ⵉⵥⵍⴰⵏ ⵙ ⵉⴳⴻⵊⴷⵓⵔⴻⵏ
1
ⵉⵣⵍⵉ ⴰⵎⴻⵣⵡⴰⵔⵓ - ⵅ ⵓⵔⵛⴰⵍⵉⵎ
1 ⴰⵍⵉⴼ. ⵎⴰⵎⵎⴻⵛ ⵜⴻⵇⵇⵉⵎ ⴷⵉⵀⴰ
ⵜⴻⵏⴷⵉⵏⵜ ⵡⴻⵃⵃⴷⴻⵙ!
ⵜⵓⵖⴰ ⵍⴻⴱⴷⴰ ⵜⴻⵛⵛⵓⵔ ⵙ ⵍⵖⴰⵛⵉ,
ⵜⴻⴷⵡⴻⵍ ⴰⵎ ⵢⵉⵛⵜ ⵏ ⵜⴰⵊⵊⴰⵍⵜ,
ⵜⵓⵖⴰ-ⵜⵜ ⴷ ⵜⴰⵎⴻⵇⵇⵔⴰⵏⵜ ⵊⴰⵔ ⵍⴻⴳⵏⵓⵙ,
ⵉⴵⵉⵙ ⵏ ⵓⵊⴻⴵⵉⴷ ⵊⴰⵔ ⵍⵄⴰⵎⴰⵍⴰⵜ,
ⵜⴻⴷⵡⴻⵍ ⵖⴰⵔ ⵜⴻⵙⵎⵓⵖⵉ.
2 ⴱⵉⵜ. ⵜᵉⵜⵜⵔⵓ ⵉⵎⴻⵟⵟⴰⵡⴻⵏ ⵉⵎⴻⵔⵣⴰⴳⴻⵏ ⵙ ⴵⵉⵍⴻⵜ,
ⵉⵎⴻⵟⵟⴰⵡⴻⵏ ⵏⵏⴻⵙ ⵅ ⵉⵎⴻⴳⴳⵉⵣⴻⵏ ⵏⵏⴻⵙ.
ⵡⴰⵔ ⵖⴰⵔⴻⵙ ⵡⵉ ⵜⵜ ⵖⴰ ⵉⵄⴻⵣⵣⴰⵏ
ⵣⵉ ⵎⴰⵔⵔⴰ ⵉⵏⵏⵉ ⵜⵜ ⵉⵜⵜⴻⵅⵙⴻⵏ,
ⵎⴰⵔⵔⴰ ⵉⵎⴻⴷⴷⵓⴽⴽⴰⵍ ⵏⵏⴻⵙ ⵖⴷⴰⵔⴻⵏ-ⵜⵜ,
ⴷⴻⵡⵍⴻⵏ ⴰⵙ ⴷ ⵍⵄⴻⴷⵢⴰⵏ. ◘1:2 ⵉⵥⵀⴷ. 6:7
3 ⴳⵉⵎⴻⵍ. ⵜᵉⵜⵜⵡⴰⵃⴻⴱⴱⴻⵙ ⵜⴻⵎⵎⵓⵔⵜ ⵏ ⵢⴰⵀⵓⴷⴰ
ⵣⵉ ⵙⵙⵉⴱⴱⴻⵜ ⵏ ⵍⴻⵖⴱⴻⵏ,
ⵓ ⵣⵉ ⵙⵙⵉⴱⴱⴻⵜ ⵏ ⵍⵇⴻⴷⴷ
ⵏ ⵜⵅⴻⵎⵎⴰⵙⵜ ⵏⵏⴻⵙ ⵉⵇⴻⵙⵃⴻⵏ.
