118
1 ⵖⴰⵔ ⴱⴻⴷⴷⵓ ...
ⵇⴰⴷⴰⵎ ⵙⵉⴷⵉ,
ⵎⴰⵖⴰⵔ ⵏⴻⵜⵜⴰ ⴷ ⴰⵚⴻⴱⵃⴰⵏ,
ⵎⴰⵖⴰⵔ ⵜⴰⵎⴻⵅⵙⵉⵡⵜ ⵏⵏⴻⵙ ⵉⵛⴻⵡⵡⴰⵔⴻⵏ
ⵜᵉⵜⵜⵖⵉⵎⴰ ⵉ ⵍⴻⴱⴷⴰ.
2 ⴻⵊⵊ ⵉⵙⵔⴰⵉⵍ ⴰⴷ ⵢⵉⵏⵉ:
“ⵜⴰⵎⴻⵅⵙⵉⵡⵜ ⵏⵏⴻⵙ ⵉⵛⴻⵡⵡⴰⵔⴻⵏ
ⵜᵉⵜⵜⵖⵉⵎⴰ ⵉ ⵍⴻⴱⴷⴰ.”
3 ⴻⵊⵊ ⵜⴰⴷⴷⴰⵔⵜ ⵏ ⵀⴰⵔⵓⵏ ⴰⴷ ⵜⵉⵏⵉ
“ⵜⴰⵎⴻⵅⵙⵉⵡⵜ ⵏⵏⴻⵙ ⵉⵛⴻⵡⵡⴰⵔⴻⵏ
ⵜᵉⵜⵜⵖⵉⵎⴰ ⵉ ⵍⴻⴱⴷⴰ.”
4 ⴻⵊⵊ ⵉⵏⵏⵉ ⵉⵜⵜⴻⴳⴳⵯⴻⴷⴻⵏ ⵙⵉⴷⵉ ⴰⴷ ⵉⵏⵉⵏ:
“ⵜⴰⵎⴻⵅⵙⵉⵡⵜ ⵏⵏⴻⵙ ⵉⵛⴻⵡⵡⴰⵔⴻⵏ
ⵜᵉⵜⵜⵖⵉⵎⴰ ⵉ ⵍⴻⴱⴷⴰ.”
5 ⴷⴻⴳ ⵡⴻⴱⵔⵉⴷ ...
ⴷⵉ ⵍⴻⵃⵚⴰⵔⴻⵜ ⵍⴰⵖⵉⵖ ⵖⴰⵔ ⵙⵉⴷⵉ.
ⵙⵉⴷⵉ ⵢⴰⵔⵔⴰ-ⴷⴷ ⵅⴰⴼⵉ, ⵉⵡⵛⴰ ⴰⵢⵉ ⵜⵜⴰⵙⵉⵄ.
6 ⵙⵉⴷⵉ ⴰⵇⴰ-ⵜ ⴰⴽⵉⴷⵉ, ⵡⴰⵔ ⵜⵜⴻⴳⴳⵯⴻⴷⴻⵖ ⵛⴰ,
ⵎⴰⵖⴰⵔ ⵎⵉⵏ ⵉⵣⴻⵎⵎⴰⵔ ⴱⵏⴰⴷⴻⵎ
ⴰⴷ ⴰⵢⵉ ⵉⴳⴳ? ◘118:6 ⵔⵓⵎ. 8:31; ⵄⴱⵔ. 13:6
7 ⵙⵉⴷⵉ ⴰⵇⴰ-ⵜ ⴰⴽⵉⴷⵉ
ⵊⴰⵔ ⵢⵉⵏⵏⵉ ⴷ ⴰⵢⵉ ⵉⵡⵛⵉⵏ ⴰⴼⵓⵙ.
ⵏⴻⵛⵛ ⴰⴷ ⵅⴻⵣⵣⴰⵔⴻⵖ ⵖⴰⵔ ⵙⵡⴰⴷⴷⴰⵢ
ⵅ ⵢⵉⵏⵏⵉ ⴷ ⴰⵢⵉ ⵉⵛⴰⵔⵔⵀⴻⵏ.
