22
1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ, ⵙ ⵜⴻⵖⵏⵉⵏⵜ ⵏ ‘ⵜⵓⴷⴰⴷⵜ ⵏ ⵜⵓⴼⴼⵓⵜ’. ⴰⵣⴻⵀⵀⴻⴷ ⵏ ⴷⴰⵡⵓⴷ.
2 ⴰⵔⴻⴱⴱⵉ ⵉⵏⵓ, ⴰⵔⴻⴱⴱⵉ ⵉⵏⵓ,
ⵎⴰⵢⴻⵎⵎⵉ ⵉ ⴷ ⴰⵢⵉ ⵜⴻⵊⵊⵉⴷ?
ⵣⵉ ⵍⴰⴳⴳⵯⴰⵊ ⵉ ⵜⴻⴵⵉⴷ ⵣⴻⴳ ⵓⵙⴻⵏⵊⴻⵎ ⵉⵏⵓ,
ⵣⴻⴳ ⵡⴰⵡⴰⵍⴻⵏ ⵉ ⵙⵖⵓⵢⵢⵓⵖ
ⴰⵎ ⵡⴻⵢⵔⴰⴷ.
◘ 3 ⴰ ⴰⵔⴻⴱⴱⵉ ⵉⵏⵓ, ⵍⴰⵖⵉⵖ ⴷⴻⴳ ⵡⴰⵙⵙ,
ⵎⴰⵛⴰ ⵛⴻⴽ ⵡⴰⵔ ⵅⴰⴼⵉ ⴷⴷ-ⵜⴰⵔⵔⵉⴷ ⵛⴰ,
ⵙ ⴵⵉⵍⴻⵜ, ⵎⴰⵛⴰ ⵏⴻⵛⵛ ⵡⴰⵔ ⵓⴼⵉⵖ ⴰⵔⵔⴰⵃⴻⵜ.
4 ⵛⴻⴽ ⴷ ⴰⵎⵇⴻⴷⴷⴻⵙ ⵉ ⵜⴻⴵⵉⴷ,
ⵜⵣⴻⴷⴷⵖⴻⴷ ⴷⵉ ⵍⵡⴻⵙⵟ ⵏ ⵉⵣⵍⴰⵏ
ⵏ ⵓⵚⴻⴱⴱⴻⵃ ⵏ ⵉⵙⵔⴰⵉⵍ.
5 ⵜⵜⴻⵛⵍⴻⵏ ⵅⴰⴽ ⵍⴻⵊⴷⵓⴷ ⵏⵏⴻⵖ,
ⵜⵓⵖⴰ ⵜⵜⴻⵛⵍⴻⵏ ⵓ ⵛⴻⴽ ⵜⴰⵔⵔⵉⴷ ⵜⴻⵏ ⴰⴷ ⵏⴻⵊⵎⴻⵏ.
6 ⵏⵉⵜⵏⵉ ⵙⵖⵓⵢⴻⵏ-ⴷⴷ ⵖⴰⵔⴻⴽ
ⵓⵛⴰ ⵜⵜⵡⴰⵙⵙⵏⴻⵊⵎⴻⵏ,
ⵜⵓⵖⴰ ⵜⵜⴻⵛⵍⴻⵏ ⵅⴰⴽ ⵓ ⵡⴰⵔ ⵏⵏⵃⴻⵛⵎⴻⵏ ⵛⴰ.
◘
7 ⵏⴻⵛⵛ ⴷ ⵉⵛⵜ ⵏ ⵜⴽⴻⵛⵛⴰ, ⵡⴰⵔ ⵉⴵⵉ ⴷ ⴰⵔⵢⴰⵣ,
ⵏⴻⵛⵛ ⴷ ⵍⵃⴻⴳⵔⴰ ⵏ ⴱⵏⴰⴷⴻⵎ
ⵜⵜⵡⴰⵙⵙⴻⵃⵇⴰⵔⴻⵖ ⵊⴰⵔ ⵍⴳⴻⵏⵙ.
