44
1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⵣⴻⴳ ⴰⵢⵜ ⵏ ⵇⵓⵔⴰⵃ. ⴰⵅⴻⵎⵎⵉ.
2 ⴰ ⴰⵔⴻⴱⴱⵉ, ⵏⴻⵛⵛⵉⵏ ⵏⴻⵙⵍⴰ ⵜⵜ
ⵙ ⵉⵎⴻⵣⵣⵓⵖⴻⵏ ⵏⵏⴻⵖ,
ⵍⴻⵊⴷⵓⴷ ⵏⵏⴻⵖ ⵃⴰⵊⴰⵏ ⴰⵏⴻⵖ ⵜⵜ:
ⵛⴻⴽ ⵜⴻⴳⴳⵉⴷ ⵉⵛⵜ ⵏ ⵜⵎⴻⴳⴳⵉⵜ
ⴷⴻⴳ ⵡⵓⵙⵙⴰⵏ ⵏⵙⴻⵏ,
ⴷⴻⴳ ⵡⵓⵙⵙⴰⵏ ⵏ ⵡⴻⵛⵃⴰⵍ ⵓⵢⴰ.
3 ⵙ ⵓⴼⵓⵙ ⵏⵏⴻⵛ ⴰⵇⴰ ⵜⴻⵙⵙⵓⴼⴼⵖⴻⴷ ⵍⴻⴳⵏⵓⵙ
ⵣⵉ ⵜⴻⵙⵖⴰⵔⵜ ⵏⵙⴻⵏ,
ⵅⴻⵏⵏⵉ ⵜⴻⵥⵥⵓⴷ ⵜⴻⵏ ⴷⴰⵢⴻⵙ.
ⵛⴻⴽ ⵜⴻⴳⴳⵉⴷ ⵍⵖⴰⵔ ⴷⵉ ⵛⵛⵓⵄⵓⴱ,
ⵜⴱⴻⵣⵣⵄⴻⴷ ⵜⴻⵏ. ◘44:3 ⵓⴼ. 15:17; ⵉⵥⵀⴷ. 80:9
4 ⵏⵉⵜⵏⵉ ⵎⴰⵛⴰ ⵡⴰⵔ ⵡⴰⵔⵜⴻⵏ ⵜⴰⵎⵎⵓⵔⵜ ⵙ ⵙⵙⵉⴼ,
ⴰⵖⵉⵍ ⵏⵙⴻⵏ ⵡⴰⵔ ⴷ ⴰⵙⴻⵏ ⴷⴷ-ⵢⵉⵡⵉ ⴰⵙⴻⵏⵊⴻⵎ,
ⵎⴰⵛⴰ ⴰⴼⵓⵙ ⵏⵏⴻⵛ ⴰⴼⵓⵙⵉ,
ⴰⵖⵉⵍ ⵏⵏⴻⵛ ⴷ ⵜⴼⴰⵡⵜ ⵏ ⵡⵓⴷⴻⵎ ⵏⵏⴻⵛ,
ⵎⵉⵏⵣⵉ ⵏⵉⵜⵏⵉ ⵓⴼⵉⵏ ⴰⵔⴹⴰ ⴷⵉ ⵜⵉⵟⵟⴰⵡⵉⵏ ⵏⵏⴻⵛ.
5 ⴰⵇⴰ ⵛⴻⴽ ⴷ ⴰⵊⴻⴵⵉⴷ ⵉⵏⵓ, ⴰ ⴰⵔⴻⴱⴱⵉ!
ⴻⵡⵛ ⵄⴰⴷ ⵍⴻⵅⵅⵓ ⵍⵓⵎⵓⵔ
ⵉ ⵉⵙⴻⵏⵊⴰⵎⴻⵏ ⵏ ⵢⴰⵄⵇⵓⴱ.
6 ⴰⴽⵉⴷⴻⴽ ⴰⴷ ⵏⴻⵖⴹⴻⵍ ⵉⵏⵏⵉ ⴷ ⴰⵏⴻⵖ ⵉⵃⴻⵚⵚⴰⵔⴻⵏ,
ⵙ ⵢⵉⵙⴻⵎ ⵏⵏⴻⵛ ⴰⴷ ⵏⴻⵄⴼⴻⵙ
ⵅ ⵢⵉⵏⵏⵉ ⵅⴰⵏⴻⵖ ⵉⵜⵜⴻⵎⵄⴰⵍⴰⵏ.
