1 ⴷⴻⴳ ⵓⵢⵓⵔ ⵡⵉⵙⵙ ⵜⵎⴻⵏⵢⴰ, ⴷⴻⴳ ⵓⵙⴻⴳⴳⵯⴰⵙ ⵡⵉⵙⵙ ⵜⵎⴻⵏⵢⴰ ⵏ ⴷⴰⵔⵉⵢⵓⵙ, ⵢⵓⵙⴰ-ⴷⴷ ⵡⴰⵡⴰⵍ ⵏ ⵙⵉⴷⵉ ⵖⴰⵔ ⵣⴰⴽⴰⵔⵉⵢⵢⴰ, ⵎⵎⵉⵙ ⵏ ⴱⴰⵔⴰⵅⵢⴰ, ⵎⵎⵉⵙ ⵏ ⵄⵉⴷⴷⵓ, ⴰⵏⴰⴱⵉ, ⵉⵏⵏⴰ:

2 “ⵙⵉⴷⵉ ⵜⵓⵖⴰ ⵉⴼⴼⵓⴳⴻⵎ ⴰⵟⵟⴰⵙ ⵅ ⵍⴻⵊⴷⵓⴷ ⵏⵡⴻⵎ. 3 ⵉⵏⵉ ⴰⵙⴻⵏ: ‘ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ: ⴷⵡⴻⵍ-ⴷⴷ ⵖⴰⵔⵉ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ, ⵅⴻⵏⵏⵉ ⵏⴻⵛⵛ ⴰⴷ ⵖⴰⵔⵡⴻⵎ-ⴷⴷ ⴷⴻⵡⵍⴻⵖ, ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ. 4 ⵡⴰⵔ ⵜⵜⵉⵍⵉⵎ ⴰⵎ ⵍⴻⵊⴷⵓⴷ ⵏⵡⴻⵎ ⵉ ⵢⵉⵏⵏⵉ ⵓⵎⵉ ⴱⴰⵔⵔⵃⴻⵏ ⵉⵏⴰⴱⵉⵢⵢⴻⵏ ⵏ ⵣⵉⵛ, ⵏⵏⴰⵏ: ‘ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ, ⴷⴻⵡⵍⴻⵎ-ⴷⴷ ⵅⴻⵏⵏⵉ ⵣⴻⴳ ⵉⴱⵔⵉⴷⴻⵏ ⵏⵡⴻⵎ ⵉⵄⴻⴼⴼⵏⴻⵏ ⵓ ⵣⵉ ⵜⵎⴻⴳⴳⴰ ⵏⵡⴻⵎ ⵉⵄⴻⴼⴼⵏⴻⵏ!’ ⵎⴰⵛⴰ ⵏⵉⵜⵏⵉ ⵡⴰⵔ ⵙⵍⵉⵏ ⵛⴰ ⵓ ⵡⴰⵔ ⴷ ⴰⵢⵉ ⵡⵛⵉⵏ ⴰⵎⴻⵣⵣⵓⵖ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ. ◘1:4 ⵉⵛⴰ. 31:6; ⵉⵔⵎ. 3:12; 18:11; ⵃⵉⵥ. 18:30; ⵃⵓⵛ. 14:2 5 ⵍⴻⵊⴷⵓⴷ ⵏⵡⴻⵎ, ⵎⴰⵏⵉ ⴵⴰⵏ? ⵓ ⵉⵏⴰⴱⵉⵢⵢⴻⵏ, ⵎⴰ ⴰⴷ ⴷⴷⴰⵔⴻⵏ ⵉ ⵍⴻⴱⴷⴰ? 6 ⵎⴰⵛⴰ ⴰⵡⴰⵍⴻⵏ ⵉⵏⵓ ⴷ ⵜⵡⴻⵚⵚⴰ ⵉⵏⵓ ⵏⵏⵉ ⵓⵎⵓⵔⴻⵖ ⵉ ⵉⵎⵙⴻⵅⵅⴰⵔⴻⵏ ⵉⵏⵓ, ⵉⵏⴰⴱⵉⵢⵢⴻⵏ, ⵎⴰ ⵡⴰⵔ ⵍⵇⵉⴼⴻⵏ ⵍⴻⵊⴷⵓⴷ ⵏⵡⴻⵎ? ⵏⵉⵜⵏⵉ ⴷⴻⵡⵍⴻⵏ-ⴷⴷ, ⵏⵏⴰⵏ: ⴰⵎ ⵎⴰⵎⵎⴻⵛ ⵜⵓⵖⴰ ⵙⵉⴷⵉ ⵏ ⵍⵄⴻⵙⴽⴰⵔⴰⵜ ⵉⵏⴻⴽⴽⵯⴰ ⴰⴷ ⵢⴻⴳⴳ ⴰⴽⵉⴷⵏⴻⵖ ⵄⵍⴰⵃⵙⴰⴱ ⵉⴱⵔⵉⴷⴻⵏ ⵏⵏⴻⵖ ⴷ ⵜⵎⴻⴳⴳⴰ ⵏⵏⴻⵖ, ⴰⵎⵎⵓ ⵉ ⵉⴳⴳⴰ ⵏⴻⵜⵜⴰ ⴰⴽⵉⴷⵏⴻⵖ.’ ” ◘1:6 ⵉⴳⵊⴷ. 1:18

