1 ⵍⴻⵅⴷⴻⵏⵏⵉ ⵉⵜⵜⵡⴰⵏⴷⴻⵀ ⵢⴰⵙⵓⵄ ⵖⴰⵔ ⵍⴻⵅⵍⴰ ⵣⵉ ⴰⵔⵔⵓⵃ ⵉⵇⴻⴷⴷⵙⴻⵏ, ⵃⵉⵎⴰ ⴰⴷ ⵉⵜⵜⵡⴰⵊⴰⵔⵔⴻⴱ ⵣⴻⴳ ⵉⴱⵍⵉⵙ. ◼4:1 ⵉⴱⵍⵉⵙ-ⵉⵙⴻⵎ-ⴰ ⵡⴰⵏⵉⵜⴰ ⵉⵅⵙ ⴰⴷ ⵢⵉⵏⵉ ‘ⵡⴻⵏⵏⵉ ⵉⵄⴻⵢⵢⴱⴻⵏ’. ⵉⴱⵍⵉⵙ ⵏⴻⵜⵜⴰ ⴷ ⵛⵛⵉⵟⴰⵏ ⴰⵎⴻⵇⵇⵔⴰⵏ.  ◘4:1 [ⵎⴽ. 1:12-13; ⵍⴽ. 4:1-13] — ⵎⴽ. 1:12; ⵍⴽ. 4:1. 2 ⴰⵡⴰⵔⵏⵉ ⵍⴰⵎⵉ ⵜⵓⵖⴰ ⵉⵥⵓⵎⵎ ⴰⵔⴻⴱⵄⵉⵏ ⵏ ⵡⵓⵙⵙⴰⵏ ⴷ ⴰⵔⴻⴱⵄⵉⵏ ⵏ ⴵⵢⴰⵍⵉ, ⵢⵓⵙⴰ ⴰⵙ-ⴷⴷ ⵊⵊⵓⵄ ⵖⴰⵔ ⵓⵏⴻⴳⴳⴰⵔ. 3 ⵢⵓⵙⴰ-ⴷⴷ ⵖⴰⵔⴻⵙ ⵓⵎⵊⴰⵔⵔⴰⴱ, ⵉⵏⵏⴰ ⴰⵙ: “ⵎⴰⵍⴰ ⵛⴻⴽ ⴷ ⵎⵎⵉⵙ ⵏ ⴰⵔⴻⴱⴱⵉ, ⵉⵏⵉ ⵉ ⵉⵥⵔⴰ-ⵢⴰ ⴰⴷ ⴷⴻⵡⵍⴻⵏ ⴷ ⴰⵖⵔⵓⵎ!” 4 ⵢⴰⵔⵔⴰ-ⴷⴷ ⵅⴰⵙ ⵉⵏⵏⴰ: “ⴰⵇⴰ ⵜⵓⵔⴰ:

‘ⴱⵏⴰⴷⴻⵎ ⵡⴰⵔ ⵉⴷⴷⴰⵔ ⵙ ⵡⴻⵖⵔⵓⵎ ⵡⴰⵀⴰ,

ⵎⴰⵛⴰ ⵣⵉ ⴽⵓⵍ ⴰⵡⴰⵍ

ⵉ ⴷⴷ-ⵉⵜⵜⴻⴽⴽⴻⵏ ⵣⴻⴳ ⵓⵇⴻⵎⵎⵓⵎ ⵏ ⴰⵔⴻⴱⴱⵉ.’ ” ◘4:4 ⴰⵄⵡⴷ. 8:3

5 ⵍⴻⵅⴷⴻⵏⵏⵉ ⵢⵉⵡⵢⵉ ⵜ ⵉⴱⵍⵉⵙ ⵖⴰⵔ ⵜⴻⵏⴷⵉⵏⵜ ⵉⵇⴻⴷⴷⵙⴻⵏ ⵓⵛⴰ ⵉⵙⵙⴱⴻⴷⴷ ⵉ-ⵜ ⵖⴰⵔ ⵟⵟⴰⵔⴼ ⵏ ⵜⵣⴻⵇⵇⴰ ⵏ ⵣⵣⴰⵡⴻⵛⵜ ⵜⴰⵎⴻⵇⵇⵔⴰⵏⵜ, 6 ⵉⵏⵏⴰ ⴰⵙ: “ⵎⴰⵍⴰ ⵛⴻⴽ ⴷ ⵎⵎⵉⵙ ⵏ ⴰⵔⴻⴱⴱⵉ, ⵉⵡⴰ, ⵏⴹⴰⵔ ⵉⵅⴻⴼ ⵏⵏⴻⵛ ⵖⴰⵔ ⵡⴰⴷⴷⴰⵢ, ⵎⵉⵏⵣⵉ ⴰⵇⴰ ⵜⵓⵔⴰ:

