9
1 ⵍⵃⵓⴽⵎ ⵉⵙⵙⴰⴳⴳⵯⴰⴷⴻⵏ ⵏ ⵡⴰⵡⴰⵍ ⵏ ⵙⵉⴷⵉ ⵅ ⵜⴻⵎⵎⵓⵔⵜ ⵏ ⵃⴰⴷⵔⴰⵅ,
ⵍⵃⵓⴽⵎ ⵏⵏⵉ ⵢⴰⵔⵙⴰⵏ ⵅ ⴷⵉⵎⴰⵛⵇ.
“ⵎⴰⵖⴰⵔ ⵙⵉⴷⵉ ⵉⵃⴻⵟⵟⴰ ⵅ ⴱⵏⴰⴷⴻⵎ
ⵓ ⵅ ⵎⴰⵔⵔⴰ ⵜⵉⵇⴻⴱⴱⴰⵍ ⵏ ⵉⵙⵔⴰⵉⵍ,
2 ⵓⵍⴰ ⵅ ⵃⴰⵎⴰⵜ ⵉ-ⵜⵜ-ⴷⴷ-ⵉⵍⴻⵙⵇⴻⵏ,
ⵅ ⵚⵓⵔ ⴷ ⵚⵉⴷⵓⵏ,
ⵡⴰⵅⵅⴰ ⵏⵉⵜⴻⵏⵜⵉ ⴷ ⵜⵉⵎⵉⵖⵉⵙⵉⵏ ⴰⵟⵟⴰⵙ.
3 ⵜⴻⴱⵏⴰ ⵚⵓⵔ ⵉⵊⵊ ⵏ ⵍⴱⴰⵔⴰⵊ ⵉ ⵢⵉⵅⴻⴼ ⵏⵏⴻⵙ
ⵓ ⵜⴻⵢⵔⵓ ⵏⵏⵓⵇⴰⵔⵜ ⴰⵎ ⵜⵄⴻⵊⵊⴰⵊⵜ
ⴷ ⵡⵓⵔⴻⵖ ⵉⵇⵇⵓⵔⴻⵏ ⴰⵎ ⵓⴱⴻⴵⴰⵄ ⵏ ⵉⵎⴻⵙⵔⴰⵇ.
4 ⵅⵣⴰⵔ, ⵙⵉⴷⵉ ⵉⵏⵓ ⴰⴷ ⵜⵜ ⵉⵟⵟⴻⴼ,
ⴰⴷ ⵉⵡⵡⴻⵜ ⵍⴱⴰⵔⴰⵊ ⵏⵏⴻⵙ ⵖⴰⵔ ⵍⴻⴱⵃⴰⵔ,
ⵓⵛⴰ ⴰⴷ ⵜⵜ ⵜⴻⵛⵛ ⵜⵎⴻⵙⵙⵉ.”
5 “ⴰⵛⴽⴻⵍⵓⵏ ⴰⴷ ⵜⵜ ⵜⵥⴰⵔ, ⴰⴷ ⵜⴻⴷⵡⴻⵍ ⵜⴻⴳⴳⵯⴻⴷ,
ⴰⵎⵎⵓ ⵓⵍⴰ ⴷ ⵖⴰⵣⵣⴰ, ⴰⴷ ⵜⴰⵔⵊⵉⵊ ⴰⵟⵟⴰⵙ,
ⵓⵍⴰ ⴷ ⵄⴰⵇⵔⵓⵏ, ⵎⴰⵖⴰⵔ ⴰⴷ ⵉⴼⵛⴻⵍ ⵓⵔⴰⵊⵉ ⵏⵏⴻⵙ.
ⴰⴷ ⵉⵜⵜⵡⴰⵜⴻⵃⵃⴰ ⵓⵊⴻⴵⵉⴷ ⵣⵉ ⵖⴰⵣⵣⴰ
ⵓ ⴷⵉ ⵜⴰⵏⴷⵉⵏⵜ ⵏ ⴰⵛⵇⴰⵍⵓⵏ
ⵡⴰⵔ ⴷⴰⵢⴻⵙ ⵜⵣⴻⴷⴷⴻⵖ ⵄⴰⴷ ⵓⵍⴰ ⴷ ⵉⵊⵊⴻⵏ.
