1 ⵉⵏⵏⴰ ⴰⵢⵉ ⵙⵉⴷⵉ: “ⴽⵙⵉ ⵜⴰⵍⵡⵉⵃⵜ ⵜⴰⵎⴻⵇⵇⵔⴰⵏⵜ, ⵜⴰⵔⵉⴷ ⵅⴰⵙ ⵙ ⵍⴻⵇⵍⴻⵎ ⵏ ⴱⵏⴰⴷⴻⵎ ⴰⵍⴰⵎⵉ ⵣⴻⵎⵎⴰⵔⴻⵏ ⴰⴷ ⵜ ⵖⴰⵔⴻⵏ: ‘ⵣⵣⴰⵔⴷⴻⵜ ⵙ ⵜⴰⵣⵍⴰ, ⵜⴰⴽⴻⵛⵛⴰⴹⵜ ⴷⴻⵖⵢⴰ!’ ” 2 ⵍⴻⵛⵀⵓⴷ ⵉⵎⵜⵉⵇⵇⴰⵏ ⵉⵡⵢⴻⵖ-ⵜⴻⵏ ⴷ ⴰⵛⴻⵀⵀⴰⴷ ⵉ ⵢⵉⵅⴻⴼ ⵉⵏⵓ: ⴰⴽⴻⵀⵀⴰⵏ ⵓⵔⵉⵢⴰ ⴷ ⵣⴰⴽⴰⵔⵉⵢⵢⴰ, ⵎⵎⵉⵙ ⵏ ⵢⴰⴱⵔⴰⵅⵢⴰ. 3 ⵜⵓⵖⴰ ⵓⴷⴼⴻⵖ ⵅ ⵜⵏⴰⴱⵉⵜ ⵓ ⵜⴻⴽⵙⵉ ⵙ ⴷⴷⴻⵢⵙⴻⵜ, ⵜⵓⵔⵓⵡ-ⴷⴷ ⵉⵊⵊ ⵏ ⵓⵃⴻⵏⵊⵉⵔ. ⵓⵛⴰ ⵉⵏⵏⴰ ⴰⵢⵉ ⵙⵉⴷⵉ: “ⴻⴳⴳ ⴰⵙ: ‘ⵎⴰⵀⴰⵔ-ⵛⴰⵍⴰⵍ, ⵅⴰⵛ-ⴱⴰⵣ!’, ⵉⵅⵙ ⴰⴷ ⵢⵉⵏⵉ: ‘ⵣⵣⴰⵔⴷⴻⵜ ⵙ ⵜⴰⵣⵍⴰ, ⵜⴰⴽⴻⵛⵛⴰⴹⵜ ⴷⴻⵖⵢⴰ!’ 4 ⵎⴰⵖⴰⵔ ⵇⴱⴻⵍ ⵎⴰ ⴰⴷ ⵉⵍⵎⴻⴷ ⵓⵃⴻⵏⵊⵉⵔ ⴰⴷ ⵢⵉⵏⵉ: ‘ⴱⴰⴱⴰ!’, ⵏⵉⵖ: ‘ⵢⴻⵎⵎⴰ!’, ⴰⴷ ⴽⴽⵙⴻⵏ ⴰⴳⵍⴰ ⵏ ⴷⵉⵎⴰⵛⵇ ⴷ ⵣⵣⴰⵔⴷⴻⵜ ⵏ ⵙⴰⵎⴰⵔⵢⴰ ⵣⵣⴰⵜ ⵉ ⵡⵓⴷⴻⵎ ⵏ ⵓⵊⴻⴵⵉⴷ ⵏ ⴰⵛⵛⵓⵔ.”

