2
ⴰⵡⴻⵟⵟⵓ ⵏ ⵏⵉⵏⵡⴰ
1 ⵅⵣⴰⵔ, ⵅ ⵉⴷⵓⵔⴰⵔ ⵜⵜⴰⵣⵣⵍⴻⵏ ⵉⴹⴰⵔⴻⵏ
ⵏ ⵡⴻⵏⵏⵉ ⴷⴷ-ⵢⵉⵡⵢⴻⵏ ⵍⴻⵅⴱⴰⵔ ⴰⵚⴻⴱⵃⴰⵏ,
ⵡⴻⵏⵏⵉ ⵉⵅⴻⴱⴱⴰⵔⴻⵏ ⵙ ⵍⴻⵀⵏⴰ.
ⵄⴻⵢⵢⴻⴷ ⵍⴻⵄⵢⵓⴷⴰⵜ ⵏⵏⴻⵛ, ⴰ ⵢⴰⵀⵓⴷⴰ,
ⵙⴻⵇⴼⴻⵍ ⵍⵡⵓⵄⵓⴷ ⵏⵏⴻⵛ,
ⵎⴰⵖⴰⵔ ⵡⴻⵏⵏⵉ ⵢⴰⵔⴻⴷⴷⴵⴻⵏ
ⵡⴰⵔ ⵉⵜⵜⵖⵉⵎⵉ ⵉⵥⴻⴽⴽⵡⵉ ⵅⴰⴽ ⵄⴰⴷ,
ⵏⴻⵜⵜⴰ ⵉⵏⵏⴻⵇⴹⴻⵄ ⵎⴰⵔⵔⴰ. ◘2:1 ⵉⵛⴰ. 52:7; ⵔⵓⵎ. 10:15
2 ⵉⵊⵊⴻⵏ ⵡⴻⵏⵏⵉ ⵢⵓⵥⵥⵍⴻⵏ ⵅ ⵉⵡⴷⴰⵏ ⵙ ⵍⵄⵓⵏⴼ
ⵉ ⴷⴷ-ⵉⴳⴻⵄⵄⴻⴷ ⵅⴰⴽ!
ⵄⴻⵙⵙ ⵅ ⵍⴱⵓⵔⵊ, ⵃⴹⴰ ⴰⴱⵔⵉⴷ,
ⵙⴻⵎⵃⴻⴹ ⵜⵉⵊⵄⵉⵏⵏⴰ ⵏⵏⴻⵛ,
ⴰⵔⵏⵉ ⴷⵉ ⵊⵊⵀⴻⴷ ⵏⵏⴻⵛ!
3 ⵙ ⵎⵉⵏⵣⵉ ⵙⵉⴷⵉ ⴰⴷ ⴷⴷ-ⵢⴰⵔⵔ
ⵍⵄⴻⵣⵣ ⵏ ⵢⴰⵄⵇⵓⴱ,
ⴰⵇⴰ-ⵜ ⴷ ⵍⵄⴻⵣⵣ ⵏ ⵉⵙⵔⴰⵉⵍ.
ⵎⴰⵖⴰⵔ ⵉⴽⴻⵛⵛⴰⴹⴻⵏ ⴽⴻⵛⵛⴹⴻⵏ ⵜⴻⵏ,
ⵓ ⵏⵉⵜⵏⵉ ⵖⴻⴹⵍⴻⵏ ⵜⵉⵣⴻⵔⵎⵉⵏ ⵏⵙⴻⵏ. ◘2:3 ⵉⵥⵀⴷ. 80:13; ⵉⵛⴰ. 10:12
4 ⵜⵛⴰⴱⴱⴰⵜ ⵏ ⵓⵙⴻⵍⵇⵉ
ⵏ ⴰⵢⵜ ⵏ ⴱⵓ-ⵜⴻⵖⵔⵓⴹⵜ ⵣⴻⵡⵖⴻⵏⵜ,
ⵉⵔⵢⴰⵣⴻⵏ ⵉⵎⴻⵃⴹⴻⵏ ⴱⴻⴷⴷⴻⵏ
ⵙⵙⵡⴻⵊⴷⴻⵏ ⵉ ⵓⵎⴻⵏⵖⵉ
ⵙ ⵡⴰⵔⵔⵓⴹ ⴰⵣⴻⴳⴳⵯⴰⵖ ⵉⵃⴻⴷⵇⴻⵏ,
ⵖⴰⵔ ⵜⴻⵙⵙⵉⵇⵜ ⵏ ⵜⵎⴻⵙⵙⵉ ⵏ ⵡⵓⵣⵣⴰⵍ
ⵏ ⵉⴽⴰⵔⵔⵓⵜⴻⵏ ⵏ ⵓⵎⴻⵏⵖⵉ,
ⴷⴻⴳ ⵡⴰⵙⵙ ⵉ ⴷⵉ ⵉ ⵖⴰ ⵉⵙⵙⴻⵡⵊⴻⴷ ⵉⵅⴻⴼ ⵏⵏⴻⵙ
ⵓ ⵜⵉⵛⴻⵊⵊⵓⵔⴰ ⵏ ⵓⵎⴻⵔⵣⵉ ⴰⴷ ⵏⵏⵀⴻⵣⵣⴻⵏ. ◼2:4 ⴰⵎⴻⵔⵥⵉ-ⵏⵉⵖ ‘ⴰⵎⴻⴹⵥⵉ’.
