1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⴰⵣⴻⵀⵀⴻⴷ ⵏ ⴷⴰⵡⵓⴷ.

2 ⴰ ⵙⵉⴷⵉ, ⴰⵊⴻⴵⵉⴷ ⵉⴼⴰⵔⵃ ⵙ ⵊⵊⴻⵀⴷ ⵏⵏⴻⵛ,

ⵎⴰⵎⵎⴻⵛ ⵉⴼⴰⵔⵃ ⴰⵟⵟⴰⵙ ⵙ ⵓⵙⴻⵏⵊⴻⵎ ⵏⵏⴻⵛ!

3 ⵜⴻⵡⵛⵉⴷ ⴰⵙ ⵎⴻⵥⵔⵉ ⵏ ⵡⵓⵍ ⵏⵏⴻⵙ,

ⵛⴻⴽ ⵡⴰⵔ ⵜⵓⴳⵉⴷ ⵛⴰ

ⴰⵣⴰⵡⴻⴳ ⵏ ⵉⵢⴻⵏⵛⵉⵛⴻⵏ ⵏⵏⴻⵙ. ⵙⵉⵍⴰⵀ.

4 ⵎⴰⵖⴰⵔ ⵛⴻⴽ ⵜⵓⵙⵉⴷ-ⴷⴷ ⵉ ⵓⵎⵙⴰⴳⴰⵔ ⴰⴽⵉⴷⴻⵙ

ⵙ ⵍⴱⴰⵔⴰⴽⴰⵜ ⵛⵛⵓⵔⴻⵏⵜ ⵙ ⵍⵅⴰⵔ,

ⵜⴻⵇⵇⵏⴻⴷ ⴰⵙ ⵜⵜⴰⵊ ⵏ ⵡⵓⵔⴻⵖ ⵉⵜⵜⵡⴰⵚⴻⴼⴼⴰⵏ

ⵅ ⵓⵣⴻⴵⵉⴼ ⵏⵏⴻⵙ.

5 ⵉⵜⵜⴰⵔ ⴰⵛ ⵜⵓⴷⴰⵔⵜ,

ⵜⴻⵡⵛⵉⴷ ⴰⵙ ⵜⵜ,

ⵜⵓⵣⵣⴻⴳⴳⴰⵔⵜ ⵏ ⵡⵓⵙⵙⴰⵏ ⵉ ⵍⴻⴱⴷⴰ ⵇⴰⵄ.

6 ⵉⵎⵖⴰⵔ ⵓⵄⵓⴵⵉ ⵏⵏⴻⵙ ⵙ ⵓⵙⴻⵏⵊⴻⵎ ⵏⵏⴻⵛ,

ⵜⴻⵙⵙⵣⴻⵀⵀⵊⴻⴷ ⵜ ⵙ ⵜⵉⵙⵙⵉⵇⵜ ⴷ ⵍⵄⴻⵣⵣ. ◼21:6 ⴰⵙⴻⵏⵊⴻⵎ-ⵏⵉⵖ ‘ⴰⵙⴻⵍⵍⴻⴽ’.

7 ⵎⵉⵏⵣⵉ ⵛⴻⴽ ⵜⴰⵔⵔⵉⴷ ⵉ-ⵜ

ⴷ ⵍⴱⴰⵔⴰⴽⴰ ⵜⴰⵎⴻⵇⵇⵔⴰⵏⵜ ⵉ ⵍⴻⴱⴷⴰ,

ⵛⴻⴽ ⵜⴻⵛⵛⵓⵔⴻⴷ ⵜ ⵙ ⵍⴻⴼⵔⴰⵃⴻⵜ

ⵖⴰⵔ ⵡⵓⴷⴻⵎ ⵏⵏⴻⵛ.

