴻⵏⵙ - 9 ⵓⵛⴰ ⴰⵣⴻⴵⵉⴼ ⵏ ⵉⴼⵔⴰⵢⵉⵎ ⴷ ⵙⴰⵎⴰⵔⵢⴰ ⵓ ⴰⵣⴻⴵⵉⴼ ⵏ ⵙⴰⵎⴰⵔⵢⴰ ⴷ ⵎⵎⵉⵙ ⵏ ⵔⴰⵎⴰⵍⵢⴰⵀⵓ. ⵎⴰⵍⴰ ⵡⴰⵔ ⵜⵓⵎⵉⵏⴻⵎ, ⵡⴰⵔ ⵜᵉⵜⵜⵖⵉⵎⴰⵎ ⴰⴷ ⵜⴱⴻⴷⴷⴻⵎ.”

10 ⵢⴰⵔⵏⵉ ⵙⵉⴷⵉ ⵄⴰⴷ ⴷⴻⴳ ⵡⴰⵡⴰⵍ ⴰⴽ-ⴷ ⴰⵃⴰⵣ, ⵉⵏⵏⴰ: 11 “ⵜⵜⴰⵔ ⵉⵛⵜ ⵏ ⵍⴻⵄⵍⴰⵎⴻⵜ ⵉ ⵢⵉⵅⴻⴼ ⵏⵏⴻⵛ ⵣⵉ ⵙⵉⴷⵉ, ⴰⵔⴻⴱⴱⵉ ⵏⵏⴻⵛ, ⵜⵜⴰⵔ ⵉ-ⵜⵜ ⵙⵡⴰⴷⴷⴰⵢ ⴷⵉ ⵔⴰⴵⴰⵖ ⵏⵉⵖ ⵜⵜⴰⵔ ⵉ-ⵜⵜ ⴷⵉⵏⵏⵉ ⵙⴻⵏⵏⴻⵊ ⴷⵉ ⵍⵓⵄⵍⴰ.” 12 ⵎⴰⵛⴰ ⴰⵃⴰⵣ ⵉⵏⵏⴰ: “ⵏⴻⵛⵛ ⵡⴰⵔ ⵜⵜ ⵜⵜᵉⵜⵜⴰⵔⴻⵖ ⵛⴰ ⵓ ⵡⴰⵔ ⵜⵜⵇⴻⴵⴰⴱⴻⵖ ⵙⵉⴷⵉ.” 13 ⵅⴻⵏⵏⵉ ⵉⵏⵏⴰ ⵏⴻⵜⵜⴰ: “ⵙⵍⴻⵎ, ⴽⴻⵏⵏⵉⵡ ⴰ ⵜⴰⴷⴷⴰⵔⵜ ⵏ ⴷⴰⵡⵓⴷ, ⵎⴰ ⵡⴰⵔ ⴽⴻⵏⵏⵉⵡ ⵉⵇⴻⴷⴷ ⴰⴷ ⵜⴻⵙⵙⵉⵃⵍⴻⵎ ⵉⵡⴷⴰⵏ, ⴰⵇⴰ ⴽⴻⵏⵏⵉⵡ ⵜⴻⵙⵙⵉⵃⵍⴻⵎ ⵄⴰⵡⴻⴷ ⵓⵍⴰ ⴰⵔⴻⴱⴱⵉ ⵉⵏⵓ? 14 ⵙ ⵓⵢⴰ ⴰⴷ ⴰⵡⴻⵎ ⵉⵡⵛ ⵙⵉⴷⵉ ⵉⵏⵓ ⵙⵉⵎⴰⵏⵜ ⵏⵏⴻⵙ ⵍⴻⵄⵍⴰⵎⴻⵜ. ⵅⵣⴰⵔ, ⵜⴰⵄⵣⴰⵔⴻⵛⵜ ⴰⴷ ⵜⴻⵢⵙⵉ ⴷⴷⴻⵢⵙⴻⵜ, ⴰⴷ ⵜⴰⵔⵓ ⵎⵎⵉⵙ, ⴰⴷ ⴰⵙ ⵜⴻⴳⴳ ‘ⵄⵉⵎⵎⴰⵏⵓ-ⵉⵍ’, ⵉⵅⵙ ⴰⴷ ⵢⵉⵏⵉ ‘ⵙⵉⴷⵉ ⴰⵇⴰ-ⵜ ⴰⴽⵉⴷⵏⴻⵖ’. ◘7:14 ⵎⵜ. 1:23; ⵍⴽ. 1:31 15 ⵏⴻⵜⵜⴰ ⴰⴷ ⵉⵛⵛ ⵜⵔⵓⵙⵙⵉ ⴷ ⵜⴰⵎⵎⴻⵏⵜ ⴰⵍ ⵖⴰ ⵉⴼⵜⴻⵏ ⴰⴷ ⵉⵏⴹⴰⵔ ⵎⵉⵏ ⵡⴰⵔ ⵉⵃⵍⵉⵏ ⵓ ⴰⴷ ⵉⵅⴹⴰⵔ ⵎⵉⵏ ⵉⵚⴻⴱⵃⴻⵏ. 16 ⵎⴰⵖⴰⵔ ⵇⴱⴻⵍ ⵉ ⵖⴰ ⵉⵙⵙⴻⵏ ⵓⵃⴻⵏⵊⵉⵔ ⴰⴷ ⵉⵏⴹⴰⵔ ⵎⵉⵏ ⵡⴰⵔ ⵉⵃⵍⵉⵏ ⵓ ⴰⴷ ⵉⵅⴹⴰⵔ ⵎⵉⵏ ⵉⵚⴻⴱⵃⴻⵏ, ⴰⴷ ⵜⴻⵅⵍⴰ ⵜⴻⵎⵎⵓⵔⵜ ⵏⵏⵉ ⵏ ⵜⵏⴰⵢⴻⵏ ⵏ ⵉⵊⴻⴵⵉⴷⴻⵏ ⵉ ⵣⵉ ⵛⴻⴽ ⵜᵉⵟⵟⴼⴻⴷ ⵜⵉⴳⴳⵯⵓⴷⵉ. 17 ⴰⴷ ⵉⵙⵙⵉⵡⴻⴹ ⵙⵉⴷⵉ ⵅⴰⴽ ⵓ ⵅ ⵍⴳⴻⵏⵙ ⵏⵏⴻⵛ ⵓ ⵅ ⵜⴰⴷⴷⴰⵔⵜ ⵏ ⴱⴰⴱⴰⵛ ⵙ ⵓⴼⵓⵙ ⵏ ⵓⵊⴻⴵⵉⴷ ⵏ ⴰⵛⵛⵓⵔ ⵓⵙⵙⴰⵏ ⴰⵎ ⵎⴰⵎⵎⴻⵛ ⵡⴰⵔ ⴷⴷ-ⵓⵙⵉⵏ ⵣⴻⴳ ⵡⴰⵙⵙ ⵏⵏⵉ ⴷⵉ ⵉⵎⵎⵙⴻⴱⴹⴰ ⵉⴼⵔⴰⵢⵉⵎ ⵅ ⵢⴰⵀⵓⴷⴰ.”

