4
ⵜⴰⴳⴻⵍⴷⵉⵜ ⵉ ⴷⴷ ⵖⴰ ⵢⴰⵙⴻⵏ ⵣⵉ ⵚⵉⵀⵢⵓⵏ
1 “ⴷⴻⴳ ⵓⵏⴻⴳⴳⴰⵔ ⵏ ⵡⵓⵙⵙⴰⵏ ⴰⴷ ⵉⵎⵙⴰⵔ,
ⴰⵇⴰ ⴰⴷⵔⴰⵔ ⵏ ⵜⴰⴷⴷⴰⵔⵜ ⵏ ⵙⵉⴷⵉ
ⴰⴷ ⵉⴱⴻⴷⴷ ⵉⵎⵜⴻⵏ
ⵅ ⵜⵇⵉⵛⵛⴻⵜ ⵏ ⵉⴷⵓⵔⴰⵔ.
ⴰⴷ ⵢⵉⵍⵉ ⵢⵓⵄⵍⴰ ⵅ ⵜⴻⵡⵔⵉⵔⵉⵏ,
ⵓⵛⴰ ⵍⴻⴳⵏⵓⵙ ⴰⴷ ⵖⴰⵔⴻⵙ ⴷⴷ-ⴰⵣⵣⵍⴻⵏ. ◘4:1 ⵉⵛⴰ. 2:2-5
2 ⴰⵟⵟⴰⵙ ⵏ ⵍⴻⴳⵏⵓⵙ ⴰⴷ ⴳⴻⵄⵄⴷⴻⵏ, ⴰⴷ ⵉⵏⵉⵏ:
“ⵊⵊⴻⵎ ⴰⵏⴻⵖ ⴰⴷ ⵏⴳⴻⵄⵄⴻⴷ
ⵖⴰⵔ ⵡⴻⴷⵔⴰⵔ ⵏ ⵙⵉⴷⵉ
ⵓ ⵖⴰⵔ ⵜⴰⴷⴷⴰⵔⵜ ⵏ ⴰⵔⴻⴱⴱⵉ ⵏ ⵢⴰⵄⵇⵓⴱ,
ⵃⵉⵎⴰ ⴰⴷ ⴰⵏⴻⵖ ⵉⵙⵙⴻⵍⵎⴻⴷ
ⵣⴻⴳ ⵉⴱⵔⵉⴷⴻⵏ ⵏⵏⴻⵙ,
ⴰⴷ ⵏⵓⵢⵓⵔ ⵏⴻⵛⵛⵉⵏ ⴷⴻⴳ ⵉⵎⴻⵙⵔⴰⵇ ⵏⵏⴻⵙ,
ⵎⵉⵏⵣⵉ ⵣⵉ ⵚⵉⵀⵢⵓⵏ ⴰⴷ ⴷⴷ-ⵜⴻⴼⴼⴻⵖ ⵛⵛⴰⵔⵉⵄⴰ
ⵓ ⴰⵡⴰⵍ ⵏ ⵙⵉⴷⵉ ⵣⵉ ⵓⵔⵛⴰⵍⵉⵎ.
3 ⵏⴻⵜⵜⴰ ⴰⴷ ⵉⵛⴰⵔⵔⴻⵄ ⵊⴰⵔ ⵍⴻⴳⵏⵓⵙ ⵉⵎⵖⴰⵔⴻⵏ
ⵓ ⴰⴷ ⵉⵙⴻⴳⴳⴻⵎ ⵍⴻⴳⵏⵓⵙ
ⵏⵏⵉ ⵖⴰⵔ ⵉⴵⴰ ⵜⵉⵣⴻⵎⵎⴰⵔ ⵜⵉⵎⴻⵇⵇⵔⴰⵏⵉⵏ,
ⵄⴰⴷ ⵓⵍⴰ ⴷ ⵍⴻⴳⵏⵓⵙ ⵉⴳⴳⵯⴻⵊⴻⵏ.
ⵏⵉⵜⵏⵉ ⴰⴷ ⴳⴳⴻⵏ ⵍⴻⵙⵢⵓⴼ ⵏⵙⴻⵏ ⴷ ⴷⴷⵓⵣⴰⵏ
ⵓ ⴼⵍⵉⵜⵛⴰⵜ ⵏⵙⴻⵏ ⴷ ⵍⴻⵎⵡⴰⵙ ⵏ ⵡⴻⵣⴱⴰⵔ.