5 ⵉⴽⴰⵔⵔⵓⵜⴻⵏ ⵏ ⵓⵎⴻⵏⵖⵉ ⵀⴰⵊⴻⵏ ⴷⴻⴳ ⵉⴱⵔⵉⴷⴻⵏ,
ⴰⵇⴰ ⵥⵥⴻⵄⵡⴰⴹⴻⵏ ⵣⵉ ⵙⵙⴰ ⵖⴰⵔ ⴷⴰ
ⴷⴻⴳ ⵡⴰⵣⵣⴰⵢⴻⵏ,
ⵜⵜⵡⴰⴹⵀⴰⵔⴻⵏ ⴰⵎ ⵢⵉⵚⴻⴼⴹⴰⵡⴻⵏ,
ⵏⵉⵜⵏⵉ ⴳⴻⵎⵎⴰⵔⴻⵏ ⴷⴰ ⴷ ⴷⵉⵀⴰ ⴰⵎ ⵡⴰⵙⵙⴰⵎⴻⵏ.
6 ⵏⴻⵜⵜⴰ ⵉⵜⵜⵅⴰⵔⵔⴻⵚ ⴷⴻⴳ ⴰⵢⵜ ⵏ ⵊⵊⴻⵀⴷ,
ⵏⵉⵜⵏⵉ ⵎⴰⵛⴰ ⵜⵜⵏⴻⵇⵔⴰⴹⴻⵏ ⴰⵎ ⴳⴳⵓⵔⴻⵏ
ⵏⵉⵜⵏⵉ ⵜⵜⴰⵣⵣⵍⴻⵏ ⵖⴰⵔ ⵍⵃⵉⴹ ⵏⵙⴻⵏ,
ⵎⴰⵏⵉ ⵉⴱⴻⴷⴷ ⵙⵙⵇⴻⴼ ⵏ ⵓⵀⵊⴰⵎ ⵉⵡⵊⴻⴷ.
7 ⵜⵉⵡⵡⵓⵔⴰ ⵏ ⵉⵖⴻⵣⵔⴰⵏ ⵏⵏⵓⵔⴻⵣⵎⴻⵏⵜ,
ⵓ ⵍⴻⵇⵚⴰⵔ ⴰⴷ ⵉⴼⵙⵉ.
8 ⴰⵇⴰ ⵜⴰⵎⴻⵙⵍⴰⵛⵜ ⵜⴱⴻⴷⴷ ⵏⵉⵛⴰⵏ!
ⵏⴻⵜⵜⴰⵜ ⴰⴷ ⵜᵉⵜⵜⵡⴰⵄⴰⵔⵔⴰ,
ⴰⴷ ⵜᵉⵜⵜⵡⴰⵙⵙⴳⴻⵄⵄⴻⴷ,
ⵓ ⵜⵉⵢⵢⴰ ⵏⵏⴻⵙ ⵙⵖⵓⵢⵢⵓⵏⵜ
ⴰⵎⴻⵛⵏⴰⵡ ⴰⴱⴰⵔⵔⵉ ⵏ ⵜⴻⴷⴱⵉⵔⵉⵏ,
ⴰⵎ ⵛⵛⴰⵜⴻⵏⵜ ⴷⴻⴳ ⵉⴷⵎⴰⵔⴻⵏ ⵏⵙⴻⵏⵜ. ◼2:8 ⴷⴻⴳ ⵉⴷⵎⴰⵔⴻⵏ ⵏⵙⴻⵏⵜ-ⵙ ⵜⵄⵉⴱⵔⴰⵏⵉⵜ ‘ⴷⴻⴳ ⵡⵓⵍⴰⵡⴻⵏ ⵏⵙⴻⵏⵜ’.