18 “ⴷⴻⴳ ⵡⴰⵙⵙ ⵏⵏⵉ ⴰⴷ ⵉⵎⵙⴰⵔ, ⴰⵇⴰ ⵙⵉⴷⵉ ⴰⴷ ⵉⵚⴻⴼⴼⴰⵔ ⵉⵥⴰⵏ ⵉ ⵉⴵⴰⵏ ⵖⴰⵔ ⵉⵏⴻⴳⴳⵓⵔⴰ ⵏ ⵉⵖⴻⵣⵔⴰⵏ ⵏ ⵎⵉⵚⵔⴰ ⵓⵍⴰ ⴷ ⵜⵣⵉⵣⵡⴰ ⵉ ⵉⴵⴰⵏ ⴷⵉ ⵜⴻⵎⵎⵓⵔⵜ ⵏ ⴰⵛⵛⵓⵔ. 19 ⴰⴷ ⴷⴷ-ⴰⵙⴻⵏ ⵓⵛⴰ ⴰⴷ ⴰⵔⵙⴻⵏ ⵎⴰⵔⵔⴰ ⴷⵉ ⵜⴻⵖⵣⵓⵔⵉⵏ ⵓ ⴷⵉ ⵜⴻⵣⵣⵉⵢⵉⵏ ⵏ ⵍⴻⵊⵔⵓⴼ ⵓ ⵅ ⵎⴰⵔⵔⴰ ⵍⵃⴰⵔⵔⴰⵛ ⵓ ⵅ ⵎⴰⵔⵔⴰ ⵉⵢⴻⵍⵎⴰⵎⴻⵏ ⵏ ⵍⵡⴰⵔⵓⴷ.”

20 “ⴷⴻⴳ ⵡⴰⵙⵙ ⵏⵏⵉ ⴰⴷ ⴰⵡⴻⵎ ⵉⵍⵙ ⵙⵉⴷⵉ ⵉⵏⵓ ⵙ ⵉⵊⵊ ⵏ ⵍⵎⵓⵙⵙ ⵉ ⴷ ⵉⵛⵔⴰ ⵅ ⵓⵊⴻⵎⵎⴰⴹ ⵏ ⵉⵖⵣⴰⵔ ⵏ ⵍⴼⵓⵔⴰⵟ, ⵙ ⵓⴼⵓⵙ ⵏ ⵓⵊⴻⴵⵉⴷ ⵏ ⴰⵛⵛⵓⵔ, ⴰⵛⵓⵡⵡⴰⴼ ⵏ ⵓⵣⴻⴵⵉⴼ ⴷ ⵓⵛⵓⵡⵡⴰⴼ ⵅ ⵉⴹⴰⵔⴻⵏ ⵓⵍⴰ ⴷ ⵜⵎⴰⵔⵜ.”