7 ⴷⴻⴳ ⵡⴰⵙⵙ ⵡⵉⵙⵙ ⴰⵔⴻⴱⵄⴰ ⵓ-ⵄⵉⵛⵔⵉⵏ, ⴷⴻⴳ ⵓⵢⵓⵔ ⵡⵉⵙⵙ ⵃⵉⵟⴰⵛ, ⵡⴰ ⴷ ⴰⵢⵓⵔ ⵏ ⵛⴰⴱⴰⵟ, ⴷⴻⴳ ⵓⵙⴻⴳⴳⵯⴰⵙ ⵡⵉⵙⵙ ⵜⵏⴰⵢⴻⵏ ⵏ ⴷⴰⵔⵉⵢⵓⵙ ⵢⵓⵙⴰ-ⴷⴷ ⵡⴰⵡⴰⵍ ⵏ ⵙⵉⴷⵉ ⵖⴰⵔ ⵣⴰⴽⴰⵔⵉⵢⵢⴰ, ⵎⵎⵉⵙ ⵏ ⴱⴰⵔⴰⵅⵢⴰ, ⵎⵎⵉⵙ ⵏ ⵄⵉⴷⴷⵓ, ⴰⵏⴰⴱⵉ, ⵃⵉⵎⴰ ⴰⴷ ⴽⵉⵙ ⵉⵙⵙⵉⵡⴻⵍ.