ⵡⴰⵔ ⵉⵙⵙⴳⵉⵄⵄⵉⴷ ⵓⵍⴰ ⴷ ⵉⵊⵊ ⵏ ⵍⴳⴻⵏⵙ
ⵄⴰⴷ ⵙⵙⵉⴼ ⵅ ⵡⴻⵏⵏⴻⵖⵏⵉ,
ⵓ ⵏⵉⵜⵏⵉ ⵡⴰⵔ ⵍⴻⵎⵎⴷⴻⵏ ⵄⴰⴷ ⴰⵎⴻⵏⵖⵉ.
4 ⵏⵉⵜⵏⵉ ⴰⴷ ⵇⵇⵉⵎⴻⵏ,
ⴽⵓⵍ ⵉⵊⵊ ⵙⴰⴷⵓ ⵜⵣⴰⵢⴰⵔⵜ ⵏⵏⴻⵙ
ⵓ ⵙⴰⴷⵓ ⵡⴰⵔⵜⵓ ⵏ ⵜⴰⵣⴰⵔⵜ ⵏⵏⴻⵙ,
ⵓⵛⴰ ⵓⵍⴰ ⴷ ⵉⵊⵊⴻⵏ ⴰⴷ ⵜⴻⵏ ⵉⵙⵙⵏⴻⵅⵍⴻⵄ,
ⵎⴰⵖⴰⵔ ⴰⵇⴻⵎⵎⵓⵎ ⵏ ⵙⵉⴷⵉ ⵏ ⵍⵄⴻⵙⴽⴰⵔⴰⵜ
ⴰⵇⴰ ⵉⵏⵏⴰ ⵜ.” ◘4:4 1 ⵉⵊ. 5:5, ⵣⴰⴽ. 3:10
5 “ⵎⵉⵏⵣⵉ ⵎⴰⵔⵔⴰ ⵍⴻⴳⵏⵓⵙ ⴰⴷ ⵓⵢⵓⵔⴻⵏ,
ⴽⵓⵍ ⵉⵊⵊ ⵣⵣⴰⵢⵙⴻⵏ ⴷⴻⴳ ⵢⵉⵙⴻⵎ ⵏ ⴰⵔⴻⴱⴱⵉ ⵏⵏⴻⵙ,
ⵎⴰⵛⴰ ⵏⴻⵛⵛⵉⵏ ⴰⴷ ⵏⵓⵢⵓⵔ ⴷⴻⴳ ⵢⵉⵙⴻⵎ ⵏ ⵙⵉⴷⵉ,
ⴰⵔⴻⴱⴱⵉ ⵏⵏⴻⵖ,
ⵉ ⵍⴻⴱⴷⴰ ⵇⴰⵄ.”
ⵙⵉⴷⵉ ⴰⴷ ⵉⵙⵙⴻⵏⵊⴻⵎ ⵚⵉⵀⵢⵓⵏ
6 “ⴷⴻⴳ ⵡⴰⵙⵙ ⵏⵏⵉ, ⵉⵇⵇⴰⵔ ⵙⵉⴷⵉ,
ⵏⴻⵛⵛ ⴰⴷ ⵢⴰⵔⵡⴻⵖ ⵎⵉⵏ ⵉⵇⴻⵊⴷⵃⴻⵏ,
ⵓ ⴰⴷ ⵖⴰⵔⵉ ⵙⵙⵎⵓⵏⴻⵖ ⵎⵉⵏ ⵅ ⵓⵣⵣⵍⴻⵏ,
ⵓ ⵡⵉ ⴷⵉ ⴳⴳⵉⵖ ⵏⴻⵛⵛ ⵍⵖⴰⵔ. ◘4:6 ⴰⵄⵡⴷ. 30:3, 4, 5
7 ⵎⵉⵏ ⵉⵇⴻⵊⴷⵃⴻⵏ ⴰⴷ ⵜ ⴳⴳⴻⵖ ⴷ ⵍⴱⴰⵇⵉ,
ⵓⵍⴰ ⵎⵉⵏ ⵉⵜⵜⵡⴰⵄⴰⵔⵔⵏⴻⵏ ⵖⴰⵔ ⵍⴰⴳⴳⵯⴰⵊ,
ⴰⴷ ⵜ ⴳⴳⴻⵖ ⴷ ⵉⵊⵊ ⵏ ⵍⴳⴻⵏⵙ
ⵙ ⵜⵣⴻⵎⵎⴰⵔ ⴷ ⵜⴰⵎⴻⵇⵇⵔⴰⵏⵜ,
ⵓⵛⴰ ⵙⵉⴷⵉ ⴰⴷ ⵅⴰⵙⴻⵏ ⵢⵉⵍⵉ ⴷ ⴰⵊⴻⴵⵉⴷ
ⵅ ⵡⴻⴷⵔⴰⵔ ⵏ ⵚⵉⵀⵢⵓⵏ,
ⵣⵉ ⵍⴻⵅⵅⵓ ⴰⵍ ⵍⴻⴱⴷⴰ. ◘4:7 ⴷⴰⵏ. 7:14; ⵚⴰⴼ. 3:19; ⵍⴽ. 1:33
8 ⵉ ⵛⴻⵎ, ⵎⵉⴳⴷⴰⵍ-ⵄⵉⴷⵔ,
ⴰ ⵛⴻⵎ, ⵜⴰⵡⵔⵉⵔⵜ ⵏ ⵢⴻⴵⵉⵙ ⵏ ⵚⵉⵀⵢⵓⵏ!