7 ⵎⴰⵖⴰⵔ ⵡⴰⵔ ⵜⵜⴻⵛⵍⴻⵖ ⵅ ⵍⵇⴻⵡⵙ ⵉⵏⵓ,
ⵙⵙⵉⴼ ⵉⵏⵓ ⵡⴰⵔ ⴷ ⴰⵢⵉ ⵉⵙⵙⴻⵏⵊⴰⵎ.
8 ⵎⴰⵖⴰⵔ ⵛⴻⴽ ⵜⴻⵙⵙⴻⵏⵊⴰⵎⴻⴷ ⴰⵏⴻⵖ
ⵣⴻⴳ ⵉⵏⵏⵉ ⴷ ⴰⵏⴻⵖ ⵉⵃⴻⵚⵚⴰⵔⴻⵏ,
ⵜⴻⵙⵙⴱⴻⵀⴷⵉⵍⴻⴷ ⵉⵏⵏⵉ ⴷ ⴰⵏⴻⵖ ⵉⵛⴰⵔⵔⵀⴻⵏ.
9 ⵏⵚⴻⴱⴱⴻⵃ ⵉ ⴰⵔⴻⴱⴱⵉ ⴰⵙⵙ ⵎⴰⵔⵔⴰ,
ⴰⴷ ⵏⵇⴰⴷⴰ ⵉⵙⴻⵎ ⵏⵏⴻⵛ ⵉ ⵍⴻⴱⴷⴰ. ⵙⵉⵍⴰⵀ.
10 ⵎⴰⵛⴰ ⵍⴻⵅⵅⵓ ⵜⴻⵏⴹⴰⵔⴻⴷ ⴰⵏⴻⵖ,
ⵜⴻⵙⵙⴱⴻⵀⴷⴰⵍⴻⴷ ⴰⵏⴻⵖ,
ⵛⴻⴽ ⵡⴰⵔ ⵜᵉⵜⵜⴻⴼⴼⵉⵖⴻⴷ ⵛⴰ
ⴰⴽ-ⴷ ⵍⵄⴻⵙⴽⴰⵔⴰⵜ ⵏⵏⴻⵖ ⵖⴰⵔ ⵓⵎⴻⵏⵖⵉ. ◘44:10 ⵉⵥⵀⴷ. 60:3; 74:1; 89:39; 108:12
11 ⵛⴻⴽ ⵜⴻⵊⵊⵉⴷ ⴰⵏⴻⵖ ⵏⴻⵜⵜⵔⴰⴽⴽⵡⴰⵍ
ⵣⵣⴰⵜ ⵉ ⵡⴻⵏⵏⵉ ⴷ ⴰⵏⴻⵖ ⵉⵃⴻⵚⵚⴰⵔⴻⵏ,
ⵉⵏⵏⵉ ⴷ ⴰⵏⴻⵖ ⵉⵛⴰⵔⵔⵀⴻⵏ
ⵜⵜⴽⴻⵛⵛⴹⴻⵏ ⵎⵉⵏ ⵜⵜⴻⵅⵙⴻⵏ ⵉ ⵢⵉⵅⴻⴼ ⵏⵙⴻⵏ.
12 ⵛⴻⴽ ⵜⴻⵡⵛⵉⴷ ⴰⵏⴻⵖ ⴰⵎ ⵡⵓⴵⵉ ⵉ ⵎⴰⵛⵛⴰ,
ⵜⴻⵣⵣⵓⵣⴰⵔⴻⴷ ⴰⵏⴻⵖ ⵊⴰⵔ ⵍⴻⴳⵏⵓⵙ.
13 ⵛⴻⴽ ⵜⴻⵣⵣⵏⵓⵣⵉⴷ ⵍⴳⴻⵏⵙ ⵏⵏⴻⵛ ⵙ ⵡⴰⵍⵓ,
ⴷⴻⴳ ⵓⵣⵣⴻⵏⵣⵉ ⵏⵙⴻⵏ ⵡⴰⵔ ⵖⴰⵔⴻⴽ ⴱⵓ ⵍⴻⴼⴹⴻⵍ.