‘ⴰⴷ ⵢⵓⵎⵓⵔ ⵍⵎⴰⵍⴰⴽⴰⵜ ⵏⵏⴻⵙ ⵅⴰⴽ,

ⴰⴷ ⵛⴻⴽ ⴽⵙⵉⵏⵜ ⵅ ⵉⴼⴰⵙⵙⴻⵏ ⵏⵙⴻⵏⵜ,

ⵃⵉⵎⴰ ⴰⴹⴰⵔ ⵏⵏⴻⵛ ⵡⴰⵔ ⵉⵏⴻⴳⴳⴻⵃ ⵛⴰ ⴰⵥⵔⵓ.’ ” ◘4:6 ⵉⵥⵀⴷ. 91:11, 12.

7 ⵢⴰⵙⵓⵄ ⵉⵏⵏⴰ ⴰⵙ: “ⵜⵓⵔⴰ ⵄⴰⵡⴻⴷ:

‘ⵡⴰⵔ ⵜⵜⵊⴰⵔⵔⴰⴱ ⵙⵉⴷⵉ, ⴰⵔⴻⴱⴱⵉ ⵏⵏⴻⵛ!’ ” ◘4:7 ⴰⵄⵡⴷ. 6:16.

8 ⵢⵉⵡⵢⵉ ⵜ ⵄⴰⵡⴻⴷ ⵉⴱⵍⵉⵙ ⵖⴰⵔ ⵡⴻⴷⵔⴰⵔ ⵢⵓⵄⵍⴰⵏ ⴰⵟⵟⴰⵙ, ⵉⵙⵙⵛⴻⵏ ⴰⵙ ⵎⴰⵔⵔⴰ ⵜⵉⴳⴻⵍⴷⵉⵡⵉⵏ ⵏ ⴷⴷⵓⵏⴻⵛⵜ ⴷ ⵓⵄⵓⴵⵉ ⵏⵙⴻⵏⵜ, 9 ⵉⵏⵏⴰ ⴰⵙ: “ⴰⴷ ⴰⵛ ⵡⵛⴻⵖ ⵎⴰⵔⵔⴰ ⵎⴰⵏ ⴰⵢⴰ, ⵎⴰⵍⴰ ⵜⴻⵡⴹⵉⴷ ⴰⵢⵉ ⵖⴰⵔ ⵉⴹⴰⵔⴻⵏ, ⴰⴷ ⴰⵢⵉ ⵜⵙⴻⵊⴷⴻⴷ!” 10 ⵉⵏⵏⴰ ⴰⵙ ⵢⴰⵙⵓⵄ: “ⵔⵓⵃ, ⴰ ⵛⵛⵉⵟⴰⵏ, ⵎⵉⵏⵣⵉ ⵜⵓⵔⴰ:

‘ⵙⵉⴷⵉ, ⴰⵔⴻⴱⴱⵉ ⵏⵏⴻⵛ, ⵓⵎⵉ ⵖⴰ ⵜⵙⴻⵊⴷⴻⴷ

ⵓ ⵉ ⵏⴻⵜⵜⴰ ⵡⴻⵃⵃⴷⴻⵙ ⵓⵎⵉ ⵖⴰ ⵜⵙⴻⵅⵅⴰⵔⴻⴷ.’ ” ◼4:10 ⵛⵛⵉⵟⴰⵏ-ⴰⵇⴰ-ⵜ ⴷ ⵛⵛⵉⵟⴰⵏ ⴰⵎⴻⵇⵇⵔⴰⵏ ⵡⴻⵏⵏⵉ ⵉⴵⴰⵏ ⵅ ⵎⴰⵔⵔⴰ ⵛⵛⵡⴰⵟⴻⵏ.  ◘4:10 ⴰⵄⵡⴷ. 6:13; 10:20.