ⴰⴷ ⵖⴰⵔⴻⵎ ⴷⴷ-ⵜⴰⵙ,
ⵡⴰⵀ, ⴰⴷ ⵖⴰⵔⴻⵎ ⴷⴷ-ⵜⴰⵙ ⵍⴻⵃⴽⴰⵎⴻⵜ
ⵜⴻⵏⵏⵉ ⵉ ⵜⵓⵖⴰ ⵉⴵⴰⵏ ⴷⴻⴳ ⵓⵎⴻⵣⵡⴰⵔⵓ,
ⵜⴰⴳⴻⵍⴷⵉⵜ ⵏ ⵢⴻⴵⵉⵙ ⵏ ⵓⵔⵛⴰⵍⵉⵎ.”
9 “ⵍⴻⵅⵅⵓ ⵎⴰⵛⴰ,
ⵎⴰⵢⴻⵎⵎⵉ ⵜⴻⵙⵖⵓⵢⵢⵓⴷ ⴰⵎⵎⵓ ⵙ ⵊⵊⴻⵀⴷ?
ⵎⴰ ⵡⴰⵔ ⵖⴰⵔⴻⵎ ⵉⴵⵉ ⵓⵊⴻⴵⵉⴷ?
ⵎⴰ ⵉⵜⵜⵡⴰⵀⴻⵍⵍⴻⴽ ⵓⵎⵛⴰⵡⴰⵔ ⵏⵏⴻⵎ,
ⴰⵇⴰ ⵉⵟⵟⴻⴼ ⵉ ⵛⴻⵎ ⵍⴻⵃⵔⵉⵇ
ⴰⵎ ⵏ ⵢⵉⵛⵜ ⵏ ⵜⴻⵎⵖⴰⵔⵜ ⵉⵜⵜⴰⵔⵡⴻⵏ? ◘4:9 ⵉⵔⵎ. 8:19
10 ⵖⵏⴻⵙ ⵓ ⵜⵄⴻⴱⴱⵣⴻⴷ,
ⴰ ⵛⴻⵎ, ⵢⴻⴵⵉⵙ ⵏ ⵚⵉⵀⵢⵓⵏ,
ⴰⵎ ⵉⵛⵜ ⵏ ⵜⴻⵎⵖⴰⵔⵜ ⵉⵜⵜⴰⵔⵡⴻⵏ.
ⵎⴰⵖⴰⵔ ⵡⴰⵅⵅⴰ ⵍⴻⵅⵅⵓ
ⴰⴷ ⵜⴻⴼⴼⵖⴻⴷ ⵣⵉ ⵜⴻⵏⴷⵉⵏⵜ,
ⴰⴷ ⵜⵣⴻⴷⵖⴻⴷ ⴷⴻⴳ ⵉⵢⵢⴰⵔ,
ⵓⵛⴰ ⴰⴷ ⴷⴷ-ⵜⴰⵙⴻⴷ ⴰⵍ ⴱⴰⴱⵉⵍ.
ⵎⴰⵛⴰ ⴷⵉⵏ ⴰⴷ ⵜⵏⴻⵊⵎⴻⴷ,
ⴷⵉⵏⵏⵉ ⴰⴷ ⵛⴻⵎ ⵉⴼⴻⴽⴽ ⵙⵉⴷⵉ
ⵣⴻⴳ ⵓⴼⵓⵙ ⵏ ⵍⵄⴻⴷⵢⴰⵏ ⵏⵏⴻⵎ.”
11 ⵍⴻⵅⵅⵓ ⵎⴰⵛⴰ ⵎⵓⵏⴻⵏ ⵅⴰⴽ
ⴰⵟⵟⴰⵙ ⵏ ⵍⴻⴳⵏⵓⵙ.
ⵏⵉⵜⵏⵉ ⵇⵇⴰⵔⴻⵏ: ‘ⵏⴻⵜⵜⴰⵜ ⴰⴷ ⵜᵉⵜⵜⵡⴰⵄⴰⵔⵔⴰ!’