◼ 8 ⵎⴰⵔⵔⴰ ⵉⵏⵏⵉ ⴷ ⴰⵢⵉ ⵉⵥⵔⵉⵏ,
ⵙⵜⵀⴻⵣⵣⴰⵏ ⵣⵣⴰⵢⵉ,
ⴰⵔⴻⵣⵣⵎⴻⵏ ⵉⵢⴻⵏⵛⵉⵛⴻⵏ ⵏⵙⴻⵏ,
9 ⵇⵇⴰⵔⴻⵏ: “ⵙⴻⵄⴷⵓ ⵜ ⵅ ⵙⵉⴷⵉ,
ⴻⵊⵊ ⵡⴰⵏⵉⵜⴰ ⴰⴷ ⵜ ⵉⴼⴻⴽⴽ, ⴰⴷ ⵜ ⵉⵙⵙⴻⵏⵊⴻⵎ,
ⵎⴰⵖⴰⵔ ⵏⴻⵜⵜⴰ ⵢⴰⵔⴹⴰ ⵅⴰⵙ.”
◘
10 ⵛⴻⴽ ⵜⵊⴻⴱⴱⴷⴻⴷ ⴰⵢⵉ-ⴷⴷ
ⵣⴻⴳ ⵓⵄⴻⴷⴷⵉⵙ ⵏ ⵢⴻⵎⵎⴰ,
ⵛⴻⴽ ⵜⴰⵔⵔⵉⴷ ⴰⵢⵉ ⴷⵉ ⵍⴰⵎⴰⵏ
ⵅ ⵡⴰⴱⴱⵓⵛⴻⵏ ⵏ ⵢⴻⵎⵎⴰ.
11 ⵣⵉ ⵍⴻⵎⵔⴰⵡⴻⵜ ⵜⵜⵡⴰⵎⵎⴻⵏⴹⴰⵔⴻⵖ ⵅⴰⴽ,
ⵣⴻⴳ ⵓⵄⴻⴷⴷⵉⵙ ⵏ ⵢⴻⵎⵎⴰ
ⴰⵇⴰ ⵛⴻⴽ ⴷ ⴰⵔⴻⴱⴱⵉ ⵉⵏⵓ.
12 ⵡⴰⵔ ⵜⵜⵖⵉⵎⵉ ⴱⵓ ⵖⴰⵔ ⵍⴰⴳⴳⵯⴰⵊ ⵣⵣⴰⵢⵉ,
ⵎⴰⵖⴰⵔ ⵍⴻⵃⵚⴰⵔⴻⵜ ⵜⵓⴷⴻⵙ
ⵓ ⵡⴰⵔ ⴷⵉⵏ ⵛⴰ ⴰⵎⵄⴰⵡⴰⵏ.
13 ⴰⵟⵟⴰⵙ ⵏ ⵉⴼⵓⵏⴰⵙⴻⵏ ⵏⵏⴹⴻⵏ ⴰⵢⵉ-ⴷⴷ,
ⵉⴼⵓⵏⴰⵙⴻⵏ ⵉⵊⴻⵀⴷⴻⵏ ⵣⵉ ⴱⴰⵛⴰⵏ
14 ⴰⵔⵣⵎⴻⵏ-ⴷⴷ ⵖⴰⵔⵉ ⴰⵇⴻⵎⵎⵓⵎ ⵏⵙⴻⵏ
ⴰⵎⴻⵛⵏⴰⵡ ⵉⵊⵊ ⵏ ⵡⴻⵢⵔⴰⴷ
ⵉⵜⵜⵎⴻⵣⵣⴰⵇⴻⵏ, ⵉⵣⴻⵀⵀⴰⵔⴻⵏ.
15 ⵏⴻⵛⵛ ⵜⵜⵡⴰⴼⴰⵔⵔⵖⴻⵖ ⴰⵎ ⵡⴰⵎⴰⵏ
ⵓ ⵎⴰⵔⵔⴰ ⵉⵖⵙⴰⵏ ⵉⵏⵓ ⵜⵜⵡⴰⵎⵎⵙⴻⴱⴹⴰⵏ.