11 ⵍⴻⵅⴷⴻⵏⵏⵉ ⵉⵊⵊⴰ ⵉ-ⵜ ⵉⴱⵍⵉⵙ, ⵓ ⵅⵣⴰⵔ, ⵍⵎⴰⵍⴰⴽⴰⵜ ⵓⵙⵉⵏⵜ-ⵉ-ⴷⴷ, ⵜⵓⵖⴰ ⵙⴻⵅⵅⴰⵔⴻⵏⵜ ⴰⵙ.

12 ⵍⴰⵎⵉ ⵉⵙⵍⴰ ⵢⴰⵙⵓⵄ ⴱⴻⵍⵍⵉ ⵢⵓⵃⴰⵏⵏⴰ ⵜⵓⵖⴰ ⵉⵜⵜⵡⴰⵙⴻⵍⵍⴻⵎ, ⵉⵔⵓⵃ ⵖⴰⵔ ⵍⵊⴰⵍⵉⵍ. ◘4:12 [ⵎⴽ. 1:14-20; ⵍⴽ. 4:14-15; ⵍⴽ. 5:1-11; 6:17-19; 16, 31; ⵢⵃ. 4:43] — ⵎⴽ. 1:14; ⵍⴽ. 4:14; 16:31; ⵢⵃ. 4:43. 13 ⵉⵊⵊⴰ ⵏⵏⴰⵚⵉⵔⴰ ⵓⵛⴰ ⵢⵓⵙⴰ-ⴷⴷ ⵖⴰⵔ ⴽⴰⴼⴰⵔⵏⴰⵃⵓⵎ, ⵜⴻⵏⵏⵉ ⵖⴰⵔ ⵟⵟⴰⵔⴼ ⵏ ⵍⴻⴱⵃⴰⵔ, ⴷⵉ ⵜⴻⵎⵎⵓⵔⵜ ⵏ ⵣⵉⴱⵓⵍⵓⵏ ⴷ ⵏⴰⴼⵜⴰⵍⵉ ⵓⵛⴰ ⵉⵣⴷⴻⵖ ⴷⵉⵏ 14 ⵃⵉⵎⴰ ⴰⴷ ⵉⵜⵜⵡⴰⴽⴻⵎⵎⴻⵍ ⵎⵉⵏ ⵉⵜⵜⵡⴰⵏⵏⴰⵏ ⵣⴻⴳ ⵓⵏⴰⴱⵉ ⵉⵛⴰⵄⵢⴰ ⵓⵎⵉ ⵉⵏⵏⴰ:

15 “ⵜⴰⵎⵎⵓⵔⵜ ⵏ ⵣⵉⴱⵓⵍⵓⵏ ⴷ ⵜⴻⵎⵎⵓⵔⵜ ⵏ ⵏⴰⴼⵜⴰⵍⵉ

ⴷⴻⴳ ⵡⴻⴱⵔⵉⴷ ⵏ ⵍⴻⴱⵃⴰⵔ,

ⵖⴰⵔ ⵓⵊⴻⵎⵎⴰⴹ ⵏ ⵍ’ⵓⵔⴷⵓⵏ, ⵍⵊⴰⵍⵉⵍ ⵏ ⵍⴻⴳⵏⵓⵙ. ◘4:15 ⵉⵛⴰ. 8:23; 9:1.

