1 ⴰⵍⵉⴼ. ⵎⴰⵎⵎⴻⵛ ⵉⴷⵍⴰ ⵙⵉⴷⵉ ⵉⵏⵓ

ⵢⴻⴵⵉⵙ ⵏ ⵚⵉⵀⵢⵓⵏ

ⵙ ⵉⵙⴻⵢⵏⵓⵜⴻⵏ ⵉⴱⴰⵔⵛⴰⵏⴻⵏ?

ⴰⵇⴰ ⴰⵄⵓⴵⵉ ⵏ ⵉⵙⵔⴰⵉⵍ ⵉⵏⴹⴰⵔ ⵉ-ⵜ

ⵣⴻⴳ ⵓⵊⴻⵏⵏⴰ ⵖⴰⵔ ⵜⴻⵎⵎⵓⵔⵜ,

ⵏⴻⵜⵜⴰ ⵡⴰⵔ ⵉⵅⴰⵔⵔⴻⵚ ⴷⵉ ⵜⵏⴻⴱⴷⴰⵜ ⵏ ⵉⴹⴰⵔⴻⵏ ⵏⵏⴻⵙ

ⴷⴻⴳ ⵡⴰⵙⵙ ⵏ ⵡⴻⵖⴹⴰⴱ ⵏⵏⴻⵙ.

2 ⴱⵉⵜ. ⵉⵇⴹⴰ ⵙⵉⴷⵉ ⵉⵏⵓ

ⵅ ⵎⴰⵔⵔⴰ ⵜⵉⵣⴻⴷⴷⴰⵖ ⵏ ⵢⴰⵄⵇⵓⴱ,

ⵡⴰⵔ ⵜⴻⵏⵜ ⵉⵊⵊⵉ ⴰⴷ ⵏⴻⵊⵎⴻⵏⵜ.

ⴷⴻⴳ ⵓⴷⵓⵇⵇⴻⵣ ⵏⵏⴻⵙ ⵏ ⵓⴼⵓⴳⴻⵎ

ⵉⵀⴷⴻⵎ ⵍⵇⴻⵍⵄⴰⵜ ⵏ ⵢⴻⴵⵉⵙ ⵏ ⵢⴰⵀⵓⴷⴰ,

ⵉⴱⴻⵇⵇⴻⴹ ⵉ-ⵜⴻⵏⵜ ⵅ ⵜⴻⵎⵎⵓⵔⵜ,

ⵉⵙⵙⵄⴰⵔⵔⴰ ⵜⴰⴳⴻⵍⴷⵉⵜ ⴷ ⵍⵃⵓⴽⴽⴰⵎ ⵏⵏⴻⵙ.

3 ⴳⵉⵎⴻⵍ. ⴷⵉ ⵍⵃⴰⴷⵓⵇ ⵏ ⵡⴻⵖⴹⴰⴱ ⵏⵏⴻⵙ

ⵉⵇⴻⵙⵙ ⵇⴰⵄ ⵉⵛⵛ ⵏ ⵉⵙⵔⴰⵉⵍ.

ⵢⴰⵔⵔⴰ ⴰⴼⵓⵙ ⴰⴼⵓⵙⵉ ⵏⵏⴻⵙ ⵖⴰⵔ ⴹⴻⴼⴼⴰⵔ

ⵣⵣⴰⵜ ⵉ ⵍⴻⵄⴷⵓ,

ⵓ ⵏⴻⵜⵜⴰ ⵢⴰⵔⵖⴰ ⴹⵉⴷⴷ ⵉ ⵢⴰⵄⵇⵓⴱ

ⴰⵎ ⵜⵎⴻⵙⵙⵉ ⵉⵜⵜⴻⵃⴷⵓⴷⵓⵇⴻⵏ,

ⵜᵉⵜⵜⴻⵜⵜ ⵎⴰⵔⵔⴰ ⵎⵉⵏ ⵉ ⴷ ⴰⵙ ⴷⴷ-ⵉⵏⵏⴹⴻⵏ.