6 ⵎⵎⵉⵙ ⵏ ⵍⴻⵃⵔⴰⵎ ⴰⴷ ⵉⵣⴷⴻⵖ ⴷⵉ ⴰⵛⴷⵓⴷ
ⵓ ⵏⴻⵛⵛ ⴰⴷ ⵜⴻⵃⵃⵉⵖ ⵏⵏⴼⴰⵅⴻⵜ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ. ◼9:6 ⴰⴷ ⵜⴻⵃⵃⵉⵖ-ⵙ ⵜⵄⵉⴱⵔⴰⵏⵉⵜ ‘ⴰⴷ ⵇⴻⴹⵄⴻⵖ’.
7 ⵏⴻⵛⵛ ⴰⴷ ⴽⵙⵉⵖ ⵉⴷⴰⵎⵎⴻⵏ ⵣⴻⴳ ⵓⵇⴻⵎⵎⵓⵎ ⵏⵏⴻⵙ
ⵓⵍⴰ ⴷ ⵏⵏⵄⴰⵡⴰⵜ ⵣⵉ ⵊⴰⵔ ⵜⵉⵖⵎⴰⵙ ⵏⵏⴻⵙ
ⵓ ⴰⵎⵎⵓ ⵉ ⵖⴰ ⵉⵇⵇⵉⵎ ⵓⵍⴰ ⴷ ⵏⴻⵜⵜⴰ
ⵉ ⴰⵔⴻⴱⴱⵉ ⵏⵏⴻⵖ.
ⵏⴻⵜⵜⴰ ⴰⴷ ⵢⵉⵍⵉ ⴰⵎ ⵢⵉⵊⵊ ⵏ ⵡⴻⵎⵖⴰⵔ ⴷⵉ ⵢⴰⵀⵓⴷⴰ
ⵓ ⵄⴰⵇⵔⵓⵏ ⴰⵎ ⵢⵉⵊⵊ ⵏ ⵓⵢⴰⴱⵓⵙⵉ.
8 ⵏⴻⵛⵛ ⴰⴷ ⴳⴳⴻⵖ ⵍⵎⴰⵔⴳⴻⵃ ⵉⵏⵓ
ⴷⴻⴳ ⵡⴻⵏⵏⴻⴹ ⵏ ⵜⴰⴷⴷⴰⵔⵜ ⵉⵏⵓ,
ⴹⵉⴷⴷ ⵏ ⵡⴻⵏⵏⵉ ⵉ ⵖⴰ ⵉⵥⵡⴰⵏ
ⵓ ⴹⵉⴷⴷ ⵏ ⵡⴻⵏⵏⵉ ⴷⴷ ⵖⴰ ⵉⴷⴻⵡⵍⴻⵏ,
ⵃⵉⵎⴰ ⵡⴻⵏⵏⵉ ⵉⵃⴻⵚⵚⴰⵔⴻⵏ
ⵡⴰⵔ ⵅⴰⵙ ⵉⵄⴻⴷⴷⵓ ⵛⴰ ⵄⴰⴷ,
ⵎⴰⵖⴰⵔ ⵍⴻⵅⵅⵓ ⵥⵍⵉⵖ ⵜ ⵙ ⵜⵉⵟⵟⴰⵡⵉⵏ ⵉⵏⵓ.”
ⴰⵊⴻⴵⵉⴷ ⵉ ⴷⴷ ⵖⴰ ⵢⴰⵙⴻⵏ ⵏ ⵙⵉⵃⵢⵓⵏ
9 “ⴼⴰⵔⵃ, ⴰ ⵢⴻⴵⵉⵙ ⵏ ⵚⵉⵀⵢⵓⵏ,
ⵙⵍⵉⵡⵍⴻⵡ, ⴰ ⵢⴻⴵⵉⵙ ⵏ ⵓⵔⵛⴰⵍⵉⵎ!