ⵓⵍ ⵉⵏⵓ ⴰⵎ ⵛⵛⵎⴻⵄ,
ⴰⵇⴰ ⵉⴼⵙⵉ ⴷⴰⵅⴻⵍ ⵉⵏⵓ.
16 ⵊⵊⴻⵀⴷ ⵉⵏⵓ ⵢⵓⵥⴻⵖ
ⴰⵎ ⵢⵉⵊⵊ ⵏ ⵓⵛⴻⴵⵉⵇ ⵏ ⵉⵛⵜ ⵏ ⵜⵇⴻⴷⴷⵓⵃⵜ,
ⵉⵍⴻⵙ ⵉⵏⵓ ⵉⵍⵚⴻⵇ ⵖⴰⵔ ⵡⴰⵏⴻⵖ ⵉⵏⵓ.
ⵛⴻⴽ ⵜⴻⵙⵙⴰⵔⵙⴻⴷ ⴰⵢⵉ ⴷⵉ ⵜⵄⴻⵊⵊⴰⵊⵜ ⵏ ⵍⵎⴻⵡⵜ.
17 ⵎⴰⵖⴰⵔ ⵉⵟⴰⵏ ⵏⵏⴹⴻⵏ ⴰⵢⵉ-ⴷⴷ,
ⵉⵛⵜ ⵏ ⴱⴰⵏⴷⵉⵢⵢⴰ ⵏ ⵜⴰⵔⵡⴰ ⵏ ⵍⴻⵃⵔⴰⵎ
ⵇⵓⵡⵡⴰⵔⴻⵏ ⴰⵢⵉ-ⴷⴷ,
ⴰⵇⴰ ⴰⵎ ⵡⴻⵢⵔⴰⴷ ⵉⴼⴰⵙⵙⴻⵏ ⴷ ⵉⴹⴰⵔⴻⵏ ⵉⵏⵓ.
◼ ◘ 18 ⵣⴻⵎⵎⴰⵔⴻⵖ ⴰⴷ ⵃⴻⵙⴱⴻⵖ
ⵎⴰⵔⵔⴰ ⵉⵖⵙⴰⵏ ⵉⵏⵓ.
ⵏⵉⵜⵏⵉ ⵜⵜⵡⴰⵍⴰⵏ ⴰⵢⵉ, ⵅⴻⵣⵣⴰⵔⴻⵏ-ⴷⴷ ⵖⴰⵔⵉ.
19 ⵏⵉⵜⵏⵉ ⴱⴹⴰⵏ ⴰⵔⵔⵓⴹ ⵉⵏⵓ ⵊⴰⵔ ⴰⵙⴻⵏ,
ⵓⵛⴰ ⵏⴹⴰⵔⴻⵏ ⵜⴰⵇⴻⴷⴷⵓⵃⵜ ⵅ ⵍⴻⵄⴱⴰⵢⴻⵜ ⵉⵏⵓ.
◘
20 ⵛⴻⴽ, ⴰ ⵙⵉⴷⵉ, ⵡⴰⵔ ⵜⵜⵉⵍⵉ
ⵖⴰⵔ ⵍⴰⴳⴳⵯⴰⵊ, ⴰ ⵊⵊⴻⵀⴷ ⵉⵏⵓ,
ⴰⵙ-ⴷⴷ ⴷⴻⵖⵢⴰ ⵃⵉⵎⴰ ⴰⴷ ⴰⵢⵉ ⵜⵄⴰⵡⵏⴻⴷ.
21 ⴼⴻⴽⴽ ⵍⴻⵄⵎⴰⵔ ⵉⵏⵓ ⵣⵉ ⵙⵙⵉⴼ,
ⴰⵢⴻⵏⵏⵉ ⵣⴻⴳ ⵓⵇⴻⵟⵟⴻⵙ ⵏ ⵡⴻⵇⵣⵉⵏ.