ⵜᵉⵜⵜⵖⵉⵎⴰ ⵊⴰⵔ ⵍⴻⴳⵏⵓⵙ, ⵡⴰⵔ ⵜⵓⴼⵉ ⴰⵔⵔⴰⵃⴻⵜ,
ⵎⴰⵔⵔⴰ ⵉⵏⵏⵉ ⵜⵜ ⵉⴹⴰⴼⴼⴰⵔⴻⵏ ⵃⴰⵔⵔⵜⴻⵏ ⵅⴰⵙ
ⴷⵉ ⵍⵡⴻⵙⵟ ⵏ ⵍⴻⵃⵚⴰⵔⴰⵜ ⵏⵏⴻⵙ.
4 ⴷⴰⵍⵉⵜ. ⵉⴱⵔⵉⴷⴻⵏ ⵖⴰⵔ ⵚⵉⵀⵢⵓⵏ ⵛⴻⴹⵏⴻⵏ,
ⵎⵉⵏⵣⵉ ⵓⵍⴰ ⴷ ⵉⵊⵊ ⵡⴰⵔ ⵉⴳⴳⵓⵔ ⵄⴰⴷ ⵖⴰⵔ ⵍⵄⵉⴷ.
ⵎⴰⵔⵔⴰ ⵜⵉⵡⵡⵓⵔⴰ ⵏⵏⴻⵙ ⵅⵍⴰⵏⵜ,
ⵉⴽⴻⵀⵀⴰⵏⴻⵏ ⵏⵏⴻⵙ ⵣⴻⵀⵀⴰⵔⴻⵏ,
ⵜⵉⵄⵣⴰⵔⵉⵢⵢⵉⵏ ⵏⵏⴻⵙ ⵛⴻⴹⵏⴻⵏⵜ,
ⵓⵛⴰ ⵏⴻⵜⵜⴰⵜ ⵙⵉⵎⴰⵏⵜ ⵏⵏⴻⵙ ⵜⴻⵛⵛⵓⵔ ⵙ ⵜⴰⵔⵣⵓⴳⵉ.
5 ⵀⵉ. ⵉⵖⵔⵉⵎⴻⵏ ⵏⵏⴻⵙ ⴷⴻⵡⵍⴻⵏ ⵃⴻⴽⴽⵎⴻⵏ ⵅⴰⵙ,
ⵍⵄⴻⴷⵢⴰⵏ ⵏⵏⴻⵙ ⴼⴰⵔⵔⵃⴻⵏ,
ⵎⴰⵖⴰⵔ ⵙⵉⴷⵉ ⵉⵙⵙⴻⵛⴹⴻⵏ ⵉ-ⵜⵜ
ⵣⵉ ⵙⵙⵉⴱⴱⴻⵜ ⵏ ⵍⵇⴻⴷⴷ ⵏ ⵍⵎⵓⵄⵚⵉⵢⵢⴻⵜ ⵏⵏⴻⵙ.
ⵉⵃⴻⵏⵊⵉⵔⴻⵏ ⵏⵏⴻⵙ ⵉⵎⴻⵥⵢⴰⵏⴻⵏ ⵓⵢⵓⵔⴻⵏ
ⴷⵉ ⵜⵎⴻⵃⴱⴰⵙⵜ ⵣⵣⴰⵜ ⵉ ⵜⵉⵟⵟⴰⵡⵉⵏ ⵏ ⵉⵖⵔⵉⵎⴻⵏ ⵏⵙⴻⵏ.
6 ⵡⴰⵡ. ⴰⵛⴻⵡⵡⴰⵔ ⵏ ⵢⴻⴵⵉⵙ ⵏ ⵚⵉⵀⵢⵓⵏ
ⵉⵏⴳⴻⵣ ⵣⵣⴰⵢⴻⵙ,
ⵎⴰⵔⵔⴰ ⵍⵃⵓⴽⴽⴰⵎ ⵏⵏⴻⵙ ⴳⴳⵉⵏ ⴰⵎ ⵓⴷⴰⴷⴻⵏ
ⵉⵏⵏⵉ ⵡⴰⵔ ⵉⵜⵜⵉⴼⴻⵏ ⴷⴷⴻⵎⵏⴻⵜ ⵏ ⵜⴰⵔⴻⵡⵙⴰ.