16 ⵍⴳⴻⵏⵙ ⵉ ⵉⵇⵇⵉⵎⴻⵏ ⴷⵉ ⵜⴰⴵⴻⵙⵜ

ⵉⵥⵔⴰ ⵜⴰⴼⴰⵡⵜ ⵜⴰⵎⴻⵇⵇⵔⴰⵏⵜ,

ⵓ ⵅ ⵢⵉⵏⵏⵉ ⵉⵣⴻⴷⵖⴻⵏ

ⴷⵉ ⵜⴻⵎⵎⵓⵔⵜ ⴷ ⵜⵉⵍⵉ ⵏ ⵍⵎⴻⵡⵜ,

ⴰⵇⴰ ⵜⴻⵏⵇⴰⵔ-ⴷⴷ ⵅⴰⵙⴻⵏ ⵜⴼⴰⵡⵜ.” ◘4:16 ⵉⵛⴰ. 9:1

17 ⵣⵉ ⵙⵙⵉⵏ ⵉⴱⴷⴰ ⵢⴰⵙⵓⵄ ⵉⵜⵜⴱⴰⵔⵔⴻⵃ, ⵉⵏⵏⴰ: “ⵜⵓⴱⴻⵎ ⵎⵉⵏⵣⵉ ⵜⴰⴳⴻⵍⴷⵉⵜ ⵏ ⵉⵊⴻⵏⵡⴰⵏ ⴰⵇⴰ ⵜⵓⴷⴻⵙ-ⴷⴷ.” ◘4:17 ⵎⴽ. 1:15.

18 ⵍⴰⵎⵉ ⵜⵓⵖⴰ ⵏⴻⵜⵜⴰ ⵉⴳⴳⵓⵔ ⵅ ⵜⵎⴰ ⵏ ⵍⴻⴱⵃⴰⵔ ⵏ ⵍⵊⴰⵍⵉⵍ, ⵉⵥⵔⴰ ⵜⵏⴰⵢⴻⵏ ⵏ ⵡⴰⵡⵎⴰⵜⴻⵏ, ⵛⵉⵎⵄⵓⵏ ⵓⵎⵉ ⵇⵇⴰⵔⴻⵏ ⴱⵓⵟⵔⵓⵙ, ⵉⵙⴻⵎ ⵡⴰⵏⵉⵜⴰ ⵉⵅⵙ ⴰⴷ ⵢⵉⵏⵉ ‘ⴷ ⴰⵥⵔⵓ’, ⴷ ⴰⵏⴷⵔⴰⵡⵓⵙ ⵓⵎⴰⵙ, ⵜⵓⵖⴰ ⵏⴻⵟⵟⴰⵔⴻⵏ ⵜⵔⴰⵛⵛⴰⵡⵉⵏ ⴷⵉ ⵍⴻⴱⵃⴰⵔ ⵎⵉⵏⵣⵉ ⵏⵉⵜⵏⵉ ⴷ ⵉⵏⴻⵢⵎⴰⵔⴻⵏ ⵏ ⵉⵙⴻⵍⵎⴰⵏ. ◘4:18 [ⵎⴽ. 1:16-20; ⵍⴽ. 5:1-11] — ⵎⴽ. 1:16. 19 ⵉⵏⵏⴰ ⴰⵙⴻⵏ ⵢⴰⵙⵓⵄ: “ⴹⴼⴰⵔⴻⵎ ⴰⵢⵉ-ⴷⴷ, ⴰⴷ ⴽⴻⵏⵏⵉⵡ ⴰⵔⵔⴻⵖ ⴷ ⵉⵏⴻⵢⵎⴰⵔⴻⵏ ⵏ ⵉⵡⴷⴰⵏ.” 20 ⵙⵙⴰⵔⵙⴻⵏ ⴷⴻⵖⵢⴰ ⵜⵉⵔⴰⵛⵛⵉⵡⵉⵏ ⵏⵙⴻⵏ, ⴹⴼⴰⵔⴻⵏ ⵜ.

21 ⵍⴰⵎⵉ ⵢⴻⵄⴷⵓ ⵙⵙⴻⵏⵏⵉ, ⵉⵥⵔⴰ ⵜⵏⴰⵢⴻⵏ ⵏ ⵡⴰⵡⵎⴰⵜⴻⵏ ⵏⵏⴻⵖⵏⵉ, ⵢⴰⵄⵇⵓⴱ ⵎⵎⵉⵙ ⵏ ⵣⴰⴱⴷⵉ ⴷ ⵓⵎⴰⵙ ⵢⵓⵃⴰⵏⵏⴰ, ⵜⵓⵖⴰ ⴰⵜⴻⵏ ⴰⴽ-ⴷ ⴱⴰⴱⴰⵜⵙⴻⵏ ⵣⴰⴱⴷⵉ ⴷⴻⴳ ⵓⵖⴰⵔⵔⴰⴱⵓ, ⵄⴻⴷⴷⵍⴻⵏ ⵜⵉⵔⴰⵛⵛⵉⵡⵉⵏ ⵏⵙⴻⵏ ⵓⵛⴰ ⵏⴻⵜⵜⴰ ⵉⵍⴰⵖⴰ ⵅⴰⵙⴻⵏ. 22 ⴷⴻⵖⵢⴰ ⵙⴻⵎⵃⴻⵏ ⴷⴻⴳ ⵓⵖⴰⵔⵔⴰⴱⵓ ⵓ ⴷⵉ ⴱⴰⴱⴰⵜⵙⴻⵏ, ⴹⴼⴰⵔⴻⵏ ⵜ.

