75
1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ‘ⵡⴰⵔ ⵜⵜⴰⵔⴻⴷⴷⴻⴵ!’ ⴰⵣⴻⵀⵀⴻⴷ ⵏ ⴰⵙⴰⴼ. ⵉⵣⵍⵉ.
2 ⵏⴻⵛⵛⵉⵏ ⵏⴻⵜⵜⵇⴰⴷⴰ ⵛⴻⴽ,
ⴰ ⴰⵔⴻⴱⴱⵉ, ⵏⴻⵜⵜⵇⴰⴷⴰ!
ⴰⵇⴰ ⵉⵙⴻⵎ ⵏⵏⴻⵛ ⵢⵓⴷⴻⵙ,
ⴰⵇⴰ ⵍⵎⵓⵄⵊⵉⵣⴰⵜ ⵏⵏⴻⵛ
ⵙⵙⴰⵡⴰⵍⴻⵏ ⵅ ⵎⴰⵏ ⴰⵢⴰ.
3 ⵎⴰⵖⴰⵔ ⵏⴻⵛⵛ ⴰⴷ ⵅⴹⴰⵔⴻⵖ
ⵍⵃⴰⵍ ⵉⵜⵜⵡⴰⴳⴳⴻⵏ,
ⴰⴷ ⴳⴳⴻⵖ ⵛⵛⵔⴻⵄ ⵙ ⵍⵃⴻⵇⵇ.
4 ⵜⴰⵎⵎⵓⵔⵜ ⴰⴽ-ⴷ ⵎⴰⵔⵔⴰ ⵉⵎⴻⵣⴷⴰⵖ ⵏⵏⴻⵙ ⵜⴻⴼⵙⵉⵢ,
ⵎⴰⵛⴰ ⵏⴻⵛⵛ ⵙⵙⵎⴻⵜⵜⵏⴻⵖ
ⵉⴱⵉⵍⴰⵔⴻⵏ ⵏⵏⴻⵙ. ⵙⵉⵍⴰⵀ.
5 ⵏⴻⵛⵛ ⵏⵏⵉⵖ ⵉ ⵉⴱⵓⵀⴰⵍⵉⵢⵢⴻⵏ:
“ⵡⴰⵔ ⵜⵜⴻⴳⴳⵯⴻⴷⴻⵎ ⵛⴰ!”,
ⵉ ⵉⵄⴻⴼⴼⴰⵏⴻⵏ:
“ⵡⴰⵔ ⵙⵙⴳⴻⵄⵄⴰⴷⴻⵎ ⵉⵛⵛ ⵏⵡⴻⵎ!
6 ⵡⴰⵔ ⵙⵙⴳⴻⵄⵄⴰⴷⴻⵎ ⵉⵛⵛ ⵏⵡⴻⵎ
ⴰⵎⵎⵓ ⵙⴻⵏⵏⴻⵊ,
ⵡⴰⵔ ⵙⵙⴰⵡⴰⵍⴻⵎ ⵙ ⵏⵏⴼⴰⵅⴻⵜ!”
7 ⵎⴰⵖⴰⵔ ⴰⵙⴳⴻⵄⵄⴻⴷ
ⵡⴰⵔ ⴷⴷ-ⵉⵜⵜⴰⵙ ⵣⵉ ⵛⵛⴰⵔⵇ,
ⵏⵉⵖ ⵣⵉ ⵍⵖⴰⵔⴱ ⵓⵍⴰ ⵣⵉ ⵍⴻⵅⵍⴰ. ◼75:7 ⵍⴻⵅⵍⴰ-ⴰⵇⴰ-ⵜ ⴷ ⵍⴻⵅⵍⴰ ⵏ ⵍⵊⴰⵏⵓⴱ ⵏ ⵉⵙⴰⵔⵓⵍⵡⴻⵏⵏⵉ ⵓⵎⵉ ⵇⵇⴰⵔⴻⵏ ⵍⴻⵅⵅⵓ ‘ⵏⴰⵇⴰⴱ’.
8 ⵎⴰⵖⴰⵔ ⴰⵔⴻⴱⴱⵉ ⴷ ⵍⵇⴰⴹⵉ.
ⵏⴻⵜⵜⴰ ⵉⵙⵙᵉⵀⴻⴽⴽⵯⴰ ⵉⵊⵊⴻⵏ
ⵓ ⵉⵙⵙⴳⴻⵄⵄⴰⴷ ⵡⴻⵏⵏⴻⵖⵏⵉ.
9 ⵎⴰⵖⴰⵔ ⴰⵇⴰ ⴷⵉⵏ ⵉⵊⵊ ⵏ ⵍⴽⴰⵙ
ⴷⴻⴳ ⵓⴼⵓⵙ ⵏ ⵙⵉⴷⵉ,
ⴱⵉⵏⵓ ⵉⵜⵜⴻⴳⴳ ⴽⵓⴼⴼⵓ, ⵉⵜⵜⵡⴰⵅⴻⴵⴰⴹ ⵎⴰⵔⵔⴰ.
ⵏⴻⵜⵜⴰ ⵉⵜⵜⴽⴻⴱⴱⴰ ⵣⵣⴰⵢⴻⵙ.
ⵎⴰⵔⵔⴰ ⵉⵄⴻⴼⴼⴰⵏⴻⵏ ⵏ ⵜⴻⵎⵎⵓⵔⵜ
ⴰⴷ ⵥⴻⵎⵎⴻⵏ ⵓⵍⴰ ⴷ ⵍⴻⵅⵎⵉⵔⴰ ⵏⵏⴻⵙ
ⵓⵎⵉ ⵣⵣⴰⵢⴻⵙ ⵉ ⵖⴰ ⵙⵡⴻⵏ. ◘75:9 ⴰⵙⴰ. 16:19
10 ⵏⴻⵛⵛ ⴰⴷ ⵜ ⴱⴰⵔⵔⵃⴻⵖ ⵉ ⵍⴻⴱⴷⴰ ⵇⴰⵄ,
ⴰⴷ ⵣⴻⵀⵀⴷⴻⵖ ⵉ ⴰⵔⴻⴱⴱⵉ ⵏ ⵢⴰⵄⵇⵓⴱ.
11 ⵏⴻⵛⵛ ⴰⴷ ⵣⴻⴷⵎⴻⵖ
ⵎⴰⵔⵔⴰ ⴰⵛⵛⴰⵡⴻⵏ ⵏ ⵉⵄⴻⴼⴼⴰⵏⴻⵏ,
ⴰⵛⵛⴰⵡⴻⵏ ⵏ ⵉⵎⵙⴻⴳⴳⴰⴷⴻⵏ
ⴰⴷ ⵜⵜⵡⴰⵙⵙⴳⴻⵄⵄⴷⴻⵏ.
◼75:7 75:7 ⵍⴻⵅⵍⴰ-ⴰⵇⴰ-ⵜ ⴷ ⵍⴻⵅⵍⴰ ⵏ ⵍⵊⴰⵏⵓⴱ ⵏ ⵉⵙⴰⵔⵓⵍⵡⴻⵏⵏⵉ ⵓⵎⵉ ⵇⵇⴰⵔⴻⵏ ⵍⴻⵅⵅⵓ ‘ⵏⴰⵇⴰⴱ’.
◘75:9 75:9 ⴰⵙⴰ. 16:19