1 ⵉⵣⵍⵉ ⵅ ⵉⵣⵍⴰⵏ ⵏⵏⵉ ⵉⴵⴰⵏ ⵏ ⵙⵓⵍⵉⵎⴰⵏ.

2 “ⴻⵊⵊ ⵉ-ⵜ ⴰⴷ ⴰⵢⵉ ⵉⵙⵙⵓⴷⴻⵎ

ⵙ ⵉⵙⵓⴷⵉⵎⴻⵏ ⵏ ⵓⵇⴻⵎⵎⵓⵎ ⵏⵏⴻⵙ,

ⵎⵉⵏⵣⵉ ⵓⵙⵃⵉⵏⵏⴻⴱ ⵏⵏⴻⵛ ⵃⵙⴻⵏ ⵣⵉ ⴱⵉⵏⵓ.

3 ⵍⴻⴼⵡⴰⵃⴻⵜ ⵏ ⵣⵣⴻⵛⵜ ⵏⵏⴻⵛ ⵜⴻⵛⵏⴰ,

ⵉⵙⴻⵎ ⵏⵏⴻⵛ ⴰⵎ ⵣⵣⴻⵛⵜ ⵉⵣⴻⴵⵄⴻⵏ,

ⵅ ⵓⵢⴰ ⵜⵜⴻⵅⵙⴻⵏⵜ ⵛⴻⴽ ⵜⴻⵄⵣⴰⵔⵉⵢⵢⵉⵏ.

4 ⵊⴱⴻⴷ ⴰⵢⵉ ⴰⵡⴰⵔⵏⵉ ⴰⵛ,

ⵏⴻⵛⵛⵉⵏ ⴰⴷ ⵏⴰⵣⵣⴻⵍ ⴰⵡⴰⵔⵏⵉ ⴰⵛ!

ⴰⵊⴻⴵⵉⴷ ⵉⵏⴷⴻⵀ ⴰⵢⵉ ⴷⴻⴳ ⵉⵅⴰⵎⵎⴻⵏ ⵏⵏⴻⵙ.

ⴻⵊⵊ ⴰⵏⴻⵖ ⴰⴷ ⵏⴰⵔⵛⴻⵇ ⵓ ⴰⴷ ⵣⵣⴰⵢⴻⴽ ⵏⴼⴰⵔⵃ,

ⴰⴷ ⵏⴻⵄⵇⴻⵍ ⵅ ⵓⵙⵃⵉⵏⵏⴻⴱ ⵏⵏⴻⵛ

ⴽⵜⴰⵔ ⵅ ⵎⵉⵏ ⵖⴰ ⵏⴻⵄⵇⴻⵍ ⵅ ⴱⵉⵏⵓ.

ⵏⵉⵛⴰⵏ ⵜⵜⴻⵅⵙⴻⵏⵜ ⵛⴻⴽ.”

5 “ⴷ ⵜⴰⴱⴰⵔⵛⴰⵏⵜ ⵏⴻⵛⵛ, ⵓ ⵚⴻⴱⵃⴻⵖ,

ⴰ ⵢⴻⵙⵙⵉⵙ ⵏ ⵓⵔⵛⴰⵍⵉⵎ,

ⴰⵎ ⵜⵇⵉⴹⵓⵏⵉⵏ ⵏ ⵇⵉⴷⴰⵔ,

ⴰⵎ ⵍⵉⵣⴰⵔⴰⵜ ⵏ ⵙⵓⵍⵉⵎⴰⵏ.