4 ⴷⴰⵍⵉⵜ. ⵏⴻⵜⵜⴰ ⵉⵎⵃⴻⴹ ⵍⵇⴻⵡⵙ ⵏⵏⴻⵙ ⴰⵎ ⵍⴻⵄⴷⵓ,

ⵉⵙⵙⴳⴻⵄⵄⴻⴷ ⴰⴼⵓⵙⵉ ⵏⵏⴻⵙ ⴰⵎ ⵍⴻⵄⴷⵓ,

ⵡⴻⵏⵏⵉ ⵉⵡⵜⵉⵏ ⵎⴰⵔⵔⴰ ⵎⵉⵏ ⵜⴻⵎⵎⴻⵥⵔⵉ ⵜⵉⵟⵟ.

ⴷⴻⴳ ⵓⵇⵉⴹⵓⵏ ⵏ ⵢⴻⴵⵉⵙ ⵏ ⵚⵉⵀⵢⵓⵏ

ⵉⴼⴰⵔⵔⴻⵖ ⴰⵙⵄⴰⵔ ⵏⵏⴻⵙ ⴰⵎ ⵜⵎⴻⵙⵙⵉ.

5 ⵀⵉ. ⵙⵉⴷⵉ ⵉⵏⵓ ⵉⴷⵡⴻⵍ ⴰⵎ ⵍⴻⵄⴷⵓ,

ⵉⵚⴰⵔⴹ ⵉⵙⵔⴰⵉⵍ,

ⵉⵚⴰⵔⴹ ⵎⴰⵔⵔⴰ ⵍⴻⵇⵚⵓⵔ ⵏⵏⴻⵙ,

ⵉⵀⴷⴻⵎ ⵍⵇⴻⵍⵄⴰⵜ ⵏⵏⴻⵙ,

ⵓ ⵢⴰⵔⵏⵉ ⵄⴰⴷ ⴷⴻⴳ ⵡⴻⵛⴹⴰⵏ ⴷ ⵉⵖⵓⵢⵢⴰⵏ

ⵖⴰⵔ ⵢⴻⴵⵉⵙ ⵏ ⵢⴰⵀⵓⴷⴰ.

6 ⵡⴰⵡ. ⵏⴻⵜⵜⴰ ⵉⵇⵍⴻⵄ ⵙ ⵍⵄⵓⵏⴼ ⴰⵄⵉⵛⵛⵓ ⵏⵏⴻⵙ,

ⴰⵎ ⵉⵊⵊ ⵏ ⵡⴻⵃⵡⵉⵛ.

ⵢⴰⵔⴻⵢⵢⴻⴱ ⴰⵎⵛⴰⵏ ⵏ ⵓⵎⵙⴰⴳⴰⵔ.

ⵉⵙⵙⴻⵜⵜⵓ ⵙⵉⴷⵉ ⴷⵉ ⵚⵉⵀⵢⵓⵏ

ⴰⵙⵙ ⵏ ⵍⵄⵉⴷ ⴷ ⴰⵙⵙ ⵏ ⵙⵙⴻⴱⵜ,

ⵓ ⴷⴻⴳ ⵡⴻⵙⵅⴻⴹ ⵏⵏⴻⵙ

ⵉⵏⴹⴰⵔ ⴰⵊⴻⴵⵉⴷ ⴷ ⵓⴽⴻⵀⵀⴰⵏ.

7 ⵣⴰⵢⵉⵏ. ⵉⴷⵡⴻⵍ ⵙⵉⴷⵉ ⵉⵏⵓ ⵉⵛⴰⵔⵔⴻⵀ

ⴰⵄⴰⵍⵟⴰⵔ ⵏⵏⴻⵙ,

ⵉⵏⴹⴰⵔ ⵣⵣⴰⵡⴻⵛⵜ ⵉⵇⴻⴷⴷⵙⴻⵏ ⵏⵏⴻⵙ,

ⵉⵡⵛⴰ ⵍⴻⵃⵢⵓⴹ ⵏ ⵢⴻⵅⵅⴰⵎⴻⵏ ⵏ ⵍⴻⵇⵚⴰⵔ

ⴷⴻⴳ ⵓⴼⵓⵙ ⵏ ⵍⴻⵄⴷⵓ.