ⴳⴳⵓⵔⴻⵏ ⵏⵉⵜⵏⵉ ⴱⵍⴰ ⵊⵊⴻⵀⴷ
ⵣⵣⴰⵜ ⵉ ⵜⵉⵟⵟⴰⵡⵉⵏ ⵏ ⵡⴻⵏⵏⵉ ⵜⴻⵏ ⵉⴹⴰⴼⴼⴰⵔⴻⵏ.
7 ⵣⴰⵢⵉⵏ. ⴷⴻⴳ ⵡⵓⵙⵙⴰⵏ ⵏ ⵍⴻⵖⴱⴻⵏ ⵏⵏⴻⵙ
ⵓ ⴷⴻⴳ ⵡⴰⵟⵟⴰⵙ ⵏ ⵡⴻⵜⵍⴰⵄ ⵏⵏⴻⵙ
ⴰⴷ ⵜⴻⵄⵇⴻⵍ ⵓⵔⵛⴰⵍⵉⵎ ⵅ ⵎⴰⵔⵔⴰ ⵎⵉⵏ ⴷⴰⵢⴻⵙ ⵉⵖⵍⴰⵏ,
ⵎⵉⵏ ⵖⴰⵔⴻⵙ ⵜⵓⵖⴰ ⵣⵉⵛ.
ⵍⴰⵎⵉ ⵉⵡⴹⴰ ⵍⴳⴻⵏⵙ ⵏⵏⴻⵙ ⵙ ⵓⴼⵓⵙ ⵏ ⵡⴻⵖⵔⵉⵎ,
ⵜⵓⵖⴰ ⵡⴰⵔ ⴷⵉⵏ ⵡⵉ ⴷ ⴰⵙ ⵉ ⵖⴰ ⵉⵡⵛⴻⵏ ⴰⴼⵓⵙ.
ⵉⵖⵔⵉⵎⴻⵏ ⵏⵏⴻⵙ ⵥⵔⵉⵏ ⵜⵜ,
ⵙⵜⴻⵀⵣⴰⵏ ⵣⴻⴳ ⵓⵔⴻⴷⴷⴻⴵ ⵏⵏⴻⵙ.
8 ⵅⵉⵜ. ⵓⵔⵛⴰⵍⵉⵎ ⵜⵓⵖⴰ ⵜⵅⴻⵟⵟⴰ ⴰⵟⵟⴰⵙ.
ⵅ ⵓⵢⴰ ⵜⴻⴷⵡⴻⵍ ⴰⵎ ⵢⵉⵛⵜ ⵏ ⵜⴻⵎⵖⴰⵔⵜ
ⴷⴻⴳ ⵡⵓⵙⵙⴰⵏ ⵏ ⵡⴻⵄⵣⴰⵍ ⵏⵏⴻⵙ.
ⵎⴰⵔⵔⴰ ⵉⵏⵏⵉ ⵜⵓⵖⴰ ⵜⵜ ⵉⵜⵜⵡⴻⵇⵇⴰⵔⴻⵏ,
ⵙⵙⴻⵃⵇⴰⵔⴰⵏ ⵜⵜ,
ⵎⵉⵏⵣⵉ ⵥⵔⵉⵏ ⵍⴻⵃⵢⴰ ⵏⵏⴻⵙ.
ⵓⵍⴰ ⵏⴻⵜⵜⴰⵜ ⵙⵉⵎⴰⵏⵜ ⵏⵏⴻⵙ ⵜⵣⴻⵀⵀⴰⵔ,
ⵜⴻⴷⵡⴻⵍ ⵖⴰⵔ ⴹⴻⴼⴼⴰⵔ. ◘1:8 ⵉⵛⴰ. 47:3
9 ⵜⵉⵜ. ⵜⴰⵅⵎⵓⵊⵉ ⵏⵏⴻⵙ ⵜⴻⵍⵚⴻⵇ
ⵖⴰⵔ ⵜⵎⵓⵡⵡⴰ ⵏ ⵓⴱⴻⵃⵔⵓⵔ ⵏⵏⴻⵙ,
ⴰⵏⴻⴳⴳⴰⵔⵓ ⵏⵏⴻⵙ ⵡⴰⵔ ⴷⴰⵢⴻⵙ ⵜⵅⴻⵎⵎ.