5 ⵢⴰⵔⵏⵉ ⵙⵉⴷⵉ ⴷⴻⴳ ⵡⴰⵡⴰⵍ ⴰⴽⵉⴷⵉ, ⵉⵏⵏⴰ: 6 “ⵎⵉⵏⵣⵉ ⵍⴳⴻⵏⵙ-ⴰ ⵉⵙⵙⴻⵃⵇⴰⵔ ⴰⵎⴰⵏ ⵢⴰⵔⵙⴰⵏ ⵉⵜⵜⴰⵣⵣⵍⴻⵏ ⵏ ⵛⵉⵍⵓⵀⴰ, ⵙ ⵓⵢⴰ ⵉⴼⴰⵔⵃ ⵔⴰⵚⵉⵏ ⴷ ⵎⵎⵉⵙ ⵏ ⵔⴰⵎⴰⵍⵢⴰⵀⵓ. 7 ⵙ ⵓⵢⴰ, ⵅⵣⴰⵔ, ⵙⵉⴷⵉ ⵉⵏⵓ ⴰⴷ ⵢⴰⵔⵔ ⴰⵎⴰⵏ ⵢⴻⵡⵄⴰⵔⴻⵏ ⴷ ⵉⵎⴻⵇⵇⵔⴰⵏⴻⵏ ⵏ ⵉⵖⵣⴰⵔ ⵏ ⵍⴼⵓⵔⴰⵟ ⴰⴷ ⵅⴰⵙⴻⵏ ⵃⴻⵎⵍⴻⵏ, ⵉⵅⵙ ⴰⴷ ⵢⵉⵏⵉ ⴰⵊⴻⴵⵉⴷ ⵏ ⴰⵛⵛⵓⵔ ⴷ ⵎⴰⵔⵔⴰ ⴰⵄⵓⴵⵉ ⵏⵏⴻⵙ. ⴰⴷ ⵉⴳⴻⵄⵄⴻⴷ ⵣⵉ ⵎⴰⵔⵔⴰ ⵜⴰⵔⵢⵉⵡⵉⵏ ⵏⵏⴻⵙ ⵓ ⴰⴷ ⴷⴷ-ⵉⵙⵙⴼⵉⵢ ⵜⵉⵡⴰ ⵏ ⵎⴰⵔⵔⴰ ⵜⵉⵎⵓⵡⵡⴰ ⵏⵏⴻⵙ. 8 ⴰⴷ ⵢⴰⴷⴻⴼ ⵖⴰⵔ ⵢⴰⵀⵓⴷⴰ, ⴰⴷ ⵜⵜ ⵉⵙⵙⵖⴰⵔⵇ ⵓⵛⴰ ⴰⴷ ⵢⴰⵔⵏⵉ ⴰⴷ ⵖⴰⵔⴻⵙ ⴷⴷ-ⵢⴰⵣⵣⴻⵍ ⴰⵍ ⴷⴷ-ⴰⵙ ⵉ ⵖⴰ ⵢⴰⵡⴻⴹ ⴰⵍ ⵢⵉⵍⵉ. ⵅⵎⵉ ⵖⴰ ⵉⵙⵙⵡⵉⵥⵥⴻⴹ ⴰⴼⵔⵉⵡⴻⵏ ⵏⵏⴻⵙ ⴰⴷ ⴷⵍⴻⵏ ⵜⵉⵔⵓ ⵏ ⵜⴻⵎⵎⵓⵔⵜ ⵏⵏⴻⵛ! ⴰ ⵄⵉⵎⵎⴰⵏⵓ-ⵉⵍ, ⴰⵔⴻⴱⴱⵉ ⴰⵇⴰ-ⵜ ⴰⴽⵉⴷⴻⵏⴻⵖ.”

9 “ⵀⴰⵊⴰⵎ, ⴰ ⴽⴻⵏⵏⵉⵡ ⵍⴻⴳⵏⵓⵙ, ⵎⴰⵛⴰ ⵄⴰⴷ ⴰⴷ ⵜᵉⵜⵜⵡⴰⵍⴻⴱⵣⴻⵎ! ⴻⵊⵊ ⵎⴰⵔⵔⴰ ⵊⵊⵡⴰⵢⴻⵀ ⵉⴳⴳⵯⴻⵊⴻⵏ ⵏ ⴷⴷⵓⵏⴻⵛⵜ ⴰⴷ ⵡⵛⴻⵏ ⵉⵎⴻⵣⵣⵓⵖⴻⵏ ⵏⵙⴻⵏ: ⵡⴰⵅⵅⴰ ⵜⵃⴻⵣⵣⵎⴻⵎ ⵉⵅⴻⴼ ⵏⵡⴻⵎ, ⴰⴷ ⵜᵉⵜⵜⵡⴰⵍⴻⴱⵣⴻⵎ, ⵡⴰⵅⵅⴰ ⵜⵃⴻⵣⵣⵎⴻⵎ ⵉⵅⴻⴼ ⵏⵡⴻⵎ, ⴰⴷ ⵜᵉⵜⵜⵡⴰⵍⴻⴱⵣⴻⵎ! 10 ⵎⵛⴰⵡⴰⵔⴻⵎ, ⵎⴰⵛⴰ ⴰⵎⵛⴰⵡⴰⵔ ⵏⵡⴻⵎ ⴰⴷ ⵉⴼⵛⴻⵍ! ⵉⵏⵉⵎ ⵉⵊⵊ ⵏ ⵡⴰⵡⴰⵍ, ⵡⴰⵔ ⵉⵜⵜⵉⵍⵉ, ⵎⴰⵖⴰⵔ ⴰⵔⴻⴱⴱⵉ ⴰⵇⴰ-ⵜ ⴰⴽⵉⴷⵏⴻⵖ, ‘ⵄⵉⵎⵎⴰⵏⵓ-ⵉⵍ’.”