ⵅⵣⴰⵔ, ⴰⵊⴻⴵⵉⴷ ⵏⵏⴻⵎ ⵢⵓⵙⴰ-ⴷⴷ ⵖⴰⵔⴻⵎ,
ⵏⴻⵜⵜⴰ ⴷ ⴰⵎⵙⴻⴳⴳⴻⴷ
ⵓ ⴰⵇⴰ ⵢⴰⵔⴹ ⴰⵔⵔⵓⴹ ⵏ ⵓⵙⴻⵏⵊⴻⵎ,
ⵏⴻⵜⵜⴰ ⴷ ⴰⵎⵡⴰⴹⴻⵄ,
ⵉⵏⵢⴰ ⵅ ⵉⵊⵊ ⵏ ⵡⴻⵖⵢⵓⵍ,
ⵅ ⵉⵊⵊ ⵏ ⵡⴻⵣⵄⵓⵇ, ⴰⵙⵏⵓⵙ ⵏ ⵉⵛⵜ ⵏ ⵜⴻⵖⵢⵓⵍⵜ.
10 ⵏⴻⵛⵛ ⴰⴷ ⵇⴹⵉⵖ ⵉⴽⴰⵔⵔⵓⵜⴻⵏ ⵏ ⵓⵎⴻⵏⵖⵉ
ⵣⵉ ⵉⴼⵔⴰⵢⵉⵎ
ⵓⵍⴰ ⴷ ⵉⵢⵙⴰⵏ ⵣⵉ ⵓⵔⵛⴰⵍⵉⵎ.
ⴰⴷ ⵉⵜⵜⵡⴰⵇⵍⴻⵄ ⵓⵍⴰ ⴷ ⵍⵇⴻⵡⵙ ⵏ ⵓⵎⴻⵏⵖⵉ.
ⵏⴻⵜⵜⴰ ⴰⴷ ⵉⴱⴰⵔⵔⴻⵃ ⵙ ⵍⴻⵀⵏⴰ ⵉ ⵔⴻⴳⵏⵓⵙ
ⵓ ⵚⵚⵓⵍⵟⴰ ⵏⵏⴻⵙ ⴰⴷ ⵜⵉⵍⵉ
ⵣⵉ ⵍⴻⴱⵃⴰⵔ ⴰⵍ ⵍⴻⴱⵃⴰⵔ,
ⵣⴻⴳ ⵉⵖⵣⴰⵔ ⵏ ⵍⴼⵓⵔⴰⵟ
ⴰⵍ ⵉⵏⴻⴳⴳⵓⵔⴰ ⵏ ⵜⴻⵎⵎⵓⵔⵜ.”
11 “ⵡⴰⵀ ⵓⵍⴰ ⴷ ⵛⴻⵎ, ⴰ ⵢⴻⴵⵉⵙ ⵏ ⵚⵉⵀⵢⵓⵏ,
ⵣⵉ ⵙⵙⵉⴱⴱⴻⵜ ⵏ ⵉⴷⴰⵎⵎⴻⵏ ⵏ ⵍⵄⴰⵀⴷ ⵏⵏⴻⵎ
ⴼⴻⴽⴽⴻⵖ-ⴷⴷ ⵉⵎⴻⵃⴱⴰⵙ ⵏⵏⴻⵎ
ⵣⴻⴳ ⵡⴰⵏⵓ ⵢⵓⵥⵖⴻⵏ ⵉ ⵡⴰⵔ ⴷⵉ ⴵⵉⵏ ⵡⴰⵎⴰⵏ. ◘9:11 ⵎⵜ. 26:28; ⵍⴽ. 22:20; ⵔⵓⵎ. 9:3, 4; ⵔⵓⵎ. 11:25, 26, 27; 1 ⴽⵓⵔ. 11:25; ⵄⴱⵔ. 9:19, 20, 21.