ⴰⵇⴰ ⵜⴻⵀⵡⴰ-ⴷⴷ ⵖⴰⵔ ⵍⴰⴵⴰⵖ
ⵙ ⵉⵊⵊ ⵏ ⵡⴻⴱⵔⵉⴷ ⵉⵙⵙⵜⴻⴱⵀⵜⴻⵏ,
ⵓⵍⴰ ⴷ ⵉⵊⵊ ⵡⴰⵔ ⵜⵜ ⵉⵄⴻⵣⵣⵉ.
ⵅⵣⴰⵔ ⵎⴰⵛⴰ ⵍⴻⵖⴱⴻⵏ ⵉⵏⵓ, ⴰ ⵙⵉⴷⵉ,
ⵎⴰⵖⴰⵔ ⵍⴻⵄⴷⵓ ⵉⵙⵙⵎⴻⵇⵇⴰⵔ ⵉⵅⴻⴼ ⵏⵏⴻⵙ. ◘1:9 ⴰⵄⵡⴷ. 32:29
10 ⵢⵓⴷ. ⴰⵖⵔⵉⵎ ⵉⵙⵙⵡⵉⵥⵥⴻⴹ ⴰⴼⵓⵙ ⵏⵏⴻⵙ
ⵖⴰⵔ ⵎⴰⵔⵔⴰ ⵎⵉⵏ ⴷⴰⵢⴻⵙ ⵉⵖⵍⴰⵏ.
ⵉⵡⴰ ⵜⴻⵥⵔⴰ ⵏⴻⵜⵜⴰⵜ ⵎⴰⵎⵎⴻⵛ ⵓⴷⴼⴻⵏ ⵍⴻⴳⵏⵓⵙ
ⵖⴰⵔ ⵣⵣⴰⵡⴻⵛⵜ ⵏⵏⴻⵙ ⵉⵇⴻⴷⴷⵙⴻⵏ,
ⵍⴻⴳⵏⵓⵙ ⵎⵉⵏ ⵅⴻⴼ ⵜⵓⵎⵓⵔⴻⴷ,
ⵡⴰⵔ ⵉⵄⴻⴷⴷⴻⵍ ⴰⴷ ⴷⴷ-ⴰⴷⴼⴻⵏ
ⵖⴰⵔ ⵡⴻⴳⵔⴰⵡ ⵏ ⵍⴳⴻⵏⵙ ⵏⵏⴻⵛ.
11 ⴽⴰⴼ. ⵇⴰⵄ ⵉⵎⴻⵣⴷⴰⵖ ⵏⵏⴻⵙ ⵣⴻⵀⵀⴰⵔⴻⵏ,
ⴰⵔⴻⵣⵣⵓⵏ ⴰⵖⵔⵓⵎ.
ⵏⵉⵜⵏⵉ ⵡⵛⵉⵏ ⵍⴻⵇⵛⵓⵄ ⵉⵖⵍⴰⵏ ⵏⵙⴻⵏ
ⴷⵉ ⵟⵟⵡⴻⵄ ⵏ ⵎⴰⵛⵛⴰ,
ⵎⴰⵃⴻⵏⴷ ⴰⴷ ⴷⴷ-ⴰⵔⵔⴻⵏ ⴰⵙⴻⴼⵙⵉ ⵖⴰⵔ ⵍⴻⵄⵎⴰⵔ ⵏⵙⴻⵏ.