ⵏⵉⵜⵏⵉ ⴳⴳⵉⵏ ⴰⴷ ⵙⵍⴻⵏ ⵉ ⵜⵎⵉⵊⵊⴰ ⵏⵙⴻⵏ

ⴷⵉ ⵜⴰⴷⴷⴰⵔⵜ ⵏ ⵙⵉⴷⵉ, ⴰⵎ ⴷⴻⴳ ⵉⵊⵊ ⵏ ⵡⴰⵙⵙ ⵏ ⵍⵄⵉⴷ.

8 ⵅⵉⵜ. ⵙⵉⴷⵉ ⵉⵅⴰⵔⵔⴻⵚ ⴰⴷ ⵉⵀⴷⴻⵎ

ⵍⵃⵉⴹ ⵏ ⵢⴻⴵⵉⵙ ⵏ ⵚⵉⵀⵢⵓⵏ,

ⵉⵙⴰⵔⵔⴻⵃ ⵅⴰⵙ ⴼⵉⵍⵓ ⵏ ⵍⴻⵄⴱⴰⵔ,

ⵡⴰⵔ ⴷⴷ-ⵉⵊⴱⵉⴷ ⵖⴰⵔⴻⵙ ⴰⴼⵓⵙ ⵏⵏⴻⵙ ⵣⴻⴳ ⵓⵚⴰⵔⴹ.

ⵉⵊⵊⴰ ⴰⵛⴱⴰⵔ ⵏ ⵣⵣⴰⵜ ⴷ ⵍⵃⵉⴹ ⴰⴷ ⵛⴻⴹⵏⴻⵏ,

ⴰⵇⴰ ⵜⵜⵡⴰⵖⴻⴹⵍⴻⵏ ⵊⵎⵉⵄ ⵖⴰⵔ ⵜⴻⵎⵎⵓⵔⵜ.

9 ⵜⵉⵜ. ⵜⵉⵡⵡⵓⵔⴰ ⵏⵏⴻⵙ ⵖⴰⵔⵇⴻⵏⵜ ⴷⴻⴳ ⵓⵛⴰⵍ,

ⵉⵄⵓⵎⴰⴷ ⵏⵏⴻⵙ ⵏ ⵓⴱⴻⵍⵍⴻⵄ ⵢⴰⵔⴻⴷⴷⴻⴵ ⵉ-ⵜⴻⵏ,

ⵢⴰⵔⵥⴰ ⵉ-ⵜⴻⵏ.

ⴰⵊⴻⴵⵉⴷ ⵏⵏⴻⵙ ⴷ ⵍⵃⵓⴽⴽⴰⵎ ⵏⵏⴻⵙ ⴰⵇⴰ ⴰⵜⴻⵏ ⵊⴰⵔ ⵍⴻⴳⵏⵓⵙ,

ⵡⴰⵔ ⴷⵉⵏ ⴱⵓ ⵓⵙⴻⵍⵎⴻⴷ ⵏ ⵛⵛⴰⵔⵉⵄⴰ,

ⵉⵏⴰⴱⵉⵢⵢⴻⵏ ⵏⵏⴻⵙ ⵡⴰⵔ ⵜⵜᵉⵟⵟⵉⴼⴻⵏ ⵛⴰ ⵍⴻⵡⵃⵉⵢ ⵏ ⵙⵉⴷⵉ.

10 ⵢⵓⴷ. ⵉⵎⵖⴰⵔⴻⵏ ⵏ ⵢⴻⴵⵉⵙ ⵏ ⵚⵉⵀⵢⵓⵏ

ⵇⵇⵉⵎⴻⵏ ⵅ ⵜⴻⵎⵎⵓⵔⵜ, ⴱⴻⴽⵎⴻⵏ,

ⵣⵓⵣⵣⴰⵔⴰⵏ ⵓⵛⴰⵍ ⵅ ⵓⵣⴻⴵⵉⴼ ⵏⵙⴻⵏ,

ⴱⴻⵢⵙⴻⵏ ⵉⵅⴻⴼ ⵏⵙⴻⵏ ⵙ ⵜⵅⵓⵏⵛⴰⵢ ⵏ ⵡⴻⵛⴹⴰⵏ.

ⵜⵉⵄⵣⴰⵔⵉⵢⵢⵉⵏ ⵏ ⵓⵔⵛⴰⵍⵉⵎ ⵙⵙⴰⴹⴰⵔⴻⵏⵜ

ⴰⵣⴻⴵⵉⴼ ⵏⵙⴻⵏⵜ ⵖⴰⵔ ⵜⴻⵎⵎⵓⵔⵜ.

