1 ⵀⴰⵍⵍⵉⵍⵓ-ⵢⴰⵀ, ⵙⵄⵓⴵⴻⵎ,

ⴽⴻⵏⵏⵉⵡ ⵉⵎⵙⴻⵅⵅⴰⵔⴻⵏ ⵏ ⵙⵉⴷⵉ,

ⵙⵄⵓⴵⴻⵎ ⵉⵙⴻⵎ ⵏ ⵙⵉⴷⵉ!

2 ⴰⴷ ⵉⵜⵜⵡⴰⴱⴰⵔⴻⴽ ⵉⵙⴻⵎ ⵏ ⵙⵉⴷⵉ,

ⵣⵉ ⵍⴻⵅⵅⵓ ⴰⵍ ⵍⴻⴱⴷⴰ. ◘113:2 ⴷⴰⵏ. 2:20

3 ⵣⵉ ⵎⴰⵏⵉⵙ ⴷⴷ-ⵜⵏⴻⵇⵇⴰⵔ ⵜⴼⵓⵛⵜ

ⴰⵍ ⵎⴰⵏⵉⵙ ⵜⵖⴻⴵⵉ ⵜⴼⵓⵛⵜ,

ⴰⴷ ⵉⵜⵜⵡⴰⵙⵙⵄⵓⴵⴰ ⵉⵙⴻⵎ ⵏ ⵙⵉⴷⵉ.◘113:3 ⵎⴰⵍ. 1:11

4 ⵙⵉⴷⵉ ⵢⵓⵄⵍⴰ ⵅ ⵎⴰⵔⵔⴰ ⵍⴻⴳⵏⵓⵙ,

ⵜⵉⵡⴰ ⵉ ⵉⵊⴻⵏⵡⴰⵏ ⴷ ⴰⵄⵓⴵⵉ ⵏⵏⴻⵙ.

5 ⵎⴰⵏ ⵡⴻⵏ ⵉⴵⴰⵏ

ⴰⵎ ⵙⵉⴷⵉ, ⴰⵔⴻⴱⴱⵉ ⵏⵏⴻⵖ,

ⵡⴻⵏⵏⵉ ⵉⵣⴻⴷⴷⵖⴻⵏ ⴷⵉ ⵍⵓⵄⵍⴰ ⵇⴰⵄ,

6 ⵡⴻⵏⵏⵉ ⵢⵓⴹⴰⵔⴻⵏ

ⵎⴰⵃⴻⵏⴷ ⴰⴷ ⵉⵥⴰⵔ ⴷⴻⴳ ⵉⵊⴻⵏⵡⴰⵏ

ⵓ ⵅ ⵜⴻⵎⵎⵓⵔⵜ!

7 ⵡⴻⵏⵏⵉ ⴷⴷ-ⵉⵙⵙⵏⴻⴽⴽⴰⵔⴰⵏ

ⴰⵎⵓⵇⵍⵉⵍ ⵣⵉ ⵜⵄⴻⵊⵊⴰⵊⵜ,

ⵉⵙⵙⴳⴻⵄⵄⴻⴷ ⴰⵎⴻⵣⵍⵓⴹ ⵣⴻⴳ ⵡⴻⴼⵔⴰⴹ ◘113:7 1 ⵚⵎ. 2:8; ⵉⵥⵀⴷ. 107:41

8 ⵎⴰⵃⴻⵏⴷ ⴰⴷ ⵜ ⵉⵙⵙⵖⵉⵎ ⴰⴽ-ⴷ ⵜⴰⵔⵡⴰ ⵏ ⵜⴰⵚⵉⵍⴻⵜ,

ⴰⴽ-ⴷ ⵜⴰⵔⵡⴰ ⵏ ⵜⴰⵚⵉⵍⴻⵜ ⵏ ⵍⴳⴻⵏⵙ ⵏⵏⴻⵙ.

9 ⵡⴻⵏⵏⵉ ⵉⵙⵙⴻⵣⴷⴰⵖⴻⵏ

ⵜⴻⵏⵏⵉ ⵡⴰⵔ ⵉⵜⵜⵉⵔⵡⴻⵏ ⴷⵉ ⵜⴰⴷⴷⴰⵔⵜ,

ⴰⵎ ⵉⵛⵜ ⵏ ⵢⴻⵎⵎⴰⵜⵙⴻⵏ ⵏ ⵉⵃⴻⵏⵊⵉⵔⴻⵏ ⵜⴼⴰⵔⵃ.

ⵀⴰⵍⵍⵉⵍⵓ-ⵢⴰⵀ.