ⵅⵣⴰⵔ, ⴰ ⵙⵉⴷⵉ, ⵡⴰⵍⴰ
ⵎⴰⵎⵎⴻⵛ ⴷⴻⵡⵍⴻⵖ ⵜⵜⵡⴰⵙⵙⴻⵃⵇⴰⵔⴻⵖ. ◘1:11 ⵉⵔⵎ. 52:6
12 ⵍⴰⵎⵉⴷ. ⵎⴰ ⵡⴰⵔ ⴷⴰⵢⵡⴻⵎ ⵉⵛⵇⵉ,
ⴽⴻⵏⵏⵉⵡ ⵉⵏⵏⵉ ⵉⵄⴻⴷⴷⵓⵏ ⵅ ⵡⴻⴱⵔⵉⴷ?
ⵡⴰⵍⴰⵎ ⵓ ⵅⵣⴰⵔⴻⵎ,
ⵎⴰ ⴷⵉⵏ ⵛⴰ ⵏ ⵍⴻⵃⵔⵉⵇ ⴰⵎ ⵍⴻⵃⵔⵉⵇ ⵉ ⴷ ⴰⵢⵉ ⵉⵜⵜⵡⴰⴳⴳⴻⵏ,
ⵉ ⵣⵉ ⴷ ⴰⵢⵉ ⵉⵙⵙⵅⴻⵢⵢⴻⵇ ⵙⵉⴷⵉ,
ⴷⴻⴳ ⵡⴰⵙⵙ ⵏ ⵍⵃⴰⴷⵓⵇ ⵏ ⵡⴻⵖⴹⴰⴱ ⵏⵏⴻⵙ.
13 ⵎⵉⵎ. ⵣⵉ ⵙⴻⵏⵏⴻⵊ ⵉ ⴷⴷ-ⵉⵙⵙⴻⴽⴽ ⵏⴻⵜⵜⴰ ⵜⵉⵎⴻⵙⵙⵉ
ⴷⴻⴳ ⵉⵖⵙⴰⵏ ⵉⵏⵓ,
ⵜⵛⴻⴱⴱⴰⵔ ⴷⴰⵢⵙⴻⵏ.
ⵏⴻⵜⵜⴰ ⵉⵏⴹⴰⵔ-ⴷⴷ ⵜⵔⴰⵛⵛⴰ ⵖⴰⵔ ⵉⴹⴰⵔⴻⵏ ⵉⵏⵓ,
ⵢⴰⵔⵔⴰ ⴰⵢⵉ ⴰⴷ ⴷⴻⵡⵍⴻⵖ ⵖⴰⵔ ⴹⴻⴼⴼⴰⵔ,
ⴰⵇⴰ ⵢⴰⵔⴻⴷⴷⴻⴵ ⴰⵢⵉ,
ⵉⵙⵙⴻⵀⵍⴻⵛ ⴰⵢⵉ ⴰⵙⵙ ⴰⵎ ⵉⴽⵎⴻⵍ.
14 ⵏⵓⵏ. ⵉⵜⵜⵡⴰⵛⴻⴷⴷ ⵓⵣⴰⵢⵍⵓ ⵏ ⵉⵄⴻⴷⵉⵢⵢⴻⵏ ⵉⵏⵓ
ⵙ ⵓⴼⵓⵙ ⵏⵏⴻⵙ,
ⴰⵇⴰ ⵜⵜⵡⴰⵎⵓⴷⴻⵏ, ⴳⴻⵄⵄⴷⴻⵏ-ⴷⴷ ⵅ ⵢⵉⵔⵉ ⵉⵏⵓ.
ⵏⴻⵜⵜⴰ ⵢⴰⵔⵔⴰ ⵊⵊⴻⵀⴷ ⵉⵏⵓ ⴰⴷ ⵉⴼⵛⴻⵍ.
ⵉⵡⵛⴰ ⴰⵢⵉ ⵙⵉⴷⵉ ⵉⵏⵓ ⴷⴻⴳ ⵉⴼⴰⵙⵙⴻⵏ ⵏⵙⴻⵏ,
ⵏⴻⵛⵛ ⵡⴰⵔ ⵣⴻⵎⵎⴰⵔⴻⵖ ⴰⴷ ⴱⴻⴷⴷⴻⵖ ⵄⴰⴷ.