8 ⵎⴰⵖⴰⵔ ⴰⵊⴻⴵⵉⴷ ⵉⵜⵜⵛⴰⵍ ⵅ ⵙⵉⴷⵉ,

ⵡⴰⵔ ⵉⵜⵜⴻⴼⵔⵉⵖ ⵙ ⵜⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ

ⵏ ⵓⵎⵄⵓⴵⵉ ⵅ ⴽⵓⵍⵛⵉ.

9 ⴰⴼⵓⵙ ⵏⵏⴻⵛ ⴰⴷ ⵢⴰⴼ ⵎⴰⵔⵔⴰ ⵍⵄⴻⴷⵢⴰⵏ ⵏⵏⴻⵛ,

ⴰⴼⵓⵙ ⴰⴼⵓⵙⵉ ⵏⵏⴻⵛ ⴰⴷ ⵢⴰⴼ

ⵎⴰⵔⵔⴰ ⵉⵏⵏⵉ ⵛⴻⴽ ⵉⵛⴰⵔⵔⵀⴻⵏ.

10 ⵛⴻⴽ ⴰⴷ ⵜⴻⵏ ⵜⴰⵔⵔⵉⴷ ⴰⵎ ⵜⴻⴼⵇⵓⵏⵜ ⵉⵛⴻⵎⵎⴹⴻⵏ

ⴷⵉ ⵍⵡⴻⵇⵜ ⵏ ⵡⴻⴹⵃⴰⵔ ⵏⵏⴻⵛ,

ⵙⵉⴷⵉ ⴰⴷ ⵜⴻⵏ ⵉⵙⴰⵔⴹ ⵙ ⵡⴻⵖⴹⴰⴱ ⵏⵏⴻⵙ,

ⵜⵉⵎⴻⵙⵙⵉ ⴰⴷ ⵜⴻⵏ ⵜⴻⵛⵛ.

11 ⴰⴷ ⵜⴻⵎⵃⵉⴷ ⵍⵖⵉⴵⴻⵜ ⵏⵙⴻⵏ ⵣⵉ ⵜⴻⵎⵎⵓⵔⵜ,

ⵣⵣⴰⵔⵉⵄⴻⵜ ⵏⵙⴻⵏ ⵣⵉ ⵜⴰⵔⵡⴰ ⵏ ⴱⵏⴰⴷⴻⵎ.

12 ⵎⴰⵖⴰⵔ ⵏⵉⵜⵏⵉ ⵏⴻⴷⵢⴻⵏ ⴰⵛ ⵍⵖⴰⵔ,

ⴳⴳⵉⵏ ⵉⵛⵜ ⵏ ⵜⵎⴻⵄⵎⵓⵍⵜ,

ⵎⴰⵛⴰ ⵡⴰⵔ ⵣⴻⵎⵎⴰⵔⴻⵏ ⵡⴰⵍⵓ.

13 ⵎⴰⵖⴰⵔ ⵛⴻⴽ ⴰⴷ ⵜⴻⵏ ⵜⴻⴳⴳⴻⴷ ⵊⴰⵔ ⵜⵉⵟⵟⴰⵡⵉⵏ,

ⵙ ⵉⴼⵉⵍⴰⵏ ⵏ ⵍⵇⴻⵡⵙ ⵏⵏⴻⵛ ⴰⴷ ⵜⵏⴻⵢⵢⵛⴻⴷ

ⵅ ⵡⵓⴷⵎⴰⵡⴻⵏ ⵏⵙⴻⵏ.

14 ⵙⴳⴻⵄⵄⴻⴷ ⵉⵅⴻⴼ ⵏⵏⴻⵛ, ⴰ ⵙⵉⴷⵉ, ⵙ ⵊⵊⵀⴻⴷ ⵏⵏⴻⵛ!

ⴻⵊⵊ ⴰⵏⴻⵖ ⴰⴷ ⵏⵖⴻⵏⵏⴻⵊ

ⵓ ⴰⴷ ⵏⵣⴻⵀⵀⴻⴷ ⵉ ⵜⵣⴻⵎⵎⴰⵔ ⵏⵏⴻⵛ.