9 ⵏⵉⵏⵡⴰ ⴰⵎ ⵢⵉⵊⵊ ⵏ ⵓⵢⴻⵍⵎⴰⵎ ⵏ ⵡⴰⵎⴰⵏ
ⵣⴻⴳ ⵡⴰⵙⵙ ⵉ ⴷⵉ ⵉⴵⴰ.
ⵍⴻⵅⵅⵓ ⵎⴰⵛⴰ ⴰⵔⴻⴽⴽⵡⴻⵍⴻⵏ ⵏⵉⵜⵏⵉ.
ⴱⴻⴷⴷⴻⵎ! ⴱⴻⴷⴷⴻⵎ!, ⵜⵜⵍⴰⵖⴰⵏ ⵏⵉⵜⵏⵉ,
ⵎⴰⵛⴰ ⵓⵍⴰ ⴷ ⵉⵊⵊ ⵡⴰⵔ ⴷⴷ-ⵉⵜⵜⵏⴻⵇⵍⵉⴱ.
10 ⴽⴻⵛⵛⴹⴻⵎ ⵏⵏⵓⵇⴰⵔⵜ, ⴽⴻⵛⵛⴹⴻⵎ ⵓⵔⴻⵖ!
ⵡⴰⵔ ⴷⵉⵏ ⵇⴻⵟⵟⵓ ⵉ ⵍⴻⴽⵏⵓⵣ,
ⵖⴰⵔ ⵓⵛⴻⵡⵡⴰⵔ ⵏ ⵄⵍⴰⵎ ⴽⵓⵍ ⵍⴻⵇⵛⵓⵄ.
11 ⵜⴻⵅⵡⴰ, ⵜᵉⵜⵜⵡⴰⴽⴻⵛⵛⴻⴹ
ⵓ ⵜᵉⵜⵜⵡⴰⵔⴻⴷⴷⴻⴵ ⵏⴻⵜⵜⴰⵜ,
ⵓⵍ ⵉⴼⵙⵉ ⵓⵛⴰ ⵉⴼⴰⴷⴷⴻⵏ ⴼⴻⵛⵍⴻⵏ,
ⵜⵜⴻⴽⴽⵙⴻⵏⵜ ⴰⵙ ⵜⵉⵊⵄⵉⵏⵏⴰ ⵎⴰⵔⵔⴰ
ⵓ ⵉⵖⴻⵎⴱⴰⴱ ⵏⵙⴻⵏ ⵡⴰⵔⵖⴻⵏ ⵎⴰⵔⵔⴰ. ◘2:11 ⴰⵄⵡⴷ. 1:28; 20:8; ⵢⴰⵛ. 2:11; 5:1; 7:5; ⵉⵛⴰ. 13:8, 7; 21:3; ⵃⵉⵥ. 21:12
12 ⵎⴰⵏⵉ ⵉⴵⴰ ⵍⴻⵅⵅⵓ ⵍⵎⴰⵔⴳⴻⵃ ⵏ ⵡⴰⵢⵔⴰⴷⴻⵏ,
ⴷ ⵍⵎⴻⴷⵡⴻⵍ ⵏ ⵡⴰⵢⵔⴰⴷⴻⵏ ⵉⵎⴻⵥⵢⴰⵏⴻⵏ,
ⵎⴰⵏⵉ ⵢⵓⵢⵓⵔ ⵡⴻⵢⵔⴰⴷ,
ⴰⵇⴰ-ⵜⵜ ⴷ ⵜⴰⵢⵔⴰⴷⵜ ⴰⴽ-ⴷ ⵡⴻⵢⵔⴰⴷ ⴰⵎⴻⵥⵢⴰⵏ
ⴰⵎ ⵓⵍⴰ ⴷ ⵉⵊⵊ ⵉⵙⵙⵏⴻⵅⵍⴻⵄ ⵉ-ⵜⴻⵏ?