15 ⵙⴰⵎⵉⵅ. ⵉⵏⴹⴰⵔ ⵙⵉⴷⵉ ⵉⵏⵓ
ⵎⴰⵔⵔⴰ ⴰⵢⵜ ⵏ ⴱⵓ-ⵚⵚⵓⵍⵟⴰ ⵉⵏⵓ ⴷⵉ ⵍⵡⴻⵙⵜ ⵉⵏⵓ,
ⴰⵎ ⵎⴰⵎⵎⴻⵛ ⵉⴱⴰⵔⵔⴻⵃ
ⵙ ⵉⵊⵊ ⵏ ⵓⵎⵓⵏⵉ ⵉⴼⴰⵔⵣⴻⵏ ⴹⵉⴷⴷ ⵉⵏⵓ,
ⵎⴰⵃⴻⵏⴷ ⴰⴷ ⵢⴰⵔⵥ ⵉⵃⵓⴷⵔⵉⵢⵢⴻⵏ ⵉⵏⵓ,
ⵙⵉⴷⵉ ⵉⵏⵓ ⴰⵇⴰ ⵉⵄⴼⴻⵙ ⴷⵉ ⵜⵙⵉⵔⵜ ⵏ ⵓⴹⵉⵍ,
ⵏ ⵜⴻⵄⵣⴰⵔⴻⵛⵜ, ⵏ ⵢⴻⴵⵉⵙ ⵏ ⵢⴰⵀⵓⴷⴰ. ◘1:15 ⵉⵔⵎ. 14:17
16 ⵄⴰⵢⵉⵏ. ⵙ ⵎⴰⵏ ⴰⵢⴰ ⵜⵜⵔⵓⵖ,
ⴰ ⵜⵉⵟⵟ ⵉⵏⵓ, ⴰ ⵜⵉⵟⵟ ⵉⵏⵓ ⵉⵙⵙⴰⵣⵣⴰⵍⴻⵏ ⵉⵎⴻⵟⵟⴰⵡⴻⵏ,
ⵎⵉⵏⵣⵉ ⴰⵎⴻⵙⴼⴻⵡⵡⴻⵊ ⵏⵏⵉ ⵉⵣⴻⵎⵎⴰⵔⴻⵏ
ⴰⴷ ⴷⴷ-ⵢⴰⵔⵔ ⵍⴻⵄⵎⴰⵔ ⵉⵏⵓ,
ⵉⴳⴳⵯⴻⵊ ⵅⴰⴼⵉ.
ⵜⵜⵡⴰⵜⴻⵃⵃⴰⵏ ⵉⵃⴻⵏⵊⵉⵔⴻⵏ ⵉⵏⵓ,
ⵎⵉⵏⵣⵉ ⵍⴻⵄⴷⵓ ⵉⵊⵀⴻⴷ ⵅⴰⵙⴻⵏ.◘1:16 ⵉⵔⵎ. 13:17
17 ⴱⵉ. ⵜⴻⵙⵙⵡⵉⵥⵥⴻⴹ ⵚⵉⵀⵢⵓⵏ ⵉⴼⴰⵙⵙⴻⵏ ⵏⵏⴻⵙ,
ⵎⴰⵛⴰ ⵏⴻⵜⵜⴰⵜ ⵡⴰⵔ ⵖⴰⵔⴻⵙ ⵡⵉ ⵜⵜ ⵖⴰ ⵉⵙⵙⴼⴻⵡⵡⵊⴻⵏ.
ⵢⵓⵎⵓⵔ ⵙⵉⴷⵉ ⵅ ⵢⴰⵄⵇⵓⴱ,
ⴰⵇⴰ ⵉⵖⵔⵉⵎⴻⵏ ⵏⵏⴻⵙ ⴰⴷ ⴰⵙ ⴷⴷ-ⵏⵏⴹⴻⵏ.