12 ⵄⴻⵇⴱⴻⵎ ⵖⴰⵔ ⵍⴱⵓⵔⵊ ⵏⵡⴻⵎ,
ⴽⴻⵏⵏⵉⵡ ⵉⵎⴻⵃⴱⴰⵙ ⵉⵏⵏⵉ ⵖⴰⵔ ⵉⴵⴰ ⵍⴰⵢⴰⵙ.
ⵓⵍⴰ ⴷ ⴰⵙⵙ-ⴰ ⵏⴻⵛⵛ ⵜⵜⴱⴰⵔⵔⵃⴻⵖ:
ⴰⵇⴰ ⵏⴻⵛⵛ ⴰⴷ ⵖⴰⵔⴻⵎ ⴷⴷ-ⴰⵔⵔⴻⵖ
ⵜⵏⴰⵢⴻⵏ ⵏ ⵜⵙⴻⵇⵇⴰⵔ,
13 ⵎⴰⵖⴰⵔ ⵏⴻⵛⵛ ⴰⴷ ⵎⴻⵃⴹⴻⵖ ⵢⴰⵀⵓⴷⴰ
ⴰⵎ ⵉⵊⵊ ⵏ ⵍⵇⴻⵡⵙ
ⵓ ⴰⴷ ⴳⴳⴻⵖ ⵉⴼⵔⴰⵢⵉⵎ ⵅ ⵍⵇⴻⵡⵙ.
ⵏⴻⵛⵛ ⴰⴷ ⵙⵙⴻⴽⴽⴰⵔⴻⵖ
ⵉⵃⴻⵏⵊⵉⵔⴻⵏ ⵏⵏⴻⵎ, ⴰ ⵚⵉⵀⵢⵓⵏ,
ⴹⵉⴷⴷ ⵉ ⵉⵃⴻⵏⵊⵉⵔⴻⵏ ⵏⵏⴻⵛ, ⴰ ⵢⴰⵡⴰⵏ,
ⵓ ⵏⴻⵛⵛ ⴰⴷ ⵛⴻⴽ ⴰⵔⵔⴻⵖ
ⴰⵎ ⵙⵙⵉⴼ ⵏ ⵉⵊⵊ ⵏ ⴱⵓ-ⵜⴻⵖⵔⵓⴹⵜ.” ◼9:13 ⵢⴰⵡⴰⵏ-ⵉⵅⵙ ⴰⴷ ⵢⵉⵏⵉ ⵍⵢⵓⵏⴰⵏ ⵏ ⵥⵉⵛ.
14 “ⵙⵉⴷⵉ ⴰⴷ ⵉⴱⴰⵏ ⵙⴻⵏⵏⴻⵊ ⵏⵙⴻⵏ
ⵓ ⴼⵍⵉⵜⵛⴰⵜ ⵏⵏⴻⵙ ⴰⴷ ⵉⵍⵉⵏⵜ
ⵜⵜⵡⴻⵙⵙⴳⴻⵏⵜ ⴰⵎ ⵡⴰⵙⵙⴰⵎ
ⵓ ⵙⵉⴷⵉ ⵉⵏⵓ, ⵙⵉⴷⵉ,
ⴰⴷ ⵉⵙⵓⴹ ⴷⴻⴳ ⵓⵢⵉⵛⵛ ⵏ ⵉⵛⴰⵔⵔⵉ,
ⴰⴷ ⵢⵓⵢⵓⵔ ⴰⴽ-ⴷ ⵜⵃⴰⵔⵢⴰⴹⵉⵏ
ⵏ ⵓⵙⴻⵎⵎⵉⴹ ⵏ ⵍⵊⴰⵏⵓⴱ. ◘9:14 ⵏⵃⵎ. 2:6
15 ⵙⵉⴷⵉ ⵏ ⵍⵄⴻⵙⴽⴰⵔⴰⵜ ⴰⴷ ⵜⴻⵏ ⵉⵙⵙⴷⵓⵔⵉⵢ.