8 ⵉⵃⵍⴰ ⴰⴷ ⴰⵔⴻⵡⵍⴻⵖ ⵖⴰⵔ ⵙⵉⴷⵉ
ⵅ ⵓⵜⴻⵛⵍⵉ ⵅ ⴱⵏⴰⴷⴻⵎ. ◘118:8 ⵉⵥⵀⴷ. 62:9, 10; 146:3; ⵉⵔⵎ. 17:5, 7
9 ⵉⵃⵍⴰ ⴰⴷ ⴰⵔⴻⵡⵍⴻⵖ ⵖⴰⵔ ⵙⵉⴷⵉ
ⵅ ⵓⵜⴻⵛⵍⵉ ⵅ ⵜⴰⵔⵡⴰ ⵏ ⵜⴰⵚⵉⵍⴻⵜ.
10 ⵎⴰⵔⵔⴰ ⵍⴻⴳⵏⵓⵙ ⵏⵏⴹⴻⵏ ⴰⵢⵉ-ⴷⴷ,
ⵏⴻⵛⵛ ⵖⴻⴹⵍⴻⵖ ⵜⴻⵏ ⵙ ⵢⵉⵙⴻⵎ ⵏ ⵙⵉⴷⵉ.
11 ⵏⵏⴹⴻⵏ ⴰⵢⵉ-ⴷⴷ, ⵡⴰⵀ, ⵇⵓⵡⵡⴰⵔⴻⵏ ⴰⵢⵉ.
ⵏⴻⵛⵛ ⵖⴻⴹⵍⴻⵖ ⵜⴻⵏ ⵙ ⵢⵉⵙⴻⵎ ⵏ ⵙⵉⴷⵉ.
12 ⵏⵉⵜⵏⵉ ⵏⵏⴹⴻⵏ ⴰⵢⵉ ⴰⵎ ⵜⵣⵉⵣⵡⴰ,
ⴰⵇⴰ ⴰⵎ ⵜⵎⴻⵙⵙⵉ ⵏ ⵉⵙⴻⵏⵏⴰⵏⴻⵏ ⵅⴻⵙⵢⴻⵏ.
ⵏⴻⵛⵛ ⵖⴻⴹⵍⴻⵖ ⵜⴻⵏ ⵙ ⵢⵉⵙⴻⵎ ⵏ ⵙⵉⴷⵉ.
13 ⵛⴻⴽ ⵜⵄⴰⵔⵏⴻⴷ ⴰⵢⵉ ⵙ ⵍⴻⵇⵙⴰⵃⴻⵜ
ⴰⵍⴰⵎⵉ ⵄⵍⴰⵃⴰⵍ ⵡⴹⵉⵖ,
ⵎⴰⵛⴰ ⵙⵉⴷⵉ ⵉⵡⵛⴰ ⴰⵢⵉ ⴰⴼⵓⵙ.
14 ⵙⵉⴷⵉ ⴷ ⵊⵊⴻⵀⴷ ⵉⵏⵓ ⴷ ⴰⵣⴻⵀⵀⴻⴷ ⵉⵏⵓ,
ⵏⴻⵜⵜⴰ ⵉⴷⵡⴻⵍ ⴰⵢⵉ ⴷ ⴰⵙⴻⵏⵊⴻⵎ.
15 ⴷⴻⴳ ⵉⵇⵉⴹⴰⵏ ⵏ ⵉⵎⵙⴻⴳⴳⴰⴷⴻⵏ ⵉⵜⵜⵡⴰⵙⴻⵍ
ⵍⵃⴻⵙⵙ ⵏ ⵓⵙⵍⵉⵡⵍⴻⵡ ⴷ ⵓⵙⴻⵏⵊⴻⵎ.