8 ⵏⴻⵛⵛ ⵥⵔⵉⵖ ⴷⵉ ⴵⵉⵍⴻⵜ, ⵅⵣⴰⵔ, ⴰⵇⴰ ⵉⵊⵊ ⵏ ⵡⴻⵔⵢⴰⵣ ⵅ ⵉⵊⵊ ⵏ ⵓⵢⵉⵙ ⴷ ⴰⵣⴻⴳⴳⵯⴰⵖ. ⵏⴻⵜⵜⴰ ⵜⵓⵖⴰ ⵉⴱⴻⴷⴷ ⵊⴰⵔ ⵜⵛⴻⵊⵊⵓⵔⴰ ⵏ ⵜⵔⵉⵃⴰⵏⵜ ⴷⵉ ⵍⴰⴵⴰⵖ ⵓ ⴰⵡⴰⵔⵏⵉ ⴰⵙ ⴷⵉⵏ ⵉⵢⵙⴰⵏ ⵉⵣⴻⴳⴳⵯⴰⵖⴻⵏ ⴷ ⵢⴻⵢⵙⴰⵏ ⵉⵇⴰⵔⵇⴰⵛⴻⵏ ⴷ ⵢⴻⵢⵙⴰⵏ ⵉⵛⴻⵎⵍⴰⵍⴻⵏ. 9 ⵏⴻⵛⵛ ⵏⵏⵉⵖ: “ⵙⵉⴷⵉ ⵉⵏⵓ, ⵎⵉⵏ ⵄⵏⴰⵏ ⵉⵏⴰ?” ⵍⴻⵅⴷⴻⵏⵏⵉ ⵉⵏⵏⴰ ⴰⵢⵉ ⵍⵎⴰⵍⴰⴽ ⵏⵏⵉ ⴽⵉⴷⵉ ⵉⵙⵙⴰⵡⴰⵍⴻⵏ: “ⵏⴻⵛⵛ ⴰⴷ ⴰⵛ ⵙⵙⴻⵛⵏⴻⵖ ⵎⵉⵏ ⵄⵏⴰⵏ ⵉⵏⴰ!” 10 ⴰⵔⵢⴰⵣ ⵏⵏⵉ ⵉⴱⴻⴷⴷⴻⵏ ⵊⴰⵔ ⵜⵛⴻⵊⵊⵓⵔⴰ ⵏ ⵜⵔⵉⵃⴰⵏⵜ, ⵢⴰⵔⵔⴰ-ⴷⴷ, ⵉⵏⵏⴰ: “ⵉⵏⴰ ⴷ ⵉⵏⵏⵉ ⴷⴷ-ⵉⵙⵙⴻⴽⴽ ⵙⵉⴷⵉ ⵃⵉⵎⴰ ⴰⴷ ⵙⵓⵃⴻⵏ ⵅ ⵜⴻⵎⵎⵓⵔⵜ.” 11 ⵏⵉⵜⵏⵉ ⴰⵔⵔⵉⵏ-ⴷⴷ ⵅ ⵍⵎⴰⵍⴰⴽ ⵏ ⵙⵉⴷⵉ, ⵡⴻⵏⵏⵉ ⵉⴱⴻⴷⴷⴻⵏ ⵊⴰⵔ ⵜⵛⴻⵊⵊⵓⵔⴰ ⵏ ⵜⵔⵉⵃⴰⵏⵜ, ⵏⵏⴰⵏ: “ⵏⴻⵛⵛⵉⵏ ⵏⵙⵓⵃ ⴷⵉ ⵜⴻⵎⵎⵓⵔⵜ, ⵓ ⵅⵣⴰⵔ, ⵎⴰⵔⵔⴰ ⵜⴰⵎⵎⵓⵔⵜ ⵜⴻⵇⵇⵉⵎ, ⵜⴰⵔⵙⴰ.”

12 ⵅⴻⵏⵏⵉ ⵢⴰⵔⵔⴰ-ⴷⴷ ⵍⵎⴰⵍⴰⴽ ⵏ ⵙⵉⴷⵉ, ⵉⵏⵏⴰ: “ⴰ ⵙⵉⴷⵉ ⵏ ⵍⵄⴻⵙⴽⴰⵔⴰⵜ, ⴰⵍ ⵎⴻⵍⵎⵉ ⵄⴰⴷ ⵡⴰⵔ ⵜᵉⵜⵜⵃⵉⵏⵏⵉⴷ ⵅ ⵓⵔⵛⴰⵍⵉⵎ ⵓ ⵅ ⵜⵏⴻⴷⴷⴰⵎ ⵏ ⵢⴰⵀⵓⴷⴰ ⵏⵏⵉ ⵅ ⵜⵓⵖⴰ ⵜⵙⴻⵅⴹⴻⴷ ⵙⴻⴱⵄⵉⵏ ⵏ ⵉⵙⴻⴳⴳⵯⵓⵙⴰ-ⵢⴰ?” 13 ⵙⵉⴷⵉ ⵢⴰⵔⵔⴰ-ⴷⴷ ⵅ ⵍⵎⴰⵍⴰⴽ ⵏⵏⵉ ⴽⵉⴷⵉ ⵉⵙⵙⴰⵡⴰⵍⴻⵏ ⵙ ⵡⴰⵡⴰⵍⴻⵏ ⵛⵏⴰⵏ, ⵙ ⵡⴰⵡⴰⵍⴻⵏ ⵏ ⵓⴼⴻⵡⵡⴻⵊ. 14 ⵍⵎⴰⵍⴰⴽ ⵏⵏⵉ ⴽⵉⴷⵉ ⵉⵙⵙⴰⵡⴰⵍⴻⵏ, ⵉⵏⵏⴰ ⴰⵢⵉ: “ⴱⴰⵔⵔⴻⵃ, ⵉⵏⵉ:

‘ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ:

ⵏⴻⵛⵛ ⵓⵙⵎⴻⵖ ⴷⵉ ⵟⵟⵡⴻⵄ ⵏ ⵓⵔⵛⴰⵍⵉⵎ

ⴷ ⵚⵉⵀⵢⵓⵏ ⵙ ⵡⴰⵙⴰⵎ ⴷ ⴰⵎⴻⵇⵇⵔⴰⵏ.

15 ⵙ ⵉⵊⵊ ⵏ ⵓⴷⵓⵇⵇⴻⵣ ⴰⵎⴻⵇⵇⵔⴰⵏ ⵏ ⵡⴻⵖⴹⴰⴱ ⵉⵏⵓ

ⴼⴼⵓⴳⵎⴻⵖ ⵅ ⵍⴻⴳⵏⵓⵙ ⵉⵏⵏⴻⴼⵅⴻⵏ.

ⵏⴻⵛⵛ ⵜⵓⵖⴰ ⴼⴼⵓⴳⵎⴻⵖ ⵎⵖⵉⵔ ⵛⵡⴰⵢⵜ ⵏ ⵍⵡⴻⵇⵜ,

ⵎⴰⵛⴰ ⵏⵉⵜⵏⵉ ⵔⵓⵃⴻⵏ ⴰⵔⵏⵉⵏ ⴷⴰⵢⴻⵙ.’

16 ⵙ ⵓⵢⴰ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ:

‘ⵏⴻⵛⵛ ⴷⴻⵡⵍⴻⵖ-ⴷⴷ ⵖⴰⵔ ⵓⵔⵛⴰⵍⵉⵎ ⵙ ⵜⴻⵃⵏⵓⵏⴻⵛⵜ,

ⵜⴰⴷⴷⴰⵔⵜ ⵉⵏⵓ ⴰⴷ ⵜᵉⵜⵜⵡⴰⴱⵏⴰ ⴷⴰⵢⴻⵙ,

ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ,

ⵓⵛⴰ ⴰⴼⵉⵍⵓ ⵏ ⵍⴻⵄⴱⴰⵔ

ⴰⴷ ⵉⵜⵜⵡⴰⴳⴳ ⵅ ⵓⵔⵛⴰⵍⵉⵎ.’

17 ⴰⵔⵏⵉ ⴱⴰⵔⵔⴻⵃ, ⵉⵏⵉ:

‘ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ:

ⵜⵉⵏⴻⴷⴷⴰⵎ ⵉⵏⵓ ⴰⴷ ⴼⴻⵢⵢⴹⴻⵏⵜ ⵄⴰⵡⴻⴷ ⵙ ⵍⵅⴰⵔ,

ⵎⴰⵖⴰⵔ ⵙⵉⴷⵉ ⴰⴷ ⵉⵙⵙⴼⴻⵡⵡⴻⵊ ⵚⵉⵀⵢⵓⵏ ⵄⴰⵡⴻⴷ

ⵓ ⵏⴻⵜⵜⴰ ⴰⴷ ⵉⵅⴹⴰⵔ ⵓⵔⵛⴰⵍⵉⵎ ⵄⴰⵡⴻⴷ.’ ”