22 ⴼⴻⴽⴽ ⴰⵢⵉ ⵣⴻⴳ ⵓⵇⴻⵎⵎⵓⵎ ⵏ ⵡⴻⵢⵔⴰⴷ,
ⴼⴻⴽⴽ ⴰⵢⵉ ⵣⴻⴳ ⵡⴰⵛⵛⴰⵡⴻⵏ ⴷ ⵉⵣⵉⵔⴰⵔⴻⵏ
ⵏ ⵉⵖⴰⵢⴹ ⵏ ⵍⴻⵅⵍⴰ!
ⴰⵇⴰ ⵛⴻⴽ ⵜⴻⵙⵍⵉⴷ ⴰⵢⵉ.
23 ⴰⴷ ⴱⴰⵔⵔⵃⴻⵖ ⵉⵙⴻⵎ ⵏⵏⴻⵛ ⵉ ⵡⴰⵡⵎⴰⵜⴻⵏ ⵉⵏⵓ,
ⴰⴷ ⵅⴰⴽ ⵚⴻⴱⵃⴻⵖ ⴷⵉ ⵍⵡⴻⵙⵟ ⵏ ⵡⴻⴳⵔⴰⵡ ⵏ ⵍⴳⴻⵏⵙ.
◘ 24 ⴽⴻⵏⵏⵉⵡ, ⵉⵏⵏⵉ ⵉⵜⵜⴻⴳⴳⵯⴷⴻⵏ ⵙⵉⴷⵉ,
ⵙⴻⵎⵖⴰⵔⴻⵎ ⵜ,
ⴰ ⴽⴻⵏⵏⵉⵡ, ⵎⴰⵔⵔⴰ ⵣⵣⴰⵔⵉⵄⴻⵜ ⵏ ⵢⴰⵄⵇⵓⴱ,
ⵙⵄⵓⴵⴻⵎ ⵜ ⵓ ⵡⴻⵇⵇⴰⵔⴻⵎ ⵜ,
ⴰ ⴽⴻⵏⵏⵉⵡ, ⵎⴰⵔⵔⴰ ⵣⵣⴰⵔⵉⵄⴻⵜ ⵏ ⵉⵙⵔⴰⵉⵍ!
25 ⵎⴰⵖⴰⵔ ⵡⴰⵔ ⵉⵙⵙⴻⵃⵇⵉⵔ ⵛⴰ
ⵍⴻⵃⵚⴰⵔⴻⵜ ⵏ ⵡⴻⵏⵏⵉ ⵉⵜⵜⵡⴰⵃⵚⴰⵔⴻⵏ,
ⵡⴰⵔ ⵜⵜ ⵉⵄⵉⴼⴼ ⵛⴰ,
ⵡⴰⵔ ⵅⴰⵙ ⵉⵙⵙⵏⵓⴼⴼⴰⵔ ⵛⴰ ⵓⴷⴻⵎ ⵏⵏⴻⵙ,
ⵎⴰⵛⴰ ⵏⴻⵜⵜⴰ ⵉⵙⵍⴰ ⴰⵙ ⵎⴰⵍⴰ ⵉⵍⴰⵖⴰ ⴰⵙ-ⴷⴷ.
26 ⵣⵣⴰⵢⴻⴽ ⴰⴷ ⴷⴷ-ⵢⴰⵙ ⵓⵇⴰⴷⵉ ⵉⵏⵓ
ⴷⴻⴳ ⵉⵊⵊ ⵏ ⵡⴻⴳⵔⴰⵡ ⵏ ⵍⴳⴻⵏⵙ ⴰⵎⴻⵇⵇⵔⴰⵏ,
ⴰⴷ ⴽⴻⵎⵎⵍⴻⵖ ⵍⵡⵓⵄⵓⴷ ⵉⵏⵓ
ⵣⵣⴰⵜ ⵉ ⵢⵉⵏⵏⵉ ⵣⵣⴰⵢⴻⵙ ⵉⵜⵜⴻⴳⴳⵯⴻⴷⴻⵏ.