14 ⵛⴻⴽ ⵜᵉⵜⵜⴻⴳⴳⴻⴷ ⴰⵏⴻⵖ ⴷ ⵍⵃⴻⴳⵔⴰ
ⵉ ⵡⴰⵊⵊⴰⵔⴻⵏ ⵏⵏⴻⵖ,
ⴷ ⴰⵙⵜⴻⵀⵣⵉ ⴷ ⵓⴱⴻⵀⴷⴻⵍ
ⵖⴰⵔ ⵢⵉⵏⵏⵉ ⴷ ⴰⵏⴻⵖ-ⴷⴷ ⵉⵜⵜⴻⵏⵏⴹⴻⵏ. ◘44:14 ⵉⵥⵀⴷ. 79:4; 80:7; ⵉⵔⵎ. 24:9
15 ⵛⴻⴽ ⵜᵉⵜⵜⴻⴳⴳⴻⴷ ⴰⵏⴻⵖ ⴷ ⴰⵎⴻⴷⵢⴰ
ⵊⴰⵔ ⵍⴻⴳⵏⵓⵙ,
ⵜᵉⵜⵜⴻⴳⴳⴻⴷ ⴰⴷ ⵅⴰⵏⴻⵖ ⵀⴻⵣⵣⴻⵏ
ⴰⵣⴻⴵⵉⴼ ⵊⴰⵔ ⵛⵛⵓⵄⵓⴱ.
16 ⴰⵙⵙ ⵎⴰⵔⵔⴰ ⵍⵄⴰⵔ ⵉⵏⵓ ⴰⵇⴰ-ⵜ ⵣⵣⴰⵜⵉ
ⵊⴰⵔ ⵜⵉⵟⵟⴰⵡⵉⵏ ⵉⵏⵓ,
ⵍⴻⵃⵢⴰ ⵉⴷⵍⴰ ⴰⵖⴻⵎⴱⵓⴱ ⵉⵏⵓ,
17 ⵣⵉ ⵜⵎⵉⵊⵊⴰ ⵏ ⵢⵉⵏⵏⵉ ⵉⵙⵙⴻⵃⵇⴰⵔⵔⴰⵏ,
ⵜⵜⵛⴻⵇⵇⴰⴼⴻⵏ, ⵣⵉ ⵙⵙⵉⴱⴱⴻⵜ ⵏ ⵍⴻⵄⴷⵓ
ⵓ ⵏ ⵡⴻⵏⵏⵉ ⵢⴰⵔⴻⵣⵣⵓⵏ ⴰⵏⵜⴰⵇⴻⵎ.
18 ⴰⵢⴰ ⵎⴰⵔⵔⴰ ⵉⴽⴽⴰ ⵅⴰⵏⴻⵖ,
ⵎⴰⵛⴰ ⵡⴰⵔ ⵛⴻⴽ ⵏⴻⵜⵜⵓ,
ⵡⴰⵔ ⵏⵖⴻⵛⵛ ⵛⴰ ⴷⵉ ⵍⵄⴰⵀⴷ ⵏⵏⴻⵛ.
19 ⵓⵍ ⵏⵏⴻⵖ ⵡⴰⵔ ⵉⴷⵡⵉⵍ ⵖⴰⵔ ⴹⴻⴼⴼⴰⵔ,
ⵉⵚⵓⵔⴰⴼ ⵏⵏⴻⵖ ⵡⴰⵔ ⴷⴷ-ⴼⴼⵉⵖⴻⵏ ⵛⴰ
ⵣⴻⴳ ⵓⵎⴻⵙⵔⵓⵇ ⵏⵏⴻⵛ,
20 ⵡⴰⵅⵅⴰ ⵛⴻⴽ ⵜⵍⴻⴱⵣⴻⴷ ⴰⵏⴻⵖ
ⴷⴻⴳ ⵡⴻⵎⵛⴰⵏ ⵏ ⵡⵓⵛⵛⴰⵏⴻⵏ ⵏ ⵍⴻⵅⵍⴰ,
ⵜⴻⴷⵍⵉⴷ ⴰⵏⴻⵖ ⵙ ⵜⵉⵍⵉ ⵏ ⵍⵎⴻⵡⵜ.