ⵜⵉⵟⵟⴰⵡⵉⵏ ⵏⵏⴻⵖ ⴰⴷ ⵥⴰⵔⴻⵏⵜ ⵚⵉⵀⵢⵓⵏ.
12 ⵏⵉⵜⵏⵉ ⵡⴰⵔ ⵙⵙⵉⵏⴻⵏ ⵉⵏⵡⴰⵢⴻⵏ ⵏ ⵙⵉⴷⵉ,
ⵓ ⵡⴰⵔ ⴼⴻⵀⵀⵎⴻⵏ ⵛⴰ ⵛⵛⵡⴰⵔ ⵏⵏⴻⵙ!
ⵎⴰⵖⴰⵔ ⵏⴻⵜⵜⴰ ⵉⴽⵙⵉ ⵜⴻⵏ ⵖⴰⵔⴻⵙ
ⴰⵎ ⵜⵇⴻⴱⴱⵉⴹⵉⵏ ⵏ ⵉⵎⴻⵏⴷⵉ ⴷⴻⴳ ⵓⵏⴻⴷⵔⴰⵔ.” ◘4:12 ⵉⵔⵎ. 51:33
13 “ⴽⴽⴰⵔ, ⵜⴻⵙⵙⴰⵔⴻⵡⵜⴻⴷ,
ⴰ ⵛⴻⵎ, ⵢⴻⴵⵉⵙ ⵏ ⵚⵉⵀⵢⵓⵏ,
ⵎⴰⵖⴰⵔ ⵏⴻⵛⵛ ⴰⴷ ⴰⵔⵔⴻⵖ
ⵢⵉⵛⵛ ⵏⵏⴻⵎ ⴷ ⵓⵣⵣⴰⵍ,
ⵓ ⴰⴷ ⴰⵎ ⴳⴳⴻⵖ ⵜⵉⵛⴻⴹⵢⵉⵏ ⵏⵏⴻⵎ ⵣⵉ ⵏⵏⵃⴰⵙ,
ⵓ ⵛⴻⵎ ⴰⴷ ⵜⵍⴻⴱⵣⴻⴷ ⴰⵟⵟⴰⵙ ⵏ ⵍⴻⴳⵏⵓⵙ
ⵓ ⵏⴻⵛⵛ ⴰⴷ ⵃⴰⵔⵔⵎⴻⵖ
ⵜⴰⴽⴻⵛⵛⴰⴹⵜ ⵏⵙⴻⵏ ⵎⴰⵔⵔⴰ ⵉ ⵙⵉⴷⵉ,
ⵓⵍⴰ ⴷ ⴰⴳⵍⴰ ⵏⵙⴻⵏ ⵉ ⵙⵉⴷⵉ ⵏ ⵎⴰⵔⵔⴰ ⵜⴰⵎⵎⵓⵔⵜ. ◘4:13 ⵣⴰⴽ. 4:14; 6:5
14 ⵅⴻⵏⵏⵉ ⵍⴻⵅⵅⵓ, ⵍⴻⵃⵎⴻⵎ
ⵉⵊⵊⴻⵏ ⵖⴰⵔ ⵡⴻⵏⵏⴻⵖⵏⵉ,
ⴰ ⵛⴻⵎ ⵢⴻⴵⵉⵙ
ⵏ ⵉⵛⵜ ⵏ ⴱⴰⵏⴷⵉⵢⵢⴰ ⵏ ⵉⵅⴻⵡⵡⴰⵏⴻⵏ!
ⵏⴻⵜⵜⴰ ⵉⵃⴻⵚⵚⴰⵔ ⴰⵏⴻⵖ.
ⵏⵉⵜⵏⵉ ⴰⴷ ⵛⵛⴰⵜⴻⵏ ⵍⵇⴰⴹⵉ ⵏ ⵉⵙⵔⴰⵉⵍ
ⵅ ⵓⵇⴰⴱⵙⵉ ⵙ ⵉⵊⵊ ⵏ ⵡⴻⵄⵎⵓⴷ.”
◘4:1 4:1 ⵉⵛⴰ. 2:2-5
◘4:4 4:4 1 ⵉⵊ. 5:5, ⵣⴰⴽ. 3:10
◘4:6 4:6 ⴰⵄⵡⴷ. 30:3, 4, 5
◘4:7 4:7 ⴷⴰⵏ. 7:14; ⵚⴰⴼ. 3:19; ⵍⴽ. 1:33
◘4:12 4:12 ⵉⵔⵎ. 51:33