ⴰⴼⵓⵙ ⴰⴼⵓⵙⵉ ⵏ ⵙⵉⴷⵉ ⵉⴳⴳⴰ ⵙ ⵊⵊⴻⵀⴷ.
16 ⴰⴼⵓⵙ ⴰⴼⵓⵙⵉ ⵏ ⵙⵉⴷⵉ ⵉⵜⵜⵡⴰⵙⵙⴳⴻⵄⵄⴻⴷ,
ⴰⴼⵓⵙ ⴰⴼⵓⵙⵉ ⵏ ⵙⵉⴷⵉ ⵉⴳⴳⴰ ⵙ ⵡⴻⵎⵃⴰⴹ. ◘118:16 ⵍⴽ. 1:51
17 ⵏⴻⵛⵛ ⵡⴰⵔ ⵜⵜⵎⴻⵜⵜⵉⵖ ⵛⴰ, ⴰⴷ ⴷⴷⴰⵔⴻⵖ,
ⴰⴷ ⴱⴰⵔⵔⵃⴻⵖ ⵜⵉⵎⴻⴳⴳⴰ ⵏ ⵙⵉⴷⵉ.
18 ⵙⵉⴷⵉ ⵉⵡⴻⴱⴱⴻⵅ ⴰⵢⵉ ⴰⵟⵟⴰⵙ,
ⵎⴰⵛⴰ ⵡⴰⵔ ⴷ ⴰⵢⵉ ⵉⵡⵛⵉ ⵉ ⵍⵎⴻⵡⵜ.
19 ⵖⴰⵔ ⵡⴰⴷⴰⴼ ...
ⴰⵔⵣⵎⴻⵎ ⴰⵢⵉ ⵜⵉⵡⵡⵓⵔⴰ ⵏ ⵜⵙⴻⴳⴷⴰ,
ⴰⴷ ⵣⵣⴰⵢⵙⴻⵏⵜ ⴰⴷⴼⴻⵖ, ⴰⴷ ⵇⴰⴷⵉⵖ ⵙⵉⴷⵉ. ◘118:19 ⵉⵛⴰ. 26:2
20 ⵉⵏⵏⵉ ⵢⴰⵔⴻⵃⵃⴱⴻⵏ ⵣⴻⴳ ⵢⵉⵏⵏⵉ ⵉⵜⵜⴰⴷⴼⴻⵏ ⵇⵇⴰⵔⴻⵏ ...
ⵜⴰ ⴷ ⵜⴰⵡⵡⴰⵔⵜ ⵏ ⵙⵉⴷⵉ,
ⵉⵎⵙⴻⴳⴳⴰⴷⴻⵏ ⴰⴷ ⵣⵣⴰⵢⴻⵙ ⴰⴷⴼⴻⵏ.
21 ⵏⴻⵛⵛ ⴰⴷ ⴰⵛ ⵇⴰⴷⵉⵖ ⵓⵎⵉ ⴷ ⴰⵢⵉ ⵜⴻⵙⵍⵉⴷ,
ⵜⴷⴻⵡⵍⴻⴷ ⴰⵢⵉ ⴷ ⴰⵙⴻⵏⵊⴻⵎ.
22 ⴰⵥⵔⵓ ⵉ ⵡⴰⵔ ⵅⵙⴻⵏ ⵉⴱⴻⵏⵏⴰⵢⴻⵏ,
ⵉⴷⵡⴻⵍ ⴷ ⵉⵅⴻⴼ ⵏ ⵜⴻⵖⵎⴰⵔⵜ. ◘118:22 ⵉⵛⴰ. 8:14; 28:16; ⵎⵜ. 21:42; ⵎⴽ. 12:10; ⵍⴽ. 20:17; ⵍⴻⵅ. 4:11; ⵔⵓⵎ. 9:33; ⴰⴼⴰ. 2:20; 1 ⴱⵟ. 2:4, 7
23 ⵡⴰ ⵢⵓⵙⴰ-ⴷⴷ ⵣⵉ ⵙⵉⴷⵉ
ⵓ ⵎⴰⵏ ⴰⵢⴰ ⴷ ⵍⴻⵄⵊⴻⴱ ⴷⵉ ⵜⵉⵟⵟⴰⵡⵉⵏ ⵏⵏⴻⵖ.