6 ⵡⴰⵔ ⴷ ⴰⵢⵉ ⵅⴻⵣⵣⴰⵔⴻⵏⵜ ⴰⵎⵎⵓ,

ⵎⵉⵏⵣⵉ ⵏⴻⵛⵛ ⴱⴱⴰⵔⵛⵏⴻⵖ,

ⵎⵉⵏⵣⵉ ⵜⴻⵙⵙⴻⵛⵎⴻⴹ ⴰⵢⵉ ⵜⴼⵓⵛⵜ,

ⵉⵃⴻⵏⵊⵉⵔⴻⵏ ⵏ ⵢⴻⵎⵎⴰ ⵜⵓⵖⴰ ⵅⴻⵢⵢⵇⴻⵏ ⵅⴰⴼⵉ,

ⴳⴳⵉⵏ ⴰⵢⵉ ⴰⴷ ⵃⴹⵉⵖ ⵉⵎⴰⵔⵊⴰⵄⴻⵏ ⵏ ⵓⴹⵉⵍ.

ⴰⵎⴰⵔⵊⴻⵄ ⵏ ⵢⵉⵅⴻⴼ ⵉⵏⵓ ⵡⴰⵔ ⵜ ⵃⴹⵉⵖ ⵛⴰ.”

7 “ⵛⴻⴽ, ⵡⴻⵏⵏⵉ ⵉⵜⵜⴻⵅⵙ ⴱⵓⵃⴱⴻⵍ ⵉⵏⵓ,

ⵉⵏⵉ ⴰⵢⵉ, ⵎⴰⵏⵉ ⵜⴰⵔⴻⴽⴽⵡⴻⵙⴻⴷ,

ⵎⴰⵏⵉ ⵜⴻⵙⵙⴰⵔⴻⵢⵢⴰⵃⴻⴷ ⵜⴰⵃⵉⵎⴰⵔⵜ

ⵖⴰⵔ ⵟⵃⴰ ⵏ ⵓⵣⵉⵍ,

ⵎⵉⵏⵣⵉ ⵉ ⵓⵎⵉ ⵖⴰ ⵉⵍⵉⵖ ⴰⵎ ⵜⴻⵏⵏⵉ ⵉⵃⴻⵊⴱⴻⵏ

ⵖⴰⵔ ⵜⵃⵉⵎⵔⵉⵡⵉⵏ ⵏ ⵉⵎⵄⴰⵛⴰⵔⴻⵏ ⵏⵏⴻⵛ?”

8 “ⵎⴰⵍⴰ ⵛⴻⵎ ⵡⴰⵔ ⵜ ⵜⴻⵙⵙⵉⵏⴻⴷ,

ⵛⴻⵎ ⵜⴻⵏⵏⵉ ⵉⵛⵏⴰⵏ ⵇⴰⵄ ⵊⴰⵔ ⵜⴻⵎⵖⴰⵔⵉⵏ,

ⵅⴻⵏⵏⵉ ⴼⴼⴻⵖ, ⴹⴼⴰⵔ ⵍⴰⵜⴰⵔ ⵏ ⵡⵓⴵⵉ,

ⴰⵔⵡⴻⵙ ⵜⵉⵖⴰⴹⵜⵉⵏ ⵏⵏⴻⵎ

ⵎⴰⵏⵉ ⵣⴻⴷⴷⵖⴻⵏ ⵉⵎⴻⴽⵙⴰⵡⴻⵏ.” ◼1:8 ⵉⵎⴻⴽⵙⴰⵡⴻⵏ-ⵏⵉⵖ ‘ⵉⵏⵉⵞⴰⵏ’.

9 “ⵙⵙⴻⵎⵇⵓⴷⴷⵉⵖ ⵛⴻⵎ ⴰⴽ-ⴷ ⵍⵄⴻⵡⴷⴰ ⵉⵏⵓ

ⵣⵣⴰⵜ ⵉⴽⴰⵔⵔⵓⵜⴻⵏ ⵏ ⴼⵉⵔⵄⵓⵏ,

ⴰ ⵜⴰⵎⴻⴷⴷⵓⴽⴽⴻⵍⵜ ⵉⵏⵓ.

10 ⵎⴻⵛⵃⴰⵍ ⵚⴻⴱⵃⴻⵏ ⵉⵎⴻⴳⴳⵉⵣⴻⵏ ⵏⵏⴻⵎ

ⵊⴰⵔ ⵜⵙⴻⴷⴷⵢⵉⵏ,

ⵉⵔⵉ ⵏⵏⴻⵎ ⵊⴰⵔ ⵉⴼⵉⵍⴰⵏ ⵙ ⵜⵢⴰⵇⵓⵜⵉⵏ.

