1 ⴰⵡⴰⵔⵏⵉ ⴰⵙ ⵉⵙⵙⵛⴻⵏ ⴰⵢⵉ ⵢⴰⵀⵓⵛⴰⵄ, ⴰⵔⵔⴰⵢⵙ ⵏ ⵉⴽⴻⵀⵀⴰⵏⴻⵏ. ⵏⴻⵜⵜⴰ ⵜⵓⵖⴰ ⵉⴱⴻⴷⴷ ⵣⵣⴰⵜ ⵉ ⵡⵓⴷⴻⵎ ⵏ ⵍⵎⴰⵍⴰⴽ ⵏ ⵙⵉⴷⵉ. ⵛⵛⵉⵟⴰⵏ ⵉⴱⴻⴷⴷ-ⴷⴷ ⵖⴰⵔ ⵓⴼⵓⵙ ⴰⴼⵓⵙⵉ ⵏ ⵢⴰⵛⵓⵄⴰ ⵃⵉⵎⴰ ⴰⴷ ⵣⵣⴰⵢⴻⵙ ⵉⵙⵙⵛⴻⵜⵛⴰ. 2 ⵙⵉⴷⵉ ⵉⵏⵏⴰ ⵉ ⵛⵛⵉⵟⴰⵏ: “ⴰⴷ ⵢⵉⵍⵉ ⴰⴷ ⵛⴻⴽ ⵉⵄⴰⵇⴻⴱ ⵙⵉⴷⵉ, ⴰ ⵛⵛⵉⵟⴰⵏ! ⴰⴷ ⵛⴻⴽ ⵉⵄⴰⵇⴻⴱ ⵙⵉⴷⵉ, ⵡⴻⵏⵏⵉ ⵉⴼⴰⵔⵣⴻⵏ ⵓⵔⵛⴰⵍⵉⵎ! ⵎⴰ ⵡⴰⵔ ⵉⴵⵉ ⵢⴰⵀⵓⵛⴰⵄ ⵡⴰⵏⵉⵜⴰ ⴷ ⵉⵊⵊ ⵏ ⵓⴽⴻⵛⵛⵓⴹ ⵇⴻⵍⵄⴻⵏ ⵜ-ⴷⴷ ⵣⵉ ⵜⵎⴻⵙⵙⵉ?” ◘3:2 ⵢⴰⵀ. 9 3 ⵢⴰⵀⵓⵛⴰⵄ ⵜⵓⵖⴰ ⵢⴰⵔⴹ ⴰⵔⵔⵓⴹ ⵉⵡⴻⵙⵙⵅⴻⵏ ⴰⵎ ⵉⴱⴻⴷⴷ ⵣⵣⴰⵜ ⵉ ⵡⵓⴷⴻⵎ ⵏ ⵍⵎⴰⵍⴰⴽ.

4 ⵅⴻⵏⵏⵉ ⵉⵟⵟⴻⴼ ⵏⴻⵜⵜⴰ ⴷⴻⴳ ⵡⴰⵡⴰⵍ ⵓⵛⴰ ⵉⵙⵙⵉⵡⴻⵍ ⴰⴽ-ⴷ ⵢⵉⵏⵏⵉ ⵉⴱⴻⴷⴷⴻⵏ ⵣⵣⴰⵜ ⵉ ⵡⵓⴷⴻⵎ ⵏⵏⴻⵙ, ⵉⵏⵏⴰ: “ⴽⴽⵙⴻⵎ ⴰⵙ ⴰⵔⵔⵓⴹ ⵉⵡⴻⵙⵙⵅⴻⵏ ⵉ ⵡⴰⵏⵉⵜⴰ!” ⵅⴻⵏⵏⵉ ⵉⵏⵏⴰ ⴰⵙ: “ⵅⵣⴰⵔ, ⵏⴻⵛⵛ ⴽⴽⵙⴻⵖ ⵣⵣⴰⵢⴻⴽ ⵍⵎⵓⵄⵚⵉⵢⵢⴻⵜ ⵏⵏⴻⵛ ⵓ ⴰⴷ ⵛⴻⴽ ⵙⵙⵢⴰⵔⴹⴻⵖ ⵙ ⵉⵊⵊ ⵏ ⵡⴰⵔⵔⵓⴹ ⵉⵛⵓⵡⵡⴰⵔⴻⵏ.” ◘3:4 ⵎⵉⵅⴰ 7:18 5 ⵏⴻⵛⵛ ⵏⵏⵉⵖ: “ⴰⴷ ⴰⵙ ⵇⵇⵏⴻⵏ ⵉⵛⵜ ⵏ ⴰⵔⴻⵥⵥⴻⵜ ⵜⴰⵎⴻⵣⴷⴰⴳⵜ ⵅ ⵓⵣⴻⴵⵉⴼ ⵏⵏⴻⵙ!” ⵓ ⵏⵉⵜⵏⵉ ⵇⵇⵏⴻⵏ ⴰⵙ ⴰⵔⴻⵥⵥⴻⵜ ⵜⴰⵎⴻⵣⴷⴰⴳⵜ ⵅ ⵓⵣⴻⴵⵉⴼ ⵏⵏⴻⵙ ⵓⵛⴰ ⵙⵙⵢⴰⵔⴹⴻⵏ ⴰⵙ ⴰⵔⵔⵓⴹ ⵉⵛⵓⵡⵡⴰⵔⴻⵏ, ⴰⵎ ⵜⵓⵖⴰ ⵍⵎⴰⵍⴰⴽ ⵏ ⵙⵉⴷⵉ ⵉⴱⴻⴷⴷ ⴷⵉⵏ 6 ⵅⴰⵙ ⵓⵛⴰ ⵉⵛⵀⴻⴷ ⵍⵎⴰⵍⴰⴽ ⵏ ⵙⵉⴷⵉ ⵉ ⵢⴰⵀⵓⵛⴰⵄ, ⵉⵏⵏⴰ:

7 “ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ:

‘ⵎⴰⵍⴰ ⵛⴻⴽ ⵜⵓⵢⵓⵔⴻⴷ ⵅ ⵉⴱⵔⵉⴷⴻⵏ ⵉⵏⵓ,

ⵓ ⵎⴰⵍⴰ ⵛⴻⴽ ⴰⴷ ⵜⴻⵃⴹⵉⴷ ⵜⴰⵙⴻⵅⵅⴰⵔⵜ ⵉⵏⵓ,

ⵅⴻⵏⵏⵉ ⴰⴷ ⵜⴻⵙⵙⵓⵢⵓⵔⴻⴷ

ⵓⵍⴰ ⴷ ⵜⴰⴷⴷⴰⵔⵜ ⵉⵏⵓ ⵙ ⵍⵃⴻⵇⵇ

ⵓ ⴰⴷ ⵜⵉⵍⵉⴷ ⴷ ⴰⵎⴻⵃⴹⴰⵢ ⵏ ⵍⴻⵎⵔⴰⵃⴰⵜ ⵉⵏⵓ,

ⵓ ⵏⴻⵛⵛ ⴰⴷ ⴰⵛ ⵡⵛⴻⵖ

ⴰⴷ ⵜⵣⴻⵎⵎⴰⵔⴻⴷ ⴰⴷ ⵜⵔⴰⵃⴻⴷ ⴰⴷ ⵜⴰⴷⴼⴻⴷ

ⵊⴰⵔ ⵉⵏⵏⵉ ⴷⴰ ⵉⴱⴻⴷⴷⴻⵏ.

8 ⵅⴻⵏⵏⵉ ⵙⴻⵍ, ⵢⴰⵀⵓⵛⴰⵄ,

ⵛⴻⴽ, ⴰⵔⵔⴰⵢⵙ ⵏ ⵉⴽⴻⵀⵀⴰⵏⴻⵏ,

ⵛⴻⴽ ⴷ ⵉⵎⴻⴷⴷⵓⴽⴽⴰⵍ ⵏⵏⴻⵛ,

ⵉⵏⵏⵉ ⵉⵇⵇⵉⵎⴻⵏ ⵣⵣⴰⵜⴻⴽ,

ⵎⴰⵖⴰⵔ ⵏⵉⵜⵏⵉ ⴷ ⵉⵛⵜ ⵏ ⵍⴻⵄⵍⴰⵎⴻⵜ ⵏ ⵓⵜⴻⴱⵀⴻⵜ,

ⵎⴰⵖⴰⵔ ⵅⵣⴰⵔ, ⵏⴻⵛⵛ ⴰⴷ ⴷⴷ-ⴰⵡⵢⴻⵖ

ⴰⵎⵙⴻⵅⵅⴰⵔ ⵉⵏⵓ, ‘ⴰⵖⴻⴷⴷⵓ’. ◘3:8 ⵉⵛⴰ. 4:2; 11:1; ⵉⵔⵎ. 23:5; 33:15; ⵣⴰⴽ. 6:12

9 ⵎⴰⵖⴰⵔ ⵅⵣⴰⵔ, ⴰⵥⵔⵓ,

ⵡⴻⵏⵏⵉ ⴷⵉⵏ ⵙⵙⴰⵔⵙⴻⵖ ⵣⵣⴰⵜ ⵉ ⵢⴰⵀⵓⵛⴰⵄ,

ⵅ ⵡⴻⵥⵍⵓ ⵏⵏⵉ ⵅⴻⵣⵣⴰⵔⴻⵏⵜ ⵙⴻⴱⵄⴰ ⵏ ⵜⵉⵟⵟⴰⵡⵉⵏ.

ⵅⵣⴰⵔ, ⵏⴻⵛⵛ ⴰⴷ ⴷⴰⵢⴻⵙ ⵏⴻⵇⵛⴻⵖ

ⵜⴰⵏⴻⵇⵇⴰⵛⵜ ⵏⵏⴻⵙ,

ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ,

ⵓ ⵏⴻⵛⵛ ⴰⴷ ⴽⴽⵙⴻⵖ

ⵍⵎⵓⵄⵚⵉⵢⵢⴻⵜ ⵏ ⵜⴻⵎⵎⵓⵔⵜ-ⴰ

ⴷⴻⴳ ⵉⵊⵊ ⵏ ⵡⴰⵙⵙ!

10 ⴷⴻⴳ ⵡⴰⵙⵙ ⵏⵏⵉ, ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ,

ⴰⴷ ⵜⵄⴰⵔⴹⴻⵎ ⵉⵊⵊ ⵉ ⵡⴻⵏⵏⴻⵖⵏⵉ

ⵙⴰⴷⵓ ⵜⵣⴰⵢⴰⵔⵜ ⵓ ⵙⴰⴷⵓ ⵡⴰⵔⵜⵓ.’ ”