11 ⴽⴰⴼ. ⵜⵉⵟⵟⴰⵡⵉⵏ ⵉⵏⵓ ⵓⵀⵍⴻⵏⵜ ⵣⴻⴳ ⵉⵎⴻⵟⵟⴰⵡⴻⵏ,

ⵜⴰⴽⵔⵉⵛⵜ ⵉⵏⵓ ⵜᵉⵜⵜⴻⵏⵀⴻⵣⵣⴰ,

ⵜᵉⵜⵜⵡⴰⵣⴻⴵⴻⵄ ⵜⵙⴰ ⵉⵏⵓ ⵅ ⵜⴻⵎⵎⵓⵔⵜ,

ⵅ ⵜⵔⴻⵥⵥⵉⵜ ⵏ ⵢⴻⴵⵉⵙ ⵏ ⵍⴳⴻⵏⵙ ⵉⵏⵓ,

ⵎⵉⵏⵣⵉ ⴰⵃⴻⵏⵊⵉⵔ ⴷ ⵓⵙⴻⵢⵎⵉ

ⵜⵜⵖⴰⵛⴰⵏ ⵅ ⵡⴰⵣⵣⴰⵢⴻⵏ ⵏ ⵜⴻⵏⴷⵉⵏⵜ.

12 ⵍⴰⵎⵉⴷ. ⵏⵉⵜⵏⵉ ⵇⵇⴰⵔⴻⵏ ⵉ ⵢⴻⵎⵎⴰⵜⵙⴻⵏ:

“ⵎⴰⵏⵉ ⵉⴵⴰ ⵄⴰⴷ ⵉⵎⴻⵏⴷⵉ ⴷ ⴱⵉⵏⵓ?”,

ⵅⵎⵉ ⵡⴻⵟⵟⴰⵏ ⵅ ⵡⴰⵣⵣⴰⵢⴻⵏ ⵏ ⵜⴻⵏⴷⵉⵏⵜ

ⴰⵎ ⵢⵉⵏⵏⵉ ⵉⵜⵜⵡⴰⵏⵖⴻⵏ,

ⵅⵎⵉ ⵜⵜⵡⴰⴽⴽⵙⴻⵏ ⵣⵉ ⵜⵓⴷⴰⵔⵜ ⵏⵙⴻⵏ

ⵅ ⵉⴼⴰⴷⴷⴻⵏ ⵏ ⵢⴻⵎⵎⴰⵜⵙⴻⵏ.

13 ⵎⵉⵎ. ⵎⵉⵏ ⴷ ⴰⵎ ⵉ ⵖⴰ ⵉⵏⵉⵖ,

ⵎⵉⵏ ⵖⴰⵔ ⵛⴻⵎ ⵉ ⵖⴰ ⵙⵙⴻⵎⵇⵓⴷⴷⵉⵖ,

ⴰ ⵢⴻⴵⵉⵙ ⵏ ⵓⵔⵛⴰⵍⵉⵎ?

ⵎⵉⵏ ⵖⴰⵔ ⵛⴻⵎ ⵉ ⵖⴰ ⵙⵙⴻⵎⵇⵓⴷⴷⵉⵖ,

ⴰⵍⴰⵎⵉ ⵛⴻⵎ ⵉ ⵖⴰ ⵙⵙⴼⴻⵡⵡⵊⴻⵖ,

ⴰ ⵛⴻⵎ ⵜⴰⵄⵣⴰⵔⴻⵛⵜ, ⵢⴻⴵⵉⵙ ⵏ ⵚⵉⵀⵢⵓⵏ,

ⵎⴰⵖⴰⵔ ⵜⴰⵔⴻⵥⵥⵉⵜ ⵏⵏⴻⵎ ⴷ ⵜⴰⵎⴻⵇⵇⵔⴰⵏⵜ ⴰⵎ ⵍⴻⴱⵃⴰⵔ,

ⵡⵉ ⵉⵣⴻⵎⵎⴰⵔⴻⵏ ⴰⴷ ⵛⴻⵎ ⵉⵙⵙⴳⴻⵏⴼⴰ?