21 “ⴷⴻⴳ ⵡⴰⵙⵙ ⵏⵏⵉ ⴰⵔⵢⴰⵣ ⴰⴷ ⵢⴰⵔⴻⴱⴱⴰ ⵉⵛⵜ ⵏ ⵜⵄⴻⵊⵎⵉⵜ ⵏ ⵉⴼⵓⵏⴰⵙⴻⵏ ⴷ ⵜⵏⴰⵢⴻⵏ ⵏ ⵡⵓⴵⵉ. 22 ⵙ ⵜⵢⴰⵡⴰⵏⵜ ⵏ ⵓⵖⵉ ⵉ ⵖⴰ ⵡⵛⴻⵏⵜ, ⴰⴷ ⵢⴻⵛⵛ ⵜⵔⵓⵙⵙⵉ. ⵜⵔⵓⵙⵙⵉ ⴷ ⵜⴰⵎⵎⴻⵏⵜ ⴰⴷ ⵢⴻⵛⵛ ⵎⴰⵔⵔⴰ ⵡⵉ ⵖⴰ ⵉⵇⵇⵉⵎⴻⵏ ⴷⵉ ⵜⴻⵎⵎⵓⵔⵜ.”

23 “ⴷⴻⴳ ⵡⴰⵙⵙ ⵏⵏⵉ ⴰⴷ ⵢⵉⵍⵉ ⴽⵓⵍ ⴰⵎⵛⴰⵎ ⵉ ⵅⴻⴼ ⴱⴻⴷⴷⴻⵏ ⴰⵍⴻⴼ ⵏ ⵜⵣⴰⵢⴰⵔⵉⵏ ⵉ ⵉⵙⴻⴽⴽⵡⴰⵏ ⴰⵍⴻⴼ ⵏ ⵍⴻⵡⵣⴰⵏ ⵏ ⵏⵏⵓⵇⴰⵔⵜ, ⵉ ⵉⵙⴻⵏⵏⴰⵏⴻⵏ ⴷ ⵜⵣⴻⴳⴳⵯⴰⵔⵜ. ◘7:23 ⵍⴰⵡⵉ 26:22; ⵀⴳⴷ. 8:11, 12 24 ⴰⴷ ⵓⵢⵓⵔⴻⵏ ⵖⴰⵔ ⴷⵉⵏ ⵙ ⴼⵍⵉⵜⵛⴰ ⴷ ⵍⵇⴻⵡⵙ, ⵎⴰⵖⴰⵔ ⵎⴰⵔⵔⴰ ⵜⴰⵎⵎⵓⵔⵜ ⴰⴷ ⵜⵉⵍⵉ ⵜⴻⵛⵛⵓⵔ ⵙ ⵉⵙⴻⵏⵏⴰⵏⴻⵏ ⴷ ⵜⵣⴻⴳⴳⵯⴰⵔⵜ. 25 ⵓⵍⴰ ⵅ ⵎⴰⵔⵔⴰ ⵜⵉⵙⴰⵡⵏⵉⵏ ⵏⵏⵉ ⵛⴰⵔⵔⵣⴻⵏ ⵙ ⵓⵍⵉⵣⵉⵎ, ⵡⴰⵔ ⴷⵉⵏ ⴷⴷ-ⵜⵜⴰⵙⴻⵏ ⵄⴰⴷ ⵣⵉ ⵙⵙⵉⴱⴱⴻⵜ ⵏ ⵜⵉⴳⴳⵯⵓⴷⵉ ⵣⴻⴳ ⵉⵙⴻⵏⵏⴰⵏⴻⵏ ⴷ ⵜⵣⴻⴳⴳⵯⴰⵔⵜ. ⵜⴰⵎⵎⵓⵔⵜ ⵏⵏⵉ ⴰⴷ ⵜⵉⵍⵉ ⵃⵉⵎⴰ ⴰⴷ ⴰⵔⵔⴻⵏ ⵖⴰⵔ ⴷⵉⵏⵏⵉ ⵉⴼⵓⵏⴰⵙⴻⵏ ⵓ ⵃⵉⵎⴰ ⴰⴷ ⵅⴰⵙ ⵄⴻⴼⵙⴻⵏ ⵡⵓⴵⵉ.”