11 ⵎⴰⵖⴰⵔ ⴰⵎⵎⵓ ⵉ ⴷ ⴰⵢⵉ ⵉⵏⵏⴰ ⵙⵉⴷⵉ, ⵓⵎⵉ ⵅⴰⴼⵉ ⵉⵊⵀⴻⴷ ⵓⴼⵓⵙ ⵏⵏⴻⵙ ⵓ ⵉⵄⵍⴻⵎ ⴰⵢⵉ ⵃⵉⵎⴰ ⵡⴰⵔ ⴳⴳⵓⵔⴻⵖ ⵅ ⵡⴻⴱⵔⵉⴷ ⵏ ⵍⴳⴻⵏⵙ-ⴰ, ⵉⵏⵏⴰ: 12 “ⵡⴰⵔ ⵇⵇⴰⵔⴻⵎ ‘ⵜⴰⵎⴻⵄⵎⵓⵍⵜ!’ ⵉ ⵎⴰⵔⵔⴰ ⵓⵎⵉ ⵉⵇⵇⴰⵔ ⵍⴳⴻⵏⵙ-ⴰ ‘ⵜⴰⵎⴻⵄⵎⵓⵍⵜ!’ ⵡⴰⵔ ⵜⵜⴻⴳⴳⵯⴻⴷⴻⵎ ⵓ ⵡⴰⵔ ⵜⵜⵏⴻⵅⵍⵉⵄⴻⵎ! 13 ⵙⵉⴷⵉ ⵏ ⵍⵄⴻⵙⴽⴰⵔⴰⵜ ⴰⴷ ⵜ ⵜⴻⵙⵙⵇⴻⴷⴷⵙⴻⵎ, ⴰⴷ ⵣⵣⴰⵢⴻⵙ ⵜⴻⴳⴳⵯⴻⴷⴻⵎ ⵓ ⴰⴷ ⵣⵣⴰⵢⴻⵙ ⵜⴻⵏⵏⵅⴻⵍⵄⴻⵎ. 14 ⵏⴻⵜⵜⴰ ⴰⴷ ⵢⵉⵍⵉ ⴷ ⵣⵣⴰⵡⴻⵛⵜ ⵉⵇⴻⴷⴷⵙⴻⵏ, ⴷ ⴰⵥⵔⵓ ⵏ ⵓⵏⴻⴷⵔⴰⴼ ⵓⵍⴰ ⴷ ⵜⴰⵚⴹⴰⵔⵜ ⵏ ⵓⵏⴻⵇⵔⴰⴹ ⵉ ⵜⵏⴰⵢⴻⵏ ⵏ ⵜⵓⴷⵔⵉⵏ ⵏ ⵉⵙⵔⴰⵉⵍ, ⴷ ⵍⴼⴻⵅ ⴷ ⵜⵔⴰⵛⵛⴰ ⵉ ⵉⵎⴻⵣⴷⴰⵖ ⵏ ⵓⵔⵛⴰⵍⵉⵎ. ◘8:14 ⵉⵛⴰ. 28:16; ⵍⴽ. 2:34; ⵔⵓⵎ. 9:33; 1 ⴱⵟ. 2:7 15 ⴰⵟⵟⴰⵙ ⵊⴰⵔ ⴰⵙⴻⵏ ⴰⴷ ⵏⵏⵇⴰⵔⴹⴻⵏ, ⴰⴷ ⵡⴹⴰⵏ, ⴰⴷ ⵜⵜⵡⴰⵔⵥⴻⵏ, ⴰⴷ ⴷⴻⵡⵍⴻⵏ ⵖⴰⵔ ⵍⴼⴻⵅ ⵓⵛⴰ ⴰⴷ ⵏⵏⴰⵖⴻⵏ.” ◘8:15 ⵎⵜ. 21:44; ⵍⴽ. 20:18