27 ⵉⵎⵡⴰⴹⵄⴻⵏ ⴰⴷ ⵛⵛⴻⵏ ⵓ ⴰⴷ ⵊⵊⵉⵡⵏⴻⵏ,
ⵉⵏⵏⵉ ⴰⵔⴻⵣⵣⵓⵏ ⵅ ⵙⵉⴷⵉ ⴰⴷ ⴰⵙ ⵚⴻⴱⴱⵃⴻⵏ,
ⵓⵍⴰⵡⴻⵏ ⵏⵙⴻⵏ ⴰⴷ ⴷⴷⴰⵔⴻⵏ ⵉ ⵍⴻⴱⴷⴰ.
28 ⵎⴰⵔⵔⴰ ⵜⵉⵏⴻⴳⴳⵓⵔⴰ ⵏ ⵜⴻⵎⵎⵓⵔⵜ ⴰⴷ ⵜ ⵉⴷⴰⵔⴻⵏⵜ,
ⴰⴷ ⴷⴷ-ⴷⴻⵡⵍⴻⵏⵜ ⵖⴰⵔ ⵙⵉⴷⵉ,
ⵎⴰⵔⵔⴰ ⵍⴰⴵⴰⵜ ⵏ ⵍⴻⴳⵏⵓⵙ
ⴰⴷ ⵙⴻⵊⴷⴻⵏⵜ ⵣⵣⴰⵜ ⵉ ⵡⵓⴷⴻⵎ ⵏⵏⴻⵛ,
◘ 29 ⵎⵉⵏⵣⵉ ⵜⴰⴳⴻⵍⴷⵉⵜ ⵉ ⵙⵉⴷⵉ ⵉ ⵜⴻⴵⴰ,
ⵏⴻⵜⵜⴰ ⵉⵃⴻⴽⴽⴻⵎ ⵊⴰⵔ ⵍⴻⴳⵏⵓⵙ.
30 ⵎⴰⵔⵔⴰ ⵉⵏⵏⵉ ⵉⵚⴻⵃⵃⴻⵏ ⴷⵉ ⵜⴻⵎⵎⵓⵔⵜ
ⴰⴷ ⵛⵛⴻⵏ, ⴰⴷ ⵙⴻⵊⴷⴻⵏ,
ⵎⴰⵔⵔⴰ ⵉⵏⵏⵉ ⴷⴷ-ⵉⵀⴻⴽⴽⵡⴰⵏ ⴷⵉ ⵜⵄⴻⵊⵊⴰⵊⵜ
ⴰⴷ ⵙⴻⵊⴷⴻⵏ ⵣⵣⴰⵜ ⵉ ⵡⵓⴷⴻⵎ ⵏⵏⴻⵙ,
ⴽⵓⵍ ⵉⵊⵊⴻⵏ ⵉ ⵡⴰⵔ ⵉⵣⴻⵎⵎⴰⵔⴻⵏ
ⴰⴷ ⵉⵃⴹⴰ ⵍⴻⵄⵎⴰⵔ ⵏⵏⴻⵙ.
31 ⵣⵣⴰⵔⵉⵄⴻⵜ ⴰⴷ ⴰⵙ ⵜⵙⴻⵅⵅⴰⵔ,
ⴰⴷ ⵜᵉⵜⵜⵡⴰⵣⴻⵎⵎ ⴷ ⴰⵔⵔⴰⵡ ⵉ ⵙⵉⴷⵉ ⵉⵏⵓ.
32 ⴰⴷ ⴷⴷ-ⴰⵙⴻⵏ, ⴰⴷ ⴱⴰⵔⵔⵃⴻⵏ ⵜⴰⵙⴻⴳⴷⴰ ⵏⵏⴻⵙ
ⵉ ⵢⵉⵊⵊ ⵏ ⵍⴳⴻⵏⵙ ⵉ ⵖⴰ ⴷⴷ-ⵉⵜⵜⵡⴰⵅⴻⵍⵇⴻⵏ,
ⵎⴰⵖⴰⵔ ⵏⴻⵜⵜⴰ ⴰⵇⴰ ⵉⴳⴳⴰ ⵉ-ⵜⵜ.
◘