ⵏⵉⵜⵏⵉ ⴰⴷ ⵛⵛⴻⵏ,
ⴰⴷ ⴷⴷⵣⴻⵏ ⵉⵥⵔⴰ ⵏ ⵉⴵⵉⵢ ⵓⵛⴰ ⴰⴷ ⵙⵡⴻⵏ,
ⴰⴷ ⴳⴳⴻⵏ ⴷⴷⵔⵉⵣ ⴰⵎ ⵖⴰⵔ ⴱⵉⵏⵓ
ⵓ ⴰⴷ ⴷⴻⵡⵍⴻⵏ ⵛⵛⵓⵔⴻⵏ
ⴰⵎ ⵟⵟⴰⵡⵢⴰ ⵏ ⵓⵔⵓⵛⵛⵉ,
ⴰⵎ ⵜⵖⴻⵎⵎⴰⵔ ⵏ ⵓⵄⴰⵍⵟⴰⵔ.
16 ⵙⵉⴷⵉ, ⴰⵔⴻⴱⴱⵉ ⵏⵡⴻⵎ
ⴰⴷ ⵜⴻⵏ ⵉⵙⵙⴻⵏⵊⴻⵎ ⴷⴻⴳ ⵡⴰⵙⵙ ⵏⵏⵉ
ⴰⵎ ⵡⵓⴵⵉ ⵏ ⵍⴳⴻⵏⵙ ⵏⵏⴻⵙ,
ⵎⴰⵖⴰⵔ ⵏⵉⵜⵏⵉ ⴰⵎⴻⵛⵏⴰⵡ ⵉⵥⵔⴰ ⵉⵖⵍⴰⵏ
ⵅ ⵉⵊⵊ ⵏ ⵜⵜⴰⵊ ⵉⴳⴻⵍⵍⴷⴻⵏ
ⵉⵜⵜⵉⵙⵙⵉⵇⴻⵏ ⵅ ⵜⴻⵎⵎⵓⵔⵜ ⵏⵏⴻⵙ.
17 ⵎⴰⵖⴰⵔ ⵎⴻⵛⵀⴰⵍ ⵉⵎⵖⴰⵔ ⴰⴷ ⵢⵉⵍⵉ ⵍⵅⴰⵔ ⵏⵏⴻⵙ
ⵓ ⵎⴻⵛⵀⴰⵍ ⵉⵎⵖⴰⵔ ⴰⴷ ⵢⵉⵍⵉ ⵡⴰⵥⵍⵉ ⵏⵏⴻⵙ!
ⵉⵎⴻⵏⴷⵉ ⴰⴷ ⵉⵙⵙⴻⵖⵎⵉ ⵉⵃⵓⴷⵔⵉⵢⵢⴻⵏ
ⵓⵍⴰ ⴱⵉⵏⵓ ⵏ ⵊⴷⵉⴷ ⵜⵉⵄⵣⴰⵔⵉⵢⵢⵉⵏ.”
◼9:6 9:6 ⴰⴷ ⵜⴻⵃⵃⵉⵖ-ⵙ ⵜⵄⵉⴱⵔⴰⵏⵉⵜ ‘ⴰⴷ ⵇⴻⴹⵄⴻⵖ’.
◘9:11 9:11 ⵎⵜ. 26:28; ⵍⴽ. 22:20; ⵔⵓⵎ. 9:3, 4; ⵔⵓⵎ. 11:25, 26, 27; 1 ⴽⵓⵔ. 11:25; ⵄⴱⵔ. 9:19, 20, 21.
◼9:13 9:13 ⵢⴰⵡⴰⵏ-ⵉⵅⵙ ⴰⴷ ⵢⵉⵏⵉ ⵍⵢⵓⵏⴰⵏ ⵏ ⵥⵉⵛ.