16 “ⵛⴼⴻⵏ ⵛⵛⵀⴰⴷⴻⵜ, ⵛⴻⵎⵎⴻⵄ ⵛⵛⴰⵔⵉⵄⴰ ⵊⴰⵔ ⵉⵎⴻⵃⴹⴰⵔⴻⵏ ⵉⵏⵓ!”

17 “ⵏⴻⵛⵛ ⴰⴷ ⵔⴰⵊⵉⵖ ⵙⵉⴷⵉ, ⵡⴻⵏⵏⵉ ⵉⵍⴻⵃⵃⴼⴻⵏ ⵉ ⵓⵖⴻⵎⴱⵓⴱ ⵏⵏⴻⵙ ⵣⵣⴰⵜ ⵉ ⵜⴰⴷⴷⴰⵔⵜ ⵏ ⵢⴰⵄⵇⵓⴱ, ⵅⴰⵙ ⵉ ⵖⴰ ⵜⴻⵛⵍⴻⵖ. 18 ⵅⵣⴰⵔ, ⵏⴻⵛⵛ ⴷ ⵉⵃⴻⵏⵊⵉⵔⴻⵏ ⵏⵏⵉ ⴷ ⴰⵢⵉ ⵉⵡⵛⴰ ⵙⵉⴷⵉ, ⴰⵇⴰ ⴰⵏⴻⵖ ⵏⴻⴵⴰ ⵉ ⵍⴻⵄⵍⴰⵎⴰⵜ ⴷ ⵍⵎⵓⵄⵊⵉⵣⴰⵜ ⴷⵉ ⵉⵙⵔⴰⵉⵍ ⵣⵉ ⵙⵙⵉⴱⴱⴻⵜ ⵏ ⵙⵉⴷⵉ ⵏ ⵍⵄⴻⵙⴽⴰⵔⴰⵜ ⵏⵏⵉ ⵉⵣⴻⴷⴷⵖⴻⵏ ⵅ ⵡⴻⴷⵔⴰⵔ ⵏ ⵚⵉⵀⵢⵓⵏ.”◘8:18 ⵄⴱⵔ. 2:13

19 “ⵎⴰⵍⴰ ⵏⵏⴰⵏ ⴰⵡⴻⵎ: ‘ⵙⴻⵇⵙⴰⵎ ⵉⵏⵏⵉ ⵉⵙⵙⴰⵡⴰⵍⴰⵏ ⴰⴽ-ⴷ ⵉⵎⴻⵜⵜⴰⵏ ⴷ ⵉⴳⴻⵣⵣⴰⵏⴻⵏ, ⵉⵏⵏⵉ ⵉⵜⵜⵡⴻⵙⵡⵉⵙⴻⵏ ⵓ ⵉⵜⵜⵡⴻⵛⵡⵉⵛⴻⵏ!’, ⵅⴻⵏⵏⵉ ⵉⵏⵉ: ‘ⵎⴰ ⵡⴰⵔ ⴷⴷ-ⵢⵓⵙⵉ ⵉ ⵢⵉⵊⵊ ⵏ ⵍⴳⴻⵏⵙ ⴰⴷ ⵉⵙⵙⴻⵇⵙⴰ ⴰⵔⴻⴱⴱⵉ ⵏⵏⴻⵙ? ⵎⴰ ⵉⵄⴻⴷⴷⴻⵍ ⴰⴷ ⵙⵙⴻⵇⵙⴰⵏ ⵉⵎⴻⵜⵜⴰⵏ ⴷⵉ ⵟⵟⵡⴻⵄ ⵏ ⵢⵉⵏⵏⵉ ⵉⴷⴷⴰⵔⴻⵏ?’ ”◘8:19 ⴰⵄⵡⴷ. 18:11