ⵓⵔⵛⴰⵍⵉⵎ ⵜⴻⴷⵡⴻⵍ ⵊⴰⵔ ⴰⵙⴻⵏ ⴰⵎ ⵢⵉⵛⵜ ⵏ ⵜⴻⵎⵖⴰⵔⵜ
ⴷⴻⴳ ⵡⵓⵙⵙⴰⵏ ⵏ ⵡⴻⵄⵣⴰⵍ ⵏⵏⴻⵙ.
18 ⵜⵙⴰⴷⵉ. ⵙⵉⴷⵉ ⴷ ⴰⵎⵙⴻⴳⴳⴻⴷ,
ⵎⴰⵖⴰⵔ ⵏⴻⵛⵛ ⵜⵓⵖⴰ ⵖⴻⵡⵡⵖⴻⵖ ⵅ ⵍⵓⵎⵓⵔⴰⵜ ⵏⵏⴻⵙ.
ⵙⵍⴻⵎ ⵅⴻⵏⵏⵉ, ⵎⴰⵔⵔⴰ ⵍⴻⴳⵏⵓⵙ,
ⵅⵣⴰⵔⴻⵎ ⵖⴰⵔ ⵍⴻⵀⵍⵉⵇ ⵉⵏⵓ.
ⵜⵉⵄⵣⴰⵔⵉⵢⵢⵉⵏ ⵉⵏⵓ ⴷ ⵉⵃⵓⴷⵔⵉⵢⵢⴻⵏ ⵉⵏⵓ
ⵓⵢⵓⵔⴻⵏ ⴷⵉ ⵜⵎⴻⵃⴱⴰⵙⵜ.◼1:18 ⵅ ⵍⵓⵎⵓⵔⴰⵜ ⵏⵏⴻⵙ-ⵙ ⵜⵄⵉⴱⵔⴰⵏⵉⵜ ‘ⵅ ⵓⵇⴻⵎⵎⵓⵎ ⵏⵏⴻⵙ’.
19 ⵇⵓⴼ. ⵏⴻⵛⵛ ⵍⴰⵖⵉⵖ ⵅ ⵢⵉⵏⵏⵉ ⴷ ⴰⵢⵉ ⵉⵜⵜⴻⵅⵙⴻⵏ,
ⵎⴰⵛⴰ ⵏⵉⵜⵏⵉ ⵛⴻⵎⵜⴻⵏ ⴰⵢⵉ.
ⵉⴽⴻⵀⵀⴰⵏⴻⵏ ⵉⵏⵓ ⴷ ⵉⵎⵖⴰⵔⴻⵏ ⵉⵏⵓ
ⴹⴻⵍⵇⴻⵏ ⵉ ⴱⵓⵃⴱⴻⵍ ⴷⵉ ⵜⴻⵏⴷⵉⵏⵜ,
ⵓⵎⵉ ⵜⵓⵖⴰ ⴰⵔⴻⵣⵣⵓⵏ ⵎⴰⵛⵛⴰ ⵉ ⵢⵉⵅⴻⴼ ⵏⵙⴻⵏ,
ⵃⵉⵎⴰ ⴰⴷ ⵙⵙⵎⴻⵃⴹⴻⵏ ⵍⴻⵄⵎⴰⵔ ⵏⵙⴻⵏ. ◘1:19 ⵉⵔⵎ. 30:14
20 ⵔⵉⵅ. ⵅⵣⴰⵔ, ⴰ ⵙⵉⴷⵉ, ⵎⴰⵖⴰⵔ ⵏⴻⵛⵛ ⴷⵉ ⵍⴻⵃⵚⴰⵔⴻⵜ,
ⵜⴰⴽⵔⵉⵛⵜ ⵉⵏⵓ ⵜⴻⵏⵏⴻⵃⵡⴻⵍ,
ⵓⵍ ⵉⵏⵓ ⵉⵏⵏⴻⵇⵍⴻⴱ-ⴷⴷ ⵣⵉ ⴷⴰⵅⴻⵍ ⵉⵏⵓ,
ⵎⴰⵖⴰⵔ ⵜⵓⵖⴰ ⵖⴻⵡⵡⵖⴻⵖ ⴰⵟⵟⴰⵙ.