14 ⵏⵓⵏ. ⵉⵏⴰⴱⵉⵢⵢⴻⵏ ⵏⵏⴻⵎ ⵥⵔⵉⵏ

ⵉⵡⴻⵃⵃⴰⵏ ⵉⵅⴰⵔⵔⵉⵇⴻⵏ ⴷ ⵉⴱⵓⵃⴰⵍⵉⵢⵢⴻⵏ,

ⵡⴰⵔ ⵙⵙⵄⴰⵔⵔⴰⵏ ⵛⴰ ⵅ ⵍⵎⵓⵄⵚⵉⵢⵢⴻⵜ ⵏⵏⴻⵎ

ⴰⵍⴰⵎⵉ ⵉ ⵖⴰ ⵙⵙⴻⵏⵇⴻⵍⴱⴻⵏ ⵜⴰⵎⴻⵃⴱⴰⵙⵜ ⵏⵏⴻⵎ.

ⴷⵉ ⵟⵟⵡⴻⵄ ⵏⵏⴻⵎ ⵥⵔⵉⵏ ⵏⵉⵜⵏⵉ

ⵎⵖⵉⵔ ⵍⴻⵃⴽⴰⵎⴰⵜ ⵉⵅⴰⵔⵔⵉⵇⴻⵏ ⴷ ⵜⵃⵓⵊⴰ ⵏ ⵓⵖⴰⵔⵔⵉ.

15 ⵙⴰⵎⵉⵅ. ⵎⴰⵔⵔⴰ ⵉⵏⵏⵉ ⵅⴰⵎ ⴷⴷ-ⵉⵜⵜⴻⴽⴽⴻⵏ

ⵛⵛⴰⵜⴻⵏ ⴷⴻⴳ ⵉⴼⴰⵙⵙⴻⵏ ⵙ ⵓⵏⴻⵅⵍⵉⵄ ⵣⵉ ⵙⵙⵉⴱⴱⴻⵜ ⵏⵏⴻⵎ.

ⵏⵉⵜⵏⵉ ⵜⵜⵚⴻⴼⴼⴰⵔⴻⵏ ⵓ ⵙⵙⴻⵏⵀⴻⵣⵣⴰⵏ ⴰⵣⴻⴵⵉⴼ ⵏⵙⴻⵏ

ⵅ ⵢⴻⴵⵉⵙ ⵏ ⵓⵔⵛⴰⵍⵉⵎ,

ⵇⵇⴰⵔⴻⵏ: ‘ⵎⴰ ⴷ ⵜⴰ ⴷ ⵜⴰⵏⴷⵉⵏⵜ ⵏⵏⵉ ⵓⵎⵉ ⵏⵏⴰⵏ:

“ⵎⴰ ⵡⴰⵔ ⵉⴵⵉ ⴰⵥⵔⵉ ⵏⵏⴻⵙ ⵉⴽⵎⴻⵍ,

ⴷ ⵍⵄⵓⵏⵚⴰⵔ ⵏ ⵍⴻⴼⵔⴰⵃⴻⵜ ⵉ ⵎⴰⵔⵔⴰ ⴷⴷⵓⵏⴻⵛⵜ!”?

16 ⴱⵉ ⵎⴰⵔⵔⴰ ⵍⵄⴻⴷⵢⴰⵏ ⵏⵏⴻⵎ ⴰⵔⴻⵣⵎⴻⵏ-ⴷⴷ ⵖⴰⵔⵡⴻⵎ

ⵉⵇⴻⵎⵎⵓⵎⴻⵏ ⵏⵙⴻⵏ,

ⵜⵜⵚⴻⴼⴼⴰⵔⴻⵏ ⵓ ⵜⵜⵖⴻⵣⵣⴰⵏ ⵜⵉⵖⵎⴰⵙ,

ⵇⵇⴰⵔⴻⵏ: “ⵏⴻⵛⵛⵉⵏ ⵏⵚⴰⵔⴹ ⵉ-ⵜⵜ.

ⵡⴰ ⴷ ⴰⵙⵙ ⵉ ⵜⵓⵖⴰ ⵏⴻⵜⵜⵔⴰⵊⴰ,

ⵍⴻⵅⵅⵓ ⵏⵓⴼⴰ ⵉ-ⵜ, ⵏⴻⵜⵜⵡⴰⵍⴰ ⵉ-ⵜ!”