24 ⵡⴰ ⴷ ⴰⵙⵙ ⵉ ⵉⴳⴳⴰ ⵙⵉⴷⵉ,
ⴻⵊⵊ ⴰⵏⴻⵖ ⴰⴷ ⵏⴰⵔⵛⴻⵇ ⵓ ⴰⴷ ⴷⴰⵢⴻⵙ ⵏⴼⴰⵔⵃ.
25 ⴰ ⵙⵉⴷⵉ, ⴰⵡⵉ-ⴷⴷ ⴰⵙⴻⵏⵊⴻⵎ,
ⴰ ⵙⵉⴷⵉ, ⴰⵡⵉ-ⴷⴷ ⴰⴼⵍⴰⵃ.
26 ⵍⴱⴰⵔⴰⴽⴰ ⵉ ⵡⴻⵏⵏⵉ ⴷⴷ ⵖⴰ ⵢⴰⵙⴻⵏ
ⵙ ⵢⵉⵙⴻⵎ ⵏ ⵙⵉⴷⵉ!
ⵏⴻⵛⵛⵉⵏ ⴰⴷ ⴽⴻⵏⵏⵉⵡ ⵏⴱⴰⵔⴻⴽ
ⵣⵉ ⵜⴰⴷⴷⴰⵔⵜ ⵏ ⵙⵉⴷⵉ. ◘118:26 ⵎⵜ. 21:9; ⵎⵜ. 23:39; ⵎⴽ. 11:9, 10; ⵍⴽ. 19:38; ⵢⵃ. 12:13
27 ⴰⵔⴻⴱⴱⵉ ⴷ ⵙⵉⴷⵉ ⵏⵏⵉ ⴷ ⴰⵏⴻⵖ ⵉⴳⴳⵉⵏ ⵜⴰⴼⴰⵡⵜ.
ⵇⵏⴻⵎ ⵜⴰⵖⴰⵔⵚⵜ ⵏ ⵍⵄⵉⴷ ⵙ ⵉⵙⴻⵖⵡⴰⵏ
ⵖⴰⵔ ⵡⴰⵛⵛⴰⵡⴻⵏ ⵏ ⵓⵄⴰⵍⵟⴰⵔ,
ⵍⵎⴻⴷⴱⴻⵃ ⵏ ⵡⴻⵛⵎⴰⴹ.
28 ⵉⵏⵏⵉ ⵉⵜⵜⴰⴷⴼⴻⵏ ⵇⵇⴰⵔⴻⵏ ...
ⵛⴻⴽ ⴷ ⴰⵔⴻⴱⴱⵉ ⵉⵏⵓ, ⵙ ⵓⵢⴰ ⴰⴷ ⵛⴻⴽ ⵇⴰⴷⵉⵖ,
ⴰ ⴰⵔⴻⴱⴱⵉ ⵉⵏⵓ, ⴰⴷ ⵛⴻⴽ ⵙⵙⵄⵓⴵⴻⵖ.
29 ⵎⴰⵔⵔⴰ ⵊⵎⵉⵄ ...
ⵇⴰⴷⴰⵎ ⵙⵉⴷⵉ, ⵎⴰⵖⴰⵔ ⵏⴻⵜⵜⴰ ⵉⵚⴱⴻⵃ,
ⵎⴰⵖⴰⵔ ⵜⴰⵎⴻⵅⵙⵉⵡⵜ ⵏⵏⴻⵙ ⵉⵛⴻⵡⵡⴰⵔⴻⵏ
ⵜᵉⵜⵜⵖⵉⵎⴰ ⵉ ⵍⴻⴱⴷⴰ.