20 “ⴷⴻⵡⵍⴻⵎ ⵖⴰⵔ ⵛⵛⴰⵔⵉⵄⴰ ⵓ ⵖⴰⵔ ⵛⵛⵀⴰⴷⴻⵜ! ⵎⴰⵍⴰ ⵡⴰⵔ ⵓⵢⵓⵔⴻⵏ ⵄⵍⴰⵃⵙⴰⴱ ⴰⵡⴰⵍ-ⴰ, ⵡⴰⵔ ⵖⴰⵔⵙⴻⵏ ⵜᵉⵜⵜⵉⵍⵉ ⵜⴼⴰⵡⵜ ⵏ ⵍⴻⴼⵊⴰⵔ.”

21 “ⴰⴷ ⵉⵏⵏⴻⴹ ⵍⴳⴻⵏⵙ ⴷⴰ ⴷ ⴷⵉⵀⴰ ⴷⵉ ⵜⴻⵎⵎⵓⵔⵜ, ⵉⵛⴹⴻⵏ ⵓ ⵉⴵⵓⵣ, ⵓⵛⴰ ⵎⴰⵍⴰ ⵉⴵⵓⵣ ⵓⵛⴰ ⵉⵅⴻⵢⵢⴻⵇ, ⴰⴷ ⵉⵏⵄⴻⵍ ⵍⴳⴻⵏⵙ ⴰⵊⴻⴵⵉⴷ ⵏⵏⴻⵙ ⴷ ⴰⵔⴻⴱⴱⵉ ⵏⵏⴻⵙ. ⵎⴰ ⴰⴷ ⵅⵣⴰⵔⴻⵏ ⵖⴰⵔ ⵓⵊⴻⵏⵏⴰ, 22 ⵏⵉⵖ ⵖⴰⵔ ⵜⴻⵎⵎⵓⵔⵜ, ⴰⵇⴰ ⴷⴰ ⵎⵖⵉⵔ ⵍⴻⵃⵚⴰⵔⴻⵜ ⴷ ⵟⵟⵍⴰⵎ, ⵟⵟⵍⴰⵎ ⵉⵙⵙⴰⴳⴳⵯⴰⴷ. ⵉⵜⵜⵡⴰⵙⵙⵓⴼⴼⴻⵖ ⵍⴳⴻⵏⵙ ⵖⴰⵔ ⵜⵓⴱⴱⴰⵔⵛⴻⵏⵜ.” ◘8:22 ⵉⵛⴰ. 5:30

23 “ⵎⴰⵛⴰ ⵡⴰⵔ ⵉⵜⵜⵖⵉⵎⵉ ⵟⵟⵍⴰⵎ ⵉⵙⵙⴰⴳⴳⵯⴰⴷ ⵎⴰⵏⵉ ⵜⴻⴵⴰ ⵍⴻⵃⵚⴰⵔⴻⵜ ⵍⴻⵅⵅⵓ. ⵣⵉⵛ ⵢⵉⵡⵉ-ⴷⴷ ⵏⴻⵜⵜⴰ ⴰⵙⴻⵃⵇⴰⵔ ⵖⴰⵔ ⵜⴻⵎⵎⵓⵔⵜ ⵏ ⵣⴰⴱⵓⵍⵓⵏ ⵓ ⵖⴰⵔ ⵜⴻⵎⵎⵓⵔⵜ ⵏ ⵏⴰⴼⵜⴰⵍⵉ, ⴰⵎⵎⵓ ⵉ ⵖⴰ ⵢⴰⵡⵉ ⴷⵉ ⵍⵡⴻⵇⵜ ⵉ ⴷⴷ ⵖⴰ ⵢⴰⵙⴻⵏ ⵛⵛⴰⵏ ⵅ ⵡⴻⴱⵔⵉⴷ ⵏ ⵍⴻⴱⵃⴰⵔ, ⵅ ⵓⵊⴻⵎⵎⴰⴹ ⵏ ⵍ’ⵓⵔⴷⵓⵏ, ⵖⴰⵔ ⵍⵊⴰⵍⵉⵍ ⵏ ⵍⴻⴳⵏⵓⵙ.” ◘8:23 ⵎⵜ. 4:15