ⴷⵉ ⴱⴰⵔⵔⴰ ⵉ ⴷ ⴰⵢⵉ ⵢⵓⵛⴰⵔ ⵙⵙⵉⴼ ⵉⵃⴻⵏⵊⵉⵔⴻⵏ ⵉⵏⵓ,
ⴷⴰⵅⴻⵍ ⵉⵃⴻⴽⴽⴻⵎ ⵍⵎⴻⵡⵜ. ◘1:20 ⵉⵛⴰ. 16:11; ⵉⵔⵎ. 48:36
21 ⵛⵉⵏ. ⵙⵍⵉⵏ ⵎⴰⵎⵎⴻⵛ ⵣⴻⵀⵀⴰⵔⴻⵖ,
ⵎⴰⵛⴰ ⵏⴻⵛⵛ ⵡⴰⵔ ⵖⴰⵔⵉ ⵓⵍⴰ ⴷ ⵉⵊⵊ ⵏ ⵓⵎⴻⵙⴼⴻⵡⵡⴻⵊ,
ⵎⴰⵔⵔⴰ ⵍⵄⴻⴷⵢⴰⵏ ⵉⵏⵓ ⵙⵍⵉⵏ ⵅ ⴰⵔⵥⵉⵢⵢⴻⵜ ⵉⵏⵓ.
ⴼⴰⵔⵃⴻⵏ ⴰⵇⴰ ⵛⴻⴽ ⵉ ⵜⵜ ⵉⴳⴳⵉⵏ.
ⵅⵎⵉ ⴷⴷ ⵖⴰ ⵜⴻⵙⵙⵉⵡⴹⴻⴷ ⴰⵙⵙ ⵉ ⵣⵉ ⴷⴷ-ⵜⵄⴻⵍⵎⴻⴷ,
ⵅⴻⵏⵏⵉ ⴰⴷ ⵉⵍⵉⵏ ⴰⵎ ⵎⴰⵎⵎⴻⵛ ⴵⵉⵖ ⵏⴻⵛⵛ.
22 ⵜⴰⴼ. ⴻⵊⵊ ⴰⴷ ⴷⴷ-ⵢⴰⵙ ⵎⴰⵔⵔⴰ ⵍⵖⴰⵔ ⵏⵙⴻⵏ ⵣⵣⴰⵜⴻⴽ,
ⴻⴳⴳ ⵣⵣⴰⵢⵙⴻⵏ ⴰⵎ ⵎⴰⵎⵎⴻⵛ ⵣⵣⴰⵢⵉ ⵜⴻⴳⴳⵉⴷ
ⵣⵉ ⵙⵙⵉⴱⴱⴻⵜ ⵏ ⵎⴰⵔⵔⴰ ⵉⵄⴻⴷⴷⵉⵢⴻⵏ ⵉⵏⵓ,
ⵎⵉⵏⵣⵉ ⵉⵣⴻⵀⵀⴰⵔⴻⵏ ⵉⵏⵓ ⴷ ⴰⵟⵟⴰⵙ,
ⵓⵍ ⵉⵏⵓ ⵢⵓⵃⴻⵍ ⴰⵟⵟⴰⵙ.
◘1:9 1:9 ⴰⵄⵡⴷ. 32:29
◘1:15 1:15 ⵉⵔⵎ. 14:17
◘1:16 1:16 ⵉⵔⵎ. 13:17
◼1:18 1:18 ⵅ ⵍⵓⵎⵓⵔⴰⵜ ⵏⵏⴻⵙ-ⵙ ⵜⵄⵉⴱⵔⴰⵏⵉⵜ ‘ⵅ ⵓⵇⴻⵎⵎⵓⵎ ⵏⵏⴻⵙ’.
◘1:19 1:19 ⵉⵔⵎ. 30:14
◘1:20 1:20 ⵉⵛⴰ. 16:11; ⵉⵔⵎ. 48:36