11 ⴰⴷ ⴰⵎ ⵏⴻⴳⴳ ⵜⵉⵙⴻⴷⴷⵢⵉⵏ ⵏ ⵡⵓⵔⴻⵖ,

ⴰⴽ-ⴷ ⵜⵏⴻⵇⵇⵉⴹⵉⵏ ⵏ ⵏⵏⵓⵇⴰⵔⵜ.”

12 “ⵎⵉⵏ ⵖⴰ ⵢⴻⴽⴽ ⵓⵊⴻⴵⵉⴷ

ⵉⵇⵇⵉⵎ ⵖⴰⵔ ⵟⵟⴰⴱⵍⴰ ⵏⵏⴻⵙ ⵜⴰⵇⵓⵔⴰⵔⵉⵜ,

ⵉⵜⵜⵉⵛⵛ ⵚⵚⴻⵏⴱⴻⵍ ⵉⵏⵓ ⵍⴻⴼⵡⴰⵃⴻⵜ ⵏⵏⴻⵙ.

13 ⵍⵍⵉⴼ ⵉⵏⵓ ⵉⵜⵜⴻⴳⴳ ⴰⵢⵉ

ⴰⵎ ⵜⴻⵛⵢⴰⵔⵜ ⵏ ⵎⵉⵔⵔⵓ,

ⵜⴻⵏⵏⵉ ⵉⵙⵙⴻⵏⵙⴻⵏ ⵊⴰⵔ ⵉⴷⵎⴰⵔⴻⵏ ⵉⵏⵓ.

14 ⵍⵍⵉⴼ ⵉⵏⵓ ⵉ ⵏⴻⵛⵛ

ⴰⵎ ⵜⵇⴻⴱⴱⵉⴹⵜ ⵏ ⵏⴻⵡⵡⴰⵛ ⵏ ⵍⵃⴻⵏⵏⵉ,

ⴷⴻⴳ ⵉⵎⴰⵔⵊⴰⵄⴻⵏ ⵏ ⵓⴹⵉⵍ ⵏ ⵄⴰⵢⵏ-ⵊⴰⴷⵉ.”

15 “ⵅⵣⴰⵔ, ⵜⴻⵛⵏⵉⴷ ⵛⴻⵎ,

ⵜⴰⵎⴻⴷⴷⵓⴽⴽⴻⵍⵜ ⵉⵏⵓ!

ⵅⵣⴰⵔ, ⵛⴻⵎ ⵜⴻⵛⵏⵉⴷ,

ⵜⵉⵟⵟⴰⵡⵉⵏ ⵏⵏⴻⵎ ⴷ ⵉⴷⴱⵉⵔⴻⵏ.”

16 “ⵅⵣⴰⵔ, ⵛⴻⴽ ⵜⴻⵛⵏⵉⴷ, ⴰ ⵍⵍⵉⴼ ⵉⵏⵓ,

ⵡⴰⵀ, ⵜⴹⴰⵔⴼⴻⴷ,

ⵜⵓⵣⵣⵉⵣⴻⵡⵜ ⴷ ⵜⴰⵙⵙⵓⵜ ⵏⵏⴻⵖ,

17 ⵜⵉⵃⴻⵏⵢⴰ ⵏ ⵜⵓⴷⵔⵉⵏ ⵏⵏⴻⵖ ⴷ ⵜⵉⵏⴻⴳⵍⵉⵏ,

ⵜⵉⵃⴻⵏⵢⴰ ⵏ ⵜⵣⴻⵇⵇⴰ

ⴰⵇⴰ ⴰⵜⴻⵏⵜ ⴷ ⵜⵉⵛⴻⵊⵊⵓⵔⴰ ⵏ ⵓⵎⴻⵔⵣⵉ.”