13 ⵎⴰⵏⵉ ⵉⴵⴰ ⵍⴻⵅⵅⵓ ⵡⴰⵢⵔⴰⴷ ⵏⵏⵉ ⵉⵎⴻⵣⵣⵇⴻⵏ
ⵎⵉⵏ ⵃⴷⴰⵊⴻⵏ ⵜⴰⵔⵡⴰ ⵏⵏⴻⵙ
ⵓ ⵉⵊⴻⵢⵢⴻⴼ ⵉ ⵜⴰⵢⵔⴰⴷⵉⵏ ⵏⵏⴻⵙ,
ⴷ ⵡⴻⵏⵏⵉ ⵉⵛⵛⵓⵔⴻⵏ ⵉⴼⵔⴰⵏ ⵏⵏⴻⵙ ⵙ ⵓⴽⴻⵛⵛⴻⴹ,
ⴷ ⵉⵎⵓⵛⴰⵏ ⵏⵏⴻⵙ ⵏ ⵓⴷⵓⵔⵔⵉ
ⵣⵉ ⵎⵉⵏ ⵉⵜⵜⵡⴰⵛⴰⵔⵔⴳⴻⵏ?
14 ⵅⵣⴰⵔ, ⵏⴻⵛⵛ ⴰⴷ ⵉⵍⵉⵖ ⵅⴰⴽ,
ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ,
ⵏⴻⵛⵛ ⴰⴷ ⴰⵔⵔⴻⵖ ⵉⴽⴰⵔⵔⵓⵜⴻⵏ ⵏⵏⴻⵛ ⴷ ⴷⴷⴻⵅⵅⴰⵏ.
ⴰⴷ ⵛⵛⴻⵖ ⵙⵙⵉⴼ ⵉⵢⵔⴰⴷⴻⵏ ⵏⵏⴻⵛ ⵉⵎⴻⵥⵢⴰⵏⴻⵏ,
ⵓ ⵏⴻⵛⵛ ⴰⴷ ⵇⴻⴹⵄⴻⵖ ⵜⴰⴽⴻⵛⵛⴰⴹⵜ ⵏⵏⴻⵛ
ⵣⵉ ⵜⴻⵎⵎⵓⵔⵜ
ⵓ ⵄⴻⵎⵎⴰⵔⵚ ⵄⴰⴷ ⴰⴷ ⵜᵉⵜⵜⵡⴰⵙⴻⵍ
ⵜⵎⵉⵊⵊⴰ ⵏ ⵉⵔⴻⵇⵇⴰⵙⴻⵏ ⵏⵏⴻⵛ. ◼2:14 ⵜⵎⵉⵊⵊⴰ ⵏ ⵉⵔⴻⵇⵇⴰⵙⴻⵏ ⵏⵏⴻⵛ-ⵅⵥⴰⵔ ⵉⵛⴰ. 36:13, 37:9.
◘2:1 2:1 ⵉⵛⴰ. 52:7; ⵔⵓⵎ. 10:15
◘2:3 2:3 ⵉⵥⵀⴷ. 80:13; ⵉⵛⴰ. 10:12
◼2:4 2:4 ⴰⵎⴻⵔⵥⵉ-ⵏⵉⵖ ‘ⴰⵎⴻⴹⵥⵉ’.
◼2:8 2:8 ⴷⴻⴳ ⵉⴷⵎⴰⵔⴻⵏ ⵏⵙⴻⵏⵜ-ⵙ ⵜⵄⵉⴱⵔⴰⵏⵉⵜ ‘ⴷⴻⴳ ⵡⵓⵍⴰⵡⴻⵏ ⵏⵙⴻⵏⵜ’.
◘2:11 2:11 ⴰⵄⵡⴷ. 1:28; 20:8; ⵢⴰⵛ. 2:11; 5:1; 7:5; ⵉⵛⴰ. 13:8, 7; 21:3; ⵃⵉⵥ. 21:12
◼2:14 2:14 ⵜⵎⵉⵊⵊⴰ ⵏ ⵉⵔⴻⵇⵇⴰⵙⴻⵏ ⵏⵏⴻⵛ-ⵅⵥⴰⵔ ⵉⵛⴰ. 36:13, 37:9.