17 ⵄⴰⵢⵉⵏ. ⵉⴳⴳⴰ ⵙⵉⴷⵉ ⵎⵉⵏ ⵉⵅⴰⵔⵔⴻⵚ,

ⵉⴽⴻⵎⵎⴻⵍ ⴰⵡⴰⵍ ⵏⵏⴻⵙ

ⵡⴻⵏⵏⵉ ⵢⵓⵎⵓⵔ ⵣⵉ ⵎⴻⵛⵃⴰⵍ ⵓⵢⴰ.

ⵉⵀⴷⴻⵎ ⵉ ⵛⴻⵎ, ⵡⴰⵔ ⵅⴰⵎ ⵉⵃⵉⵡⴻⵍ.

ⵍⴻⵄⴷⵓ ⵉⵊⵊⴰ ⵉ-ⵜ ⵉⴼⴰⵔⵃ ⵣⵣⴰⵢⴻⵎ,

ⵉⵙⵙⴳⴻⵄⵄⴻⴷ ⵉⵛⵛ ⵏ ⵉⵖⵔⵉⵎⴻⵏ ⵏⵏⴻⵎ.

18 ⵜⵙⴰⴷⵉ. ⵓⵍ ⵏⵙⴻⵏ ⵉⵙⵖⵓⵢⵢⵓ ⵖⴰⵔ ⵙⵉⴷⵉ ⵉⵏⵓ,

“ⴰ ⵍⵃⵉⴹ ⵏ ⵢⴻⴵⵉⵙ ⵏ ⵚⵉⵀⵢⵓⵏ,

ⴻⵊⵊ ⴰⴷ ⴰⵣⵣⵍⴻⵏ ⵉⵎⴻⵟⵟⴰⵡⴻⵏ ⵏⵏⴻⵎ ⴰⵎ ⵜⴻⵖⵣⴰⵔⵜ,

ⴰⵙⵙ ⴷ ⴵⵉⵍⴻⵜ ⴱⵍⴰ ⵎⴰ ⴰⴷ ⵏⴻⵇⵚⴻⵏ,

ⵡⴰⵔ ⵜⵜⴻⵊⵊⵉ ⵎⵓⵎⵎⵓ ⵏ ⵜⵉⵟⵟⴰⵡⵉⵏ ⵏⵏⴻⵎ ⴰⴷ ⵉⴱⴻⴷⴷ!” ◘2:18 ⵉⵔⵎ. 14:17; ⵉⴳⵊⴷ. 1:16

19 ⵇⵓⴼ. ⴽⴽⴰⵔ, ⵙⵖⵓⵢⵢ ⴷⵉ ⴵⵉⵍⴻⵜ,

ⵖⴰⵔ ⵓⵎⴻⵣⵡⴰⵔⵓ ⵏ ⵜⵄⴻⵙⵙⴰⵙⵜ ⵏ ⴵⵉⵍⴻⵜ,

ⵣⴻⴵⴻⵄ ⵓⵍ ⵏⵏⴻⵎ ⴰⵎ ⵡⴰⵎⴰⵏ

ⵣⵣⴰⵜ ⵉ ⵡⵓⴷⴻⵎ ⵏ ⵙⵉⴷⵉ ⵉⵏⵓ.

ⵙⴳⴻⵄⵄⴻⴷ ⵖⴰⵔⴻⵙ ⵉⴼⴰⵙⵙⴻⵏ ⵏⵏⴻⵎ

ⵉ ⵜⵓⴷⴰⵔⵜ ⵏ ⵉⵃⴻⵏⵊⵉⵔⴻⵏ ⵏⵏⴻⵎ ⵉⵎⴻⵥⵢⴰⵏⵉⵏ,

ⵉⵏⵏⵉ ⵉⵡⴹⴰⵏ ⵖⴰⵔ ⵜⴻⵎⵎⵓⵔⵜ ⵙ ⵍⴰⵥ,

ⵖⴰⵔ ⵜⵖⴻⵎⵎⴰⵔ ⵏ ⵎⴰⵔⵔⴰ ⵉⴱⵔⵉⴷⴻⵏ.