21 ⵎⵍⵉ ⵜⵓⵖⴰ ⵏⴻⵜⵜⵓ ⵉⵙⴻⵎ ⵏ ⴰⵔⴻⴱⴱⵉ ⵏⵏⴻⵖ,
ⵏⴻⵙⵙⵡⵉⵥⵥⴻⴹ ⵉⴼⴰⵙⵙⴻⵏ ⵏⵏⴻⵖ
ⵖⴰⵔ ⵢⵉⵊⵊ ⵏ ⴰⵔⴻⴱⴱⵉ ⴷ ⴰⵖⵔⵉⴱ,
22 ⵎⴰ ⵉⵍⵉ ⴰⵔⴻⴱⴱⵉ ⵡⴰⵔ ⵢⴰⵔⴻⵣⵣⵓ ⴷⵉ ⵎⴰⵏ ⴰⵢⴰ?
ⴰⵇⴰ ⵏⴻⵜⵜⴰ ⵢⴰⵔⴻⴳⴳⴻⴱ
ⵅ ⵎⵉⵏ ⵉⵏⵏⵓⴼⴼⴰⵔⴻⵏ ⴷⴻⴳ ⵡⵓⵍ.
23 ⵎⴰⵖⴰⵔ ⴷⵉ ⵟⵟⵡⴻⵄ ⵏⵏⴻⵛ
ⵏⴻⵇⵇⴻⵏ ⴰⵏⴻⵖ ⴽⵓⵍ ⴰⵙⵙ,
ⴰⵇⴰ ⵃⴻⵙⵙⴱⴻⵏ ⴰⵏⴻⵖ ⴰⵎ ⵡⵓⴵⵉ ⵏ ⵜⵖⴰⵔⵚⵜ. ◘44:23 ⵔⵓⵎ. 8:36
24 ⴼⴰⵇ, ⵎⴰⵢⴻⵎⵎⵉ ⵜᵉⵟⵟⵚⴻⴷ, ⵙⵉⴷⵉ ⵉⵏⵓ?
ⴼⴰⵇ, ⵡⴰⵔ ⴷ ⴰⵏⴻⵖ ⵏⴻⵟⵟⴰⵔ ⵉ ⵍⴻⴱⴷⴰ!
25 ⵎⴰⵢⴻⵎⵎⵉ ⵖⴰ ⵜⴻⴼⴼⴰⵔⴻⴷ ⵓⴷⴻⵎ ⵏⵏⴻⵛ,
ⴰⴷ ⵜᵉⵜⵜⵓⴷ ⵍⴻⵖⴱⴻⵏ ⴷ ⴷⴷⴻⴵ ⵏⵏⴻⵖ?
26 ⵎⴰⵖⴰⵔ ⵍⴻⵄⵎⴰⵔ ⵏⵏⴻⵖ ⵉⵜⵜⴰⴹⴰⵔ ⵖⴰⵔ ⵜⵄⴻⵊⵊⴰⵊⵜ,
ⴰⵄⴻⴷⴷⵉⵙ ⵏⵏⴻⵖ ⵉⵍⴻⵚⵚⴻⵇ ⴷⵉ ⵜⴻⵎⵎⵓⵔⵜ.
27 ⴽⴽⴰⵔ, ⴻⵡⵛ ⴰⵏⴻⵖ ⴰⴼⵓⵙ, ⴼⴷⵉ ⵅⴰⵏⴻⵖ
ⴷⵉ ⵟⵟⵡⴻⵄ ⵏ ⵜⵎⴻⵅⵙⵉⵡⵜ ⵏⵏⴻⵛ ⵉⵛⴻⵡⵡⴰⵔⴻⵏ. ◼44:27 ⴼⴷⵉ -ⵅⵥⴰⵔ ‘ⴰⵎⴻⴼⴷⵉ’-ⵉⵥⵀⴷ. 78:35.
◘44:3 44:3 ⵓⴼ. 15:17; ⵉⵥⵀⴷ. 80:9
◘44:10 44:10 ⵉⵥⵀⴷ. 60:3; 74:1; 89:39; 108:12
◘44:14 44:14 ⵉⵥⵀⴷ. 79:4; 80:7; ⵉⵔⵎ. 24:9
◼44:27 44:27 ⴼⴷⵉ -ⵅⵥⴰⵔ ‘ⴰⵎⴻⴼⴷⵉ’-ⵉⵥⵀⴷ. 78:35.