23 ⵜⵓⵖⴰ ⵢⴰⵙⵓⵄ ⵉⵜⵜⴻⵏⵏⴻⴹ ⴷⵉ ⵜⴻⵎⵎⵓⵔⵜ ⵏ ⵍⵊⴰⵍⵉⵍ ⵎⴰⵔⵔⴰ, ⵉⵙⵙⴻⵍⵎⴰⴷ ⴷⵉ ⵜⴻⵎⵣⵉⴷⴰⵡⵉⵏ ⵏⵙⴻⵏ, ⵉⵜⵜⴱⴰⵔⵔⴻⵃ ⵙ ⵍⴻⵅⴱⴰⵔ ⴰⵚⴻⴱⵃⴰⵏ ⵏ ⵜⴳⴻⵍⴷⵉⵜ ⵓⵛⴰ ⵉⵙⵙⴳⴻⵏⴼⴰ ⴽⵓⵍ ⵍⴻⵀⵍⴰⵛ ⴷ ⴽⵓⵍ ⵍⴻⵄⵢⵓⴱⴰⵜ ⵉ ⵉⴵⴰⵏ ⴷⵉ ⵍⴳⴻⵏⵙ. ◘4:23 [ⵍⴽ. 6:17-19] 24 ⵉⴼⴼⴻⵖ ⵍⴻⵅⴱⴰⵔ ⵅⴰⵙ ⴷⵉ ⵙⵓⵔⵉⵢⴰ ⵎⴰⵔⵔⴰ, ⵓⵛⴰ ⵉⵡⵢⴻⵏ-ⴷⴷ ⵖⴰⵔⴻⵙ ⵎⴰⵔⵔⴰ ⵉⵎⴻⵀⵍⴰⵛ ⵉⵏⵏⵉ ⵖⴰⵔ ⵉⴵⴰ ⵄⵍⴰⵎ ⴽⵓⵍ ⵍⴻⵀⵍⴰⵛ ⵍⴰ ⴷ ⵢⵉⵏⵏⵉ ⴷⴰⵢⵙⴻⵏ ⵍⴻⵃⵔⵉⵇ ⵍⴰ ⴷ ⵉⵏⵏⵉ ⴷⴰⵢⵙⴻⵏ ⵛⵛⵡⴰⵟⴻⵏ ⵍⴰ ⴷ ⵢⵉⵏⵏⵉ ⵉⵜⵜⴱⴰⵔⴽⵉⴽⴽⵉⴹⴻⵏ ⵓⵍⴰ ⴷ ⵉⵏⴻⵄⴹⴰⴱⴻⵏ, ⵓⵛⴰ ⵉⵙⵙⴳⴻⵏⴼⴰ ⵉ-ⵜⴻⵏ. 25 ⴹⴼⴰⵔⴻⵏ ⵜ-ⵉ-ⴷⴷ ⴰⵟⵟⴰⵙ ⵏ ⵍⵖⴰⵛⵉ ⵣⵉ ⵍⵊⴰⵍⵉⵍ, ⵣⵉ ⴷⵉⴽⴰⴱⵓⵍⵉⵙ, ⵣⵉ ⵓⵔⵛⴰⵍⵉⵎ, ⵣⵉ ⵢⴰⵀⵓⴷⵉⵢⵢⴰ ⵓ ⵣⴻⴳ ⵓⵊⴻⵎⵎⴰⴹ ⵏ ⵍ’ⵓⵔⴷⵓⵏ.