20 ⵔⵉⵅ. ⵅⵣⴰⵔ, ⴰ ⵙⵉⴷⵉ, ⵡⴰⵍⴰ ⵎⵍⵉⵃ

ⵓⵎⵉ ⵜⴻⴳⴳⵉⴷ ⵎⴰⵏ ⴰⵢⴰ?

ⵎⴰ ⵉⵜⵜⵅⴻⵚⵚⴰ ⵅⴻⵏⵏⵉ ⴰⴷ ⵛⵛⴻⵏⵜ ⵜⴻⵎⵖⴰⵔⵉⵏ

ⵍⵖⵉⴵⴻⵜ ⵏ ⵓⵄⴻⴷⴷⵉⵙ ⵏⵙⴻⵏⵜ,

ⵉⵃⴻⵏⵊⵉⵔⴻⵏ ⵏⵙⴻⵏⵜ ⵉ ⴷⵉ ⵜⵜⵀⵉⵍⵍⴰⵏⵜ ⵏⵉⵜⴻⵏⵜⵉ?

ⵎⴰ ⵉⵜⵜⵅⴻⵚⵚⴰ ⴰⴷ ⵉⵜⵜⵡⴰⵏⴻⵖ ⵓⵏⴰⴱⵉ ⴷ ⵓⴽⴻⵀⵀⴰⵏ

ⴷⵉ ⵣⵣⴰⵡⴻⵛⵜ ⵉⵇⴻⴷⴷⵙⴻⵏ ⵏ ⵙⵉⴷⵉ? ◘2:20 ⵉⴳⵊⴷ. 4:10

21 ⵛⵉⵏ. ⵉⵃⵓⴷⵔⵉⵢⵢⴻⵏ ⴷ ⵉⵡⴻⵙⵙⵓⵔⴰ ⴱⵓⵣⵣⵍⴻⵏ

ⵅ ⵜⴻⵎⵎⵓⵔⵜ ⴷⴻⴳ ⵉⴱⵔⵉⴷⴻⵏ.

ⵜⵉⵄⵣⴰⵔⵉⵢⵢⵉⵏ ⵉⵏⵓ ⴷ ⵉⵃⵓⴷⵔⵉⵢⵢⴻⵏ ⵉⵏⵓ ⵡⴹⴰⵏ ⵙ ⵙⵙⵉⴼ.

ⵜⴻⵏⵖⵉⴷ ⵜⴻⵏ ⴷⴻⴳ ⵡⴰⵙⵙ ⵏ ⵡⴻⵖⴹⴰⴱ ⵏⵏⴻⵛ,

ⵜⵖⴰⵔⵚⴻⴹ ⴰⵙⴻⵏ, ⵡⴰⵔ ⵅⴰⵙⴻⵏ ⵜⵃⵉⵡⵍⴻⴷ ⵛⴰ.

22 ⵜⴰⴼ. ⵜⵄⴰⵔⵔⵏⴻⴷ-ⴷⴷ ⵖⴰⵔⵉ ⵎⵉⵏ ⵉⵙⵙⴰⴳⴳⵯⴰⴷⴻⵏ

ⵣⵉ ⵎⴰⵔⵔⴰ ⵉⵖⴻⵣⴷⵉⵙⴻⵏ,

ⴰⵎ ⵎⴰⵎⵎⴻⵛ ⵉⴱⴰⵔⵔⴻⵃ ⵙ ⵉⵊⵊ ⵏ ⵓⵎⵓⵏⵉ ⵉⴼⴰⵔⵣⴻⵏ.

ⵡⴰⵔ ⵉⵏⴻⵊⵊⵉⵎ ⵏⵉⵖ ⵉⵜⵜⴰⵔⴻⴽⴽⵡⴰⵍ ⵓⵍⴰ ⴷ ⵉⵊⵊ

ⴷⴻⴳ ⵡⴰⵙⵙ ⵏ ⵡⴻⵖⴹⴰⴱ ⵏ ⵙⵉⴷⵉ.

ⵉⵏⵏⵉ ⵉ ⴷⵉ ⵜⵜⵀⵉⵍⵍⵉⵖ ⵓ ⴰⵔⴻⴱⴱⵉⵖ

ⵉⵇⴹⴰ ⵉ-ⵜⴻⵏ ⵍⴻⵄⴷⵓ ⵉⵏⵓ.